Part 1

Total Number of Verses: 7

1

Sii ko ngaran o Allah, a Masalinggagaw, a Makalimoon.

2

So bantogan na rk o Allah, a Kadnan o manga kaadn;

3

A Masalinggagaw, a Makalimoon;

4

A Phapaar ko alongan a kapamalas.

5

Ska bo i phzoasoatn ami, go Ska bo i phangnian ami sa tabang.

6

Nggonanaowa kaming Ka ko okit a makaoontol,

7

So okit o siran a inikalimoo Ka siran, salakaw ko kiyararangitan Ka siran, go salakaw ko mithataridadag.

Total Number of Verses: 286

1

Alif, Lam, Mim. (so Allah i Matao ko paka-aantapan Iyan on)

2

Katii so kitab; a da a sangka a madadalm on, a toroan ko khipanananggila;

3

A siran na paparatiyayaan iran so da mapayag, go ipphamayandg iran so sambayang, go so sabaad ko inibgay Ami kiran na ipphammgay iran;

4

Go siran na paparatiyayaan iran so (kitab a) initoron rka (ya Mohammad), go so initoron ko miyaonaan ka, go so akhirat na siran na tatangkdn iran.

5

Siran man i thatakna ko toroan, a phoon ko Kadnan iran, go siran man i phamakaslang sa maliwanag.

6

Mataan! a so siran a da pamaratiyaya, na mlagid kiran o piyakaiktiyar ka siran antawaa dang ka siran pakaiktiyara; ka di siran bo pharatiyaya.

7

Tiyotopan o Allah so manga poso iran go so kan'g iran, na kiyatagoan so manga kaylay iran sa pils; go adn a bagian iran a siksa a lbi a mala.

8

Na adn a pd ko manga manosiya a taw a gii tharo sa: "Piyaratiyaya mi so Allah ago so alongan a mawri;" a kna a ba siran mapaparatiyaya.

9

Plimpangn iran so Allah go so miyamaratiyaya; na da a pkhalimpang iran a rowar ko manga ginawa iran, sa di iran maiin'ngka!

10

Katatagoan so manga poso iran sa gdamn; na inomanan siran o Allah sa gdamn. Go adn a bagian iran a siksa a malipds, sabap ko kiyapamokhag iran.

11

Go amay ka pitharo kiran a "Di kano phaminasa ko lopa," na tharoon iran a: "Skami na giyabo a kapphangompiya mi!"

12

Tanodan, ka mataan! a siran i pphamaminasa, na ogaid na di iran maiin'ngka.

13

Go amay ka pitharo kiran a: "Paratiyaya kano sa lagid o kiyaparatiyaya o (sabaad ko) manga manosiya:" na tharoon iran a: "Ino kami pharatiyaya sa lagid o kiyaparatiyaya o manga lalong!" – tanodan, ka mataan! a siran i manga lalong, na ogaid na di iran katawan.

14

Go igira a minithoona iran so miyamaratiyaya, na tharoon iran a: "Miyaratiyaya kami;" na igira a miyakandod siran ko manga olowan iran, na tharoon iran a: "Mataan! a skami na pd iyo. Go aya bo oto a kowan na giya di kiran kapagizawizawa."

15

So Allah i mbadal kiran ko di iran kapagizawizawa ko miyamaratiyaya, go tataalikn Iyan kiran ko gi iran kandarowaka; a gii siran mromparompak.

16

Siran man so inipamasa iran ko kadadag so toroan: Na da makalaba so kiyandagang iran, go da siran makakdg sa ontol,

17

Aya ropaan iran na lagid o miniyag sa apoy; na kagiya a kasindawan iyan so mliliyota on, na piyadng o Allah so sindaw kiran go inibagak Iyan siran ko manga lilibotng. Na di siran phakaylay.

18

(Siran) Na manga bngl, manga omaw, manga bota; na siran na di siran dn phakandod.

19

Odi na lagid o miyasogat a mabagr a oran a phoon ko kawang a kadadalman sa manga lilibotng, go dalndg, go kilat: Pkhioln iran so manga tindoro iran ko manga tangila iran phoon ko manga parti, ka kalk iran ko kapatay. Na so Allah na katatangkalan Iyan so da pamaratiyaya!

20

Maytobo na so kilat na masinggaot iyan so manga kaylay iran; oman iyan siran kasindawan, na makalalakaw siran on, na igira a mikhnm kiran, na makathangn siran. Na o kabaya o Allah, na mataan! a khaylang Iyan so kan'g iran go so manga kaylay iran; ka mataan! a so Allah na sii ko langowan taman na Gaos Iyan

21

Hay manga manosiya, zoasoata niyo so Kadnan iyo, a so miyadn rkano ago so miyangaoona an iyo, ka ang kano makapanananggila;

22

So inadn Iyan rkano so lopa a miyakayat, go so langit a atp; ago piyakatoron Iyan a phoon ko kawang so ig; na inisabap Iyan on a kiyapakagmawa Niyan ko manga onga a pagpr rkano; na di kano phangmbaal sa manga saginda o Allah a skano na katawan iyo (a da a saginda Niyan).

23

Na oba kano zasangka ko (Qor'an a) initoron Ami ko oripn Ami, na mbaas kano sa sorah a lagid iyan; go tawaga niyo so manga katohanan iyo (a mamakatabang rkano) a salakaw ko Allah, amay ka skano i manga bnar.

24

Na amay ka di niyo manggolawla, go di niyo dn mapnggolawla na pananggilai niyo so apoy a aya itagon iyan na so manga manosiya ago so manga ator! - a inithiyakap ko di phamaratiyaya.

25

Na pphamanotholang ka ko siran a miyamaratiyaya, go pinggalbk iran so manga pipiya a: Mataan! a adn a bagian iran a manga sorga, a pphamangondas ko kababaan iyan so manga lawasayg. Oman siran roo natan sa onga a pagpr, na tharoon iran a: "Giyai so (lagid o) in'nat rktano a miyaona," na phagowitn kiran oto a makapzasagindai: Go adn a bagian iran roo a manga karoma a manga soti; sa ron siran on dn makakakal.

26

Mataan! a so Allah na di Niyan phakamawagn so kambaal sa ibarat, apiya rngit go so lawan on. Na so pman so siran a miyamaratiyaya na katawan iran a mataan! a skaniyan so bnar a phoon ko Kadnan iran; na so pman so da pamaratiyaya na gi iran tharoon a: "Antonaa i aantapan o Allah sangkai a ibarat?" Madakl a pndadagn Iyan sa sabap saya, go madakl a pthoroon Iyan sa sabap saya; na da a ndadagn Iyan sa sabap saya, a rowar ko manga songklid,

27

Siran na pphamarngkasn iran so diyandi o Allah ko oriyan o kiyailot iyan, go pphanphdn iran so inisogo o Allah a kapakakhakamptaa on, go pphaminasa siran ko lopa: Na siran man na siran so manga logi.

28

Andamanaya i di niyo kapharatiyayaa ko Allah? - A aya btad iyo na maatay, na inoyag kano Niyan; oriyan iyan na mbono on kano Niyan, na oriyan iyan na pagoyagn kano Niyan (ko akhirat); oriyan iyan na Ron kano bo phakandoda.

29

Skaniyan so inadn Iyan a rk iyo so madadalm ko lopa langon; oriyan iyan na siyangor Iyan so langit, na pithaong Iyan siran phiyapiya a pito a manga langit; go Skaniyan na so langowan taman na katawan Iyan.

30

Na gowani, na pitharo o Kadnan ka ko manga malaikat a: "Mataan! a Sakn na magmbaal Ako sii ko lopa sa khalifa." Na pitharo iran a: "Ino Ka on pagmbaal sa taw a phaminasa on go phamakaragiray ron ko manga rogo? - a skami na ipthasbik ami so poding Ka, go pzotin ami Ska?" Pitharo Iyan a: "Mataan! a Sakn na katawan Ko so di niyo katawan."

31

Na inindao Niyan ko Adam so manga ngaran langon; oriyan iyan na siyandig Iyan siran ko manga malaikat, na pitharo Iyan a: "Panothola niyo Rakn so manga ngaran nai oba skano i manga bnar."

32

Pitharo iran a: "Soti Ka, da a katao ami, a rowar ko inindaong Ka rkami. Mataan! a Ska bo i Matao a Mawngangn."

33

Pitharo (o Allah): "Hay Adam, panotholang ka kiran so manga ngaran iran. "Na kagiya a mapanothol iyan kiran so manga ngaran iran, na pitharo (o Allah): "Ba Ko rkano da tharoa a mataan! a katawan Ko so mapag-uma ko manga langit ago so lopa, go katawan Ko so papayagn iyo go so pag-umaan niyo?"

34

Na gowani, na pitharo Ami ko manga malaikat a: "Pangalimbabaan kano ko Adam." Na miyangalimbabaan siran, inonta so iblis: Ka somiyangka, go mimaratabat: Na miyapd ko da pamaratiyaya.

35

Go pitharo Ami a: "Hay Adam, babaling ka, ska ago si karomang ka ko sorga; go kang kano ron sa kapangondaya sa sadn sa kabaya iyo; go di kano pagobay sangkai a kayo, ka mbaloy kano a pd ko da pamaginontolan."

36

Na miyapokas siran roo o shaytan, go miyapakaawa iyan siran ko btad iran. Na pitharo Ami a: "Tpad kano, sa so sabaad rkano na ridoay o sabaad. Go adn a bagian iyo ko lopa a kapthaknaan go kawiyagan, taman ko masa (o kapatay)."

37

Na adn a miyasowa o Adam a phoon ko Kadnan iyan a manga katharo, na piyakatawbat Iyan skaniyan; ka mataan! a Skaniyan so Pphanarima ko tawbat, a Makalimoon.

38

Pitharo Ami a: "Tpad kano phoon ko sorga langon; na amay ka adn a makatalingoma rkano a phoon Rakn a toroan, na sadn sa monot ko toroan Ko, na da a pangandam iran, go di siran makamboko (ko alongan a mawri)."

39

"Na so siran a da pamaratiyaya, go piyakambokhag iran so manga ayat Ami, na siran man i manga taw ko naraka; sa ron siran on dn makakakal."

40

Hay manga moriyataw o Israil, tatadmi niyo so limo Akn a so inipangalimo Akn rkano, go tomana niyo so diyandi Akn rkano ka tomann Ko so diyandi rkano, go Sakn bo i kalkn iyo.

41

Go paratiyayaa niyo so (Qor'an a) initoron Akn a tomiyanto ko matatangan iyo, go di skano i paganay a di ron pharatiyaya, go di niyo phamasaan so manga ayat Akn sa arga a mayto; go Sakn bo i kalkn iyo.

42

Go di niyo khmbotn ko bnar so ribat, go di niyo phagmaa so bnar a skano na katawan iyo.

43

Go pamayandgn iyo so sambayang; go tonaya niyo so zakat; go roko kano a pd ko pphroroko.

44

Ino niyo pzogo on ko manga manosiya so mapiya, na pakalilipatan iyo so manga ginawa niyo, a skano na kapphangadian iyo so kitab? Ba da a manga sabot iyo?

45

Na pangni kano sa tabang sa nggolalan ko kaphantang ago so kazambayang: Na mataan aya! a titho a margn, inonta bo ko khipangangalimbabaan (ko Allah),

46

A siran na tatangkdn iran a mataan! a siran na mipthoona iran so Kadnan iran, go mataan! a siran na Ron siran phamakandod.

47

Hay manga moriyataw o Israil, tadmi niyo so limo Akn a so inipangalimo Akn rkano, go mataan! a Sakn na inilbi Ko skano ko manga kaadn (ko miyaona a masa).

48

Go kalkn iyo so gawii a da a khiyogop o isa ginawa ko isa ginawa a mayto bo go da a khatarima on a safaat, go da a khakowa on a sambi, go di siran khatabangan.

49

Na gowani na siyabt Ami skano ko pagtaw o Pir'awn a irarasay iran rkano so marata a siksa, ka pphanombaliin iran so manga wata iyo a manga mama na phlambaan iran so manga babay rkano; na adn a matatago roo man a tiyoba a phoon ko Kadnan iyo a Lbi-a-mala.

50

Na gowani na siray Ami rkano so kalodan na siyabt Ami skano na inld Ami so pagtaw o Pir'awn a skano na kababantayan iyo.

51

Go gowani na miyakiphasada Kami ko Mosa sa pat polo gawii, oriyan iyan na kinowa niyo so sapi (a katohanan) ko oriyan iyan, na skano na miyakanggolawla kano sa di ontol.

52

Oriyan iyan na pimaapan Ami skano ko oriyan oto; ka ang kano makapanalamat.

53

Na gowani na inibgay Ami ko Mosa so kitab, go so padoman: Ka ang kano mamakaontol.

54

Go gowani na pitharo o Mosa ko pagtaw niyan a: "Hay pagtaw akn, mataan! a skano na miyabinasa niyo so manga ginawa niyo sa kiyakowaa niyo ko sapi (a katohanan): Na thawbat kano ko miyadn rkano, sa bonoa o da makazala so miyakazala rkano; giyoto man i mapiya rkano sii ko Kadnan iyo." Na piyakatawbat kano Niyan: Ka mataan! a Skaniyan so Pphanarima ko tawbat, a Makalimoon.

55

Go gowani na pitharo iyo a: "Hay Mosa, di ami ska dn pharatiyayaan taman sa di ami maylay so Allah a mapayag," na piyolang kano o parti a skano na kababantayan iyo.

56

Oriyan iyan na inoyag Ami skano ko oriyan o kiyapatay niyo: Ka ang kano makapanalamat.

57

Go inipayong Ami rkano so gabon go piyakatoron Ami rkano so Manna, go so (papanok a) Salwa, (sa pitharo Ami a:) "Kang kano ko manga pipiya a inipagpr Ami rkano:" Na da Kami ran kabinasai, na ogaid na so manga ginawa iran i kiyabinasaan iran.

58

Go gowani na pitharo Ami a: "Sold kano sangkai a ingd (a Baytal Moqaddas), na kang kano ron sa sadn sa kabaya iyo sa kapangondaya; go sold kano ko pinto sa pangangalimbabaan kano, go tharo kano sa phakaponas sa dosa, ka napin Ami rkano so manga kasalaan iyo go omanan Ami (sa balas) so miphipiyapiya."

59

Na siyambian o siran a da pamaginontolan sa katharo a salakaw ko pitharo kiran; na piyakatoronan Ami so siran a da pamaginontolan sa siksa a phoon ko langit, sabap ko kiyapanongklid iran.

60

Na gowani na inipangni sa inomn o Mosa so pagtaw niyan; na pitharo Ami a: "Bntoln ka so badas ka ko ator (na inibntol iyan on)." Na miyakambowat on so sapolo ago dowa a bowalan. Na sabnar a kiyatokawan o oman i isa ka sagorompong so sagba iran. (go pitharo Ami:) kang kano go inom kano ko pagpr o Allah, go di kano phangalandada ko lopa a pphamakakayd kano.

61

Na gowani na pitharo iyo a: "Hay Mosa, di ami dn khitigr so pangn'ngkn a sasa-soson; na pangniyang ka rkami ko Kadnan ka a pakagmawan kami Niyan sa pd ko pphakathoon o lopa, a llthaan on, go sikowa on, go lasona on, go kodalis on, go tiboyas on." Pitharo (o Mosa): "Ino niyo pzambia ko korang so mapiya? Tana kano sa bandar a ingd, ka mataan! a khakowa niyo so piyangni niyo." Na miyaadn kiran so kahinaan go so kapakarondan; go miyakakholokog siran sa rarangit a phoon ko Allah. Giyoto man na sabap sa mataan! a siran na da iran paratiyayaa so manga ayat o Allah go pphamonoon iran so manga nabi sa di ontol. Giyoto man na sabap ko kiyandarowaka iran go so kiyapmalawani iran.

62

Mataan! a so siran a miyamaratiyaya, go siran a manga Yahodi, go so manga Kristiyan, go so manga Sabiin, - na sadn sa maratiyaya on ko Allah go so alongan a mawri, go nggalbk sa mapiya, na adn a bagian iyan a balas kiran sii ko Kadnan iran: Go da a pangandam iran, go di siran makamboko (ko alongan a mawri).

63

Na gowani na tiyarima Ami so diyandi iyo ko kiniporoon Ami ko kaporoan iyo ko palaw: (go pitharo Ami) "Kpiti niyo so inibgay Ami rkano zabnsabnar go tatadmi niyo so madadalm on: ka an kano makapanananggila."

64

Oriyan iyan na tomiyalikhod kano ko oriyan oto: Na o da so gagaw rkano o Allah go so limo Iyan, na miyabaloy kano dn a pd ko miyangalologi.

65

Na sabnsabnar a kiyatokawan iyo so mimamalawani rkano sii ko alongan a Sapto: Na pitharo Ami kiran a: "Mbaloy kano a manga amo, a miyamakadapanas."

66

Na biyaloy Ami skaniyan a poringana ko masa niyan go so oriyan iyan, go thoma ko khipanananggila.

67

Na gowani na pitharo o Mosa ko pagtaw niyan a: "Mataan! a so Allah na isosogo Iyan rkano a kasombali iyo sa sapi." Na pitharo iran a: "Ino kaming ka khowaa kasablawan?" Pitharo iyan a: "Mlindong ako ko Allah oba ako maadn a pd ko da a manga mlng iyan!"

68

Pitharo iran a: "Pangniang ka rkami ko Kadnan ka a payagn Iyan rkami o antona onon (a sapi)." Pitharo iyan a: "Mataan! a so Allah na ptharoon Iyan a: Mataan! a skaniyan na sapi a di matoa, go di mangoda, katatangkaan ko pagltan oto: Na nggolawlaa niyo so isosogo rkano!"

69

Pitharo iran a: "Pangniang ka rkami ko Kadnan ka a payagn Iyan rkami o antonaa i warna niyan." Pitharo (o Mosa): "Mataan a so Allah na ptharoon Iyan a: Mataan! a skaniyan na sapi a binaning, a maloto so warna niyan, a phakabimban ko phphamakaylay ron!"

70

Pitharo iran a: "Pangniang ka rkami ko Kadnan ka a payagn Iyan rkami o antona onon a sapi: Ka mataan! a so manga sapi na miyakaplilingowa rkami: Na mataan! a skami na omiyog so Allah, na matoon ami dn."

71

Pitharo (o Mosa): "Mataan! a so Allah na ptharoon Iyan a: Mataan! a skaniyan na sapi a da marasay sa ba pndado ko lopa, go di iphamakayg ko manga pangomaan; da a paawing iyan, da a palang iyan." Pitharo iran a: "Imanto na minitalingomang ka so bnar." Na siyombali iran oto, go mayto bo na di iran mapnggolawla.

72

Na gowani ko mamono so isa rkano sa taw na iniszndla iyo to: Na so Allah i miyayag ko pag-umaan iyo.

73

Na pitharo Ami a: "Papsn iyo ron so sabaad on (ko sapi)". Lagid man oto a kapagoyaga o Allah ko miyamatay go pphakiilay Niyan rkano so manga tanda Iyan: ka an iyo gii manggdagda.

74

Oriyan iyan na mithgas so manga poso iyo ko oriyan oto: Na skaniyan na lagid o ator odi na lawan on sa katgas. Ka mataan! a so sabaad ko ator na sabnar a so pphakambowat on so manga lawasayg; go mataan! a so sabaad on na sabnar a so pkhabngkag na pphakagmaw ron so ig: Go mataan! a so sabaad on na sabnar a so pkhawlog sa phoon ko kalk ko Allah. Na kna a ba kalilipati o Allah so gii niyo nggolawlaan.

75

Ati iinamn iyo a kaparatiyayaa iran rkano? - A sabnar a adn a salompok kiran a pphamakin'gn iran so katharo o Allah, na oriyan iyan na pphamagalinn iran ko oriyan o kiyasabota iran on a siran na katawan iran.

76

Go igira a minithoona iran so miyamaratiyaya, na tharoon iran a: "Miyaratiyaya kami." Na igira a miyakandod so sabaad kiran ko sabaad, na tharoon iran a: "Ino niyo kiran pphanonotholana so piyakitokawan rkano o Allah, a khikarina iran rkano to sii ko Kadnan niyo?" – ba daa manga sabot iyo?

77

Ba iran di katawi a mataan! a so Allah na katawan Iyan so isosoln iran go so papayagn iran?

78

Na adn a pd kiran a manga Ommi, a da a katawan iran ko kitab, a rowar ko manga siyarangkoni, go da (a katawan iran) inonta na pphagantangan siran.

79

Na so sangat a siksa na bagian o siran a ipphanorat iran ko kitab so manga lima iran, (a di iran mbabaasn), oriyan iyan na gi iran tharoon a: "Giyai na phoon ko Allah," ka kagiya a ipphamasa iran oto sa arga a mayto! - na sangat a siksa a bagian iran phoon ko kinipanoratn on o manga lima iran, go sangat a siksa a bagian iran phoon ko gi iran on khisokatn.

80

Go pitharo iran a: "Da dn a kakhaskho a rkami o apoy inonta bo ko manga alongan a mabibilang." Tharoang ka (ya Mohammad): "Ba kano miyakakowa sii ko Allah sa diyandi, na di pndorat so Allah ko diyandi Iyan? Antawaa gii niyo tharoon makapantag ko Allah so da a mlng iyo ron?"

81

Oway man, sadn sa nggalbk sa marata, go katangkali skaniyan o kasalaan iyan, - na siran man i manga taw ko naraka: Sa ron siran on dn makakakal.

82

Na so miyamaratiyaya, go pinggalbk iran so manga pipiya, na siran man i manga taw ko sorga: Sa ron siran on dn makakakal.

83

Na gowani na tiyarima Ami so maylot a diyandi o manga moriyataw o Israil (go pitharo Ami): Da a pzoasoata niyo a inonta so Allah; go (phiyapiya i niyo) so mbala a loks sa tanto a kaphiyapiya, go so adn a katotonganay ron, go so manga wata a ilo go so manga miskin; go tharo kano ko manga manosiya sa mapiya; go pamayandgn iyo so sambayang; go tonaya niyo so zakat. Oriyan iyan na mimbarapaling kano, inonta so mayto a pd rkano, a skano na tomatalikhod kano.

84

Na gowani na tiyarima Ami so maylot a diyandi iyo: Sa di niyo phamakaragirayn so manga rogo (o sabaad) rkano, go di niyo mbogawn so sabaad rkano ko manga ingd iyo: Na oriyan iyan na miyagikral kano, a skano na kazasaksian iyo.

85

Oriyan iyan na skano wai, na pphamonoon iyo so sabaad rkano, go pphakaawaan iyo so isa ka sagorompong rkano ko manga ingd iran; gii niyo thatabangaan kiran so dosa, go so kapakipriridoay; na amay ka adn a miniyoma iran rkano a manga biyag, na phagaonn iyo siran (a tamok), a skaniyan na hiyaram rkano so kapakaawaa kiran. Ino a paparatiyayaan iyo so sabaad ko kitab, na phagongkirn iyo so sabaad? Na da a balas ko taw a pnggolawla roo a pd rkano a rowar ko kahinaan ko kawyagoyag ko doniya, go so alongan a qiyamah na phakandodn siran ko minitaralo a siksa. Na kna a ba kalilipati o Allah so gii niyo nggolawlaan.

86

Siran man so inipamasa iran ko kawyagoyag ko doniya so akhirat: Na di kiran phagkhapkhapn so siksa, go di siran khatabangan.

87

Na sabnsabnar a inibgay Ami ko Mosa so kitab, go piyakathondotondog Ami ko oriyan iyan so manga sogo; go inibgay Ami ko Eysa a wata o Maryam so manga rarayag a karina, go inibagr Ami ron so (Jibril a) Niyawa Soti. Ino a oman i makatalingoma rkano a sogo, na sabap sa di khabayaan o manga ginawa niyo, na pmaratabatan niyo? - na adn a isa ka sagorompong a piyakambokhag iyo, go adn a isa ka sagorompong a pphamonoon niyo!

88

Go pitharo iran (sa kapamagompat) a: "So manga poso ami na khikappno." Na kna, ka pimorkaan siran o Allah sabap ko da iran kaparatiyaya: Ka miyakaytoyto a paratiyaya iran.

89

Go kagiya a adn a miyakatalingoma kiran a kitab a phoon ko Allah, a tomiyanto ko kitab a zisii kiran, - a aya btad iran sa paganay na pphangnin iran a kapgsa iran ko da pamaratiyaya, - na kagiya a makatalingoma kiran so (Mohammad a) miyakilala iran, na inongkir iran oto na so morka o Allah na san ko da pamaratiyaya.

90

Mikharatarata so piphasaan iran ko manga ginawa iran, a so di iran kapaparatiyayaa ko initoron o Allah, kadngki sa kipthoronn o Allah ko limo Iyan ko kabaya Iyan ko manga oripn Iyan: Na miyakakholokog siran sa rarangit rakhs o isa a rarangit. Na adn a bagian o da pamaratiyaya a siksa a phakahina.

91

Na igira a pitharo kiran a: "Paratiyayaa niyo so (kitab a) initoron o Allah," na tharoon iran a: "Paparatiyayaan ami so (kitab a) initoron rkami:" Na di iran paparatiyayaan so salakaw ron, a skaniyan so bnar a tomiyanto ko kitab a zisii kiran. Tharoang ka kiran (ya Mohammad): "Ino niyo pphamonoa so manga nabi o Allah gowani, o skano na mapaparatiyaya kano?"

92

Na sabnsabnar a minitalingoma rkano o Mosa so manga rarayag a karina; oriyan iyan na kinowa niyo so sapi (a katohanan) ko oriyan iyan, sa skano na miyakanggolawla kano sa di ontol.

93

Na gowani na tiyarima Ami so diyandi iyo ko kiniporoon Ami ko kaporoan iyo ko palaw (go pitharo Ami:) "Kpiti niyo so inibgay Ami rkano zabnsabnar, go pamakin'ga niyo:" Na pitharo iran a: "Piyamakin'g ami, go siyangka ami:" Na piyakasnp kiran ko manga poso iran so (kabaya sa kasimba) sa sapi sabap ko kiya ongkir iran. Tharoang ka a: "Mikharatarata so ipzogo rkano o paratiyaya niyo o skano na khipaparatiya!"

94

Tharoang ka a: "O miyaadn a rk iyo so ingd a mawri, sii ko Allah, sa tolabos, a di ron pd so manga manosiya, na zingayoa niyo so kapatay, o skano na mmamataan kano."

95

Na di iran dn oto zingayo on sa tanitiyasa, sabap ko (dosa a) miniyona o manga lima iran. Na so Allah i lbi a Matao ko da pamaginontolan.

96

Na ibt ka matoon ka siran dn, a lbi a mala i inam ko manga manosiya ko kawyagoyag, go lbi (a mala i inam) a di so miyamanakoto: Makangnangna so pizakatawan kiran a oba bo makaphagomor sa sanggibo ragon: Na di skaniyan mipakawatan ko siksa o kapakapagomor iyan (sa sanggibo ragon). Na so Allah i lbi a phagilay ko gi iran nggolawlaan.

97

Tharoang ka a: Sadn sa mabaloy a ridoay o Jibril, na mataan! a skaniyan na initoron iyan so Qor'an ko poso o ka (ya Mohammad), sabap sa sogoan o Allah, a tomiyanto ko kitab a miyaonaan iyan, go toroan, go tothol a mapiya a bagian o miyamaratiyaya,

98

Sadn sa mabaloy a ridoay o Allah ago so manga malaikat Iyan go so manga sogo Iyan, go so Jibril, go so Mikail, - na mataan! a so Allah na ridoay o da pamaratiyaya.

99

A sabnsabnar a tiyoronan Ami ska (ya Mohammad) sa manga ayat a manga rarayag; na da a magongkir on a rowar ko manga songklid.

100

Ino a oman siran makindiyandi sa isa a diyandi na ibowang o isa kiran ka sagorompong? Kna, ka kadaklan kiran na di mapaparatiyaya.

101

Na kagiya a adn a miyakatalingoma kiran a sogo a phoon ko Allah, a tomiyanto ko kitab a zisii kiran, na inibowang o isa ka sagorompong a pd ko siran a bigan ko kitab, so kitab o Allah ko tampar ko manga likod iran, lagid oba iran ni katawi!

102

Go inonotan iran so pmbatiyaan o manga shaytan ko kandadato o Solayman: Na kna a ba mikhapir so Solayman, na ogaid na so manga shaytan i mikhapir, ka ipphangndao iran ko manga manosiya so sihir, go so initoron ko dowa malaikat sa ingd a Babil so Harot ago so Marot. Na da a pagndao an iran on a isa bo odi iran matharo a: "Mataan! a skami na matag tpng; na di ka pkhapir." Na pphaganadn iran sa dowa oto sa pkhasabapan sa gi iran kapakamblaga ko taw ago so karoma niyan. Na da a khabinasaan iran on a isa bo inonta a sabap sa idin o Allah. Na mapphaganad iran so phakabinasa kiran, go di kiran phakaompiya. Na sabnsabnar a kiyatokawan iran a mataan a so taw a miyatomo iyan oto na da a bagian iyan ko akhirat a kamapiyaan. Na mataan a mikharatarata so piphasaan iran ko manga ginawa iran, o siran na katawi ran!

103

Na oba siran dn miyaratiyaya na, go siran miyananggila, na matatangkd a so balas a phoon ko Allah na aya tomo, o siran na katawi ran!

104

Hay miyamaratiyaya, di niyo ptharoa (ko Nabi) so Raina, aya tharoa niyo na Onzorna; go pamakin'ga niyo: Na adn a bagian o da pamaratiyaya a siksa a malipds.

105

Di khabayaan o da pamaratiyaya a pd ko adn a kitab iyan, go so miyamanakoto, so kipthoronn rkano ko mapiya a phoon ko Kadnan iyo. Na so Allah na ipphamili Iyan so limo Iyan ko taw a kabaya Iyan ka so Allah i Khirk ko gagaw a lbi a mala.

106

Sadn sa iptharg Ami (a kokoman) a ayat odi na pakilipatan Ami skaniyan, na pmbgay Kami sa mapiya a di skaniyan odi na so lagid iyan: Bang ka di katawi a mataan! a so Allah na so langowan taman na Gaos Iyan?

107

Bang ka di katawi a mataan! a so Allah i Khirk ko kapaar ko manga langit ago so lopa? Na da a bagian iyo a salakaw ko Allah a Panarigan go phakatabang.

108

Ba niyo pn kabaya a mangni kano ko sogo rkano lagid o kiyapangnii ko Mosa gowani? Na sa taw a zambiin iyan ko kaongkir so paratiyaya, na sabnar a miyapokas ko ontol a lalan.

109

Miyazinganin o madakl ko adn a kitab iyan a oba kano iran bo maphakakasoy ko oriyan o kiyaparatiyaya niyo, ko kakakapir iyo, kadnki a phoon ko manga ginawa iran, ko oriyan o kiyapayag kiran o bnar: Na pmaap kano go dapaya niyo, taman sa italingoma o Allah so sogoan Iyan; mataan! a so Allah na so langowan taman na Gaos Iyan.

110

Na pamayandg niyo so sambayang go tonaya niyo so zakat: Ka sadn sa iyona niyo a rk o manga ginawa niyo a mapiya, na khatoon iyo to sii ko Allah: Ka mataan! a so Allah na so gii niyo nggolawlaan na phagilayn Iyan.

111

Na pitharo iran a: "Da dn a phakasold ko sorga a rowar ko mimbaloy a manga Yahodi odi na manga Kristian." Giyoto na manga ongaya iran. Tharoang ka a: "Bgan iyo i karina niyo o skano i manga bnar."

112

Aya bnar na sadn sa imbayorantang iyan a ginawa niyan ko Allah a skaniyan na phipiyapiya, - na adn a bagian iyan a balas rkaniyan sii ko Kadnan iyan; go da a pangandam iran, go di siran makamboko (ko alongan a mawri).

113

Na pitharo o manga Yahodi a: "Da so manga Kristian ko agama ontol;" go pitharo o manga Kristian a: "Da so manga Yahodi ko agama ontol." A siran na kapphangadian iran so kitab. Izananan a pitharo o siran a da a manga mlng iyan so lagid o katharo iran; na so Allah i khokom kiran ko alongan a qiyamah ko di iran phagayonayonan.

114

Na ba adn a lawan a darowaka ko taw a inipanapar iyan so manga masjid o Allah, ko kapkhaaloy ron o ngaran Iyan? - go piyanamaran iyan nggalbk a kagnk iron? Siran man na da a phamakasold kiran on a ba di pphangaalk. Adn a bagian iran ko doniya a kahinaan, go adn a bagian iran ko akhirat a siksa a lbi a mala.

115

Na rk o Allah so sbangan go so sdpan: Na apiya anda kano pakasangora, na roo dn so pphangadapan ko Allah. Mataan! a so Allah na Rangkom, a Matao.

116

Na pitharo iran a: "Kominowa so Allah sa wata Iyan:" Soti Skaniyan. - kna, ka rk Iyan so nganin a zisii ko manga langit go so lopa: Tanan on pphangongonotan.

117

Mimbaas ko manga langit ago so lopa: Na igira a adn a ipnggolalan Iyan a zowaan, na aya bo a ptharoon Iyan on na: "Kon," na khaadn.

118

Na pitharo o siran a da a manga mlng iyan a: "Ino kami di pmbitiyarain o Allah? O di na adn a makatalingoma rkami a tanda?" Izanaya a pitharo o siran a miyaonaan iran so lagid o katharo iran. miyakandatar so manga poso iran. Sabnar a piyayag Ami so manga tanda ko pagtaw a khitotomangkd.

119

Mataan! a siyogo Ami ska (ya Mohammad), ka an mapayag so bnar a pphamanothol ko mapiya, go pphamakaiktiyar: Na kna a ba rka pagizaan so manga taw ko (naraka) Jahim.

120

Na di rka dn khasoat so manga Yahodi go so manga Kristiyan taman sa ding ka onotan so okit iran. Tharoang ka a: "Mataan! a so toroan o Allah, na skaniyan so toroan." Na ibt ka o onoting ka so manga kabaya iran a ribat ko oriyan o kiyapakatalingoma rka o katao, na da a mambagian ka a phoon ko Allah a panarigan go da a phananabang.

121

So siran oto a inibgay Ami kiran so kitab a pphangadian iran ko ontol a kapangadi iron: Na siran man i mapaparatiyaya on: Na sadn sa di ron maratiyaya, - na siran man na siran so manga logi.

122

Hay manga moriyataw o Israil! tatadmi niyo so limo Akn a so inipangalimo Akn rkano, go mataan! a Sakn na inilbi Ko skano ko manga kaadn (ko masa niyo).

123

Go kalkn iyo so gawii a da a khiyogop o isa ginawa ko isa ginawa a mayto bo, go da a khatarima on a sambi, go da a phakanggay ron a gona a safaat go di siran khatabangan.

124

Na gowani na adn a initpng ko Ibrahim o Kadnan Iyan a manga katharo, na tiyarotop Iyan oto: Pitharo Iyan a: "Mataan! a Sakn na mbalowin Akn ska ko manga manosiya a khawnotan". Na pitharo (o Ibrahim): "Ago so pn so manga moriyataw akn". Pitharo (o Allah): "A di izampay so diyandi Akn ko da pamaginontolan."

125

Na gowani na biyaloy Ami so Baytollah a kalimodan o manga manosiya, go panarigan; na kowa kano ko tinindgan o Ibrahim sa gii zambayangan; na inisogo Ami ko Ibrahim ago so Ismail, a sotiya iran so walay Akn a bagian o gii thatawaf, go so pphamag-i'tikaf, go so pphroroko, a pphamanojiod.

126

Na gowani na pitharo o Ibrahim a: "Kadnan ko, baloyang Ka ini a ingd a panarigan, go rizkhiing Ka so taw ron ko manga onga, - a so miyamaratiyaya kiran ko Allah go so alongan a mawri." Pitharo (o Allah): "Ago so taw a da paratiyaya, - ka phakasawitn ko skaniyan sa mayto (ko doniya) oriyan iyan na paka phangbongng Ko ko siksa ko naraka, - a mikharatarata a khabolosan!"

127

Na gowani ko ipphoro o Ibrahim so manga onayan o Baytollah go so Ismail: (na pitharo iran): "Kadnan ami, tarimaang Ka rkami yai: Ka mataan! a Ska na Ska so Pphakan'g, a Matao."

128

"Kadnan ami, go baloya kaming Ka a dowa a mbabayorantang Rka, go so sabaad ko manga moriyataw ami, a pagtaw a mbabayorantang Rka; go pakisowaan Ka rkami so manga okit ami; go pakatawbata kaming Ka; ka mataan! a Ska so Pphanarima ko tawbat, a Makalimoon."

129

"Kadnan ami, go pakatindging Ka siran sa sogo a pd kiran, a kapphangadian iyan kiran so manga ayat Ka, go mindao niyan kiran so kitab, go so hadith, go makasoti kiran: Ka mataan! a Ska na Ska so Domadaag, a Mawngangn."

130

Na ba adn a khagowad ko okit o Ibrahim a rowar ko taw a liyalong iyan a ginawa niyan? Na sabnsabnar a tinindos Ami skaniyan sa doniya: Go mataan! a skaniyan sii sa akhirat na pd dn ko manga bilangataw.

131

Gowani, na pitharo on o Kadnan iyan a: "Mbayorantang ka, na pitharo iyan a: Mimbayorantang ako ko Kadnan o manga kaadn."

132

Na inithanan oto o Ibrahim ko manga wata iyan, go so Ya’qob; (pitharo iyan:) "Hay manga wata ko, mataan! a so Allah na tinindos Iyan rkano so dyinol Islam; na oba kano mamatay sa di kano makambabayorantang (ko Allah)."

133

Ba kano khipakadadarpa gowani ko makarani ko Ya'qob so kapatay? A samawto, na pitharo iyan ko manga wata iyan: Antonaa i zimbaan iyo ko oriyan ko? Na pitharo iran a: Aya zimbaan ami na so Tohan ka, go Tohan o manga loks ka, - a so Ibrahim, go so Ismail, go so Is'haq, - a tohan a Isaysa: Go skami na Ron kami mbabayorantang.

134

Giyoto man na pagtaw a miyaypos dn; a rk iyan so pinggalbk iyan, go rk iyo so pinggalbk iyo. Na di rkano ipagiza so pinggolawla iran!

135

Na pitharo iran a: "Mbaloy kano a manga Yahodi odi na manga Kristiyan ka ang kano matoro." Tharoang ka a: "Kna! (ka aya pagonotan ami na) so okit o Ibrahim a zasalimbotawan, go di pd ko manga pananakoto."

136

Tharoa niyo a: "Piyaratiyaya mi so Allah, go so (Qor'an a) initoron rkami, go so initoron ko Ibrahim, go so Ismail, go so Is'haq, go so Ya'qob, go so manga moriyataw niyan, go so inibgay ko Mosa, go so Eysa, go so inibgay ko manga nabi a phoon ko Kadnan iran: da a zalboon ami kiran a isa bo: Go skami na Ron kami mbabayorantang."

137

Na amay ka paratiyayaan iran so piyaratiyaya niyo skaniyan, na sabnar a matoro siran; na o talikhod siran, na siran dn i miyatago ko kazoransorang; na plindingng ka kiran dn o Allah, ka Skaniyan so Pphakan'g, a Matao.

138

(Onoti niyo so) Okit o Allah: Ka ba adn a lbi a mapiya a di so Allah i okit? Go skami na aya mi Skaniyan gii zoasoatn.

139

Tharoang ka a: Ino kano rkami gii pakiphawala makapantag ko Allah, a Skaniyan so Kadnan ami go Kadnan iyo; na rk ami so manga galbk ami na rk iyo so manga galbk iyo; go skami na Ron kami thotolabos?

140

Ino niyo gii tharoa a: Mataan! a so Ibrahim, go so Ismail, go so Is'haq, go so Ya'qob, go so manga moriyataw niyan na siran na manga Yahodi odi na manga Kristian? Tharoang ka a: Ba skano i lbi a Matao antawaa so Allah? Na ba adn a lawan a darowaka ko taw a miyagma sa kazasaksian iyan phoon ko Allah? Ka kna a ba kalilipati o Allah so gii niyo nggolawlaan!

141

Giyoto man na pagtaw a miyaypos dn; a bagian iyan so pinggalbk iyan, na bagian iyo so pinggalbk iyo! go di rkano ipagiza so pinggolawla iran:

Part 2

142

Ptharoon o manga lalong ko manga manosiya a: "Antonaa i miyakaalin kiran ko pkhiblatn iran a so thataknaan iran?" Tharoang ka (ya Mohammad) a: Rk o Allah so sbangan ago so sdpan. Thoroon Iyan so taw a kabaya Iyan ko okit a makaoontol.

143

Na lagid oto a biyaloy Ami skano a pagtaw a pizokodan, ka ang kano mabaloy a manga saksi ko manga manosiya, go mabaloy so sogo a saksi rkano; na da a inibaloy Ami ko kiblat a so pithaknaan ka skaniyan, inonta na an Ami mapnto so magonot ko sogo ko taw a pmbazowi ko kakakapiri ron. Na mataan aya a miyabaloy a tonganay a margn, inonta bo ko siran a tiyoro o Allah. Na da ko Allah i ba Niyan ilanga so paratiyaya niyo. Ka mataan! a so Allah na tanto a Malai-gagaw ko manga manosiya, a Makalimoon.

144

Sabnar a pkhaylay Ami so kapkhatingr o paras ka ko langit: Na phakasangorn Ami ska dn ko qiblat a pkhababayaan ka skaniyan. Na sangorn ka a paras ka ko tampar sa Masjid Al-Haram: Apiya anda kano matago, na pzangorn iyo so manga paras iyo ko katatamparan on. Na mataan! a so siran a tiyoronan ko kitab na katawan iran dn a mataan! a skaniyan so bnar a phoon ko Kadnan iran. Na kna a ba kalilipati o Allah so gi iran nggolawlaan.

145

Na ibt ka apiya pn mitalingomang ka ko siran oto a tiyoronan ko kitab so langowan o tanda, na di iran dn onotan so pkhiblatn ka; na, go da rka i bang ka onoti so pkhiblatn iran, go da ko sabaad kiran i ba onot ko pkhiblatn o sabaad. Na ibt ka o onoting ka so manga kabaya iran a ribat, - ko oriyan o kiyapakatalingoma rka o katao, na mataan! a ska na samawto na pd dn ko da pamaginontolan.

146

So siran oto a inibgay Ami kiran so kitab na makikilala iran (so Mohammad) sa lagid o kakikilalaa iran ko manga wata iran; na mataan! a adn a isa kiran ka sagorompong a pag-umaan iran so bnar a siran na katawan iran.

147

So bnar na phoon ko Kadnan ka; na oba ka dn mabaloy a pd ko pkhakaalangalangan.

148

Na adn a rk o oman i isa a pphangadapn, a skaniyan i pphangadap on; na pagoradoradi niyo so manga pipiya. Ka apiya anda kano matago, na phakatalingomaan kano dn o Allah langon. Mataan! a so Allah na so langowan taman na Gaos Iyan.

149

Na apiya anda ka makasong, na phagadapn ka so paras ka ko tampar ko Masjid Al-Haram; ka mataan! a skaniyan so titho a bnar a phoon ko Kadnan ka. Na kna a ba kalilipati o Allah so gii niyo nggolawlaan.

150

Go apiya anda ka makasong, na phagadapn ka so paras ka ko tampar ko Masjid Al-Haram; go apiya anda kano matago, na phagadapn iyo so manga paras iyo ko katatamparan on: ka an da a khabaloy ko manga manosiya a karina iran rkano, inonta so siran a da kiran pamaginontolan; na di niyo siran khalkn, go Sakn i kalkn iyo; ka an Akn matarotop so limo Akn rkano, go ang kano matoro;

151

Lagid aya a kiyasogo i Ami rkano sa sogo a pd rkano, a pkhabatiya iyan rkano so manga ayat Ami, go pkhasoti kano niyan, go pkhindao niyan rkano so kitab ago so hadith, go pkhindao niyan rkano so di niyo katawan.

152

Na tatadmi Ako niyo; ka tatadman Ko skano. Go panalamat kano Rakn, go di kano pagongkir.

153

Hay miyamaratiyaya, pangni kano sa tabang sa nggolalan ko kaphantang go so kazambayang: Ka mataan! a so Allah na babid o (tabang Iyan so) manga papantang.

154

Go di niyo ptharoa ko taw a khaprang sa lalan ko Allah i: "Miyamatay. Kna, ka manga oyagoyag, na ogaid na di niyo katawan."

155

Na mataan dn a pthpngan Ami skano sa shay' a kalk go kaor go so kapkhakorangi ko manga tamok go so manga ginawa, go so manga onga, na pphamanotholing ka sa mapiya so manga papantang,

156

A siran na igira a miyasogat siran a tiyoba: Na tharoon iran a: "Mataan! a skami na kapaar o Allah, go mataan! a skami na Ron kami phakandod:"

157

Siran man i kiyapatotan ko manga maap a phoon ko Kadnan iran, ago limo, go siran man na siran i miyamakakdg ko ontol.

158

Mataan! a giya Safa, go giya Marwa na pd ko manga tanda o Allah. Na sa taw a mnay-hajji ko Baytollah odi na mag omra, na da a dosa niyan ko kapagaloyan iyan sa dowa nan. Na sadn sa nggolawla sa dawn paliyogatn a mapiya, - na mataan! a so Allah i mbalas on a Matao.

159

Mataan! a siran a pphagmaan iran so initoron Ami a manga karina, go toroan, ko oriyan o kiyapayag Ami ron ko manga manosiya sii ko kitab, - na siran man na pmorkaan siran o Allah, go ipamaninta siran o phamakasinta,

160

Inonta bo so siran a mithatawbat go miphipiyapiya, go piyayag iran (so piyamagma iran): Ka siran man na phakatawbatn Ko siran; ka Sakn so Pphanarima ko tawbat, - a Makalimoon.

161

Mataan! a so siran a da pamaratiyaya, go miyamatay siran sa kapapantagan siran a manga kapir, - na siran man na miyatangkd kiran so morka o Allah, go so manga malaikat, go so manga manosiya sa kasamasama iran;

162

Kakal siran on dn: Sa di kiran kababasan so siksa, go di kiran khataalik.

163

Na so Tohan iyo na Tohan a Isaysa: da a Tohan inonta Skaniyan, a Masalinggagaw, a Makalimoon.

164

Mataan! a adn a matatago ko kiya adna ko manga langit go so lopa; go so gii kapakazambi o gagawii ago so dawndaw; go so manga kapal a pphamangtas ko kalodan sabap ko nganin a phakanggay a gona ko manga manosiya; go so kiyapakatorona o Allah phoon ko kawang ko ig, na inioyag Iyan oto ko lopa ko oriyan o kiyapatay niyan; go biyarmbad Iyan roo so oman i baraniyawa; go so kapkhaalinalin o manga ndo, go so gabon a pawnotonot ko pagltan o langit ago so lopa; - a titho a manga tanda ko pagtaw a pnggdagdaan iran.

165

Na adn a pd ko manga manosiya a taw a pphangmbaal sa salakaw ko Allah a manga barahala, a pkhababayaan iran siran lagid o kapkhababayai ko Allah. Na so miyamaratiyaya na tanto a kapkhababaya iran ko Allah. Na o maylay o siran a da pamaginontolan, ko masa a kasandngi ran ko siksa: Na mataan! a so bagr na rk o Allah langon, go mataan! a so Allah na Mayloti-kapaniksa.

166

Masa a taplisn o siran a inonotan so miyamangonot kiran: Ka kasandngan iran so siksa, go pakanggigintasaan siran o kiya khokoyaptaan iran.

167

Na tharoon o siran a miyamangonot a: "Oba adn bo a kaphakakasoy tano (sa doniya), ka taplisn tano siran, sa lagid o kiyataplisa iran rktano." Lagid oto a kaphakiilayn kiran o Allah ko manga galbk iran a mipzsndit iran. Go di siran phamakaawa ko naraka.

168

Hay manga manosiya, kang kano ko nganin a matatago ko lopa, a halal a mapiya; go di niyo pagonoti so manga okit o shaytan, ka mataan! a skaniyan na ridoay niyo a mapayag.

169

Aya bo a ipzogo iyan rkano na so marata, go so pakasisingay, go so kiphagangkobn iyo ko Allah ko di niyo katawan.

170

Na igira a pitharo kiran a: "Onoti niyo so (Qor'an a) initoron o Allah," na tharoon iran a: "Di! ka aya pagonotan ami na so okit a miyatoon ami ron so manga loks ami." Ati apiya pn so manga loks iran na da a sabot iran a mayto bo go di siran makaoontol (na aya iran dn phagonotan)?

171

Na aya ropaan o siran a da pamaratiyaya na lagid o ropaan o taw a pphangay niyan so da a khan'g iyan, a rowar sa kapananalo ago kapananawag: (siran na) manga bngl, manga omaw, manga bota, na siran na di phamanabot.

172

Hay so miyamaratiyaya, kang kano ko manga pipiya ko iniriskhi Ami rkano, go panalamati niyo so Allah, o skano na Skaniyan bo i pzoasoatn iyo.

173

Aya dn a kiyaram Iyan rkano na so miyatay (a da masombali), go so rogo, go so sapo a baboy, go so nganin a inipanambay ko salakaw ko Allah. Na sa taw a kasngtan, a kna a ba pphanganiyaya, go di malawani, - na da a dosa niyan on. Mataan! a so Allah na Manapi, a Makalimoon.

174

Mataan! a so siran a pphagmaan iran so initoron o Allah a pd ko kitab, go ipphamasa iran oto sa arga a mayto, - na siran man na da a pkhakan iran a pkhatago ko manga tiyan iran a rowar ko apoy; go di siran imbitiyarai o Allah ko alongan a qiyamah, go di Niyan siran zotin: Go adn a bagian iran a siksa a malipds.

175

Siran man so inipamasa iran ko kadadag so toroan go (inipamasa iran ko) siksa so maap. Na sayana siran a madrs ko apoy!

176

Giyoto man na sabap sa mataan! a so Allah na initoron Iyan so kitab a rakhs o bnar. Na mataan! a so siran a da siran pagayonayon ko kitab na titho a miyatago ko kasosorang a mawatan (ko bnar).

177

Kna a ba kaphiyapiya so khiphagadapn iyo ko manga paras iyo ko tampar ko sbangan go so sdpan; na ogaid na aya miphiyapiya na so taw a miyaratiyaya ko Allah go so alongan a mawri, go so manga malaikat, go so manga kitab, go so manga nabi; go bigan iyan ko tamok iyan ko kapkhababayai niyan on so manga tonganay niyan, go so manga wata a ilo, go so manga miskin, go so gii mlayalayag, go so pphamamangni, go so pphamangaon sa ginawa niyan; go inipamayandg iyan so sambayang, go tiyonay niyan so zakat; go pthomann iran so diyandi iran igira a miyakindiyandi siran.; go manga papantang ko masakit, go so kapakathatalogdam, go so masa a kapanananggawlo o kambonoay. Na siran man so miyamangimbnar, go siran man na siran so miyamananggila.

178

Hay so miyamaratiyaya, inipaliyogat rkano so kakitasi ko miyangabobono: So maradika na (ikitas ko) maradika, go so oripn na oripn, go so babay na babay. Na sa taw a adn a pmaapn on a shay' ko pagari niyan, na pakawnotn ko adat a mapiya, go tonayn ko mimaap (so diyat) a phiyapiyaan. Giyanan i pilbolbodan on a phoon ko Kadnan iyo go limo. Na sa taw a mbago sa rido ko oriyan oto na adn a bagian iyan a siksa a malipds.

179

Na adn a rk iyo sii ko kakitas a kawyagoyag, hay adn a manga sabot iyan; ka ang kano makapananggila.

180

Inipaliyogat rkano, a igira a miyakarani ko isa rkano so kapatay, amay ka phakabagak sa tamok, so khithanann ko bagian o dowa loks go so manga dadasg, sii ko adat a mapiya; kabnar ko khipanananggila.

181

Na sa taw a sambian iyan ko oriyan o kiyan'ga niyan on, na so dosa on na sii bo ko manga taw a phamanambi on. Mataan! a so Allah na Pphakan'g, a Matao.

182

Na sa taw a adn a kawan iyan ko mithanan a karibat odi na kandosa, na, go niyan siran matanor, na da a dosa niyan on: Ka mataan! a so Allah na Manapi, a Makalimoon.

183

Hay so miyamaratiyaya, inipaliyogat rkano so powasa lagid o kinipaliyogatn on ko siran a miyaonaan iyo, ka ang kano makapananggila,

184

Sii ko manga alongan a mabibilang; na sa taw a kapantagan rkano a pkhasakit, odi na zisii sa lakawan, na (go makaboka na bayadi niyan) so kadakl o (kiyabokaan iyan sii ko) manga alongan a salakaw. Na adn a inipaliyogat ko siran a di ron phamakagaga a pidiya, a pangn'ngkn o miskin. Na sadn sa nggolawla sa dawn paliyogatn a mapiya, - na giyoto i tomo on. Na so kaphowasa niyo i tomo rkano, o skano na katawi niyo.

185

So olanolan a Ramadhan na ron minipantag a kinitoronn ko Qor'an, a toroan ko manga manosiya, go manga rarayag a karina a toroan go padoman. Na sa taw a romaot rkano ko olanolan a Ramadhan na phowasa on, na sa taw a kapantagan a pkhasakit, odi na zisii sa lakawan, na (go makaboka na bayadi niyan) so kadakl o (kiyabokaan iyan sii ko) manga alongan a salakaw. Kabaya rkano o Allah so malbod; na di Niyan rkano kabaya so margn. Go an iyo matarotop so bilangan, go an iyo mazlasla so Allah sa kiyatoroa Niyan rkano; go ang kano makapanalamat.

186

Go igira a iniiza Ako rka o manga oripn Ko, na mataan! a Sakn na Marani: Tharimaang Ko so pangni o phangni igira a miyangni Rakn: Na tarimaa Ko iran, go paratiyaya Ako iran: ka an siran makaontol.

187

Hiyalal rkano, ko gagawii ko powasa, so kapamakaya niyo ko manga karoma niyo. Ka siran na nditarn iyo na skano na nditarn iran. Katawan o Allah a mataan! a skano na miyadorat iyo a ginawa niyo; na piyakatawbat kano Niyan go pimaapan kano Niyan; na imanto na pakiprorada kano kiran, go mbabanoga niyo so pithakdir rkano o Allah, go kang kano, go inom kano taman sa mapayag rkano so goris a mapoti ko goris a maytm a fajar; oriyan iyan na tarotopa niyo so kathigr sa taman ko gagawii; go di kano kiran pakiphrorada a magi-i'tikaf kano ko manga masjid. Giyoto i manga taman o Allah: Na di niyo pagobaya lagid a nan a pphayagn o Allah so manga ayat Iyan ko manga manosiya: ka an siran makapananggila.

188

Go di niyo pagaraba so manga tamok o sabaad rkano sa mokit sa kapanalimbot, go di niyo thndann ko manga kokoman, ka khaarab iyo so sabaad ko manga tamok o manga manosiya sa mokit sa dosa a skano na katawan iyo.

189

Ipagiza iran rka so (gona ko) manga sinaribolan. Tharoang ka a: Giyanan na manga toos ko manga wakto o manga manosiya, go so kapnay-hajji. Na kna a ba kaphiyapiya so kasold iyo ko manga walay sii ko manga oriyan iyan. Na ogaid na aya miphiyapiya na so taw a miyananggila. Na sold kano ko manga walay sii ko manga paytaw niyan. Go kalkn iyo so Allah: Ka ang kano maka slang sa maliwanag.

190

Na pakimbonoay kano sa makapantag ko lalan o Allah ko siran a pphamono rkano, go di kano phmalawani; ka mataan! a so Allah na di Niyan khabayaan so manga malawani.

191

Go bonoa niyo siran apiya anda niyo siran matoon, go pakaawaa niyo siran sa sadn sa kiyapakaawaa iran rkano; ka so kapanakoto na lawan ko kapamono na di kano kiran pakipmbonoay sa Masjid Al-Haram, taman sa di siran rkano ron makimbonoay; na amay ka makimbonoay siran rkano, na bonoa niyo siran lagid oto a balas ko da pamaratiyaya.

192

Na amay ka gomnk siran (manakoto), na mataan! a so Allah na Manapi, a Makalimoon.

193

Na pakimbonoay kano kiran taman sa da a maadn a kapanakoto, go maadn so agama. (okit ko kapagintaw) a rk o Allah; na amay ka gomnk siran, na da a rido inonta ko da pamaginontolan.

194

So olanolan a pagaadatan na pantag o olanolan a pagaadatan, - go so khipagaadatan, na makapkhikitasa. Na sa taw a pangorawan kano niyan na atowi niyo skaniyan sa lagid o kiyapangorawi niyan rkano. Go kalkn iyo so Allah, go tangkda niyo a mataan! a so Allah na babid o (tabang Iyan so) khipanananggila.

195

Na nggasto kano ko lalan ko Allah, go di niyo pagnata a ginawa niyo ko kabinasa; go phiyapiya kano; ka mataan! a so Allah na pkhababayaan Iyan so miphipiyapiya.

196

Na tarotopa niyo so kapnay-hajji go so omra a rk o Allah. Na amay ka kabalambanan kano, na (bgan niyo) so malbod ko manga pammgayan, go di niyo pagopawi so manga olo niyo taman sa di iraot so manga pammgayan ko darpa iyan. Na sa taw a kapantagan a pkhasakit rkano, odi na adn a sakit ko olo niyan, na (paliyogat on) so pidiya a kaphowasa, odi na kazadka, odi na kasombali (sa kambing); na amay ka somarig kano, na sa taw a mapili iyan so omra ko onaan o kapnay-hajji, na (paliyogat on) so malbod ko manga pammgayan, na sa taw a di makatoon, na phowasa sa tlo alongan sii ko kapnay-hajji go pito (alongan) igira a miyakabaling kano, giyoto na sapolo a tarotop. Giyoto na sii ko taw a da mabaloy so prn iyan oba khibabaling ko (obay a) Masjid Al-Haram. Na kalkn iyo so Allah, go tangkda niyo a mataan! a so Allah na Mayloti-kapaniksa.

197

So kapnay-hajji na manga olanolan a khikappnto. Na sa taw a mag-ihram roo ko kapnay-hajji, na da a kapamakay sa babay, go da a kandarowaka, go da a kaphapawala sii ko (kapagi-ihram ko) kapnay-hajji. Na sadn sa mapnggolawla niyo a mapiya, na katawan skaniyan o Allah. Na ploto kano, na mataan! a aya mapiya loto na so kapananggila. Go kalkn Ako niyo, hay adn a manga sabot iyan.

198

Daa dosa niyo ko kambabanog iyo sa limo a phoon ko Kadnan iyo. Na amay ka gomanat kano sa Arafat, na pzabota niyo so Allah ko obay o Mash'ar Al-Haram, go pzabota niyo Skaniyan sa kiyanggonanaowa Niyan rkano, ka mataan! a aya btad iyo ko onaan aya, na pd dn ko miyanga dadadag.

199

Oriyan iyan na ganat kano sa sadn sa pngganatan o manga manosiya, go pangni kano sa maap ko Allah. Mataan! a so Allah na Manapi, a Makalimoon.

200

Na amay ka mapasad iyo so manga okit iyo ko kapnay-hajji, na tatadmi niyo so Allah, lagid o katatadmi niyo ko manga loks iyo, - o di na lawan on a kapananadm. Na adn a pd ko manga manosiya a taw a gii tharo sa: "Kadnan ami, bgi kaming Ka sii sa doniya." Na da a bagian iyan ko akhirat a kamapiyaan.

201

Na adn a pd kiran a gii tharo sa: "Kadnan ami, bgi kaming Ka sii sa doniya sa mapiya, go sa akhirat sa mapiya, go lidasn kaming Ka ko siksa ko naraka!"

202

Siran man na adn a bagian iran a kapiyaan phoon ko pinggalbk iran; na so Allah na magaan i kapamagitong.

203

Na pzabota niyo so Allah sii ko manga alongan a mabibilang. Na sa taw a magalokalok (gomanat sa Mina) ko dowa alongan, na da a dosa niyan, na sa taw a makawri, na da a dosa niyan sii ko taw a miyananggila. Na kalkn iyo so Allah, go tangkda niyo a mataan! a skano na Ron kano plimoda.

204

Na adn a pd ko manga manosiya a taw a pkhasoat ka o katharo iyan sii ko kawyagoyag ko doniya, go gii niyan zaksiin so Allah ko madadalm ko poso iyan; (takinoba) a skaniyan i lbi a pawal.

205

Na igira a miyakatalikhod, na lomalakaw ko lopa ka maminasa on, go prarataan iyan so manga pr go so manga wata a pangangayamn. Na so Allah na di Niyan khababayaan so kapaminasa.

206

Na igira a pitharo on a: "Kalkn ka so Allah," na awidan skaniyan o maratabat sii ko dosa. Na aya dn a khabolosan iyan na so naraka Jahannam; - a mikharatarata a darpa!

207

Na adn a pd ko manga manosiya a taw a gii niyan phasaan a ginawa niyan ka tontot ko manga ikasosoat o Allah; na so Allah na Makapdiin ko manga oripn Iyan.

208

Hay so miyamaratiyaya, sold kano ko Islam sa kalangolangowan iyan; go di niyo khdga so manga okit o shaytan; ka mataan! a skaniyan na ridoay niyo a mapayag.

209

Na amay ka somilay kano ko oriyan o kiyapakatalingoma rkano o manga rarayag a karina, na tangkda niyo a mataan! a so Allah na Mabagr, a Mawngangn.

210

Ba adn a pnayawn iran a rowar ko kapakatalingoma kiran o Allah a Maporo ago Mala sii ko bontal a domadait On sabap ko kala Iyan a matatago ko miyagngkapngkap a gabon, go so manga malaikat go mitaman so kokoman? Ka sii bo phakandoda ko Allah so manga kokoman.

211

Izaan ka ko manga moriyataw o Israil o pira i inibgay Ami kiran a tanda a marayag. Na sa taw a sambian iyan so limo o Allah ko oriyan o kiyapakatalingoma niyan on, na mataan! a so Allah na Mayloti-kapaniksa.

212

Pipharasan ko siran a da pamaratiyaya so kawyagoyag ko doniya, go pphamagrgan iran so miyamaratiyaya. Na so siran a miyamananggila na makaombaw kiran ko alongan a qiyamah; ka so Allah na priskhiyan Iyan so taw a kabaya Iyan sa di khasar a pandapat.

213

Miyaadn so manosiya ko okit a isa, na siyogo o Allah so manga nabi a pphamanothol ko mapiya, go pphamakaiktiyar; go piyakatoron Iyan a babid iran so kitab a bnar, ka an Iyan makokom so manga manosiya ko di iran phagayonayonan; na da a somiyorang on a rowar ko siran oto a bigan on ko oriyan o kiyapakatalingoma kiran o manga rarayag a karina, kadngki ko siran (a miyamaratiyaya). Na tiyoro o Allah so miyamaratiyaya, sii ko da iran pagayonayoni ko bnar, sabap sa idin Iyan, ka so Allah na thoroon Iyan so taw a kabaya Iyan ko lalan a matitho.

214

Ba niyo tiyarima a phakasold kano ko sorga a da rkano makatalingoma so lagid o (miyakatalingoma ko) siran oto a miyaypos ko miyaonaan iyo? A minisogat kiran so masikot go so karomasayan, go miyaaroraya siran taman sa gii matharo o sogo ago so miyamaratiyaya a pd iyan a: "Anda so tabang o Allah? Tanodan! ka mataan! a so tabang o Allah na Marani!"

215

Ipagiza iran rka o antonaa i kaphammgay iran. Na tharoang ka a: Sadn sa iphammgay niyo a mapiya, na bagian o mbala a loks, go so manga dadazg, go so manga wata a ilo, go so manga miskin, go so gii mlayalayag a maka khakadiyat a miyakawang sa lalan. Na sadn sa nggolawlaan iyo a mapiya, - na mataan! a so Allah na katawan Iyan oto.

216

Inipaliyogat rkano so kapakimbonoay (ko manga kapir), a skaniyan na ipkhagowad iyo, na thatana a adn a ipkhagowad iyo a aya rkano mapiya, go thatana a adn a pkhababayaan iyo a aya rkano marata. Na so Allah i Matao, na skano i di manga tatao.

217

Ipagiza iran rka (ya Mohammad) so olanolan a pagaadatan so kambonoay ron. Na tharoang ka a: "So kambonoay ron na mala a dosa; go so kaalangi ko lalan o Allah, go so kaongkira on, go so (kaalangi ko) Masjid Al-Haram, go so kapakaawaa on ko taw ron;" na lawan roo a mala (a dosa) sii ko Allah go so kapanakoto na lawan a mala (a dosa) a di so kapamono. Na di siran nggnk sa kapphamonoa iran rkano taman sa di kano iran mapakaawa ko agama niyo o khagaga iran. Na sa taw a mawa rkano ko agama niyan na, go matay a kapantagan a skaniyan na di mapaparatiyaya, na siran man na miyailang so manga galbk iran sii sa doniya, go sa akhirat; ka siran man i manga taw ko naraka sa ron siran on dn makakakal.

218

Mataan! a so siran a miyamaratiyaya, go miyamanogalin sa ingd, go miyamanagontaman sii ko lalan o Allah, - na siran man i phakaarap ko limo o Allah: Ka so Allah na Manapi, a Makalimoon.

219

Ipagiza iran rka so pakabrg go so kandarmt. Na tharoang ka a: "Adn a madadalm sa dowa oto a dosa a mala, go manga gona, a rk o manga manosiya; na so dosa sa dowa oto na mala a di so gona on." Na ipagiza iran rka o antonaa i iphammgay ran; na tharoang ka a: "So khalawan (ko hadiyat iyo)." Lagid aya a kaphphayaga rkano o Allah ko manga ayat: ka an iyo mapphamimikiran.

220

Sii sa doniya, go sa akhirat. Go ipagiza iran rka so manga wata a ilo. Na tharoang ka a: "So ka ompiya i kiran na aya mapiya; na o pakizaog kano kiran (sa kawiyagan), na manga pagari niyo siran (ko agama); ka so Allah na mattndo Iyan so pphaminasa ko pphangompiya. Na o kabaya o Allah, na mataan a kaphakargnan kano Niyan: Mataan! a so Allah na Mabagr, a Mawngangn."

221

Na di niyo phangaromaa so manga pananakoto a manga babay, taman sa di siran maratiyaya: Ka mataan a so oripn a babay a miyaratiyaya na tomo a di so pananakoto a babay, apiya pn masoat kano niyan. Go di niyo pakiphangaromaan ko manga pananakoto (so miyamaratiyaya a babay) taman sa di siran maratiyaya: Ka mataan a so oripn a mama a miyaratiyaya na tomo a di so pananakoto a mama, apiya pn masoat kano niyan. Siran man na ipthawag iran so naraka. Na so Allah na ipthawag Iyan so sorga ago so maap sabap sa idin Iyan, go pphayagn Iyan so manga ayat Iyan ko manga manosiya: ka an iran pkhatadmi.

222

Na ipagiza iran rka so Hayd. Na tharoang ka a: Skaniyan na marzik: Na gnki niyo mamakay so manga babay ko masa o Hayd, go di kano kiran pagobay sa (kandima) taman sa di siran makazoti. Na amay ka makazoti siran, na song kano kiran sa sadn sa sogoan rkano o Allah. Mataan! a so Allah na pkhababayaan Iyan so manga baratawbat go pkhababayaan Iyan so manga barasoti.

223

So manga karoma niyo na babasoka iyo; na song kano ko babasoka iyo sa sadn sa kabaya iyo; go onaan iyo so rk o manga ginawa niyo; na kalkn iyo so Allah, go tangkda niyo a mataan! a skano na mipthoona iyo Skaniyan, na pphanotholing ka sa mapiya so miyamaratiyaya.

224

Na di niyo mbaloya so (kazapa ko) Allah makapantag ko manga sapa iyo a balamban o kapphiyapiya niyo, go so kaphangongonotan iyo, go so kathanora niyo ko manga manosiya; ka so Allah na Pphakan'g, a Matao.

225

Di rkano iziksa o Allah so da mbabaa ko manga sapa iyo, na ogaid na iziksa Iyan rkano so pimbaba o manga poso iyo; ka so Allah na Manapi, a Matigr.

226

Bagian o siran a pizapaan iran (sa di iran phamakayn) so manga karoma iran, so kanayaw sa pat olan; na amay ka indod iran, na mataan! a so Allah na Manapi, a Makalimoon.

227

Na amay ka tanton iran so kamblag, na mataan! a so Allah na Pphakan'g, a Matao.

228

So piyamanalak na magnggn iran so manga ginawa iran ko (masa o) tlo a Hayd. Na di kiran khapakay i ba iran pagmaa so inadn o Allah ko manga tiyan iran, o siran na paparatiyayaan iran so Allah. - go so alongan a mawri. Na so manga karoma iran i kapapatotan ko kabalingi kiran sangkoto (a masa), o kabaya iran so kathanora. Na adn a bagian iran a kabnar a lagid o kabnar kiran (o manga mama) sii ko adat a mapiya; go adn a bagian o manga mama a miyoombaw iran ko manga babay. Na so Allah na Mabagr, a Mawngangn.

229

So kamblag (a adn a kambalingana on) na makadowa: Na balingi niyo siran ko adat a mapiya, odi na botawani niyo siran ko okit a mapiya. Na di rkano khapakay, oba kano kowa ko (btang a) minibgay niyo kiran sa mayto bo, inonta oba iran khawann a dowa so di iran kaontola ko manga taman o Allah. Na amay ka ikhawan iyo so di iran kapanonthola ko manga taman o Allah na da a dosa iran ko kitndan on o babay. Giyoto i manga taman o Allah; na di niyo to plawani ka sa taw a lawanan iyan so manga taman o Allah, na siran man na siran so manga darowaka.

230

Na amay ka imblag iyan (sa ika tlo), na di ron khapakay ko oriyan oto, taman sa di makipangaroma sa karoma a salakaw ron na amay ka imblag o miyangaroma (a ika dowa) na da a dosa iran ko kikasowin iran (ko kakhawing), amay ka magda iran a khaontol iran so manga taman o Allah. Na giyaya i manga taman o Allah, a pphayagn Iyan ko pagtaw a khisasabot.

231

Na igira a inimblag iyo so manga babay, na, go siran praotn ko ida iran, na balingi niyo siran sii ko adat a mapiya odi na botawani niyo siran sii ko adat a mapiya; go di niyo siran mbalingi sa kapakiprasaya, ka makapmbaba kano; na sa taw a nggolawla roo, na sabnar a miyabinasa niyan a ginawa niyan. Na di niyo mbaloya so manga ayat o Allah a kasandagan, go tadmi niyo so limo rkano o Allah, go so initoron Iyan rkano a kitab, go ongangn, a ipphangthoma Niyan rkano to. Na kalkn iyo so Allah, go tangkda niyo a mataan! a so Allah na katawan Iyan so langowan taman.

232

Na igira a inimblag iyo so manga babay, na, go siran raotn ko ida iran, na di niyo siran pagrna ko kapakiphangaroma iran ko manga karoma iran, igira a miyagayon siran ko adat a mapiya. Giyoto na iphagndao to ko taw a pd rkano, a paparatiyayaan iyan so Allah go so alongan a mawri. Giyoto man i lbi a phakaompiya rkano go lbi a phakasoti. Na so Allah i Matao, na skano i di manga tatao.

233

Na so manga ina na pakasosowa iran so manga wata iran sa dowa ragon a tarotop a dowa oto, sii ko taw a kabaya iyan a katarotopa niyan ko kapakasoso. Na paliyogat ko ama so pagpr kiran go so nditarn iran sii ko adat a mapiya. Da a iphaliyogat ko baraniyawa a rowar ko khagaga niyan. Di rasayn so ina sa sabap ko wata iyan, go di pakargnan so ama sa sabap ko wata iyan, na paliyogat ko waris (ko ama) so lagid oto. Na amay ka kabaya iran a kapakagnka on somoso sa piyagayonan iran, go kiyapagodasaan, na da a dosa iran on. Na amay ka kabaya iyo so kapakasosowa niyo ko manga wata iyo (ko salakaw ko manga ina iran), na da a dosa niyo igira a minibgay niyo kiran so tndan iyo kiran, sii ko adat a mapiya. Na kalkn iyo so Allah go tangkda niyo a mataan! a so Allah na so gii niyo nggolawlaan na phagilay Niyan.

234

Na so phamatay rkano a adn a khibagak iran a manga karoma, na magnggn iran so manga ginawa iran sa pat olan go sapolo (gawii): Na amay ka iraot siran ko ida iran, na da a dosa niyo ko kinggolalann iran ko zisii sa ginawa iran sii ko adat a mapiya. Na so Allah na so gii niyo nggolawlaan na Kaip Iyan.

235

Na da a dosa niyo sii ko inipangilat iyo a garay ko manga babay (a balo) odi na piyagns iyo sii ko manga ginawa niyo. Katawan o Allah a mataan a skano na pkharm iyo siran: Na ogaid na di kano kiran pakipphasada sa masoln inonta o aya tharoa niyo na katharo a patot, go di niyo phakatanaa so katangkd o kakhawing taman sa di iraot so ida ko tataalikan on. Na tangkda niyo a mataan! a so Allah na katawan Iyan so zisii ko manga ginawa niyo, na iktiyari niyo skaniyan; go tangkda niyo a mataan! a so Allah na Manapi, a Matigr.

236

Daa dosa niyo amay ka imblag iyo so manga babay ko da niyo kiran pn kapamakaya, go da pn a miyapayag iyo kiran a btang; na bgi niyo siran sa iphakapiya ginawa iran, paliyogat ko kawasa so pantag o guus iyan, go paliyogat ko kasisimpitan so pantag o guus iyan; - a pammgayan sii ko adat a mapiya kabnar ko miphipiyapiya.

237

Na amay ka imblag iyo siran ko da niyo kiran pn kapamakaya, a sabnar a adn a miyapayag iyo kiran a btang, na (bgan iyo kiran) so sabagi ko miyapayag iyo, inonta o pmaap siran odi na mmaap so zisii sa tangan iyan so katangkd o kapangaroma; na so kapmaap iyo na aya marani ko kapangongonotan. Na di niyo phakalipati so kiyapaka adiyadiya rkano. Mataan! a so Allah na so gii niyo nggolawlaan na phagilayn Iyan.

238

Siyapa niyo so manga sambayang, go so sambayang (a Asar) a millbi; go pamayandgn iyo a rk o Allah sa titho a kapphangongonotan iyo.

239

Na amay ka khawan kano, na (zambayang kano a) phlalakaw kano, odi na khokoda kano, na amay ka somarig kano, na sabota niyo so Allah (sa zambayang kano) sa manaa so inindao Niyan rkano, a di niyo katawan.

240

Na so siran a phamatay rkano go adn a khaganatan iran a manga karoma na thanann iran a adn a bagian o manga karoma iran a pagpr sa taman ko saragon sa di siran pakaliyon; na amay ka lomiyo siran, na da a dosa niyo, sii ko kininggolalann iran ko zisii sa ginawa iran, a adat a mapiya. Na so Allah na Mabagr a Mawngangn.

241

Na adn a bagian o piyamanalak a pammgayan sii ko adat a mapiya; kabnar ko khipanananggila.

242

Lagid oto a kapphayaga rkano o Allah ko manga ayat Iyan: ka an iyo gii manggdagda.

243

Bang ka da katokawi so siran a miyamangawa ko manga ingd iran, a siran na baribo ribo, sa pangali ko kapatay? Na pitharo kiran o Allah a: "Miyamatay kano." Oriyan iyan na inoyag Iyan siran. Mataan! a so Allah i titho a Malai-gagaw ko manga manosiya, na ogaid na kadaklan ko manga manosiya a di siran phanalamat.

244

Na pakimbonoay kano sa lalan ko Allah, go tangkda niyo a mataan! a so Allah na Pphakan'g, a Matao.

245

Sadn sa taw a pagotangan iyan so Allah sa otang a mapiya, na pthaktakpn Iyan on sa kathaktakp a madakl, ka so Allah i pzikot go ploag, go Ron kano phamakandoda.

246

Bang ka da katokawi so manga nakoda ko manga moriyataw o Israil a miyaoriyan o Mosa? Gowani na pitharo iran ko nabi ran a (Sam'on) a: "Pakatindgi kaming ka sa dato, ka makimbonoay kami sa lalan ko Allah." Pitharo iyan a: "Oba badn amay ka ipaliyogat rkano so kambonoay, na di kano bo makimbonoay!" Pitharo iran a: "Ino kami di pakipmbonoay sa lalan ko Allah a sabnar a piyakaawa kami ko manga ingd ami go (pirabay) so manga wata ami?" Na gowani a ipaliyogat kiran so kambonoay, na tomiyalikhod siran, inonta so mayto (a mithalimbagak) kiran. Na so Allah na katawan Iyan so da pamaginontolan.

247

Na pitharo kiran o nabi ran a: "Mataan! a so Allah na piyakatindg Iyan rkano so Talot a dato." Pitharo iran a: "Andamanaya i kakhapatot on o kapndato i niyan rkami a skami i titho a kapapatotan ko kadato a di skaniyan, go da bgi sa kakawasaan a tamok?" Pitharo iyan a: "Mataan! a so Allah na tinindos Iyan rkano skaniyan, go piyakalawan Iyan sa kala ko katao go so lawas; na so Allah na mbgan Iyan ko kapaar Iyan so taw a kabaya Iyan. Na so Allah na Maginawa, a Matao."

248

Na pitharo kiran o nabi ran a: "Mataan! a aya tanda o kadato iyan na makatalingoma rkano so kaban a katatagoan sa sarig, a phoon ko Kadnan iyo, go so manga lamba ko paninggalan o Mosa, go so Haron, a phagawidan skaniyan o manga malaikat. Mataan! a adn a matatago roo man a titho a tanda a bagian iyo o skano na mapaparatiyaya."

249

Na kagiya a lomiyo so Talot a rakhs o manga tantara iyan, na pitharo iyan a: 'Mataan! a so Allah na adn a ithpng Iyan rkano a lawasayg: Na sa taw a minom on, na di rakn pd: Na sa taw a di ron tomaam na mataan! a skaniyan na pd rakn: Inonta so taw a isandok iyan sa sasandok so lima niyan." Na miyamanginom siran on, inonta so mayto a pd kiran. Na kagiya a maripag iyan oto - skaniyan ago so miyamaratiyaya a pd iyan, - na pitharo iran a: "Da a kaphakaato tano sa alongan nai ko Jalot ago so manga tantara iyan." Na pitharo o siran a tatangkdn iran a mataan a siran na mipthoona iran so Allah a: "Madakl a pagtaw a mayto a miyakapgs sa pagtaw a madakl sa sabap sa idin o Allah, ka so Allah na babid o (tabang Iyan so) manga papantang."

250

Na gowani a makiprayara siran ko Jalot ago so manga tantara iyan, na pitharo iran a: "Kadnan ami, sampornaang Ka rkami so kapantang go pakabknang Ka so manga parapara mi: Go tabangi kaming Ka ko pagtaw a da pamaratiyaya."

251

Na miyapgs iran so pagtaw a Jalot sabap sa idin o Allah; go miyabono o Dawood so Jalot; go inibgay ron o Allah so kadato go so ongangn go inindao Niyan on so nganin a kabaya Iyan. Na o da rna o Allah so manga manosiya so sabaad kiran sa minggolalan ko sabaad, na miyabinasa dn so lopa: Na ogaid na so Allah na Malai-gagaw ko manga kaadn.

252

Giyoto man so manga tanda o Allah a pphangadian Ami rka oto (ya Mohammad) a aya btad iyan na bnar: Na mataan! a ska na pd dn ko manga sogo (o Allah).

Part 3

253

Giyoto man so manga sogo a inilbi Ami so sabaad kiran ko sabaad: Pd kiran so inimbitiyarai o Allah; go iniporo Iyan so sabaad kiran sa manga daradat; na inibgay Ami ko Eysa a wata o Maryam so manga rarayag a karina, go inibagr Ami ron so Roh Al-Qoddos (so Jibril). Na o kabaya o Allah, na da a makambobono ko siran a miyaoriyan iran, sii ko oriyan o kiyapakatalingoma kiran o manga rarayag a karina, na ogaid na mizoransorang siran, ka adn a pd kiran a taw a miyaratiyaya, go adn a pd kiran a taw a miyongkir. Na o kabaya o Allah, na da a makambobono kiran; na ogaid na so Allah na pnggolawlaan Iyan so nganin a kabaya Iyan.

254

Hay so miyamaratiyaya, pammgay kano ko inibgay Ami rkano, ko dapn kapakatalingoma o gawii a da a kaphasai ron, go da a kambobolayoka on go da a kapamagalba on. Na so da pamaratiyaya na siran so da pamaginontolan.

255

So Allah! Da a patot a pzoasoatn a inonta Skaniyan, - a Oyagoyag, a Thatandingan; di khatalingomaan a toratod, go torog. Rk Iyan so zisii ko manga langit ago so zisii ko lopa. Ba adn a taw a makaphanapaat sa hadapan Iyan inonta a sabap sa idin Iyan? Katawan Iyan so nganin a khabolosan iran go so nganin a kiya iposan iran. Na da a zzzbn iran a mayto bo ko katao Niyan inonta bo ko nganin a kabaya Iyan. Miyarangkom o korsi Iyan so manga langit ago so lopa, go di Ron khipnd so siyap Iyan sa dowa oto, go Skaniyan so Maporo, a Lbi-a-mala.

256

Daa kapan'gl ko agama: Ka sabnar a minisnggay so ontol ko ribat: Na sadn sa ongkirn iyan so manga Tagot, a paratiyayaan iyan so Allah na sabnar a miyakakapt sa rambit a mabagr, a da a ikhathpd iyan, na so Allah na Pphakan'g, a Matao.

257

So Allah i Panarigan o miyamaratiyaya: Phakaawaan Iyan siran phoon ko manga lilibotng ka phakasongn Iyan siran ko maliwanag. Na sa da pamaratiyaya na aya manga panarigan iran na so manga Tagot a pphamakaawaan iran siran phoon ko maliwanag ka pphamakasongn iran siran ko manga lilibotng. Na siran man i manga taw ko naraka, sa ron siran on dn makakakal.

258

Bang ka da katokawi so (Namrod a) miyakiphawala ko Ibrahim makapantag ko Kadnan iyan, sa kinibgan on o Allah ko kadato? Gowani a tharoon o Ibrahim a: "Aya Kadnan ko na so pphangoyag go pphakapatay." Na pitharo iyan a: "Sakn na pphakawyag ako go phphakapatay ako." Pitharo o Ibrahim: "Na mataan! a so Allah na pphakasongn Iyan so alongan phoon ko sbangan (sii sa sdpan): Na pakasongang ka skaniyan phoon sa sdpan (sii sa sbangan)." Na biyabngan so da paratiyaya. Na so Allah, na di Niyan pnggonanaon so pagtaw a da pamaginontolan.

259

Go so (Ozayr a) somiyagad ko (Baytal Moqaddas a) ingd a miyangaggba so manga walay ron, pitharo iyan a: "Andamanaya i kakhaoyaga sii o Allah, ko oriyan o kiyapatay niyan?" Na biyono skaniyan o Allah sa magatos ragon, oriyan iyan na inoyag Iyan bo na pitharo (o Allah): "Ay kiyathaing ka (hay Ozayr)?" Pitharo iyan: "Aya kiyathay akn na salongan odi na sabaad sa salongan." Pitharo (o Allah) a: "Kna, ka aya kiyathayng ka na miyakamagatos ragon; na ilayang ka so pangn'ngkn ka, go so inomn ka, ka da phaparin; go ilayang ka so himar ka: Ka kagiya a mbalowin Ami ska a nanao o manga manosiya, go ilayang ka so manga tolan, o andamanaya i gii Ami ron kapakathootoora, oriyan iyan na pmbongkosan Ami sa sapo." Na kagiya a mapayag on oto, na pitharo iyan a: "Tiyangkd akn a mataan! a so Allah na sii ko langowan taman na Gaos Iyan."

260

Na gowani na pitharo o Ibrahim: "Kadnan ko, pakiilayn Ka rakn o andamanaya i kapagoyagang Ka ko miyamatay." Pitharo (o Allah): "Ba ka di pharatiyaya?" Pitharo iyan: "Oway! (mapaparatiyaya ko) na ogaid na an thatana so pamikiran ko." Pitharo (o Allah): "Na kowa ka sa pat ko manga papanok; na tathadang ka ko katimo iran rka; oriyan iyan na tagoing ka on so oman i isa a palaw sa sabaad, oriyan iyan na talowing ka siran: Ka mamakatalingoma siran rka sa mataan. Na tangkdang ka a mataan! a so Allah na Mabagr, a Mawngangn."

261

Aya ropaan o siran a gii siran nggasto ko manga tamok iran sii ko lalan ko Allah na lagid o satiman a od a mitho' sa pito saway, zisii ko oman i saway ron so magatos a od. Na so Allah na pthaktakpn Iyan ko taw a kabaya Iyan: Ka so Allah na Maginawa, a Matao.

262

Siran a gi iran nggaston so manga tamok iran sii ko lalan o Allah, oriyan iyan na di iran thondogn so kiyapammgay ran a kazalibantog go kapanakit sa ginawa, na adn a bagian iran a balas kiran sii ko Kadnan iran: Go da a pangandam iran, go di siran makamboko (ko alongan a mawri).

263

So katharo a mapiya, go so kapmaap na tomo a di so sadka a pkhatondog a kapanakit sa ginawa. Na so Allah na Kawasa, a Matigr.

264

Hay so miyamaratiyaya, di niyo mbinasaan ko manga sadka niyo so kazalibantog go so kapanakit sa ginawa, - lagid o pphammgay ko tamok iyan sa kapaki-ilaylayn ko manga manosiya, go di niyan paparatiyayaan so Allah go so alongan a mawri. Na aya ropaan iyan na lagid o ator a matilak, a kaliliyawawan sa botha a miyasogat skaniyan a mabagr a oran, na miyalamba iyan on so matgas. Na da a khaparoli ran a mayto bo ko pinggalbk iran. Na so Allah na di Niyan pnggonanaon so pagtaw a da pamaratiyaya.

265

Na aya ropaan o siran a pphammgay ko manga tamok iran, sa singanin ko manga kasosoat o Allah go so kathatana o manga ginawa iran, na lagid o pamomolan ko lopa a tambo a miyasogat a mabagr a oran na minibgay niyan so onga niyan sa dowa takp, na apiya pn da masogat a mabagr a oran, ka tarintik bo, ka so Allah na so gii niyo nggolawlaan na phagilayn Iyan.

266

Ba khabayai o isa rkano a adn a mambagian iyan a pamomolan a manga Korma ago manga Anggor, a pphamangondas ko kababaan iyan so manga lawasayg, mambagian iyan roo so pizoson a manga onga, a miyakatalingoma on so kaloks, go adn a manga moriyataw niyan a manga llmk na miyasogat oto a sobosobo, a kadadalman sa apoy, na miyatotong? Lagid aya a kapphayaga rkano o Allah ko manga tanda; ka ang kano makapphamimikiran.

267

Hay so miyamaratiyaya, pphammgay kano ko manga pipiya ko miyasokat iyo, go so piyakagmaw Ami rkano a phoon ko lopa, go di niyo pthibabaa so marata on, a iphammgay niyo, ka da rkano i ba niyo to kowaa inonta a ba kano ron phipipidng. Na tangkda niyo a mataan! a so Allah na Kawasa, a Pphodin.

268

So shaytan na ipphangangalk iyan rkano so kamiskin go ipzogo iyan rkano so pakasisingay. Na so Allah na didiyandian kano Niyan sa maap a phoon Rkaniyan go limo. Na so Allah na Maginawa, a Matao.

269

Imbgay Niyan so ongangn ko taw a kabaya Iyan; na sa taw a bgan ko ongangn na sabnar a kiyabgan sa mapiya a madakl; na da a phakatanod on a inonta so manga papantas i akal.

270

Na sadn sa ipammgay niyo a pammgayan, odi na izamaya iyo a samaya, na mataan! a so Allah na katawan Iyan oto. Na da a bagian o da pamaginontolan a manga tabanga.

271

Amay ka payagn iyo so manga sadka, na mapiya dn oto, na amay ka pagmaan iyo to, go ibgay niyo to ko khikarrgnan, na giyoto i mapiya rkano: Go makaponas rkano ko sabaad ko manga dosa niyo. Na so Allah na so gii niyo nggolawlaan na Kaip Iyan.

272

Kna a ba rka paliyogat, so katoro iran, na ogaid na so Allah i thoro ko taw a kabaya Iyan. Na sadn sa mipphammgay niyo a mapiya na rk o manga ginawa niyo, na di kano phammgay sa makaliyo ko singanin ko kasosoat o Allah. Na sadn sa mipphammgay niyo a mapiya, na khitoman rkano sa tarotop, a skano na di kano kasalimbotan.

273

(So manga sadka) Na bagian o khikarrgnan, a siran na miyangatatarongko ko lalan ko Allah, a di siran phakatayod ndadalakaw ko lopa, arangan kiran odi kiran matao na manga kawasa sabap ko kaggnggna ko ginawa, khikilalang ka kiran so manga toos iran: a di siran phamangni ko manga manosiya sa marsrs. Na sadn sa mipphammgay niyo a mapiya, na mataan! a so Allah na katawan Iyan oto.

274

So siran a pphammgay siran ko manga tamok iran sii ko gagawii go so dawndaw, - masoln go mapayag, na adn a bagian iran a balas kiran sii ko Kadnan iran: Go da a pangandam iran, go di siran makamboko (ko alongan a mawri).

275

So siran a pkhn iran so piribaan na di siran makatindg inonta so lagid o kapakatindg o ipphamaps skaniyan o shaytan phoon sa bthang. Giyoto man na sabap sa mataan! a siran na pitharo iran a: "So kaphasai na lagid bo o kapriba," na piyakay o Allah so kaphasai na inisapar Iyan so kapriba. Na sa taw a adn a makatalingoma on a thoma a phoon ko Kadnan iyan, na, go gnk (mriba), na rk iran so miyaypos; na so khasoa iyan na sii matitimo ko Allah; na sa taw a mbalingan an iyan na siran man i manga taw ko naraka: Sa ron siran on dn makakakal.

276

Pagantiyorn o Allah so riba, na phakaozorn Iyan so manga sadka: Ka so Allah na di Niyan khabayaan so langowan o miyongkir a baradosa.

277

Mataan! a so siran a miyamaratiyaya, go pinggalbk iran so manga pipiya, go inipamayandg iran so sambayang, go tiyonay ran so zakat, na adn a bagian iran a balas kiran sii ko Kadnan iran: Go da a pangandam iran, go di siran makamboko (ko alongan a mawri).

278

Hay so miyamaratiyaya, kalkn iyo so Allah, go rndana niyo so miyalamba ko piribaan o skano na khipaparatiyaya.

279

Na amay ka di niyo to nggolawlaan, na tangkda niyo a adn a gobat a phoon ko Allah, go so Sogo Iyan: Na o thawbat kano, na rk iyo so manga watang o manga tamok iyo: Sa di kano makasalimbot, go di kano kasalimbotan.

280

Na amay ka adn a (mababayad a) karrgnan, na manayaw sa taman sa kaloagan. Na so kizadkaan iyo ron, i mapiya rkano o skano na katawi niyo.

281

Na kalkn iyo so gawii a phakandodn kano ron sii ko Allah. Oriyan iyan na itoman sa tarotop ko oman i baraniyawa so pinggalbk iyan, sa di siran kasalimbotan.

282

Hay so miyamaratiyaya, na igira a mindodolona kano sa bayadan sii ko taalik a miyapnto, na soratn iyo skaniyan, go soratn rkano o panonorat sa kapaginontolan. Go di pagnda so panonorat ko kisoratn iyan on: Manaa so inindao ron o Allah, na soratn iyan. Na kdga o mababayad, go kalkn iyan so Allah a Kadnan iyan, go da a khoranga niyan on a mayto bo. Na amay ka so mababayad na korang i sabot, odi na malobay, odi na di niyan khagaga komdg? Na kdgn o wali ron sa kapaginontolan. Na pakizaksii niyo sa dowa a saksi, ko manga mama rkano na amay ka da a kapantagan a dowa a mama; na isa a mama ago dowa a babay, ko khasoat kano ron, a manga saksi, ka o khalipat so isa kiran, na mapakatadm o isa kiran so pd iyan. Na di pagnda so manga saksi igira a tiyawag siran. Na o ba adn a indaraynon iyo ko kisoratn iyo ron, mayto sa mala: Taman ko taalik on: Giyoto man i lbi a kapaginontolan sii ko Allah, go lbi a phakatabang ko kipamayandgn ko kazaksi, go lbi a marani ko di niyo kapakazangka inonta o makawkit sa kandagang a makamomoayan a khatangan iyo to, ka da a dosa niyo ko di niyo ron kisoratn. Na pakizaksi kano igira a pphapasai kano; go di pmarataan so panonorat go so saksi. Na amay ka nggolawlaan iyo to, na mataan aya! a dosa niyo. Na kalkn iyo so Allah; ka phagnda on kano o Allah. Na so Allah na so langowan taman na katawan Iyan.

283

Na o kapantagi kano sa lakawan, go da a khatoon iyo a panonorat, na so manga sanda a matatangan. Na amay ka sarigan o sabaad rkano so sabaad, na tonaya o siyarigan so inisarig on, go kalkn iyan so Allah a Kadnan iyan. Na di niyo phagmaa so kazaksi; ka sadn sa magma on, na mataan! a skaniyan na baradosa so poso iyan. Na so Allah na so gii niyo nggolawlaan na katawan Iyan.

284

Rk o Allah so zisii ko manga langit go so zizii ko lopa. Na o payaga niyo so zisii ko manga ginawa niyo odi na pagmaan iyo to, na phamagitongn rkano to o Allah. Na pnapiyan Iyan so taw a kabaya Iyan, go ziksaan Iyan so taw a kabaya Iyan. Na so Allah na so langowan taman na Gaos Iyan.

285

Piyaratiyaya o Rasol so initoron on a phoon ko Kadnan iyan, go so miyamaratiyaya. Oman i isa kiran na piyaratiyaya niyan so Allah, go so manga malaikat Iyan, go so manga kitab Iyan, go so manga sogo Iyan. "Da a imbida ami a isa bo ko manga sogo Iyan." Na pitharo iran a: "Piyamakin'g ami, go inonotan ami: Na pmaapi kaming Ka, Kadnan ami, ka Ska i khabolosan."

286

Daa iphaliyogat o Allah ko baraniyawa, a rowar ko khagaga niyan. Rk iyan so miyanggalbk iyan (a mapiya), go ithana on so miyanggalbk iyan (a marata). "Kadnan ami, di kaming Ka zalaa o malipat kami odi na maribat kami; Kadnan ami, go di kaming Ka phakaawida sa mapnd lagid o kiyapakiawiding Ka on ko siran a miyaonaan ami; Kadnan ami, go di kaming Ka phakaawida sa di ami khagaga. Na pmaapi kaming Ka, go napii kaming Ka, go kalimoon kaming Ka. Ska i Kadnan ami; na tabangi kaming Ka sa kadaag ami ko pagtaw a da pamaratiyaya."

Total Number of Verses: 200

1

Alif, Lam, Mim. (So Allah i Matao ko paka-aantapan Iyan on.)

2

So Allah! Da a tohan a inonta Skaniyan, - a Oyagoyag, a Thatandingan.

3

Piyakatoron Iyan rka (ya Mohammad) so kitab, a bnar, a tomatanto ko kitab a miyaonaan iyan; go piyakatoron Iyan so Tawrat go so Injil:

4

A miyaona, a toroan ko manga manosiya, go piyakatoron Iyan so padoman. Mataan! a siran a da pamaratiyaya ko manga ayat o Allah na adn a bagian iran a siksa a sangat, na so Allah na Mabagr, a Phapaar ko kandadan'g.

5

Mataan! a so Allah, na da a makaphagma on a mayto bo sii ko lopa, go da sii ko langit.

6

Skaniyan i gii rkano mbontal sii ko manga tiyan sa sadn sa kabaya Iyan. Da a tohan a inonta Skaniyan, a Mabagr, a Mawngangn.

7

Skaniyan so tomiyoron rka ko kitab: So sabaad on na manga ayat a manga rarayag; a giyoto i onayan o kitab: Go adn a pd a makaphlilingowa. Na so pman so siran a katatagoan so manga poso iran sa anganangan na phagonotan iran so minilingo ron, ka tontot ko samok, go tontot ko khaakiran on; na da a matao ko khaakiran on a inonta so Allah. Na so mithatakna ko katao na gi iran tharoon a: "Piyaratiyaya mi oto; ka palaya phoon ko Kadnan ami:" Na da a phakasabot on a rowar ko manga papantas i akal!.

8

"Kadnan ami, ding ka phalinga so manga poso ami ko oriyan o masa a kiyatoroang Ka rkami, go bgi kaming Ka a phoon ko hadapan Ka sa limo; mataan! a Ska na Ska so tanto a phphammgay."

9

"Kadnan ami, mataan! a Ska i mlimod ko manga manosiya sii ko gawii a da a sangka a madadalm on; mataan! a so Allah na di pndorat ko wakto o diyandi."

10

Mataan! a so siran a da pamaratiyaya, - na da dn a milinding kiran o manga tamok iran ago so manga wata iran ko (siksa o) Allah a mayto bo: Ka siran man na siran i itagon o apoy.

11

Lagid o adat o pagtaw o Pir'awn, ago so miyaonaan iran a piyakambokhag iran so manga ayat Ami, na bininasa siran o Allah sabap ko manga dosa iran. Na so Allah na maylot i kandadan'g.

12

Tharoang ka ko siran a da pamaratiyaya a: Ndaagn kano dn go thimoon kano ko naraka Jahannam, - a mikharatarata a darpa!"

13

"Sabnar a adn a tanda iyo sii ko dowa pagtaw a miyakambaratmowa: Adn a isa a pagtaw a gii makimbonoay sa lalan ko Allah, go adn a salakaw ron a kapir; a pkhaylay ran siran a katatakpan siran ko kaylay a mata. Na so Allah na ipmbagr Iyan so tabang Iyan ko taw a kabaya Iyan. Mataan! a matatago roo man so titho a thoma ko adn a manga kaylay niyan."

14

Inibarayat ko manga manosiya so kabaya ko pkhakababayaan a manga babay go manga wata; go manga kakawasaan a piyanimo a bolawan ago pirak; go manga koda a khitatandaan; go manga pangangayamn go manga babasoka. Giyoto man na matag sagad a kapipiya ginawa ko kawyagoyag sa doniya; na so Allah na Ron so mapiya a khandodan.

15

Tharoang ka a: Ba ko rkano phanothola so mapiya a di giyoto? Adn a bagian o siran a miyamananggila sii ko Kadnan iran a manga sorga, a pphamangondas ko kababaan iyan so manga lawasayg; a kakal siran on; go manga karoma a manga soti, go kasosoat a phoon ko Allah. Na so Allah na phagilayn Iyan so manga oripn Iyan,

16

Siran na gi iran tharoon a: "Kadnan ami, mataan! a miyaratiyaya kami: Na napiyang Ka rkami, so manga dosa mi, go pakalidasa kaming Ka ko siksa ko naraka;"

17

A manga papantang, go miyamangimbnar go pphamangongonotan; go pphamammgay; go pphamangni sa maap ko kapkhakalibabas iyan.

18

Pizaksian o Allah; a mataan aya! a da a patot a pzoasoatn a inonta Skaniyan; go (pizaksian o) manga malaikat, go so adn a manga katao niyan, a mamamayandg ko kapaginontolan. Da a patot a pzoasoatn a inonta Skaniyan, a Mabagr, a Mawngangn.

19

Mataan! a aya okit ko kapagintaw sii ko Allah na so Islam: Na kna a ba da pagayonayon so piyamgan ko kitab inontabo ko oriyan o kiyapakatalingoma kiran o katao, ka minddngkiya siran. Na sa taw a ongkirn iyan so manga ayat o Allah, na mataan! a so Allah na magaan i kapamagitong.

20

Na amay ka pamawalng ka iran, na tharoang ka a: "Inimbayorantang akn so ginawa ko ko Allah go so taw a miyonot rakn." Na tharoang ka ko siran a piyamgan ko kitab ago so manga Ommi a: "Ino mimbayorantang kano?" Na o mimbayorantang siran, na sabnar a matoro siran, na o talikhod siran, na aya bo a paliyogat rka na so kisampay (o sogoan); ka so Allah na phagilayn Iyan so manga oripn Iyan.

21

Mataan! a so siran a di mapaparatiyaya ko manga ayat o Allah, go pphamono on iran so manga nabi sa di patot, go pphamono on iran so pphamanogo ko kapaginontolan ko manga manosiya, na pphamanotholang ka kiran so siksa a malipds.

22

Siran man so miyailang so manga galbk iran sii sa doniya, go sa akhirat, go da a bagian iran a phamakatabang.

23

Bang ka da katokawi so siran a bigan siran sa kipantag ko kitab? A ipthawag kiran so kitab o Allah, ka an Iyan siran makokom, oriyan iyan na pthalikhod so salompok kiran a siran na somasangka siran.

24

Giyoto man na sabap sa mataan! a siran na pitharo iran a: "Da dn a kakhaskho a rkami o apoy a rowar ko manga alongan a maiitong:" Na miyakalimpang kiran ko okit iran ko kapagintaw so pimbabaas iran a kabokhag.

25

Na antonaa i khasowa iran amay ka limodn Ami siran ko gawii a da a sangka a madadalm on, go itoman sa tarotop ko oman i baraniyawa so pinggalbk iran, sa di siran kasalimbotan?

26

Tharoang ka: "Ya Allah! a Khirk ko kadato, ipmbgaing Ka so kadato ko taw a kabayaa Ka, go pphokasn Ka so kadato ko taw a kabayaa Ka: Go ipphoroo Ka so taw a kabayaa Ka, go ipmbabaa Ka so taw a kabayaa Ka; zisii sa tangan Ka so mapiya. Mataan! a Ska i Gaos ko langowan taman."

27

"Pphakasoldn Ka so gagawii ko dawndaw, go pphakasoldn Ka so dawndaw ko gagawii; go pphakagmawn Ka so oyagoyag phoon ko miyatay, go pphakagmawn Ka so miyatay phoon ko oyagoyag; go priskhiyan Ka so taw a kabayaa Ka, sa di khasar a pandapat."

28

Di khowaa o miyamaratiyaya so da pamaratiyaya a manga panarigan a salakaw ko miyamaratiyaya: Ka sa taw a nggolawla roo, na da ko (agama o) Allah sa mayto bo: Inonta a ba niyo siran khalkn, sa titho a kalk. Na pakipphangalian rkano o Allah a ginawa Niyan; na sii ko Allah so khandodan.

29

Tharoang ka a: "O pagmaa niyo so zisii ko manga rarb iyo odi na payagn iyo skaniyan, na katawan dn oto o Allah; go katawan Iyan so nganin a zisii ko manga langit, go so zisii ko lopa. Na so Allah na so langowan taman na Gaos Iyan."

30

"Sii ko gawii a matoon o oman i baraniyawa so pinggalbk iyan a mapiya a mimasa, go so pinggalbk iyan a marata, na mandingan dingan iyan a oba bo khalti (so marata) ago skaniyan sa lt a mawatan. Na pakipphangalian rkano o Allah a ginawa Niyan. Na so Allah na Malai-gagaw ko manga oripn Iyan."

31

Tharoang ka (ya Mohammad) a: "O skano na khabayaan iyo so Allah, na onoti ako niyo: Ka kababayaan kano o Allah go napi Niyan rkano so manga dosa niyo: Ka so Allah na Manapi, a Makalimoon."

32

Tharoang ka a: Onoti niyo so Allah ago so Rasol: Na o talikhod siran, na mataan! a so Allah na di Niyan khabayaan so da pamaratiyaya.

33

Mataan! a so Allah na tinindos Iyan so Adam go so Noh, go so mbawataan o Ibrahim, go so mbawataan o Imran ko manga kaadn (sii ko masa iran),

34

Manga moriyataw, a so sabaad on na phoon ko sabaad: Na so Allah na Pphakan'g, a Matao.

35

Gowani na pitharo (o Hannato a) karoma o Imran a: "Kadnan ko, mataan! a sakn na inizamaya akn a phaladn akn Rka so zisii sa tiyan akn sa da a sangkot iyan: Na tarimaang Ka rakn: Ka mataan! a Ska so Pphakan'g, a Matao."

36

Na gowani a imbawata iyan, na pitharo iyan a: "Kadnan ko, mataan! a sakn na inimbawata akn skaniyan na babay!" Na so Allah i lbi a Matao ko inimbawata – "Na da ko mama i ba lagid o babay. Na mataan! a sakn na inibtho akn on so Maryam, go mataan! a sakn na iplindong akn Rka ago so manga moriyataw niyan ko shaytan, a pimorkaan."

37

Na tiyarima o Kadnan iyan sa katarima a mapiya: Go piyakatho Iyan sa katho a mapiya: Na tiyagikor skaniyan o Zakariya. Na oman on somold so Zakariya ko mihrab, na makatoon on sa pagpr. Na pitharo iyan a: "Hay Maryam! andang ka dn nai miyakowa?" Pitharo iyan a: "Giyaya na phoon ko Allah: Mataan! a so Allah na priskhiyan Iyan so taw a kabaya Iyan, sa di khawma kirakira."

38

Roo dn miyangni so Zakariya ko Kadnan Iyan, sa pitharo iyan: Kadnan ko, bgi akong Ka a phoon Rka sa moriyataw a soti: Mataan! a Ska i Pphakan'g ko pangni!

39

Na tiyawag skaniyan o malaikat a skaniyan na tomitindg a gii zambayang ko Mihrab: "Mataan! a so Allah na pakiphanothol Iyan rka (a ipmbawata aka) so Yahya, a tomatanto ko katharo a phoon ko Allah, go nakoda, go pindiyara, go nabi, - a pd ko minggagalbk sa manga pipiya."

40

Pitharo iyan: "Kadnan ko! andamanaya i kakhaadn rakn o wata, a sabnar a riyaot ako o kaloks, go so karoma ko na balk?" Pitharo o malaikat a: "Giyoto dn man, ka so Allah na pnggolawlaan Niyan so kabaya Iyan."

41

Pitharo iyan: "Kadnan ko, bgi akong Ka sa nanao." Pitharo (o malaikat) a: "Aya nanaong ka na ding ka mipmbitiyarai so manga manosiya sa tlo alongan inonta a kaproayat. Na pzabotang ka so Kadnan ka sa madakl, go pthasbik ka sii ko kagabigabi go so kapitapita."

42

Na gowani na pitharo o malaikat a: Hay Maryam, mataan! a so Allah na tinindos ka Niyan go siyoti ka Niyan - go tinindos ka Niyan ko manga babay ko manga kaadn.

43

"Hay Maryam, pangongonotan ka ko Kadnan ka: Go sojiod ka, go phroko ka a pd ko pphroroko."

44

Giyoto man na pd ko manga tothol a gaib, a iphagilaham Ami rka (ya Mohammad): Ka di ka kiran makamamasa gowani ko ipphangithog iran so manga pansom iran (ka pagilayn), o antawaa kiran i makatagikor ko Maryam: Go di ka kiran makamamasa gowani ko pphangasasawal siran.

45

Gowani na pitharo o malaikat a: "Hay Maryam, mataan! a so Allah na adn a pakiphanothol Iyan rka a katharo a phoon Rkaniyan a: Aya ngaran iyan na Al-Masih Eysa a wata a mama o Maryam, a mala i mnang sii sa doniya ago sa akhirat go pd ko manga rarani ko Allah;"

46

"Go mipmbitiyarai niyan so manga manosiya sii ko saloyota, go so kakhasad iyan. Go pd ko manga bilangataw."

47

Pitharo (o Maryam): "Kadnan ko, andamanaya i kakhaadn rakn o wata a da a miyakakhbot rakn a mama?" Pitharo (o malaikat): "Giyoto dn man, ka so Allah na phagadnn Iyan so nganin a kabaya Iyan: igira a ipnggolalan Iyan so kabaya Iyan, na aya bo a ptharoon Iyan on, na 'Kon', na khaadn!"

48

Go ipagndao Niyan on so kasorat go so ongangn go so Tawrat go so Injil,

49

Go sogo ko manga moriyataw o Israil: (na pitharo iyan:) "Mataan! a sakn na sabnar a adn a minitalingoma ko rkano a tanda a phoon ko Kadnan iyo, ka mataan! a sakn na khambaalan ko rkano so botha, a lagid o bontal a papanok, na iyopn ko skaniyan, na mbaloy a papanok sabap sa idin o Allah: Go pkhapiya ko so bota, go so pphanggaln, go pkhaoyag akn so miyamatay, sa sabap sa idin o Allah; go maphanothol akn rkano so pkhakan iyo, go so mbbtsn iyo ko manga walay niyo." Mataan! a adn a matatago saya man a titho a nanao niyo o skano na khipaparatiyaya;

50

"Go tomatanto ko miyaonaan ko a Tawrat; go phakaing ko rkano so sabaad ko inisapar rkano; go adn a minitalingoma ko rkano a tanda a phoon ko Kadnan iyo. Na kalkn iyo so Allah, go onoti ako niyo."

51

"Mataan! a so Allah i Kadnan ko go Kadnan iyo; na zoasoata niyo Skaniyan. Giyaya i okit a ontol!."

52

Na kagiya a magda kiran o Eysa so da kaparatiyaya, na pitharo iyan: "Antawaa i manga tabanga akn sii ko Allah?" Pitharo o manga Hawariyyon a: "Skami i manga tabanga o Allah: Piyaratiyaya mi so Allah, na zaksiing ka a mataan! a skami na mimbayorantang kami (Ron)."

53

"Kadnan ami, piyaratiyaya mi so initoron Ka, go inonotan ami so sogo; na pakisoratn kaming Ka a pd ko manga saksi."

54

Na miyagikmat siran, na biyadalan o Allah so ikmat iran, ka so Allah i lawan ko manga baraikmat.

55

Gowani na pitharo o Allah: "Hay Eysa, mataan! a Sakn na thangann Akn ska, go iphoro Akn ska sii ko hadapan Ko go zoting Ko ska phoon ko siran a da pamaratiyaya; go mbalowing Ko so siran a miyamangonot rka a makaombaw ko siran a da pamaratiyaya, taman ko alongan a qiyamah: Oriyan iyan na Sakn i khandodan iyo, na kokomng Ko skano ko nganin a da kano ron pagayonayon."

56

"Na so pman so siran a da pamaratiyaya, na ziksaan ko siran sa siksa a sangat sii sa doniya, go sa akhirat, go da a phamakatabang kiran."

57

"Na so pman so siran a miyamaratiyaya, go pinggalbk iran so manga pipiya, na itoman Iyan kiran so manga balas kiran; na so Allah na di Niyan khabayaan so da pamaginontolan."

58

Giyaya na pphanotholn Ami rka a pd ko manga ayat go so pananadm a kokoman.

59

Mataan! a aya lagid o Eysa sii ko Allah na lagid o Adam; a inadn Iyan a phoon sa botha, oriyan iyan na pitharo Iyan on so: "Kon", na miyaadn.

60

(Giyaya) So bnar a phoon ko Kadnan ka; na di ka phangpd ko pkhakadowadowaan.

61

Na sa taw a mamawal rka on, ko oriyan o kiyapakatalingoma rka o katao, na tharoang ka a: "Song kano sii, ka tawagn tano so manga wata ami, go so manga wata iyo, go so manga babay rkami, go so manga babay rkano, go so manga ginawa mi, go so manga ginawa niyo. Oriyan iyan na mangangarapan tano, sa balowin tano a so morka o Allah na itomparak Iyan ko manga bokhag!"

62

Mataan aya! a skaniyan dn so manga tothol a bnar: Go da a tohan a inonta so Allah; na mataan! a so Allah na titho a Skaniyan so Mabagr, a Mawngangn.

63

Na amay ka tomalikhod siran, na mataan! a so Allah na katawan Iyan so pphamaminasa.

64

Tharoang ka: "Hay manga taw a tiyoronan ko kitab, song kano ko katharo a ndatadatar tano ron a: Da a pzoasoatn tano a salakaw ko Allah; go da a isakoto tano Ron a mayto bo; go di khowaa o sabaad rktano so sabaad a manga katohanan a salakaw ko Allah." Na o talikhod siran, na tharoa niyo a: "Zaksii niyo a mataan! a skami na mbabayorantang kami (ko Allah)."

65

Hay manga taw a tiyoronan ko kitab, ino niyo gii phapawalai so makapantag ko Ibrahim, a da toronn so Tawrat ago so Injil inonta ko oriyan iyan? Badaa manga sabot iyo?

66

Ino kano wai! a skano na siran aya na pphamawaln iyo ko adn a katao niyo ron. Na, go niyo wai gii phapawalai so da a mlng iyo ron? A so Allah i Matao, na skano i di manga tatao!

67

Da ko btad o Ibrahim iba Yahodi go kna a ba Kristiyan; na ogaid na skaniyan na tomataliyadok ko bnar, a mbabayorantang, na da mabaloy a pd ko manga pananakoto.

68

Mataan! a aya patot a marani ko manga manosiya ko Ibrahim, na sabnar a so siran a miyamangonot on, go giya ungkai a Nabi (a so Mohammad) go so miyamaratiyaya: Na so Allah i somisyap ko miyamaratiyaya.

69

Miyandingandingan o isa ka sagorompong ko tiyoronan ko kitab a oba kano iran bo khadadag. Na da a khadadag iran, a rowar ko manga ginawa iran, sa di iran maiin'ngka!

70

Hay manga taw a tiyoronan ko kitab, ino niyo phagongkira so manga ayat o Allah a skano na kazasaksian niyo?

71

Hay manga taw a tiyoronan ko kitab, ino niyo pkhmbotn ko bnar so ribat, go niyo pphagmaa so bnar, a skano na katawan niyo?

72

Na pitharo o isa ka sagorompong ko tiyoronan ko kitab a: "Paratiyayaa niyo so initoron ko miyamaratiyaya, ko awal o kadawndaw, na ongkira niyo ko akir iran; ka an siran mamakakasoy;"

73

"Go da a pharatiyayaa niyo a rowar ko taw a miyonot ko okit iyo." Tharoang ka a: "Mataan! a aya toroan na so toroan o Allah: (go di kano pharatiyaya) sa ba adn a kabgan a isa bo sa lagid o inibgay rkano? O di na ba adn a makapamawal kiran rkano sii ko Kadnan niyo?" Tharoang ka a: "Mataan! a so kakawasaan na zisii sa tangan o Allah: Ipmbgay Niyan ko taw a kabaya Iyan: Ka so Allah na Maginawa, a Matao."

74

Ipphamili Iyan so limo Iyan ko taw a kabaya Iyan; ka so Allah i Khirk ko kakawasaan a mala.

75

Na adn a pd ko tiyoronan sa kitab a taw, a amay ka sarigan ka sa tamok a madakl, na tonayn iyan rka; go adn a pd kiran a taw, a amay ka sarigan ka sa salad a dinar, na di niyan rka thonayn inonta ko kathaythay a katitindgang ka on, giyoto na sabap sa mataan! a siran na pitharo iran a: "Da a okit a kakhadosa mi sii ko manga Ommi." Na iphagangkob iran ko Allah so kabokhag, a siran na katawan Iyan (a siran na manga bokhag).

76

Oway na sadn sa taw a itoman iyan so diyandi iyan go mananggila, - na mataan! a so Allah na pkhababayaan Iyan so khipanananggila.

77

Mataan! a so siran a ipphamasa iran so diyandi o Allah ago so manga sapa iran sa arga a mayto, na siran man na da a kipantag iran ko akhirat: Go di siran ipmbitiyarai o Allah go di Niyan siran ilayn ko alongan a qiyamah, go di Niyan siran sotin: Go adn a bagian iyan a siksa a malipds.

78

Na mataan! a adn a pd kiran a salompok a ipphamagalin iyan so manga dila iran ko kitab, ka an iyo to tarimaa sa pd ko kitab, a kna a ba oto pd ko kitab; go gi iran tharoon a: Giyoto na phoon ko hadapan o Allah, a kna a ba oto phoon ko hadapan o Allah: Ka iphagangkob iran ko Allah so kabokhag, a siran na katawan iran (a siran na manga bokhag)!

79

Di patot ko manosiya, a ibgay ron o Allah so kitab; - go so ongangn, go so kananabii, i ba sa oriyan iyan na tharoon iyan ko manga manosiya a: "Mbaloy kano a manga oripn ko a sambi o Allah:" Na ogaid na (aya tharoon iyan na:) "Mbaloy kano a manga olama sabap ko skano na ipphangndao niyo so kitab, go sabap ko skano na pphangadian iyo."

80

Go (di patot) o ba niyan rkano sogoon a kakowaa niyo ko manga malaikat go so manga nabi a manga kathanan; ka ino niyan rkano zogoon so kaongkir ko oriyan o masa a kambabayorantang iyo?

81

Na gowani a mbaalan o Allah so diyandi ko manga nabi, na (pitharo Iyan:) "Ibt ka so inibgay Akn rkano a kitab ago ongangn; na sa oriyan iyan na adn a phakatalingoma rkano a sogo, a tomatanto ko matatangan iyo (skaniyan so Mohammad) na paratiyayaa niyo dn go tabangi niyo dn skaniyan." Pitharo Iyan: "Ino miyayon kano, go tiyarima iyo angkoto a diyandi Akn?" Pitharo iran a: "Miyayon kami." Na pitharo Iyan a: "Zaksii niyo, go Sakn na pd iyo a pd ko manga saksi."

82

Na sadn sa tomalikhod ko oriyan oto, na siran man na siran i manga songklid.

83

Ba so salakaw ko agama o Allah i pmbabanogn iran? - a (sii ko Allah) mimbayorantang so matatago ko manga langit go so lopa, sa kapangongonotan go tgl: Go Ron siran phamakandoda.

84

Tharoang ka a: "Piyaratiyaya mi so Allah, go so (Qor'an a) initoron rkami go so initoron ko Ibrahim, go so Ismail, go so Is'haq, go so Ya'qob, go so manga mori iran a taw, go so inibgay ko Mosa, go so Eysa, go so manga nabi, a phoon ko Kadnan iran: da a imbida ami kiran a isa bo, go skami na Ron kami mimbayorantang."

85

Na sadn sa mbabanog, sa salakaw ko Islam a okit ko kapagintaw na da dn a khatarima a phoon rkaniyan; go skaniyan sii sa akhirat na pd dn ko manga logi (a manga taw ko naraka).

86

Andamanaya i kapnggonanao a o Allah ko pagtaw a miyamangongkir ko oriyan o kiyaparatiyaya iran go kiyazaksian iran a mataan! a so sogo na bnar go miyakatalingoma kiran so manga rarayag a karina? Na so Allah na di Niyan pnggonanaon so pagtaw a da pamaginontolan.

87

Siran man na aya balas kiran na mataan! a mitomparak kiran so morka o Allah, go so manga malaikat, go so manga manosiya a kasama sama iran;

88

Makakakal siran on; di kiran maphagkhapkhap so siksa, go di kiran mathataalik;

89

Inonta bo so siran a mithatawbat ko oriyan oto, go miphipiyapiya; ka mataan! a so Allah na Manapi, a Makalimoon.

90

Mataan! a so siran a miyamangongkir ko oriyan o kiyaparatiyaya iran, oriyan iyan na piyagomanomanan iran so kaongkir, - na di dn matarima so tawbat iran; ka siran man na siran so miyangadadadag.

91

Mataan! a so siran a da pamaratiyaya, a miyamatay ko di iran kapaparatiyaya, - na da dn a matarima a phoon ko nggagaysa kiran a makapno ko lopa a bolawan, o aonn on. Na siran man na adn a bagian iran a siksa a malipds, go da a mamakatabang kiran.

92

Di kano dn iraot ko mapiya taman sa di kano nggasto ko pkhababayaan iyo; na sadn sa manggasto niyo a nganin o nganin, na mataan! a so Allah na katawan Iyan oto.

Part 4

93

Langowan o pangn'ngkn na miyabaloy a halal ko manga moriyataw o Israil, inonta so hiyaram o Israil sa ginawa niyan, ko dapn kitoronn ko Tawrat. Tharoang ka a: "Bayann iyo so Tawrat na, go niyo batiyaa o skano i manga bnar."

94

Na sadn sa itmpo niyan ko Allah so kabokhag ko oriyan oto, na siran man na siran so da pamaginontolan.

95

Tharoang ka a: "Bnar so Allah: Na kdga niyo so okit o Ibrahim, a makaoontol; na da mabaloy a pd ko manga pananakoto."

96

Mataan! a aya paganay a walay a mbalayn a rk o manga manosiya na so (Masjid Al-Haram a) matatago sa Makkah a babarakatn go toroan ko manga kaadn:

97

Katatagoan sa manga tanda a manga rarayag; a so tinindgan o Ibrahim; na sadn sa makasold on na miyabaloy a somasarig; na paliyogat o Allah ko manga manosiya so kapnay-hajji ko Baytollah, - ko taw a phakagaos ko okit on; na sa taw a mongkir, na mataan! a so Allah na Kawasa ko manga kaadn.

98

Tharoang ka: "Hay manga taw a tiyoronan ko kitab, ino niyo di pharatiyayaa so manga ayat o Allah, a so Allah i saksi ko gii niyo nggolawlaan?"

99

Tharoang ka: "Hay manga taw a tiyoronan ko kitab, ino niyo pphangalangi ko lalan o Allah, so taw a miyaratiyaya, a iphloloba iyo sa lalan a bkhog, a skano i manga saksi on? Na kna a ba kalilipati o Allah so gii niyo nggolawlaan."

100

Hay so miyamaratiyaya! amay ka onotan iyo so isa ka sagorompong ko siran a piyamgan ko kitab, na mapakakasoy kano iran ko oriyan o kiyaparatiyaya niyo ko kakakapiri!

101

Na andamanaya i kapkhapir iyo a skano na kapphangadian rkano so manga ayat o Allah, go zisii rkano so sogo Iyan? Na sadn sa kpitan iyan so (kitab o) Allah na sabnar a miyatoro ko lalan a matitho.

102

Hay so miyamaratiyaya, kalkn iyo so Allah sa titho a kalk Rkaniyan, na oba kano mamatay sa di kano Ron makambabayorantang.

103

Go kpiti niyo so tali o Allah sa kasamasama niyo, go di kano pmblablag; go tadmi niyo so limo rkano o Allah; gowani ko mriridoay kano na tinimo Iyan so manga poso iyo, na miyabaloy kano so sabap ko limo Iyan, a magariyari; go miyatago kano ko thbaan o landng a apoy, na siyabt kano Niyan on. Lagid anan a kapphakaliwanaga rkano o Allah ko manga tanda Iyan: ka ang kano makakdg sa ontol.

104

Na mbaloy so isa rkano ka sagorompong a ipphanolon iran so mapiya, go ipzogo iran so okit a mapiya, go ipzapar iran so marata: Na siran man na siran so phamakaslang sa maliwanag.

105

Na oba kano mabaloy a lagid o siran a mimblablag siran go da siran pagayonayon ko oriyan o kiya pakatalingoma kiran o manga rarayag a karina: Na siran man na adn a bagian iran a siksa a lbi a mala.

106

Sii ko gawii a adn a makatataid a manga paras, go adn a makaitmitm a manga paras: Na so pman so siran oto a miyakaitmitm so manga paras iran, na (tharoon kiran:) "Ino kano pagongkir ko oriyan o kiyaparatiyaya niyo? Na taami niyo so siksa sabap ko kiyaongkir iyo."

107

Na so pman so siran oto a miyamakataitaid so manga paras iran, - na matago ko (sorga a) limo o Allah: Sa ron siran on dn makakakal.

108

Giyaya man so manga ayat o Allah a pphangadian Ami rka ya sii ko bnar: Na di kabaya o Allah o ba Niyan kasalimboti so manga kaadn.

109

Na rk o Allah so nganin a zisii ko manga langit go so nganin a zisii ko lopa: Na sii bo phakandoda ko Allah so pkhakawlawla.

110

Miyaadn kano a mapiya a pagtaw, a piyakagmaw ko manga manosiya, a ipzogo iyo so okit a mapiya, go ipzapar iyo so marata, go paparatiyayaan iyo so Allah. Na o maratiyaya so tiyoronan ko kitab, na mataan! a adn a mapiya a bagian iran: So sabaad kiran na mapaparatiyaya, na so kadaklan kiran na manga songklid.

111

Da dn a khibinasa iran rkano, a rowar sa sakit a ginawa; na o pakimbonoay siran rkano, na thalikhodan kano iran, oriyan iyan na di siran khatabangan.

112

Minikolob kiran so kahinaan, apiya anda siran pkhatoon, inonta bo sa (kom'pit) ko tali a phoon ko Allah go so tali a phoon ko manga manosiya; go adn a miyatangkd kiran a rarangit a phoon ko Allah, go minikolob kiran so kapakarondan. Giyoto man na sabap sa mataan! a siran na miyabaloy siran a moongkir ko manga ayat o Allah, go pphamonoon iran so manga nabi sa di ontol; giyoto man na sabap ko kiyandarowaka iran go miyabaloy siran a mimamalawani.

113

Kna a ba siran mlagilagid: Kaadn a pd ko tiyoronan ko kitab a pagtaw a moontol; a pphangadian iran so manga ayat o Allah ko manga oras ko kagagawii, a siran na pphamanodiod siran.

114

Paparatiyayaan iran so Allah ago so alongan a mawri; go ipzogo iran so okit a mapiya, go ipzapar iran so marata; go pphagoradorad siran ko manga pipiya: Na siran man na pd ko manga bilangataw.

115

Na sadn sa nggolawlaan iran a mapiya, na di kiran dn oto mapapas; ka so Allah na katawan Iyan so khipanananggila.

116

Mataan! a so siran a da pamaratiyaya, - na da dn a milinding kiran o manga tamok iran go so manga wata iran ko (siksa o) Allah a mayto bo: Ka siran man i manga taw ko naraka, - sa ron siran on dn makakakal.

117

Aya ibarat o ipphammgay ran sangkai a kawyagoyag sa doniya na lagid o ndo a katatagoan sa mayaw a minisogat ko pr o pagtaw a siyalimbotan iran so manga ginawa iran na miyabinasa niyan oto: Na da siran salimboti o Allah, na ogaid na so manga ginawa iran i pzalimbotan iran.

118

Hay so miyamaratiyaya, di kano khowa sa manga bolayoka ko salakaw rkano: Ka di iran rkano khksan so kapaminasa. Na mazizinganin iran so kapakandadamar iyo: Sabnar a miyapayag so rarangit a phoon ko manga ngari iran: Na so pag-umaan o manga rarb iran i lbi a mala. Sabnar a piyakarayag Ami rkano so manga tanda, o skano na pnggdagdaan iyo.

119

Ino kano wai! a skano na pkhababayaan iyo siran, na di kano iran khababayaan, - go paparatiyayaan iyo so kitab sa kalangolangowan iyan. Na igira a minithoona kano iran, na tharoon iran a: "Miyaratiyaya kami:" Na igira a miyakasibay siran, na pangkhbn iran makapantag rkano so manga kmr iran phoon sa otg. Tharoang ka a: "Mamatay kano sabap ko otg iyo; mataan! a so Allah na katawan Iyan so zisii ko manga rarb."

120

O masogat kano a mapiya, na ikharata a ginawa iran; na o masogat kano a marata, na ipakapiya a ginawa iran. Na o phantang kano go mananggila kano, na da a mabinasa rkano o tipo iran a mayto bo; mataan! a so Allah na katawan Iyan so gi iran nggolaolaan.

121

Na gowani na miyangabalaga ka a phoon ko walaing ka, ka phakadarpaan ka so miyamaratiyaya ko manga darpa ko kambonoay: Na so Allah na Pphakan'g, a Matao:

122

Gowani a manggdagda o dowa lompok rkano a kakhalk iran; na so Allah i tomiyabang kiran, na so Allah i sarigi o miyamaratiyaya.

123

Na sabnsabnar a tiyabangang kano o Allah sii sa Badr, a skano na mitatanan; na kalkn iyo so Allah; ka ang kano makapanalamat.

124

Gowani na giing ka tharoon ko miyamaratiyaya a: "Ba rkano di phakatiyokop so panabang rkano o Kadnan iyo a tlong gibo a manga malaikat a piyamakatoron?"

125

"Oway, - amay ka makatigr kano, go mananggila kano na, go kano iran matkaw gomobat sangkai a masa iran, na phanabangan kano o Kadnan iyo sa limang gibo a manga malaikat a manga biyaksa."

126

Na da a inimbaal o Allah ko panabang a rowar sa pangoyat rkano, go an thatana so manga poso iyo sa sabap rkaniyan: Na da ko panabang inonta na sii bo phoon ko hadapan o Allah, a Mabagr, a Mawngangn:

127

Ka mbinasaan Iyan so sabaad ko siran a da pamaratiyaya odi na phakaytoon Iyan siran, ka an siran mamakandod, a da a miyambatas iran.

128

Daa kapaar ka, ko khasowa a mayto bo: O phakatawbata Niyan siran, odi na siksaan Iyan siran; ka mataan! a siran na da pamaginontolan.

129

Na rk o Allah so nganin a zisii ko manga langit ago so nganin a zisii ko lopa. Pnapiyan Iyan so taw a kabaya Iyan go ziksaan Iyan so taw a kabaya Iyan; ka so Allah na Manapi, a Makalimoon.

130

Hay so miyamaratiyaya, di niyo khana so piribaan, a pkhatakp a gii mathaktakp; go kalkn iyo so Allah; ka ang kano makaslang sa maliwanag.

131

Pananggilai niyo so apoy, a so inithiyagar ko da pamaratiyaya.

132

Go onoti niyo so Allah go so sogo; ka ang kano mipangalimo.

133

Na pamakoti niyo so maap a phoon ko Kadnan iyo, go so sorga a aya kablang iyan na so kablang o manga langit ago so lopa, a inithiyagar ko miyamananggila,

134

Siran na pphammgay siran, ko kapakadadaya, ago so masikot; go itataknl iran a ginawa iran ko gani, go manga nanapi ko manga manosiya; ka so Allah na pkhababayaan Iyan so miphipiyapiya;

135

Go siran na igira a miyakanggolawla siran sa pakasisingay, odi na kasalimbotan iran so manga ginawa iran, na katadman iran so Allah, na mangni siran on sa maap makapantag ko manga dosa iran, - ka ba adn a phakada ko manga dosa a rowar ko Allah? - go di iran thatapn so pinggolawla iran (a marata) a siran na katawan iran.

136

Siran man na adn a balas kiran a maap a phoon ko Kadnan iran, go manga sorga a pphamangondas ko kababaan iyan so manga lawasayg, - a makakakal siran on, a miyaka piyapiya a balas ko manga baraamal!

137

Sabnar a miyaypos ko miyaonaan iyo o piyangaookitan: Na ndalakaw kano sii ko lopa, na pagilaylaya niyo o antonaa i miyambtad o kiya akiran ko piyamakambokhag iran (so manga rasol).

138

Giyaya na osayan ko manga manosiya, go toroan go thoma ko miyamananggila!

139

Na di kano khalobai, go di kano pmboko: Ka skano i maporo o skano na khipaparatiyaya.

140

O masogat kano a pali, na sabnar a miyasogat so pagtaw a pali a izan iyan, na giyoto man so manga alongan a gii Ami oto pakazambisambiin ko ltlt o manga manosiya: Go kagiya a phntoon o Allah so siran a miyamaratiyaya, go mbalowin Iyan so sabaad rkano a manga shahid. Na so Allah na di Niyan khabayaan so da pamaginontolan;

141

Go kagiya zotin o Allah so siran a miyamaratiyaya, go mbinasaan Iyan so manga kapir.

142

Ba niyo tatarimaa sa phakasold kano ko sorga a dapn mapnto o Allah so siran a miyamanagontaman rkano go da Niyan pn mapnto so manga papantang?

143

Na sabnsabnar a skano na gii niyo zingayoon so kapatay ko da niyo ron pn kitmo: Na sabnar a miyaylay niyo to a skano na kababantayan niyo!

144

Na da ko Mohammad inonta na sogo, a sabnar a miyaipos ko miyaonaan iyan so manga sogo. Ino amay ka matay odi na maprang, pmbaklid kano ko kakakapir iyo? Na sadn sa mbaklid ko kakakapiri ron, na da dn a mibinasa niyan ko Allah a mayto bo; na mbalasan dn o Allah so miyamanalamat.

145

Na da a baraniyawa a ba matay inonta o sabap sa idin o Allah, ko misosorat a adiyal: Na sadn sa kabaya iyan so balas sa doniya, na mbgan Ami ron; go sadn sa kabaya iyan so balas ko akhirat, na mbgan Ami ron. Na mbalasan Ami dn so miyamanalamat.

146

Na madakl a nabi a miyakimbonoay, a biyabid o sagorompong a madakl. Na da siran kalobayi sabap ko minisogat kiran (a tiyoba) sii ko lalan o Allah, go da siran lngk, go da siran sangkop. Na so Allah na pkhababayaan Iyan so manga papantang.

147

Na da a miyabaloy a katharo iran a rowar sa gi iran katharoa sa: "Kadnan ami, maapang Ka rkami so manga dosa mi go so minipmalawani ami sii ko okit ami: Go pakabknang Ka so manga parapara mi, go tabangi kaming Ka ko pagtaw a da pamaratiyaya."

148

Na inibgay kiran o Allah so balas sa doniya, go so mapiya a balas sa akhirat. Ka so Allah na pkhababayaan Iyan so mipiphipiyapiya.

149

Hay so miyamaratiyaya! amay ka onotan iyo so siran a da pamaratiyaya, na maphakandod kano iran ko kakakapiri rkano, na khabaklid kano a miyangalologi.

150

Kna, ka so Allah i tomatabang rkano, na Skaniyan i taralbi a mapiya ko pphamanabang.

151

Ithmo Ami dn ko manga poso o siran a da pamaratiyaya so kalk sabap ko kinisakoton iran ko Allah, ko da a initoron Iyan on a katantowan: Go darpa iran so naraka a mikharatarata a darpa o da pamaginontolan!

152

Na sabnsabnar a tiyoman rkano o Allah so diyandi Iyan gowani ko pphamonoon iyo siran sabap sa idin Iyan, - taman ko kotika a kiyaalapi rkano, go da kano pagayonayon ko sogoan; na siyorang iyo ko oriyan o kiyapakiilayn Iyan rkano ko pkhababayaan iyo. Na adn a pd rkano a taw a kabaya iyan so doniya, go adn a pd rkano a taw a kabaya iran so akhirat. Oriyan iyan na piyakitalikhodan Iyan rkano so siran oto ka thpngan kano Niyan. Na sabnsabnar a pimaapan kano Niyan: Ka so Allah i Malai-gagaw ko miyamaratiyaya.

153

Gowani ko pphamanakdg kano, na da a plilingayn iyo a isa bo, a so Rasol na pthalowan kano niyan sii ko talikhodan iyo. Na biyalasan kano niyan sa boko sabap sa kiyapakamboko (o Rasol), ka an iyo di mipmboko so miyalpas rkano, go so minisogat rkano (a tiyoba). Na so Allah na Kaip Iyan so gii niyo nggolawlaan.

154

Oriyan iyan na piyakatoronan kano Niyan ko oriyan o boko sa sarig a toratod, a pkhikolob ko isa rkano ka sagorompong, go adn a isa ka sagorompong a sabnar a miyapakandamar siran o manga ginawa iran, sa ipphagarangan iran so Allah sa kna a ba bnar a arangan a kadaa mlng. Gi iran tharoon: "Ba adn a kapaar tano ko khasowa a mayto bo?" Tharoang ka a: "Mataan! a so khasowa na palaya kapaar o Allah." Pag-umaan iran ko manga ginawa iran so di iran rka phayagn. Di iran tharoon a: "Opama ka adn a kapaar tano ko khasowa a mayto bo, na da a mabono rktano sii." Tharoang ka a: "Apiya matatago kano ko manga walay niyo, na phakaliyo dn so siran a miyatangkd kiran so kabono sii ko phangakklitan iran;" ka kagiya a thpngan o Allah so zisii ko manga rarb iyo go kagiya a phntoon Iyan so zisii ko manga poso iyo. Na so Allah na katawan Iyan so zisii ko manga rarb.

155

Mataan! a so siran a miyamalagoy rkano ko alongan a kiyapakambaratmowa o dowa madakl, - na aya bo a kiya gawiya kiran o shaytan, na sabap ko sabaad ko (dosa a) miyanggalbk iran. Na sabnsabnar a pimaapan siran o Allah: Ka mataan! a so Allah na Manapi, a Matigr.

156

Hay so miyamaratiyaya, oba kano mabaloy a lagid o siran a da pamaratiyaya, go gi iran tharoon ko manga pagari ran, igira a mindadalakaw siran ko lopa odi na miphrang siran a: "O zisii siran rktano, na da a mamatay kiran, go da a manga bobono kiran;" ka kagiya a mbalowin oto o Allah a kazndit sii ko manga poso iran. Na so Allah i pphangoyag go pzabap ko kapatay, go so Allah na so gii niyo nggolawlaan na phagilayn Iyan.

157

Na ibt o maprang kano, sa lalan o Allah, odi na matay kano, na mataan! a so maap a phoon ko Allah go so limo na tomo a di so pphanimoon iran (a kakawasaan).

158

Na ibt o matay kano, odi na mapulang kano, na sii dn ko Allah i plimodan rkano.

159

Na sabap ko limo a phoon ko Allah na kiyapakananaowan ka siran. Na o miyabaloy ka a makras, a matgas i poso, na giyanatan ka iran dn ko mliliyota rka: Na pmaaping ka siran, go pangnin ka siran sa kada a dosa iran; go pakipphagodasa ka kiran ko pnggolawlaan. Na amay ka matkhs ka (so zowaan), na sariging ka so Allah. Mataan! a so Allah na pkhababayaan Iyan so khisasarig On.

160

Amay ka tabangan kano o Allah, na da a makapgs rkano: Na odi kano Niyan tabangi, na antawaa san i makatabang rkano ko oriyan Iyan? Na so bo so Allah, i sarigi o miyamaratiyaya.

161

Na di patot ko nabi i ba ndonsiyan. Na sadn sa ndonsiyan, na kaawidan iyan so inindonsiyan iyan ko alongan a qiyamah, oriyan iyan na itoman sa tarotop ko oman i baraniyawa so pinggolawla niyan, - sa di siran kasalimbotan;

162

Ino so taw a kidg iyan so kasosoat o Allah, ba lagid o taw a miyakakholokhog sa rarangit a phoon ko Allah?, go darpa iyan so naraka Jahannam, - a mikharatarata a khabolosan!

163

Siran (a miyamangdg ko kasosoat o Allah) i adn a manga daradat iyan sii ko Allah, na so Allah na phagilayn Iyan so gi iran nggolawlaan.

164

Sabnsabnar a inikalimo o Allah so miyamaratiyaya gowani a pakatindgan Iyan siran sa sogo a pd ko manga ginawa iran, a kapphangadian iyan kiran so manga ayat Iyan, go pphakasoti kiran, go makapphangndao kiran ko kitab, go so hadith ka mataan! a miyabaloy siran sa paganay, a titho a matatago ko kadadag a mapayag.

165

Ino a kagiya a masogat kano a tiyoba, a sabnar a minisogat iyo kiran so katatakpan oto, na pitharo iyo a: "Ino wai mapnggolawla?" Tharoang ka a: "Skaniyan na phoon ko manga ginawa niyo (ka sabap ko kiyasoranga niyo ko sogoan o Rasol): Mataan! a so Allah na so langowan taman na Gaos Iyan."

166

Na so tiyoba a minisogat rkano ko gawii a kiya pakambaratmowa o dowa madakl, na sabap sa idin o Allah, go an Iyan mapnto so miyamaratiyaya, -

167

Go an Iyan mapnto so siran a mimomonapik. Na pitharo kiran a: "Song kano sii, na pakimbonoay kano sa lalan ko Allah, odi na pangrn kano." Na pitharo iran a: "O katawi ami i kapakimbonoay, na mataan! a monot kami rkano." Siran sii ko kakakapiri sa alongan oto na lbi a marani siran on a di so paratiyaya, gi iran pakitharo ko manga ngari iran so da ko manga poso iran. Na so Allah i lbi a Matao ko pag-umaan iran.

168

Siran na pitharo iran ko manga pagari ran a mithatalimbagak a: "O inonotan kami ran, na di siran manga bobono." Tharoang ka a: "Rna niyo so manga ginawa niyo ko kapatay, o skano i manga bnar."

169

Na ding ka dn tharimaa so siran a miyangapprang sa lalan ko Allah i ba miyamatay. Kna, ka manga oyagoyag, sii ko Kadnan iran a pphagprn siran;

170

Mabababaya siran sabap ko kiyabgi kiran o Allah ko kakawasaan Iyan: Go pkhababaya siran sabap ko siran oto a da siran pn kiran raotn, a pd ko kiyaganatan iran, da a pangandam iran, go da a mimboko iran (ko alongan a mawri).

171

Pkhababaya siran sabap ko limo a phoon ko Allah ago gagaw, ka mataan! a so Allah na di Niyan pagilangn so balas ko miyamaratiyaya.

172

Siran na tiyarima iran so Allah go so Rasol, ko oriyan o kinisogat kiran o pali, na adn a bagian o miphipiyapiya kiran go miyamananggila a balas a lbi a mala; -

173

Siran na pitharo kiran o manga manosiya a: "Mataan! a so manga manosiya na sabnar a pithampotampongan kano iran, na kalkn iyo siran." Na ba kiran dn miyakawman sa paratiyaya. Go pitharo iran a: "Angkosan kami o Allah, go miyakapiyapiya a sasarigan."

174

Na miyakambalingan siran sabap ko limo a phoon ko Allah ago gagaw - sa da siran maskho a marata. Go kiyaonotan iran so ikasosoat o Allah: Ka so Allah i Khirk ko gagaw a lbi a mala.

175

Mataan! giyoto dn man so shaytan a ipphangangalk iyan so manga tabanga iyan: Na di niyo siran khalkn, go kalkn Ako niyo, o skano na mapaparatiyaya.

176

Na oba ka mapakamboko o siran a pphagoradorad ko kakakapiri: Ka mataan! a siran na da dn a mibinasa iran ko Allah a mayto bo: Kabaya o Allah a da a misnggay Niyan a bagian iran a kipantag sii ko akhirat, go adn a bagian iran a siksa a lbi a mala.

177

Mataan! a so siran a inipamasa iran ko kakhapir so paratiyaya, - na da dn a mibinasa iran ko Allah a mayto bo, go adn a bagian iran a siksa a malipds.

178

Na di dn thangkapn o siran a da pamaratiyaya oba so kapakalalanat Ami kiran na ba aya mapiya ko manga ginawa iran: Ka aya bo a kapakalalanat Ami kiran na an siran makapphamagoman sa dosa: Ka adn a bagian iran a siksa a phakahina.

179

Da ko btad o Allah i ba Niyan ndaraynonn so miyamaratiyaya ko mambbtad iyo, taman sa di niyan misnggay so marata phoon ko mapiya. Go da ko btad o Allah i ba Niyan rkano pakitokawi so migagaib, na ogaid na so Allah na pphamili ko manga sogo Iyan sa kabaya Iyan. Na paratiyayaa niyo so Allah go so manga sogo Iyan: Ka o paratiyaya kano go kano pananggila, na adn a bagian iyo a balas a lbi a mala.

180

Na di thangkapa o siran a ipliligt iran so inibgay kiran o Allah ko kakawasaan Iyan, i ba kiran oto mapiya. Kna, ka marata kiran oto: Ka ithogor kiran dn so inipligt iran sii ko alongan a qiyamah. Na rk o Allah so manga paninggalan ko manga langit go so lopa; na so Allah na so gii niyo nggolawlaan na Kaip Iyan.

181

Sabnsabnar a miyan'g o Allah so katharo o siran a pitharo iran a: "Mataan! a so Allah na pkhamrmran na skami i manga kawasa!" - izorat Ami dn so pitharo iran go so kiyapamonoa iran ko manga nabi sa di ontol, go ptharoon Ami a: "Taami niyo so siksa a phakatotong!"

182

"Giyoto man na sabap ko miniona o manga lima niyo (a dosa): Ka mataan! a so Allah na kna a ba salimbot ko manga oripn Iyan."

183

Siran na pitharo iran a: "Mataan! a so Allah na inisogo Iyan rkami a da a pharatiyayaan ami a sogo taman sa di kami niyan kawitan sa qorban a kn skaniyan o apoy." Tharoang ka a: "Sabnar a minitalingoma rkano o manga rasol a miyaonaan ko, so manga rarayag a karina ago so pitharo iyo: Na ino niyo siran phamonoa, o skano na mmamataan kano!"

184

Na o pakambokhaga ka iran, na sabnar a piyakambokhag mambo so manga sogo a miyaonaan ka, a minitalingoma iran so manga rarayag a karina, go so manga kitab, go so kitab a miyakabgay sa sindaw.

185

Oman i baraniyawa na phakataam sa kapatay: Na ithoman rkano dn sa tarotop so manga balas rkano sii ko alongan a qiyamah. Na sadn sa pakawatann ko naraka, go pakasoldn ko sorga na sabnar a miyagontong: Ka da ko kawyagoyag ko doniya inonta na matag sagad a kabimbanan a phakalimpang.

186

Thiyobaan kano dn sii ko manga tamok iyo go so manga ginawa niyo; go mataan! a adn a khan'g iyo a phaka phoon ko siran a piyamgan ko kitab a miyaonaan iyo, go phakapoon ko siran a miyamanakoto a ringasa a madakl. Na o phantang kano, go mananggila kano, - na mataan! a giyoto man i pamotosan o manga olawla.

187

Gowani a tarimaan o Allah so maylot a diyandi ko siran a piyamgan ko kitab, na (pitharo Iyan:) Mataan! a payaga niyo dn oto ko manga manosiya, go di niyo to phagmaa; na inilbad iran ko oriyan o manga likod iran, go inipamasa iran sa arga a mayto. Na miyakaratarata so piyamasaan iran on!

188

Ding ka dn thangkapa so siran a izosonor iran so miyanggolawla iran, go pkhababayaan iran a kipmbantogn kiran ko da iran manggolawla, - na ding ka siran dn thangkapa ko kapakawatan ko siksa. Na adn a bagian iran a siksa a malipds.

189

Na rk o Allah so kapaar ko manga langit go so lopa; ka so Allah na so langowan taman na Gaos Iyan.

190

Mataan! a adn a matatago ko kiya adna ko manga langit go so lopa, go so gii kapakazambi o gagawii ago so dawndaw, - a titho a manga tanda a rk o adn a manga sabot iyan,

191

A siran na tatadman iran so Allah, a gomaganat siran, sa moontod siran, sa miiga siran, go pphamimikirann iran so kiya adna ko manga langit ago so lopa (gii ran tharoon): "Kadnan ami, dang Ka ini adn na sa ba ilang. Miyasotisoti Ka! na pakalidasa kaming Ka ko siksa ko naraka."

192

"Kadnan ami, mataan! a Ska na sadn sa pakasoldn Ka ko naraka, na sabnar a piyakarondan Ka skaniyan, ka da a bagian o da pamaginontolan a manga tabanga!"

193

"Kadnan ami, mataan! a skami na adn a piyamakin'g ami a pphananawag a ipphananawag iyan so paratiyaya: Sa paratiyayaa niyo so Kadnan iyo, na piyaratiyaya mi. Kadnan ami!. Napiyang Ka rkami so manga dosa mi, go pokasang Ka rkami so manga karataan ami, go tangana kaming Ka a pd ko miphipiyapiya."

194

"Kadnan ami! go bgan Ka rkami so inidiyandii Ka rkami a minggolalan ko manga sogo o Ka, go di kaming Ka phakarondana sii ko alongan a qiyamah: Ka mataan! a Ska na di Ka pndorat ko wakto o diyandi."

195

Na inismbag kiran o Kadnan iran a: "Mataan! a Sakn na di ko pagilangn so galbk o minggalbk rkano, a mama odi na babay: So sabaad rkano, na phoon ko sabaad: Na so siran a miyamanogalin, go piyamakaawa ko manga ingd iran, go riningasa siran makapantag ko lalan Akn, go miyakimbonoay siran go miyaprang siran, - na phokasn Ko kiran dn so manga karataan iran, go phakasoldn Ko siran dn ko manga sorga a pphamangondas ko kababaan iyan so manga lawasayg; - balas a phoon ko hadapan o Allah, ka so Allah na Ron so mapiya a balas."

196

O ba ka malimpang o gii kazorombaling o siran a da pamaratiyaya sii ko manga ingd:

197

Matag sagad a kapipiya ginawa a mayto: Oriyan iyan na aya darpa iran na so naraka Jahannam a: Mikharatarata a kadnan!

198

Ogaid na so siran a miyangongonotan ko Kadnan iran, na adn a bagian iran a manga sorga, a pphamangondas ko kababaan iyan so manga lawasayg; kakal siran roo, - a pananakawan a phoon ko hadapan o Allah; na so zisii ko Allah na aya mapiya a bagian o miphipiyapiya.

199

Na mataan! a adn a pd ko tiyoronan ko kitab, a taw a titho a khipaparatiyaya ko Allah go so initoron rkano, go so initoron kiran, mangangalimbabaan siran ko Allah: Di iran iphamasa so manga ayat o Allah sa arga a mayto! Na siran man na adn a bagian iran a balas kiran sii ko Kadnan iran. Mataan! a so Allah i magaan i itongan.

200

Hay so miyamaratiyaya phantang kano; go pakithobayowa kano sa kapantang; go pakithambda kano; go kalkn iyo so Allah, ka ang kano makadaag.

Total Number of Verses: 176

1

Hay! manga manosiya, kalkn iyo so Kadnan iyo, a so inadn kano Niyan a phoon ko (Adam a) ginawa a isa, go inadn Iyan a phoon rkaniyan so karoma niyan, go miyabmbad phoon sa dowa oto so manga mama a madakl go manga babay, - na kalkn iyo so Allah, a so gii kano makaphapangniya sa sabap Rkaniyan, go (kalkn iyo oba niyo matphd) so manga kathotonganaya: Mataan! a so Allah na tatap a totonggoan kano Niyan.

2

Na bgan iyo ko manga wata a ilo so manga tamok iran, go di niyo pzambia ko marata so mapiya; go di niyo pagaraba so manga tamok iran a mirakhs ko manga tamok iyo. Mataan aya! a skaniyan na miyabaloy a dosa a mala.

3

Na amay ka ikhawan iyo oba kano di makapaginontolan ko manga wata a ilo, na pangaroma kano ko mapiya rkano ko manga babay, sa dowa, odi na tlo, odi na pat (na di niyo plawani); na amay ka ikhawan iyo oba kano di makapaginontolan, na sakataw, odi na so manga sandil iyo. Giyoto man i marani a di niyo kapakaaniyaya.

4

Na bgan iyo ko manga babay so manga btang kiran a pammgayan a miyapnto; na amay ka mapiya sa ginawa iran a kapakakowa niyo ron, na paroliya niyo sa mapiya a da a margn on.

5

Na di niyo mbgan ko manga lalong so manga tamok iran rkano, a so biyaloy kano o Allah a thatandingan on, go pagpra niyo siran on go pakanditara niyo siran on, go tharoa niyo kiran so katharo a mapiya.

6

Na tpngi niyo so manga wata a ilo taman sa o pabila a iraot siran ko kapangaroma; na o khaylay niyo siran sa kabilangataw, na bgan iyo kiran so manga tamok iran go di niyo pharoliya sa kapamagola, go kapamakot, (sa kalk) sa kapakala iran. Na sa taw a kapantagan a kawasa (ko manga wali), na gnggna niyan a ginawa niyan (ko tamok o ilo), go sa taw a kapantagan a kasisikotan, na paroli ron sa so pantag o galbk iyan. Na o pabila a ibgay niyo kiran so manga tamok iran, na pakizaksii niyo siran: Ka so Allah na makatatarotop a pagiitong.

7

Adn a kipantag o manga mama ko kiyaganatan o mbala a loks go so manga dadasg, go adn a kipantag o manga babay ko kiyaganatan o mbala a loks ago so manga dadasg, ko kayto iyan odi na madakl, - kipantag a madidiyangka.

8

Na o pabila makadarpa ko kapmbagibagi so manga tonganay, go so manga ilo, go so manga miskin, na bgi niyo siran on, go tharoa niyo kiran so katharo a mapiya.

9

Na kalkn o siran a adn a khaganatan iran ko oriyan iran a manga moriyataw a manga llmk a ipkhawan iran siran: Na kalkn iran so Allah, go tharo siran sa katharo a mathitho.

10

Mataan! a so siran a phagarabn iran so manga tamok o manga wata a ilo sa kapanalimbot, na aya dn a pkhaarab iran a pkhatago ko manga tiyan iran na apoy: Go makasold siran dn ko kadg!

11

Isosogo rkano o Allah sii ko manga wata iyo a: Bagian o isa mama so lagid o kipantag o dowa babay: Na amay ka siran na manga babay, a (dowa odi na) kalawanan so dowa, na bagian iran so dowa ko tlo bagi ko miniganat iyan; na amay ka sakataw, na bagian iyan so midiya (ko tamok). Na bagian o mbala a loks iyan, rk o oman i isa kiran so ikanm bagi ko miniganat iyan, amay ka adn a wata iyan; na amay ka da a wata iyan, go kapangowarisi skaniyan o mbala a loks iyan, na bagian o ina iyan so ikatlo bagi; na amay ka adn a manga pagari niyan na bagian o ina iyan so ikanm bagi; ko oriyan o wasiyat a ipthanan iyan oto odi na bayadan. So manga loks iyo go so manga wata iyo na di niyo katawan o antawaa kiran i marani rkano a makanggay a gona. Kapharail a phoon ko Allah; mataan! a so Allah na tatap a Matao, a Mawngangn.

12

Na bagian iyo so midiya (ko tamok) ko kiyaganatan o manga karoma niyo (a manga babay), amay ka da a wata iran; na amay ka adn a wata iran, na bagian iyo so ika pat bagi, ko kiyaganatan iran ko oriyan o wasiyat a ipthanan iran oto odi na bayadan. Na bagian iran so ika pat bagi, ko miniganat iyo, amay ka da a wata iyo; na amay ka adn a wata iyo, na bagian iran so ika walo bagi; ko miniganat iyo ko oriyan o wasiyat a ipthanan iyo skaniyan odi na bayadan. Na amay ka adn a mama a pangowarisan a da a loks iyan go da a wata iyan, odi na babay na adn a pagari niyan a mama odi na pagari a babay, na bagian o oman i isa kiran so ika nm bagi; na amay ka siran na madakl a di giyoto, na makathompotompok siran ko ika tlo bagi, ko oriyan o wasiyat a ipthanan iyan skaniyan odi na bayadan; sa di makamorala. Wasiyat a phoon ko Allah; na so Allah na Matao, a Matigr.

13

Giyoto man i manga taman o Allah: Na sadn sa monot ko Allah ago so sogo Iyan na phakasoldn Iyan ko manga sorga a pphamangondas ko kababaan iyan so manga lawasayg, kakal siran on. Na giyoto man so ontong a mala.

14

Na sadn sa sorangn iyan so Allah ago so sogo Iyan go lompas ko manga taman Iyan na pakasoldn Iyan ko naraka, sa kakal on dn: Go adn a bagian iyan a siksa a phakahina.

15

Na so siran a masogok iran so kazina a pd ko manga karoma niyo, na pakizaksii niyo siran sa pat a pd rkano; na amay ka kazaksian siran, na kalabosowa niyo siran ko manga walay taman sa raotn siran o kapatay, odi na snggayan siran o Allah sa okit (a salakaw).

16

Na so dowa katao a makasogok siran (sa kazina) a pd rkano, na ringasaa niyo siran. Na o thawbat siran na, go siran phiyapiya, na gnki niyo siran; mataan! a so Allah na tatap a pphanarima ko tawbat, a Makalimoon.

17

Aya bo a tawbat a matatangkd ko Allah (a katharimaa Niyan on) na so rk o siran a gi iran manggolawla so marata sabap ko di katao, oriyan iyan na pzambot siran thawbat; na siran man na phakatawbatn siran o Allah: Ka so Allah na Matao, a Mawngangn.

18

Na da a tawbat (a khatarima) a rk o siran a gi iran manggolawla so manga rarata, taman sa amay ka miyakarani ko isa kiran so kapatay, na tharoon iyan a: "Mataan! a sakn na mithawbat ako imanto;" go da (a tawbat a khatarima) ko siran a phamatay ko kakakapir iran: Ka siran man na pithiyagaran Ami siran sa siksa a malipds.

19

Hay so miyamaratiyaya, di rkano khapakay so kapangowarisi niyo ko manga babay sa tgl. Na di niyo siran pagrna (ko kapakiphangaroma iran) sabap ko kakhowaa niyo ko sabaad ko minibgay niyo kiran (a btang), - inonta o makasogok siran sa pakasisingay a mapayag; go pakipagoganapa kano kiran ko adat a mapiya. Na amay ka ikhagowad iyo siran na (thigr kano ka) adn a ikhagowad iyo a shay', a thagoan o Allah skaniyan sa mapiya a madakl.

20

Na amay ka kabaya iyo so kisambi o isa a karoma ko darpa o isa a karoma, go adn a minibgay niyo ko isa kiran a tamok a madakl (a btang), na di kano ron khowa sa mayto bo: Ati khowa kano ron sa kapanganiyaya, go dosa a mapayag?

21

Na andamanaya i kakhowa niyo ron a sabnar a miyapamakay o sabaad rkano so sabaad, go miyakakowa siran rkano sa diyandi a maylot?

22

Na di niyo phangaromaa so miyapangaroma o manga ama iyo ko manga babay, - inonta so andang a miyaypos: Ka mataan aya! a miyabaloy a pakasisingay go rarangit - go miyakaratarata a okit.

23

Kiyaram rkano so (kapangaromaa niyo ko) manga ina iyo, go so manga wata iyo, go so manga babay niyo; go so manga babay o ama iyo, go so manga pagari o ina iyo; go so manga wata o pagari a mama, go so manga wata o pagari a babay; go so manga ina iyo, a so miyapakasoso kano iran, go so manga babay niyo ko sosowan; go so manga ina o manga karoma niyo; go so manga patalilowan iyo a so phagoyagn iyo, a phoon ko manga karoma niyo a so kiyasoldan iyo siran, - na o da niyo siran kasoldi na da a dosa niyo ron; - go so miyapangaroma o manga wata iyo a so titho niyo a manga wata; go so kapakandowayaa niyo ko magari, inonta so andang a miyaypos; mataan! a so Allah na tatap a Manapi, a Makalimoon;

Part 5

24

Go (kiyaram rkano) so adn a manga karoma niyan ko manga babay, inonta so miyakhapaar o manga tangan iyo: sogoan rkano aya o Allah: Na piyakay rkano so salakaw roo, ka an iyo ron mimbabanog so manga tamok iyo, - sa titho kano a phamangaroma, kna a ba kano pzizina. Na sadn sa zawitan iyo kiran, na bgan iyo kiran so manga mahar iran a miyapnto; na da a dosa niyo ko pirila iyan iyo skaniyan, ko oriyan o kiyapnto iran, mataan! a so Allah na tatap a Matao, a Mawngangn.

25

Na sadn sa di phakabaog rkano sa kakawasaan a mipangaroma niyan ko manga pipiya a taw a miyamaratiyaya, na sii (pangaroma) ko miyakhapaar o manga tangan iyo a manga oripn iyo a miyamaratiyaya: Na so Allah na katawan Iyan so paratiyayan iyo. So sabaad rkano na phoon ko sabaad: Na pamangaroma kano kiran sa idin o wali kiran, go bgan iyo kiran so manga mahar iran, sii ko adat a mapiya a: Manga patiis, a kna a ba manga pazisina, go di phamangowa sa manga bolayoka ko kazina: Na amay ka mapangaroma siran, na, go siran makasogok sa kazina, na itana kiran so midiya (ko tamok) ko kasalaan o manga maradika ko siksa. Giyoto man na sii ko taw a inikalk iyan so kazina a pd rkano; na so kaphantang iyo i tomo rkano. Na so Allah na Manapi, a Makalimoon.

26

Kabaya o Allah ka phayagn Iyan rkano go thoroon kano Niyan ko manga okit o siran a miyaonaan iyo; go phakatawbatn kano Niyan: Ka so Allah na Matao, a Mawngangn.

27

Na so Allah na kabaya Iyan a pakatawbatn kano Niyan, na kabaya o siran a pangongonotan iran so manga kabaya a makasilay kano, - sa kapakasilay a mala.

28

Kabaya o Allah a pakakhapan kano Niyan: Ka inadn so manosiya a malobay.

29

Hay so miyamaratiyaya, di niyo pagaraba so manga tamok iyo ko ndolondolonan iyo sa mokit sa di ontol: Inonta o mabaloy a kandagang a pagayonan iyo: Go di niyo mbonoa so manga ginawa niyo: Mataan! a so Allah na tatap a Mala rkano i limo!

30

Na sadn sa nggolawla roo sa kapmalawani go kapanganiyaya, - na pakasoldn Ami dn ko naraka: Ka miyabaloy oto ko Allah a malbod.

31

Amay ka pakawatanan iyo so manga ala ko inisapar rkano, na pokasn Ami rkano so manga iito a manga dosa niyo, go pakasoldn Ami skano ko khasoldan a mapiya.

32

Na di niyo pndingan-dingana so kiyapakalbiya o Allah ko sabaad rkano ko sabaad: Adn a bagian o manga mama a kipantag ko pinggalbk iran, na adn a bagian o manga babay a kipantag ko pinggalbk iran: Na pangni kano ko Allah ko kakayaan Iyan. Mataan! a so Allah na tatap a so langowan taman na katawan Iyan.

33

Na oman i isa, na biyaloy Ami a manga waris ko miniganat o mbala a loks ago so manga dadasg. Na so siran a miyabals o manga sapa iyo, na bgan iyo kiran so kipantag iran. Mataan! a so Allah na mababaloy ko langowan taman a saksi.

34

So manga mama i pakathatandingann ko manga babay, sabap ko kiyapakalbiya o Allah ko sabaad kiran ko sabaad, go sabap ko kiyanggastowa iran ko manga tamok iran. Na aya manga bilangataw a babay na so pphamangongonotan, a khisisiyapn iran sa masoln so piyakisiyap o Allah. Na so manga babay a ikhawan iyo so karikor iran na pangthomai niyo siran, go awai niyo siran ko manga igaan, go dan'ga niyo siran; na amay ka pangonotan kano iran, na di niyo siran pmbabanogi sa okit (a salakaw): Mataan! a so Allah na tatap a Maporo, a Lbi-a-mala.

35

Na amay ka ikhawan iyo so di kaphagayon o kharomai, na sogo kano sa kokoman, a pd ko tonganay o mama, go kokoman a pd ko tonganay o babay; na o kabaya iran so katatanor, na pakaphagayonn siran o Allah: Mataan! a so Allah na tatap a Matao, a Makakakaip.

36

Na zoasoata niyo so Allah, go di niyo phanakoton Skaniyan sa mayto bo; go (phiyapiya i niyo) so mbala a loks, sa tanto a kaphiyapiya, go so manga tonganay, go so manga wata a ilo, go so manga miskin, go so siringan a madazg, go so siringan a mawatan, go so ingapda a mipagoobay, go so gii mlayalayag a makakhakadiyat a miyakawang sa lalan, go so miyakhapaar o manga tangan iyo: Mataan! a so Allah na di Niyan khabayaan so taw a aya btad iyan na takabor, a masalibantogn;

37

Siran na manga liligt, go ipzogo iran ko manga manosiya so kapligt, go pphagmaan iran so inibgay kiran o Allah ko kakawasaan Iyan; na pithiyagaran Ami, so da pamaratiyaya, sa siksa a phakahina;

38

Go siran na ipphammgay ran so manga tamok iran, sa kapakiilaylayn ko manga manosiya, na di iran paparatiyayaan so Allah go so alongan a mawri: Na sadn sa taw a mabaloy so shaytan a ingapda iyan, na miyakaratarata a ingapda!

39

Na antonaa i phakakayd kiran o piyaratiyaya iran so Allah go so alongan a mawri, go miyammgay siran ko iniriskhi kiran o Allah? Na tatap a so Allah na katawan Iyan siran.

40

Mataan! a so Allah na da a paganiyayaan Iyan a timbang bo o kolpong. Na o mabaloy a mapiya, na pthaktakpn Iyan skaniyan, go mbgay a phoon ko hadapan Iyan sa balas a lbi a mala.

41

Na andamanaya i khasowa amay ka pakatindgan Ami so oman i pagtaw sa saksi, go pakatindgn Ami ska (ya Mohammad) ko siran aya a saksi!

42

Sa alongan oto na mazingayo o siran a da pamaratiyaya, go miyamanangka ko Rasol a oba siran bo khilagid ko lopa: Na da a maphagma iran ko Allah a miyanggolawla!.

43

Hay so miyamaratiyaya, di niyo pnggolawlaa so sambayang ko kabbrg iyo, taman sa di niyo katanodan so ptharoon iyo, - go oba kano madidiyonob, inonta oba kano lomalayag, taman sa di kano makaphaygo. Na o kapantagi kano a pkhakasakit, odi na zisii sa lakawan, odi na miyakaoma so isa rkano a phoon ko diyamban, odi na miniprorada iyo so manga babay, go da a miyatoon iyo a ig, na thayamom kano sa botha a soti, na sapowa niyo ron so manga paras iyo go so manga lima niyo. Mataan! a so Allah na tatap a Mamaapn, a Manapi.

44

Bang ka da katokawi so siran a piyamgan sa kipantag ko kitab? A ipphamasa iran ko kadadag, go khabayaan iran a mapokas kano ko lalan.

45

Na so Allah i lbi a Matao ko manga ridoay niyo: Go makatatarotop so Allah a Panarigan, go makatatarotop so Allah a Pphanabang.

46

Adn a pd ko siran a manga Yahodi a pphamagalinn iran so manga katharo ko khipaka-aantapan on, go gi iran tharoon a: "Miyan'g ami go siyangka ami;" na pamakinkha da a phamakin'g on; sabotang ka so pphakapoon Rkami, - go pakasabota kaming ka; a kapamibid ko manga dila iran go kapanotiya ko agama. Na opama ka mataan! a siran aya pitharo iran: "Na miyan'g ami go inonotan ami; go pakin'gang ka; go ilaya kaming ka:" Na mataan! a aya kiran mapiya, go aya ontol; na ogaid na pimorkaan siran o Allah sabap ko kiyaongkir iran; ka da a mapaparatiyaya kiran a rowar ko mayto.

47

Hay piyamgan ko kitab, paratiyayaa niyo so (Qor'an a) initoron Ami, a tomatanto ko kitab a zisii rkano, ko da Ami pn kapnasa ko manga paras a tingrn Ami ko manga talikhodan iyan, odi na pmorkaan Ami siran lagid o kiyapmorkai Ami ko mimbabaloy a amo, ka aya btad o sogoan o Allah na mapnggolawla.

48

Mataan! a so Allah na di Niyan pnapin so kapakisakotowi Ron; na pnapin Iyan so salakaw roo, sii ko taw a kabaya Iyan; na sa taw a pakisakotowan Iyan so Allah na sabnar a miyakambaal sa dosa a lbi a mala.

49

Bang ka da katokawi so siran a pmbalowin iran a soti so manga ginawa iran? Kna ka so Allah i zoti ko taw a kabaya Iyan. Na di siran kasalimbotan sa mayto bo.

50

Pamimikiranang ka, o andamanaya i kiphagangkobn iran ko Allah ko kabokhag. Na khasanaan dn oto a dosa a mapayag!

51

Bang ka da katokawi so siran a piyamgan sa kipantag ko kitab? A paparatiyayaan iran so manga barahala, go so Tagot, go gi iran tharoon ko siran a da pamaratiyaya a: siran i lbi a miyatoro sa lalan a di so siran oto a miyamaratiyaya!

52

Siran man so pimorkaan siran o Allah: Na sadn sa pmorkaan o Allah, na ding ka dn mitoon sa makatabang on.

53

Opama ka adn a kipantag iran ko kapaar na samawto na da a ibgay ran ko manga manosiya a izan bo o pso o od a korma.

54

Ino iran dngkin ko manosiya so inibgay kiran o Allah ko kalbihan Iyan? Na sabnar a inibgay Ami ko moriyataw o Ibrahim so kitab, go so ongangn, go bigan Ami siran sa kadato a lbi a mala.

55

Na so sabaad kiran na miyaratiyaya on, na so sabaad kiran na inongkir iran skaniyan. Na kaa-angkosan siran o naraka Jahannam a pzokhayaw (a kadg).

56

Mataan! a so da pamaratiyaya ko manga ayat Ami, na pakapagmbongn Ami siran ko apoy: Na oman matotong so manga kobal iran, na sambian Ami kiran sa manga kobal a salakaw rkaniyan, ka an iran pkhataami so siksa: Mataan! a so Allah na tatap a Mabagr, a Mawngangn.

57

Na so siran a miyamaratiyaya, go pinggalbk iran so manga pipiya, na pakasoldn Ami siran dn ko manga sorga, a pphamangondas ko kababaan iyan so manga lawasayg, - a kakal siran on sa dayon sa dayon: Adn a bagian iran roo a manga darodopa a manga soti: Go pakasoldn Ami siran ko kasisirongan, a tatap.

58

Mataan! a so Allah na isosogo Iyan rkano so kibgan iyo ko manga sarig ko khirk on; na igira a khokomn iyo so manga manosiya, na kokomn iyo so ontol. Mataan! a so Allah na sayana a mapiya so ipphangndao Niyan rkano to. Mataan! a so Allah na tatap a Pphakan'g, a Pphakaylay.

59

Hay so miyamaratiyaya, onoti niyo so Allah, go onoti niyo so Rasol, go so bbgan sa kapaar ko zowaan a pd rkano. Na amay ka manga sasawal kano ko isa a shay', na ndodn iyo to ko (kitab, o) Allah go so Rasol, o skano na paparatiyayaan iyo so Allah, go so alongan a mawri. Giyoto man i tomo, go lbi a mapiya a khabolosan.

60

Bang ka da katokawi so siran a ipndaowa iran a mataan! a siran na piyaratiyaya iran so initoron rka, go so initoron ko miyaonaan ka? Kabaya iran a sii siran pphakikokom ko Tagot, a sabnar a inisogo kiran a kaongkira iran on. Na kabaya o shaytan a madadag iyan siran sa kadadag a mawatan.

61

Na igira a pitharo kiran a: "Song kano sii ko (kitab a) initoron o Allah, go sii ko Rasol:" Na maylaing ka so manga monapik a talikhodan ka iran sa titho a katalikhod.

62

Na antona aya, a igira a miyasogat siran a tiyoba, sabap ko iniona o manga lima iran (a dosa)? Na oriyan iyan na phakaoma siran rka, sa gii siran zapa sa: "Ibt ko Allah ka da a antap ami a rowar ko kaphiyapiya, go kapagaayonayon!"

63

Siran man so katawan o Allah so zisii ko manga poso iran; na dapayang ka kiran, go pangthomaing ka siran, go tharoing ka siran sii ko manga ginawa iran sa katharo a tomotogatk.

64

Na da ko kiyasogo Ami ko sogo, inonta na an kawnoti, sa sabap sa idin o Allah. Na opama ka mataan! a siran gowani ko kasalimbotan iran so manga ginawa iran, na miyakaoma siran rka na miyangni siran sa maap ko Allah, go inipangni siran sa maap o Rasol, na mataan! a khatoon iran so Allah a pphanarima ko tawbat, a Makalimoon.

65

Na kna, ka ibt ko Kadnan ka, ka di siran khabaloy a mapaparatiyaya, taman sa di siran rka makikokom ko simokt iran, oriyan iyan na da a magda iran ko manga ginawa iran a sangka ko inikokom ka, go mbayorantang siran sa titho a kambayorantang.

66

Na opama o mataan! a Skami na inipaliyogat Ami kiran a bonoa niyo so manga ginawa niyo odi na awa kano ko manga ingd iyo, na da a nggolawla kiran a rowar ko mayto kiran. Na opama ka mataan! a siran na pinggolawla iran so ipphangthoma kiran oto, na mataan! a miyabaloy a mapiya a bagian iran, go tanto a ipthakna (o paratiyaya iran);

67

Na o giyoto (i pinggolawla iran) na bgan Ami siran dn phoon ko hadapan Ami sa balas a lbi a mala;

68

Go toroon Ami siran dn sa lalan a matitho.

69

Na sa taw a onotan iyan so Allah go so Rasol na siran man i pd o siran a inikalimo siran o Allah, - a manga nabi, go miyamangimbnar, go manga shahid, go manga bilangataw. Na miyakapiyapiya siran man a bolayoka!

70

Giyoto man so kapakalbi a phoon ko Allah. Na makatatarotop so Allah a Matao.

71

Hay so miyamaratiyaya, pagiyasaa niyo so iktiyar iyo, na sorong kano sa kazalompok odi na sorong kano sa kazamasama.

72

Na mataan! a adn a pd rkano a taw a titho a pphlombat: Na o masogat kano a tiyoba, na ptharoon iyan a: "Sabnar a inikalimo ako o Allah gowani a da ako kiran mapd a miyakamasa."

73

Na ibt o masogat kano a limo a phoon ko Allah, na ptharoon iyan dn a lagid oba da a miyaadn ko lt iyo ago so lt iyan a kanggiginawai: "Ah! Oba ako kiran bo miyapd; ka magontong ako sa ontong a mala!"

74

Na pakimbonoay sa lalan ko Allah so siran a pphasaan iran so kawyagoyag ko doniya ko akhirat. Ka sadn sa makimbonoay sa lalan ko Allah, - na, go maprang odi na makapgs na mbgan Ami dn Skaniyan sa balas a lbi a mala.

75

Na ino kano di pakipmbonoay sa lalan ko Allah go so (kalindinga ko) manga lolobay ko manga mama, go so manga babay; go so manga wata? - a siran na gi iran tharoon: "Kadnan ami, pakaawaa kaming Ka sangkai a ingd, a tanganiyaya so taw ron; go snggay kaming Ka sa phoon ko hadapan Ka sa panarigan; go snggay, kaming Ka sa phoon ko hadapan Ka sa phananabang!"

76

So siran a miyamaratiyaya na gii siran makimbonoay sa lalan ko Allah, na so siran a da pamaratiyaya na gii siran makimbonoay sa lalan ko Tagot. Na pakimbonoay kano ko manga tabanga o shaytan. Mataan! a so tipo o shaytan na btad iyan a malobay.

77

Bang ka da katokawi so siran a pitharo kiran a: Gnggna niyo so manga barokan iyo, go pamayandgn iyo so sambayang, go bgan iyo so zakat? Na kagiya a ipaliyogat kiran so kambonoay, na samawto na adn a isa kiran ka sagorompong a ipkhalk iran so manga manosiya lagid o kalk ko Allah odi na lawan on a kalk. Go pitharo iran: "Kadnan ami, inong Ka rkami phaliyogatn so kambonoay? Inong Ka rkami da sndodn sa taalik a marani?" Tharoang ka a: "So gona ko doniya na mayto; na so akhirat i tomo a bagian o taw a miyananggila. Go di kano khasalimbotan sa mayto bo!."

78

Apiya anda kano matago, na praotn kano o kapatay, go apiya matago kano ko manga kota a manga poporo! na o masogat siran a mapiya, na ptharoon iran a: "Giyai na phoon ko hadapan o Allah;" na o masogat siran a marata, na ptharoon iran a: "Giyai na phoon ko hadapan ka." Tharoang ka a: "Palaya phoon ko hadapan o Allah." Na antonaa siran aya a pagtaw, a margn a kapkhasaboti ran ko pkhawlawla?

79

Sadn sa misogat rka a mapiya, na phoon ko Allah; go sadn sa misogat rka a marata, na phoon ko ginawang ka. Na siyogo Ami ska (ya Mohammad) ko manga manosiya a sogo. Na makatatarotop so Allah a saksi.

80

Sa taw a onotan iyan so Rasol, na sabnar a kiyaonotan iyan so Allah: Go sa taw a tomalikhod na kna a ba Ami ska siyogo a somisiyap kiran.

81

Na gi iran tharoon a: "Kapangongonotan." Na igira a miyakaliyo siran phoon ko hadapan ka, na mbabasagawii magantangan so isa kiran ka sagorompong sa salakaw ko giing ka tharoon. Na so Allah na pphakisorat Iyan so gi iran babasagawi iyan magantangan: Na dapayang ka kiran, go sariging ka so Allah, ka khasanaan so Allah a sasarigan.

82

Ino iran di pnggdagdaa so Qor'an? A opama ka miyaadn a phoon ko hadapan o salakaw ko Allah, na mataan! a makatoon siran on sa zoransorang a madakl.

83

Na igira a adn a miyakatalingoma kiran a miyasowa a kalilintad odi na kalk, na ipamalata iran skaniyan. Na o piyakandod iran oto sii ko Rasol, go sii ko makakhakapaar ko zowaan a pd kiran, na mataan! a katokawan oto o siran a pphangdg on a phoon kiran. Na o da so gagaw rkano o Allah go so limo Iyan, na kiyaonotan iyo dn so shaytan inonta so mayto.

84

Na pakimbonoay ka sa lalan ko Allah - ka da a ipapaliyogat rka a rowar sa ginawang ka, go pangoyating ka so miyamaratiyaya. Na matatangkd a so Allah na pagrnn Iyan so bagr o siran a da pamaratiyaya; ka so Allah i tanto a Mabagr, go tanto a phaniksa.

85

Sadn sa mangongogopan sa kapangongogopan a mapiya na adn a kipantag iyan on: Go sadn sa mangongogopan sa kapangongogopan a marata, na adn a bagian iyan on: Na tatap a so Allah na so langowan taman na magagaga Niyan.

86

Na igira a siyalam kano sa isa a salam, na salam kano sa lawan on sa kapiya, odi na pakakasoya niyo skaniyan. Mataan! a so Allah na tatap a so langowan taman na maiitong Iyan.

87

So Allah! Da a tohan a inonta Skaniyan: Plimodn kano Niyan dn sii ko alongan a qiyamah, a da a sangka a madadalm on, na ba adn a makalawan ko Allah a Bnar i katharo?

88

Na ino kano khadowa lompok makapantag ko manga monapik? A so Allah na piyato Iyan siran sabap ko pinggalbk iran. Ba niyo khabayai a matoro iyo so taw a diyadag o Allah? A sadn sa dadagn o Allah, na ding ka dn mitoon sa lalan.

89

Miyazingayo iran a oba kano bo pagongkir, sa lagid o kiyaongkir iran, na mabaloy kano a mlagilagid. Na di kano kiran khowa sa manga panarigan taman sa di siran tomogalin ko lalan o Allah. Na o talikhod siran, na pamiyaga niyo siran, go pamonoa niyo siran apiya anda niyo siran matoon; go di kano kiran khowa sa panarigan go tabanga;

90

Inonta so siran a magapas ko pagtaw a adn a pasad iyo ago siran, odi na miyakaoma siran rkano a inigagt o manga rarb iran oba siran rkano pakimbonoay odi na ba siran pakimbonoay ko pagtaw iran. Na o kabaya o Allah, na mataan! a kaphakipangarasiyan kano Niyan kiran, na makimbonoay siran rkano dn. Na o awata kano iran a di siran rkano makimbonoay, go idolon iran rkano so kalilintad, na da a inisnggay rkano o Allah a okit kiran (ko kapakimbonoay).

91

Khatoon iyo dn a manga pd a taw a kabaya iran a kapakasasariga iran rkano go so kapakasasariga iran ko pagtaw iran: Oman siran pakandodn ko kapanakoto, na mapato siran on: Na odi kano iran awata, go di iran rkano idolon so kalilintad, go di iran (rkano) rnn so manga barokan iran, na pamiyaga niyo siran go pamonoa niyo siran sa sadn sa kapkhaparowi niyo kiran: Ka skano man na singgayan Ami skano kiran sa karina a mapayag.

92

Na da mapatot ko miyaratiyaya i ba pamono sa miyaratiyaya; inonta o karibat, na sa taw a makabono sa miyaratiyaya a da mbabaa, na makaphmaradika sa isa a oripn a miyaratiyaya, go diyat a ibgay ko tonganay o miyabono, inonta oba iran on zadkaan. Na amay ka (so miyabono na) pd ko pagtaw a ridoay niyo, a skaniyan na mapaparatiyaya, na makaphmaradika (so miyamono) sa isa a oripn a mapaparatiyaya. Na amay ka (so miyabono na) pd ko pagtaw a adn a pasad iyo ago siran, na diyat a ibgay ko tonganay niyan, go kapmaradika sa isa a oripn a mapaparatiyaya. Na sa taw a da a matoon iyan (a oripn) na kaphowasa sa dowa olan a makathondog a dowa oto: Kathawbat a phoon ko Allah: Na tatap a so Allah na Matao, a Mawngangn.

93

Na sa taw a mamono sa miyaratiyaya a pimbaba iyan, na aya balas iyan na so naraka Jahannam, kakal roo: Go kararangitan o Allah skaniyan go pmorkaan Iyan, go thitiyagaran Iyan sa siksa a mala.

94

Hay so miyamaratiyaya, igira a lomiyalakaw kano sa lalan ko Allah, na pangamad kano, go di niyo ptharoa ko taw a inialaw niyan rkano so salaam i: "Kna a ba ka mapaparatiyaya!" Sa tontot iyo ko kaadilan ko kawyagoyag ko doniya: Ka sii ko Allah so manga taban a madakl. Giyoto man i miyambtad iyo sa paganay, na inikalimo kano o Allah: Na pangamad kano. Mataan! a so Allah na so gii niyo nggolawlaan na Kaip Iyan.

95

Di magizan so khiggnk ko miyamaratiyaya a da a manga ongn iran, go so miphprang sa lalan ko Allah a mrakhs so manga tamok iran ago so manga ginawa iran. Piyakalbi o Allah so miphprang a mrakhs so manga tamok iran ago so manga ginawa iran ko khiggnk sa pangkatan. Na oman i isa kiran na inidiyandi on o Allah so mapiya: Go piyakalbi o Allah so miyamanagontaman ko khiggnk sa balas a mala,

96

Manga pangkatan a phoon Rkaniyan go maap go limo. Na tatap a so Allah na Manapi, a Makalimoon.

97

Mataan! a so siran a biyono siran o manga malaikat a inaniyaya iran so manga ginawa iran, na pitharo o manga malaikat a: "Antonaa i miyambtad iyo?" Pitharo iran a: "Aya btad ami na manga lolobay sii ko lopa." Pitharo o manga malaikat a: "Ba da mabaloy so lopa o Allah a mawlad ka ang kano ron makatogalin?" Na siran man na aya dn a darpa iran na so naraka Jahannam, - na mikharatarata a khabolosan!

98

Tabiya bo ko manga lolobay ko manga mama, go so manga babay, go so manga wata a di siran phakagaga magantangan (sa kapakaliyo iran), go di siran phakatoon sa lalan.

99

Na siran man na matatangkd a so Allah na phmaapan Iyan siran: Ka aya btad o Allah na Mamaapn, a Manapi.

100

Na sadn sa tomogalin ko lalan o Allah, na phakatoon sii ko lopa sa khaapasan a madakl, go dayaan: Na sa taw a lomiyo a phoon ko walay niyan a thogalin ko Allah go so sogo Iyan, oriyan iyan na raotn skaniyan o kapatay, na mataan! a miyatangkd so balas rkaniyan sii ko Allah: Ka aya btad o Allah na Manapi, a Makalimoon.

101

Na igira a milayalayag kano sii ko lopa, na da a dosa niyo ko kakasara niyo ko sambayang amay ka ikhawan iyo oba kano kamaratai o siran a da pamaratiyaya: Mataan! a so da pamaratiyaya na miyabaloy siran a ridoay niyo a mapayag.

102

Na igira a zisii ka kiran, na gong ka siran phagimami ko sambayang, na tindg so salompok kiran sa pd ka, go kkpiti ran so manga gomaan iran: Na amay ka makasodiod siran, na kadn siran ko talikhodan iyo; na talingoma so salompok a salakaw a da makazambayang na zambayang siran sa pd ka, go kkpiti ran so iktiyar iran, go so manga gomaan iran: Miyazinganin o siran a da pamaratiyaya, a oba niyo bo khaliwati so manga gomaan iyo go so manga kasangkapan iyo, na gobatn kano iran sa kagobat a makaysa. Na da a dosa niyo amay ka khasakitan kano ko oran odi na pkhasakit kano ko kibtadn iyo ko manga gomaan iyo; na kpiti niyo so iktiyar iyo. Mataan! a so Allah na pithiyagaran Iyan so da pamaratiyaya sa siksa a phakahina.

103

Na igira a miningolalan iyo so sambayang, na tatadmi niyo so Allah ko katitindg, go kaoontod, go so kaiiga iyo; na igira a lominintad kano na sampornaa niyo so sambayang: Mataan! a so sambayang na miyabaloy ko miyamaratiyaya a paliyogat a miphopowakto.

104

Na di kano plokha sa gii kambabanoga ko pagtaw (o ridoay niyo): Ka o makathatalogdam kano, na mataan! a siran na makathatalogdam sa lagid o kapakathatalogdam iyo; go khaarap iyo ko Allah, so di iran khaarap. Na aya btad o Allah na Matao, a Mawngangn.

105

Mataan! a Skami na initoron Ami rka (ya Mohammad) so kitab a (miyakapayag ko) bnar, ka an ka mikokom ko manga manosiya, so piyakiknal rka o Allah: Na oba ka mabaloy a mananandig ko mamakadodorata;

106

Go pangni ka sa maap ko Allah; mataan! a so Allah na aya btad Iyan na Manapi, a Makalimoon.

107

Go di ka pakipphapawala sa linding ko siran a pndoratn iran so manga ginawa iran; mataan! a so Allah na di Niyan khabayaan so taw a aya btad iyan na makadodorata a baradosa;

108

Pphagma siran ko manga manosiya, na di siran phagma ko Allah, a Skaniyan na katawan Iyan siran gowani a gi iran mbabasagawiinan magantangan, so di phakasoat a katharo: Na so Allah na tatap a so gi iran nggolawlaan na katawan Iyan.

109

Ah! Na skano wai na miyakiphapawala kano sa linding kiran sii ko kawyagoyag ko doniya; na antawaa onon i makapawal ko Allah sa linding kiran ko alongan a qiyamah, ba adn a taw a khabaloy a khasarigan iran?

110

Na sa taw a makanggolawla sa marata odi na maaniyaya niyan a ginawa niyan oriyan iyan na mangni sa maap ko Allah, na khatoon Iyan so Allah a Manapi, a Makalimoon.

111

Na sa taw a nggalbk sa dosa, na aya dn a gii niyan minggalbk sa dosa na so ginawa niyan: Ka tatap a so Allah na Matao, a Mawngangn.

112

Na sa taw a nggalbk sa kasalaan odi na dosa oriyan iyan na idiil iyan oto ko di sala, na sabnar a miyakaawid sa tmpo go dosa a mapayag.

113

Na o da so gagaw rka o Allah go so limo Iyan, na mataan! a piyagngtan o salompok kiran a kandadaga iran rka. Na da a khadadag iran a rowar ko manga ginawa iran, go da a khibinasa iran rka a mayto bo. Na piyakatoron rka o Allah so kitab, go so ongangn, go inindao Niyan rka so ding ka katawan: Ka aya btad o gagaw rka o Allah na mala.

114

Daa mapiya a matatago ko madakl ko bitiyara iran: Inonta sa taw a somiyogo sa kazadka odi na adat a mapiya odi na so kapthanora ko manga manosiya: Na sadn sa nggolawla roo, sa singanin ko manga kasosoat o Allah, na mbgan Ami dn sa balas a mala.

115

Na sadn sa sorangn Iyan so Rasol ko oriyan o kiyapayag on o toroan, go komdg sa salakaw ko okit o miyamaratiyaya, na pakaantapn Ami skaniyan ko inantapan iyan, go pakasoldn Ami skaniyan ko naraka Jahannam, - a mikharatarata a khabolosan!

116

Mataan! a so Allah na di Niyan pnapin so kapakisakotowi Ron; na pnapin Iyan so salakaw roo sii ko taw a kabaya Iyan: Na sadn sa taw a pakisakotowan iyan so Allah, na sabnar a miyadadag sa kadadag a mawatan.

117

Da ko pzimbaan iran a salakaw ko Allah, inonta na manga babay (a barahala): Go da ko pzimbaan iran inonta na shaytan a gii mbinasa!

118

Pimorkaan skaniyan o Allah, na pitharo iran a: "Mataan! a khowa ko dn ko manga oripn Ka sa kipantag a mappnto;"

119

"Go mataan! ka dadagn ko siran dn, go igdi akn dn ko manga poso iran so ribat; go sogoon ko siran dn na pamotoln iyan dn so manga tangila o manga ayam, go sogoon ko siran dn na pamagalinn iran dn so manga kaadn o Allah." Na sadn sa taw a kowaan iyan so shaytan a panarigan a salakaw ko Allah, na sabnar a miyalogi sa kalogi a mapayag.

120

Pmbgan iyan siran sa pasad, go ipnggdi iran ko manga poso iran so ribat; na da a ipmbgay kiran a pasad o shaytan a rowar sa limpangan.

121

Siran man na darpa iran so naraka Jahannam, go da a khatoon iran a milidas on.

122

Na so miyamaratiyaya, go pinggalbk iran so manga pipiya, na phakasoldn Ami siran dn ko manga sorga, a pphamangondas ko kababaan iyan so manga lawasayg, - kakal siran roo sa dayon sa dayon. Diyandi o Allah a di pndorat, na ba adn a makalawan a Bnar ko Allah sa katharo?

123

Kna a ba sii ko manga ongaya iyo, go kna a ba sii ko manga ongaya o adn a kitab iyan: Ka sadn sa nggalbk sa marata, na imbadal on. Go da a matoon iyan a salakaw ko Allah a Panarigan, go Tabanga.

124

Na sa taw a nggalbk ko manga pipiya, - mama odi na babay - a skaniyan na mapaparatiyaya, na siran man i phamakasold ko sorga, go da a masalimbot kiran a izan bo o pso o od a korma.

125

Na ba adn a taw a makalawan sa kapiya i okit ko kapagintaw ko taw a inizalimbotawan iyan a ginawa niyan sii ko Allah, a skaniyan na phipiyapiya, go kidg iyan so okit o Ibrahim a tomataliyadok ko bnar? Na kinowa o Allah so Ibrahim a bolayoka.

126

Na rk o Allah so zisii ko manga langit go so zisii ko lopa: Ka aya btad o Allah na katawan Iyan so langowan taman.

127

Na pakiphagosay ran rka so makapantag ko manga babay, tharoang ka a: So Allah na pphagosayn Iyan rkano so makapantag kiran: Go so kapphangadian rkano ko kitab, makapantag ko manga ilo ko manga babay a siran na di niyo kiran imbgay so miyatangkd a rk iran, go pkhababayaan iyo so kapangaromaa niyo kiran, go so manga lolobay ko manga wata: Go so kathandingana niyo ko manga ilo sa kapaginontolan. Na sadn sa manggolawla niyo a mapiya, na mataan! a so Allah na tatap a katawan Iyan oto.

128

Na amay ka adn a babay a inikawan iyan ko karoma niyan so karpo iron odi na so karimng iyan, na da a dosa iran o mbaal siran sa pasad ko katatanor; na so kaphasada i tomo (a di so kamblag); ka waraan o manga ginawa so kala a inam a sarta a kaligt. Na amay ka phiyapiya kano go mananggila kano, na mataan! a so Allah na tatap a so gii niyo nggolawlaan na Kaip Iyan.

129

Na di niyo dn magaga i ba niyo mapakathimbang so manga karoma niyo, apiya i kapanagontaman iyo: Na di kano pzoramig sa tanto a kazoramig, sa indaraynon iyo so karoma niyo sa lagid o maa-alangalang. Na o phapasada kano, go mananggila kano, na mataan! a so Allah na aya btad Iyan na Manapi, a Makalimoon.

130

Na amay ka mblag siran, na mbgan o Allah so oman i isa kiran ko kakawasaan Iyan: Ka aya btad o Allah na Maginawa, a Mawngangn.

131

Na rk o Allah so zisii ko manga langit go zisii ko lopa. Na sabnsabnar a inisogo Ami ko siran a bigan ko kitab ko miyaonaan iyo, ago skano a onoti niyo so Allah. Na odi kano paratiyaya, na mataan! a rk o Allah so zisii ko manga langit go so zisii ko lopa, go aya btad o Allah na da a mapzinganin Iyan, a Pphodin.

132

Go rk o Allah so zisii ko manga langit go so zisii ko lopa, go kiyasanaan so Allah a sasarigan.

133

O kabaya Iyan, na khaylang kano Niyan, hay manga manosiya! go phakaadn sa manga salakaw; ka aya btad o Allah na khagaga Niyan oto.

134

Na sa taw a aya kabaya iyan na so balas sa doniya, na sii ko Allah so balas sa doniya ago sa akhirat: Ka aya btad o Allah na Pphakan'g, a Pphakaylay.

135

Hay so miyamaratiyaya, mbaloy kano a khipamamayandg ko kapaginontolan, a manga saksi makapantag ko Allah, apiya pn sii phakatana ko manga ginawa niyo, odi na so mbala a loks, go so manga dadasg, amay ka (so pzaksian na) kawasa odi na miskin: Na so Allah i mona sa dowa oto. Na di niyo pagonoti so kabaya a ribat, ka makasilay kano, na amay ka pamingign iyo o di' na mnda kano, na mataan! a so Allah na tatap a so gii niyo ngolawlaan na Kaip Iyan.

136

Hay so miyamaratiyaya, paratiyayaa niyo so Allah go so sogo Iyan, go so kitab a so initoron Iyan ko sogo Iyan go so kitab - a so initoron Iyan gowani. Na sadn sa di maratiyaya ko Allah, go so manga malaikat Iyan, go so manga kitab Iyan, go so manga sogo Iyan, go so alongan a mawri, na sabnar a miyadadag sa kadadag a mawatan.

137

Mataan! a so miyamartiyaya, oriyan iyan na miyamangongkir, oriyan iyan na miyamaratiyaya, - oriyan iyan na miyamangongkir, oriyan iyan na piyakaozor iran so kaongkir, - na di patot ko Allah i ba Niyan siran napii go ba Niyan siran nggonanaowa sa lalan.

138

Pphanotholang ka ko manga monapik a mataan! a adn a bagian iran a siksa a malipds;

139

A siran na pkhowaan iran so dapamaratiyaya a manga panarigan a inilbi ran ko miyamaratiyaya: Ba iran pzinganina sii kiran oto so mnang? Na mataan! a so mnang na rk o Allah langon.

140

Na sabnar a initoron Iyan rkano ko kitab, a amay ka man'g iyo so manga ayat o Allah a phagongkirn skaniyan go gii zomann, na di kano pagontod ko obay ran taman sa di siran tompas ko bitiyara a salakaw rkaniyan: Mataan! a skano na samawto na izan iran. Mataan! a so Allah na thimoon Iyan so manga monapik go so manga kapir sii ko naraka Jahannam langon:

141

Siran na dadaraan kano iran: Na o adn a mambagian iyo a daag a phoon ko Allah, na tharoon iran a: "Ba kami niyo di manga pd?" Na o adn a mambagian o da pamaratiyaya a kapakataban, na tharoon iran a: "Ba Ami skano da mapakapgs, go ba Ami skano da malinding ko miyamaratiyaya?" Na so Allah na khokomn kano Niyan ko alongan a qiyamah. Na da dn a isnggay o Allah ko da pamaratiyaya ko miyamaratiyaya a okit.

142

Mataan! a so manga monapik - na plimpangn iran so Allah, a Skaniyan i mbadal ko limpangan iran: igira a tominindg siran ko sambayang, na tomindg siran a khibobokln, makiilaylayn siran ko manga manosiya, sa di iran tatadman so Allah inonta so mayto;

143

Maa-alangalang siran ko pagltan oto - da siran ko siran aya (a miyamaratiyaya) go da siran ko siran oto (a manga kapir). Na sadn sa dadagn o Allah na ding ka dn mitoon sa lalan.

144

Hay so miyamaratiyaya, di niyo khowaa so da pamaratiyaya a manga panarigan a ilbi niyo ko miyamaratiyaya: Ba niyo kabaya a snggayan iyo so Allah sa karina rkano a mapayag?

145

Mataan! a so manga monapik na sii ko darpa a pithamanan a mababa ko naraka: Go ding ka siran dn mitoon sa phananabang;

146

Inonta so siran a mithatawbat, go miphipiyapiya, go kipitan iran so (kitab o) Allah, go tiyolabos iran so okit iran ko kapagintaw a rk o Allah: Na siran man i pd o miyamaratiyaya. Na mbgan dn o Allah so miyamaratiyaya sa balas a mala.

147

Di pnggolawlaan o Allah i ba kano Niyan siksaa, o panalamat kano go maratiyaya kano: Ka aya btad o Allah na Masalamatn, a Matao.

Part 6

148

Di khabayaan o Allah so kipakatanogn ko marata a katharo, inonta so taw a kiyasalimbotan; ka aya btad o Allah na Pphakan'g, a Matao.

149

O payaga niyo so mapiya odi na pagmaan iyo skaniyan odi na mmaap kano ko marata, na mataan! a so Allah na aya btad Iyan na Mamaapn, a Phakagaga.

150

Mataan! a so da pamaratiyaya ko Allah go so manga sogo Iyan, go kabaya iran a pakambidaan iran so Allah go so manga sogo Iyan, go gi iran tharoon a: "Paparatiyayaan ami so sabaad, go oongkirn ami so sabaad:" Go kabaya - iran a makambaal siran ko pagltan oto sa okit,

151

Siran man na siran so da pamaratiyaya a titho; na pithiyagaran Ami so da pamaratiyaya sa siksa a phakahina.

152

Na so miyamaratiyaya ko Allah go so manga sogo Iyan go da a inibida iran a isa bo ko siran oto (a manga rasol), na siran man na imbgay Niyan kiran dn so manga balas kiran: Ka aya btad o Allah na Manapi, a Makalimoon.

153

Phangnin rka (ya Mohammad) o tiyoronan ko kitab a pakatoronan ka siran sa kitab a phoon ko langit: Na sabnar a piyangni ran ko Mosa so mala a di giyoto: - sa pitharo iran a: "Pakiilayn ka rkami so Allah sa mapayag," na piyolang siran o lthi sabap ko kiyandarowaka iran. Oriyan iyan na kinowa iran so sapi (a katohanan) ko oriyan o kiyapakatalingoma kiran o manga rarayag a karina; na pimaap Ami kiran oto; go bigan Ami so Mosa sa karina a marayag.

154

Go iniporo Ami ko kaporoan iran so palaw sabap ko kinindiyandiin kiran; go pitharo Ami kiran a: "Sold kano ko pinto (o Baytal Moqaddas) sa pangangalimbabaan kano;" go pitharo Ami kiran a: "Di kano phmalawani ko alongan a Sapto." Na kominowa Kami kiran sa diyandi a mapnd.

155

Na (pimorkaan Ami siran) sabap ko kiyabarngkasa iran ko diyandi iran; go so kiyaongkira iran ko manga ayat o Allah; go so kiyabonoa iran ko manga nabi sa di ontol; go so kiyatharoa iran sa: "So manga poso Ami na mappno" - kna, ka piyatri o Allah skaniyan sabap ko kiyaongkir iran, ka da a mapaparatiyaya kiran a rowar ko mayto;

156

Go sabap ko kiyaongkir iran; go so kiyatharoa iran ko Maryam ko tmpo a mala;

157

Go so katharo iran sa: "Mataan! a miyapatay ami so Al-Masih Eysa a wata o Maryam, a sogo o Allah;" - a da iran mapatay, go da iran masola skaniyan, ogaid na piyakalingo siran, na mataan! a siran a dawn pagayonayon na miyatago siran dn ko anganangan rkaniyan, da a katawi ran on a rowar sa kawnot sa arangan, ka matatangkd a da iran mabono skaniyan: -

158

Kna, ka iniporo skaniyan o Allah sii ko hadapan Iyan; ka aya btad o Allah na Mabagr, a Mawngangn;

159

Go da (a isa bo) ko toyoronan ko kitab a bawn di paratiyaya ko da niyan pn kapatay; go sa alongan a qiyamah na mabaloy kiran a saksi -

160

Na sabap ko da kapaginontolan o siran a manga Yahodi na kiyaram Ami kiran so manga pipiya a kiyalal kiran; - go sabap ko kiyapangalang iran ko lalan o Allah sa madakl;

161

Go so kapphakaya iran ko kapriba, a sabnar a inisapar kiran oto; go so kaphagaraba iran ko manga tamok o manga manosiya sa di ontol; - na pithiyagaran Ami so da kiran pamaratiyaya sa siksa a malipds.

162

Ogaid na so mithatakna ko katao a pd kiran, go so miyamaratiyaya, na paparatiyayaan iran so (kitab a) initoron rka (ya Mohammad) go so initoron ko miyaonaan ka: Go ipphamayandg iran so sambyang go pthonayn iran so zakat go paparatiyayaan iran so Allah go so alongan a mawri: Na siran man na mbgan Ami siran dn sa balas a mala.

163

Mataan! a Skami na inilahaman Ami ska (ya Mohammad), sa lagid o kiyailahami Ami ko Noh go so manga nabi ko miyaoriyan iyan: Go inilahaman Ami so Ibrahim, go so Ismail, go so Is'haq, go so Ya'qob, go so mbawataan iyan, go so Eysa, go so Ayyob, go so Yonos, go so Haron, go so Solayman, go inibgay Ami ko Dawood so Zaboor.

164

Go (somiyogo Kami sa) manga sogo a andang a miyapanothol Ami siran rka gowani; go manga sogo a da Ami siran rka mapanothol; - na inimbitiyarai o Allah so Mosa sa samporna a kambitiyarai;

165

Manga sogo a pphamanothol sa mapiya, go pphamakaiktiyar, ka an da a khabaloy a daowa o manga manosiya, sii ko Allah, ko oriyan o manga sogo: - ka aya btad o Allah na Mabagr, a Mawngangn.

166

Ogaid na so Allah na zasaksian Iyan so initoron Iyan rka (ya Mohammad) a initoron Iyan sii ko katao Niyan go so manga malaikat na zasaksian iran: Na khasanaan so Allah a Saksi.

167

Mataan! a so da pamaratiyaya, go miyangalang siran ko lalan o Allah, na sabnar a miyadadag siran, sa kadadag a mawatan.

168

Mataan! a so da pamaratiyaya, go da pamaginontolan, - na da mapatot ko Allah i ba Niyan siran napii, go ba Niyan siran toroa sa lalan

169

Inonta so lalan ko naraka Jahannam, sa kakal siran on sa dayon sa dayon. Na miyabaloy oto sii ko Allah a malbod.

170

Hay manga manosiya, sabnar a minitalingoma rkano o sogo so bnar a phoon ko Kadnan iyo: Na paratiyayaa niyo: Ka aya rkano mapiya. Na odi niyo paratiyayaa, na mataan! a rk o Allah so zisii ko manga langit ago so lopa: Ka aya btad o Allah na Matao, a Mawngangn.

171

Hay tiyoronan ko kitab, di niyo phanongkili so agama niyo: Go da a ptharoa niyo makapantag ko Allah a rowar ko bnar. So Al-Masih Eysa a wata o Maryam na matag sogo o Allah, go katharo Iyan, na initmo Niyan ko Maryam, go niyawa a phoon Rkaniyan: Na paratiyayaa niyo so Allah go so manga sogo Iyan. Na di niyo ptharoa a: "Tlo (a tohan)". Gnki niyo: Ka aya rkano mapiya. So Allah na aya bo tohan a Isaysa: Mawatan on o ba adn a mabaloy a wata Iyan. Rk Iyan so zisii ko manga langit go so zisii ko lopa. Na kiyasanaan so Allah a Sasarigan.

172

Di dn iphnama o Al-Masih a kababaloy niyan a oripn o Allah, go di iphnama o manga malaikat a manga dadasg: Ka sadn sa ipnama niyan so kaooripn iron o Allah go mmaratabat, - na, timoon Iyan siran dn sii ko hadapan Iyan langon.

173

Na so pman so miyamaratiyaya, go pinggalbk iran so manga pipiya, na ithoman Iyan kiran sa tarotop so manga balas kiran, - go omanan Iyan siran ko kakayaan Iyan: Na so pman so minanama, go mimamaratabat, na ziksaan Iyan siran sa siksa a malipds; go da a matoon iran a bagian iran a salakaw ko Allah, a Panarigan go da a phananabang.

174

Hay manga manosiya, sabnar a adn a miyakaoma rkano a karina a phoon ko Kadnan iyo: Go piyakatoronan Ami skano sa sindaw a maliwanag.

175

Na so pman so miyamaratiyaya ko Allah: Go tikhs iran on, - na pakasoldn Iyan siran dn ko limo a phoon Rkaniyan go kakayaan, go thoroon Iyan siran sii Rkaniyan ko lalan a mathito.

176

Phakiosay siran rka: (ya Mohammad). Tharoang ka a: So Allah na phagosayn Iyan rkano so makapantag ko da a loks iyan go da a moriyataw niyan. Amay ka so mama na matay, a da a wata iran, na adn a babay niyan na bagian iyan so midiya (ko tamok) ko miniganat iyan: Go skaniyan (a mama) na khawarisan iyan (so kiyaganatan o babay niyan) o da a wata iran: Na amay ka dowa a babay, na bagian iyan so dowa ko tlo baad ko miniganat iyan: Na amay ka siran na magariyari a manga mama, go manga babay, na bagian o isa a mama so lagid o kipantag o dowa a babay. Pphakarayagn rkano o Allah, ka oba kano madadag. Na so Allah na so langowan taman na katawan Iyan.

Total Number of Verses: 120

1

Hay so miyamaratiyaya! tomann iyo so manga diyandi (a makaoontol). Piyakay rkano so binatang a manga ayam, inonta so pkhabatiya rkano: Liyo ko piyakay niyo ko kapanganop ko kapagiikram iyo: Na mataan! a so Allah na ipkhokom Iyan so kabaya Iyan.

2

Hay so miyamaratiyaya, di niyo pndarowakai so manga tanda o Allah, go so olanolan a pagaadatan, go so manga pammgayan, go so manga toos, go so pphamanong ko walay a pagaadatan, a pmbabanog siran sa riskhi a phoon ko Kadnan iran go kasosoat. Na amay ka makaipos kano (ko kapagikram) na panganop kano (o kabaya iyo), na oba rkano makagawi so rarangit ko pagtaw sa kiya alangi ran rkano ko Masjid Al-Haram ko kapakambaal iyo sa rido. Na thatabanga kano ko mapiya, go so kapananggila, go di kano pthatabanga ko dosa, go so kapriridoay: Go kalkn iyo so Allah: Ka mataan! a so Allah na maylot i kandadan'g.

3

Hiyaram rkano so (kakana ko) miyatay (a da masombali), go so rogo (a tomiyoga), go so sapo o baboy, go so inipanambay ko salakaw ko Allah; go so miyapkl, go so bintol, go so miyawlog, go so sinidong; go so piyagdasan o binatang a mawaraw, inonta so miyasombali iyo (a riyaotan sa niyawa), go so siyombali makapantag ko manga barahala, go so kiprimarn iyo ko manga Azlam: Giyoto man na kapanongklid. Sa alongan nai na kiyadaan sa panginam so da pamaratiyaya (ko kabinasaa) ko agama niyo: Na di niyo siran khalkn, na Sakn i kalkn iyo. Sa alongan nai na tiyarotop Akn rkano so okit iyo ko kapagintaw, go siyamporna Akn rkano so limo Akn; go pinili Akn rkano so Islam a agama (a okit ko kapagintaw). Na sa taw a kasngtan ko ongos, a kna a ba mithibaba ndosa, na mataan! a so Allah na Manapi, a Makalimoon.

4

Ipagiza iran rka o antonaa i piyakay kiran, tharoang ka a: Piyakay rkano so manga pipiya: Go so minipangndao niyo ko pphamakapali a bababsn iyo a pkhipangndao niyo kiran so inipangndao rkano o Allah: Na kang kano ko miyadakp iran rkano, go aloya niyo ron so ngaran o Allah: Go kalkn iyo so Allah; mataan! a so Allah na magaan i kapagitong.

5

Sa alongan nai na piyakay rkano so manga pipiya. Na so siyombali o siran a bigan ko kitab na halal rkano, go so siyombali iyo na halal kiran; go (piyakay rkano) so manga bilangataw ko miyamaratiyaya a manga bai, go so manga bilangataw ko manga bai ko siran a bigan ko kitab, ko miyaonaan iyo, - igira minibgay niyo kiran so manga mahar iran, sa titho kano a miyamaratiyaya a kna a ba kano pzisina sa mapayag, go kna a ba kano phamangowa sa manga bolayoka ko kazina a masoln. Na sadn sa khapir ko oriyan o paratiyaya, na sabnar a miyailang so galbk iyan, go skaniyan sii sa akhirat na pd ko miyangalologi (a manga taw ko naraka).

6

Hay so miyamaratiyaya, igira ithindg iyo so sambayang, na onabi niyo so manga paras iyo, go so manga lima niyo taman ko manga siko; go sapowa niyo so manga olo niyo; go (onabi niyo) so manga ai niyo taman ko dowa boko a ai. Na amay ka madidiyonob kano, na phaygo kano. Na o pkhakasakit kano, odi na kapantagan kano sa lakawan, odi na miyakaoma so isa rkano a phoon ko diyamban, odi na miniprorada iyo so manga babay, go da a khatoon iyo a ig, na thayamom kano sa botha a soti, na sapowa niyo ron so manga paras iyo, go so manga lima niyo. Kna a ba kabaya o Allah i ba kano Niyan snggay sa margn, na ogaid na aya kabaya Iyan na ang kano Niyan masoti, go an Iyan matarotop so limo Iyan rkano, ka an kano makapanalamat.

7

Na tadmi niyo so limo rkano o Allah, go so diyandi Iyan, a so inidiyandi Iyan rkano, gowani ko tharoon iyo a: "Piyamakin'g ami go inonotan ami": Na kalkn iyo so Allah; mataan! a so Allah na katawan Iyan so zisii ko manga rarb (a manga pamikiran).

8

Hay so miyamaratiyaya, mbaloy kano a khipamamayandg ko (manga kabnar o) Allah, a manga saksi kano ko kapaginontolan, na oba rkano makagawi so rarangit ko pagtaw ko di niyo kapakapaginontolan. Paginontolan kano: Ka giyoto i lbi a marani ko kapangongonotan: Na kalkn iyo so Allah. Mataan! a so Allah na Kaip Iyan so gii niyo nggolawlaan.

9

Inidiyandi o Allah ko siran a miyamaratiyaya, go pinggalbk iran so manga pipiya, a adn a bagian iran a maap go balas a lbi a mala.

10

Na so da pamaratiyaya, go piyakambokhag iran so manga ayat Ami, na siran man i manga taw ko naraka Jahim.

11

Hay so miyamaratiyaya! tadmi niyo so limo rkano o Allah gowani ko mapamikir o pagtaw a pagolangn iran rkano so manga barokan iran, na inrn Iyan rkano so manga barokan iran: Go kalkn iyo so Allah. Na so bo so Allah i sarigi o miyamaratiyaya.

12

Na sabnsabnar a inmbaalan o Allah so diyandi ko manga moriyataw o Israil, go piyakatindgan Ami siran sa sapolo ago dowa nakoda. Na pitharo o Allah a: "Mataan! a Sakn na babid iyo: Na ibt ka o pamayandgn iyo so sambayang, go tonayn iyo so zakat, go paratiyayaa niyo so manga sogo Akn, go babidn iyo siran, go pagotangan iyo so Allah sa otang a mapiya, na mataan! a lalasn Ko rkano dn so manga dosa niyo, go mataan! a pakasoldn Ko skano dn ko manga sorga a pphamangondas ko kababaan iyan so manga lawasayg; na sadn sa mongkir rkano, ko oriyan oto, na sabnar a miyapokas ko ontol a lalan."

13

Na sabap ko kiyabarngkasa iran ko diyandi kiran, na pimorkaan Ami siran, go biyaloy Ami so manga poso iran a manga ttgas: Pphamagalinn iran so manga katharo ko manga darpa iyan, go piyakalipatan iran so ontong a pd ko inisogo kiran; na di khada a kapkhatokawing ka ko kandonsiyan a pphakapoon kiran inonta so mayto kiran - na pmaaping ka siran, go dapayang ka: Mataan! a so Allah na pkhababayaan Iyan so miphipiyapiya.

14

Na sabap sa siran na pitharo iran a: Mataan! a skami na manga Kristiyan, na inmbaalan Ami so diyandi kiran, na piyakalipatan iran so ontong a pd ko inisogo kiran: Na inadn Ami kiran so rido go so rarangit sa taman ko alongan a qiyamah. Na phanotholn kiran dn o Allah so siyowa iran.

15

Hay tiyoronan ko kitab, sabnar a miyakaoma rkano so sogo Ami, a pphagosay rkano ko madakl ko piyagma iyo ko kitab, go adn a plpasn iyan a madakl: Sabnar a adn a miyakaoma rkano a phoon ko Allah a sindaw ago kitab a miyakawsay (a giya Qor'an aya),

16

Pthoroon o Allah sa sabap roo so taw a komidg ko kasosoat Iyan, ko manga okit ko kalilintad, go pphakatogalinn Iyan siran phoon ko manga lilibotng, sii ko maliwanag, - sabap ko idin Iyan, go pthoroon Iyan siran ko okit a ontol

17

Sabnsabnar a miyakapir so siran a pitharo iran a: Mataan! a so Allah na sodn so Al-Masih a wata o Maryam. Tharoang ka: "Na ba adn a taw a adn a mapkhapaar iyan ko Allah a mayto bo, amay ka kabaya Iyan a binasaan Iyan so Al-Masih a wata o Maryam, go so ina iyan, go so taw ko lopa sa kalangolangowan iyan? Na rk o Allah so kapaar ko manga langit ago so lopa, go so nganin a pagltan a dowa oto. Pphangadn sa sadn sa kabaya Iyan. Na so Allah na so langowan taman na Gaos Iyan."

18

Na pitharo o manga Yahodi go so manga Kristiyan a: "Skami na manga wata o Allah, go pkhakababayaan Iyan." Tharoang ka: "Ino kano Niyan ziksaa sabap ko manga dosa niyo? Kna, ka skano na manosiya, - a pd ko inadn Iyan: Pnapiyan Iyan so taw a kabaya Iyan, go ziksaan Iyan so taw a kabaya Iyan: Ka rk o Allah so kapaar ko manga langit ago so lopa, go so pagltan a dowa nan: Go Skaniyan i khandodan."

19

Hay tiyoronan ko kitab, sabnar a miyakaoma rkano so sogo Ami, a pphagosay rkano (ko bitikan o agama) ko kiyarintas o manga sogo, ka oba niyo matharo i: "Da a miyakaoma rkami a pphamanothol sa mapiya, go pphamakaiktiyar." Na sabnar a adn a miyakaoma rkano a pphamanothol sa mapiya, go pphamakaiktiyar. Na so Allah na so langowan taman na Gaos Iyan.

20

Na gowani na pitharo o Mosa ko pagtaw niyan: "Hay pagtaw akn, tadmi niyo so limo rkano o Allah, gowani ko porotan kano Niyan sa manga nabi, go biyaloy kano Niyan a manga dato, go inibgay Niyan rkano so da a bigan Iyan on a isa bo ko manga kaadn."

21

"Hay pagtaw akn, sold kano (sa Baytal Moqaddas a) lopa a soti a so tiyangkd o Allah a rk iyo, go di kano pmbazowi ko manga talikhodan iyo, ka makakasoy kano a miyangalologi."

22

Pitharo iran: "Hay Mosa, mataan! a adn a matatago on a pagtaw a pphamamndg: Go mataan! a skami na di kami ron dn zold taman sa di siran on mawa: Na o awa siran on, na mataan! a skami na phamanold kami ron."

23

Pitharo o dowa mama a pd ko siran a maalkn (ko Allah) a inikalimo siran o Allah: "Soldi niyo siran ko pinto: Ka o sold kano ron, na mataan! a skano i phamakadaag; go so bo so Allah i sarigi niyo o skano na mapaparatiyaya kano."

24

Pitharo iran: "Hay Mosa, mataan! a skami na di kami ron dn zold, sa dayon sa kakakadn iran on, na lalakaw ka, ska ago so Kadnan ka, na pakimbonoay kano (kiran), ka mataan! a skami na sii kami dn kakadn."

25

Pitharo iyan: "Kadnan ko, mataan! a sakn na da a mipapaar akn a rowar ko ginawa ko ago so pagari ko: Na pakaznggayaa kaming Ka ago so pagtaw a manga songklid!"

26

Pitharo (o Allah): "Na mataan! a inisapar kiran - sa pat polo ragon: Na pkhataataap siran ko lopa: Na ding ka pmbokoon so pagtaw a manga songklid."

27

Na pangadiing ka kiran so totholan ko dowa wata o Adam sii ko bnar; gowani a khorban siran sa korban: Na tiyarima so phoon ko isa sa dowa oto, na da tarimaa so phoon ko pd iyan. Na pitharo (o Qabil) a: "Mbonoon ko ska dn." Pitharo (o Habil) a: "Aya bo a tharimaan o Allah na so phoon ko miyamangongonotan (ko Allah);"

28

"Ibt o olangang ka rakn a barokan ka, ka mbonoon akong ka, oba ko rka olanga a barokan akn sa ba ko ska bonoa: Ka mataan! a sakn na ikhalk akn so Allah, a Kadnan o manga kaadn."

29

"Mataan! a sakn na tomoon ko a mikholokog ka so dosa ko, go so dosang ka, na mabaloy ka a pd ko manga taw ko naraka, ka giyoto i balas ko da pamaginontolan."

30

Na inipangoyat on o napso niyan a kiyabonoa niyan ko pagari niyan: Na biyono iyan, na miyabaloy a pd ko miyangalologi.

31

Na somiyogo so Allah sa kakowak, a mangokay ko lopa, ka phakiilay niyan on o andamanaya i katamboni niyan ko bangkay i pagari niyan. Pitharo i Qabil: "Hay dowan dowaan ako! Ino ko da magaga a mabaloy ako a lagid angkai a kakowak, a katambonan ko so bangkay o pagari ko? Na mimbaloy a pd ko miyamakazndit."

32

Sabap a makapantag roo: Na tiyangkd Ami ko manga moriyataw o Israil a mataan! a sadn sa mono ko taw a da pamono sa taw, odi na da paminasa ko lopa, na lagid oba niyan biyono so manga manosiya langon: Na sadn sa kasabapan sa kaoyag o taw, na lagid o ba on minisabap a kiyaoyag o manga manosiya langon. Na sabnsabnar a miniyoma kiran o manga sogo Ami so manga rarayag a karina, oriyan iyan na mataan! a madakl kiran ko oriyan oto a titho a mimamalawani ko lopa.

33

Aya dn a imbadal ko siran a romido ko Allah ago so sogo Iyan, go manamar nggalbk ko lopa sa kapaminasa: Na so kapamonoa kiran, odi na so kasolaa kiran, odi na so kapamotoli ko manga barokan iran go so manga ai ran sa di makapagonod, odi na so kitawgn kiran ko lopa: Giyoto man i bagian iran a kahinaan sa doniya, go adn a bagian iran sa akhirat a siksa a mala;

34

Inonta so siran a mithawbat ko da niyo kiran pn kagagaa (domakp): Na tangkda niyo, a mataan! a so Allah na Manapi, a Makalimoon.

35

Hay so miyamaratiyaya, kalkn iyo so Allah, go plobaa niyo so mipakarani niyo Ron, go panagontaman kano ko lalan Iyan: ka ang kano makaslang sa maliwanag.

36

Mataan! a so siran a da pamaratiyaya, - na apiya pn mataan! a pakimbagian kiran so nganin a zisii ko lopa langon, go dorogn a lagid iyan, ka an iran oto miyaon (sa ginawa iran) phoon ko siksa ko alongan a qiyamah, na di kiran matarima. Go adn a bagian iran a siksa a malipds.

37

Kabaya iran a kapakaawa iran ko naraka, na di siran on dn mamakaawa: Go adn a bagian iran a siksa a tatap.

38

Na so tkhaw a mama, go so tkhaw a babay, na potoli niyo so manga barokan iran: Ka balas ko pinggolawla iran, a dan'g a thoma a phoon ko Allah, ka so Allah na Mabagr, a Mawngangn.

39

Na sa taw a thawbat ko oriyan o kiyapakasalimbot iyan, go phiyapiya, na mataan! a so Allah na phakatawbatn Iyan; ka mataan! a so Allah na Manapi, a Makalimoon.

40

Bang ka di katawi a mataan! a so Allah i Khirk ko kapaar ko manga langit ago so lopa? Ziksaan Iyan so taw a kabaya Iyan, go pnapiyan Iyan so taw a kabaya Iyan: Ka so Allah sii ko langowan taman na Gaos Iyan.

41

Hay Rasol, oba ka mapakamboko o siran a pphagoradorad ko kakhapir a siran na pitharo iran a: "Miyaratiyaya kami" sa sii bo ko manga ngari iran na di mapaparatiyaya so manga poso iran; go pd ko siran a manga Yahodi, - a pphamakin'g siran sa pantag a kapamamokhag, - a ipphamakin'g iran so pagtaw a salakaw a da siran rka makasong. Na pphamagalinn iran so manga katharo ko manga darpa iyan (ko oriyan iyan): gi iran tharoon a: "O mitalingoma rkano wai, na kpiti niyo skaniyan, na odi rkano wai mitalingoma, na pagiktiyari niyo!" Na sadn sa kabaya o Allah a kadadag iyan, na da dn a makhapaar ka on ko Allah a mayto bo. Siran man so di kabaya o Allah o ba Niyan masoti so manga poso iran. Adn a bagian iran sa doniya a kahinaan, go adn a bagian iran sa akhirat a siksa a mala.

42

Pphamakin'g siran sa pantag a kapamamokhag, manga bosaw sa haram. Na o makawma siran rka, na kokomang ka siran, odi na talikhoding ka siran. Na o talikhoding ka siran, na da dn a mibinasa iran rka a mayto bo. Na o khokomang ka (siran) na kokomn ka kiran so ontol. Na mataan! a so Allah na pkhababayaan Iyan so manga oontol.

43

Na andamanaya i kaphakikokom iran rka a zisii kiran so Tawrat a matatago on so kokoman o Allah? Oriyan iyan na thalikhod siran bo ko oriyan oto; ka di siran mapaparatiyaya.

44

Mataan! a Skami na initoron Ami so Tawrat a katatagoan sa toroan go sindaw a ipphangokom skaniyan o manga nabi, a so mimbabayorantang (ko Allah), ko siran a manga Yahodi go (ipphangokom o) manga barasimba, go so manga olama (kiran): Sabap ko piyakisiyap kiran a kitab o Allah, go miyabaloy siran on a manga saksi: Na di niyo khalkn so manga manosiya, ka Sakn i kalkn iyo, go di niyo phamasaan so manga ayat Akn sa arga a mayto. Na sadn sa di niyan ikokom so initoron o Allah, na siran man na siran i manga kapir.

45

Na inipaliyogat Ami kiran (sii ko Tawrat) a: "Mataan! a so niyawa na (kitasan sa) niyawa, go so mata na mata, go so ngirong na ngirong, go so tangila na tangila, go so ngipn na ngipn, go so manga pali na makapkhikitasa." Na sa taw a rndann iyan (so kitas) na giyoto na khilalas iyan ko dosa; na sa taw a di niyan ikokom so initoron o Allah, na siran man na siran i manga salimbot.

46

Na piyakatondog Ami ko manga rarad iran so Eysa a wata o Maryam, a miyakatanto ko miyaonaan iyan a Tawrat: Go inibgay Ami ron so Injil a katatagoan sa toroan go sindaw, go miyakatanto ko miyaonaan iyan a Tawrat: Go toroan go ndao a rk o miyamananggila.

47

Na kokomn o tiyoronan ko Injil so initoron o Allah a madadalm on. Na sadn sa di niyan ikokom so initoron o Allah, na siran man na siran i manga songklid.

48

Na initoron Ami rka (ya Mohammad) so kitab, ka an mapayag so bnar, a miyakatanto ko miyaonaan iyan a kitab, go miyakazaksi on: Na kokomn ka kiran so initoron o Allah, go ding ka phangonoti so manga kabaya iran, a makaliliyo ko miyakatalingoma rka a bnar. Oman i isa rkano na singgayan Ami sa bitikan go okit. Na o kabaya o Allah, na mataan! a khabaloy kano Niyan ko okit a isa, na ogaid na (piyakambidabida kano Niyan ka) ang kano Niyan katpngi ko inibgay Niyan rkano: Na pagoradoradi niyo so manga pipiya. Na sii bo ko Allah so khandodan iyo langon; na phanotholn Iyan rkano so da niyo pagayonayoni;

49

Na kokomn ka kiran so initoron o Allah, go ding ka phangonoti so manga kabaya iran, go iktiyaring ka siran oba ka iran mapokas ko sabaad ko initoron rka o Allah. Na o talikhod siran, na tangkdang ka a aya dn a kabaya o Allah na izogat Iyan kiran so sabaad ko manga dosa iran. Na mataan! a madakl ko manga manosiya a titho a manga songklid.

50

Ba so kokoman ko masa a kaada a mlng i phlolobaan iran? Go ba adn a lawan o Allah sa kapiya i kokoman ko pagtaw a khitotomangkd?

51

Hay so miyamaratiyaya, di niyo khowaa so manga Yahodi ago so manga Kristiyan a manga panarigan: So sabaad kiran i manga panarigan o sabaad. Na sadn sa pd rkano a somarig kiran na mataan! a skaniyan na pd kiran. Mataan! a so Allah na di Niyan pnggonanaon so pagtaw a da pamaginontolan.

52

Na maylaing ka so siran a katatagoan so manga poso iran sa gdamn a pphamagapas siran kiran, a gi iran tharoon a: "Ipkhalk ami oba kami masogat o khisalimbago a margn." Na matatangkd a so Allah na imbgay Niyan so kapakadaag, odi na sogoan a phoon ko hadapan Iyan. Na mabaloy siran makapantag ko piyagma iran ko manga ginawa iran a mamakazndit.

53

Na tharoon o siran a miyamaratiyaya a: "Ba siran aya so inizapa iran ko Allah, so pithamanan o manga sapa iran sa mataan! a siran na pd iyo dn?" Miyailang so manga galbk iran, na miyabaloy siran a manga logi.

54

Hay so miyamaratiyaya, sadn sa mawa rkano ko agama niyan, na zambian dn o Allah sa pagtaw a pkhababayaan Iyan siran go pkhababayaan iran Skaniyan, - a mangangalimbabaan ko miyamaratiyaya, a thtgas ko da pamaratiyaya, a mananagontaman ko lalan o Allah, go da a ikhalk iran a panginsoya o pphanginsoya. Giyoto man so gagaw o Allah, a mibgay Niyan ko taw a kabaya Iyan. Na so Allah na Maginawa, a Matao.

55

Aya bo a panarigan iyo na so Allah, go so sogo Iyan, go so siran a miyamaratiyaya, - a so ipphamayandg iran so sambayang go pthonayn iran so zakat, a siran na pphroroko.

56

Na sadn sa manarig ko Allah, go so sogo Iyan, go so siran a miyamaratiyaya, - na mataan! a so tampil ko Allah na siran i phamakadaag.

57

Hay so miyamaratiyaya, di niyo khowaa so siran a kinowa iran so agama niyo a kasandagan go gitagita a pd ko siran a bigan ko kitab ko miyaonaan iyo, go so da pamaratiyaya, a manga panarigan; go kalkn iyo so Allah, o skano na khipaparatiyaya.

58

Na igira a inipananawag iyo so sambayang, na balowin iran a kasandagan go kakayad; giyoto man na sabap sa mataan! a siran na pagtaw a da a manga sabot iyan.

59

Tharoang ka: "Hay tiyoronan ko kitab, ba adn a isisilid iyo rkami a rowar sa kapaparatiyaya ami ko Allah, ago so initoron rkami, go so initoron gowani, na mataan! a kadaklan rkano na manga songklid?"

60

Tharoang ka: "Ba ko skano phanotholi sa marata a di giyoto a balas, sii ko hadapan o Allah? So taw a pimorkaan skaniyan o Allah, go kiyararangitan Iyan, go biyaloy Niyan siran a manga amo, go manga baboy, go miyangongonotan ko Tagot, - siran man i tanto a marata i btad, go miyaawatawat ko ontol a lalan!"

61

Na igira a miyakaoma siran rkano, na tharoon iran a: "Miyaratiyaya kami," a sabnar a somiyold siran a di mapaparatiyaya, go sabnar a siran na lominiyo siran na mawto dn. Na so Allah i lbi a Matao ko pag-umaan iran.

62

Go pkhaylaing ka a madakl kiran, a pphamagarabaya ko dosa, go so kapmalawani, go so kapkhana iran ko haram. Na miyakaratarata dn so gi iran nggolawlaan.

63

Ino kiran di zaparn o manga barasimba, go so manga olama (kiran) so gi iran katharoa ko dosa, go so kapkhana iran ko haram? Miyakaratarata dn so pzowaan iran.

64

Na pitharo o manga Yahodi a: "So lima o Allah na mapapatong." Na miyapatong so manga lima iran go pimorkaan siran sabap ko katharo iran. Kna, ka so mbala a lima o Allah na makapangongondaya: Pmbgay sa sadn sa kabaya Iyan. Na mataan! a badn pphakawman ko madakl a pd kiran so initoron rka a phoon ko Kadnan ka sa kapangakowala, go kaongkir. Na inolog Ami kiran so rido, go so rarangit taman ko alongan a qiyamah. Na oman siran miyag sa apoy ko kapakipridoay, na padngn skaniyan o Allah; go mananamar siran nggalbk ko lopa sa kapaminasa. Na so Allah na di Niyan khabayaan so pphamaminasa.

65

Na opama ka mataan! a so tiyoronan ko kitab na miyaratiyaya siran go miyananggila siran, na lalasn Ami kiran dn so manga dosa iran go pakasoldn Ami siran dn ko manga sorga a pakadarandang.

66

Na opama ka mataan! a siran na inipamayandg iran so Tawrat, go so Injil, go so (Qor'an a) initoron kiran a phoon ko Kadnan iran, na mataan! a makapangondaya siran koman ko phoon ko kaporoan iran, go so phoon ko kababaan o manga ai ran. Adn a pd kiran a pagtaw a moontol: Na madakl kiran a mikharatarata a gi iran nggolawlaan.

67

Hay Rasol, sampayn ka so initoron rka a phoon ko Kadnan ka, na oding ka nggolawlaa, na dang ka misampay so sogoan Iyan. Na so Allah na lilindingn ka Niyan ko manga manosiya. Mataan! a so Allah na di Niyan pnggonanaon so pagtaw a da pamaratiyaya.

68

Tharoang ka: "Hay tiyoronan ko kitab, da a kapthindgan iyo a mayto bo (ko agama o Allah) taman sa di niyo ipamayandg so Tawrat, go so Injil, go so (Qor'an a) initoron rkano a phoon ko Kadnan iyo." Na mataan! a badn pphakawman ko madakl a pd kiran so initoron rka a phoon ko Kadnan ka, sa kapangakowala, go kaongkir. Na ding ka pmbokoon so pagtaw a da pamaratiyaya.

69

Mataan! a so siran a miyamaratiyaya, go so manga Yahodi, go so manga Sabion, go so manga Kristiyan, - na sadn sa maratiyaya on ko Allah, go so alongan a mawri, go nggalbk sa mapiya na da a pangandam iran, go di siran makamboko (ko alongan a mawri).

70

Sabnsabnar a inmbaalan Ami so diyandi ko manga moriya taw o Israil go siyogo an Ami siran sa manga sogo. Na oman dn na mitalingoma kiran o sogo so di khabayaan o manga ginawa iran, na adn a isa ka sagorompong (ko manga rasol) a piyakambokhag iran, go adn a isa ka sagorompong a pphamonoon iran.

71

Na aya tarima iran na da a phakambowat a tiyoba; na mimbota bngl siran; oriyan iyan na piyakatawbat siran o Allah; oriyan iyan na mimbota bngl siran so madakl kiran. Na so Allah na phagilayn Iyan so gi iran nggolawlaan.

72

Sabnsabnar a miyakapir so siran a pitharo iran a: "Mataan! a so Allah na so dn so Al-Masih a wata o Maryam." Na pitharo o Al-Masih: "Hay manga moriyataw o Israil, simbaa niyo so Allah, a Kadnan ko go Kadnan iyo." Mataan aya! a sadn sa mmbaal sa sakoto o Allah na sabnar a kiyaram on o Allah so sorga, go darpa iyan so naraka. Na da a bagian o manga darowaka a phamakatabang.

73

Sabnsabnar a miyakapir so siran a pitharo iran a: Mataan! a so Allah na ikatlo ko tlo (a manga tohan): Na da a tohan inonta so tohan a Isaysa. Na odi ran gnki so gi iran tharoon, na khasogat dn so siran a da kiran pamaratiyaya a siksa a malipds.

74

Ino siran di pthawbat ko Allah, go siran on pangni sa maap? A so Allah na Manapi, a Makalimoon.

75

So Al-Masih a wata o Maryam na matag sogo; a andang a miyaypos ko miyaonaan iyan so manga sogo. Na so ina iyan na mangingimbnar. Aya btad iran na pkhan siran ko pangn'ngkn. Ilayang ka o andamanaya i kapphakarayag Ami kiran ko manga tanda; taros a ilayang ka o andamanaya i kapthalikhod iran!

76

Tharoang ka: "Ino niyo pzimbaa a salakaw ko Allah so da a mipapaar iyan rkano a kabinasa go ompiya? Na so Allah na Skaniyan so Pphakan'g, a Matao."

77

Tharoang ka: "Hay tiyoronan ko kitab, di niyo phanongkirn ko agama niyo so di bnar, go di niyo pagonoti so manga kabaya o pagtaw a andang a miyangadadadag gowani, - go miyakadadag siran sa madakl, go miyapokas siran ko ontol a lalan."

78

Kyamorkaan so da pamaratiyaya ko manga moriyataw o Israil, a minggolalan ko katharo o Dawood ago so Eysa a wata o Maryam: Giyoto man na sabap ko kiyandarowaka iran go so kiyapmalawani iran.

79

Aya btad iran na da iran thatapaosai so marata a pinggolawla iran: Na miyakaratarata dn so pinggolawla iran.

80

Pphakaylay ka sa madakl a pd kiran a pphanarig ko siran a da pamaratiyaya. Na mikharatarata dn so minibgay kiran o manga ginawa iran a inikararangit kiran o Allah, go sii ko siksa na siran na kakal siran on.

81

Opama ka piyaratiyaya iran so Allah, go so Nabi, go so (Qor'an a) initoron sii rkaniyan, na di iran siran makowa a manga panarigan, na ogaid na madakl kiran a manga songklid.

Part 7

82

Khatndoo ka dn a tanto a maylot ko manga manosiya i kapakipridoay ko miyamaratiyaya so manga Yahodi go so siran a miyamanakoto; go khatndoo ka dn a lbi a marani kiran i kapakingginawai ko siran a miyamaratiyaya so siran a pitharo iran a: Mataan! a skami na manga Kristiyan: Giyoto man na sabap sa mataan! a adn a pd kiran a manga olama, go manga barasimba, go mataan! a siran na di siran phanakabor.

83

Go igira a miyan'g iran so initoron ko Rasol, na maylaing ka so manga mata iran a prarayasan a lo' sabap ko kiyakilalaa iran ko bnar. Sa gi iran tharoon: "Kadnan ami! miyaratiyaya kami; na soratn kaming Ka a pd ko manga saksi;"

84

"Go andamanaya i di ami kaparatiyayaa ko Allah go so miyakaoma rkami a bnar, a maiinam ami a kapakasold a rkami o Kadnan ami (ko sorga) a pd ko pagtaw a manga bilangataw?"

85

Na inibalas kiran o Allah ko katharo iran so manga sorga, a pphamangondas ko kababaan iyan so manga lawasayg, makakakal siran roo. Na giyoto man i balas ko miphipiyapiya.

86

Na so siran a da pamaratiyaya, go piyakambokhag iran so manga ayat Ami, - na siran man i manga taw ko somozokhayaw a kadg.

87

Hay so miyamaratiyaya, di niyo harama so manga pipiya a hiyalal rkano o Allah, go di kano pmalawani: Mataan! a so Allah na di Niyan khabayaan so manga malawani.

88

Na kang kano ko inipagpr rkano o Allah, a halal a mapiya; go kalkn iyo so Allah, a so skano na aya niyo Skaniyan paparatiyayaan.

89

Di rkano iziksa o Allah so da mbabaa ko manga sapa iyo, na ogaid na iziksa Iyan rkano so kiyathibaba iyo zapa: Na aya rnding Iyan, na so kapakakana ko sapolo a manga miskin, ko ka tatangkaan ko pphakikan iyo ko taalok rkano; odi na so kapakanditara kiran; odi na kapmaradika sa oripn. Na sa taw a di ron phakabaog, na kaphowasa sa tlo alongan. Giyoto man i rnding o manga sapa iyo igira mizapa kano. Na siyapa niyo so manga sapa iyo. Lagid aya a kapphagosaya rkano o Allah ko manga ayat Iyan, ka ang kano makapanalamat.

90

Hay so miyamaratiyaya, aya bo a (antap) o pakabrg go so kandarmt, go so manga barahala, go so manga kaprimar, na marzik, - ka pd ko galbk o shaytan. Na pakawatani niyo Skaniyan, ka ang kano makadaag.

91

Aya bo a ongaya o shaytan na mitana iyan rkano so rido, go so rarangit, sii ko pakabrg go so kandarmt, go kaalangan kano niyan ko tadm ko Allah, go so sambayang. Na una skano ginkan niyo?

92

Go onoti niyo so Allah, go onoti niyo so Rasol, go pagiktiyar kano. Na o talikhod kano, na tangkda niyo a aya bo a paliyogat ko sogo Ami na so kapamakasampay a mapayag.

93

Da ko siran a miyamaratiyaya, go pinggalbk iran so manga pipiya i dosa sii ko miyakan iran (gowani), igira a miyananggila siran, go miyaratiyaya siran, go pinggalbk iran so manga pipiya, oriyan iyan na miyananggila siran, go miyaratiyaya siran, - oriyan iyan na miyananggila siran, go miphiyapiya siran. Na so Allah na pkhababayaan Iyan so miphipiyapiya.

94

Hay so miyamaratiyaya, thiyobaan kano dn o Allah sii ko shay' a pd ko pphanganopn a pkhakawa skaniyan o manga barokan iyo, go so manga sbat iyo, ka an mapnto o Allah so taw a maalk Rkaniyan a masoln: Na sadn sa mmalawani ko oriyan oto, na adn a bagian iyan a siksa a malipds.

95

Hay so miyamaratiyaya, di niyo mbonoa so pphanganopn ko kapagi-ihram iyo, na sadn sa mono on rkano a thibabaan iyan, na aya khibayad iyan na so lagid o miyapatay niyan ko manga ayam, khakokom skaniyan o dowa a maontol rkano; a pammgayan a izampay sa Kaaba, odi na kiparat a pangn'ngkn o manga miskin; odi na kabaloy anan oto a kaphowasa: ka an iyan kataami so karata o siyowa iyan. Pimaap o Allah so miyaypos: Na sadn sa pharomanan iyan oto na indan'g on o Allah. Na so Allah na Mabagr, a Phapaar ko kandadan'g.

96

Hiyalal rkano so kathogs ko kalodan go so pangn'ngkn on, a pagpr rkano, ago so pphlayalayag; na hiyaram rkano so kapanganop ko kalopaan ko masa a kapagi-ihram iyo. Na kalkn iyo so Allah, a so Ron kano plimoda.

97

Biyaloy o Allah so kaaba, a so walay a pagaadatan, a makapamamayandg ko (kapiyaan o) manga manosiya, go so olanolan a pagaadatan, go so manga pammgayan, go so manga toos: Giyoto man na an iyo katokawi a mataan! a so Allah na katawan Iyan so zisii ko manga langit ago so zisii ko lopa, go mataan! a so Allah na so langowan taman na katawan Iyan,

98

Tangkda niyo a mataan! a so Allah na Mayloti-kapaniksa, go mataan! a so Allah na Manapi, a Makalimoon.

99

Daa paliyogat ko Rasol a rowar ko kapamakasampay (o sogoan on). Na so Allah na katawan Iyan so papayagn iyo ago so pag-umaan iyo.

100

Tharoang ka a: "Di magizan so marata ago so mapiya, apiya i kiyasoata rka o kadakl o marata; na kalkn iyo so Allah, hay manga papantas i akal; ka an kano makaslang sa maliwanag."

101

Hay so miyamaratiyaya, di niyo phagizaan so nganinganin, a o payaga rkano, na makaringasa rkano. Na o aya kiphagizaan iyo ron na so masa a kipthoronn ko Qor'an, na khapayag rkano; na pimaap oto o Allah: Ka so Allah na Manapi, a Matigr.

102

Sabnar a iniiza oto o pagtaw a miyaonaan iyo, oriyan iyan na miyabaloy siran sa sabap roo a manga kapir.

103

Daa inisnggay o Allah a Bahira (giyo to so ayam a ppotolan so tangila niyan igira mimbawata sa madakl), go da a Saiba (a giyoto so ayam a ipsnggay para bo ko manga barahala), go da a Wasilah (a giyo to so ayam a oman mbawata na babay), go da a Ham (a giyoto so mama a pd ko onta igira inimbawata a phoon ko mbawataan iyan so madakl a onta). Na ogaid na siran a da pamaratiyaya na iphagangkob iran ko Allah so kabokhag; na kadaklan kiran na da a manga sabot iyan.

104

Na igira a pitharo kiran a: "Song kano sii ko (kokoman a) initoron o Allah; go sii ko sogo:" Na tharoon iran a: "Kiyatarotopan kami o kpit a kiyatoonan ami ko manga loks ami." Ati apiya aya btad o manga loks iran na da a manga mlng iran a mayto bo go di siran makaoontol (ko bnar)?

105

Hay so miyamaratiyaya, siyapa niyo so manga ginawa niyo: da a khibinasa rkano o taw a miyadadag o matoro kano. Sii kano bo phakandod ko Allah langon: Na phanotholn Iyan rkano so pinggolawla niyo.

106

Hay so miyamaratiyaya, pakizaksi kano amay ka makarani ko isa rkano so kapatay, ko masa a kapthanan, sa dowa kataw a manga oontol a pd rkano, odi na dowa a salakaw a di rkano pd amay ka skano na gii kano ndadalakaw ko lopa, na miyasogat kano o khisogat a kapatay. Rna niyo siran ko oriyan o sambayang, na zapa siran ko Allah: O ba kano zasangka sa (tharoon iran a:) "Di ami aya iphamasa sa arga apiya ami tonganay: Go di ami phagmaan so kazaksi ko Allah: Ka mataan! a skami na o sowa ami oto, na khapd kami dn ko manga baradosa!"

107

Na o katokawi a mataan! a giya dowa oto na miyatangkd a mindosa, na so dowa salakaw i makatindg ko tindg a dowa oto, - a pd ko siran a kiyapatotan (ko kathanan) a dowa a madazg (o miyatay): Na zapa siran ko Allah: "Sa mataan! a so kiyazaksi ami na bnar a di so kiyazaksi iran a dowa, go da kami pamagoman: Ka mataan! a skami na o sowa ami oto, na khapd kami dn ko da pamaginontolan!"

108

Giyoto man i marani a kitomann iran ko kazaksi sii ko kaontol iyan: Odi na ikalk iran so di katarima o kazapa (a dowa oto) ko oriyan o kazapa iran (a manga waris). Na kalkn iyo so Allah, go pamakin'ga niyo: Ka so Allah na di Niyan thoroon so pagtaw a manga songklid.

109

Sii ko alongan a kalimoda o Allah ko manga rasol, na tharoon Iyan: "Antonaa i inismbag rkano (o pagtaw niyo)?" Tharoon iran a: "Da a katao ami, mataan! a Ska na Ska i Matao ko manga sosoln."

110

Gowani na pitharo o Allah: "Hay Eysa a wata o Maryam! tadming ka so limo Akn rka ago si ina aka, gowani ko ibagr Akn rka so Niyawa-soti (a so Jibril) a giing ka mimbitiyarai so manga manosiya ko saloyota, go so kiyakhasad ka; go gowani ko indao Akn rka so kazorat go so ongangn, go so Tawrat go so Injil; go gowani ko pphakambaal ka ko lipaw, sa lagid o bontal o papanok, sabap sa idin Akn, na phagiyopn ka oto, na gii mbaloy a papanok sabap sa idin Akn, go pkhapiyang ka so bota, go so ppanggaln, sabap sa idin Akn; go gowani ko pkhawyag ka so myamatay, sabap sa idin Akn; go gowani ko lindingn Akn ska ko manga moriyataw o Israil gowani a miyomang ka kiran so manga rarayag a karina, na pitharo o siran a da kiran pamaratiyaya a: 'Da a salakaw saya a rowar sa balik mata a mapayag.'

111

Go gowani na iniilaham Akn ko manga Hawariin a paratiyaya Ako niyo go so sogo Akn: Na pitharo iran a: "Miyaratiyaya kami, na zaksiing ka a mataan! a skami na mimbabayorantang (rka)."

112

Gowani na pitharo o manga Hawariyyon: "Hay Eysa a wata o Maryam, ino khagaga o Kadnan ka a: Pakatoronan kami Niyan sa dolang a phoon ko kawang?" Pitharo iyan: "Kalkn iyo so Allah, o skano na khipaparatiyaya."

113

Pitharo iran a: "Kabaya ami a makakan kami ron go thakna so manga poso ami, go katokawan ami a sabnar a pimataanan kaming ka; go mabaloy kami a pd ko manga saksi."

114

Pitharo o Eysa a wata o Maryam: "Ya Allah! a Kadnan ami pakatoroni kaming Ka sa dolang, a phoon ko kawang, a mabaloy rkami a gii khalamilamiyan a rk o miyaona rkami ago so khawri rkami go tanda a phoon Rka; go riskhii kaming Ka, ka Ska i taralbi a mapiya ko pphamgay sa riskhi."

115

Pitharo o Allah: "Mataan! a Sakn na ithoron Akn rkano anan: Na sadn sa mongkir rkano ko oriyan oto, na mataan! a Sakn na ziksaan Ko skaniyan sa a da a ziksaan Ko ron a isa bo ko manga kaadn"

116

Na so masa a tharoon o Allah: "Hay Eysa a wata o Maryam, bang ka pitharo ko manga manosiya a: Baloya ko niyo ago si ina a dowa tohan a salakaw ko Allah?" Na tharoon iyan: "Soti Ka (ya Rabbi)! Di rakn patot. O sakn na pitharo akn oto, na sabnar a katawan Ka skaniyan. Katawan Ka so zisii sa ginawa ko, na di ko katawan so zisii sa ginawang Ka. - mataan! a Ska na Ska i Matao ko manga sosoln."

117

"Daa pitharo akn kiran a rowar ko inisogoo Ka rakn skaniyan a: Giya kazoasoata niyo ko Allah, a Kadnan ko go Kadnan iyo; na miyabaloy ako kiran a saksi ko kazisii akn kiran; na kagiya a tangann akong Ka, na Ska bo i makatotonggo kiran; ka Ska i saksi ko langowan taman."

118

"O siksaang Ka siran, na mataan! a siran na manga oripn Ka: Na o napiing Ka siran, na mataan! a Ska na Ska so Mabagr, a Mawngangn."

119

Ptharoon o Allah: "Giyaya so alongan a phakanggay a gona ko miyamangimbnar so kiyapangimbnar iran: Adn a bagian iran a manga sorga, a pphamangondas ko kababaan iyan so manga lawasayg, - makakakal siran on sa dayon sa dayon: Miyasoat kiran so Allah, na miyasoat siran on mambo: Giyoto man so daag a mala."

120

Rk o Allah so kapaar ko manga langit go so lopa, go so madadalm roo; na Skaniyan sii ko langowan taman na Gaos Iyan.

Total Number of Verses: 165

1

So podi na rk o Allah, a so miyadn ko manga langit go so lopa, go miyadn ko manga lilibotng ago so sindaw. Oriyan aya na siran a miyamangongkir na so Kadnan iran na phrimbangn iran.

2

Skaniyan so miyadn rkano phoon sa lipaw, oriyan iyan na diniyangka Iyan so adiyal. Na so adiyal na miyapnto sii Rkaniyan; oriyan aya na skano na zasangka kano!

3

Go Skaniyan so Allah (a patot a pzimbaan) sii ko manga langit go so lopa. Katawan Iyan so isosoln iyo, go so ipapayag iyo, go katawan Iyan so gii niyo nggalbkn.

4

Na da a phakatalingoma kiran a ayat a pd ko manga ayat o Kadnan iran, a ba iran oto di ta talikhodi.

5

Na sabnar a piyakambokhag iran so bnar ko kiyapakawma niyan kiran: Na phakatalingoma kiran dn so manga totholan ko piyamagompat iran skaniyan (a siksa).

6

Ba iran da maylay a madakla bininasa Mi ko miyaonaan iran a pagtaw? A piyakikhapaar Ami kiran ko lopa so da Ami rkano phakikhapaarn, go biyotawanan Ami kiran so oran a margs, go biyaloy Ami so manga lawasayg a pphamangondas ko kababaan iran: Na bininasa Mi siran sabap ko manga dosa iran, go miyadn Kami ko oriyan iran sa pagtaw a manga salakaw.

7

Na opama ka tiyoronan Ami ska sa kitab a matatago sa karatas, go iran on miniskho so manga lima iran, na ptharoon dn o siran a da pamaratiyaya a: "Da a salakaw saya o rowar sa salamangka a mapayag!"

8

Na pitharo iran a: "Ino da pakatoroni skaniyan sa malaikat?" Na o tomiyoron Kami sa malaikat, na minitaman dn so khasowa, oriyan iyan na di kiran mapthataalik.

9

Na opama ka baloya Mi so sogo a malaikat, na matatangkd a khabaloy Ami skaniyan a mama, na mataan! a ba Ami siran dn kharimboti sa lagid o karirimboti kiran.

10

Na sabnsabnar a adn a piyamagompat a manga sogo ko miyaonaan ka; na kiyatangkalan so siran a miyamagrg kiran o piyamagompat iran (a siksa).

11

Tharoang ka a: "Ndalakaw kano ko lopa, na go niyo pagilaylaya o antonaa i miyambtad o kiya akiran ko miyamanaplis (ko bnar)."

12

Tharoang ka: "Antawaa i khirk ko nganin a zisii ko manga langit ago so lopa?" Tharoang ka a: "Rk o Allah. Tiyangkd Iyan ko ginawa Niyan so kapangalimo, plimodn kano Niyan dn ko alongan a qiyamah, a da a sangka a madadalm on. So siran a liyogi ran so manga ginawa iran, na siran i di khipaparatiyaya.

13

Na rk Iyan so nganin a miyakakadn ko gagawii ago so dawndaw; go Skaniyan so Pphakan'g; a Matao."

14

Tharoang ka: "Ba adn a salakaw ko Allah a khakowa ko a panarigan, a mimbaas ko manga langit ago so lopa? A Skaniyan i Pphagpr na di maphagpr." Tharoang ka a: "Mataan! a inisogo rakn a kabaloy akn a paganay a taw a mimbayorantang (ko Allah), na ding ka dn mbaloya a ginawang ka a pd ko manga pananakoto."

15

Tharoang ka a: "Mataan! a sakn na ikhalk akn amay ka sangkaan ko so Kadnan ko, so siksa ko alongan a lbi a mala."

16

"Sadn sa pakalidasn roo sa alongan oto, na sabnar a inikalimo skaniyan (o Allah); ka giyoto man so daag a mapayag."

17

"Na o sogati ka o Allah sa morala, na da a phakapokas on a rowar Rkaniyan; na o sogati ka Niyan sa mapiya, na Skaniyan sii ko langowan taman na Gaos Iyan."

18

"Go Skaniyan so Phakagaga, a makaoombaw ko manga oripn Iyan; go Skaniyan so Mawngangn, a Kaip."

19

Tharoang ka (ya Mohammad): "Antonaa shay' i mala a saksi?" Tharoang ka a: "So Allah i saksi rakn ago sii rkano; go iniilaham rakn angkai a Qor'an, ka an akn rkano aya mipamakaiktiyar; ago sadn sa raotn iyan. Ba mataan! a skano na pzaksian iyo a mataan! a adn a pd o Allah a manga tohan a salakaw?" Tharoang ka a: "Di ko pzaksian!" Tharoang ka a: "Mataan! a Skaniyan bo i tohan a Isaysa, go mataan! a sakn na angiyas ako ko ipphanakoto niyo."

20

Na so siran a inibgay Ami kiran so kitab na makikilala iran (so Mohammad) lagid o kakililalaa iran ko manga wata iran. So liyogi ran so manga ginawa iran, na siran i di khipaparatiyaya.

21

Na ba adn a taw a lawan a salimbot a di so taw a inangkob iyan so Allah sa kabokhag, odi na piyakambokhag iyan so manga ayat Iyan? Mataan aya! a di phakadaag so manga salimbot.

22

Na sii ko alongan a kalimoda Mi kiran langon: Oriyan iyan na tharoon Ami ko siran a miyamanakoto a: "Anda so inipamanakoto niyo a siran na skano na ittgo niyo (a manga sakotowa o Allah)?"

23

Oriyan aya na da a mabaloy a rason iran a rowar sa katharoa iran sa: "Ibt ko Allah a Kadnan Ami, ka kna a ba Kami manga pananakoto."

24

Pamimikiranang ka, o andamanaya i kapakapmbokhaga iran ko manga ginawa iran. Go maylang kiran so inipangangkob iran (ko Allah).

25

Na adn a pd kiran a pphamakin'gn ka niyan; na tiyagoan Ami so manga poso iran sa manga pils, ka an iran oto di khasabot, go (tiyagoan Ami) so manga tangila iran sa kabngl; na apiya maylay ran so langowan o tanda, na di iran oto paratiyayaan; taman sa igira a miyakaoma siran rka, na pphamawaln ka iran; gii tharoon o siran a da pamaratiyaya a: "Da a salakaw saya a rowar sa manga iringa a kabokhag o miyangaoona."

26

Na siran na ipphanapar iran skaniyan (a Qor'an), go phagawatn iran skaniyan; na da a pkhabinasaan iran a rowar ko manga ginawa iran, sa di iran maiin'ngka.

27

Na o maylaing ka so masa a katarongkoa kiran ko naraka! Na matharo iran a: "Hay oba tano bo phakakasoya (ko doniya)! ka di tano pakambokhagn so manga ayat o Kadnan tano, go mabaloy tano a pd ko miyamaratiyaya!"

28

Kna, ka pphayag kiran so piyagma iran sa paganay. Na o pakakasoya siran, na pagndodan iran dn so inisapar kiran, ka mataan! a siran na titho a manga bokhag.

29

Na pitharo iran a: "Da a kawyagoyag a rowar ko kawyagoyag tano ko doniya, go di tano pagoyagn (ko oriyan o kapatay)."

30

Na o maylaing ka so masa a kapakatindga kiran ko hadapan o Kadnan iran! a tharoon Iyan a: "Ba ini di bnar?" Na tharoon iran a: "Ungkayno di, ibt ko Kadnan ami (ka bnar dn)!" Tharoon Iyan: "Na taami niyo so siksa, sabap ko kiyaongkir iyo."

31

Sabnar a miyalogi so siran a piyakambokhag iran so kimbaratmowaan ko Allah, - taman sa amay ka makawma kiran so bangkit a mitalmba, na matharo iran a: "Hay miyakazndit tano! Sa kiyandaraynon tano ko doniya;" a siran na kaa-awidan iran so manga dosa iran sii ko manga likod iran; tanodan ka miyakaratarata a kaa-awidi ran on.

32

Na da ko kawyagoyag ko doniya inonta na matag katmbangan go kabimbanan; na matatangkd a so ingd a mawri i taralbi a mapiya ko siran a khipanananggila. Ba da a manga sabot iyo?

33

Sabnar a katawan Ami a mataan aya! a mapakapmboko ka dn o katharo iran: Na mataan! a siran na kna a ba ka iran di bbnara: Na ogaid na so da pamaginontolan na so manga ayat o Allah na sasangkaan iran.

34

Na sabnsabnar a piyakambokhag so manga sogo ko miyaonaan ka: Na miphantang siran ko kiyapakambokhaga kiran, go so kiyaringasaa kiran, taman ko kiyapakatalingoma kiran o tabang Ami: Ka da a phakasambi ko manga katharo o Allah. Na sabnsabnar a adn a miyakaoma rka ko manga totholan ko manga sogo.

35

Na oba rka minirgn so kiyatalikhod iran, na o khagagang ka na ploloba ka sa okita ko lopa odi na towak ko langit a kasabapan sa kabging ka kiran sa tanda, - na o kabaya o Allah, na mataan! a khatimo Iyan siran ko toroan: Na oba ka mabaloy a pd ko da a manga mlng iyan!

36

Aya bo a tharima (ko ipphanolon ka) na so pphamakin'g on: Na so miyamatay, na pagoyagn siran o Allah; oriyan iyan na Ron siran phakandoda.

37

Na pitharo iran: "Ino da toroni skaniyan sa tanda a phoon ko Kadnan iyan?" Tharoang ka a: "Mataan! a so Allah na Gaos Iyan a kapakatoron Iyan sa tanda, na ogaid na kadaklan kiran a di manga tatao."

38

Na da a binatang ko lopa, go da a papanok a iphlantap iyan so mbala a papak iyan, a ba di manga pagtaw a manga lagid iyo. Da a linipha Ami ko kitab a mayto bo, oriyan iyan na sii siran plimoda ko Kadnan iran.

39

Na so siran a piyakambokhag iran so manga ayat Ami na manga bngl go manga omaw, - a matatago ko manga lilibotng: Sadn sa kabaya o Allah (a kadadag Iyan) na ndadagn Iyan: Go sadn sa kabaya Iyan (a katoro Iyan) na thagoon Iyan ko lalan a makaoontol.

40

Tharoang ka: "Ay gda iyo amay ka makatalingoma rkano so siksa o Allah, odi na makatalingoma rkano so bangkit, ba adn a salakaw ko Allah a kaphangnian niyo? - o skano i manga bnar!"

41

"Kna, ka Skaniyan bo i kaphangnian iyo, na pakaslangn kano Niyan sa maliwanag phoon ko tiyoba a mala a minitalmba rkano o kabaya Iyan, na kalipatan iyo so ipphamanakoto niyo Ron!"

42

Go sabnsabnar a siyogoan Ami so manga pagtaw ko miyaonaan ka, na piyakadansal Ami kiran so masikot, go so kapakathatalogdam, ka an siran makapangalimbabaan.

43

Na ino siran da pangalimbabaan gowani ko makawma kiran so siksa Ami? Na ogaid na badn tomigas so manga poso iran, go pipharasan kiran o shaytan so pinggolawla iran (a manga rarata).

44

Na kagiya a pakalipatan iran so sabap a kiyapakatadma kiran, na likaan Ami kiran so manga pinto o langowan taman, taman sa kagiya a ba siran dn miyasonor ko kiyabgi kiran, na siniksa Ami siran sa minitalmba, na samawto na siran na kiyadaan siran sa panginam!

45

Na miyathiphad so kaposan o pagtaw a da pamaginontolan. Na so podi na rk o Allah a Kadnan o manga kaadn.

46

Tharoang ka: "Ay gda iyo, amay ka kowaan o Allah so kan'g iyo go so manga kaylay niyo, go parkatn Iyan so manga poso iyo, ba adn a tohan a salakaw ko Allah a mibgay niyan rkano to?" Pamimikiranang ka so ropaan a gii Ami kazalinsalina magosay ko manga ayat; na oriyan iyan na siran na pthalikhodan iran.

47

Tharoang ka: "Ay gda iyo, amay ka makatalingoma rkano so siksa o Allah a mitalmba, odi na mapayag, ba adn a khabinasa a rowar ko pagtaw a da pamaginontolan?"

48

Na da a kiyasogo Ami ko manga sogo a rowar sa kapphamanothol iran sa mapiya, go giya kaphphamakiiktiyar iran ko marata: Na sadn sa maratiyaya, go mbilangataw, - na da a pangandam iran, go di siran makamboko (ko alongan a mawri).

49

Na so piyakambokhag iran so manga ayat Ami, - na khasogat siran o siksa, sabap ko da iran kapangongonotan.

50

Tharoang ka a: "Di ko rkano ptharoon i zisii rakn so khitatagoan ko manga kakawasaan o Allah, go di ko katawan so migagaib, go di ko rkano ptharoon i mataan! a sakn na malaikat. Da a khdgn ko a rowar ko iphagilaham rakn." Tharoang ka a: "Ba magizan so bota ago so pphakaylay?" Ino kano di phamimikiran?

51

Na pakiiktiyaring ka ini ko siran a ikaalk iran so kaplimoda kiran ko Kadnan iran a: Da a khakowa iran a salakaw ko Allah a Panarigan go da a phangongogopan: ka an siran makapananggila.

52

Go ding ka mbowangn so siran a pzimbaan iran so Kadnan iran ko kapitapita, go so kagabigabi, a singanin iran ko kasosoat o Allah. Na da a paliyogat rka ko kapphamagitonga kiran a mayto bo, go da a paliyogat kiran ko kapphamagitonga rka a mayto bo, ka misabap ko kibowangn ka kiran, a sabap a kabaloing ka a pd ko da pamaginontolan.

53

Na lagid aya a kiyatiyoba Ami ko sabaad kiran sabap ko sabaad, ka an iran matharo a: "Ba siran aya so inikalimo siran o Allah ko ndolon-dolonan tano?" Ba da so Allah a Matao ko miyamanalamat?

54

Na igira a miyakaoma rka so siran a paparatiyayaan iran so manga ayat Ami, na tharoang ka a: "So kalilinatad na sii rkano. Tiyangkd o Kadnan iyo ko ginawa Niyan so kapangalimo. Mataan aya! a sadn sa miyakanggolawla rkano sa marata sii ko di katao, oriyan iyan na mithawbat ko oriyan iyan, go miphiyapiya, na mataan! a so Allah na Manapi, a Makalimoon."

55

Na lagid aya a gii Ami kazmpada magosay ko manga ayat. Go an mapayag so okit o manga baradosa.

56

Tharoang ka a: "Mataan! a sakn na inisapar rakn so kazoasoata ko ko siran a pphanongganowin iyo a salakaw ko Allah." Tharoang ka a: "Di akn pagonotan so manga kabaya iyo a ribat, ka miyadadag ako dn, o siyowa akn oto, go kna a ba ako pd ko miyamakaontol."

57

Tharoang ka a: "Mataan! a sakn na thatakna ko marayag a karina a phoon ko Kadnan ko, a piyakambokhag iyo Skaniyan. Kna a ba rakn zisii so pphagalokalokan iyo (a siksa). Da ko kokoman oto inonta na rk o Allah. Ipkhokom Iyan so bnar, go Skaniyan i taralbi a mapiya ko manga kokoman."

58

Tharoang ka a: "Opama ka mataan! a zisii rakn so phagalokalokan iyo, na minitaman dn so khasowa ko lt akn ago so lt iyo, na so Allah na katawan Iyan so da pamaginontolan."

59

Na zisii Rkaniyan so manga gonsi o migagaib, da a matao ron a rowar Rkaniyan. Go katawan Iyan so zisii ko kalopaan go so kalodan. Go da a khawlog a raon a ba Niyan di katawi skaniyan. Go da a od a matatago ko manga lilibotng ko lopa, go da a mawasa, go da a mamara, a ba di matatago ko kitab a mapayag (so Laoh Mahfodh).

60

Go Skaniyan so pthangan rkano ko gagawii, (ko kapthoroga rkano), go katawan Iyan so miyapasad iyo ko dawndaw. Oriyan iyan na pphakagogona on kano Niyan roo; ka an mapopos so taalik a miyapnto; oriyan iyan na sii Rkaniyan so khandodan iyan oriyan iyan na phanotholn Iyan rkano so pinggolawla niyo.

61

Go Skaniyan so phakabaas, a kaporoan o manga oripn Iyan, go pzogoan kano Niyan sa (manga malaikat a) khisisiyap (rkano). Taman sa igira a miyakaoma ko isa rkano so kapatay, na tangann Skaniyan o manga sogo Ami (a manga malaikat), a siran na di siran pphasipasin.

62

Oriyan iyan na pakakasowin siran ko Allah, a Kadnan iran a bnar. Tanodan ka rk Iyan so kokoman, go Skaniyan i lbi a magaan ko manga pagiitong.

63

Tharoang ka: "Ba adn a phakasabt rkano ko manga lilibotng ko kalopaan go so kalodan, a kaphangangarapanan iyo Skaniyan sa mapayag a kapangalimbabaan ago masoln (maptharo iyo a:) 'Ibt o sabta kami Niyan sii, na khabaloy kami dn a pd ko miyamanalamat'?"

64

Tharoang ka a: "So Allah na pzabtn kano Niyan on, go so langowan o boko, oriyan iyan na skano na ipphanakoto niyo!"

65

Tharoang ka a: "Skaniyan so Phakagaga sa katalingomai Niyan rkano sa siksa, a phoon ko kaporoan iyo odi na phoon ko kababaan o manga ai niyo, odi na pakarimbotan kano Niyan, sa kapakathitindga, go pakitintiman Iyan ko sabaad rkano so bagr o sabaad." Pamimikiranang ka so ropaan a gii Ami kazalinsalina magosay ko manga ayat, ka an iran kasaboti.

66

Na piyakambokhag aya o pagtawng ka, a skaniyan so bnar. Tharoang ka a: "Kna a ba kano rakn sasarign;"

67

"Oman i thothol na adn a pkhatanaan iyan, na katokawan iyo bo."

68

Na igira a miyailaing ka so siran a pphagizawizaw ko manga ayat Ami, na talikhoding ka siran taman sa di aya pagizawizawn iran na tothol a salakaw ron. Na o malipat ka o shaytan, na di ka pagontod ko oriyan o kapakatadm ka, a pd o pagtaw a da pamaginontolan.

69

Na da a paliyogat ko siran a khipanananggila ko kapphamagitonga kiran a mayto bo, na ogaid na pananadm, ka an siran makapananggila.

70

Na ganating ka so siran a biyaloy iran so agama iran a katmbangan go kabimbanan, go miyalimpang siran o kawyagoyag ko doniya. Na pamakitadming ka a Qor'an nai: Ka oba adn a kabinasaan a ginawa sa sabap ko pizokat iyan: da a bagian iyan a salakaw ko Allah a Panarigan go da a phangalbalb. Na apiya iyaon iyan (sa ginawa niyan) so langowan o ipagaon na di ron matarima: Siran man so kiyabinasaan sabap ko pizokat iran: Na bagian iran so inomn a phlikabo a ig go so siksa a malipds: Sabap ko da iran kaparatiyaya.

71

Tharoang ka (ya Mohammad): "Ino Ami zimbaa a salakaw ko Allah so di rkami phakanggay a gona, go di rkami phakamorala, - go ba kami pmbaklid ko manga talikhodan ami ko oriyan o masa a kiyatoroa rkami o Allah? - lagid o diyadag skaniyan o shaytan sii ko lopa, a pkhataataap, adn a manga bolayoka iyan a pthawagn iran sii ko toroan, sa song ka rkami." Tharoang ka a: "Mataan! a so toroan o Allah na giyoto i toroan, na inisogo rkami a kambayorantang ami ko Kadnan o manga kaadn;"

72

Go giya kipamayandgn iyo ko sambayang go onoti niyo Skaniyan: Na Skaniyan so Ron kano plimoda.

73

Go Skaniyan so (Allah a) miyadn ko manga langit ago so lopa sii ko bnar: Na sii ko alongan a tharoon Iyan so: "Kon," na khaadn. Aya katharo Iyan na so bnar. Na rk Iyan so kapaar ko alongan a kaiyopa ko pariyop o sanggakala. Katawan Iyan so gaib ago so mapayag. Go Skaniyan so Mawngangn, a Kaip.

74

Na gowani na pitharo o Ibrahim ko ama iyan a Azar: "Ino ka pphangmbaal sa manga barahala a manga katohanan? Mataan! a sakn na pkhaylay akn ska, go so pagtawng ka ko kadadag a mapayag."

75

Na lagid aya a kapphakiilayn Ami ko Ibrahim ko mala a kapaar ko manga langit go so lopa, ka an mabaloy a pd ko mithotomangkd.

76

Na kagiya a makalibotng rkaniyan so gagawii, na miyakaylay sa bitoon, na miyatharo iyan a: "Giyaya i Kadnan ko." Na kagiya a somdp, na miyatharo iyan a: Di ko khabayaan so pphamandp.

77

Na kagiya a maylay niyan so olan a pzbang, na miyatharo iyan a: "Giyaya i Kadnan ko. Na kagiya a somdp, na miyatharo iyan a: Ibt o di ako toroa o Kadnan ko, na khabaloy ako dn a pd ko pagtaw a miyangadadadag."

78

Na kagiya a maylay niyan so alongan a pzbang, na miyatharo iyan a: "Giyaya i Kadnan ko: Ka giyaya i mala." Na kagiya a somdp, na miyatharo iyan a: "Hay pagtaw akn, mataan! a sakn na angiyas ako ko ipphamanakoto niyo."

79

"Mataan! a sakn na inibantak akn so hadap akn ko Allah a mimbaas ko manga langit go so lopa, a mbabayorantang ako, go di ako pd ko manga pananakoto."

80

Na miyakiphawala on so pagtaw niyan. Pitharo iyan a: "Ino kano rakn gii pakiphawala, makapantag ko Allah, a sabnar a tiyoro ako Niyan? Na da a ikhalk akn ko ipzakoto niyo Rkaniyan a mayto bo: Inonta sa kabaya o Kadnan ko. Mararangkom o Kadnan ko a katao so langowan taman. Ino kano di phananadm?"

81

"Na andamanaya i kikhalkn ko ko ipphanakoto niyo, na di niyo ikhalk a mataan! a skano na piyaki sakotowan iyo so Allah, da a initoron Iyan rkano ron a karina? Na anda ko dowa ka sagorompong i kiyapatotan ko sarig? o skano na katawi niyo."

82

"So miyamaratiyaya, go da iran kmbotn ko paratiyaya iran so kapanakoto, na siran man i kiyapatotan ko sarig, go siran i miyamakaontol."

83

Na giyoto i karina Mi, a inibgay Ami oto ko Ibrahim makapantag ko pagtaw niyan: Ipphoro Ami ko manga daradat so taw a kabaya Ami: Mataan! a so Kadnan ka na Mawngangn, a Matao.

84

Na inibgay Ami ron so Is'haq go so Ya'qob; oman i isa kiran na tiyoro Ami. Go so Noh, na tiyoro Ami ko miyaonaan iyan, na pd ko moriyataw niyan so Dawood, go so Solayman, go so Ayyob, go so Yosof, go so Mosa, go so Haron: Na lagid aya a kambalasi Ami ko miphipiyapiya:

85

Go so Zakariya, go so Yahya, go so Eysa, go so Ilyas: Oman i isa kiran na pd ko manga bilangataw:

86

Go so Ismail, go so Al-Yasa', go so Yonos, go so Lot: Na oman i isa kiran na inilbi Ami ko manga kaadn (ko masa iran):

87

Go so sabaad ko manga loks iran, go so manga moriran a taw, go so manga pagari ran: Na pinili Ami siran, go tiyoro Ami siran ko okit a makaoontol.

88

Giyaya man so toroan o Allah a thoroon Iyan sa sabap Rkaniyan so taw a kabaya Iyan, ko manga oripn Iyan. Na opama ka miyanakoto siran, na miyaylang kiran dn so pinggalbk iran.

89

Siran man so inibgay Ami kiran so kitab, go so ongangn, go so kananabii: Na amay ka ongkirn aya o siran aya, na sabnar a inisarig Ami aya sa pagtaw a kna a ba iran aya di paparatiyayaa.

90

Siran man so tiyoro o Allah: Na so toroan kiran i onoting ka skaniyan; tharoang ka a: "Da a phangning ko rkano saya a sokay: da a salakaw rkaniyan a rowar sa ndao ko manga kaadn."

91

Na da iran slaan ko Allah so titho a kala Iyan, gowani ko tharoon iran a: "Da a initoron o Allah ko manosiya a mayto bo." Tharoang ka a: "Antawa onon i tomiyoron ko kitab a so minioma skaniyan o Mosa? - a sindaw ago toroan ko manga manosiya: Ipphanorat iyo to ko manga daptar na pphayagn iyo to, na madakl a pphagmaan iyo ron: Na minindao rkano so di niyo katawan, skano go di katawan o manga loks iyo." Tharoang ka a: "So Allah (i tomiyoron on):" Oriyan iyan na ganating ka siran ko gi iran kandadab a mabibimban siran.

92

Na giyang kaya (a Qor'an) na kitab a initoron Ami skaniyan, a ndadaklan o mapiya, a miyakatanto ko miyaonaan iyan: Go an ka mipamakaiktiyar ko (taw sa Makkah a) pompongan o manga ingd ago so makaliliyot on. Na so miyamaratiyaya ko akhirat na paparatiyayaan iran aya, go siran na so sambayang iran na sisyapn iran.

93

Na ba adn a taw a lawan a darowaka ko taw a inangkob iran so Allah sa kabokhag, odi na pitharo iran a: "Inilahaman ako," a da a iniilaham on a mayto bo, go so taw a pitharo iran a: "Phakatoron ako sa lagid o initoron o Allah?" Na opama ka maylaing ka amay ka so da pamaginontolan na matago ko manga kabrg ko kapatay! - a so manga malaikat na oolangn iran so manga barokan iran, (sa gi iran tharoon a:) "Pakaliyowa niyo so manga niyawa niyo: Sa alongan nai na imbadal rkano so siksa a kahinaan, - sabap ko skano na ipphangangkob iyo ko Allah so di bnar, go skano na so manga ayat Iyan na pphmaratabatan niyo!"

94

Na (tharoon kiran a:) "Sabnsabnar a miyakaoma kano Rkami a manga tawantawan lagid o kiyaadna Mi rkano ko paganay a kiyaokitan: Na kiyaganatan iyo (sa doniya) so inibgay Ami rkano ko tampar ko manga talikhodan iyo: Na da a khaylay Ami a pd iyo ko manga panandigan iyo a siran so initgo niyo sa mataan! a siran na manga sakotowa siran rkano o Allah. Sabnsabnar a miyangappka so kiyakhokoyaptaan iyo, go miyaylang rkano so initgo niyo (a phamakaogop rkano)!"

95

Mataan! a so Allah i dii makambatkad ko manga od, go so od a korma. Pphakagmawn Iyan so oyagoyag a phoon ko miyatay, go pphakagmawn Iyan so miyatay a phoon ko oyagoyag. Giyoto man so Allah: Na andamanaya i kapthalikhod iyo?

96

Miyadn ko kapipita: Go biyaloy Niyan so gagawii a iddkha, go so alongan go so olan a ipphagitong. Giyoto man i taks o (Allah a) Mabagr, a Matao.

97

Go Skaniyan so miyadn rkano ko manga bitoon, ka an iyo gii mipnanao ko manga lilibotng ko kalopaan ago so kalodan: Sabnar a pizmpad Ami magosay so manga ayat ko pagtaw a tatakikn iran.

98

Go Skaniyan so miyadn rkano phoon ko ginawa a isa (a giyoto so Adam): Na adn a kapthaknaan go adn a kapmbtadan: Sabnar a pizmpad Ami magosay so manga ayat ko pagtaw a khisasabot.

99

Go Skaniyan so piyakatoron Iyan a phoon ko kawang so ig: Na piyakagmaw Ami sa sabap rkaniyan so mbarambarang a mangngto: Na adn a piyakagmaw Ami ron a gadong, na pphakagmawan Ami skaniyan sa onga a mapipingi; go pphakaphoon ko korma a phoon ko tandok iyan a manga talintang a maa-ampir: Go so manga pamomolan a manga anggor, go zayton, go dalimah, makapzasaropai go di makapzasaropai: Pagilaylaya niyo so onga niyan igira miyonga, go so kapakatoa niyan. Mataan! a adn a matatago roo man a titho a manga tanda ko pagtaw a mapaparatiyaya.

100

Na biyaloy iran a manga sakotowa o Allah so manga jinn, a inadn Iyan siran; go tiyakayan iran sa manga wata a mama, go manga wata a babay a kna a ba katao. Soti Skaniyan! go maporo a ka-aawat Iyan ko phropaan iran On!

101

Mimbaas ko manga langit ago so lopa: Andamanaya i kapmbawata Iyan a da a darodopa Iyan? Go aya miyadn ko langowan taman, go Skaniyan i Matao ko langowan taman.

102

Giyoto man so Allah, a Kadnan niyo! Da a tohan a inonta Skaniyan, a miyadn ko langowan taman. Na zoasoata niyo Skaniyan. Go Skaniyan i tomatanggong ko langowan taman.

103

Di khatndo Skaniyan o manga kaylay, na Skaniyan na mattndo Iyan so manga kaylay: Go Skaniyan i Lambasi-katao, a Kaip.

104

"Sabnar a adn a miyakaoma rkano, a manga karina, a phoon ko Kadnan iyo: Na sadn sa min'ngka on, na kapiyaan o ginawa niyan; na sa di ron magin'ngka, na ikabinasa niyan: Na kna a ba sakn i somisiyap rkano."

105

Na lagid aya a gii Ami kazalinsalina magosay ko manga ayat. Go kagiya oba iran matharo a: "Kiyapangadian ka," go kagiya an Ami oto mapakarayag ko pagtaw a manga tatao.

106

Kdgang ka so iniilaham rka a phoon ko Kadnan ka: Da a tohana inonta Skaniyan. Go talikhoding ka so manga pananakoto.

107

Na o kabaya o Allah, na di siran makapanakoto: Na da Ami ska pntoa a somisiyap kiran, go kna a ba siran rka pakiaakon.

108

Na di niyo pndadawrai so siran a pzimbaan iran a salakaw ko Allah, ka ndadawraan iran so Allah sa kapmalawani sabap ko di katao. Lagid aya a kiyapharasi Ami ko oman i pagtaw ko galbk iran. Oriyan iyan na so bo so Kadnan iran i khandodan iran, na phanotholn Iyan kiran so pinggolawla iran.

109

Na mizasapa siran ko Allah ko pithamanan o manga sapa iran, sa mataan! a o adn a makawma kiran a tanda, na pharatiyayaan iran dn oto. Tharoang ka a: "So manga tanda na sii bo ko Allah. Na antawaa i maphakatokaw kano niyan sa mataan aya! a o makatalingoma na di iran pharatiyayaan?"

110

Na mbangkiringn Ami so manga poso iran, go so manga kaylay ran, lagid o da iran on kaparatiyayaa ko paganay a kiyaokitan: Go mbotawanan Ami siran ko kadadadag iran, a gii siran mromparompak.

Part 8

111

Na opama ka mataan! a Skami na piyakatoron Ami kiran so manga malaikat, go minimbitiyarai siran o miyamatay, go tinimo Ami kiran so langowan taman a minipagadapa (iran), na di siran dn maratiyaya, inonta o kabaya o Allah. Na ogaid na kadaklan kiran na di manga tatao.

112

Na lagid aya a kiyasnggay Ami ko oman i nabi sa ridoay, a manga shaytan ko manga manosiya, go so manga jinn, a ipphamodiyok o sabaad kiran ko sabaad so inirmasan a katharo, ka an siran maikmat. Na o kabaya o Kadnan ka, na di iran oto manggolawla: Na botawaning ka siran ago so gi iran mbabaasn;

113

Ka an on mitaliyadok so manga poso o siran a di miyamaratiyaya ko akhirat: Go an siran on masoat, go an iran gii manggolawla so siran na gi iran nggolawlaan (a dosa).

114

(Tharoang ka a:) "Ba adn a salakaw ko Allah a pmbabanogn akn a kokoman? - a Skaniyan so tomiyoron rkano ko kitab," a katatarotopan sa osayan. Na so siran a bigan Ami ko kitab, na katawan iran, a mataan! (a giya Qor'an aya na) initoron a phoon ko Kadnan ka a bnar. Na ding ka dn mbaloya a ginawang ka a pd ko pkhakadowadowaan.

115

Na miyasamporna so katharo o Kadnan ka a bnar ago ontol: da a phakasambi ko manga katharo Iyan: Go Skaniyan so Pphakan'g, a Matao.

116

Na amay ka onotan ka so kadaklan ko taw ko lopa, na khapokas ka iran ko lalan o Allah; ka da a phagonotan iran a rowar ko arangan: Go ba siran dn dii pangsar.

117

Mataan! a so Kadnan ka na Skaniyan i Matao ko taw a mapopokas ko lalan Iyan: Go Skaniyan i Matao ko khipakaoontol.

118

Na kang kano ko miyaaloy ron so ngaran o Allah, o skano na so manga ayat Iyan i paparatiyayaan iyo.

119

Na antonaa i sikap iyo (a maka-uurn rkano) sa di niyo kakhan ko miyaaloy ron so ngaran o Allah, a sabnar a pizmpad Iyan rkano magosay so kiyaram Iyan rkano inonta so kiyasngtan kano ron? Na mataan! a madakl a tanto a pphamakadadag sabap ko manga kabaya iran a ribat a kna a ba katao. Mataan! a so Kadnan ka na Skaniyan i Matao ko manga malawani.

120

Na ganati niyo so mapapayag a dosa, go so masoln on: Mataan! a siran a gii zokat ko dosa na imbalas kiran dn so pizokat iran.

121

Na di kano khan ko da on maaloy so ngaran o Allah: Ka mataan aya! a titho a kandarowaka. Na mataan! a so manga shaytan na titho a pphamodiyokn iran so manga salinggogopa iran, ka an kano iran mapphamawal. Na amay ka onotan iyo siran, na mataan! a skano na titho a manga pananakoto.

122

Ino so taw a aya btad iran na maatay, na inoyag Ami skaniyan, go singgayan Ami sa sindaw a sabap a pkhilalakaw niyan ko manga manosiya, ba lagid o taw a makaiibarat skaniyan sa matatago ko manga lilibotng, a di ron phakaawa? Lagid aya a kiyapharasi Ami ko da pamaratiyaya ko pinggolawla iran.

123

Go lagid aya a kiyasnggay Ami ko oman i ingd, sa manga ala ko manga rarata on i ongar, ka an siran on makapphagantangan sa marata: Na da a kapphagantanganan iran sa marata a rowar ko manga ginawa iran, sa di iran maiin'ngka.

124

Na igira adn a miyakaoma kiran a tanda, na tharoon iran a: "Di ami dn pharatiyayaan taman sa di kami kabgan sa lagid o inibgay ko manga sogo o Allah. So Allah i Matao sa sadn sa ipkhidiya Niyan ko sogoan Iyan. Na khasogat dn so siran a mimamarata i ongar a kapakayto sii ko Allah, go siksa a sangat, sabap ko kiyapagantangan iran sa marata."

125

Na sadn sa kabaya o Allah a katoroa Niyan on, - na phakaloagn Iyan so rarb iyan ko kambayorantang; go sadn sa kabaya Iyan a kadadaga Niyan on, na mbaloyn Iyan so rarb iyan a maggt a masimpit, lagid oba pphanakdg ko kawang: Lagid oto a kipznggayn, o Allah ko siksa ko siran a di mapaparatiyaya.

126

Na giya ungkai (a Islam) i lalan o Kadnan ka, a makaoontol: Sabnar a pizmpad Ami magosay so manga ayat ko pagtaw a khipakatatadm.

127

Bagian iran so ingd a kalilintad sii ko Kadnan iran: Go Skaniyan i Panarigan iran, sabap ko pinggolawla iran (a mapiya).

128

Na sii ko gawii a kalimoda Niyan kiran langon, (na tharoon Iyan): "Hay malilimod a manga jinn! Sabnar a madakl a liyalong iyo ko manga manosiya." Na tharoon o manga salinggogopa iran a pd ko manga manosiya: "Kadnan ami, kiyasawitan o sabaad rkami so sabaad: Na inisampay kami ko diyandi ami a so inidiyandii Ka rkami." Tharoon Iyan a: "So apoy i darpa iyo: Makakakal kano ron dn, inonta sa kabaya o Allah. Mataan! a so Kadnan ka na Mawngangn, a Matao."

129

Na giyaya i gii Ami kapakikhapaarn ko sabaad ko manga darowaka ko sabaad, sabap ko pizokat iran.

130

"Hay kasamasama o manga jinn go manga manosiya! Ba da a miyakatalingoma rkano a manga sogo a pd rkano, a mapphanothol iran rkano so manga ayat Akn, go mipphamakaiktiyar iran rkano so kitmo ko alongan iyo wai?" Tharoon iran: "Pizaksian ami a sala so manga ginawa mi. Na miyakalimpang kiran so kawyagoyag ko doniya. Na zaksian iran a ginawa iran sa mataan! a siran na da pamaratiyaya."

131

Giyoto man na mataan! a da ko btad o Kadnan ka oba Niyan binasaa so manga ingd sabap ko kiyandarowaka, a ba so taw ron na di makaiin'ngka.

132

Na rk o oman i isa so manga daradat ko pinggolawla iran: Ka da ko Kadnan ka i ba Niyan kalilipati so gi iran nggolawlaan.

133

Na so Kadnan ka i Kawasa, a Khirk ko limo: O kabaya Iyan, na khaylang kano Niyan, go phakasambi (sa pagtaw) ko oriyan iyo sa sadn sa kabaya Iyan, izan o kiya adn a Niyan rkano a miyakapoon ko moriyataw o pagtaw a salakaw.

134

Mataan! a so diyandi rkano na phakatalingoma dn: Go di niyo dn kapalagoyan.

135

Tharoang ka (ya Mohammad): "Hay pagtaw akn, nggalbk kano sa sadn sa kapasang iyo: Ka mataan! a pnggalbk ako mambo: Na katokawan iyo bo o antawaa i khabaloy a rk iyan so mababantog a ingd: Mataan aya! a di phakaslang sa maliwanag so da pamaginontolan."

136

Na singgayan iran so Allah ko inadn Iyan a manga prpran go manga ayam, sa kipantag: Na pitharo iran a: "Giyaya na bagian o Allah sii ko tgo iran a kabokhag: Go giyaya na bagian o ipphamanakoto ami!" Na so miyabaloy a bagian o ipphamanakoto iran na di ipraot ko Allah, na so miyabaloy a bagian o Allah na ipraot ko ipphamanakoto iran. Mikharatarata so ipkhokom iran!

137

Na lagid aya a kiyapharasi Niyan ko madakl ko manga pananakoto, ko kapmbonoa ko manga wata iran o ipphamanakoto iran, ka an iran siran mabinasa, go an iran siran karimboti ko agama iran, na opama ka kabaya o Allah, na di iran oto manggolawla: Na botawaning ka siran ago so gi iran mbabaasn a kabokhag.

138

Na pitharo iran a: Giya manga ayam ai go giya prpran nai na inisapar, da a phakakan on a inonta so kabaya ami sii ko tgo iran a kabokhag go manga ayam a inisapar so karorani ko manga likod iyan, go manga ayam a di iran on pagalowin so ngaran o Allah; - a ipphangangkob on: Mbadalan Iyan siran dn ko ipphangangkob iran on.

139

Go pitharo iran a: "So matatago ko manga tiyan angkai a manga ayam na kabisa o manga mama rktano, na kiyaram ko manga karoma tano;" na amay ka mabaloy a maatay, na thompotompok siran on. Mbadalan Iyan siran ko iniropa iran (a kabokhag): Mataan! a Skaniyan na Mawngangn, a Matao.

140

Sabnar a miyalogi so siran a piyamono iran so manga wata iran, sa kalalalongan, kna a ba katao, go kiyaram iran so pagpr kiran o Allah, a iniangkob ko Allah. Sabnar a miyadadag siran go da siran makakdg sa ontol.

141

Na Skaniyan so (Allah a) miyadn ko manga sapad, a gii mithaataar, go di mipthaataar, go so korma, go so prpran, a mbidabida a kapkhanawn: Go zayton, go so dalima a makapzasaropai, go di makapzasaropai: Kan kano ko onga niyan igira a miyonga, go tonaya niyo so zakat iyan ko alongan a kapragonawn; go di kano pthabowakar: Ka mataan! a Skaniyan na di Niyan khabayaan so manga tabowakar.

142

Go (inadn Iyan) so sabaad ko manga ayam a pkharoranan go di kharoranan: Kang kano ko pagpr rkano o Allah, go di niyo khdga so manga okit o shaytan: Mataan! a Skaniyan na ridoay niyo a mapayag.

143

Walo a nggaganapa: Sii ko bilibili a dowa, go sii ko kambing a dowa; tharoang ka a: Ba so dowa a mama i inisapar Iyan, antawaa so dowa a babay, antawaa so miyarangkom skaniyan o manga tiyan o dowa a babay? Panothola niyo rakn sii ko katao, o skano na manga bnar:

144

Go sii ko onta a dowa, go sii ko sapi a dowa. Tharoang ka a: Ba so dowa mama i inisapar Iyan, antawaa so dowa babay, antawaa so miyarangkom skaniyan o manga tiyan o manga babay? antawaa ba kano khipakadadarpa gowani a isogo rkano aya o Allah? Na ba adn a lawan a darowaka ko taw a inangkob iyan so Allah sa kabokhag, ka an iyan madadag so manga manosiya sa kna a ba katao? Mataan! a so Allah na di Niyan pnggonanaon so pagtaw a da pamaginontolan.

145

Tharoang ka (ya Mohammad) a: "Da a khatoon ko ko iniilaham rakn a inisapar ko khan a kakan iyan on, inonta o mabaloy a miyatay, odi na rogo a tomiyoga, odi na sapo o baboy, - ka mataan! a skaniyan na marzik - odi na kandarowaka, a inipanambay oto ko salakaw ko Allah." Na sadn sa kasngtan, a kna a ba darowaka, go di malawani, - na mataan! a so Kadnan ka na Manapi, a Makalimoon.

146

Na hiyaram Ami ko siran a manga Yahodi so oman i adn a kanoko niyan, go so sapi go so kambing, na hiyaram Ami kiran so manga sibo a dowa oto, inonta so kaa-awidan o manga likod a dowa oto, odi na so manga tinai, odi na so minilook ko tolan: Giyoto man i inibadal Ami kiran sabap ko kiyandarowaka iran: Na mataan! a Skami i titho a manga bnar.

147

Na o pakambokhaga ka iran, na tharoang ka a: "So Kadnan iyo i Khirk ko limo a rangkom; go da a phakarn ko siksa Iyan ko pagtaw a manga rarata i ongar."

148

Ptharoon o siran a miyamanakoto a: "Opama ka kabaya o Allah, na di kami makapanakoto, go di makapanakoto so manga loks ami; go da a misapar ami a mayto bo," lagid oto a kiyapakambokhaga o siran a miyaonaan iran (ko manga sogo), taman sa kiyataaman iran so siksa Ami. Tharoang ka a: "Ba adn a zisii rkano a katao? Na gmawn iyo rkami oto. Da a phagonotan iyo a rowar ko arangan: Ka ba kano dn gii pangsar."

149

Tharoang ka: "Na rk o Allah so karina a tarotop. Na o kabaya Iyan, na mataan! a khatoro kano Niyan langon."

150

Tharoang ka a: "Pakadarpaa niyo i manga saksi iyo a siran so pzaksian iran a mataan! a so Allah na hiyaram Iyan aya." Na o zaksi iran, na ding ka siran mbabida a kazaksi. Go ding ka pagonoti so manga kabaya o siran a piyakambokhag iran so manga ayat Ami, go siran na di iran paparatiyayaan so akhirat, a siran na so Kadnan iran na phrimbangn iran.

151

Tharoang ka a: "Song kano sii, ka batiyaang ko so hiyaram rkano o Kadnan iyo:" Di niyo phanakoton (so Allah) sa mayto bo; go (phiyapiya i niyo) so mbala a loks sa tanto a kaphiyapiya; go di niyo mbonoa so manga wata iyo sa phoon ko kamiskin; - ka Skami i pphagpr rkano ago so siran; - go di kano pagobay ko manga pakasisingay, so mapapayag on go so misosoln; go di niyo mbonoa so baraniyawa, a so inisapar o Allah, inonta o sii ko kabnar. Giyoto man na inisogo Iyan rkano to, ka an iyo sabota.

152

Go di niyo pagobaya so tamok o ilo, inonta o so kapiya niyan, taman sa iraot ko kakhasad iyan; go tarotopa niyo so kapagasad go so kathimbang sii ko kaontol; da a iphaliyogat Ami ko baraniyawa, a inonta so khagaos iyan; - na igira a ptharo kano, na paginontolan kano, apiya sii ko tonganay (niyo); go so diyandi o Allah na tomann iyo: Giyoto man i kinisogoon Iyan rkano ron, ka an iyo katanodi.

153

Na mataan! a giyaya i lalan Akn, a makaoontol. Na kdga niyo skaniyan. Go di niyo khdga so manga pd a lalan, ka mablag kano niyan ko lalan Iyan. Giyoto man i kinisogoon Iyan rkano ron, ka ang kano makapananggila.

154

Oriyan iyan na inibgay Ami ko Mosa so kitab, a tarotop ko miphiyapiya, go osayan ko langowan taman, - go toroan go limo, ka an iran maparatiyaya so kipthoonaan (iran) ko Kadnan iran.

155

Na giyang kaya (a Qor'an) na kitab a initoron Ami skaniyan a piyakandaklan sa mapiya: Na onoti niyo skaniyan, go pananggila kano, ka ang kano mipangalimo:

156

Ka oba niyo matharo a: "Aya bo a tiyoronan ko kitab na so dowa pagtaw ko miyaonaan ami, na mataan! a miyabaloy kami a titho a di somasabot ko kapphangadi iran;"

157

O di na oba niyo matharo i: "Opama ka mataan! a sii rkami initoron so kitab, na khabaloy kami dn a lbi a miyatoro a di siran." Na sabnar a adn a miyakaoma rkano a karina a phoon ko Kadnan iyo, - go toroan go limo. Na ba adn a lawan a darowaka ko taw a piyakambokhag iyan so manga ayat o Allah, go tiyalikhodan iyan oto? Imbalas Ami dn ko siran oto a pphamanalikhod ko manga ayat Ami, so marata a siksa, sabap ko kiyatalikhod iran.

158

Ba adn a pnayawn iran a rowar ko kapakatalingoma kiran o manga malaikat odi na so kapaka talingoma o Kadnan ka (hay Mohammad ko masa a kakokoma ko ndolon dolonan o manga oripn Iyan sa alongan a qiyamah). Odi na so kapakatalingoma o sabaad ko manga tanda o Kadnan ka (a so kazbang o alongan sa sdpan)? Sii ko alongan a kapakatalingoma o sabaad ko manga tanda o Kadnan ka, na di makanggay a gona ko ginawa so paratiyaya niyan, o da paratiyaya sa paganay, odi na da nggalbk ko paratiyaya niyan sa mapiya. Tharoang ka a: "Nayaw kano, ka mataan! a skami na nomanayaw kami (mambo)."

159

Mataan! a so siran a mizisibaya ko agama iran go mithitindga, na da a labot ka kiran a mayto bo: Ka so khasowa iran na sii bo (phakandod) ko Allah. Oriyan iyan na phanotholn Iyan kiran so pinggolawla iran.

160

Sa taw a mitalingoma niyan so mapiya, na adn a bagian iyan a sapolo a manga lagid iyan (a manga pipiya), go sa taw a mitalingoma niyan so marata, na da a imbalas on a rowar ko lagid iyan; sa di siran kasalimbotan.

161

Tharoang ka (ya Mohammad) a: "Mataan! a sakn na tiyoro ako o Kadnan ko ko lalan a makaoontol, - a okit a makasosogat, - a okit o Ibrahim a makaoontol, go kna a ba miyabaloy a pd ko manga pananakoto."

162

Tharoang ka a: "Mataan! a so sambayang akn, go so simba ko, go so kawyagoyag akn, go so kapatay akn, na rk o Allah a Kadnan o manga kaadn."

163

Daa sakotowa Iyan: Na giyaya i inisogo rakn, go sakn i paganay ko mimbabayorantang (ko Allah).

164

Tharoang ka: "Ba adn a salakaw ko Allah a pmbabanogn ko a Kadnan, a Skaniyan i Kadnan o langowan taman? Na da a khasokat o oman i ginawa (a dosa) a ba on di pthagorar: Go di khaawidan o maawid so awid o pd iyan. Oriyan iyan na so bo so Kadnan iyo i khandodan iyo: Na phanotholn Iyan rkano so nganin a skano na di niyo to phagayonayonan."

165

Go Skaniyan so miyadn rkano a manga khalifah ko lopa. Go piyakaombaw Niyan so sabaad rkano, ko kaporoan o sabaad sa manga daradat: Ka thpngan kano Niyan ko inibgay Niyan rkano. Mataan! a so Kadnan ka na magaan i kandadan'g, go mataan! a Skaniyan na titho a Manapi, a Makalimoon.

Total Number of Verses: 206

1

Alif, Lam, Mim, Sad. (so Allah i Matao ko paka-aantapan Iyan on.)

2

(Giyang kaya a Qor'an) Na kitab a initoron rka (ya Mohammad), - na di aya nggagtn a rarb ka, - ka an ka mipamaka iktiyar go pananadm a rk o miyamaratiyaya.

3

Onoti niyo so (Qor'an a) initoron rkano a phoon ko Kadnan iyo, na di niyo pagonoti, so salakaw Rkaniyan a manga panarigan, miyakayto ito a kapphakatadm iyo.

4

Na madakl a ingd a bininasa Mi, a miyakaoma on so siksa Ami ko kagagawii, odi na siran na khitotorogn siran ko kawtho o alongan.

5

Na da a miyabaloy a daowa iran gowani ko makawma kiran so siksa Ami, a rowar sa kiyatharo iran: "Sa mataan! a skami na miyabaloy kami a manga darowaka."

6

Na mataan! a pagizaan Ami dn so manga taw a siyogo an siran, go pagizaan Ami dn so manga sogo.

7

Na mataan! a phanotholn Ami kiran dn (so pinggolawla iran) sii ko katao, go kna a ba Kami di makadadarpa.

8

Na so kathimbang sa alongan oto na ontol: Na sadn sa makapnd so manga timbang iran, na siran man na siran i phamakaslang sa maliwanag:

9

Na sadn sa makakhap so manga timbang iyan, na siran man so liyogi ran so manga ginawa iran, sabap ko kiya ongkira iran ko manga ayat Ami.

10

Na sabnsabnar a piyaka khapaar Ami skano ko lopa, go singgayan Ami skano roo sa manga kawiyagan: Na miyakayto ito a kapphanalamat iyo!

11

Go sabnsabnar a inadn Ami skano, oriyan iyan na pimbontalan Ami skano; oriyan iyan na pitharo Ami ko manga malaikat a: Pangalimbabaan kano ko Adam, na miyangalimbabaan siran; inonta so iblis; ka da mapd ko miyamangalimbabaan.

12

Pitharo (o Allah) a: "Antonaa i miyakarn rka sa dang ka kapangalimbabaan isako sogoon Akn ska?" Pitharo (o iblis) a: "Sakn i tomo a di so Adam. Ka inadn akong Ka a phoon sa apoy, na inadn Ka skaniyan a phoon sa lipaw."

13

Pitharo (o Allah) a: "Panokha ka ding ka dait iba ka sii di pmaratabat. Na awa ka, ka mataan! a ska na pd ko miyamakayto."

14

Pitharo (o iblis) a: "Bgi akong Ka sa taalik taman ko alongan a kawyaga kiran."

15

Pitharo (o Allah) a: "Mataan! a ska na pd ko piyangabbgan sa taalik."

16

Pitharo (o iblis): "Na sabap ko kiyabaloyang Ka rakn a dadag, na mataan! a bknang ko siran dn sa ayan ko lalan Ka a makaoontol:"

17

"Oriyan iyan na mataan! a songowang ko siran dn sii ko kasasangoran iran, go sii ko talikhodan iran, go sii ko manga kawanan iran, go sii ko manga diwang iran. Na ding ka matoon so kadaklan kiran oba pananalamat."

18

Pitharo (o Allah) a: "Awa ka phoon rkaniyan (a sorga), a papaawingn, a inibowang. Na mataan! a sadn sa monot rka kiran, - na mataan! a ipno Akn skano dn ko naraka Jahannam langon."

19

Na (pitharo o Allah a:) "Hay Adam, babaling ka, ska go si karomang ka ko sorga, na kang kano sa sadn sa kabaya iyo a dowa: Na di kano pagobay sangkai a kayo, ka mbaloy kano a pd ko manga darowaka."

20

Na piyangonsi siran o shaytan, ka an iyan kiran kasawai so idadalong kiran ko kayaan iran. Go pitharo iyan a: "Da a kinisaparn rkano o Kadnan iyo sangkai a kayo, a rowar sa oba kano mabaloy a dowa a malaikat, odi na mabaloy kano a pd ko phangakakakal (ko sorga)."

21

Na mizapa kiran: Sa mataan! a sakn na pd dn ko pphamangoyaw rkano sa mapiya.

22

Na minibaba iyan siran sabap ko ikmat. Na kagiya a kataaman iran so kayo, na kiyasawaan kiran so kayaan iran a dowa, na aya miyataad iran na giya gi iran kapanangkiri ko raon sa sorga (a pinditar iran). Na tiyawag siran o Kadnan iran: "Ba Ko rkano da saparn angkanan a kayo, go ba Ko rkano da tharoa a mataan! a so shaytan na ridoay niyo a mapayag?"

23

Pitharo iran: "Kadnan ami, miyadorat ami a ginawa mi, na odi kaming Ka napii go di kaming Ka kalimoon, na mataan! a khabaloy kami dn a pd ko miyangalologi."

24

Pitharo (o Allah) a: "Tpad kano; sa so sabaad rkano na ridoay o sabaad; go adn a rk iyo ko lopa a kapthaknaan go kawiyagan, - taman ko wakto (o kapatay)."

25

Pitharo Iyan (pn) a: "Ron kano khawyag, go ron kano phamatay, go ron kano phakagmawa."

26

Hay manga moriyataw o Adam, sabnar a tiyoronan Ami skano sa nditarn a pphakarnding ko kayaan iyo, go ikataid. Na so nditarn a kapananggila, - na giyoto i tomo. Giyoto man na pd ko manga tanda o Allah, ka an siran pphakatadm!

27

Hay manga moriyataw o Adam, di kano phakidadag ko shaytan, lagid o kiyapakaawaa niyan ko dowa a loks iyo phoon ko sorga, a phlkasn iyan kiran so nditarn iyan: ka an iyan kiran mapakiilay so kayaan iran: Mataan! a skaniyan na pkhaylay kano niyan skaniyan ago so manga pagtaw niyan sa di niyo siran khaylay: Mataan! a biyaloy Ami so manga shaytan a manga panarigan o siran a di mapaparatiyaya.

28

Go igira a minggolawla siran sa pakasisingay, na tharoon iran a: "Miyatoon Ami saya so manga loks Ami, go so Allah na inisogo Iyan rkami aya." Tharoang ka a: "Mataan! a so Allah na di Niyan izogo so piyamakasisingay. Ino niyo pakiptharoon ko Allah so da a katao niyo ron?"

29

Tharoang ka (ya Mohammad) a: "Inisogo rakn o Kadnan ko so kaontol; go bantakn iyo so manga hadap iyo (ko Allah) sii ko oman i kazambayang, go zoasoata niyo Skaniyan, sa bobonayona niyo Ron so okit ko kapagintaw. Lagid o kiyaphooni Niyan rkano (madn), a kaphakakasoy niyo."

30

So salompok na tiyoro Iyan, go so salompok na miyatangkd kiran so kadadag; mataan! a siran na kinowa iran so manga shaytan a manga panarigan, a salakaw ko Allah, aya arangan iran na mataan! a siran i khipaka oontol.

31

Hay manga moriyataw o Adam, solota niyo so mapiya ko nditarn iyo ko oman i wakto a kapzambayang. Go kang, kano go inom kano, go di kano phanobra. Mataan! a Skaniyan na di Niyan khabayaan so pphamanobra.

32

Tharoang ka: Antawaa i somiyapar ko (kanditara ko) parahiyasan o Allah, a so inadn Iyan a rk o manga oripn Iyan, go so manga pipiya ko pagpr? Tharoang ka a: Giyaya na rk o siran a miyamaratiyaya sii ko kawyagoyag ko doniya, kabisa iran ko alongan a qiyamah. Lagid aya a kapphagosaya Mi ko manga ayat ko pagtaw a manga tatao.

33

Tharoang ka a: Aya bo a inisapar o Kadnan ko na so piyamakasisingay, so mapayag on go so masoln; go so dosa, go so kapangarasi sa di ontol; go so kipzakoton iyo ko Allah; ko da a initoron Iyan on a katantowan; go so gii niyo kapakitharoon ko Allah ko da a katao niyo ron.

34

Na oman i pagtaw na adn a diyandi iyan (ko kakhabinasa iran): Na o pabila a makawma so diyandi kiran, na di iran misndod sa isa ka oras, go di iran maktng.

35

Hay manga moriyataw o Adam! amay ka makatalingoma rkano so manga sogo a pd rkano, a pphamanotholn iran rkano so manga ayat Akn, - na sadn sa mananggila, go phiyapiya, - na da a pangandam iran, go di siran makamboko (ko alongan a mawri).

36

Na so siran a piyakambokhag iran so manga ayat Ami go pimaratabatan iran, - na siran man i manga taw ko naraka, sa ron siran on dn makakakal.

37

Na ba adn a lawan a darowaka ko taw a inangkob iyan so Allah sa kabokhag, odi na piyakambokhag iyan so manga ayat Iyan? Siran man na ipraot kiran so kipantag iran ko kitab. Taman sa o pabila makawma kiran so manga sogo Ami a khowa ko manga niyawa iran, sa tharoon iran: "Anda dn so piyanongganoy niyo a salakaw ko Allah?" Na ismbag iran a: "Miyailang siran rkami," na zaksian iran so manga ginawa iran, a mataan! a siran na miyabaloy siran a da pamaratiyaya.

38

Tharoon (o Allah): "Sold kano a rakhs o manga pagtaw a andang a miyaypos ko miyaonaan iyo a manga jinn ago manga manosiya, - ko naraka." Oman i makasold a pagtaw na ipamaninta iyan so pd iyan, taman sa amay ka makapraraota siran roo langon, na tharoon o miyawri kiran sa makapantag ko miyaona kiran a: "Kadnan ami siran aya i domiyadag rkami: Na talingomaing Ka siran sa siksa a takp ko naraka." Tharoon Iyan a: "Adn a rk o oman i isa rkano a takp (ko siksa) ogaid na di niyo katawan."

39

Na tharoon o miyaona kiran ko miyawri kiran a: "Da a milalawan iyo rkami; na taami niyo so siksa sabap ko pinggalbk iyo (a marata)!"

40

Mataan! a so siran a piyakambokhag iran so manga ayat Ami go pimaratabatan iran oto, na di kiran kalkaan so manga pinto o langit, go di siran makasold ko sorga, taman sa di makasold so onta ko pso o ragom: Na lagid aya a imbadal Ami ko manga rarata i ongar.

41

Adn a bagian iran ko naraka Jahannam, a igaan go adn a phamangikolob ko kaporoan iran (a apoy): Na lagid aya a imbadal Ami ko manga darowaka,

42

Na so miyamaratiyaya, go pinggalbk iran so manga pipiya, na da a iphaliyogat Ami ko baraniyawa, a inonta so khagaga niyan, - na siran man i manga taw ko sorga, sa ron siran on dn makakakal.

43

Na iniliyo Ami so matatago ko manga rarb iran a dngki; - pphamangondas ko kababaan iran so manga lawasayg; - go ptharoon iran: "So podi na rk o Allah, a tomiyoro rktano sii: Ka di tano matoro, o da tano toroa o Allah: Sabnsabnar a minioma o manga sogo o Kadnan tano so bnar," na itawag kiran a: "Giyanan man so sorga! a piyakikhawali rkano, sabap ko pinggolawla niyo (a mapiya)."

44

Na itawag o manga taw ko sorga ko manga taw ko naraka a: "Sabnar a miyatoon ami so inidiyandi rkami o Kadnan ami a bnar: Na ino miyatoon iyo so inidiyandi rkano o Kadnan iyo a bnar?" Tharoon iran a: "Oway;" na ipananawag o phananawag ko pagltan iran a: "Mataan! a so morka o Allah na sii ko manga darowaka;"

45

"Siran so pphangalang ko lalan o Allah go pphlolobaan iran on a kabkhog iyan: Go siran na so akhirat na oongkirn iran."

46

Na kaaltan siran sa rnding, go adn a manga mama ko liyawaw o paglt a makikilala iran so oman i isa kiran sabap ko manga tanda iran. Na ipthawag iran ko manga taw ko sorga a: "Kalilintad a sii rkano," da siran on makasold, a siran na adn a panginam iran (sa kapakasold iran ko sorga).

47

Na igira a miyatingr so manga kaylay ran ko tampar ko manga taw ko naraka, na tharoon iran: "Kadnan ami, di kaming Ka mbaloya a pd ko pagtaw a manga darowaka."

48

Go adn a thawagn o manga taw ko paglt a manga mama a makikilala iran siran sabap ko manga tanda iran, sa tharoon iran: "Ino miyakalinding rkano so piyanimo iyo (a manga tamok) go so kiyapanakabor iyo?"

49

"Ba siran aya so inizapa iyo sa da a phakasampayn kiran o Allah a limo? (tharoon kiran a) Sold kano ko sorga: da a pangandam iyo, go da a mimboko iyo."

50

Na itawag o manga taw ko naraka ko manga taw ko sorga: "Sirayati kami niyo ko ig odi na so inipagpr rkano o Allah." Ismbag iran a: "Mataan! a so Allah na inisapar Iyan a dowaya ko da pamaratiyaya;"

51

"Siran na biyaloy iran so agama iran kabimbanan go katmbangan, go miyakalimpang kiran so kawyagoyag ko doniya." Na sa alongan nai na phakalipatan Ami siran, lagid o kiyapakalipati ran ko kitmo ko alongan iran nai, go so kiyasangkaa iran ko manga ayat Ami.

52

Na sabnsabnar a bigan Ami siran sa kitab, a piyagosay Ami skaniyan sii ko katao, a toroan ago limo ko pagtaw a mapaparatiyaya.

53

Ba adn a pnayawn iran a rowar ko pakatana iyan? Sii ko alongan a makatalingoma so pakatana iyan, na matharo o siran a miyamakalipat on gowani a: "Sabnar a minioma o manga sogo o Kadnan tano so bnar. Na ba adn a manga panandigan tano, ka an tano iran masandig? O di na batano phakakasoya (ko doniya) ka an tano makanggalbk sa salakaw ko pinggalbk tano?" Sabnar a miyabinasa iran so manga ginawa iran, go miyakawatan kiran so piyangmbaalan iran a kabokhag.

54

Mataan! a aya Kadnan iyo na so Allah, a miyadn ko manga langit ago so lopa sa miyakanm alongan, oriyan iyan na mithakna ko aras: Ipndalong Iyan so gagawii ko dawndaw, na pphakitondog Iyan on sa magaan: Go (inadn Iyan) so alongan, go so olan, go so manga bitoon a pawnotonot ko sogoan Iyan. Tanodan ka rk Iyan so kiyapangadn go so sogoan; Soti so Allah, a Kadnan o manga kaadn!

55

Pangni kano ko Kadnan iyo sa kapangalimbabaan go masoln: Mataan! a Skaniyan na di Niyan khabayaan so pphlalawan.

56

Go di kano phaminasa ko lopa ko oriyan o kiyatanor iyan, go pangni kano Ron sa makapantag sa kalk ago arap: Mataan! a so limo o Allah na marani ko miphipiyapiya.

57

Go Skaniyan so pmbotawan ko manga ndo a pphamalata ko onaan o limo Iyan: Taman sa igira miyakaawid sa gabon a kappndan (sa oran), na ipamakaig Ami skaniyan ko ingd a miyatay (so lopa on), na pakatoronn Ami ron so ig, na isabap Ami ron a kapakagmawa Mi ko oman i manga onga: Lagid aya man a kaphakagmawa Mi ko miyamatay: Ka ang kano pphakatadm.

58

Na so ingd a mapiya, na pphakagmaw so mangngto on sabap sa idin o Kadnan Iyan: Na so (ingd a) marata, na da a phakagmaw ron (a mangngto) inonta o kaplogati: Lagid aya a gii Ami kazalinsalina magosay ko manga tanda ko pagtaw a mananalamat (ko Allah).

59

Sabnsabnar a siyogo Ami so Noh ko pagtaw niyan, na pitharo iyan: "Hay pagtaw akn! zoasoata niyo so Allah! ka da a tohan iyo a salakaw Rkaniyan. Mataan! a ipkhawan akn skano ko siksa ko alongan a lbi a mala!"

60

Pitharo o manga nakoda ko pagtaw niyan a: "Mataan! a pkhaylay ami ska dn ko kadadag a mapayag."

61

Pitharo o Noh: "Hay pagtaw akn, da rakn so kadadag, ogaid na sakn na sogo a phoon ko Kadnan o manga kaadn!"

62

"Ipzampay akn rkano so manga sogoan o Kadnan ko, go pphangthomaan ko skano, go katawan ko phoon ko Allah so di niyo katawan."

63

"Ino ago kano phammsa sa kiyapakawma rkano o ndao a phoon ko Kadnan iyo, a minggolalan ko mama a pd rkano, ka ang kano niyan mapakaiktiyar, - go ang kano makapananggila, ka ang kano mipangalimo?"

64

Na piyakambokhag iran, na siyabt Ami skaniyan, go so manga pd iyan ko kapal, na inld Ami so siran a piyakambokhag iran so manga ayat Ami. Mataan! a siran na miyabaloy siran a pagtaw a di phamakanono!

65

Go (siyogo Ami ko pagtaw a) Ad so pagari ran a Hod. Pitharo iyan: "Hay pagtaw akn, zoasoata niyo so Allah, ka da a tohan iyo a salakaw Rkaniyan. Ino kano di phananggila?"

66

Pitharo o manga nakoda a so da pamaratiyaya ko pagtaw niyan a: "Mataan! a skami na pkhaylay ami ska dn ko kamomondowi. Go mataan! a skami na sabnar a arangan ami rka na pd ko manga bokhag!"

67

Pitharo o Hod: "Hay pagtaw akn, da a kamomondowi rakn, na ogaid na sakn na sogo a phoon ko Kadnan o manga kaadn!"

68

"Ipzampay akn rkano so manga sogoan o Kadnan ko. Go sakn na pphangthoma rkano a kasasanaan."

69

"Ino ago kano phammsa sa kiyapakawma rkano o ndao a phoon ko Kadnan iyo a minggolalan ko mama a pd rkano, ka ang kano niyan mapakaiktiyar? Na tadmi niyo gowani a balowin kano Niyan a manga khalifah ko oriyan o pagtaw Noh, go piyakalawan kano Niyan ko kaadn sa kapangaala. Na tadmi niyo so manga limo o Allah, ka ang kano makaslang sa maliwanag."

70

Pitharo iran: "Ba aya kiyapakatalingomang ka rkami, na an ami masimba so Allah a Isaysa Skaniyan, go an ami kaganati so pzimbaan o manga loks ami? Na talingomaan ka rkami so ipphangangalk ka rkami, o pd ka ko manga bnar!"

71

Pitharo (o Hod) a: "Sabnar a adn a miyatangkd rkano a phoon ko Kadnan iyo a siksa, go rarangit. Ino kano rakn gii pakiphawala makapantag ko manga ngaran a inipamtho niyo ron skano go so manga loks iyo, - a da a initoron on o Allah a katantowan? Na nayaw kano, ka mataan! a sakn na pd iyo, a pd o khinanayaw."

72

Na siyabt Ami skaniyan go so manga pd iyan, sabap ko limo a phoon Rkami, na tiniphad Ami so kaposan o siran a piyakambokhag iran so manga ayat Ami go di siran mapaparatiyaya.

73

Go (siyogo Ami ko pagtaw a) Samod so pagari ran a Salih. Pitharo iyan: "Hay pagtaw akn, zoasoata niyo so Allah; ka da a tohan iyo a salakaw Rkaniyan. Sabnar a adn a miyakaoma rkano a karina a phoon ko Kadnan niyo, katii so onta o Allah a nanao niyo: Na botawani niyo skaniyan ko kapphangangan iyan ko lopa o Allah, go di niyo ron thmoon so marata, ka masogat kano o siksa a malipds."

74

"Na tadmi niyo gowani a balowin kano Niyan a manga khalifah ko oriyan o Ad, go bigan kano Niyan sa darpa ko lopa. Gii kano makambabalay ko manga kapantaran on sa manga torogan, go pphanonggirb kano ko manga palaw sa manga walay; na tadmi niyo so manga limo o Allah, go di kano phaminasa ko lopa a mama kakayd kano."

75

Pitharo o manga nakoda a siran so miyamanakabor ko pagtaw niyan ko siran a dipaka nganganinn a miyamaratiyaya a pd kiran a: "Ba niyo katawi a mataan! a so Salih na siyogo a phoon ko Kadnan iyan?" Pitharo iran a: "Mataan! a skami na so inisogo on na paparatiyayaan ami oto."

76

Pitharo o siran a miyamanakabor a: "Mataan! a skami na so piyaratiyaya niyo to na inongkir ami."

77

Na biyono iran so onta, go pimaratabatan iran so sogoan o Kadnan iran, go pitharo iran a: "Hay Salih! talingomaan ka rkami so ipphangangalk ka rkami, o ska na pd ko manga sogo!"

78

Na miyadansal siran o linog, na kiyapitaan siran ko manga ingd iran a miyamangndr!

79

Na inawaan iyan siran, go pitharo iyan: "Hay pagtaw akn, sabnsabnar a minisampay akn rkano so sogoan o Kadnan ko, go kiyapangthomaan ko skano, na ogaid na di niyo khabayaan so pphamangthoma!"

80

Go (siyogo Ami) so Lot gowani na pitharo iyan ko pagtaw niyan a: "Ino niyo gii nggolawlaa so piyakasisingay a da a bawn minggolawla a miyaonaan iyo a isa bo ko manga kaadn?"

81

"Mataan! a skano na aya dn a pphangabayaan iyo na so manga mama a sambi o manga babay. Kna, ka skano na pagtaw a mimamalawani."

82

Na da a inismbag on o pagtaw niyan a rowar sa kiyatharoa iran sa: "Pakaawaa niyo siran ko ingd iyo ka mataan! siran a manga taw a zosoti!"

83

"Na siyabt Ami skaniyan ago so manga taalok on, inonta so karoma niyan, ka miyabaloy a pd ko miyamangibagak (ko siksa)."

84

Na piyakaoranan Ami siran sa oran (a ator): Na pamimikiranang ka so miyambtad o kiya akiran ko manga rarata i ongar!

85

Go (siyogo Ami ko) pagtaw a Madyan so pagari ran a Shoayb. Pitharo iyan: "Hay pagtaw akn, zoasoata niyo so Allah; ka da a tohan iyo a salakaw Rkaniyan. Sabnar a adn a miyakaoma rkano a karina a phoon ko Kadnan niyo. Na tarotopa niyo so kapagasad go so kathimbang, go di niyo khorangi ko manga manosiya so nganinganin iran; go di kano phaminasa ko lopa ko oriyan o kiyatanor iyan. Giyoto man i mapiya rkano, o skano na khipaparatiyaya."

86

"Go di kano phamagayan ko oman i lalan, a pphangangalk kano, go phangalangan iyo ko lalan o Allah so miyaratiyaya Rkaniyan go pmbabanogn iyo ron a kabkhog iyan; go tadmi niyo gowani ko mayto kano, na piyakadakl kano Niyan. Na pamimikirana niyo so miyambtad o kiya akiran ko miyamaminasa."

87

"Na mataan! a adn a sabaad rkano a piyaratiyaya iran so inisogo rakn, go adn a sabaad a da iran paratiyayaa, na phantang kano taman sa kokomn tano o Allah: Ka Skaniyan i taralbi a mapiya ko manga kokoman."

Part 9

88

Pitharo o manga nakoda a so miyamanakabor ko pagtaw niyan a: "Mataan! a phakaawaan ami ska dn hay Shoayb! go so miyamaratiyaya a pd ka phoon ko ingd ami, inonta o mataan! a komasoy kano ko okit tano." Pitharo iyan: "Ati apiya di ami kabaya?"

89

"Sabnar a khaangkob ami so Allah sa kabokhag, o kasoy kami ko okit iyo ko oriyan o masa a kiyalpasa rkami ron o Allah; go di rkami khapakay i ba kami ron kasoy inonta o kabaya o Allah, a Kadnan ami. Mararangkom o Kadnan ami a katao so langowan taman. So bo so Allah i siyarigan ami. Kadnan ami, kokoma kaming Ka ago so pagtaw ami sa ontol, ka Ska i taralbi a mapiya ko manga kokoman."

90

Na pitharo o manga nakoda a so da pamaratiyaya ko pagtaw niyan: "Ibt amay ka onotan iyo so Shoayb, na mataan! a skano samawto na miyangalologi dn!"

91

Na miyasogat siran o linog, na kiyapitaan siran ko manga ingd iran a miyamangndr!

92

So siran a piyakambokhag iran so Shoayb na lagid oba siran roo da maadn. Siran a piyakambokhag iran so Shoayb, na miyabaloy siran a siran i manga logi.

93

Na inawaan iyan siran, go pitharo iyan: "Hay pagtaw akn, sabnsabnar a minisampay akn rkano so manga pakawit o Kadnan ko, go piyangthomaan ko skano, na andamanaya i kipmboko on akn ko pagtaw a da pamaratiyaya!"

94

Na da a siyogo an Ami a ingd sa nabi, a ba Ami da sogatn ko taw ron so masikot go so karomasayan, ka an siran maka pangalimbabaan.

95

Oriyan iyan na siyambiyan Ami so btad a marata sa mapiya, taman sa mithagompiya siran, na pitharo iran a: "Sabnar a minisogat ko manga loks tano so karomasayan go so kapakadadaya! Na siniksa Ami siran sa minitalmba, a siran na di iran maiin'ngka."

96

Na o opama ka mataan! a so taw ko manga ingd na miyaratiyaya siran go miyananggila siran, na plkaan Ami kiran dn so manga kapiyaan a phoon ko langit ago so lopa; na ogaid na kagiya a piyakambokhag iran (so manga sogo), na siniksa Ami siran sabap ko pinggalbk iran (a marata).

97

Ba sasana so manga taw ko manga ingd sa di kiran makatalingoma so siksa Ami ko gagawii a siran na khitotorogn siran?

98

Odi na ba sasana so manga taw ko manga ingd sa di kiran makatalingoma so siksa Ami ko dawndaw a siran na mabibimban siran?

99

Ba siran sasana (sa malpas siran) ko siksa o Allah? Da a somasana (sa kalpas) ko siksa o Allah, a rowar ko pagtaw a miyangalologi!

100

Ba da makanggonanao ko siran a pphamangowali ko lopa ko oriyan o (kiyabinasa o) taw ron, a o kabaya Ami, na khisogat Ami kiran (so siksa) sabap ko manga dosa iran, go khaparkat Ami so manga poso iran na siran na di siran mamakan'g?

101

Giyoto man so manga ingd a pphanotholn Ami rka so sabaad ko manga thotholan on. Na sabnsabnar a minioma kiran o manga sogo kiran so manga rarayag a karina: Na da iran paratiyayaa so piyakambokhag iran sa paganay. Lagid aya a kapthotopi o Allah ko manga poso o da pamaratiyaya.

102

Na da a miyatoon Ami ko kadaklan kiran a (katoman sa) diyandi. Ka mataan! a miyatoon Ami so kadaklan kiran a da dn pangongonotan.

103

Oriyan iyan na siyogo Ami ko kiyaipos iran so Mosa rakhs o manga tanda Ami ko Pir'awn ago so manga nakoda ko pagtaw niyan, na siyangka iran oto. Na pamimikiranang ka so miyambtad o kiyabolosan o miyamaminasa.

104

Na pitharo o Mosa: "Hay Pir'awn, mataan! a sakn na sogo a phoon ko Kadnan o manga kaadn,"آ

105

"Patot a da a tharoong ko makapantag ko Allah a rowar ko bnar. Sabnar a adn a minioma ko rkano a marayag a karina a phoon ko Kadnan iyo. Na pakaonotang ka rakn so manga moriyataw o Israil."

106

Pitharo (o Pir'awn) a: "Oba adn a miniomang ka a tanda, na gmawn ka, - o ska na pd ko manga bnar."

107

Na iniithog iyan so badas iyan, na samawto na skaniyan na (mimbaloy a) nipay, a marayag!

108

Go tiyonggos iyan a lima niyan, na samawto na skaniyan na lominindaw ko khibabantay!

109

Pitharo o manga nakoda ko pagtaw o Pir'awn a: "Mataan nai! a titho a balik mata a mapasang."

110

"Kabaya iyan a mapakaawa kano niyan ko lopa iyo, na antonaa i iphando iyo?"

111

Pitharo iran (ko Pir'awn) a: "Pakanayawang ka, go si pagari niyan; go sogoing ka so manga ingd sa kalimod iranآ".

112

"Ka an iran rka mapakasong so oman i balik mata a mapasang."

113

Na miyakaoma so manga balik mata ko Pir'awn na pitharo iran a: "Mataan! a adn a balas rkami o mabaloy kami a skami i mamakadaag!"

114

Pitharo iyan: "Oway, go mataan! a skano na pd dn ko manga dadazg (rakn)."

115

Pitharo iran: "Hay Mosa, o ska i (mona) mithog, odi na skami i (mona) mamangithog?"

116

Pitharo iyan a: "Ithog kano (mona)." Na kagiya mithog siran, na miyabalik iran so manga mata o manga manosiya, go kiyapakalkan iran siran, go miyakambaal siran sa balik mata a mala.

117

Na iniilaham Ami ko Mosa a: Ithogn ka so badas ka, na samawto na skaniyan na liyolok iyan so ipphamagakal iran.

118

Na mithakna so bnar. Na miyailang so pinggalbk iran.

119

Na miyapgs siran roo, go miyamakandod siran a miyamakayto.

120

Na miyamangigpha so manga balik mata a makasosodiod siran.

121

Miyatharo iran a: "Piyaratiyaya Mi so Kadnan o manga kaadn,"

122

"A Kadnan o Mosa ago so Haron."

123

Pitharo o Pir'awn a: "Piyaratiyaya niyo skaniyan ko da akn rkano pn kapandoi? Mataan! a giyai na titho a ikmat a iniikmat iyo to sangkai a ingd, ka an iyo ron mapakaawa so taw ron. Na katokawan iyo bo."

124

"Mataan! a pakipamotolang ko dn so manga barokan iyo go so manga ai niyo sa di makapagonod, oriyan iyan na mataan, a pakisolaakn skano dn langon."

125

Pitharo iran a: "Mataan! a skami na sii kami bo ko Kadnan ami phamangndod: "

126

"Na aya bo a indan'g ka rkami na giya kiyaparatiyaya ami ko manga tanda o Kadnan ami ko kiyapakawma niyan rktano. Kadnan ami, bgi kaming Ka sa kapantang, go tarimaa kaming Ka a khimbabayorantang (Rka)!"

127

Na pitharo o manga nakoda ko pagtaw o Pir'awn a: "Bang ka mbotawani so Mosa ago so pagtaw niyan, ka an siran makapaminasa ko lopa, go angka niyan kaganati ago so manga katohanan ka?" Pitharo iyan a: "Pamonoon tano so manga wata iran a mama; na lambaan tano so manga babay kiran; ka mataan! a sktano i maka oombaw kiran a pphamangarasi."

128

Pitharo o Mosa ko pagtaw niyan a: "Pangni kano sa tabang ko Allah, go phantang kano, ka mataan! a so lopa na rk o Allah, pakiphangowaliyan Iyan oto ko taw a kabaya Iyan ko manga oripn Iyan; na so (mapiya a) khabolosan na bagian o khipanananggila."

129

Pitharo iran a: "Riyasay kami ko dang ka rkami pn kapaka talingoma, go sii ko oriyan o kiyapaka talingomang ka rkami." Pitharo iyan a: "Matatangkd a so Kadnan iyo na mbinasaan Iyan so ridoay niyo go izambi kano Niyan a manga khalifah ko lopa; ka an Iyan maylay o antonaa i pnggolawlaan iyo."

130

Na sabnsabnar a inisiksa Ami ko pagtaw o Pir'awn so miyakapira ragon (a laon): Go so kiyakhorang o manga onga, ka an siran mamakatanod.

131

Na igira a miyakaoma kiran so mapiya, na tharoon iran a: "Rk tano wai; na o masogat siran a marata, na isndit iran so sokna a marata ko Mosa ago so manga pd iyan. Tanodan, ka mataan! a so sokna iran a marata na sii bo phoon ko Allah, na ogaid na so kadaklan kiran na di iran katawan!"

132

Na pitharo iran: "Apiya antonaa i khitalingomang ka rkami a tanda, a iplimpang ka rkami oto, na di ami ska dn pharatiyayaan."

133

Na biyotawanan Ami kiran so lapay, go so tarapan, go so koto, go so manga babak, go so rogo: - a manga tanda a piyamakarayag. Na ba siran dn mimaratabat, - go mimbaloy siran a pagtaw a manga baradosa.

134

Go masa a kiya pakatoron o siksa ko Pir'awn ago so pagtaw niyan, na tharoon iran: "Hay Mosa, pangnin kaming ka ko Kadnan ka sabap ko inidiyandi Iyan rka, ka ibt o pokasang ka rkami so siksa, na mataan! a paratiyayaan ami ska dn, go mataan! a sogoon ami dn a monot rka so manga moriyataw o Israil."

135

Na sii ko masa a pakawatann o Allah kiran pokasn so siksa taman ko taalik a siran na riyaot iran skaniyan, - na samawto na siran na mbarngkas siran!

136

Na siniksa Ami siran: Ka inld Ami siran ko ragat, sabap ko mataan! a siran na piyakambokhag iran so manga tanda Ami, go miyabaloy siran a da iran in'ngkaa skaniyan.

137

Na piyakipangowaliyan Ami ko pagtaw a so siran a di siran pakanganganinn, so manga sbangan o lopa, go so manga sdpan iyan, - a so piyakathagompiya Mi so dalm iyan. Na miyatarotop so katharo o Kadnan ka a mapiya ko manga moriyataw Israil, sabap ko kiyaphantang iran; na piyowalas Ami so miyapasad o Pir'awn go so pagtaw niyan, go so pimbabalay ran a manga poporo.

138

Na piyakaripag Ami so manga moriyataw o Israil ko kalodan. Na miyatalingoma iran a pagtaw a rrtkan iran so manga barahala iran. Pitharo iran: "Hay Mosa, snggay kaming ka sa tohan a lagid o manga tohan iran." Pitharo iyan a: "Mataan! a skano na pagtaw a da a manga mlng iyo."

139

"Mataan! a siran aya na miyabinasa so okit iran, - go miyailang so pinggalbk iran."

140

Pitharo iyan a: "Ba adn a salakaw ko Allah a pmbabanogn ko rkano a tohan, a Skaniyan na piyakalawan kano Niyan ko manga kaadn (ko masa niyo)?"

141

Go gowani na siyabt Ami skano ko pagtaw o Pir'awn, a irarasay ran rkano so marata a siksa, ka pphamonoon iran so manga wata iyo a mama na phlambaan iran so manga babay rkano. Na matatago roo man so tiyoba a phoon ko Kadnan iyo a lbi a mala.

142

Na inidiyandi Ami ko Mosa so tlo polo gawii, na inomanan Ami oto sa sapolo. Na miyaganap so wakto o diyandi o Kadnan iyan, a pat polo gawii (a kipmbitiyarain Iyan on). Na pitharo o Mosa ko pagari niyan a Haron a: "Sambii akong ka ko pagtaw akn, go phiyapiya ka, go ding ka khdga so okit o pphamaminasa."

143

Na kagiya a mawma o Mosa so diyandi Ami (a kapmbitiyarai), na inimbitiyarai skaniyan o Kadnan iyan. Pitharo iyan: "Kadnan ko, pakiilay Ka rakn, ka an akn Ska mapagilaylay." Pitharo (o Allah) a: "Di Akong ka dn khaylay; na ogaid na patnging ka so palaw; na o thatakna ko darpa iyan, na khaylay Akong ka." Na kagiya a mapayag so tihaya o Kadnan iyan ko palaw, na miyabaloy niyan a miyaropropt, na minipaps so Mosa a pipinsann. Na kagiya a makatanod na miyatharo iyan: "Soti Ka (ya Rabbi)! Mithawbat ako Rka, go sakn i paganay ko miyamaratiyaya."

144

Pitharo iyan: "Hay Mosa, mataan! a Sakn na tinindos Akn ska ko manga manosiya, sabap ko manga pakawit Akn go so kinimbitiyarain Ko rka: Na kpiting ka so inibgay Akn rka, go tapi ka ko miyamanalamat."

145

Na inisorat Ami ron sii ko manga ondangondang so langowan taman a thoma, go osayan ko langowan taman. Na (pitharo Ami ron a:) "Kpiting ka ya zabnsabnar, go sogoon ka ko pagtawng ka a kpiti ran so lbi ron a mapiya, ka phakiilay Ko rkano dn so ingd o manga darowaka,"

146

Phakitalikhodan Ko dn so manga ayat Akn ko siran a khipananakabor ko lopa sa di ontol. Na o maylay ran so oman i ayat, na di iran oto paratiyayaan; go o maylay ran so lalan ko toroan, na di iran oto khowaan a lalan; na o maylay ran so lalan ko kadadag, na khowaan iran oto a lalan. Giyoto man na sabap ko mataan! a siran na piyakambokhag iran so manga ayat Ami, go siran na da iran oto in'ngkaa.

147

Na so siran a piyakambokhag iran so manga ayat Ami go so kitmo ko akhirat, - na miyailang so manga galbk iran: ba adn a imbalas kiran a rowar ko pinggalbk iran?

148

Na mimbaal so pagtaw o Mosa ko oriyan (o kiyalalakaw niyan), phoon ko manga imbolawan iran, sa sapi a lawas iyan, a mapphaka-unga. Ba iran da maylay a mataan! a skaniyan na di niyan siran mipmbitiyarai, go di niyan siran khatoro sa lalan? Biyaloy iran oto (a tohan) na mimbaloy siran a manga darowaka.

149

Na kagiya a makazndit siran, go miyailay ran a mataan! a siran na sabnar a miyadadag siran, na pitharo iran: "Ibt ka odi tano kalimoon o Kadnan tano go di tano Niyan napii, na mataan! a khabaloy tano dn a pd ko miyangalologi."

150

Na kagiya a makandod so Mosa ko pagtaw niyan, a pkhararangitan a makamboboko, na pitharo iyan a: "Mikharatarata a kiyasambii niyo rakn ko oriyan (o kiyalalakaw akn). Ino niyo pagonai so sogoan o Kadnan niyo?" Na iniithog iyan so manga ondangondang, sa kiyaptan iyan a olo i pagari niyan, sa pnggandrn iyan sa ginawa niyan. Pitharo (o Haron): "Wata i ina, mataan! a so pagtaw na daa ko iran pakanganina, go mayto bo na mbonoon ako iran! Na ding ka phakapiyaa a ginawa o manga ridoay sa sabap rakn, go di akong ka mbaloya a pd ko pagtaw a manga darowaka."

151

Pitharo iyan: "Kadnan ko, napii akong Ka, go so pagari ko. Go pakasolda kaming Ka ko limoo Ka! ka Ska i lbi a Makalimoon ko pphamangalimo!"

152

Mataan! a so siran a biyaloy iran so sapi (a tohan) na khasogat siran dn a rarangit a phoon ko Kadnan iran, go kahinaan ko kawyagoyag ko doniya. Na lagid aya a imbadal Ami ko pphamangmbaal sa kabokhag.

153

Na so siran a miyanggalbk iran so manga rarata, oriyan iyan na mithawbat siran ko oriyan oto go miyaratiyaya siran, na mataan! a so Kadnan ka ko oriyan oto na titho a Manapi, a Makalimoon.

154

Na kagiya a lomnggaw ko Mosa so gani, na kinowa niyan so manga ondangondang a adn a matatago on ko inisorat on a toroan go limo a rk o siran a ikaalk iran so Kadnan iran.

155

Na miyamili so Mosa ko pagtaw niyan sa pito polo a mama sii ko wakto a diyandi Ami: Na kagiya madansal siran o linog, na pitharo iyan: "Kadnan ko, o inikabayaa Ka na miyabinasang Ka siran gowani, ago sakn. Bang Ka rkami mbinasaan so pinggalbk o manga lalong rkami? Da a salakaw saya a rowar sa tiyobaa Ka, ndadagn Ka sa sabap saya so taw a kabayaa Ka, go thoroon Ka so taw a kabayaa Ka. Ska i Phanarigan ami, na napii kaming Ka, go kalimoon kaming Ka; Ska i taralbi a mapiya ko manga nanapi."

156

"Na tangkdang Ka a adn a bagian ami sii sangkai a doniya a mapiya, go sii sa akhirat. Mataan! a skami na mimbalingan kami Rka." Pitharo (o Allah) a: "So siksa Akn na izogat Akn oto ko taw a kabaya Akn; go so limo Akn na langkap ko langowan taman. Na thangkdn Akn aya a rk o siran a khipanananggila, go pthonayn iran so zakat, go siran na siran na so manga ayat Ami i paparatiyayaan iran;"

157

"Siran na phagonotan iran so sogo, a Nabi a Ommi, so pkhatoon iran skaniyan a misosorat sii kiran, - ko Tawrat go so Injil; - a pzogo kiran ko mapiya, go pzapar kiran ko marata; go pphakay kiran ko manga pipiya, go pzapar kiran ko manga rarata; go pphakapokas kiran ko manga ppnd iran go so manga rrgn a misasanggolay kiran. Na so siran a miyamaratiyaya on, go mizlasla on, go miyamanabang on, go miyamangonot ko (Qor'an a) sindaw a so initoron a pd iyan, - na siran man na siran i phamakaslang sa maliwanag."

158

Tharoang ka (ya Mohammad): "Hay manga manosiya, mataan! a sakn na sogo rkano o Allah langon, a so Khirk ko kapaar ko manga langit ago so lopa. Da a tohan a inonta Skaniyan, a pphangoyag go pphangimatay. Na paratiyayaa niyo so Allah go so sogo Iyan, a Nabi a Ommi, a so mapaparatiyaya ko Allah go so manga katharo Iyan. Na onoti niyo Skaniyan, ka ang kano makakdg sa ontol."

159

Na adn a pd ko pagtaw o Mosa a isa ka sagorompong a ipthoro iran so bnar, go oontoln iran skaniyan.

160

Na pimbaabaad Ami siran sa sapolo ago dowa ka loks a manga pagtaw. Na iniilaham Ami ko Mosa, gowani ko mangni ron sa ig so pagtaw niyan a: "Bntoln ka so badas ka ko ator," na kiyambowatan oto a sapolo ago dowa a bowalan. Sabnar a kiyatokawan o oman i isa ka loks so sagba iran. Na inisayap Ami kiran so gabon, go initoron Ami kiran so Manna, go so (papanok a) Salwa, (na pitharo Ami kiran a:) "Kang kano ko manga pipiya a inipagpr Ami rkano. Na da Kami ran kabinasai, na ogaid na giya ginawa iran i kiyabinasaan iran."

161

Na gowani na pitharo kiran a: "Baling kano sangkai a ingd (a Baytal Moqaddas) go kang kano ron sa sadn sa kabaya iyo, go tharo kano sa ikhada a dosa, go sold kano ko paytaw sa kapangalimbabaan, ka napin Ami rkano so manga kasalaan iyo; phagomanomanan Ami dn so (balas ko) miphipiyapiya."

162

Na siyambian o siran a da kiran pamaginontolan sa katharo a salakaw ko pitharo kiran; na piyakatoronan Ami siran sa siksa a phoon ko langit, sabap ko da iran kapaginontolan.

163

Na izaan ka kiran so ingd a matatago ko marani sa ragat. Gowani ko pzorang siran sa pando ko alongan a Sapto. Gowani na pphakatalingoma kiran so manga sda iran ko alongan a Sapto iran, a ndadakdakl, na sii ko alongan a di iran Sapto, na di kiran phakatalingoma. Lagid aya man a kapthiyoba Ami kiran, sabap ko da iran kapangongonotan.

164

Na gowani na pitharo o isa kiran ka sagorompong a: "Ino kano pphangthoma sa pagtaw a so Allah i mbinasa kiran odi na ziksa kiran sa siksa a sangat?" - pitharo iran a: "Kapamokas sa kataksilan sii ko Kadnan iyo, go oba siran pananggila."

165

Na kagiya a pakalipatan iran so inindao kiran, na inilidas Ami so siran a pphanapar ko marata; na siniksa Ami so siran a da pamaginontolan, sa siksa a sangat, sabap ko kiyandarowaka iran.

166

Na kagiya a sogokn iran so inisapar kiran, na pitharo Ami kiran a: "Mbaloy kano a manga amo, a miyamakadapanas."

167

Na gowani na piyakitokawan o Kadnan ka a mataan! a pakiphangarasiyan Iyan siran dn, sa taman ko alongan a qiyamah, sa taw a phakisagadan Iyan kiran so marata a siksa. Mataan! a so Kadnan ka na titho a magaan i kandadan'g, go mataan! a Skaniyan na titho a Manapi, a Makalimoon.

168

Na pimbaabaad Ami siran ko lopa a pizagorompong. Sabaad kiran so manga bilangataw, na sabaad kiran na salakaw roo. Na initpng Ami kiran so manga pipiya, go so manga rarata, ka an siran makambalingan (ko ontol).

169

Na adn a minilapis ko kiyaypos iran a salapis a miyakhawali ran so kitab, a pkhowaan iran so parayasan sangkai a korang (a ingd), go gi iran tharoon a: "Pnapin rktano bo." Na o adn a makatalingoma kiran a parayasan a lagid iyan, na khowaan iran pn oto. Ba kiran da makowa so diyandi ko kitab, sa da a ptharoa iran makapantag ko Allah a inonta so bnar? Go kiyapangadian iran so madadalm on. Na so ingd a mawri i lbi a mapiya a bagian o siran a khipanananggila. Ba da a manga sabot iyo?

170

Na so siran a komkpit ko kitab, go inipamayandg iran so sambayang, - na mataan! a Skami na di Ami pagilangn so balas ko miphipiyapiya.

171

Na gowani na inalangalang Ami so palaw ko kaporoan iran, makasasaibarat skaniyan sa atp, na tiyangkd iran a mataan aya! a phakatana kiran dn. (Na pitharo Ami a:) "Kpiti niyo so inibgay Ami rkano zabnsabnar, go tatadmi niyo so madadalm on, ka ang kano makapanananggila."

172

Na gowani na piyakaliyo o Kadnan ka phoon ko manga moriyataw o Adam phoon ko manga likod iran so manga moriyataw iran, na piyakizaksian Iyan kiran a ginawa iran, sa (pitharo Iyan a:) "Ba di Sakn i Kadnan niyo?" Pitharo iran a: "Oway (Ska i Kadnan ami)! Pizaksian ami! ka oba niyo matharo ko alongan a qiyamah i: Mataan! a skami na miyabaloy kami a di ami aya katawan."

173

Odi na oba niyo matharo a: "Aya bo a miyanakoto na so manga loks ami gowani, na miyabaloy kami a manga moriyataw ko oriyan iran (na miyakawnot kami kiran). Inong Ka rkami mbinasaan so pinggolawla o minggagalbk sa ribat?"

174

Na lagid aya a gii Ami kazmpada magosay ko manga ayat; ka an siran makambalingan (ko ontol).

175

Na pangadiing ka kiran so totholan ko (Bal'am Bno Baorah a) taw a inibgay Ami ron so manga ayat Ami, na liyowas iyan oto, na tiyalokonan skaniyan o shaytan, na miyabaloy a pd ko mithataridadag.

176

Na o kabaya Ami, na mataan! a maphakaozor Ami skaniyan sa sabap roo; na ogaid na Skaniyan na mizoramig ko doniya, go piyangonotan iyan so n'nga iyan. Na aya ibarat iyan na lagid o aso a o pakabasnging ka skaniyan, na pakaloloyotn iyan a dila iyan, odi na ding ka khodiin skaniyan, na pakaloloyotn iyan dn a dila iyan. Giyoto man i ibarat o pagtaw a so piyakambokhag iran so manga ayat Ami; na panotholang ka so manga tothol, ka an iran mapphamimikiran.

177

Miyakaratarata a ibarat o pagtaw a so piyakambokhag iran so manga ayat Ami go so manga ginawa iran i bininasa iran.

178

Sadn sa toroon o Allah, na skaniyan i khatoro, go sadn sa dadagn Iyan, - na siran man na siran i phangalologi.

179

Na sabnsabnar a miyadn Kami sa rk o naraka Jahannam a madakl a pd ko manga jinn go so manga manosiya: Adn a manga poso iran na di iran oto ipnggdagda, go adn a manga mata iran na di iran oto iphangilaylay, go adn a manga tangila iran na di iran oto iphamakin'g. Siran man na lagid o manga ayam, - kna ka siran i lbi a miyangadadag. Siran man na siran so di makaiin'ngka.

180

Na rk o Allah so manga ngaran a manga pipiya: Na bthon iyo Ron oto; na ganati niyo so siran a pphamakasilayn iran so manga ngaran Iyan, ka imbadal kiran dn so pinggolawla iran.

181

Na adn a pd ko inadn Ami a pagtaw a ipthoro iran so bnar so skaniyan na oontoln iran.

182

Na so miyamanaplis ko manga ayat Ami, na zagintonn Ami siran (ko phakabinasa kiran) sa di iran katawan;

183

Go pakalalanatn Ko siran: Mataan! a so siksa Akn na mabagr.

184

Ba iran da pamimikirana? A da ko (Mohammad a) bolayoka iran i bthang: da a salakaw ron a rowar sa pphamakaiktiyar a mapayag.

185

Ba iran da maylay so mala a kapaar ko manga langit go so lopa, go so kiyaadna o Allah ko langowan taman? Go so kiyatangkd a kababaloy a sabnar a kiyapakarani o diyandi kiran? Na antonaa i tothol ko oriyan aya i pharatiyayaan iran?

186

Sadn sa dadagn o Allah, na da a makanggonanao ron: Na mbotawanan Iyan siran ko kapangangakowala iran, a mromparompak.

187

Iphagiza iran rka so alongan a qiyamah o anday kaphakatalingoma niyan? Tharoang ka a: "Mataan! a so katawi ron na sii bo ko Kadnan ko: Da a phakapayag ko wakto niyan a inonta Skaniyan. Mapnd ko manga langit ago so lopa. Di rkano makatalingoma odi mitkaw." Ipagiza iran rka a lagid a bang ka oto katawi, tharoang ka a: "Mataan! a so katawi ron na sii bo ko Allah, na ogaid na so kadaklan ko manga manosiya na di iran katawan."

188

Tharoang ka a: "Da a mipapaar akn a bagian o ginawa ko a ompiya ago da a morala inonta sa kabaya o Allah. Na o adn a katawi ko, ko da mapayag, na mataan! a pakadakln akn so mapiya, go di rakn misogat so marata: - sakn na matag ako pphamakaiktiyar, go pphamanothol sa mapiya ko pagtaw a mapaparatiyaya."

189

Skaniyan so (Allah a) miyadn rkano phoon ko (Adam a) isa a ginawa, go biyaloy Niyan, a miyakapoon rkaniyan so darodopa iyan, ka an on lilintad. Na kagiya a pamakayn iyan skaniyan, na miyarimbit sa karimbit a makhap; na pkhilalakaw niyan oto. Na kagiya a makapnd, na minipangangarapan iran ko Allah, a Kadnan iran a: "Mataan! a o bgi kaming Ka sa (wata a) mapiya; na mataan! a mabaloy kami dn a pd ko miyamanalamat."

190

Na kagiya a bgan Iyan siran sa (wata a) mapiya, na mimbaal siran sa manga sakotowa Iyan ko inibgay niyan kiran: Na Maporo so Allah a ka-aawat Iyan ko ipzakoto iran On.

191

Ino iran pphakasakotowa (ko Allah) so da a khambaalan iyan a mayto bo, ka siran na pphangmbaalan?

192

Go da a khagaga iran a tabang kiran, go di iran khatabangan so manga ginawa iran!

193

Na o tawagn iyo kiran so toroan, na di kano iran khawnotan: Magizan rkano o tawaga niyo siran antawaa ba kano dn khiggnk!

194

Mataan! a so siran a pphanongganowin iyo a salakaw ko Allah, na manga oripn a manga lagid iyo: Na tawaga niyo siran, na pakismbag kano kiran, o skano i manga bnar!

195

Ba adn a manga ai ran a pkhilalakaw iran? Antawaa ba adn a manga barokan iran a pkhipangawakawa iran? Antawaa ba adn a manga mata iran a pkhipangilaylay ran? Antawa ba adn a manga tangila iran a mipphamamakin'g iran? Tharoang ka a: "Panongganoya niyo so ipphamanakoto niyo, oriyan iyan na pagantangani ako niyo sa marata, na di niyo rakn thaalika!"

196

"Mataan! a aya somisiyap rakn na so Allah, a so Tomiyoron ko kitab, go skanyan i Somisiyap ko manga bilangataw."

197

"Na so siran a pphanongganowin iyo a salakaw ko Allah, na da a khagaga iran a tabang rkano, go di iran khatabangan so manga ginawa iran."

198

Na o tawagn iyo kiran so toroan, na di iran khan'g, na pkhaylaing ka siran a ttntngan ka iran, a siran na di siran phamakanono.

199

Kpiting ka so kanapi go sogoon ka so mapiya; go talikhoding ka so da a manga mlng iyan.

200

Na amay ka khasogat ka o onsi a phoon ko shaytan, na lindong ka ko Allah. Mataan! a Skaniyan na Pphakan'g, a Matao,

201

Mataan! a siran a khipanananggila, na igira a adn a miyakasogat kiran a saramat a phoon ko shaytan, na makatadm siran, na samawto na siran na makapangilaylay siran!

202

Na so manga pagariya (o manga shaytan) na ipmbolog iran siran ko kadadag, oriyan iyan na di siran pthangka.

203

Na igira a da a minitalingomang ka kiran a tanda, na tharoon iran a: "Inong ka oto da mipanton?" Tharoang ka a: "Aya bo a phagonotan ko na so iphagilaham rakn a phoon ko Kadnan ko. Giyaya na manga rarayag a karina a phoon ko Kadnan iyo, go toroan, go limo, a bagian o pagtaw a khipaparatiyaya."

204

Na igira a pmbatiyaan so Qor'an, na pphamamakin'ga niyo skaniyan, go lilintad kano: ka ang kano mipangalimo.

205

Na tatadming ka so Kadnan ka sii ko ginawang ka, sa kapangalimbabaan ago kalk, go di matanog a katharo, sii ko kapitapita, go so kagabigabi; go ding ka mbaloya so ginawang ka a pd ko khikalilipat.

206

Mataan! a so (manga malaikat a) manga rarani ko Kadnan ka, na di iran iphmaratabat a kapzimbaa iran ko Allah. Go gi iran iphoroporo Skaniyan, go Ron siran pangangalimbabaan.

Total Number of Verses: 75

1

Ipagiza iran rka so manga taban ko kambonoay. Tharoang ka a: "So manga taban na kapaar o Allah go so Rasol. Na kalkn iyo so Allah, go tanora niyo so kaphapantapantagan iyo. Go onoti niyo so Allah go so sogo Iyan, o skano na khipaparatiyaya."

2

Aya bo a titho a khipaparatiyaya na so siran, a igira a miyaaloy so Allah, na somangkop so manga poso iran, go igira a piyangadian kiran so manga ayat Iyan, na makaoman kiran sa paratiyaya, go so bo so Kadnan iran i sasarigan iran;

3

Siran na ipphamayandg iran so sambayang, go so sabaad ko inibgay Ami kiran na ipphammgay ran.

4

Siran man na siran so khipaparatiyaya a titho: Adn a bagian iran a manga pangkatan (ko sorga) sii ko Kadnan iran, go maap, go pagpr a mapiya:

5

Lagid o kiyapakaliyowa rka o Kadnan ka phoon ko walaing ka sabap ko bnar, na mataan! a adn a salompok ko miyamaratiyaya a tanto a di siran kamamantrangan,

6

Pphamawalng ka iran makapantag ko bnar ko oriyan o kiyapayag iran, lagid o ba siran pndndgn ko kapatay a siran na kasasandngan iran.

7

Na gowani ko idiyandi rkano o Allah so isa ko dowa pagtaw, a mataan aya! a khataban iyo: Na gii niyo mandingandingan a so da a bagr iyan i masangan iyo, na kabaya o Allah a tanto Niyan so bnar sabap ko manga katharo Iyan, na thiphadn Iyan so kaposan o da pamaratiyaya;

8

Ka thanto Niyan so bnar na pagilangn Iyan so ribat, apiya di kabaya o manga rarata i ongar.

9

Gowani ko pphangni kano sa tabang ko Kadnan iyo, na inismbag Iyan rkano a: "Mataan! a Sakn na thabangan Ko skano sa sanggibo a manga malaikat, a makapthondotondog."

10

Na da a kiyabaloya saya o Allah a rowar sa tothol a iphakapiya ginawa, go an on misabap a kathatana o manga poso iyo: Na da ko tabang inonta na sii bo phoon ko Allah; mataan! a so Allah na Mabagr, a Mawngangn.

11

Gowani na ipkholob Iyan rkano so toratod, a sarig a phoon Rkaniyan, go pthoronan kano Niyan a phoon ko kawang sa ig, ka an on misabap a kasotiya Niyan rkano, go an Iyan rkano maylang so pangangalk o shaytan, go an Iyan matkhs so manga poso iyo, go an on misabap a kapakabkna Niyan ko manga parapara.

12

Gowani na iphagilaham o Kadnan ka ko manga malaikat a: "Mataan! a Sakn na pd iyo. Na pakabkna niyo so siran a miyamaratiyaya: Ithmo Akn dn ko manga poso o siran a da pamaratiyaya so kalk: Na sogata niyo so kaporoan o manga lig (iran), go sogata niyo kiran so oman i kmr"

13

Giyoto man na sabap sa mataan! a siran na siyorang iran so Allah go so sogo Iyan: Na sadn, sa sorangn Iyan so Allah go so sogo Iyan, na mataan! a so Allah na Mayloti-kapaniksa.

14

Giyoto man (so siksa): "Na taami niyo skaniyan ka mataan! a bagian o da pamaratiyaya so siksa ko naraka."

15

Hay miyamaratiyaya, igira minithmo niyo (ko giimbonoayan) so siran a da pamaratiyaya a pkhamang siran, na di niyo kiran thalikhodn so manga likod (iyo).

16

Na sadn sa italikhod iyan kiran sa alongan oto a likod iyan inonta a plimpang ko kambonoay, odi na thapi ko pagtaw (a pd iyan) - na sabnar a miyakakholokog sa rarangit a phoon ko Allah, go darpa iyan so naraka Jahannam, - a mikharatarata a khabolosan!

17

Na da niyo siran mapatay; na ogaid na so Allah i miyakapatay kiran: Go kna a ba ska i miyakasogat gowani a lombad ka, na ogaid na so Allah i somiyogat (kiran), ka an Iyan matiyoba so miyamaratiyaya sa tiyoba a mapiya a phoon Rkaniyan. Mataan! a so Allah na Pphakan'g, a Matao.

18

Giyoto dn man, ka mataan! a so Allah na pphakalobayn Iyan so antangan a marata o da pamaratiyaya.

19

Na o phangniya niyo so hokoman (ko paglt iyo ago so Mohammad) na sabnar a miyakaoma rkano so hokoman (a so kiyatabana rkano sa Badr) na o gnk kano (mongkir), na giyoto i mapiya rkano: Na o kasoy kano na komasoy Kami (tomabang). Na da dn a milinding rkano o pagtaw niyo a mayto bo, apiya i kadakl iyan. Ka mataan! a so Allah na babid o (tabang Iyan so) miyamaratiyaya!

20

Hay miyamaratiyaya, onoti niyo so Allah go so sogo Iyan, go di niyo thalikhodi Skaniyan a skano na pkhan'g iyo.

21

Go di niyo zowaa so siran a pitharo iran a: "Piyamakin'g ami, a siran na di iran phamamakin'gn:"

22

Mataan! a miyakaratarata ko manga binatang sii ko Allah so manga bngl a manga omaw, - a siran na da a manga sabot iran.

23

Na o katawi o Allah a adn a matatago kiran a mapiya, na mataan! a pakapamamakin'gn Iyan siran: Na apiya pakapamamakin'gn Iyan siran, na thalikhod siran bo a siran na khisasangka.

24

Hay miyamaratiyaya! tarimaa niyo so Allah go so Rasol, igira a tiyawag kano niyan ko phakawyag rkano; go tangkda niyo a mataan! a so Allah na phagltan Iyan so lt o taw ago so poso iyan, go mataan! a Skaniyan na Ron kano plimoda.

25

Go pananggilai niyo so tiyoba, ka di khisogat ko siran a mindadarowaka rkano sa ba matabis. Go tangkda niyo a mataan! a so Allah na Mayloti-kapaniksa.

26

Na tadmi niyo gowani ko mayto kano, a di kano pakanganganinn ko lopa, ipkhalk iyo oba kano mabiyag o manga manosiya; na piyakapagingd kano Niyan (sa Madinah), go inibagr Iyan rkano so tabang Iyan, go riniskhiyan kano Niyan ko manga pipiya, ka ang kano makapanalamat.

27

Hay miyamaratiyaya, di niyo pndonsiyani so Allah go so Rasol, go di niyo pndonsiyani so manga sarig rkano a skano na katawan iyo.

28

Na tangkda niyo a so manga tamok iyo go so manga wata iyo na matag tpng; ka mataan! a so Allah na adn a zisii Rkaniyan a balas a lbi a mala.

29

Hay miyamaratiyaya, o kalkn iyo so Allah, na snggayan kano Niyan sa padoman, go lalasn Iyan rkano so manga dosa niyo, go napiyan kano Niyan, ka so Allah i Khirk ko limo a lbi a mala.

30

Na gowani na pphagantanganang ka sa marata o siran a da pamaratiyaya, ka tharongko on ka iran, odi na mbonoon ka iran, odi na phakaawaang ka iran. Na pphagantangan siran sa marata, na pmbadalan o Allah so antangan iran, ka so Allah i makalalawan ko pphamagantangan sa marata.

31

Na igira a biyatiya kiran so manga ayat Ami, na tharoon iran a: "Sabnar a miyan'g ami, na o kabaya ami, na mataan! a maptharo ami so lagid aya, ka da a salakaw saya a rowar sa manga tothol a kabokhag o miyangaoona."

32

Na gowani na pitharo iran: "Ya Allah, o giyai na skaniyan so bnar a phoon ko hadapan Ka, na pakaorani kaming Ka sa ator a phoon ko kawang, odi na talingomai kaming Ka sa siksa a malipds."

33

Na da ko Allah i ba Niyan siran ziksaa a matatago ka kiran; go da ko Allah i ba Niyan siran siksaa a pphangni siran sa maap (ko Allah).

34

Na andamanaya i di kiran kasiksaa o Allah, a siran na pphangalang siran ko Masjid Al-Haram - a kna a ba siran i manga wali ron? Ka da a manga wali ron a rowar ko khipanananggila; na ogaid na so kadaklan kiran na di iran katawan.

35

Na da a miyabaloy a sambayang iran sii sa Baytollah a rowar sa kapamopoy go kandawpay: "Na taami niyo so siksa sabap ko da niyo kaparatiyaya."

36

Mataan! a so siran a da pamaratiyaya na gi iran nggaston so manga tamok iran, ka an siran makaalang ko lalan o Allah, na gi iran dn oto nggaston; na oriyan iyan na pkhabaloy kiran a kazndit; oriyan iyan na pndaagn siran. Na siran a da pamaratiyaya na sii siran ko naraka Jahannam plimoda;

37

Ka iznggay o Allah so marata a mblagn ko mapiya, go ithapi Iyan so marata, so sabaad on ko sabaad, na thimoon Iyan oto langon, na thagoon Iyan oto ko naraka Jahannam. Siran man na siran so manga logi.

38

Tharoang ka ko siran a da pamaratiyaya a: O gnk siran, na pnapin kiran so andang a miyaypos; na o kasoy iran, na sabnar a somiyagad so kiyaokitan o miyangaoona (a miyabaloy a ladiyawan).

39

Na pakimbonoay kano kiran taman sa da a mabaloy a kapanakoto, go mabaloy so okit ko kapagintaw a tanan rk o Allah; na o gnki iran, na mataan! a so Allah na so gi iran nggolawlaan na phagilayn Iyan.

40

Na o talikhod siran, na tangkda niyo a mataan! a so Allah i Panarigan iyo - miyakapiyapiya a Phanarigan go miyakapiyapiya a Phananabang.

Part 10

41

Na tangkda niyo a mataan! a so miyataban iyo, apiya antonaa, na mataan! a rk o Allah so ikalima on bagi, go rk o Rasol, go rk o manga tonganay niyan, go so manga ilo, go so manga miskin, go so pphlayalayag, - o skano na piyaratiyaya niyo so Allah, go so initoron Ami ko oripn Ami ko alongan a kiyapakasnggaya (o ontol ago so ribat) - alongan a kiyapakathmo o dowa pagtaw (sa Badr). Na so Allah sii ko langowan taman na Gaos Iyan.

42

Gowani na zisii kano ko sabala ko balintad a marani (sa Madinah), na zisii siran ko sabala ko balintad a mawatan (sa Madinah), na so isa ka lalakawan (a manga padagang) na zisii ko kababaan iyo. Na o miphapasada kano (sa kapthalabok iyo), na pndorat kano dn ko pasad. Na ogaid na kagiya adn a pakapnggolalann o Allah a sogoan a miyatangkd a mapnggolawla; ka an thakna a ka oongkir o taw a miyongkir ko oriyan o marayag a karina, go an thakna a kapaparatiyaya o taw a miyaratiyaya ko oriyan o marayag a karina. Na mataan! a so Allah na titho a Pphakan'g, a Matao.

43

Gowani na pphakiilay rka siran o Allah ko katotoroga rka a mayto (siran): Na opama ka piyaki ilay Niyan rka siran a madakl (siran), na mataan! a kaalapan kano, go mataan! a di kano magayonayon ko pnggolawlaan. Na ogaid na so Allah na migay sa kalilintad: Mataan! a Skaniyan na katawan Iyan so zisii ko manga rarb.

44

Na gowani na pphakiilay Niyan rkano siran ko masa a kiyapakathmo niyo, a mayto a kaiilaya niyo kiran, na mayto a kaiilaya iran rkano, ka kagiya adn a pakapnggolalann o Allah a sogoan a miytangkd a mapnggolawla. Na sii bo phakandoda ko Allah so mapnggogolawla.

45

Hay miyamaratiyaya, igira adn a minithmo niyo a sagorompong (a da pamaratiyaya), na pakathanaan iyo, go tatadmi niyo so Allah sa madakl; ka ang kano makadaag:

46

Go onoti niyo so Allah go so sogo Iyan; go di kano pzoransorang, ka kaalapan kano go mada so bagr iyo; go phantang kano, ka mataan! a so Allah na babid o manga papantang:

47

Go di niyo zowaa so siran a lominiyo siran ko manga ingd iran sa kapangandag go kapakiilaylayn ko manga manosiya, go pphangalang siran ko lalan ko Allah: Na so Allah sii ko gi iran nggolawlaan na katawan Iyan.

48

Na gowani na pipharasan kiran o shaytan so manga galbk iran, go pitharo iyan a: "Da a phakadaag rkano sa alongan nai ko manga manosiya, go mataan! a sakn i lomilinding rkano." Na kagiya makambantaya so dowa ka sagorompong, na miyangndod ko talikhodan iyan, sa pitharo iyan a: "Mataan! a sakn na angiyas ako rkano; ka mataan! a sakn na, pkhaylay akn so di niyo pkhaylay mataan! a sakn na ikhalk akn so Allah; ka so Allah na Mayloti-kapaniksa."

49

Gowani na gii tharoon o manga monapik go so siran a katatagoan so manga poso iran sa gdamn a: "Miyakaikmat ko siran aya so agama iran." Na sadn sa somarig ko Allah, na mataan! a so Allah na Mabagr, a Mawngangn.

50

Na o maylaing ka so masa a kathangana o manga malaikat ko (niyawa o) da pamaratiyaya, a pphrorontayn iran so manga paras iran go so manga likod iran na (gi iran tharoon a:) "Taami niyo so siksa a phakatotong"

51

"Giyoto man na sabap ko miniona o manga lima niyo (a dosa). Ka mataan! a so Allah na kna a ba salimbot ko manga oripn Iyan:"

52

"Lagid o sowasowai o pagtaw o Pir'awn go so miyaonaan iran a da iran paratiyayaa so manga ayat o Allah, na siniksa siran o Allah sabap ko manga dosa iran: Mataan! a so Allah na Mabagr, a Mayloti-kapaniksa: "

53

"Giyoto man na sabap sa mataan! a so Allah na di Niyan pagalinn so limo a inipangalimo Iyan ko pagtaw taman sa di iran alinn so zisii ko manga ginawa iran: Ka mataan! a so Allah na Pphakan'g, a Matao."

54

Lagid o sowasowai o pagtaw o Pir'awn go so siran a miyaonaan iran a piyakambokhag iran so manga ayat o Kadnan iran: Na bininasa Mi siran sabap ko manga dosa iran, na inld Ami so pagtaw o Pir'awn: Ka tanan siran manga darowaka.

55

Mataan! a mikharatarata ko manga binatang sii ko Allah so siran a miyamangongkir: Na siran na di phamaratiyaya.

56

Siran so miniphasada aka kiran, oriyan iyan na pmbarngkasn iran so pasad iran ko oman siran makiphasada, a siran na di siran phananggila.

57

Na o mapgs ka siran ko kambonoay, na baloyang ka siran a thoma ko taw a phakatondog kiran, ka an iran pkhatadmi.

58

Na amay ka ikhawan ka ko pagtaw so kandorat, na bokaing ka kiran (so pasad), sa mapayag, mataan! a so Allah na di Niyan khabayaan so mamakadodorata.

59

Na di dn thangkapa o siran a da pamaratiyaya o ba siran miyakalipos: Mataan! a siran na di iran khalipos.

60

Na thiyagari niyo siran sa sadn sa khagaga niyo a bagr, go pd on so kathiyagara ko manga koda, a mipphangangalk iyo to ko ridoay o Allah, go ridoay niyo, go so manga pd a salakaw kiran, a di niyo siran katawan, so Allah i Matao kiran. Na sadn sa manggasto niyo apiya antonaa sii ko lalan o Allah, na khitoman rkano sa tarotop (so balas iyan), - a skano na di kano kasalimbotan.

61

Na o ramig siran ko kalilintad, na ramig ka on (mambo), go sariging ka so Allah: Mataan! a Skaniyan na Skaniyan so Pphakan'g, a Matao.

62

Na oba iran khabayai a kalimpanga iran rka, - na mataan! a aangkosang ka o Allah: Skaniyan so inibagr Iyan rka so tabang Iyan go so miyamaratiyaya:

63

Go piyakakhakalayama Iyan so manga poso iran: Apiya nggaston ka so nganin a zisii ko lopa langon, na ding ka mapakakhakalayama so manga poso iran, na ogaid na so Allah i miyakapagayonayon kiran. Mataan! a Skaniyan na Mabagr, a Mawngangn.

64

Hay Nabi! aangkosang ka o Allah, - go so taw a miyonot rka a miyamaratiyaya.

65

Hay Nabi, piisn ka ko miyamaratiyaya so kapakimbonoay. O adn rkano a dowa polo a manga papantang, na phakapgs siran sa dowa gatos. Na o adn rkano a magatos, na phakapgs siran sa sanggibo ko siran a da pamaratiyaya. Sabap sa mataan! a siran na pagtaw a da a manga sabot iran.

66

Imanto na piyakakhapan kano o Allah, ka katawan Iyan a mataan! a matatago rkano so kalobay. Na o adn rkano a magatos, a manga papantang, na phakapgs siran sa dowa gatos, na o adn rkano a sanggibo, na phakapgs siran sa dowa nggibo, sabap sa idin o Allah. Ka so Allah na babid o (tabang Iyan so) manga papantang.

67

Da mapatot ko Nabi i ba adn a kowaan iyan ko manga biyag (a a'on sa ginawa) taman sa di makapgs ko lopa. Khabayaan iyo so parayasan ko doniya; na so Allah na kabaya Iyan a mambagian iyo so akhirat. Na so Allah na Mabagr, a Mawngangn.

68

Oda so kitab a phoon ko Allah a miyaona, na khasogat kano dn sabap ko kinowa niyo a siksa a mala.

69

Na kang kano ko miyataban iyo, a halal a mapiya. Go kalkn iyo so Allah, mataan! a so Allah na Manapi, a Makalimoon.

70

Hay Nabi, tharoang ka ko taw a zisii sa tangan iyo a manga biyag a: "O adn a katawan o Allah a matatago ko manga poso iyo a mapiya, na mbgan kano Niyan sa mapiya adi so miyakowa rkano, go pnapiyan kano Niyan, ka so Allah na Manapi, a Makalimoon."

71

Na o kabaya iran so kandhorata iran rka, na sabnar a diyorat iran so Allah gowani, na piyakidaag Iyan (rka) siran. Na so Allah na Matao, a Mawngangn.

72

Mataan! a siran a miyamaratiyaya, go giyanatan iran so manga darpa iran, go inipanagontaman iran so manga tamok iran go so manga ginawa iran, sii ko lalan o Allah, go so siran a somiyandig kiran go tomiyabang kiran (ko Nabi), - na siran man na so sabaad kiran i manga wali ko sabaad. Na so miyamaratiyaya a da iran ganati so manga darpa iran, na da a kipantag iyo ko kapangowalii kiran a mayto bo taman sa di siran tomogalin; na o pangni siran rkano sa tabang makapantag ko agama, na paliyogat rkano so katabangi (kiran), inonta a aya iran khasogat so pagtaw a adn a pasad iyo ago siran. Na so Allah na phagilayn Iyan so gii niyo nggolawlaan.

73

Na so siran a da pamaratiyaya, na so sabaad kiran i manga wali ko sabaad: odi niyo to nggolawlaa, na khatagoan sa samok so lopa, go kapaminasa a mala.

74

Na so miyamaratiyaya, go miyamanogalin, go miyamanagontaman ko lalan o Allah, go so siran a somiyandig kiran go tomiyabang kiran, - na siran man na siran so miyamaratiyaya a titho: Na adn a bagian iran a maap, go pagpr a mapiya.

75

Na so miyamaratiyaya ko oriyan iyan, go miyamanogalin, go pd iyo a miyamanagontaman, - na siran man na pd iyo. Na so thotonganaya na so sabaad kiran i lbi a wali ko sabaad sii ko kitab o Allah. Mataan! a so Allah na so langowan taman na katawan Iyan.

Total Number of Verses: 129

1

(Giyai) So kiyabarngkas o pasad a phoon ko Allah go so sogo Iyan, sii ko siran a iniphasada iyo ko manga pananakoto:

2

Na ndalakaw kano ko lopa (hay manga mosrik) sa pat olan, go tangkda niyo a mataan! a skano na di niyo khalipos so (siksa o) Allah go mataan! a so Allah na phakaytoon Iyan so manga kapir

3

Na piyakalangkap a phoon ko Allah go so sogo Iyan, ko manga manosiya ko alongan a kapnay-hajji a mala a mataan! a thipd o Allah (so pasad) ko manga pananakoto; go (thipd o) sogo Iyan. Na o thawbat kano, na giyoto i mapiya rkano; na o talikhod kano, na tangkda niyo a mataan! a skano na di niyo khapalagoyan so (siksa o) Allah. Na panotholang ka ko siran a da pamaratiyaya so siksa a malipds.

4

Inonta so siran a iniphasada iyo ko manga pananakoto, oriyan iyan na da a kiyorang iran rkano a mayto bo, go da a tiyabangan iran a sorang rkano a isa bo. Na tarotopa niyo kiran so diyandi kiran taman ko wakto iran (a mappnto): Mataan! a so Allah na pkhababayaan Iyan so khipanananggila.

5

Na amay ka maypos so manga olanolan a khipagaadatan, na bonoa niyo so manga pananakoto apiya anda niyo siran matoon, go pamiyaga niyo siran, go tarongkoa niyo siran, go pamagayani niyo siran ko oman i phagokitan; na o thawbat siran, go itindg iran so sambayang, go tonayn iran so zakat, na gikasi niyo so lalan iran: Mataan! a so Allah na Manapi, a Makalimoon.

6

Na amay ka adn a sakataw a pd ko manga mosrik a manarig rka, na pakasarigang ka, taman sa pamamakin'gn iyan so katharo o Allah; oriyan iyan na sampayn ka skaniyan ko phakasarig on. Giyoto man na sabap sa mataan! a siran na pagtaw a manga tatao

7

Andamanaya i kakhapatot ko manga pananakoto o diyandi sii ko Allah go sii ko sogo Iyan, inonta so siran a inidiyandi iyo sii sa Masjid Al-Haram? Na sadn sa kapagiinontolan iyan rkano, na pagiinontolani niyo siran(mambo): Mataan! a so Allah na pkhababayaan Iyan so khipanananggila.

8

Na andamanaya (i kapakipphasada iyo kiran) a o mapgs kano iran, na di iran rkano pagilayn i kaplolot go kaphapasada? Ipzoat iran rkano so manga ngari iran, na somasangka so manga poso iran; ka so kadaklan kiran na manga songklid.

9

Inipamasa iran so manga (ayat o Allah sa arga a mayto, go miyangalang siran ko lalan Rkaniyan: Mataan! a siran na miyakaratarata so pinggolawla iran.

10

Di iran pagilayn ko miyaratiyaya so kaplolot go kaphapasada. Na siran man na siran so manga malawani.

11

Na o thawbat siran, go itindg iran so sambayang, go tonayn iran so zakat, - na manga pagari niyo siran ko agama: Na pphagosayn Ami so manga ayat ko pagtaw a manga tatao.

12

Na o barngkasa iran so manga sapa iran ko oriyan o kiya pakindiyandi iran, go phapaawingn iran so agama niyo, - na pakimbonoay kano ko manga nakoda ko kaongkir: Mataan! a siran na da a kipantag kiran o manga sapa, ka an siran makagnk.

13

Ino kano di pakipmbonoay ko pagtaw a siyogok iran so manga sapa iran, go piyagngtan iyan a kaphakaawaa iran ko Rasol, go siran na piyangorawan kano iran ko paganay a kiyaokitan? Ino niyo siran khalkn? Na so Allah i patot a ikhalk iyo Skaniyan, o skano na khipaparatiyaya!

14

Pakimbonoay kano kiran, ka ziksaan siran o Allah sa pnggolalan ko manga barokan iyo, go phakaytoon Iyan siran, go thabangan kano Niyan, sa kadaaga kiran, go phakapiyaan Iyan, so manga rarb o pagtaw a khipaparatiyaya,

15

Go pagilangn Iyan so otg ko manga poso iran. Na phakatawbatn o Allah so taw a kabaya Iyan; ka so Allah na Matao, a Mawngangn.

16

Ba niyo tiyangkap sa ipndaraynon kano, ka an katokawi o Allah so siran oto a miyamagiklas, ko kiya prang iran, go da siran kowa sa salakaw ko Allah go so sogo Iyan go so miyamaratiyaya sa manga Panarigan? Na so Allah na Kaip Iyan so gii niyo nggolawlaan.

17

Da mapatot ko manga pananakoto, so kapthanosa iran ko manga masjid o Allah, zasaksian iran so manga ginawa iran ko kaongkir. Siran man na miyailang so manga galbk iran: Na so naraka na siran na tatap siran on.

18

Aya bo (a patot) a pthanos ko manga masjid o Allah na so taw a piyaratiyaya niyan so Allah, go so alongan a mawri, go initindg iyan so sambayang, go tiyonay niyan so zakat, go da a inikalk iyan inonta so Allah. Na matatangkd a siran man i khabaloy a pd ko miyamakakdg sa ontol.

19

Ino niyo mbaloya so kapphakaynoma ko nomanayk go so kapthanosa ko Masjid Al-Haram, a lagid o taw a piyaratiyaya niyan so Allah, go so alongan a mawri, go miyanagontaman sii ko lalan o Allah? Di siran magizan sii ko Allah, a so Allah na di Niyan pnggonanaon so pagtaw a manga darowaka.

20

So miyamaratiyaya, go miyamanogalin (sa ingd) ago inipanagontaman iran ko lalan o Allah, so manga tamok iran go so manga ginawa iran, i mala i pangkatan ko Allah: Na siran man na siran so phamakaslang sa maliwanag.

21

Pphanotholan siran o Kadnan iran sa limo a phoon Rkaniyan, go kasosoat, go manga sorga, a adn a bagian iran roo a kapipiya ginawa a tatap:

22

Makakal siran on sa dayon sa dayon. Mataan! a so Allah na adn a zisii Rkaniyan a balas a mala.

23

Hay miyamaratiyaya, di niyo khowaa so manga loks iyo go so manga pagari niyo a manga panarigan amay ka matomo iran so kaongkir a di so kaparatiyaya: Na sadn sa manarig kiran a pd rkano, na siran man na siran so da pamaginontolan.

24

Tharoang ka a: O so manga loks iyo, go so manga wata iyo, go so manga pagari niyo, go so manga karoma niyo, go so manga tonganay niyo; go so manga tamok a miyasokat iyo; go so dagangan a ipkhawan iyo so kalpas o wakto niyan, go so manga darpa a masosoat kano ron na matomo iyo a di so Allah, go so sogo Iyan, go so kaphrang sii ko lalan Rkaniyan; - na nayawa niyo taman sa italingoma o Allah so sogoan Iyan (a siksa): Ka so Allah na di Niyan thoroon so pagtaw a manga songklid.

25

Sabnsabnar a tiyabangan kano o Allah sii ko manga thmoan a madakl go so alongan a (kiyaphrang sa) Honayn: Gowani na miyasoat kano o kadakl iyo, na da a mininggay niyan rkano a gona a mayto bo: Go piyakasimpit rkano o lopa so kawlad iyan, oriyan iyan na tomiyalikhod kano a pphamalagoy.

26

Oriyan iyan na initoron o Allah so kathatana iyan sii ko sogo Iyan go sii ko miyamaratiyaya, go tomiyoron sa manga tantara a (manga malaikat) a da niyo siran maylay: Go siniksa Iyan so siran a da pamaratiyaya: Na giyoto i balas ko manga kapir.

27

Oriyan iyan na phakatawbatn o Allah ko kiyaipos oto so taw a kabaya Iyan: Ka so Allah na Manapi, a Makalimoon.

28

Hay miyamaratiyaya, mataan! a so manga pananakoto na marzik; na di siran pagobay ko Masjid Al-Haram ko oriyan angkai a ragon iran (a kiyabarngkas o pasad). Na oba niyo khawann so kamiskin, na mbgan kano o Allah ko kakayaan Iyan, o kabaya Iyan, mataan! a so Allah na Matao, a Mawngangn.

29

Pakimbonoay kano ko siran a di mapaparatiyaya ko Allah, go so alongan a mawri, go di iran izapar so inisapar o Allah go so sogo Iyan, go di siran magokit ko okit a bnar, a pd ko siran a bigan ko kitab, taman sa di siran mgay sa bowis sa kathanganaan, a siran na phapasiyonot siran.

30

Na pitharo o manga Yahodi a: So Ozayr na wata o Allah, go pitharo o manga Kristiyan, a so Al-Masih na wata o Allah. Giyoto man so katharo iran ko manga ngari iran; a ipphananayan iran ko katharo o siran a da pamaratiyaya gowani. Pimorkaan siran o Allah: Andamanaya i kapphamokhag iran!.

31

Kinowa iran so manga olama kiran go so manga barasimba kiran a manga katohanan a salakaw ko Allah, go so Al-Masih a wata o Maryam; a da a inisogo kiran a rowar ko kasimbaa iran ko (Allah a) tohan a Isaysa: da a tohan a inonta Skaniyan. Soti Skaniyan: Mawatan ko ipzakoto iran on.

32

Khabayaan iran so kapadnga iran ko sindaw o Allah a gii nggolalan ko manga ngari iran na di iphangonot o Allah inonta na, tharotopn Iyan so sindaw Niyan, apiya pn di kabaya o manga kapir.

33

Skaniyan so (Allah a) siyogo Iyan so sogo Iyan a rakhs o toroan go so agama a bnar, ka phakiombawan Iyan on so manga agama, sa kalangolangowan iyan, apiya di kabaya o manga pananakoto.

34

Hay miyamaratiyaya, mataan! a madakl ko manga olama ko manga Yahodi go so manga olama ko manga Kristiyan, a mataan! a phagarabn iran so manga tamok o manga manosiya sa di ontol go pphangalang siran ko lalan o Allah. Na so siran a pphanimoon iran so bolawan ago pirak na di iran oto pnggaston ko lalan o Allah: Na panotholang ka kiran so siksa a malipds-

35

Sii ko alongan a pakalanggaan oto ko apoy ko Jahannam, na ipamirinsa oto ko manga bn'ng iran, go so manga kilid iran, go so manga likod iran. (Tharoon kiran a:) "Giyaya so piyanimo iyo a rk o manga ginawa niyo: Na taami niyo so piyanimo iyo!"

36

Mataan! a so itongan o manga olanolan (ko saragon) sii ko Allah na sapolo ago dowa olan sii ko kitab o Allah sii ko alongan a kiya adna Niyan ko manga langit go so lopa; a adn a pd on a pat olan a khipagaadatan: Giyoto man so okit a ontol. Na di niyo roo mbinasaa so manga ginawa niyo; na pakimbonoay kano ko manga pananakoto langon lagid o gi iran rkano kapakimbonoay langon. Na tangkda niyo a mataan! a so Allah na babid o (tabang Iyan so) khipanananggila.

37

Mataan! a so kapphaka oriya (ko kassla a ko Moharam sii ko Sapar) na phakawman ko kaongkir: Pkhisabap on a kapkhadadag o siran a miyamangongkir: Pphakayn iran oto ko saragon, na ipzapar iran oto ko isa a ragon, ka pphakaayonn iran ko itongan o inisapar o Allah na pphakayn iran so inisapar o Allah. Pipharasan kiran so marata ko manga galbk iran. Na so Allah na di Niyan pnggonanaon so pagtaw a manga kapir.

38

Hay miyamaratiyaya, ino kano wai, a igira a pitharo rkano a: Sorong kano ko kambonoay sii ko lalan o Allah, na ba kano dn oomplak ko lopa? Ino kano khasoat ko kawyagoyag ko doniya a di so akhirat? Na da ko parayasan ko kawyagoyag ko doniya, ko kipapantag iyan ko akhirat inonta na miyakaytoito.

39

O di kano sorong ko kambonoay, na ziksaan kano o Allah sa siksa a malipds, go zambi sa pagtaw a salakaw rkano; na da a mibinasa niyo Ron a mayto bo. Na so Allah na so langowan taman na Gaos Iyan.

40

O di niyo tabangi (so Rasol), na sabnar a tiyabangan skaniyan o Allah, gowani a pakaawaan o siran a da pamaratiyaya a: Ika dowa ko dowa, gowani a zisii siran a dowa ko liyang (a Jabal Tor), na samawto na gii niyan tharoon ko pd iyan (a so Abobakar) a" "Di ka pmboko, ka mataan! a so Allah na babid ta (so tabang Iyan):" Na piyakatoron on o Allah so ithatana Iyan, go tiyabangan Iyan sa manga tantara a da niyo maylay, go biyaloy Niyan so katharo o siran a da pamaratiyaya a mababa. Na so katharo o Allah na giyoto i Maporo: Na so Allah na Mabagr, a Mawngangn.

41

Sorong kano ko kambonoay, makhap sa mapnd, go panagontamann iyo so manga tamok iyo, go so manga ginawa niyo, sii ko lalan o Allah. Giyoto man i mapiya rkano, o skano na katawi niyo.

42

O adn a parayasan (a khataban) a marani go so plalakawn na mathangka, na magonot siran rka dn, na ogaid na piyakawatan kiran o lalan a malayat. Na pzapa siran dn ko Allah sa: "O miyakagaga kami, na miyapd kami niyo dn a lominiyo:" Pmbinasaan iran so manga ginawa iran; na so Allah na katawan Iyan a mataan! a siran na titho a manga bokhag.

43

Pimaapan ka o Allah! anda sabap i kiya idining ka kiran taman sa mapayag rka so siran a mimamataan: Go katokawan ka so manga bokhag?

44

Di rka phangni sa idin so siran a miyamaratiyaya ko Allah go so alongan a mawri sa ba iran di panagontamann so manga tamok iran go so manga ginawa iran. Na so Allah na katawan Iyan so khipanananggila.

45

Aya bo a phangni rka sa idin (ko kathalimbagak) na so siran a di mapaparatiyaya ko Allah go so alongan a mawri, go mizangka so manga poso iran, na siran na matataap siran ko kazasangka iran.

46

Na o miyabaya siran lomiyo, na pithiyagaran iran dn sa bagr; na ogaid na da kabayai o Allah so kapakaliyo iran; na piyakapamokl Iyan siran, na adn a mitharo: "Sa thalimbagak kano a pd o mithatalimbagak."

47

O miyapd siran rkano lomiyo, na da a khiyoman iran rkano a rowar sa kabinasa, go plagosakn iran dn so pagltltan iyo ka ipmbabanog kano iran sa samok, go adn a matatago rkano a pakapphanorimann iran. Na so Allah na katawan Iyan so manga darowaka.

48

Sabnsabnar a pimbabanog iran so samok gowani, go pikhlikhlid iran rka so manga bitiyara, - taman sa miyakaoma so bnar, go miyapayag so sogoan o Allah a siran na ikagogowad iran.

49

Na adn a pd kiran a gii tharo sa: "Idini akong ka (ko kathalimbagak) go di akong ka pagologa ko dosa." Tanodan ka miyaolog siran ko dosa, na mataan! a so naraka Jahannam na katatangkalan iyan dn so manga kapir.

50

O masogat ka a mapiya, na ikharata a ginawa iran; na o masogat ka a tiyoba, na tharoon iran a: "Sabnar a miyakatoman kami ko galbk ami gowani," na tomalikhod siran a siran na pkhakababaya.

51

Tharoang ka a: "Da dn a khisogat rkami a rowar ko inimasad o Allah a bagian ami: Skaniyan i Panarigan ami:" Na so Allah i sarigi o miyamaratiyaya.

52

Tharoang ka a: "Da a pnayawn iyo rkami a rowar ko isa ko dowa mapiya (kapakataban odi na kazahid). Na skami na nanayawn ami rkano so kasogata rkano o Allah a siksa a phoon ko hadapan Iyan, odi na nggolalan ko manga barokan ami. Na nayaw kano; ka mataan! a pd kami niyo a khinanayaw."

53

Tharoang ka a: "Pphammgay kano sa onot odi na tgl: da dn a khatarima a phoon rkano: Mataan! a skano na miyabaloy kano a pagtaw a manga songklid."

54

Na da a miyakagandawali kiran ko katarimaa kiran ko ipphammgay ran a rowar sa mataan! a siran na da iran paratiyaya so Allah ago so sogo Iyan; go di iran inggolalan so sambayang odi siran khibobokl; go di siran phammgay odi siran magogowad.

55

Na oba rka makabiray so manga tamok iran go so manga wata iran: Aya dn a kabaya o Allah na anon misabap a kasiksaa Niyan kiran sii ko kawyagoyag ko doniya, go an makaliyo so manga niyawa iran ko di iran kapaparatiyaya.

56

Na gii siran zapa ko Allah sa mataan! a pd iyo siran dn; a kna a ba niyo siran pd: Na ogaid na siran na pagtaw a pphangaalk.

57

O makatoon siran sa khalindongan, odi na manga liyang, odi na khasolkan, na magapas siran on dn, a siran na gii siran manizakay.

58

Na adn a pd kiran a taw a gii ka niyan zomann ko makapantag ko manga sadaqa: Na, o kabgi siran on, na masoat siran, na odi siran on kabgi, na samawto na siran na ganiganin siran!

59

Na opama ka mataan! a siran na miyasoat siran ko inibgay kiran o Allah ago so sogo Iyan, go iran pitharo a: "Kaa-angkosan kami o Allah! Mbgan kami dn o Allah ko kakayaan Iyan go so sogo Iyan: Mataan! a skami na so bo so Allah i phangangarapanan ami" (na giyoto i mapiya kiran)!

60

So manga zakat na aya bo a khibagian on na so pkhakamrmran, go so manga miskin, go so manga gomagalbk on; go so playamn so manga poso iran (ko bnar); go so kaaona ko khikaooripn, go so adn a manga bayadan iyan; go so sii ko lalan o Allah, go so gii mlayalayag a miyakawang sa lalan: Paliyogat a phoon ko Allah, na so Allah na Matao, a Mawngangn.

61

Na pd kiran so siran a phringasaan iran so Nabi go gi iran tharoon a: "Skaniyan na pananangila." Tharoang ka a: "Pananangila sa mapiya a bagian iyo: Paparatiyayaan iyan so Allah, go bbnarn iyan so miyamaratiyaya, go limo ko siran a miyamaratiyaya a pd rkano." Na so siran a phringasa ko sogo o Allah, na adn a bagian iran a siksa a malipds.

62

Gii siran rkano zapa ko Allah; ka ang kano iran masoat a: So Allah ago so sogo Iyan i patot a pzoasoatn iran, o siran na khipaparatiyaya.

63

Ba iran di katawi a mataan aya! a sadn sa somorang ko Allah go so sogo Iyan. Na mataan! a bagian iyan so apoy ko Jahannam? - sa matatap roo, giyoto so kahinaan a mala.

64

Ipkhawan o manga monapik oba adn a mitoron a makapantag kiran a sorah, a mapayag iyan kiran so zisii ko manga poso iran. Tharoang ka a: "Zagola kano dn zandag! ka mataan! a so Allah na phakagmawn Iyan so ipkhawan iyo (oba mapayag)."

65

Na ibt o izaing ka siran, na ptharoon iran dn a: "Skami na giya bo a gii ami kapagikayat go kanggitagita." Tharoang ka a: "Ba so Allah, go so manga ayat Iyan, go so sogo Iyan, i dii niyo pagzawzawn?"

66

Di kano dn pphamitowa a: Sabnar a miyongkir kano ko oriyan o paratiyaya niyo. O napii Ami so sabaad rkano na ziksaan Ami so sabaad, sabap sa mataan! a siran na miyabaloy siran a manga baradosa.

67

So manga monapik a manga mama, go so manga monapik a manga babay, na so sabaad kiran na pd ko sabaad: Ipzogo iran so marata, go ipzapar iran so mapiya, go gagamakn iran a manga lima iran (ka di siran phammgay). Piyakalipatan iran so Allah; na piyakalipatan siran mambo o Allah. Mataan! a so manga monapik na siran so manga pasik.

68

Inidiyandi o Allah ko manga monapik a manga mama, go so manga monapik a manga babay, go so manga kapir so apoy ko Jahannam: Makakakal siran on - giyoto i khabolosan iran: Na pimorkaan siran o Allah, go adn a bagian iran a siksa a tatap,

69

Lagid o siran a miyaonaan iyo a miyabaloy siran a lbi a mabagr a di skano, go madakl i manga tamok go manga wata (a di skano). Na siyawitan iran so kipantag iran: Na siyawitan iyo mambo so kipantag iyo, lagid o kiyasawiti o siran a miyaonaan iyo ko kipantag iran; go miyagikayat kano (sa kabokhag) lagid a kiyapagikayat iran. Siran man na miyailang so manga galbk iran sii sa doniya ago sii sa akhirat, na siran man na siran so miyangalologi.

70

Ba kiran da makatalingoma so thotholan ko miyaonaan iran?. A pagtaw o Noh, go so Ad, go so Samod; go so pagtaw o Ibrahim, go so khibabaling sa Madyan, go so miyangababaklid. Miyakatalingoma kiran so manga sogo kiran rakhs o manga rarayag a karina. Na da siran salimboti o Allah, na ogaid na siran i somiyalimbot ko manga ginawa iran.

71

Na so miyamaratiyaya a manga mama, go so miyamaratiyaya a manga babay, na so sabaad kiran na manga panarigan o sabaad: Ipzogo iran so mapiya, go ipzapar iran so marata: Go ipthindg iran so sambayang, go pthonayn iran so zakat, go phagonotan iran so Allah go so sogo Iyan. Siran man na ikhalimo siran dn o Allah: Mataan! a so Allah na Mabagr, a Mawngangn.

72

Diniyandian o Allah so miyamaratiyaya a manga mama, go so miyamaratiyaya a manga babay, sa manga sorga a pphamangondas ko kababaan iyan so manga lawasayg, makakakal siran roo, go manga darpa a manga pipiya sii ko manga sorga a tatap. Go kasosoat a phoon ko Allah a lawan roo pn: Giyoto man na skaniyan so daag a mala.

73

Hay Nabi, prangang ka so manga kapir ago so manga monapik go pakatgasing ka siran. Na darpa iran so naraka Jahannam, - a mikharatarata a khabolosan.

74

Gii siran zapa ko Allah sa da iran matharo, go sabnsabnar a pitharo iran: So katharo a kaongkir, go miyongkir siran ko oriyan o kiyambayorantang iran (ko Allah); go piyagngtan iran so (kambonoa iran ko Nabi a) da iran maparoli: Na da a inipaawing iran on a rowar sa kiyabgi kiran o Allah go so sogo Iyan ko kakawasaan Iyan. Na o thawbat siran, na mabaloy a mapiya a bagian iran; na o talikhod siran; na ziksaan siran o Allah sa siksa a malipds sii sa doniya, go sa akhirat na da a bagian iran ko lopa a panarigan go tabanga.

75

Na adn a pd kiran a miyakindiyandi ko Allah, (sa pitharo iyan a:) Ibt o bgi kami Niyan ko kakayaan Iyan, na mataan! a zasadka kami dn, go mataan! a mabaloy kami dn a pd ko manga bilangataw.

76

Na kagiya a bgan Iyan siran ko kakayaan Iyan, na inipligt iran, go tomiyalikhod siran, a siran na somasangka siran.

77

Na inakir Iyan siran ko kapmonapik sii ko manga poso iran, taman ko alongan a kimbaratmowaan iran on: - sabap ko kiyadorata iran ko Allah, ko inibgay ran on a pasad, go sabap ko kiyapamokhag iran.

78

Ba iran di katawi a mataan! a so Allah na katawan Iyan so isosoln iran go so pphamagtongaan iran, go mataan! a so Allah na katawan Iyan so da mamangipayag?

79

Siran na gi iran zodiin so gii khakapiyaan ko miyamaratiyaya, makapantag ko manga sadka, go so siran a da a khatoon iran a rowar ko (mayto a) pkhabaog iran, - na pphamagrgan iran siran, na mbadalan o Allah so kapphamagrg iran: Go adn a bagian iran a siksa a malipds.

80

Pangnin ka siran sa maap, antawaa ding ka siran phangnin sa maap, na o pangnin ka siran sa maap sa makapito polo makasoy, na di siran dn pmaapan o Allah: Giyoto man na sabap sa mataan! a siran na inongkir iran so Allah go so sogo Iyan: Na so Allah na di Niyan pnggonanaon so pagtaw a manga songklid.

81

Miyababaya so mithatalimbagak sabap ko kinibagak iran ko talikhodan o sogo o Allah: Go inikagowad iran oba iran mipanagontaman so manga tamok iran go so manga ginawa iran, sii ko lalan o Allah: Na pitharo iran a: "Di kano pagonot phrang ko kakhakayaw niyan," tharoang ka a: "So apoy ko naraka Jahannam i taralbi a mayaw opama ka siran na sasabota iran!"

82

Na khala siran sa mayto: Na sgad siran sa madakl: Balas ko miyapasad iran (a manga dosa).

83

Na opakakasoya ka o Allah ko sabaad kiran, na magodas siran rka makapantag ko kapagonot iran lomiyo (ko kaphrang), na tharoang ka a: "Di kano rakn dn makawnot lomiyo sa dayon sa dayon, go di kano rakn dn makaogop makimbonoay ko ridoay: Mataan! a skano na miyasoat kano ko kaoontod ko paganay a kiya okitan: Na oontod kano dn a pd o mithatalimbagak."

84

Na da a zambayanging ka kiran a isa bo a miyatay sa dayon sa dayon, go di ka thindg ko kobor iyan; mataan! a siran na inongkir iran so Allah go so sogo Iyan, go miyatay siran ko kasosongklid iran.

85

Na oba ka mabarayat o manga tamok iran go so manga wata iran: Aya dn a kabaya o Allah na misabap roo a kasiksaa Niyan kiran sii sa doniya, go makaliyo so manga niyawa iran ko kaoongkir iran.

86

Na igira a adn a initoron a sorah (a miyaaloy ron:) A paratiyayaa niyo so Allah go phrang kano a pd o sogo Iyan, na mangni rka sa idin so adn a manga kakawasaan iyan kiran go tharoon iran a: "Bagakn kaming ka, ka ang kami mabaloy a pd ko mithatalimbagak."

87

Miyasoat siran sa kitatapi iran ko mithatalimbagak: Na miyaparkat so manga poso iran na siran na di siran phamakasabot.

88

Ogaid na so sogo, go so miyamaratiyaya a pd iyan, na iniphrang iran so manga tamok iran go so manga ginawa iran: Na siran man na bagian iran so manga pipiya: Go siran man na siran so phamakaslang sa maliwanag.

89

Pithiyagaran siran o Allah sa manga sorga a pphamangondas ko kababaan iyan so manga lawasayg, makakakal siran on: Giyoto man so daag a mala.

90

Na miyakaoma so pphamamitowa a pd ko manga Arab, ka an siran kaydini (ko kathalimbagak); na miyamangontod so siran a piyamamokhagan iran so Allah go so sogo Iyan. Na khasogat dn so siran a miyamangongkir kiran a siksa a malipds.

91

Da ko manga lolobay, go so pkhakasakit, go so siran a da a khatoon iran a mapnggasto iran, a dosa, igira miyangoyaw siran a rk o Allah go so sogo Iyan: Da ko miphipiyapiya i lalan (ko dosa): Ka so Allah na Manapi, a Makalimoon.

92

Go da a dosa o siran a igira a miyakatalingoma siran rka, ka an ka siran katanggongi, na pitharoo ka a: "Da a khatoon ko a khitanggong akn rkano;" na tomiyalikhod siran, a so manga mata iran na pphamanoga sa lo a rata a ginawa sa di iran kaphakatoon sa mapnggasto iran.

Part 11

93

Aya bo a adn a lalan on (o dosa) na so siran a pphamangni siran rka sa idin (ko kathalimbagak) a siran na manga kawasa. Miyasoat siran sa kitatapi iran ko mithatalimbagak: Na piyarkat o Allah so manga poso iran; na siran na di manga tatao.

94

Pphamitowaan kano iran igira a miyakandod kano kiran. Tharoang ka: "Di kano pphamitowa: Ka di ami skano dn pharatiyayaan: Sabnar a piyanothol rkami o Allah so manga totholan rkano: Na pagilayn o Allah go so sogo Iyan so galbk iyo: Oriyan iyan na phakandodn kano ko (Allah a) Matao ko migagaib ago so mipapayag: Na phanotholn Iyan rkano so pinggolawla niyo"

95

Pzapa siran rkano sa ibt ko Allah, igira miyakambalingan kano kiran, ka an iyo siran katalikhodi. Na talikhodi niyo siran: Mataan! a siran na marzik, na darpa iran so naraka Jahannam, - a balas ko miyapasad iran (a manga dosa).

96

Pzapa siran rkano, ka an iyo siran karilai na o rilai niyo siran, na mataan! a so Allah na di Niyan prilaan so pagtaw a manga songklid.

97

Adn a manga Arab a mabagr i kaongkir go kapanangin, go dait a di iran katawi ko manga taman o initoron o Allah ko sogo Iyan: Na so Allah na Matao, a Mawngangn.

98

Na adn a pd ko manga Arab a taw a babalowin iyan so mipphammgay niyan a ilang, go nanayawn iyan rkano so kapphangasasalin o masa: Sii kiran so kapkhasalin o masa a marata: Na so Allah na Pphakan'g, a Matao.

99

Na adn a pd ko manga Arab a paparatiyayaan iyan so Allah go so alongan a mawri, go babalowin iyan so mipphammgay niyan a ipphamakarani sii ko Allah go so manga pangni o Rasol. Ba di mataan! a skaniyan na iphakarani ran (ko Allah): Phakasoldn siran dn o Allah ko limo Iyan: Mataan! a so Allah na Manapi, a Makalimoon.

100

Na so manga paganay a miyangaoona ko manga Mohajirin go so manga Ansar go so siran a miyamakatondog kiran ko kaphiyapiya, - na miyasoat kiran so Allah, go miyasoat siran on (mambo): Na pithiyagaran Iyan siran sa manga sorga a pphamangondas ko kababaan iyan so manga lawasayg, makakakal siran on sa dayon sa dayon: Giyoto man so daag a mala.

101

Na adn a pd ko makaliliyot rkano ko manga Arab a pphamanangin, go so sabaad ko taw sa Madinah: Na miyanamar siran ko kapmonapik: ding ka siran katawan: Skami i Matao kiran: Ziksaan Ami siran dn sa makadowa: Oriyan iyan na phozangn siran ko siksa a mala.

102

Na adn a manga pd a inipagikral iran so manga dosa iran: Piyakazaog iran so galbk a mapiya, go so pd a marata. Matatangkd a so Allah na phakatawbatn Iyan siran: Mataan! a so Allah na Manapi, a Makalimoon.

103

Kowa ka ko manga tamok iran sa sadaqah, a misoting ka kiran; go kasabapan sa kapakaozorang ka kiran; na pangnin ka siran. Mataan! a so pangning ka na kalilintad a bagian iran: Na so Allah na Pphakan'g, a Matao.

104

Ba iran di katawi a mata an! a so Allah na Skaniyan so ptharima ko tawbat phoon ko manga oripn Iyan go ptharima ko manga sadaqah, go mataan! a so Allah na Skaniyan so pphanarima ko tawbat, a Makalimoon?

105

Na tharoang ka a: "Nggalbk kano, ka pagilayn o Allah go so sogo Iyan go so miyamaratiyaya so galbk iyo: Na phakandodn kano dn ko (Allah a) Matao ko migagaib, go so mipapayag: Na phanotholn Iyan rkano so pinggolawla niyo."

106

Na adn a manga pd, a pakidadara kiran o kokoman o Allah, o siksaa Niyan siran, antawaa pakatawbatn Iyan siran: Na so Allah na Matao, a Mawngangn.

107

Na so siran a mimbalay sa masjid a kapaminasa, go kaongkir go an maomparik so miyamaratiyaya, go ipphagipat ko taw a romirido ko Allah go so sogo Iyan gowani. Na mataan! a gii siran zapa: da a antap ami a rowar ko mapiya; na zasaksi an o Allah a mataan! a siran na titho a manga bokhag.

108

Di ka on pzambayang sa dayon sa dayon. Mataan! a so masjid a pimbalay makapantag ko kapangongonotan (ko Allah) ko paganay a gawii; na aya patot a rong ka zambayang. Katatagoan sa manga mama a pkhababayaan iran a kasoti ran; na so Allah na pkhababayaan Iyan so manga barasoti.

109

Ino so taw a pimbalay niyan so walay niyan makapantag sa onot ko Allah go so kasosoat Iyan aya mapiya? - antawaa so taw a pimbalay niyan so walay niyan ko kilid o thbaan a pkhatbar, na miyaolog iyan ko apoy ko Jahannam na so Allah na di Niyan pnggonanaon so pagtaw a manga darowaka.

110

Di khada so walay ran a so pimbalay ran, kasangka a madadalm ko manga poso iran, odi mazaropt so manga poso iran. Na so Allah na Matao, a Mawngangn.

111

Mataan! a so Allah na piyamasa Niyan ko miyamaratiyaya so manga ginawa iran go so manga tamok iran; sa mataan! a rk iran so sorga: Gii siran makimbonoay sa lalan ko Allah, na pphakapatay siran go pkhaprang siran: Diyandi Iyan aya a di pndorat, a zisii ko Tawrat, ago so Injil, go so Qor'an: Na ba adn a taw a makalawan ko Allah a tomotoman ko diyandi Iyan? Na pakapipiyaa niyo a ginawa niyo sabap ko dagangan iyo a so piphasa niyo to (ko Allah): Ka giyoto man so daag a mala.

112

(Siran) So manga baratawbat; a manga barasimba, a khipananalamat; a manga barapowasa, pphroroko, a pphamanodiod, a pphamanogo ko mapiya, pphanapar ko marata, go khisisiyapn iran so manga taman o Allah; na pphamanotholing ka sa mapiya so miyamaratiyaya.

113

Da mapatot ko Nabi go so miyamaratiyaya, i ba iran pangnin sa maap so manga pananakoto, apiya pn i katotonganay ran on, ko oriyan o kiyapayag iyan kiran sa mataan! a siran na manga taw ko naraka Jahim.

114

Na aya bo a kinipangnin sa maap o Ibrahim ki ama iyan na sii bo ko diyandi a inidiyandi iyan on. Na kagiya a mapayag on a mataan! a skaniyan na ridoay o Allah, na tiyaplis iyan skaniyan: Mataan! a so Ibrahim na lalayon makaphphaginao, a matigr.

115

Na da ko btad o Allah o ba adn a dadagn Iyan a pagtaw ko oriyan o masa a kiyatoroa Niyan kiran, taman sa di Niyan kiran mapayag so phananggilaan iran. Mataan! a so Allah na so langowan taman na katawan Iyan.

116

Mataan! a so Allah na rk Iyan so kapaar ko manga langit ago so lopa. Pphangoyag go pphangimatay. Na da a bagian iyo a salakaw ko Allah a Panarigan go da a tabanga.

117

Sabnsabnar a piyakatawbat o Allah so Nabi, go so manga Mohajirin, go so manga Ansar, - a siran so miyamangonot on ko oras a margn (ko kiyaphrang sa Tabok), ko oriyan o masa a mayto bo na khapaling so manga poso o salompok kiran; oriyan iyan na piyakatawbat Iyan siran: Mataan! a Skaniyan i mala kiran i gagaw, a Makalimoon.

118

Go (piyakatawbat Iyan) so tlo kataw a siran so minibagak; taman sa samawto na piyakasimpit kiran o lopa so kawlad iyan, go kiyangtan kiran so manga ginawa iran, - na tiyangkd iran a da a kaphagapasan phoon ko Allah a inonta Skaniyan. Oriyan iyan na niyapiyan Iyan siran, ka an siran makatawbat: Mataan! a so Allah na Skaniyan i Pphanarima ko tawbat, a Makalimoon.

119

Hay miyamaratiyaya, kalkn iyo so Allah go tapi kano ko mimamataan.

120

Da mapatot ko taw sa Madinah go so taw a makaliliyot kiran ko manga Arab, i ba siran thalimbagak ko oriyan o sogo o Allah, go ba iran matomo so manga ginawa iran a di so ginawa niyan: Giyoto man na sabap sa mataan! a siran na da a khisogat kiran a kawaw, go da a dokaw, go da a ongos sii ko lalan o Allah, go da a kaphanadaan iran a darpa a ikhararangit o manga kapir, go da a khisogat iran ko ridoay a ringasa a ba di misorat a bagian iran sa sabap roo a galbk a mapiya; mataan! a so Allah na di Niyan pagilangn so balas ko miphipiyapiya;

121

Go da a mapnggasto iran a gasto mayto ago mala, go da a khatarapas iran a balintad, a ba di misorat (a balas) a bagian iran; ka imbalas kiran o Allah so mapiya ko pinggolawla iran.

122

Na da mapakay ko miyamaratiyaya i ba siran liyo langon: Na ino da liyo ko oman i salompok kiran so sabaad, ka an iran pkhasaboti so agama, go an iran mipphamakaiktiyar ko pagtaw iran igira miyakandod siran kiran, ka an siran makaiktiyar?

123

Hay miyamaratiyaya, pakimbonoay kano ko siran a makaoobay rkano ko manga kapir, go pakigdaan iyo kiran a adn a katgas iyo: Na tangkda niyo a mataan! a so Allah na babid o (tabang Iyan so) khipananangila.

124

Na igira a adn a initoron a sorah, na adn a pd kiran a taw a gii tharo sa: "Antawaa rkano i miyakawman on nai sa paratiyaya?" Na so siran a miyamaratiyaya, na miyakawman kiran sa paratiyaya, a siran na pkhababaya siran.

125

Na so siran a katatagoan so manga poso iran sa gdamn, na ba kiran dn miyakawman sa kaongkir ko andang a kaoongkir iran, go miyamatay siran a kapapantagan siran a manga kapir.

126

Ba iran di khaylay a mataan! a siran na pthiyobaan siran ko oman ragon sa makaysa odi na makadowa? Oriyan iyan na di siran pthawbat, go di siran phakatadm.

127

Na igira adn a initoron a sorah, na tntngan o sabaad kiran so sabaad (sa tharoon iyan a): "Ba adn a pphakaylay rkano a isa bo?" Na oriyan iyan na tomalikhod siran: Na piyakatalikhod o Allah so manga poso iran; sabap sa mataan! a siran na pagtaw a da a manga sabot iran.

128

Sabnsabnar a adn a miyakaoma rkano a sogo a pd ko manga ginawa niyo a awid a akal iyan so margn iyo: Mala rkano so sambatan: Sii ko miyamaratiyaya mala i kapdi, a Makalimoon.

129

Na o talikhod siran, na tharoang ka a: "Kasasanaan ko so Allah: da a tohan a salakaw Rkaniyan: Ron ako somiyarig, - ka Skaniyan i Khirk ko kapaar a mala!"

Total Number of Verses: 109

1

Alif, Lam, Ra. (so Allah i Matao ko paka-aantapan Iyan on.) Giyaya so manga ayat ko kitab a pimbaibaitan.

2

Ino khabaloy ko manga manosiya a pakammsa a kiyailahami Ami ko mama a pd kiran? (sa pitharo on a:) Pamakaiktiyarang ka so manga manosiya, go pamanotholang ka ko siran a miyamaratiyaya a: Mataan! a adn a bagian iran a pangkatan a maporo sii ko Kadnan iran. Pitharo o da pamaratiyaya a: "Mataan aya! a titho a balik mata a mapayag!"

3

Mataan! a aya Kadnan iyo na so Allah, so miyadn ko manga langit ago so lopa sii ko miyakanm alongan, oriyan iyan na mithakna ko aras, thatandingann Iyan so mambbtad. Da a makaphanapaat inonta ko oriyan o idin Iyan. Giyoto man so Allah a Kadnan iyo; na zoasoata niyo Skaniyan: Ino kano di phananadm?

4

Ron kano phakandod langon. Diyandi o Allah a bnar. Mataan! a Skaniyan i pphanagipoon ko kapphangadn, oriyan iyan na khasowin Iyan (madn), ka mbalasan Iyan so miyamaratiyaya, go pinggalbk iran so manga pipiya sa kaontol; na so siran a da pamaratiyaya na adn a bagian iran a inomn a phlikabo, go siksa a malipds, sabap ko da iran kaparatiyaya.

5

Skaniyan so mimbaal ko alongan a masindaw go so olan a maliwanag, na diniyangka Iyan oto ko manga darpa, ka an iyo katokawi so manga bilangan o manga ragon go so itongan. Da ko kiya adna saya o Allah inonta na sabap ko bnar. Gii Niyan zmpadn magosay so manga tanda ko pagtaw a khitotomangkd.

6

Mataan! a adn a matatago ko gii kapakazambi o gagawii ago so dawndaw, go so inadn o Allah ko manga langit ago so lopa, a titho a manga tanda ko pagtaw a khipanananggila.

7

Mataan! a so siran a di iran ikhalk so kimbaratmowaan Rkami, go miyatomo iran so kawyagoyag ko doniya, go miyasoat siran on, go siran na siran na so manga ayat Ami na pakalilipatan iran,

8

Na siran man na darpa iran so naraka, sabap ko pinggalbk iran.

9

Mataan! a so siran a miyamaratiyaya, go pinggalbk iran so manga pipiya, - na thoroon siran o Kadnan iran (ko sorga) sabap ko paratiyaya iran: Pphamangondas ko kababaan iran so manga lawasayg sii ko manga sorga a pakalma.

10

Aya pangni ran roo na: "Soti Ka, ya Allah!" Na aya gi iran roo ikhokormata na: "Salaam!" Na aya mori ko pangni ran: "Na so podi na rk o Allah, a Kadnan o manga kaadn!"

11

Na opama ka pnggagaani o Allah ko manga manosiya so marata, lagid o gii Niyan kiran kanggagaani ko mapiya, - na mininggolalan kiran dn so taalik kiran (ko kabinasa). Na bobotawanan Ami so siran a di iran ikhalk so kimbaratmowaan Rkami ko kadadadag iran, a gii siran mromparompak.

12

Na igira a minisogat ko manosiya so morala, na mangni Rkami ko kaiiga iyan, odi na moontod, odi na gomaganat. Na kagiya a pokasn Ami ron so morala rkaniyan, na initaros iyan dn (so kaoongkir iyan), lagid o da Rkami pangni ko morala a minisogat on. Lagid aya man a kiyapharasi ko manga malawani ko pinggolawla iran!

13

Na sabnsabnar a bininasa Mi so miyagapidapid a pagtaw ko miyaonaan iyo gowani a ndarowaka siran, a minitalingoma kiran o manga sogo kiran so manga rarayag a karina, na da siran paratiyaya. Lagid aya man a kambalasi ami ko pagtaw a manga rarata i ongar!

14

Oriyan iyan na biyaloy Ami skano a miyamakasambi ko lopa ko oriyan iran, ka pagilayn Ami o antonaa i pnggolawlaan niyo!

15

Na igira a pphangadian kiran so manga ayat Ami, a manga rarayag, na gii tharoon o siran a di iran ikhalk so kimbaratmowaan Rkami a: "Bgay ka sa pphangadian, a salakaw sii, odi na sambiing ka skaniyan;" tharoang ka (ya Mohammad) a: "Di rakn khapatot oba ko sambii skaniyan phoon ko pantag ko ginawa ko: da a pagonotan ko a rowar ko iphagilaham rakn: Mataan! a sakn na ikhalk akn amay ka sorangn ko so Kadnan ko, so siksa ko alongan a mala."

16

Tharoang ka a: "Opama ka kabaya o Allah, na di ko rkano aya kapangadian, go di Niyan rkano aya pakitokawan. Na sabnar a miyathay ako rkano ko kawyagoyag akn ko dapn aya: Ba da a sabot iyo?"

17

Na ba adn a lawan a darowaka ko taw a inangkob iyan so Allah sa kabokhag, odi na piyakambokhag iyan so manga ayat Iyan? Mataan aya! a di phakaslang sa maliwanag so manga rarata i ongar.

18

Na pzimbaan iran a salakaw ko Allah, so di kiran phakabinasa, go di kiran phakaompiya, go gi iran tharoon a: "Siran aya na phamakaogop rkami sii ko Allah." Tharoang ka: "Ba adn a phanotholn iyo ko Allah a di Niyan katawan, sii ko manga langit ago so lopa? - Soti Skaniyan! go maporo a kaa-awat Iyan ko ipphanakoto iran On!"

19

Na da a kiya adna ko manga manosiya a rowar ko okit a isa, na da siran pagayonayon. Na o da so katharo a miyaona a phoon ko Kadnan ka, na miyakokom siran dn ko di iran phagayonayonan.

20

Na gi iran tharoon a: "Ino a da a initoron on a tanda a phoon ko Kadnan Iyan?" Na tharoang ka a: "So migagaib na aya bo a phapaar on na so Allah. Na nayaw kano: Ka mataan! a sakn na pd ako niyo a pd ko khinanayaw."

21

Na igira a piyakataam Ami so manga manosiya sa limo ko oriyan o morala a minisogat kiran, na samawto na adn a antangan iran a marata ko manga ayat Ami. Tharoang ka a: "So Allah i magaan (i kabadal) ko antangan a marata." Mataan! a so manga sogo Ami (a manga malaikat) na ipzorat iran so pphagantangann niyo!

22

Skaniyan so pphakalalakawn kano Niyan ko kalopaan go so kalodan; taman sa igira a miyakada kano ko kapal; - go Niyan siran ktasn sabap ko ndo a manawt, na mababaya siran sa sabap roo; na mawma siran a ndo a mabagr go siran dansali o bagl a phoon ko mbalabala, na matangkd iran a mataan! a siran na kiyatangkalan siran: Na mangni siran ko Allah, sa tolabosn iran On so kapangni sa: "Ibt o sabta kaming Ka sii, na mataan! a mabaloy kami dn a pd ko miyamanalamat!"

23

Na kagiyaa sabtn Iyan siran, na samawto na siran na pphanganiyaya siran ko lopa sa di antol. Hay manga manosiya, so kapphanganiyaya niyo na sii bo phakatana ko manga ginawa niyo, - sawiti niyo sa di mathay so kawyagoyag ko doniya: Oriyan iyan na sii kano Rkami phakandod, na phanotholn Ami rkano so pinggolawla niyo.

24

Aya dn a ibarat o kawyagoyag ko doniya na lagid o ig a piyakatoron Ami skaniyan a phoon ko kawang: Na minisabap on a kiyapakazaosaog o mangngto ko lopa, pd on so pkhakan o manga manosiya, go so manga ayam: Taman sa igira a miyanditar o lopa so parayasan iyan go kapharasan: Na maantang o khirk on a mataan! a siran na khaparoli ran (so gona on): Na makatalingoma on so sogoan Ami ko kagagawi odi na kadawndaw, na balowin Ami oto a lagid o piragon, lagid oba da maadn kagai! Lagid aya a gii Ami kazmpada magosay ko manga tanda ko pagtaw a pphamimikirann iran.

25

Na so Allah na ipthawag Iyan so (sorga a) ingd a kalilintad: Go thoroon Iyan so taw a kabaya Iyan ko okit a makaoontol.

26

Bagian o siran a miphipiyapiya so mapiya, go adn a ipagoman on! Na di kakoloban so manga paras iran sa maytm ago kahinaan. Siran man i manga taw ko sorga; siran na ron siran on dn makakakal!

27

Go adn a bagian o siran a minggagalbk ko manga rarata a balas a marata, a lagid iyan: Go kakoloban siran sa kahinaan: da a makalinding kiran ko (siksa o) Allah: Lagid oba kiyakoloban so manga paras iran, sa sabaad ko gagawii a miyangirngkirm: Siran man i manga taw ko naraka: Siran na ron siran on dn makakakal!

28

Na sii ko alongan a kalimoda Ami kiran langon; oriyan iyan na tharoon Ami ko siran a miyamanakoto a: "(Ggnk kano ko) Darpa iyo! Skano ago so inipamanakoto niyo." Na pakazsnggayaan Ami siran, na tharoon o inipamanakoto iran: "Da ami rkano sogoon a kiyasimbaa niyo rkami!"

29

Na kiyasanaan so Allah a saksi rkami ago sii rkano: "Mataan! a aya btad ami na di ami dn katawan i kapzimbaa niyo rkami!"

30

Roo dn katpngi o oman i isa a ginawa so miyanggalbk iyan: Na pakandodn siran ko Allah a Kadnan iran a Bnar, na makawatan kiran so piyangmbaalan iran a kabokhag.

31

Tharoang ka: "Antawaa i pmbgay rkano sa pagpr a phoon ko kawang go so lopa? Ino antawaa i makapapaar ko kan'g go so manga kaylay? Go antawaa i pphakagmaw ko oyagoyag a phoon ko miyatay? Go antawaa i pphakagmaw ko miyatay a phoon ko oyagoyag? Go antawaa i gii ndiyator ko pkhawlawla?" Na ptharoon iran dn a: "So Allah." Na tharoang ka a: "Ino niyo di khalkn?"

32

Na giyoto man so Allah, a Kadnan iyo a Bnar: Na da a oriyan o bnar, inonta so ribat; na andamanaya i kapthalikhod iyo?

33

Lagid aya a kiyatangkd o katharo o Kadnan ka ko siran a miyamanongklid: Mataan! a siran na di siran mapaparatiyaya.

34

Tharoang ka a: "Ba adn a pd ko ipphamanakoto niyo a taw a pphanagipoon ko kapangadn, oriyan iyan na khasowin Iyan (madn)?" Tharoang ka a: "So Allah i pphanagipoon ko kapangadn, oriyan iyan na khasowin Iyan (madn): Na andamanaya i kapthalikhod iyo?"

35

Tharoang ka a: "Ba adn a pd ko ipphamanakoto niyo a taw a phakatoro ko bnar?" Tharoang ka a: "So Allah i phakatoro ko bnar. Ino so phakatoro ko bnar, aya patot a onotan antawaa so di niyan khatoon so lalan odi toroa? Na ino kano wai? Andamanaya i kipkhokomn iyo (ko ribat)?"

36

Na da a phagonotan o kadaklan kiran a rowar sa arangan: Mataan! a so arangan na da a khibgay niyan a gona ko bnar a mayto bo. Mataan! a so Allah na katawan Iyan so gii tano nggolawlaan.

37

Na da ko btad angkai a Qor'an oba giimbabaasa a phoon ko salakaw ko Allah; na ogaid na initanto ko miyaonan iyan (a manga kitab), go iniosay ko manga kokoman, da a sangka a madadalm on, a phoon ko Kadnan o manga kaadn.

38

Ino iran gii tharoa a: "Pimbabaas skaniyan (o Mohammad)?" Tharoang ka a: "Bgay kano sa sorah a lagid iyan, go panongganoy kano sa sadn sa khagaga niyo a salakaw ko Allah, o skano i manga bnar!"

39

Kna, ka piyakambokhag iran so da iran szba so katao rkaniyan, go da kiran pn makatalingoma so taawil iyan: Lagid aya so kiyapakambokhaga o siran a miyaonaan iran (ko manga kitab): Na pamimikiranang ka so miyambtad o kiya akiran ko manga darowaka!

40

Na adn a pd kiran a taw a mapaparatiyaya on, go adn a pd kiran a taw a di ron mapaparatiyaya: Na so Kadnan ka i Matao ko pphamaminasa.

41

Na oba ka iran pakapmbokhaga, na tharoang ka a: "Rk akn so galbk akn, na rk iyo so galbk iyo! Skano na angiyas kano ko gii ko nggalbkn, na sakn na angiyas ako ko gii niyo nggalbkn!"

42

Na adn a pd kiran a taw a pphamamakin'gn ka iran: Ino ska, maphakan'g ka so manga bngl, - apiya pn siran na da a manga sabot iran?

43

Go adn a pd kiran a taw a phagilaing ka niyan: Ino ska, khatoroo ka so manga bota, - apiya pn siran na di siran phamakanono?

44

Mataan! a so Allah na di Niyan zalimbotan so manga manosiya sa mayto bo: Na ogaid na so manga manosiya i pzalimbot ko manga ginawa iran.

45

Na sii ko alongan a kalimoda Niyan kiran: Na lagid oba da a minitarg iran (ko doniya) a rowar ko isa ka oras ko kadawndaw: Sa makakhikilalai siran: Sabnar a miyalogi so siran a piyakambokhag iran so kimbaratmowaan ko Allah, go da siran makakdg sa ontol.

46

Na amay ka pakiilay Ami rka so sabaad ko ididiyandi Ami kiran (a siksa), - odi na tangann Ami ska, na sii siran Rkami bo phakandod: Oriyan iyan na so Allah i Saksi ko gi iran nggolaawlaan.

47

Na oman i pagtaw na adn sogo on: Na amay ka makawma so sogo kiran, na kokomn siran sa ontol, a siran na di siran kasalimbotan.

48

Na gi iran tharoon a: "Anda dn angkai a diyandi, - o skano na mmamataan kano?"

49

Tharoang ka a: "Da a mipapaar akn a rk o ginawa ko a kabinasa, ago da a ompiya inonta sa kabaya o Allah. Adn a rk o oman i pagtaw a taalik: Na igira miyakaoma so taalik kiran, na di iran khisndod sa isa ka oras, go di iran khaktng."

50

Tharoang ka: "Ay gda iyo, amay ka makatalingoma rkano so siksa Iyan ko gagawii, odi na dawndaw, antonaa pn i pnggagaanan on o manga rarata i ongar?"

51

"Ino a sa oriyan iyan na igira a miyakatana (so siksa) na pharatiyayaan iyo bo? Ino a imanto bo (i kapharatiyaya niyo) a sabnar a giyaya so pphagalokalokan niyo?"

52

Oriyan iyan na tharoon ko siran a da pamaginontolan: "Taami niyo so siksa a tatap! Da a imbalas rkano a rowar ko pinggalbk iyo!"

53

Na pakiphanothol iran rka: "Ino bnar skaniyan?" Tharoang ka: "Oway! Ibt ko Kadnan ko! ka mataan! aya a titho a bnar! na di niyo dn khapalagoyan!"

54

Na opama ka mataan! a rk o oman i isa a ginawa, a da paginontolan, so nganin a zisii ko lopa (langon) na mataan! a iyaon iyan oto sa ginawa niyan: Na misoln iran so kazndit ko masa a kasandngi ran ko siksa: Na makokom siran sa ontol, a siran na di siran kasalimbotan.

55

Ba di mataan! a rk o Allah so nganin a zisii ko manga lagit ago so lopa? Ba di mataan! a so diyandi o Allah na bnar? Na ogaid na so kadaklan kiran na di iran katawan.

56

Skaniyan i pphangoyag go pzabap ko kapatay, go Ron kano phakandoda.

57

Hay manga manosiya, sabnar a adn a miyakaoma rkano a thoma a phoon ko Kadnan iyo, go bolong ko nganin a zisii ko manga rarb, go toroan, go limo ko miyamaratiyaya (a giya Qor'an aya).

58

Tharoang ka a: "Sabap ko gagaw o Allah, go sabap ko limo Iyan, na sabap roo na pakapipiyaa iran a ginawa iran:" Ka giyoto i tomo, a di so pphanimoon iran.

59

Tharoang ka: "Ay gda iyo ko initoron rkano o Allah a pagpr? Na biyaloy niyo to a haram go halal. Tharoang ka: Ba rkano inisogo o Allah, antawaa phagangkobn iyo so Allah?"

60

Na antonaa i arangan o siran a iphagangkob iran ko Allah so kabokhag (ko khabolosan iran), ko alongan a qiyamah? Mataan! a so Allah na titho a Malai-gagaw ko manga manosiya, na ogaid na so kadaklan kiran na di siran phanalamat.

61

Na da a khatagoan rka a btad, go da a kaphangadian ka ko Qor'an, go da a mapnggalbk iyo a galbk, a ba di Skami i manga Saksi rkano ko masa a gii niyo ron kinggolalann. Na da a makaphagma ko Kadnan ka a timbang bo o kolpong sii ko lopa, go sii ko langit; go da a mayto a di giyoto go da a mala, a ba di matatago ko (Laoh Mahfodh a) kitab a mapayag.

62

Tanodan ka mataan! a so manga tabanga o Allah na da a pangandam iran, go di siran makamboko (ko alongan a mawri);

63

Siran na miyamaratiyaya, go miyamananggila;

64

Bagian iran so mapiya a tothol, ko kawyagoyag ko doniya, go so akhirat: Di khasambian so manga katharo o Allah. Giyoto man na skaniyan so daag a mala.

65

Na oba ka mapakamboko o katharo iran: Mataan! a so mnang na rk o Allah langon: Skaniyan so Pphakan'g, a Matao.

66

Tanodan ka mataan! a rk o Allah so zisii ko manga langit go so zisii ko lopa. Na da ko phagonotan o siran a pphanongganoy siran sa salakaw ko Allah oba manga sakotowa (o Allah); da a phagonotan iran a rowar ko arangan, ka ba siran dn dii pangsar.

67

Skaniyan so miyadn rkano ko gagawii, ka ang kano ron pphakadkha, go so dawndaw a pphakabgay sa maliwanag. Mataan! a adn a matatago roo man a titho a manga tanda ko pagtaw a pphamamakin'g siran.

68

Pitharo iran a: "Kominowa so Allah sa wata Iyan!" Soti Skaniyan! Skaniyan na da a mapkhno Niyan! Rk Iyan so zisii ko manga langit go so zisii ko lopa. Da a karina niyo saya! Ino niyo gii tharoa makapantag ko Allah so di niyo katawan?

69

Tharoang ka a: "Mataan! a siran a iphagangkob iran ko Allah so kabokhag na di siran makaslang sa maliwanag."

70

Matag sagad so kapphagintaw iran ko doniya! - oriyan iyan, na sii siran Rkami phakandod. Na oriyan iyan na pakitaaman Ami kiran so siksa a sangat sabap ko kiya ongkir iran.

71

Na pangadiing ka kiran (ya Mohammad) so totholan ko Noh. Gowani na pitharo iyan ko pagtaw niyan: "Hay pagtaw akn, oba rkano mippnd so katatago akn rkano go so kapphakitadmi akn (rkano) ko manga ayat o Allah, na so bo so Allah i siyarigan ko. Na tkhsa niyo i pnggolawlaan iyo rakhs o ipphamanakoto niyo, oriyan iyan na di kakndongan rkano so pnggolawlaan iyo; na oriyan iyan na dansaln iyo rakn, sa di niyo rakn dn thaalika."

72

"Na o talikhod kano, na da a piyangni akn rkano a sokay: da a sokay akn inonta so zisii ko Allah, na inisogo rakn a kabaloy akn a pd ko mimbabayorantang (ko Allah)."

73

Na piyakambokhag iran skaniyan, na siyabt Ami skaniyan, ago so manga pd iyan ko kapal, go biyaloy Ami siran a miyamakasambi (ko lopa), na inld Ami so siran a piyakambokhag iran so manga ayat Ami. Na pamimikiranang ka so miyambtad o kiya akiran ko piyamakaiktiyar (a da dn paratiyaya)!

74

Oriyan iyan na siyogoan Ami ko kiyaipos iyan sa manga sogo so pagtaw iran: Na minioma iran kiran so manga rarayag a karina, na da iran dn paratiyayaa so piyakambokhag iran gowani. Lagid aya a kapthotopi Ami ko manga poso a manga malawani.

75

Oriyan iyan na siyogo Ami ko kiyaipos iran so Mosa ago so Haron ko Pir'awn ago so manga olowan ko pagtaw niyan rakhs o manga tanda Ami. Na ba siran dn mimaratabat: Go miyabaloy siran a pagtaw a manga baradosa.

76

Na kagiya a makawma kiran so bnar a phoon ko hadapan Ami, na pitharo iran: "Mataan aya! a titho a balik mata a mapayag!"

77

Pitharo o Mosa: "Ino niyo gii tharoa ko bnar ko wakto a kiyapakawma niyan rkano (i balik mata)? Ino, balik mata ini? Na di phakaslang sa maliwanag so manga balik mata."

78

Pitharo iran: "Ba aya kiyapakatalingomang ka rkami na phakiawaan ka rkami so kpit a miyatoon ami ron so manga loks ami, go an iyo makowa a dowa so kapaar ko lopa? Na di ami skano pharatiyayaan!"

79

Na pitharo o Pir'awn a: "Wita niyo rakn so langowan o balik mata a mapasang."

80

Na kagiya a makawma so manga balik mata, na pitharo kiran o Mosa: "Ithogn iyo i ipagithog iyo! "

81

Na kagiya a mithog siran, na pitharo o Mosa a: "So minitalingoma niyo na balik mata: Mataan! a so Allah na phrataan Iyan dn oto: Mataan! a so Allah na di Niyan pakaphamtsn so galbk o pphamaminasa. "

82

"Na thanton o Allah so bnar sabap ko manga katharo Iyan, apiya miyagowad so manga rarata i ongar!"

83

Na da a miyamaratiyaya ko Mosa a rowar ko moriyataw a sabala ko pagtaw (o Pir'awn), makapantag sa kalk ko Pir'awn ago so manga nakoda kiran, sa ba niyan siran pangarasii; na mataan! a so Pir'awn na titho a mangangarasi ko lopa, go mataan! a skaniyan na pd dn ko manga malawani.

84

Na pitharo o Mosa: "Hay pagtaw akn! o skano na piyaratiyaya niyo so Allah, na skaniyan bo i sarigi niyo o skano na mbabayorantang kano."

85

Na pitharo iran a: "So Allah i siyarigan ami. Kadnan ami, di kaming Ka mbaloya a pangangarasiyan o pagtaw a manga darowaka;"

86

"Go sabap ko limoo Ka na pokasa kaming Ka ko pagtaw a miyamangongkir."

87

Na iniilaham Ami ko Mosa ago so pagari niyan a: "Mbaal kano sa rk o pagtaw niyo sa manga walay sa Misir, go tagoi niyo so manga walay niyo sa gii zambayangan, go pamayandgn iyo so sambayang: Na pphamanotholing ka sa mapiya so miyamaratiyaya!"

88

Na pitharo o Mosa: "Kadnan ami, mataan! a Ska na bigan Ka so Pir'awn go so manga olowan ko pagtaw niyan sa parahiyasan go manga tamok ko kawyagoyag ko doniya, Kadnan ami! kagiya a mapphakasilay ran (so manga manosiya) phoon ko lalan Ka; Kadnan ami! Na ilangang Ka so manga tamok iran, go pakatgasang Ka so manga poso iran, ka di siran pharatiyaya taman sa di iran kasandngan so siksa a malipds."

89

Pitharo (o Allah) a: "Sabnar a tiyarima so pangni niyo a dowa! Na paginontolan kano go di niyo khdga so lalan o siran a da a manga mlng iran."

90

Na piyakaripag Ami so manga moriyataw o Israil ko kalodan: Na siyaloba siran o Pir'awn ago so manga tantara iyan sa kapangakowala ago kapangarasi; taman sa kagiya a raotn skaniyan o kald, na miyatharo iyan a: "Piyaratiyaya ko a mataan aya! a da a tohan a inonta so piyaratiyaya skaniyan o manga moriyataw o Israil: Go sakn na pd ko mimbabayorantang (ko Allah)"

91

(Pitharo on:) "Ino a imanto bo (i kapharatiyayang ka)! a sabnar a somiyangka ka gowani? Go miyabaloy ka a pd ko miyamaminasa!"

92

"Na sa alongan nai na zabtn Ami ska sa sobo so lawas ka, ka angka mabaloy a tanda o taw a phakasalono rka!." Na mataan! a madakl ko manga manosiya a so manga tanda Ami na titho a pakalilipatan iran!

93

Na sabnsabnar a piyakapagingd Ami so manga moriyataw o Israil ko phagingdan a mapiya, go rinizkhiyan Ami siran sa manga pipiya: Na da siran zoransorang taman ko kiyapakawma kiran o katao. Mataan! a so Kadnan ka na khokomn Iyan siran sa alongan a qiyamah ko da iran pagayonayoni.

94

Na oba ka zasangka ko initoron Ami rka (ya Mohammad), na izaing ka so pphamangadi ko kitab a miyaonaan ka: Sabnsabnar a miyakaoma rka so bnar a phoon ko Kadnan ka: Na oba ka mabaloy a pd ko pkhakadowadowaan.

95

Go oba ka mabaloy a pd ko siran a piyakambokhag iran so manga ayat o Allah, ka mabaloy ka a pd ko miyangalologi.

96

Mataan! a siran a miyatangkd kiran so katharo o Kadnan ka na di siran pharatiyaya,

97

Apiya pn makawma kiran so langowan o tanda, taman sa di iran kasandngan so siksa a malipds.

98

Na ino a da a miyaadn a phagingd a miyaratiyaya, (ko kiya ilaya iran ko siksa), - na miyakanggay ron a gona so paratiyaya niyan, - a rowar ko pagtaw o Yonos? Na kagiya a maratiyaya siran, na piyokas Ami kiran so siksa a kapakarondan ko kawyagoyag ko doniya, na piyakasawit Ami siran ko kapagintaw taman ko wakto (o kapatay).

99

Na o kabaya o Kadnan ka, na mataan! a makaparatiyaya so taw ko lopa, - sa tanan siran langon. Bang ka khatgl so manga manosiya, taman sa mabaloy siran a miyamaratiyaya?

100

Na di phaarn o baraniyawa so kapakaparatiyaya niyan, inonta o sabap sa idin o Allah, na iznggay Niyan so siksa ko siran a da a manga sabot iran.

101

Tharoang ka a: "Pamimikirana niyo so matatago ko manga langit ago so lopa; na di phakanggay a gona so manga ayat go so pphamakaiktiyar ko pagtaw a di phamaratiyaya."

102

Na ba adn a pnayawn iran a rowar ko lagid o manga gawii o siran a miyangaiipos ko miyaonaan iran? Tharoang ka a: "Nanayaw kano ka mataan! a sakn na pd iyo a pd ko khinanayaw."

103

Oriyan iyan na pzabtn Ami so manga sogo Ami ago so miyamaratiyaya: Lagid aya a kabnar Rkami a kasabta mi ko miyamaratiyaya!

104

Tharoang ka: "Hay manga manosiya, oba kano zasangka ko okit akn, na di akn pzoasoatn so gii niyo zoasoatn, a salakaw ko Allah! Na ogaid na aya pzoasoatn ko na so Allah a so pthangan ko manga niyawa niyo: - go inisogo akn a mabaloy ako a pd ko miyamaratiyaya,"

105

"Go (pitharo rakn a:) 'Pakaantapang ka so hadap ka ko okit a makaoontol, go di ka thapi ko manga pananakoto';"

106

"Go ding ka phanongganoya a salakaw ko Allah so di rka phakaompiya, go di rka phakabinasa: Na o nggolawlaang ka, na mataan! a ska samawto na pd ko manga darowaka."

107

Na o sogati ka o Allah sa morala, na da a phakapokas on a rowar Rkaniyan: Na o pakaantapi ka Niyan sa mapiya, na da a phakarn ko gagaw Niyan: Izogat Iyan oto ko taw a kabaya Iyan ko manga oripn Iyan. Na Skaniyan so Manapi, a Makalimoon.

108

Tharoang ka: "Hay manga manosiya, sabnar a miyakaoma rkano so bnar a phoon ko Kadnan niyo! Na sadn sa taw a komdg ko ontol, na khatoro sa rk bo o ginawa niyan; na sadn sa taw a somilay, - na phakasilay sa sii bo phakatana rkaniyan: Na kna a ba kano rakn pakiaakon."

109

Na onoting ka so iphagilaham rka, go phantang ka, taman sa komokom so Allah: Ka Skaniyan i taralbi a mapiya ko manga kokoman.

Total Number of Verses: 123

1

Alif, Lam, Ra. (so Allah i Matao ko paka-aantapan Iyan on). (Giyai na) Kitab a pimbaibaitan so manga ayat on, oriyan iyan na piyagosay a phoon ko hadapan o (Allah a) Mawngangn, a Kaip.

2

Sa da a pzoasoata niyo a inonta so Allah. "Mataan! a sakn na phoon Rkaniyan a pphamakaiktiyar rkano go pphamanothol sa mapiya."

3

"Go pangni kano sa maap ko Kadnan iyo, oriyan iyan na thawbat kano sii Rkaniyan; ka pakasawitn kano Niyan sa kapagintaw a mapiya, taman ko taalik a miyapnto, go imbgay Niyan ko oman i adn a millbi niyan so millbi niyan! Na o talikhod kano, na mataan! a sakn na ikhalk akn skano ko siksa ko alongan a mala (a so alongan a qiyamah)."

4

"Sii ko Allah so khandodan iyo, na Skaniyan sii ko langowan taman na Gaos Iyan."

5

Tanodan! ka mataan! a siran na pag-unsn iran ko manga rarb iran, ka pphagmaan iran on; tanodan! ka so wakto a kizasalikombongn iran ko manga nditarn iran, na katawan (o Allah) so isosoln iran, go so papayagn iran: Mataan! a Skaniyan na katawan Iyan so zisii ko manga rarb.

Part 12

6

Na da a baraniyawa ko lopa a ba di atastanggongan o Allah so pagpr on: Go katawan Iyan so khatargan iyan go so kapmbtadan iyan: Tanan matatago ko (Laoh Mahfodh a) kitab a mapayag.

7

Go Skaniyan so miyadn ko manga langit ago so lopa sii ko miyakanm gawii a matatago so aras Iyan ko liyawaw o ig, ka thpngan kano Niyan o antawaa rkano i lbi a mapiya i galbk. Na ibt o tharoang ka a: "Mataan! a skano na pagoyagn kano ko oriyan o kapatay," na ptharoon dn o siran a da pamaratiyaya a: "Da ko ungkai inonta na balik mata a mapayag!"

8

Na mataan! a o sndodn Ami kiran so siksa taman ko manga wakto a mappnto, na ptharoon iran dn a: "Antonaa i maka-uurn on?" Tanodan, ka so alongan a kapakatalingoma niyan kiran, na di kiran dn mikisar, go kalikopan siran o piyamagompat iran (a siksa)!

9

O mataan! a o pakataama Mi so manosiya so phoon Rkami a limo, oriyan iyan na gamitn Ami ron, na mataan aya! a kadaan dn sa panginam, a makalaa kaoongkir iran.

10

Go mataan! a o pakataama Mi skaniyan sa limo ko oriyan o morala a miyakasogat on na mataan! a tharoon iyan dn a: "Miyada rakn so manga rarata:" Mataan aya! a zonor dn a mangangandag.

11

Inonta so siran a miphapantang, go pinggalbk iran so manga pipiya; siran man na adn a bagian iran a maap, go balas a mala.

12

Na masikn a mibagak ka so sabaad ko iphagilaham rka, go kasabapan skaniyan a igagt a rarb ka sa gi iran katharoa: "Sa ino a da a initoron on a kakawasaan, odi na miyakaoma a pd iyan a malaikat?" (pitharo o Allah:) Ska na matag pphamakaiktiyar na so Allah i Somisiyap ko langon taman!

13

Ino iran gii tharoa i: "Pimbabaas aya (o Mohammad);" tharoang ka: "Na bgay kano sa sapolo a manga sorah a lagid iyan a pimbabaas, go panongganoy kano (sa makatabang rkano) sa sadn sa khagaga niyo, a salakaw ko Allah! o skano i manga bnar!"

14

"Na amay ka di kano iran masmbag, na tangkda niyo a aya bo a kinitoron iyan na sii ko katao o Allah, go mataan aya! a da a tohan a inonta Skaniyan! Na ino, skano mimbayorantang kano (ko Allah)?"

15

Sadn sa kabaya iran so kawyagoyag ko doniya, go so parahiyasan on, na ithoman Ami kiran sa tarotop so (balas o) manga galbk iran (sa doniya), a siran na da a makorang kiran on roo (sa doniya).

16

Siran man so da a bagian iran sa akhirat a rowar ko apoy: Na miyailang so pingolawla iran roo (sa akhirat), go miyalaklak so pinggalbk iran!

17

Ba (niyan lagid) so taw a mithakna ko marayag a karina a phoon ko Kadnan iyan, go ptondogn skaniyan o saksi a phoon ko Allah, go sii ko miyaonaan iyan so kitab o Mosa, a ladiyawan go limo? Siran man i mapaparatiyaya on; na sadn sa mongkir on ko pizagorompong, na so naraka i khabolosan iyan. Na oba ka on katagowi sa anganangan: Mataan! a skaniyan so bnar a phoon ko Kadnan ka: Na ogaid na so kadaklan ko manga manosiya na di siran pharatiyaya!

18

Na ba adn a lawan a darowaka ko taw a inangkob iyan so Allah sa kabokhag? Siran man na pagowitn siran ko Kadnan iran, go tharoon o manga saksi a: "Siran aya so miyamamokhag makapantag ko Kadnan iran." Tanodan! ka so morka o Allah na ithomparak ko manga darowaka!

19

"Siran na pphangalang siran ko lalan o Allah go phlolobaan iran on a kabkhog iyan: Go siran na oongkirn iran so akhirat!"

20

Siran man na da iran kapalagowi (so siksa) ko lopa, go da a bagian iran a salakaw ko Allah a manga panarigan. Pthaktakpn kiran so siksa! Da iran gagaa so kapamamakin'g, go da siran pangilaylay!

21

Siran man so liyogi ran so manga ginawa iran, go diyorat siran o pimbabaas iran a kabokhag!

22

Matatangkd a mataan! siran sii ko akhirat na siran so manga logi!

23

Mataan! a so siran a miyamaratiyaya, go pinggalbk iran so manga pipiya, go mizalimbotawan siran ko Kadnan iran na siran man i manga taw ko sorga sa ron siran on dn makakakal!

24

Aya ibarat o dowa lompok na lagid o bota ago bngl, go so pphakaylay ago Pphakan'g. Ba magizan a dowaya sa ibarat? Ino kano di phananadm?

25

Na sabnsabnar a siyogo Ami so Noh ko pagtaw niyan (sa pitharo iyan a:) "Mataan! a sakn na pphamakaiktiyar rkano a mapayag:"

26

Sa da a pzoasoata niyo inonta so Allah: "Mataan! a sakn na ikhalk akn skano ko siksa ko alongan a masakit."

27

Na pitharo o manga nakoda a so siran a da pamaratiyaya ko pagtaw niyan a: "Da a kapkhaylay ami rka a rowar sa manosiya a lagid ami: Go da a pkhaylay ami rka a miyonot rka a rowar ko siran a pkhakalaklak rkami, a mababaw i pamikiran: Go da a pkhaylay ami a mibibinta iyo rkami: Kna, ka arangan ami rkano na manga bokhag!"

28

Pitharo (o Noh): "Hay pagtaw akn! ay gda iyo o sakn na thatakna ko marayag a karina a phoon ko Kadnan ko, go bigan ako Niyan sa limo a phoon ko hadapan Iyan, na kiyalimngan rkano? Na ba Ami rkano aya mitgl a skano na ikagogowad iyo aya?"

29

"Na hay pagtaw akn, da a phangnin ko rkano saya a tamok: da a balas rakn a rowar ko zizii ko Allah: Na di akn bogawn so siran a miyamaratiyaya, - mataan! a siran na mipmbaratmowa iran so Kadnan iran, na ogaid na pkhaylay akn skano a pagtaw a da a manga mlng iyo!"

30

"Na hay pagtaw akn! antawaa i makatabang rakn ko Allah o bogawa ko siran? Ba kano di phananadm?"

31

Na di akn rkano ptharoon i: "Zisii rakn so manga kakawasaan o Allah, go di akn katawan so migagaib, go di akn ptharoon i: Mataan! a sakn na malaikat. Go di akn ptharoon ko siran a di ittmbo o manga mata niyo i ba da dn a imbgay kiran o Allah a mapiya: So Allah i Matao ko zisii ko manga ginawa iran. Mataan! a sakn na o sowa ako to, na khapd ako dn ko manga darowaka."

32

Pitharo iran: "Hay Noh, sabnar a piyamawal kaming ka! Piyakadakl ka a kapphamawalang ka rkami: Na talingomaan ka rkami so ipphangangalk ka rkami (a siksa), o ska na pd ko manga bnar!"

33

Pitharo iyan a: "Aya bo a phakabgay rkano ron na so Allah o kabaya Iyan: Na di niyo dn kapalagoyan!"

34

"Na di rkano phakaompiya so thoma ko, apiya kabaya akn a kathomai ko rkano, amay ka so Allah na kabaya Iyan a kadadaga Niyan rkano: Skaniyan i Kadnan niyo! Go Ron kano phakandoda!"

35

Ino iran gii tharoa i: "Pimbabaas iyan aya?" Tharoang ka: "O pimbabaas akn aya, a sii rakn phakatana so dosa ko! Na sakn na angiyas ako ko gii niyo imbaradosa!"

36

Na iniilaham ko Noh a: "Mataan aya! a da dn a pharatiyaya ko pagtawng ka, a rowar ko taw a andang a miyamaratiyaya! Na ding ka pmbokoon so pinggolawla iran;"

37

"Go mbaaling ka so kapal, sii ko kaylay Ami ago so ilaham Ami, go ding ka Rakn pagangaya so makapantag ko siran a mindadarowaka: Mataan! a siran na pagldn siran."

38

Na so kaphagmbaali niyan ko kapal: Na oman i somagad on ko manga nakoda ko pagtaw niyan, na pamagrgan iran skaniyan. Pitharo iyan a: "Apiya kami niyo pphamagrgi, ka mataan! a skami na pamagrgan ami skano (mambo so oriyan iyan) a lagid o kapphamagrgi niyo rkami!"

39

"Na katokawan iyo bo o antawaa i katalingomaan a siksa a pakarondann Iyan, go kawlogan sa siksa a tatap: "

40

Taman sa kagiya a makawma so sogoan Ami, go piyamangmbowatan a ig so lopa! Na pitharo Ami a: "Prorang ka on, ko oman i (sadinis sa) ngganapa a dowa: (mama, go babay), go so taalok rka, inonta so taw a miyaona on so katharo, go (proranang ka on) so taw a miyamaratiyaya a pd iyan, a rowar ko mayto."

41

Na pitharo iyan a: "Da kano ron, sii ko ngaran o Allah, so kapkhtas iyan go so kaptharg iyan. Mataan! a so Kadnan ko na titho a Manapi, a Makalimoon!"

42

Na giyoto na ipkhtas iyan siran ko manga bagl a lagid o manga palaw, go tiyawag o Noh so wata iyan, a aya btad iyan na tomiyawarang: "Hay ikaritan ko, da ka rkami, go di ka thapi ko manga kapir!"

43

Pitharo (o wata) iyan a: "Sii ako phagapas ko palaw ka kharn ako niyan ko ig." Pitharo (o Noh): "Da a khapalihara sa alongan nai ko sogoan o Allah, inonta so taw a inikalimo Iyan!" Na kiyaltan siran o bagl, na miyabaloy a pd ko miyanga-aald.

44

Na adn a mitharo sa: "Hay lopa! Lamdang ka so ig ka, go hay kawang! targn ka (so oran)!" Na minirat so ig, go minggolalan so sogoan, go miyakadongko (so kapal) ko palaw a Al-Jodii, na adn a mitharo sa: "Kapakawatan (ko limo) a bagian o pagtaw a da pamaginontolan!"

45

Na miyangni so Noh ko Kadnan iyan, sa pitharo iyan a: "Kadnan ko, mataan! a so wata akn a pd ko taalok rakn. Go mataan! a so diyandii Ka na bnar, go Ska i taralbi a Maontol ko manga kokoman."

46

Pitharo (o Allah): "Hay Noh, mataan! a skaniyan na kna a ba pd ko taalok rka: Mataan aya! a galbk a di mapiya; na ding ka Rakn phangniya so da a kataong ka on. Mataan! a Sakn na pphangthomaan Ko ska, ka oba ka mabaloy a pd ko di manga tatao!"

47

Pitharo (o Noh): "Kadnan ko, mataan! a sakn na mlindong ako Rka, sa ba ko rka mapangni so da a katao ko ron. Na odi akong Ka napii, go di akong Ka ipangalimo, na khabaloy ako a pd ko miyangalologi!"

48

Adn a mitharo: "Hay Noh! tpad ka sa kalilintad. Phoon Rkami, go madakl a mapiya a sii rka, go sii ko manga pagtaw a pd ka: Na adn a manga pagtaw a phakisawitan Ami kiran (so doniya), oriyan iyan na khasogat siran a siksa a malipds a phoon Rkami."

49

Giyaya na pd ko manga totholan ko migagaib, a iphagilaham Ami rka: Na ding ka ya katawan (ya Mohammad), ska, go di katawan o pagtawng ka ko onaan aya. Na phantang ka: Mataan! a so khabolosan a daag na bagian o khipanananggila.

50

Go (siyogo Ami ko) pagtaw a Ad, so pagari ran a Hod, pitharo iyan: "Hay pagtaw akn, simbaa niyo so Allah! ka da a tohan iyo a salakaw Rkaniyan, skano na ba kano dn dii pamrak!"

51

"Hay pagtaw akn, di ako rkano saya mangindaki balas; da a balas rakn, inonta so zisii ko miyadn rakn: Ba da a manga sabot iyo?"

52

"Go hay pagtaw akn, pangni kano sa maap ko Kadnan iyo oriyan iyan na thawbat kano sii Rkaniyan: Ka pakatoronn Iyan rkano so oran a margs, go omanan kano Niyan sa bagr a rakhs a bagr iyo: Na di kano thalikhod a mbabaradosa kano!"

53

Pitharo iran: "Hay Hod, da a minitalingomang ka rkami a karina, na di ami ngganatan so manga katohanan ami, sa sabap bo ko katharo o ka. Go di ami ska pharatiyayaan!"

54

"Daa ismbag ami a rowar ko kisogatn rka o sabaad ko manga katohanan ami ko marata." Pitharo iyan a: "Mataan! a sakn na zasaksiin ko so Allah, na zaksii niyo a mataan! a sakn na angiyas ako ko ipphamanakoto niyo."

55

"A salakaw Rkaniyan! Na palaya kano rakn tipo, go di niyo rakn dn thaalika."

56

"Mataan! a sakn na siyarigang ko so Allah, a Kadnan ko go Kadnan niyo! Da a baraniyawa, a ba di Skaniyan i Phapaar on. Mataan! a so Kadnan ko na sii ko okit a makaoontol."

57

"Na o talikhod kano, na sabnar a minisampay akn rkano so inisogo rakn, a pagowitn rkano; na zambi so Kadnan ko sa pagtaw a salakaw rkano, go da a mibinasa niyo Ron a mayto bo. Mataan! a so Kadnan ko, na so langowan taman na sisiyapn Iyan."

58

Na kagiya a makawma so sogoan Ami, na siyabt Ami so Hod, go so siran a miyamaratiyaya a pd iyan, sabap ko limo a phoon Rkami; go siyabt Ami siran phoon ko siksa a margn.

59

Giyoto man so pagtaw a Ad: Inongkir iran so manga ayat o Kadnan iran; go siyorang iran so manga sogo Iyan; go inonotan iran so sogoan o oman i mangangalandada, a somasangka.

60

Na tiyondog siran sangkai a doniya a morka, go sa alongan a qiyamah. Tanodan! ka mataan! a so pagtaw a Ad na inongkir iran so Kadnan iran. Tanodan! ka kapakawatan (ko limo) a bagian o Ad, a pagtaw o Hod!

61

Go (siyogo Ami) sii ko pagtaw a Samod so pagari ran a Salih. Pitharo iyan: "Hay pagtaw akn, simbaa niyo so Allah: Ka da a tohan iyo a salakaw Rkaniyan. Skaniyan i miyadn rkano phoon ko lopa, go piyakapagingd kano Niyan on: Na pangni kano Ron sa maap, go thawbat kano sii Rkaniyan: Mataan! a so Kadnan ko na Marani, a Pphanarima (ko pangni)."

62

Pitharo iran: "Hay Salih, sabnar a miyaadn ka rkami a ipphangangarapan ko onaan aya. Inong ka rkami zaparn a kapzimba ami ko pzimbaan o manga loks ami? Na mataan! a skami na matatago kami dn ko kazasangka ko ipndolon ka rkami, sa mala a kazangka."

63

Pitharo iyan: "Hay pagtaw akn! ay gda iyo o sii ako ko marayag a karina a phoon ko Kadnan ko, go bigan ako Niyan sa limo a phoon Rkaniyan? Na antawaa i makatabang rakn ko Allah o soranga ko Skaniyan? Na da a miphagoman iyo rakn a rowar ko kalogi."

64

"Na hay pagtaw akn, katii so onta o Allah a nanao niyo; na botawani niyo ko kapphangangan iyan ko lopa o Allah, go di niyo ron thmon so marata, ka madansal kano o siksa a marani!"

65

Na biyono iran oto, na pitharo (o Salih) a: "Khariyala kano dn ko ingd iyo sa tlo gawii: Giyaya man na diyandi a kna a ba kabokhag!"

66

Na kagiya a makatalingoma so sogoan Ami, na siyabt Ami so Salih, go so siran a miyamaratiyaya a pd iyan, a minisabap ko limo a phoon Rkami, go (siyabt Ami siran) ko kahinaan ko alongan oto. Mataan! a so Kadnan ka na Skaniyan so Mabagr, a Domadaag.

67

Na miyadansal so siran a da pamaginontolan a lalis, na kiyapitaan siran ko manga ingd iran a miyamangndr, -

68

Lagid o ba siran roo da maadn. Tanodan! ka mataan! a so pagtaw a Samod na inongkir iran so Kadnan iran. Tanodan! ka kapakawatan (ko limo) a bagian o pagtaw a Samod!

69

Na sabnsabnar a minioma o manga sogo Ami (a manga malaikat) ko Ibrahim so tothol a mapiya. Na mitharo siran sa: "Salaam!" Simbag iyan a: "Salaam!" Na da mathay na minioma niyan a mayto a sapi a iniyaw.

70

Na kagiya maylay niyan a di oto khawaan o manga lima iran, na miyasawang kiran, go kiyaakinan kiran sa kalk. Pitharo iran a: "Di ka khawan, ka mataan! a skami na siyogo kami ko pagtaw o Lot (ka mbinasaan ami siran)."

71

Na si karoma niyan a tomitindg, na miyakakhala: Na piyanothol Ami ron (a ipmbawata iyan) so Is'haq, go sii ko oriyan o Is'haq; so Yaqob.

72

Pitharo iyan: "Ah phammsa ta! Arati pmbawata ako, a miyaloks ako, go giya karoma ko wai na miyakatoa? Mataan! a giyai titho a shay' a pakammsa!"

73

Pitharo iran a: "Ino ka phammsa ko sogoan o Allah? So limo o Allah go so manga gagaw Niyan na sii rkano a manga taw ko walay (o Ibrahim). Mataan! a so Allah i kiyapatotan ko podi, a Maginawa!"

74

Na kagiya a mada ko Ibrahim so pangandam go miyakaoma on so tothol a mapiya, na gii rkami makindaowa makapantag ko pagtaw o Lot.

75

Mataan! a so Ibrahim na titho a matigr, a lalayon makapphagaynaw, a m'undod (ko Allah).

76

Pitharo (o manga malaikat): Hay Ibrahim! talikhoding ka dn nai; mataan aya! a sabnar a miyakaoma so sogoan o Kadnan ka: Go mataan! a siran na adn a makatatalingoma kiran a siksa a di khindod!

77

Na kagiya a makawma, so manga sogo Ami ko Lot, na miyakandamar sa sabap kiran, go inigagt siran a rarb iyan. Na miyatharo iyan a: "Giyai na gawii a margn."

78

Na miyakaoma on so pagtaw niyan a pphamagarabaya siran on somong, a gowani na aya btad iran na gii siran nggolawla sa manga rarata. Pitharo iyan: "Hay pagtaw akn, kataya so manga wata akn a manga babay (na pamangaroma kano kiran): Siran na soti rkano! Na kalkn iyo so Allah, go di ako niyo ndiyamana sii ko manga banto akn. Ba da a pd rkano a mama a phakapando?"

79

Pitharo iran a: "Sabnsabnar a katawan ka a da a kabaya Ami ko manga wata aka a manga babay: Go mataan! a ska na katawan ka dn so kabaya ami!"

80

Pitharo iyan a: "O adn a bagr akn a khiyato akn rkano, odi na adn a kharndaan ko a mabagr a tanto (na rnn ko skano)."

81

Miyatharo (o manga malaikat): "Hay Lot, mataan! a skami na manga sogo o Kadnan ka. Da dn a khisampay ran rka (a kabinasa)! Na panglmn ka lomalakaw so taalok rka, sii ko sabaad ko kagagawii, na da a ndingil rkano a isa bo: Inonta so karomang ka: Mataan aya! a khisogat on so khisogat kiran (a siksa). Mataan! a aya diyandi kiran na so kapipita: Ba di marani so kapipita."

82

Na kagiya a makawma so sogoan Ami, na biyaloy Ami so liyawaw (o manga ingd iran) a miyadidalm, go piyakawranan Ami sa ator a phoon ko lipaw a miyakomba, a piyakathondotondog, -

83

Totoosan sii ko Kadnan ka: Na knaa ba aya mawatan ko manga darowaka!

84

Go (siyogo Ami ko) pagtaw a Madyan so pagari ran a Shoayb. Pitharo iyan: "Hay pagtaw akn, simbaa niyo so Allah: Ka da a tohan iyo a salakaw Rkaniyan. Go di kano phangorang ko kapagasad, go so kathimbang: Mataan! a sakn na pkhaylay akn skano ko mapiya (a kawiyagan), go mataan! a sakn na ikhalk akn skano ko siksa ko alongan a makatangkal."

85

"Na hay pagtaw akn! tarotopa niyo so kapagasad, go so kathimbang sa kaontol, go da a khoranga niyo ko manga manosiya ko nganinganin iran: Go di kano phaminasa ko lopa a mamakakayd kano."

86

"So liyamba rkano o Allah na aya rkano mapiya, o skano na miyamaratiyaya kano. Na kna a ba sakn i somisiyap rkano!"

87

Pitharo iran: "Hay Shoayb, ba so sambayang ka i somosogo rka sa kagnki ami ko pzimbaan o manga loks ami, odi na so (kagnki ami ko) ipkhidia mi ko manga tamok ami sa sadn sa kabaya ami? Mataan! a ska na titho ka a matigr, a pphamando!"

88

Pitharo iyan: "Hay pagtaw akn! ay gda iyo a sakn na sii ko marayag a karina a phoon ko Kadnan ko, go bigan ako Niyan sa pagpr a mapiya a phoon Rkaniyan? Na di akn kabaya i ba ko manggolawla so ipzapar akn rkano. Da a kabaya akn a rowar ko kapangompiya sa sadn sa khagaosan ko; na da a guus akn inonta a sabap ko (tabang o) Allah. Skaniyan i siyarigan ko, go Skaniyan i pagndodan ko."

89

"Na hay pagtaw akn, oba kano matonda o di tano kaphagayon ko kisogat rkano o (siksa) lagid o minisogat ko pagtaw o Noh, odi na so pagtaw o Hod, odi na so pagtaw o Salih; na kna a ba rkano mawatan so pagtaw o Lot!."

90

"Na pangni kano sa maap ko Kadnan iyo, oriyan iyan na thawbat kano sii Rkaniyan: Mataan! a so Kadnan ko na Makalimoon, a Makapdiin."

91

Pitharo iran: "Hay Shoayb, madakl a di ami zabotn ko katharo o ka. Go mataan! a titho a pkhaylay ami ska a malobay rkami! Na o da so manga tonganaing ka, na radiyamn ami ska dn. Go kna a ba ska i pagaadatan rkami."

92

Pitharo iyan: "Hay pagtaw akn, ba so manga tonganay akn i lbi a pagaadatan iyo a di so Allah? Na inibowang iyo (so sogoan Iyan) ko manga talikhodan iyo, a da dn pankhayda. Mataan! a so Kadnan ko na so gii niyo nggolawlaan na katawan Iyan!"

93

"Go hay pagtaw akn, nggalbk kano sa sadn sa kapasang iyo: Ka mataan! a sakn na pnggalbk ako mambo: Katokawan iyo o antawaa i taw a khatalingomaan skaniyan a siksa a pakaytoon iyan, go antawaa i taw a skaniyan i bokhag! Na nayaw kano! ka mataan! a sakn na pd iyo a nomanayaw!"

94

Na kagiya a makawma so sogoan Ami, na siyabt Ami so Shoayb ago so miyamaratiyaya a pd iyan, sabap ko limo a phoon Rkami: Na miyadansal so da pamaginontolan o lalis, na kiyapitaan siran ko manga ingd iran a miyamangndr.

95

Lagid o ba siran roo da maadn. Tanodan! ka kapakawatan (ko limo) a bagian o pagtaw a Madyan. Lagid o kiyapakawatan o pagtaw a Samod (ko limo)!

96

Go sabnsabnar a siyogo Ami so Mosa, rakhs o manga tanda Ami go katantowan a mapayag,

97

Sii ko Pir'awn go so manga nakoda a pagtaw niyan: Na aya iran inonotan so sogoan o Pir'awn, a da ko sogoan o Pir'awn i ba makaoontol.

98

Phagolowanan iyan so pagtaw niyan ko alongan a qiyamah; na mapakasold iyan siran ko naraka a mikharatarata a kaphakasold o phakasoldn on!

99

A tiyondog siran sangkai (a doniya) a morka, ago sa alongan a qiyamah: Miyakaratarata a pammgayan ko mbganon!

100

Giyoto man na pd ko manga totholan ko manga ingd a pphanotholn Ami rka (ya Mohammad): So sabaad on na makatitindg, go (so sabaad on na) miyatbas.

101

Na da Ami siran salimboti: Na ogaid na siyalimbotan iran so manga ginawa iran: Na da a minilinding kiran o manga katohanan iran, a so pphanongganowin iran a salakaw ko Allah a mayto bo, kagiya a makawma kiran so sogoan o Kadnan ka: Go da a minioman iran kiran a rowar ko kabinasa!

102

Na lagid aya so siksa o Kadnan ka kiran ka igira a siniksa Iyan so (taw ko) manga ingd a giyoto na mindarowaka: Mataan! a so siksa Iyan na malipds, a tanto.

103

Mataan! a adn a matatago roo man a titho a tanda ko taw a inikalk iyan so siksa ko akhirat: Giyoto man so alongan a plimodn on so manga manosiya: Go giyoto man so alongan a khamasaan.

104

Na di Ami oto isndod inonta sii ko taalik a mappnto.

105

Sii ko alongan a kapakatalingoma niyan, na da a makatharo a baraniyawa inonta bo o sabap sa idin o Allah: Na so sabaad kiran na marata i okor, go (so sabaad kiran na) mapiya i okor.

106

Na so pman so siran a manga rarata i okor, na khatago ko naraka: bagian iran roo so katagaw, go so karangs:

107

Kakal siran roo sa sodn so kathay o manga langit ago so lopa (sa dayon sa dayon), inonta sa kabaya o Kadnan ka: Mataan! a so Kadnan ka na pnggolawlaan Iyan so kabaya Iyan.

108

Na so pman so siran a manga pipiya i okor na matago ko sorga: Makakal siran roo sa sodn so kathay o manga langit ago so lopa (sa dayon sa dayon), inonta sa kabaya o Kadnan ka: Pammgayan a di pthaman.

109

Na di ka pkhadowadowai ko pzimbaan o siran aya. Da ko kapzimba iran inonta na lagid o kapzimba o manga loks iran gowani: Na mataan! a Skami na ithoman Ami kiran dn so kipantag iran (ko siksa) sa di kakorangan.

110

Na sabnsabnar a inibgay Ami ko Mosa so kitab, na da pagayonayoni so madadalm on: Na o da so katharo a miyaona a phoon ko Kadnan ka, na miyakokom siran dn: Na mataan! a matatago siran dn ko kazasangka iran on sa mapayag a kazangka.

111

Na mataan! a oman i isa kiran na ibt ka tharotopn kiran dn o Kadnan ka so (balas ko) manga galbk iran: Mataan! a Skaniyan na so gi iran nggolawlaan na Kaip Iyan.

112

Na ontolang ka manaa so inisogo rka, - go (ontola o) taw a mithawbat a pd ka; go di kano phmalawani: Mataan! a Skaniyan na so gii niyo nggolawlaan na Phagilayn Iyan.

113

Na di niyo pagampili so siran a miyamanalimbot, ka masogat kano o apoy; go da a mambagian iyo a salakaw ko Allah a manga Panarigan, oriyan iyan na di kano katabangan.

114

Na pamayandgn ka so sambayang ko mbala ko kadawndaw, go so sabaad ko gagawii: Mataan! a so manga pipiya na khalalas iyan so manga rarata: Giyanan man na ndao ko pphamakindao:

115

Go phantang ka; ka mataan! a so Allah na di Niyan pagilangn so balas ko miphipiyapiya.

116

Na ino a da a miyabaloy ko manga pagtaw ko miyaonaan iyo, a adn a mibibinta iran a phanapar ko marata sii ko lopa a rowar ko mayto a miyasabt Ami kiran? Go miyatmbang so siran a da pamaginontolan ko inipangalimo kiran, go miyabaloy siran a manga baradosa.

117

Na da ko btad o Kadnan ka i ba Niyan binasaa so (taw ko) manga ingd sa kapanganiyaya, a so taw ron na phipipiyapiya.

118

Na o kabaya o Kadnan ka, na mataan! a khabaloy Niyan so manga manosiya ko okit a isa: (na ogaid) na di siran khada ko kazosoransorang iran,

119

Inonta so taw a inikalimo o Kadnan ka: Ka giyoto man i kiyaadna Niyan kiran: Na miyatangkd so katharo o Kadnan ka a: "Mataan! a ipno Akn dn ko naraka Jahannam so (da pamaratiyaya ko) manga jinn go so manga manosiya langon."

120

Na so langowan oto a pphanotholn Ami rka a pd ko manga totholan ko manga sogo, na pkhisabap on a kapphakabagr Ami ko poso o ka: Na saya zisaya a kiyapakatalingoma rka o bnar, go thoma, go ndao ko khipaparatiyaya.

121

Na tharoang ka ko siran a di mapaparatiyaya a: "Nggalbk kano sa sadn sa kapasang iyo: Mataan! a skami na pnggalbk kami (mambo);"

122

"Go nayaw kano! ka mataan! a skami na nomanayaw kami (mambo)."

123

Na rk o Allah so migagaib ko manga langit ago so lopa, go Ron phakandoda so mapnggolawla sa kalangolangowan iyan: Na zoasoatang ka Skaniyan, go sariging ka Skaniyan. Na kna a ba di maiin'ngka o Kadnan ka so gii niyo nggolawlaan.

Total Number of Verses: 111

1

Alif, Lam, Ra. (so Allah i Matao ko paka-aantapan Iyan on.) giyai so manga ayat ko kitab a pphakapayag (ko ontol ago so ribat).

2

Mataan! a Skami na initoron Ami skaniyan sa kapangadi a basa Arab, ka an iyo kasaboti.

3

Skami na pphanotholn Ami rka (ya Mohammad) so lbi a mapiya a manga tothol, sii ko kiniilahamn Ami rka sangkai a Qor'an: Na mataan! a miyabaloy ka ko onaan aya a pd dn ko di khipakaiin'ngka.

4

Gowani na pitharo o Yosof ki ama iyan: "Hay ama ko, mataan! a sakn na pithataginp akn a sapolo ago isa a bitoon go so alongan go so olan, a miyaylay akn siran a mangangalimbabaan siran rakn!"

5

Pitharo (o Ya'qob): "Hay wata ko, ding ka pphanothola so taginpn ka ko manga pagaring ka, ka pagantanganan ka iran sa tipo: Mataan! a so shaytan na ridoay o manosiya a mapayag!"

6

"Na giyaya i kaphilia rka o Kadnan ka, go kipagndaon Niyan rka ko taawil o manga tothol go katharotopa Niyan ko limo Iyan rka ago so manga moriya taw o Ya'qob lagid o kiyatarotopa Niyan on ko dowa loks ka gowani a so Ibrahim go so Is'haq. Mataan! a so Kadnan ka na Matao, a Mawngangn."

7

Sabnsabnar a adn a miyatago ko (totholan ko) Yosof ago so manga pagari niyan a manga tanda a rk o pphamangingiza.

8

Gowani na pitharo iran a: "Mataan! a so Yosof ago so pagari niyan na pkhababayaan o ama tano a di sktano; A sktano na madakl tano. Mataan! a si ama tano na titho a miyatago ko karibat, a mapayag!"

9

(Miyatharo o isa kiran a:) "Bonoa niyo so Yosof odi na bowangn iyo ko lopa (a mawatan), ka an rkano mabonayon so gagaw i ama iyo: Go ang kano mabaloy ko oriyan iyan a pagtaw a miyamakapiya!"

10

Pitharo o mitharo a pd kiran a: "Di niyo mbonoa so Yosof, na ba niyo dn ologa ko malibotng a landng, ka an matoon o sabaad ko somasagad o skano na pnggolawlaan iyo. "

11

Pitharo iran: "Hay ama Ami, inong ka rkami di zanaan so Yosof a mataan! a skami na titho a phagompiyaan ami?"

12

"Sogoang ka a monot rkami amag, ka an mababaya, go an makanggitagita, ka mataan! a skami na sisiyapn ami dn."

13

Pitharo iyan a: "Mataan! a sakn na titho akn a mimboboko a kaphakaonota niyo ron: Go ipkhawan akn oba makan a sarigala a skano na di niyo maiin'ngka."

14

Pitharo iran a: "Ibt o makan skaniyan a sarigala a skami na madakl kami, na mataan! a samawto na titho kami a manga ilang!"

15

Na kagiya a mapakawnot iran, go miyawpakat siran sa pagologn iran ko malibotng a landng: Na iniilaham Ami ron a: Mataan! a maphanothol ka kiran dn a siyowa iran nai sa siran na di iran katawan.

16

Na miyakaoma siran ki ama iran ko kagabigabi, a pphaman'gad siran.

17

Pitharo iran: "Hay ama ami, mataan! a lomiyalakaw kami a gii kami magoradorad, na inibagak ami so Yosof sii ko manga igagama ami; na kiyan skaniyan a sarigala, na da rka i ba kaming ka paratiyayaa apiya pn skami na manga bnar."

18

Na minioma iran so bangkala (o Yosof) a masasalapot a rogo a kabokhag. Pitharo (o Ya'qob) a: "Kna ka pipharasan rkano o manga napso niyo so miyanggolawla; na sabar dn a maliwanag: Ka so Allah i phangniyan sa tabang ko iphropa niyo."

19

Na miyakaoma a isa ka lalakawan: Na siyogo iran so pphakasagbn iran, na tiyayothon iyan so panabo iyan (ko landng). Pitharo iyan: "Hay ontong akn nai! Katii so bagowamama!" Na piyagma iran (ka biyaloy iran) a tamok! Na so Allah na katawan Iyan so gi iran nggolawlaan!

20

Na piphasa iran sa arga a korang a manga dirham a miyapagitong: Go miyabaloy siran on a pd ko dawn pamagarga!

21

Na pitharo o miyamasawn sa Misir ko karoma niyan a: "Phiyapiyaing ka so darpa iyan: Masikn a makanggay rkta a gona, odi na kowaan ta skaniyan a wata ta." Na giyaya man i kiyapakakhapaar Ami ko Yosof sii ko lopa (a Misir), go an Ami ron mindao so taawil o manga tothol. Na so Allah na Di-Kharn ko zowaan Iyan; na ogaid na so kadaklan ko manga manosiya na di iran katawan.

22

Na kagiya a iraot ko kiyakhasad iyan, na bigan Ami skaniyan sa ongangn go katao: Na lagid aya man a kambalasi Ami ko miphipiyapiya.

23

Na piyangabayaan skaniyan o (Zolaykha a) khiwalay ko babalingan iyan sa giyadn a ginawa niyan: Go pinggagalidan iyan so manga pinto, sa pitharo iyan: "Song ka sii ka sadn sa kabaya aka rakn!" Pitharo (o Yosof) a: "Mlindong ako ko Allah! Mataan aya! a so Kadnan ko na phipiyapiyaan Iyan so darpa akn. Mataan aya! a di phakaslang sa maliwanag so manga darowaka!"

24

Na sabnsabnar a kiyagdian on (so Zolaykha) go kiyagdian rkaniyan (mambo so Yosof), opama ka da niyan maylay so tanda o Kadnan iyan (na khitaloga on): Giyaya (i pingolawla Mi), ka an Ami mapakalidas ko marata, go so pakasisingay: Mataan! a skaniyan na pd ko manga oripn Ami, a piyamanolabos.

25

Na miyagorad siran ko pinto, a miyardit iyan so bangkala (o Yosof) sa talikhodan: Go miniphasgawa iran si karoma niyan sii ko pinto, pitharo (o Zolaykha) a: "Da a balas ko taw a phikhadiyatan iyan so taalok rka sa marata a rowar ko kakalabosowa on, odi na siksa a malipds."

26

Pitharo (o Yosof) a: "Skaniyan i miyangabaya rakn sa ginawa ko." Na adn a mizaksi a saksi a pd ko tonganay niyan, (a pitharo iran:) "O so bangkala (o Yosof) nasii miyabrat sa sangoran, na bnar (so Zolaykha), na so Yosof na pd ko manga bokhag!"

27

"Na o so bangkala iyan na sii miyardit sa talikhodan, na miyamokhag (so Zolaykha), na so Yosof na pd ko manga bnar!"

28

Na kagiya maylay (i karoma niyan) so bangkala iyan a sii miyardit sa talikhodan - na pitharo iyan a: 'Mataan aya! a pd ko antangan iyo a marata. Mataan! a so antangan iyo (a manga babay) a marata na mala!"

29

"Yosof, talikhoding ka dn nai; na pangni ka sa maap (Zolaykha), makapantag ko dosang ka. Mataan! a ska na miyabaloy ka a pd ko miyanga dodosa."

30

Na pitharo o manga babay ko bandar a ingd a: "So karoma o Aziz na pphangabayaan iyan so mangoda niyan sa giyadn a ginawa niyan: Sabnar a miyabnsad iyan so poso iyan a kabaya; mataan! a skami na titho a pkhaylay ami skaniyan ko karibat a mapayag."

31

Na kagiya a man'g iyan so antaanta iran on, na siyogo an iyan siran go pithiyagaran iyan siran sa pangn'ngkn: Na piyamgan iyan so oman i isa kiran sa glat: Go pitharo iyan: "(Hay Yosof) Liyowing ka siran," na kagiya a maylay ran skaniyan, na miyalma siran on, go miyangakakarad iran a manga lima iran: Na miyatharo iran: "Soti so Allah! Kna a ba ini manosiya! Da ko ungkai inonta na malaikat a sslaan!"

32

Pitharo (o Zolaykha): "Na giyoto man so piyamaganta ako niyo ron! Na sabnsabnar a piyangabayaang ko skaniyan sa giyadn a ginawa niyan na minda! Na ibt odi niyan nggolawlaa so sogoang ko ron, na khalaboson dn, go khabaloy dn a pd ko miyamakayto!"

33

Pitharo (o Yosof): "Kadnan ko, so kalaboso i pkhababayaan ko a di so ipndolon iran rakn: Na odi akong Ka pakalidasa ko antangan iran a marata, na mitaliyadok ako kiran go mabaloy ako a pd ko di manga tatao."

34

Na tiyarima o Kadnan iyan na piyakalidas iyan ko antangan iran a marata: Mataan! a Skaniyan so Pphakan'g.

35

Oriyan o kiyapayag iyan kiran, sii ko oriyan o kiyaylaya iran ko manga tanda, na (miyatomo o Aziz a) kalaboson iyan dn taman ko masa (a kada o siyanta).

36

Na adn a miyapd iyan ko kalaboso a dowa mangoda. Pitharo o isa sa dowa oto a: "Mataan! a pithataginp akn a pthmk ako sa arak. Na pitharo o pd iyan a: Mataan! a sakn na pithataginp akn a maawid ako ko poro o olo akn sa roti, a pkhn on a papanok. Panotholang ka rkami i taabir iyan: Mataan! a skami na pkhaylay ami ska a pd ko miphipiyapiya."

37

Pitharo (o Yosof) a: "Da a phakatalingoma rkano a pangn'ngkn a pagpr rkano to a dowa a ba akn rkano da mapanothol so osayan on ko da niyan rkano pn kapakatalingoma. Giyoto man na pd ko inindao rakn o Kadnan ko. Mataan! a sakn na giyanatan ko so okit o pagtaw a di iran paparatiyayaan so Allah. Go siran na so akhirat na siran na oongkirn iran."

38

"Na inonotan ko so okit o manga loks akn, a so Ibrahim ago so Is'haq, go so Ya'qob; di rkami patot oba ami rimbangn ko Allah so apiya antonaa: Giyoto man na pd ko gagaw rkami o Allah go sii ko manga manosiya: Na ogaid na so kadaklan ko manga manosiya na di siran phanalamat."

39

"Hay dowa kataw a pd akn ko kalaboso, ba so manga katohanan a mbidabida i tomo, antawaa so Allah a Isaysa, a phakabaas?"

40

"Da ko pzimbaan iyo a salakaw Rkaniyan inonta na manga ngaran a inipamtho niyo skaniyan, skano ago so manga loks iyo, da a initoron on o Allah a katantowan: Da ko kokoman inonta na rk o Allah: inisogo Iyan a da a pzoasoata niyo a rowar Rkaniyan: Giyaya man i okit a ontol, na ogaid na so kadaklan ko manga manosiya na di iran katawan."

41

"Hay dowa kataw a pd akn ko kalaboso, so isa rkano na kapthalagadan iyan sa inomn a arak so kadnan iyan: Na so pman so pd iyan, na khasola, na khn a papanok so olo niyan. Miyapasad so khasowa a so phakipitowa iyo to."

42

Na pitharo iyan sii ko miyagda iyan a mataan! a skaniyan i phakaslang kiran sa maliwanag a: "Aloya kong ka ko kadnan ka." Na linipat skaniyan o shaytan ko kaaloya niyan on ko kadnan iyan: Na miyakatarg ko kalaboso sa miyakapira ragon.

43

Na pitharo o dato (sa Misir) a: "Mataan! a sakn na pithataginp akn a pito a manga sapi a manga kawlit, a pkhn siran o pito (a manga sapi) a manga pagti go pito a mangngto a lomolombay, go (pito a) pd iyan a manga gango. Hay manga nakoda, pitowaa niyo rakn so taginpn ko o skano na so taginpn na khataabir iyo."

44

Pitharo iran a: "Zaozaog anan a manga taginpn, na di kami matao tomaabir ko manga taginpn (a lagidanan)."

45

Na pitharo o miyakaslang sa maliwanag sa dowa oto, a miyakatadm ko oriyan o miyathay a masa a: "Sakn na maphanothol akn rkano so taabir iyan: Na sogo i niyo (so Yosof)."

46

(Na pitharo iyan a:) "Yosof! Hay mmamataan pitowa angka rkami so makapantag ko pito a manga sapi a manga kawlit a pkhn siran o pito (a manga sapi) a manga pagti, go pito a mangngto a lomolombay, go (pito a) pd iyan a manga gango: ka an ako makandod ko manga manosiya, ka an iran katokawi."

47

Pitharo (o Yosof) a: "Pamola kano sa pito ragon a makathondotondog na sa pkharagon iyo na di niyo prorowa ko andag iyan, inonta so mayto a pkhn iyo;"

48

"Oriyan iyan na phakatalingoma ko kaypos oto a pito (ragon), a manga sikot a khalngan iran so ipthiyagar iyo kiran inonta so mayto ko tataliyongn iyo: "

49

"Oriyan iyan na adn a phakatalingoma ko kaypos oto a ragon a pagodarn on so manga manosiya, go makaphanmk siran on (sa mbarambarang a onga)."

50

Na pitharo o dato a: "Pakasonga niyo rakn skaniyan." Na kagiya a makawma on so sogo, na pitharo iyan a: "Kasoy ka ko kadnan ka, na izaan ka on o antonaa i btad o manga babay a so miyanga kakarad iran so manga lima iran? Mataan! a so Kadnan ko na so antangan iran a marata na katawan Iyan."

51

Pitharo (o dato) a: "Antonaa i miyasowa iyo gowani a pangabayaan iyo so Yosof sa so dn so ginawa niyan?" Pitharo iran: "Soti so Allah! Da a katawan ami a karataan iyan!" Pitharo o karoma o Aziz a: "Imanto na miyapayag so bnar: Sakn na piyangabayaan ko skaniyan sa giyadn a ginawa niyan na mataan! a skaniyan na pd dn ko manga bnar. "

52

(Pitharo o Yosof a) "Giyaya man na an iyan katokawi a mataan! a sakn na da akn ndonsiyani skaniyan ko kigagaib iyan, go mataan! a so Allah na di Niyan phakagagdn so antangan a marata o mamakadodorata."

Part 13

53

"Na di akn khikiyas a ginawa ko: Mataan! a so ginawa na titho a somosogo ko marata, inonta so inikalimo o Kadnan ko: Mataan! a so Kadnan ko na Manapi, a Makalimoon."

54

Na pitharo o dato a: "Pakasonga niyo rakn, ka tindosn ko skaniyan sii ko ginawa ko." Na kagiya a mimbitiyarai niyan, na pitharo iyan a: "Mataan! a ska sa alongan nai, sii ko hadapan ami, i piyakaphaar a sasanaan!"

55

Pitharo iyan a: "Baloya kong ka (a sasanaan) ko manga kakawasaan ko lopa (a Misir): Mataan! a sakn na masiyapn, a matao."

56

Na giyaya man i kiyapakakhapaar Ami ko Yosof ko lopa (a Misir), pphagingd on sa sadn sa kabaya iyan. Ipphamili Ami so limo Ami ko taw a kabaya Ami, go di Ami pagilangn so balas ko miphipiyapiya.

57

Na mataan! a so balas ko akhirat i mapiya, ko siran a miyamaratiyaya, go miyamananggila.

58

Na miyakaoma so manga pagari o Yosof: Na somiyold siran on, na miyakilala niyan siran, a siran na masasawang siran on.

59

Na kagiya a mibgay niyan kiran so angin iran, na pitharo iyan a: "Pakasonga niyo rakn so pagari niyo ko ama iyo, ba niyo di khaylay a mataan! a sakn na ptharotopn ko so kapagasad, go sakn i lbi a mapiya ko pphamamolosan?"

60

"Na odi niyo rakn mapakasong, na di kano rakn makapamoko, go di kano rakn phagobay."

61

Pitharo iran a: "Pagomayokn ami skaniyan ki ama iyan: Go mataan! a skami na nggolawlaan ami dn."

62

Na pitharo iyan ko manga ngongoda niyan a: Tagoa niyo so manga dagangan iran ko manga potal iran, ka an iran makilala amay ka makabaling siran ko manga taalok kiran, ka an siran rktano makakasoy.

63

Na kagiya a makabaling siran ki ama iran, na pitharo iran: "Hay ama ami, miyarn rkami so kapamoko, na pakawnotang ka rkami so pagari ami, kaang kami makapamoko; go mataan! a skami na siyapn ami dn."

64

Pitharo (i ama iran) a: "Da ko kisanaang ko rkano rkaniyan inonta na lagid o kinisanaan rkano ko pagari niyan gowani; na so Allah i taralbi a Mapiya a Somisiyap, go Skaniyan i lbi a Makalimoon ko pphamangalimo!"

65

"Na kagiya a pamkarn iran so manga barang iran, na miyatoon iran on so manga dagangan iran a inikasoy kiran." Pitharo iran: "Hay ama ami! antonaa pn i pmbabanogn ami? Katii so manga dagangan ami a inikasoy rkami: Go pkhikowa mi sa pangn'ngkn so pagtaw tano; go siyapn ami so pagari ami; go makaozor kami sa isa ko rorana a onta. Giyoto man i kapamoko a malbod."

66

Pitharo iyan a: "Di akn rkano dn phakawnotn taman sa di ako niyo bgan sa maylot a diyandi, a phoon ko Allah, sa mataan! a phakandodn iyo rakndn skaniyan, inonta oba kano katangkali." Na kagiya a ibgay ran on so diyandi iran, na pitharo iyan a: "So Allah i Tomotonggo ko katharo tano!"

67

Go pitharo iyan: "Hay manga wata ko, di kano zold ko pinto a satiman: Na sold kano ko manga pinto a makambblablag; na da a khitabang akn rkano ko (kokoman o) Allah a mayto bo: Da ko kokoman inonta na rk o Allah: Skaniyan i siyarigan ko go Skaniyan na sarigi o pphamanarig."

68

Na kagiya a somold siran sa sadn sa sogoan kiran i ama iran, na da a minitabang iyan kiran ko (kokoman o) Allah a mayto bo: Ogaid na so hadiyat a zisii sa ginawa o Ya'qob, na mininggolalan iyan oto. Na mataan! a skaniyan na titho a adn a tanod iyan ko inindao Ami ron: Na ogaid na so kadaklan ko manga manosiya na di iran katawan.

69

Na kagiya a somold siran ko Yosof, na inikakp iyan si pagari niyan; Pitharo iyan a: "Mataan! a sakn na sakn si pagaring ka; na ding ka pmboko on so pinggolawla iran."

70

Na kagiya a mibgay niyan kiran so angin iran, na tiyago iyan so phaginoman ko potal i pagari niyan. Oriyan iyan na miyananawag so pphananawag: "Hay manga komokoda sa onta! mataan kano a titho a manga tkhaw!"

71

Pitharo iran sa somiyangor siran kiran: "Antonaa i miyada a pphangdgn niyo?"

72

Pitharo iran a: "Pphangdgn ami a miyada a gantang o dato; na sa taw a mikasoy niyan oto na adn a bagian iyan a isa ka awid o satiman a onta; go sakn na ako akn skaniyan."

73

Pitharo iran a: "Ibt ko Allah! Sabnsabnar a kiyatokawan iyo a kna a ba kami miyakaoma sa ba kami phaminasa ko lopa, go kna a ba kami manga tkhaw!"

74

Pitharo iran: "Antonaa i kasalaan o tkhaw, o skano na manga bokhag?"

75

Pitharo iran: "Aya kasalaan iyan na sadn sa taw a sii matoon ko potal iyan, na skaniyan dn i kasalaan iyan. Lagid aya a ipzala Ami ko manga darowaka!"

76

Na iniphoon iyan ko manga potal iran, ko dapn so potal i pagari niyan: Oriyan iyan na inigmaw niyan phoon ko potal i pagari niyan. Giyaya i piyaki pagantangan Ami ko Yosof. Di patot oba niyan makowa so pagari niyan sii ko kokoman o dato odi so kabaya o Allah. Iphoro Ami sa phipira pangkat so taw a kabaya Ami: Na kaoombawan so oman i adn a katao niyan o lawan on sa katao.

77

Pitharo iran: "O ba miyamankhaw, na kagiya a miyamankhaw si pagari niyan gowani." Na piyagns oto o Yosof sii sa ginawa niyan, sa da niyan kiran oto payaga. Pitharo iyan a: "Skano i marata i btad; na so Allah i lbi a Matao ko iphropa niyo!"

78

Pitharo iran: "Hay Aziz, mataan! a adn a ama iyan a loks a miyakatoa, na kowaang ka so isa rkami a sambi iyan; mataan! a skami na maiilay ami ska a pd ko miphipiyapiya."

79

Pitharo iyan a: "Mlindong kami ko Allah oba adn a makowa mi a rowar ko taw a miyatoon ami ron so tamok ami: Mataan! a skami na samawto na titho kami a phakasalimbot."

80

Na kagiya a kadaan siran on sa panginam, na sominibay siran a miyagopakat siran. Pitharo o mala kiran a: "Ba niyo di katawi a mataan! a si ama iyo na sabnar a kominowa rkano sa maylot a diyandi a phoon ko Allah, gowani na mindorat kano makapantag ko Yosof? Na di akn dn ngganatan a ingd ai taman sa di ako pandoan i ama, odi na kokomn ako o Allah; ka Skaniyan i lbi a Mapiya ko manga kokoman."

81

"Baling kano ki ama iyo, na tharoa niyo: Hay ama ami, mataan! a so wata aka na miyamankhaw! Na da a pizaksian ami a rowar ko kiyatokawan ami, na da rkami i ba ami masiyap so migagaib!"

82

"Na izaing ka so phagingd a kiyatagoan rkami, go so manga komokoda a minithoona ami roo, ka mataang! kami a titho a manga bnar."

83

Pitharo iyan: "Kna, ka pipharasan rkano o manga ginawa niyo so miyawlawla. Na sabar dn a maliwanag; ka masikn a so Allah na pakatalingomaan iyan siran rakn langon. Mataan! a Skaniyan so Matao, a Mawngangn."

84

Na tiyalikhodan iyan siran, sa pitharo iyan: "Hay kiyaontanan so rataa ginawa ko ko Yosof! Na miyakapoti so dowa mata niyan phoon ko boko, na skaniyan na ba niyan dn marrbn."

85

Pitharo iran a: "Ibt ko Allah! Di ka dn khada sa kapkhatadming ka ko Yosof taman sa mabaloy ka a pakapapatayn, odi na mitapi ka ko miyamatay;"

86

Pitharo iyan a: "Aya bo a pphanonan ko ko rata a ginawa ko, go so boko akn na so Allah, go katawan ko phoon ko Allah so di niyo katawan."

87

"Hay manga wata ko, lalakaw kano na, go niyo pangdga so Yosof go so pagari niyan, na di kano khadai sa panginam ko limo o Allah: Mataan! a da a khadaan sa panginam ko limo o Allah, a rowar ko pagtaw a da pamaratiyaya."

88

Na kagiya a mangadap siran on (zaroman), na pitharo iran: "Hay Aziz, minisogat rkami ago so pagtaw ami so morala: Na adn a minioma mi a dagangan a garap: Na tarotopi kaming ka sa asad, go zadka i kaming ka: Mataan! a so Allah na mbalasan Iyan so manga barasadka."

89

Pitharo (o Yosof): "Ino katawan iyo so pinggolawla niyo ko Yosof ago so pagari niyan, gowani ko skano na di kano manga tatao?"

90

Pitharo iran: "Ba mataan! a ska na ska so Yosof?" Pitharo iyan: "Sakn so Yosof, go giyai so pagari ko: Sabnar a inikalimo kami o Allah: Mataan aya! a sadn sa mananggila, go phantang na mataan! a so Allah na di Niyan pagilangn so balas ko miphipiyapiya."

91

Pitharo iran: "Ibt ko Allah! Sabnsabnar a piyakalbi ka rkami o Allah, go mataan! a miyabaloy kami a titho a manga baradosa!"

92

Pitharo iyan: "Da a pangnsi niyo sa alongan nai: (pangninta a) napiyan kano o Allah, ka Skaniyan i lbi a Makalimoon ko Pphamangalimo!"

93

"Balingn iyo a bangkala akn nai na kolobn iyo ko paras i ama: ka an makatalingoma a pphakaylay. Go pakasonga niyo rakn so manga taalok rkano langon."

94

Na kagiya a makaliyo so pphlalalakaw, na pitharo i ama iran a: "Mataan! a sakn na titho akn a maggda so baw o Yosof: O di ako niyo mbaloya a lalong."

95

Pitharo iran: "Ibt ko Allah, mataan! a ska na matatago ka dn ko kiyaribat ka a andang."

96

Na kagiya a makawma so pphanonotholan sa mapiya, na inikolob iyan (so bangkala) ko paras (o Ya'qob), na somiyonod ko kapphakaylay niyan. Pitharo iyan: "Ba ko rkano da tharoa, mataan! a sakn na katawan ko phoon ko Allah so di niyo katawan?"

97

Pithato iran: "Hay ama ami, pangniyang ka a kamaap rkami o manga dosa mi, mataan! a skami na miyabaloy kami a manga baradosa."

98

Pitharo iyan: "Ipangni akn skano dn sa maap ko Kadnan ko: Mataan! a Skaniyan so Manapi, a Makalimoon."

99

Na kagiya a somld siran ko Yosof, na inikakp iyan so dowa loks iyan, go pitharo iyan a: "Sold kano sa Misir ka omiyog so Allah na somasarig kano."

100

Na piyakadarpa iyan so dowa a loks iyan ko panggaw, go somiyondong siran on sa kapangalimbabaan. Na pitharo iyan: "Hay ama, giyai so taabir o taginpn ko gowani! Sabnar a biyaloy skaniyan o Kadnan ko a bnar. Go sabnar a phipiyapiyaan ako Niyan, gowani a pakaliyon ako Niyan ko kalaboso, go piyakawma kano niyan a phoon ko pagonayan (sa Palistin), ko oriyan o kiyabinasaa rakn o shaytan ago so manga pagari ko. Mataan! a so Kadnan ko na Malai-gagaw ko kabaya Iyan. Mataan! a Skaniyan so Matao, a Mawngangn."

101

"Kadnan ko, sabnar a bigan akong Ka sa kapaar, go inindaong Ka rakn so taawil o manga tothol, a miyadn ko manga langit ago so lopa. Ska i Panarigan akn ko doniya, go so akhirat. Tarima akong Ka a mbabayorantang Rka, go pakaraota kong Ka ko manga bilangataw."

102

Giyaya man na pd ko manga tothol a migagaib, iphagilaham Ami rka (ya Mohammad): Na di ka kiran makamamasa gowani a pagopakatan iran so zowaan iran, a siran na pphagantangan siran.

103

Na da ko kadaklan ko manga manosiya apiya i kazabnar ka oba siran paratiyaya.

104

Na kna a ba ka kiran saya phangni sa sokay: da a antap iyan a rowar sa ndao ko manga kaadn.

105

Na madakl a tanda a matatago ko manga langit ago so lopa a pkhasagadan iran skaniyan, a siran na di iran tatagoon sa ginawa!

106

Go di pharatiyayaan o kadaklan kiran so Allah inonta a misasarta on a kapphanakoto iran!

107

Ba siran sasarig sa da a makatalingoma kiran a khikolob a siksa o Allah odi na di kiran makatalingoma so bangkit a mitalmba, a siran na di iran maiin'ngka?

108

Tharoang ka a: "Giyai okit akn, ipphanolon akn so (kaparatiyaya ko) Allah sii ko marayag a karina, sakn ago so taw a miyonot rakn. Na Soti so Allah! go di ako pd ko manga pananakoto!"

109

Na da a siyogo Ami ko miyaonaan ka (ya Mohammad) a rowar sa manga mama, a phagilahaman Ami siran, a pd ko taw ko manga ingd. Ba siran da lalakaw ko lopa, ka an iran maylay o antonaa i miyambtad o kiyabolosan o siran a miyaonaan iran? Na mataan! a so ingd a mawri i lbi a mapiya, a rk o siran a miyamananggila. Ba da a manga sabot iyo?

110

Taman sa kagiya a kadaan sa panginam so manga sogo go miyaantang iran a mataan! a siran na sabnar a piyakambokhag siran, na miyakaoma kiran so tabang Ami, na siyabt Ami so taw a kabaya Ami. Na di kharn so siksa Ami ko pagtaw a manga rarata i ongar.

111

Sabnsabnar a adn a matatago ko manga totholan kiran a thoma ko manga papantas i akal (giya Qor'an aya) na kna a ba tothol a pphangmbaalan, na ogaid na initanto ko miyaonaan iyan, go osayan ko langowan taman, go toroan go limo ko pagtaw a mapaparatiyaya.

Total Number of Verses: 43

1

Alif, Lam, Mim, Ra. (so Allah i Matao ko paka-aantapan Iyan on.) Giyaya so manga ayat ko kitab: Na so initoron rka a phoon ko Kadnan ka na bnar; na ogaid na so kadaklan ko manga manosiya na di siran mapaparatiyaya.

2

So Allah so iniporo Iyan so manga langit a da a manga polaos a khaylay niyo skaniyan; oriyan iyan na pithandingan Iyan so kapaar; go piyaka phasiyonot Iyan so alongan ago so olan (sa gii ron kanggonai). Oman i isa on na pphalalagoy sii ko wakto a mappnto. Titilikn Iyan so pkhawlawla, pphayagn Iyan so manga tanda, ka an iyo matangkd so kimbaratmowaan ko Kadnan iyo.

3

Go Skaniyan so komiyayat ko lopa, go tiyagoan Iyan oto sa manga palaw, go manga lawasayg: Na so oman i manga onga na biyaloy Niyan on a ngganapa a dowa: Ipndalong Iyan so gagawii ko dawndaw. Mataan! a adn a matatago roo man a titho a manga tanda ko pagtaw a pphamimikirann iran!

4

Go adn a matatago ko lopa a pizalbo a makandadaidair, go manga pamomolan a manga anggor, go prpran, go manga korma a khika riringkit, go di mariringkit: Pphakaygan sa ig a isa; na inilbi Ami so sabaad on ko sabaad sii ko kapkhanawn. Mataan! a adn a matatago roo man a titho a manga tanda ko pagtaw a pnggdagdaan iran!

5

Na oba ka phammsa, na aya iphammsa na so katharo iran a: "Ino amay ka mbaloy kami a botha, ba mataan! a skami na khatago kami dn ko kaadn a bago?" Siran so miyamangongkir ko Kadnan iran. Go siran man na so manga sangkali na mitogor ko manga lig iran: Go siran man i manga taw ko naraka, siran na ron siran on dn makakakal!

6

Na phangnin iran rka a kagaan o marata ko dapn so mapiya a: Sabnar a miyaypos ko miyaonaan iran so manga siksa ko lagid iran! Na mataan! a so Kadnan ka na titho a Malai-maap ko manga manosiya sii ko gi iran kandarowaka, go mataan! a so Kadnan ka na titho a Sangati-kapaniksa.

7

Na gii tharoon o siran a da pamaratiyaya a: "Ino a da a initoron on a tanda a phoon ko Kadnan iyan. Ska (ya Mohammad) na matag pphamakaiktiyar; na adn a bagian o oman i pagtaw a giinggonanao."

8

So Allah na katawan Iyan so ipkhawgat o langowan o babay, go so pkhorangn o manga roranan a wata, go so iphagoman Iyan, na so langowan taman na zisii ko Allah so diyangka Iyan.

9

Katawan Iyan so masoln ago so mapayag, a Mala a Maporo.

10

Magizan on so pd rkano a taw a inipnanay niyan so katharo go so taw a inipakatanog iyan; go so taw a skaniyan na mag-una ko gagawii go so phapayag ko kadawndaw.

11

(So manosiya) Na adn a pphamagilisa on (a manga malaikat) sii ko onaan iyan go sii ko oriyan iyan a: Sisiyapn iran skaniyan phoon sa sogoan o Allah. Mataan! a so Allah na di Niyan pagalinn so btad o pagtaw taman sa di iran alinn so btad o manga ginawa iran. Na igira a adn a piyakaantap o Allah ko pagtaw a marata, na da a phakarnon, go da a bagian iran a salakaw Rkaniyan a kaphanarigan.

12

Skaniyan so pphakiilay Niyan rkano so kilat, sa kalk na,go inam: Go Phagadn ko manga gabon, a khikappndan (sa oran)!

13

Go pthasbik so dalndg sa podi Rkaniyan, go so manga malaikat phoon sa kalk Rkaniyan: Na pmbotawanan Iyan so manga lthi, ipzogat Iyan oto ko taw a kabaya Iyan. Na siran na gii siran makiphapawala makapantag ko Allah, a Skaniyan i Sangati-kandadan'g!

14

Rk Iyan so katharo a bnar: Na so siran a pphanongganowin iran a salakaw ko Allah na da a khismbag iran kiran a mayto bo, inonta na lagid o ikakawa iyan so dowa palad a lima niyan ko ig, ka an makasampay ko ngari iyan na di ron phakasampay skaniyan: Ka da ko pangni o da pamaratiyaya inonta na matatago sa ilang.

15

Na pzojiod sa bagian o Allah so matatago ko manga langit ago so lopa sa onot ago tgl go (pzojiod) so manga along iran ko manga kapipita, go so manga kagabi gabi.

16

Tharoang ka: "Antawaa i khirk ko manga langit ago so lopa?" Tharoang ka a: "So Allah." Tharoang ka a: "Ino niyo khowaa so salakaw Rkaniyan a manga panarigan, a da a mipapaar iran a rk o manga ginawa iran a gona ago morala?" Tharoang ka: "Ba magizan so bota ago so pphakaylay? Antawaa ba magizan so manga lilibotng ago so maliwanag? Ba so piyangmbaalan iran a manga sakoto o Allah na miyaka pangadn siran sa lagid o kiya pangadn o Allah, na miyaka zasaropai kiran so manga kaadn?" Tharoang ka a: "So Allah i miyadn ko langowan taman: Go Skaniyan so Isaysa, a Phakabaas."

17

Piyakatoron Iyan a phoon ko langit so ig, na tomiyoga so manga baogan, sii ko diyangka iyan: Na miyakaawid so dgan sa borabora a maliliyawaw na pd on so pkhatonag iran ko apoy a singanin sa parahiyasan, odi na pagigimo, borabora a lagid iyan. Lagid aya a kapphayaga o Allah ko bnar ago so ribat. Na so pman so borabora na pkhailang a mibobowang; na so pman so phakaompiya ko manga manosiya na ptharg ko lopa. Lagid aya a kapphayaga o Allah ko manga ibarat.

18

Bagian o siran a tiyarima iran so (katharo o) Kadnan iran so mapiya. Na siran oto a da iran tarimaa skaniyan na apiya pn mataan! a rk iran so matatago ko lopa langon, go babidn pn a lagid iyan, na iyaon iran oto sa ginawa iran (na di kiran matarima). Siran man na bagian iran so marata a itongan: Go darpa iran so naraka Jahannam a mikharatarata a kadnan!

19

Ino so taw a bbnarn iyan a aya bo a initoron rka a phoon ko Kadnan ka na so bnar, ba lagid o taw a skaniyan na bota? Aya bo a phakasabot on na so manga papantas i akal;

20

Siran na itotoman iran sa tarotop so diyandi o Allah, go di siran pndorat ko pasad.

21

Go siran na gi iran pakazompatn so inisogo o Allah a kapakazompata on, go somasangkop siran ko Kadnan iran, go ipkhalk iran so marata a itongan;

22

Go siran na miphantang siran, sa singanin ko kasosoat o Kadnan iran; go inipamayandg iran so sambayang; go miyammgay siran ko inibgay Ami kiran sa masoln go mapayag; go iphagrn iran so mapiya ko marata: Siran man na bagian iran so phakatondog a ingd,

23

Manga sorga a tatap a phamakasold siran on, go so taw a miyaratiyaya a pd ko manga loks iran, go so manga karoma iran, go so manga mori ran a taw: Na so manga malaikat na pphamanold kiran ko oman iisa a pinto:

24

(Gi iran tharoon a:) "Kalilintad a sii rkano sabap ko kiyaphantang iyo! Na miyakapiyapiya so miyakatondog a ingd (a bagian niyo)!"

25

Na siran oto a pphamarngkasn iran so diyandi o Allah, na oriyan o kiyatanto niyan, go pthpdn iran so inisogo o Allah, a kapakazompata on, go pphaminasa siran ko lopa; na siran man na rk iran so morka; go rk iran so mikharatarata a ingd!

26

So Allah na pphakaloagn Iyan so rizkhi ko taw a kabaya Iyan, go phakasimpitn Iyan. Na miyababaya siran sabap ko kawyagoyag ko doniya a: Da ko kawyagoyag ko doniya ko khiphapantagn iyan ko akhirat inonta na matag sagad a kapipiya ginawa.

27

Na gii tharoon o siran a da pamaratiyaya a: "Ino a da a initoron on a tanda a phoon ko Kadnan iyan?" Tharoang ka (ya Mohammad) a: "Mataan! a so Allah na ndadagn Iyan so taw a kabaya Iyan; go pnggonanaon Iyan sii Rkaniyan so taw a somiyangor on,"

28

"Siran na miyamaratiyaya, go thatana so manga poso iran sabap ko tadm ko Allah: Tanodan ka sabap ko tadm ko Allah a kathatana o manga poso."

29

"So siran a miyamaratiyaya, go pinggalbk iran so manga pipiya, na kapakadaya a bagian iran, ago mapiya a khandodan."

30

Lagid man oto a kiyasogo Ami rka (ya Mohammad) sii ko pagtaw a sabnar a adn a miyaypos ko miyaonaan iran a manga pagtaw; ka an ka kiran kapphangadii so iniilaham Ami rka; ko kaoongkira iran ko (Allah a) Masalinggagaw! Tharoang ka a: "Skaniyan so Kadnan ko! Da a tohan a salakaw Rkaniyan! Skaniyan i siyarigan ko, go Skaniyan i Khandodan ko!"

31

Na opama ka mataan! a adn a pphangadian a miyapakalalakaw sa sabap rkaniyan so manga palaw, odi na miyabnsad sa sabap rkaniyan so lopa, odi na minimbitiyarai sa sabap rkaniyan so miyamatay, (na misabap sa Qor'an aya!) kna, ka kapaar o Allah so pkhasowa sa kalangolangowan iyan. Ba di katawi o siran a miyamaratiyaya a o kabaya o Allah, na mataan! a khatoro Iyan so manga manosiya langon? Na da a parphay o siran a da pamaratiyaya sa kapkhasogat iran a tiyoba, sabap ko pinggolawla iran, odi na makadarpa ka ko marani ko darpa iran, taman sa makatalingoma so diyandi o Allah; mataan! a so Allah na di pndorat ko diyandi.

32

Na sabnsabnar a adn a piyamagompat a manga sogo ko miyaonaan ka: Na piyakadamay Akn so siran a da pamaratiyaya, oriyan iyan na siniksa Akn siran: Na antonaa i miyambtad o siksa Akn (kiran)!

33

Ino so Skaniyan a tomotonggo ko oman i baraniyawa ko pinggalbk iyan (ba lagid o salakaw Rkaniyan)? Na mimbaal siran sa manga sakoto o Allah. Tharoang ka a: "Pamthowa niyo siran. Ba adn a maphanothol iyo Rkaniyan a di Niyan katawan ko lopa, antawaa ba sii bo ko kapapayag o katharo?" Kna! ka pipharasan Ko siran a da pamaratiyaya so antangan iran a marata, go piyakasilay siran ko lalan (a ontol). Na sadn sa dadagn o Allah, na da dn a makanggonanao ron.

34

Adn a bagian iran a siksa ko kawyagoyag ko doniya, na matatangkd a so siksa ko akhirat na lawan on sa kargn: Na da dn a bagian iran a makarn ko (siksa o Allah).

35

Aya ropaan o sorga a so inidiyandi ko miyamananggila, na pphamangondas ko kababaan iyan so manga lawasayg: So pangn'ngkn on na tatap ago so along iyan: Giyoto man i darpa o siran a miyamananggila; na aya darpa o da pamaratiyaya na so naraka.

36

Na so siran a inibgay Ami kiran so kitab na pkhababayaan iran so initoron rka: Na adn a pd ko pizagorompong a taw a oongkirn iyan so sabaad on. Tharoang ka (ya Mohammad) a: "Aya bo a inisogo rakn na so kasimba ako ko Allah, go di ko pakisakotowan Skaniyan. Skaniyan i ipphanolon akn, go sii Rkaniyan so khandodan akn."

37

Na lagid man oto a kinitoronn Ami (ko Qor'an), a kokoman a basa Arab na ibt o onoting ka so manga kabaya iran a ribat ko oriyan o kiyapakatalingoma rka o katao, na da dn a kapanarigan ka, go da a makalinding rka ko (siksa o) Allah.

38

Na sabnsabnar a somiyogo kami sa manga sogo ko miyaonaan ka (ya Mohammad), go singgayan Ami siran sa manga karoma, go manga moriyataw: Na da mapatot ko sogo oba adn a mitalingoma niyan a tanda o di sabap sa idin o Allah. Oman i taalik na adn a kitab iyan.

39

Pphonasn o Allah so kabaya Iyan: Go pakathataknaan Iyan (so kabaya Iyan), ka sii Rkaniyan so tomadng o kitab.

40

Na o pakiilayn Ami rka so sabaad ko ididiyandi Ami kiran (a siksa), odi na tangann Ami ska na aya bo a paliyogat rka na so kapamakasampay (o sogoan rka): Na sii Rkami so itongan.

41

Ba iran da maylay a mataan! a Skami na pzangorn Ami so lopa na pkhorangan Ami so manga kilid iyan? Na so Allah i pkhokom, da a phakarn ko kokoman Iyan: Go Skaniyan i Magaani-itongan.

42

Na sabnar a miyagantangan sa marata so siran a miyaonaan iran; na kapaar o Allah so antangan sa kalangolangowan Iyan. Katawan Iyan so pkhasokat o oman i baraniyawa: Na khatokawan dn o da pamaratiyaya a antawaa i khibagian ko phakatondog a ingd.

43

Na gii tharoon o siran a da pamaratiyaya a: "Kna a ba ka siyogo." Tharoang ka (ya Mohammad) a: "Kiyasanaan dn so Allah a Saksi rakn ago sii rkano, go so taw a adn a katao niyan ko kitab."

Total Number of Verses: 52

1

Alif Lam Ra. (so Allah i mataa ko paka-aantapan Iyan on. Giya ungkai a Qor'an) Na kitab a initoron Ami rka (ya Mohammad), ka an ka mapakaawa so manga manosiya phoon ko manga lilibotng sa mawit ko maliwanag sabap sa idin o Kadnan iran sii ko okit o Allah a Mabagr a Pphodin!

2

A so Allah, a so rk Iyan so zisii ko manga langit ago so zisii ko lopa. Na so kabinasa na bagian o da pamaratiyaya a pd ko siksa a sangat!

3

Siran na matotomo iran so kaoyagoyag ko doniya a di so akhirat, go pphangalang siran ko lalan o Allah go pphlolobaan iran on a kabkhog iyan: Na siran man i matatago ko kadadag a mawatan.

4

Na da a siyogo Ami a sogo a ba di sii ko basa o pagtaw niyan, ka an iyan kiran mapayag (so sogoan). Na ndadagn o Allah so taw a kabaya Iyan; go pnggonanaon Iyan so taw a kabaya Iyan: Go Skaniyan i Mabagr, a Mawngangn.

5

Na sabnsabnar a siyogo Ami so Mosa rakhs o manga tanda Ami, (sa pitharo Ami) a: "Pakaawa angka so pagtawng ka phoon ko manga lilibotng sa mawit ko maliwanag, go pakitadming ka kiran so manga limo o Allah." Mataan! a adn a matatago roo man a titho a manga tanda ko oman i mapantang a mananalamat.

6

Na gowani na pitharo o Mosa ko pagtaw niyan a: "Tadmi niyo so limo rkano o Allah gowani ko sabtn kano Niyan ko pagtaw o Pir'awn; a irarasay ran rkano so marata a siksa, go pphanombaliin iran so manga wata iyo a manga mama, na phlambaan iran so manga babay rkano:" Na adn a matatago roo man a tiyoba a phoon ko Kadnan iyo a lbi a mala.

7

Na gowani na piyakalangkap o Kadnan iyo a: "Mataan! a o panalamat kano, na pagomanan rkano dn (so limo Akn); go mataan! a o ongkir kano, na mataan! a so siksa Akn na tanto a margn."

8

Na pitharo o Mosa a: "O ongkir kano skano ago so taw a matatago ko lopa langon na mataan! a so Allah na da dn a mapkhno Niyan, a Khirk ko podi."

9

Ba rkano da makatalingoma so totholan ko siran a miyaonaan niyo? So pagtaw Noh, go so Ad, go so Samod, go so siran a miyaoriyan iran? da a matao kiran a inonta so Allah. Miyakawma kiran so manga sogo kiran rakhs o manga rarayag a karina; na piyangkhb iran so manga lima iran, sii ko manga ngari iran (sa otg), go pitharo iran a: "Mataan! a skami na inongkir ami so inisogo rkano to, go mataan! a skami na titho a zasangka kami ko ipndolon iyo rkami oto sa mapayag a kazangka."

10

Pitharo o manga sogo kiran a: "Ba adn a sangka ko makapantag ko Allah, a miyadn ko manga langit ago so lopa?" Pthawagn kano Niyan, ka an Iyan rkano mapakada so manga dosa niyo, go pakalalanatn kano Niyan taman ko taalik a mappnto". Pitharo iran a: "Kna a ba kano di manosiya a lagid ami. Khabayaan iyo a kaalangan kami niyo ko pzimbaan o manga loks ami: Na witi kami niyo sa katantowan, a mapayag,"

11

Pitharo kiran o manga sogo kiran a: "Kna a ba kami manosiya a lagid iyo, na ogaid na so Allah na pmbgan Iyan sa limo so taw a kabaya Iyan ko manga oripn Iyan. Na di rkami patot oba adn a mawit ami rkano a katantowan inonta o sabap ko idin o Allah. Na so bo so Allah i sarigi o miyamaratiyaya."

12

"Na andamanaya i di ami kasarigi ko Allah? A sabnar a tiyoro kami Niyan ko manga lalan ami; na mataan! a pphantang kami dn ko kiyapamakasakiti niyo rkami. Na so bo so Allah i sarigi o khisasarig."

13

Na pitharo o siran a da pamaratiyaya ko manga sogo kiran: "Mataan! a pakaawaan ami skano dn ko lopa ami, odi na mataan! a makakasoy kano dn ko okit tano". Na iniilaham kiran o Kadnan iran a: "Mbinasaan Ami dn so manga darowaka!"

14

"Go pakaphagingdn Ami skano dn ko lopa ko oriyan iran. Giyoto man na rk o taw a inikalk Iyan so kapakatindg Iyan ko hadapan Ko, go inikalk Iyan so siksaz Akn."

15

Na miyangni siran sa tabang (ko Allah), na miyalogi so oman i takabor a somosorang (ko bnar).

16

Sii ko khabolosan iyan so naraka Jahannam, go phakainomn ko ig a dana':

17

Phlikgan on, go margn a kaphlinoa niyan on go pphakatalingoma on so kapatay phoon ko oman i darpa, a di bo phatay skaniyan: Go sii ko khabolosan iyan so siksa a mitataralo.

18

Aya ibarat o siran a da pamaratiyaya ko Kadnan iran na so manga amal iran na lagid o ombi, inibayog skaniyan o ndo ko alongan a kapananagompot iyan: da a khasakm iran ko pinggalbk iran a mayto bo: Giyoto man na skaniyan ikadadag a miyakawatawatan.

19

Bang ka di katawi a mataan! a so Allah i miyadn ko manga langit ago so lopa sii ko bnar? O kabaya Iyan, na khailang kano Niyan, go phakasambi sa kaadn a bago,

20

Na kna a ba oto margn ko Allah.

21

Na mabayar siran ko Allah langon: Na tharoon o manga lolobay ko siran a miyamanakabor a: "Mataan! a skami na miyabaloy kami a pphangongonotan rkano; na una skano khalinding kami niyo ko siksa o Allah sa mayto bo?" Tharoon iran a: "O tiyoro kami o Allah, na miyatoro ami skanodn: Magizan rktano o ino mikhaminan tano, antawaa ba tano dn miphantang: Ka da bo a kaphagapasan tano."

22

Na tharoon o shaytan amay ka mapasad so kokoman a: "Mataan! a so Allah na inidiyandi Iyan rkano so diyandi a bnar: Na inidiyandi akn rkano (so ribat), na diyorat akn skano. Na da a miyabaloy a kapaar akn rkano ogaid na giyogo akn skano, na inonotan ako niyo: Na di ako niyo phannditi, na aya pannditi niyo na so manga ginawa niyo. Di akn skano khatabangan, go di ako niyo khatabangan. Mataan! a sakn na inongkir akn so kinisakoto niyo rakn (ko Allah) gowani. Mataan! a so manga darowaka na adn a bagian iran a siksa a malipds."

23

Na pakasoldn so siran a miyamaratiyaya, go pinggalbk iran so manga pipiya ko manga sorga a pphamangondas ko kababaan iyan so manga lawasayg, makakakal siran roo sabap ko idin o Kadnan iran. Aya gi iran roo ikhokormata na "Salaam!"

24

Bang ka di katawi o andamanaya i kiyambaal o Allah sa ibarat? Katharo a mapiya lagid o kayo a mapiya, a so itado niyan na thatakna, na so sapak iyan na zisii ko kawang,

25

Pkhibgay niyan so onga niyan ko oman i masa, sabap sa sogoan o Kadnan iyan. Na phagmbaalan o Allah so manga ibarat ko manga manosiya, ka an siran pphakatanod.

26

Na aya ibarat o katharo a marata na lagid o kayo a marata a: Miyaandot ko liyawaw o lopa, a da a thataknaan iyan.

27

Pakathataknaan o Allah ko siran a miyamaratiyaya so katharo a thatana (so Laa Ilaaha Illallaah), sii ko kawyagoyag ko doniya, go sii ko akhirat; go ndadagn o Allah so manga darowaka: Na pnggolawlaan o Allah so kabaya Iyan.

28

Bang ka da katokawi so siran a pizambi iran so limo o Allah sa kadaa tadm. Na piyakapagingd iran so pagtaw iran ko ingd a binasa;

29

A so naraka Jahannam? A phakasold siran on na miyakaratarata a phagingdan!

30

Na miyangmbaal siran sa manga sakoto o Allah, ka an iran madadag (so manga manosiya) phoon ko lalan o Allah! Tharoang ka a: "Zonor kano dn! ka mataan! a aya khabolosan iyo na so naraka!"

31

Tharoang ka ko manga oripn ko a miyamaratiyaya a: Pthindgn iran so sambayang, go pphammgay siran ko inibgay Ami kiran, sa masoln ago mapayag, ko dapn kapakatalingoma o alongan a da a kaphapasai ron go da a kambobolayoka on (a phakabgay a gona).

32

So Allah so miyadn ko manga langit ago so lopa, go piyakatoron Iyan a phoon ko kawang so ig, na minisabap on a kiyapakagmawa Niyan ko manga onga a pagpr rkano; go inipagadil Iyan rkano so manga kapal, ka adn pphamakaktas ko kalodan sabap ko sogoan Iyan; go inipagadil Iyan rkano so manga lawasayg (ka an iyo gii kanggonai):

33

Go inipagadil Iyan rkano so alongan ago so olan, a tatap a dowa oto ko okit iran; go inipagadil Iyan rkano so gagawii ago so dawndaw (ka an iyo gii kanggonai)

34

Go bigan kano Niyan ko oman i piyangni niyo Rkaniyan. Na o pagitonga niyo so limo o Allah, na di niyo dn maytong. Mataan! a so manosiya (a da paratiyaya) na titho a darowaka, a da a tadm iyan.

35

Na gowani na pitharo o Ibrahim: "Kadnan ko, baloyang Ka angkai a ingd (a Makkah) a panarigan: Go pakawatana kong Ka ago so manga moriyataw akn ko kapakasimba mi ko manga barahala."

36

"Kadnan ko, mataan! a siran na miyakadadag siran sa madakl ko manga manosiya; na sadn sa monot rakn na mataan! a skaniyan na pd akn, na sadn sa somorang rakn na mataan! a Ska i Manapi, a Makalimoon."

37

"Kadnan ami, mataan! a sakn na piyakapagingd akn so sabaad ko manga moriyataw akn ko balintad (sa Makkah) a di kapmbasokan, a marani ko walaing Ka a pagaadatan; Kadnan ami! ka an iran mipamayandg so sambayang: Na baloyang Ka so manga poso o sabaad ko manga manosiya a magawi kiran, go riskhiing Ka siran ko manga onga: ka an siran makapanalamat."

38

"Kadnan ami, mataan! a Ska na katawan Ka so isosoln ami go so ipapayag ami: Na da a makaphagma ko Allah a mayto bo sii ko lopa, go da a (makaphagma on) sii ko langit."

39

"So podi na rk o Allah, a so inibgay Niyan rakn sii ko kiyaloks akn so Ismail go so Is'haq: Mataan! a so Kadnan ko i titho a Pphakan'g ko pangni!"

40

Kadnan ko, baloya kong Ka a pphamayandg ko sambayang, go so sabaad ko manga moriyataw akn, Kadnan ami! Go tarimaang Ka so pangni akn.

41

"Kadnan ami, napii akong Ka, go so mbala a loks akn, go so miyamaratiyaya, ko alongan a kapakatindg o itongan!"

42

Na ding ka dn tharimaa i ba di maiin'ngka o Allah so gii nggolawlaan o manga darowaka. Aya bo a kapakalalanata Niyan kiran na taman bo ko alongan a khasambolayang on so manga kaylay,

43

Gii siran makanggagaan a milalangag iran a manga olo iran, a di siran phakaprk, go so manga poso iran na makakawang (sabap sa kalk)!

44

Na pakiiktiyaring ka ko manga manosiya so alongan a kapakatalingoma kiran o siksa: Na tharoon o siran a da pamaginontolan: "Kadnan ami, pakalanata kaming Ka, sa taman bo ko taalik a di mathay: Ka tarimaan ami so sogoan Ka, go pagonotan ami so manga sogo!" (na ismbag kiran:) "Ba kano da zapa gowani sa da dn a kakhada iyo?"

45

Na miyakapagingd kano ko piyamagingdan o siran a siyalimbotan iran a manga ginawa iran; go miyapayag rkano so inikidia Mi kiran; go inmbaalan Ami rkano so manga ibarat!

46

Na sabnar a piyagantangan iran so antangan iran a marata, na sii ko Allah so (balas o) antangan iran, go da mapatot ko antangan iran o bawn misabap a kaylang o manga palaw!

47

Na ding ka dn tharimaa so Allah a ba ndorat ko diyandi Iyan ko manga sogo Iyan: Mataan! a so Allah na Mabagr a Phapaar ko kandadan'g.

48

Sii ko alongan a kasambian so lopa sa salakaw a lopa, go (kasambian) so manga langit, go mabayar siran ko hadapan o Allah, a Isaysa, a Phakabaas;

49

Na maylaing ka so manga baradosa sa alongan oto a piyakaphapatonga ko manga patong; -

50

So manga nditarn iran na tombaga a plangga, go mikokolob ko manga paras iran so apoy;

51

Ka imbadal o Allah ko oman i baraniyawa so pinggalbk iyan; mataan! a so Allah na Magaani-itongan.

52

Giya ungkai (a Qor'an) na tarotop a ndao ko manga manosiya: Go an on misabap a kapaka iktiyara kiran, go an iran katokawi a Skaniyan bo i tohan a Isaysa: Go an makowa a ndao o manga papantas i akal.

Part 14

Total Number of Verses: 99

1

Alif, Lam, Ra. (so Allah i Matao ko paka-aantapan Iyan on.) Giyaya na manga ayat ko kitab, go Qor'an a miyakapayag (ko ontol).

2

Madakl a kapndingandingana o siran a da pamaratiyaya, sa oba siran bo miyabaloy a manga Moslim.

3

Botawaning ka siran, ka an siran pphakakan, go an iran pkhasawiti (so doniya): Go so kattmbanga kiran o inam: Ka katokawan iran bo.

4

Na da a bininasa Mi a phagingd a ba da a kitab iyan a mappnto.

5

Di kapngagaanan o pagtaw so adial iyan, go di iran khisndod.

6

Na pitharo iran: "Hay tiyoronan ko ndao, mataang ka a titho a pmbthangn!"

7

"Ino kaming ka di khawiti sa malaikat o ska na pd ko khipmamataan?"

8

(Pitharo o Allah:) A di Ami phakatoronn so malaikat inonta o rakhs o bnar: Na samawto na di siran dn makanggowamay!.

9

Mataan! a Skami na Skami i tomiyoron ko (Qor'an a) ndao; go mataan! a Skami i titho a somisiyap on.

10

Na sabnsabnar a siyogoan Ami so miyaonaan ka sii ko pithanggisa ka tindg ko miyangaoona:

11

Na da a miyakatalingoma kiran a sogo a ba iran da pamagrgi skaniyan.

12

Lagid aya man i kipzanipn Ami ron ko manga poso o manga baradosa,

13

A di siran on pharatiyaya; oba di sabnar a somiyagad so miyasowa o miyangaoona.

14

Na apiya pn lomka Kami kiran sa pinto ko langit, na mabaloy siran a makapanik siran on,

15

Na tharoon iran dn a: "Mataan! a birg so manga kaylay tano: Kna, ka sktano na pagtaw a miyangababalik a mata niyan."

16

Na sabnsabnar a tiyagoan Ami so langit sa manga darpa o manga bitoon, go inipharas Ami ron oto a rk o pphamakaylay ron;

17

Na siniyap Ami oto phoon ko langowan a shaytan a pradiyamn:

18

Ogaid na so miyamankhaw sa kan'g, na siyaloba skaniyan a kadg, a mapayag.

19

So lopa na kiyayat Ami oto; go piyamakatindgan Ami oto sa manga palaw; go piyamakathoan Ami oto sa mbarambarang a didiyangkaan.

20

Go singgayan Ami skano ron sa manga kawiyagan ago so kna a ba skano i pphamagpr on.

21

Na da a nganin a ba Ami di mipapaar so khitatagoan on; go da a phakatoronn Ami ron a ba di madidiyangka a mappnto.

22

Go pphakasambrn Ami so manga undo a pphamakatago sa ig ko gabon, na piyakatoron Ami a phoon ko kawang so ig, na piyakainom Ami skano ron, na kna a ba skano i makakhakapaar on.

23

Go mataan! a titho a Skami i pphangoyag, go pphangimatay: Go Skami i manga waris (a phamaapaar).

24

Na sabnsabnar a katawan Ami so miyangaoona rkano, go sabnsabnar a katawan Ami so phangaoori rkano.

25

Mataan! ka so Kadnan ka na plimodn Iyan siran, Skaniyan na Mawngangn a Matao.

26

Na sabnsabnar a inadn Ami so manosiya a phoon ko lopa a gango, a phoon ko lipaw a miyarmbis;

27

Go so jinn na inadn Ami mona a phoon ko apoy a mararas.

28

Na gowani na pitharo o Kadnan ka ko manga malaikat a: "Mataan! a Sakn na magadn Ako sa manosiya, a phoon ko lopa a gango, a phoon ko lipaw a miyarmbis;"

29

"Na anda i kaymasada Ko ron go masokan Ko skaniyan sa niyawa, na sondong kano ron sa pangangalimbabaan kano."

30

Na miyangalimbabaan on so manga malaikat, sa tanan siran, langon:

31

Inonta so iblis: Ka somiyangka oba mabaloy a pd ko miyamangalimbabaan.

32

Pitharo (o Allah): "Hay iblis! antonaa i miyakarn rka sa dang ka kapangpd ko miyamangalimbabaan?"

33

Pitharo iyan a: "Di rakn patot oba ako pangalimbabaan ko manosiya, a inadn Ka a phoon ko lopa a gango, a phoon ko lipaw a miyarmbis."

34

Pitharo (o Allah): "Na awa ka phoon ko langit; ka mataan! a ska na inibowang;"

35

"Go mataan! a zisii rka so morka sa dayon ko alongan a kambabadala."

36

Pitharo iyan: "Kadnan ko, na pakanayawa kong Ka sa dayon ko alongan a kaoyaga kiran."

37

Pitharo (o Allah): "Na mataan! a ska na pd ko phamakanayawn"

38

"Taman ko alongan a masa a mappnto."

39

Pitharo iyan: "Kadnan ko, ibt ko kiyabaloyang Ka rakn a dadag, na mataan! a barayatn ko siran dn (ko kandarowaka) ko lopa, go mataan! a dadagn ko siran dn langon,"

40

"Inonta so manga oripn ka, a pd kiran a miyangatotolabos (Rka)."

41

Pitharo (o Allah) a: "Katii so lalan Rakn a makaoontol (a di Ko ipndaraynon)."

42

"Mataan! a so manga oripn Ko na da a mapkhapaar ka kiran, a rowar ko taw a inonotan ka niyan a pd ko miyangadadadag."

43

Go mataan! a so naraka Jahannam na diyandi kiran dn langon!

44

Pito a pinto iyan: Oman i isa pinto na adn a bagian iyan kiran a sabaad a missnggay.

45

Mataan! a so miyamananggila na makaphagingd ko manga pamomolan go manga bowalan.

46

(Tharoon kiran a:) "Sold kano ron sa kalilintad a somasarig kano."

47

Na ilangn Ami so matatago ko manga rarb iran a siig a: Phapagariya siran, a zisii ko manga kantir a khipagaadapadapa.

48

Daa phakatalingoma kiran roo a dokaw, go di siran on dn maphamakaawa.

49

Pamanotholang ka ko manga oripn ko a: Mataan! a Sakn na Sakn so Manapi, a Makalimoon;

50

Go mataan! a so iphaniksa Akn na giyoto so siksa a malipds.

51

Go pamanotholang ka kiran so manga banto o Ibrahim:

52

Gowani na somiyold siran on, na mitharo siran sa: "Salaam!" Pitharo o Ibrahim a: "Mataan! a Skami na ipkhalk ami skano!"

53

Pitharo iran a: "Di ka khalk! ka mataan! a skami na phanotholan ami ska sa (ipmbawata aka a) wata a matao."

54

Pitharo iyan: "Ino niyo rakn phanothola (a kapmbawata akn) a riyaot ako a kaloks? Na antonaa i sabap a kaphanothola niyo rakn (saya)?"

55

Pitharo iran a: "Piyanothol ami rka so bnar: Na di ka phangpd ko piyangaadaan sa panginam!"

56

Pitharo iyan: "Na ba adn a taw a khadaan sa panginam ko limo o Kadnan iyan, a rowar ko mithataridadag?"

57

Pitharo iyan: "Na antonaa i zowaan iyo, hay manga sogo (o Allah)?"

58

Pitharo iran a: "Mataan! a skami na siyogo kami ko pagtaw a manga baradosa (a pagtaw o Lot),"

59

"Inonta so taalok ko Lot: Mataan! a skami na zabtn ami siran dn langon,"

60

"Inonta so karoma niyan, ka kiyokom ami a mataan! a skaniyan na pd dn ko phangakakal (ko siksa)."

61

Na kagiya a makawma ko Lot so manga sogo (a manga malaikat),

62

Na pitharo iyan a: "Mataan! a skano na pagtaw a di makikilala."

63

Pitharo iran a: "Kna, ka inowit ami rka so (siksa a) siran na zasangka on so pamikiran iran;"

64

"Go minitalingoma mi rka so bnar, go mataan! a skami na titho kami a mmamataan."

65

"Na panglmn ka so taalok rka, ko sabaad ko kagagawii, go tondogang ka siran sa talikhodan: Na oba adn a domingil rkano a isa bo, go taros kano sa sadn sa sogoan rkano."

66

Na piyakitokawan Ami ron angkoto a khasowa, a mataan! a khathiphad so siran aya ko kapitai kiran.

67

Na miyakaoma so taw ko bandar a ingd a pkhababaya siran.

68

Pitharo (o Lot) a: "Mataan! a siran nai na khibobolos rakn: Na di ako niyo ndiyamana: "

69

"Go kalkn iyo so Allah, go di ako niyo phakaytoa."

70

Pitharo iran a: "Ba ami rka da saparn, so (kapakabolosa ko) khi pananangga?"

71

Pitharo iyan: "Katii so manga wata akn a manga babay, (na pamangaroma kano ron) oba adn a pnggolawlaan iyo."

72

Ibt ko kawyagoyag ka (ya Mohammad), ka mataan! a siran na matatago siran dn ko kabbrg iran a pphromparompak siran,

73

Na miyadansal siran o lalis ko kiyasbangi kiran o alongan.

74

Na biyaloy Ami so liyawaw (o ingd iran) a didalm, go piyakawranan Ami siran sa ator a phoon ko lopa a kiyomba.

75

Mataan! a adn a matatago roo man a titho a manga tanda a bagian o pphamangilay sa piratas.

76

Go mataan aya! a titho a matatago ko lalan a da maawg.

77

Mataan! a adn a matatago roo man a titho a tanda a bagian o miyamaratiyaya!

78

Na mataan aya! a miyabaloy so manga taw sa Ayka (a pagtaw o Shoayb) a titho a manga darowaka;

79

Na siniksa Ami siran. Na mataan! a giya dowaya (a ingd) na sabnar a matatago ko mala a lalan, a mapapayag.

80

Na sabnsabnar a piyakambokhag o manga taw sa Hijr (a pagtaw o Salih) so manga sogo (o Allah):

81

Go inibgay Ami kiran so manga tanda Ami, na tiyalikhodan iran skaniyan.

82

Go miyanonggirb siran ko manga palaw sa manga walay, a khisasarig siran.

83

Na miyadansal siran o lalis ko kiyapitai kiran,

84

Na da kiran makalinding so pinggalbk iran!

85

Na da ko kiyaadna Mi ko manga langit, ago so lopa, go so nganin a pagltan a dowa nan, inonta na sii ko bnar. Na mataan! a so bangkit na phakatalingoma dn. Na dapayangka (kiran) sa kadapay a maliwanag.

86

Mataan! a so Kadnan ka na Skaniyan so Pphangadn, a Matao.

87

Na sabnsabnar a bigan Ami ska sa pito a manga ayat (a so Fatiha) a gii makhasokasoy, go so Qor'an a Sslaan.

88

Ding ka phakaotnga so (kaylay o) dowa matang ka ko nganin a piyakisawitan Ami oto a pizoson, ko sabaad kiran, go ding ka siran pmbokoon: Go pakainayang ka so gowagowaing ka ko miyamaratiyaya.

89

Go tharoang ka a: Mataan! a sakn so pphamakaiktiyar, a mapayag,

90

Lagid o initoron Ami ko mimbabagibagi,

91

Siran na biyaloy iran so Qor'an a di bo dn pira baad.

92

Na ibt ko Kadnan ka, ka mataan! a iiza Ami kiran dn langon,

93

So pinggolawla iran.

94

Na payagang ka so sogoan rka, go talikhoding ka so manga pananakoto;

95

Mataan! a Skami na lininding Ami ska ko gii rka zosodi,

96

A siran so pphangmbaal sa rimbang o Allah a tohan a salakaw: Na katokawan iran bo

97

Na sabnsabnar a katawan Ami a mataan! a ska na ipnggagt a rarb ka so gi iran tharoon.

98

Na pthasbikn ka so podi ko Kadnan ka, go pangpd ka ko pphamanojiod;

99

Go zoasoatang ka so Kadnan ka taman sa kapakatalingoma rka o kapatay.

Total Number of Verses: 128

1

Phakatalingoma dn so sogoan o Allah: Na di niyo phagalokaloki skaniyan: Soti Skaniyan, go Maporo a ka-aawat Iyan ko ipphanakoto iran On!

2

Pphakitoron Iyan ko malaikat so wahi phoon sa sogoan Iyan ko taw a kabaya Iyan ko manga oripn Iyan: "Sa pakiin'ngkaan iyo a mataan aya! a da a tohan a salakaw Rakn: Na onoti Ako niyo."

3

Inadn Iyan so manga langit ago so lopa sii ko bnar: Maporo a ka-aawat Iyan ko ipphamanakoto iran On!

4

Inadn Iyan so manosiya a phoon sa notfa (a ig a phopoyot); na apiya mawto dn na skaniyan na lampawi a mapayag!

5

Go so manga ayam na inadn Iyan oto a rk iyo, a adn a matatago on a pangrn (sa tnggaw), go manga pd a osba, go so sabaad on na pkhakan iyo.

6

Go adn a rk iyo a matatago on a kataid ko masa a kapkhodala niyo ron, go so masa a kapphakaliyowa niyo ron;

7

Go pphakaawid ko manga awid iyo a manga ppnd sii ko ingd a di kano ron ipraot odi misabap ko kargni ko manga ginawa: Mataan! a so Kadnan iyo na titho a Malai-gagaw, a Makalimoon.

8

Go (inadn Iyan) so manga koda, go so manga bigal, go so manga khimar, ka an iyo to gii kakhodai, go paramanis (iyo); go phangadn sa di niyo katawan.

9

Na sii ko Allah so matitho a lalan, na so manga pd (a lalan) na makasisilay. Na o kabaya (o Allah) na miyatoro kano Niyan dn langon.

10

Skaniyan so piyakatoron Iyan phoon ko kawang so ig a: Pphakaynom kano ron, go pkhisabap on so (kapphakatho o) kayo a mapphakakan iyo ron (so manga ayam iyo).

11

Pkhisabap on a kapphakathoa Niyan rkano ko manga prpran, go so manga zayton, go so manga korma, go so manga anggor, go so pizoson a manga onga: Mataan! a adn a matatago roo man a titho a karina a rk o pagtaw a pphamimikirann iran.

12

Na inipagadil Iyan rkano so gagawii go so dawndaw; go so alongan go so olan (ka an iyo gii kanggonai); go so manga bitoon na phapasiyonot siran ko sogoan Iyan: Mataan! a adn a matatago roo man a titho a manga tanda ko pagtaw a pnggdagdaan iran.

13

Go (inipagadil Iyan rkano) so inadn Iyan rkano ko lopa a mbidabida so manga warna niyan: Mataan! a adn a matatago roo man a titho a tanda ko pagtaw a khipakatatadm.

14

Na Skaniyan so inipagadil Iyan so kalodan, ka an kano pphakakan ko pphakapoon on a sapo (a sda) a malmk, go an iyo ron mapphakagmaw so pakayan a gii niyo to manditar; go pkhailaing ka so manga kapal a pphamangtas on, go ang kano gii makambabanog ko kakawasaan Iyan, go ang kano makapanalamat.

15

Na tiyagoan Iyan so lopa sa manga palaw, ka oba kano Niyan pkhakoyong; go (tiyagoan Iyan sa) manga lawasayg go manga lalan; kaang kano makakdg sa ontol;

16

Go manga padoman; na sabap ko manga bitoon na siran na pphakakdg siran sa ontol.

17

Ino so pphangadn ba lagid odi phakaadn? Ino kano di phananadm?

18

Na o pamagitonga niyo so limo o Allah, na di niyo dn maytong: Mataan! a so Allah na titho a Manapi, a Makalimoon.

19

Na so Allah i Matao ko isosoln iyo, go so ipapayag iyo.

20

Na so siran a pzimbaan iran a salakaw ko Allah, na da a khaadn iran a mayto bo, ka siran na pphangmbaalan.

21

Maatay siran, kna a ba manga oyagoyag: Go di iran katawan o anday kapagoyaga kiran.

22

So Tthan iyo na tohan a Isaysa: Na siran a di mapaparatiyaya ko akhirat, na so manga poso iran na moongkir, a siran na manga takabor.

23

Matatangkd a mataan! a so Allah na katawan Iyan so isosoln iran, go so ipapayag iran: Mataan! a Skaniyan na di Niyan khabayaan so manga takabor.

24

Na igira a pitharo kiran a: "Antonaa so initoron o Kadnan niyo?" Na tharoon iran a: "Manga iringa a kabokhag o miyangaoona!"

25

Ka kagiya a khaawidan iran so manga dosa iran a tarotop ko alongan a qiyamah, go so (lagid o) manga dosa o siran a pkhadadag iran sabap ko di katao. Tanodan, ka miyakaratarata so khaawidan iran!

26

Sabnar a miyagantangan sa marata so miyaonaan iran: Na diniyongkat o Allah so manga onayan o manga walay iran, na minirobar kiran so atp ko kaporoan iran; go miyatalingoma siran o siksa sa da a katawi iran on.

27

Oriyan iyan na diyamann Iyan siran ko alongan a qiyamah, go tharoon Iyan: "Anda dn so inipririmbang iyo Rakn, a so da kano pagayonayon sa makapantag kiran?" Tharoon o siran a piyamgan ko katao a: "Mataan! a so kadiyaman sa alongan nai go so marata na sii ko da pamaratiyaya,"

28

Siran na thangann siran o manga malaikat a ma-aaniyaya iran so manga ginawa iran. Na makaphasiyonot siran (sa matharo iran a:) "Kna a ba kami gii nggolawla sa marata". (na tharoon kiran a:) "Oway na, mataan! a so Allah na katawan Iyan so gii niyo nggolawlaan;"

29

"Na sold kano ko manga pinto a naraka Jahannam, sa makakal kano ron dn". Na miyakaratarata dn a darpa o manga takabor.

30

Na pitharo ko siran a miyamananggila (ko marata) a: "Antonaa so initoron o Kadnan niyo?" Na pitharo iran a: "Mapiya". Adn a bagian o siran a miphipiyapiya sangkai a doniya a mapiya, na matatangkd a so ingd a mawri i taralbi a mapiya, na miyakapiyapiya dn a ingd o miyamananggila,

31

Manga sorga a tatap a phamakasold siran on: Pphamangondas ko kababaan iyan so manga lawasayg: Khakowa iran roo so nganin a kabaya iran: Lagid aya man a imbalas o Allah ko miyamananggila,

32

Siran na thangann siran o manga malaikat a phipiyapiya siran, sa gi iran tharoon a: "Kalilintad a sii rkano; sold kano ko sorga, sabap ko kiyapagamal iyo (sa mapiya)."

33

Ba adn a pnayawn iran a rowar ko kapakatalingoma kiran o manga malaikat, odi na so kapakatalingoma o sogoan o Kadnan ka? Lagid aya man a pinggolawla o siran a miyaonaan iran. Na da siran salimboti o Allah: Na ogaid na siran i pzalimbot ko manga ginawa iran.

34

Na miyasogat siran o manga rarata ko pinggalbk iran, go kiyalikopan siran o piyamagompat iran (a siksa).

35

Na pitharo o siran a miyamanakoto a: "O kabaya o Allah, na da a masimba mi a salakaw Rkaniyan a mayto bo, skami ago so manga loks ami, - go da a misapar ami a salakaw (ko inisapar Iyan) a mayto bo." Lagid aya man a pinggolawla o siran a miyaonaan iran. Na ba adn a paliyogat ko manga sogo a rowar ko kapamakasampay (o sogoan o Allah) a mapayag?

36

Na sabnsabnar a siyogo an Ami so oman i pagtaw sa sogo (a pphamakalangkapn iran a:) "Zoasoata niyo so Allah, go pakawatani niyo so Tagot:" Na adn a pd kiran a taw a tiyoro o Allah, go adn a pd kiran a taw a miyatangkd on so kadadag. Na lalakaw kano ko lopa, na pagilaylaya niyo o antonaa i miyambtad o kiyaakiran ko piyamakambokhag iran (so manga sogo o Allah).

37

Apiya i kapanamaring ka sa katoro iran, na mataan! a so Allah na di Niyan thoroon so taw a ndadagn Iyan, go da dn a mamakatabang kiran.

38

Na mizapa siran ko Allah a pithamanan o manga sapa iran, sa di pagoyagn o Allah so taw a phatay: Oway na, diyandi Iyan aya a matatangkd: Na ogaid na so kadaklan ko manga manosiya na di iran katawan.

39

Ka an Iyan kiran mapayag so di iran phagayonayonan, go an katokawi o siran a da pamaratiyaya a mataan! a siran na miyabaloy siran a manga bokhag.

40

Aya bo a ptharoon Ami ko apiya antonaa igira a kabaya Ami a kapagadna Mi ron, na so katharo Ami ron ko: "Kon", na maadn.

41

Na so siran a miyamanogalin sa ingd makapantag ko Allah ko oriyan o kiyapangarasii kiran, - na pakaphagingdn Ami siran dn ko doniya sa mapiya; na matatangkd a so balas ko akhirat i lbi a mala o siran na katawi ran!

42

Siran so miphapantang, go so bo so Kadnan iran i sasarigan iran.

43

Na da a siyogo Ami ko miyaonaan ka (ya Mohammad) a rowar sa manga mama, a phagilahaman Ami siran: Na izaan iyo ko adn a sabot iyan o skano na di niyo katawi.

44

Rakhs o manga rarayag a karina, go so manga kitab; na initoron Ami rka so Qor'an, ka an ka mapagosay ko manga manosiya so initoron kiran, go an iran mapphamimikiran.

45

Ba sasarig so siran a miyamagantangan ko manga rarata sa di siran landngn o Allah ko lopa, odi na di siran matalingoma o siksa sa di iran maiin'ngka?

46

Odi na di Niyan siran siksaan ko gi iran kazorombaling, a di siran makapalagoy?

47

Odi na di Niyan siran siksaan sa mazaginton a maalk siran na mataan! a so Kadnan iyo na tanto a Masalinggagaw, a Makalimoon

48

Ba iran da maylay so langowan taman a inadn o Allah, a gii mrombaromba so manga along iyan, ko manga kawanan ago manga diwang, a mangangalimbabaan ko Allah, a phapasiyonot siran?

49

Na pzojiod ko Allah so matatago ko manga langit go so matatago ko lopa a baraniyawa, go so (pn) so manga malaikat, a siran na di siran phanakabor.

50

Ikaalk iran so Kadnan iran a kaporoan iran, go inggogolalan iran so sogoan kiran.

51

Na pitharo o Allah a: "Di kano khowa sa dowa a tohan: Skaniyan bo i tohan a Isaysa: Na Sakn bo i kalkn iyo;"

52

Na rk Iyan so matatago ko manga langit go so lopa, go rk Iyan so agama a tatap: Ba adn a salakaw ko Allah a ikhalk iyo?

53

Na langowan taman a kapiyaan iyo na phoon ko Allah: Oriyan iyan na igira a minisogat rkano so morala, na Skaniyan bo i khagoraok iyo;

54

Oriyan oto na igira a piyokas Iyan rkano so morala, na samawto na so isa rkano ka sagorompong na phrimbangn iran so Kadnan iran -

55

Ka phagongkirn iran so inibgay Ami kiran. Na sawiti niyo (dn) so kawyagoyag; ka katokawan iyo bo!

56

Na pznggayan iran so da a manga mlng iyan sa kipantag ko inibgay Ami kiran. Ibt ko Allah, ka mataan! a ipagiza rkano dn so inipangangkob iyo (ko Allah).

57

Na ipznggay ran a rk o Allah so manga wata a babay! - Soti Skaniyan! - go (ipznggay ran a) rk iran so matotomo iran (a manga wata a mama)!

58

Na igira a miyapanothol ko isa kiran a (mimbawata sa) babay, na makarimng a paras iyan, a skaniyan na tanto a makamboboko!

59

Pphagma ko pagtaw, phoon ko marata a miyapanothol on! (sa pkhadowandowaan o) ino phanagotiyapn iyan sa kaayaan, odi na baniyan dn lbngn ko lopa (a bibiyag)? Tanodan, ka sayana a marata so ipkhokom iran.

60

Rk o siran a di mapaparatiyaya ko akhirat, so ibarat a marata: Na rk o Allah so ibarat a maporo: Na Skaniyan so Mabagr, a Mawngangn.

61

Na o siksaa o Allah so manga manosiya sabap ko kiyandarowaka iran, na da a lambaan Iyan ko liyawaw o lopa a baraniyawa: Na ogaid na pakalalanatn Iyan siran sa taman ko taalik a mappnto: Na amay ka makatalingoma so taalik kiran, na di iran dn misndod sa isa ka oras, go di iran kanggagaanan.

62

Na ipznggay ran a rk o Allah so ipkhagowad iran (a manga wata a babay). Go iphropa o manga dila iran so kabokhag: Sa mataan! a siran i khirk ko mapiya: Matatangkd a mataan! a rk iran so naraka, go mataan! a siran na indaraynon siran!

63

Ibt ko Allah, ka sabnsabnar a siyogo an Ami so manga pagtaw a miyaonaan ka (ya Mohammad): Na pipharasan kiran o shaytan so manga galbk iran: Na Skaniyan i panarigan iran sa alongan nai, go adn a bagian iran a siksa a malipds.

64

Na aya bo a kinitoronn Ami rka ko kitab na an ka kiran mapayag so da iran pagayonayoni, go toroan, go limo ko pagtaw a mapaparatiyaya.

65

Na so Allah na piyakatoron Iyan a phoon ko kawang so ig, na inioyag Iyan oto ko lopa ko oriyan o kiyapatay niyan: Mataan! a adn a matatago roo man a titho a tanda ko pagtaw a pphamamakin'gn iran.

66

Na mataan! a adn a matatago ko manga ayam a titho a ndao rkano: Pphakaynomn Ami skano ko matatago ko manga tiyan iyan, a pphakapoon ko pagltan o najis ago so rogo, a gatas a lombos, a malbod linoon o pphamanginom.

67

Na so manga onga korma, go manga inab, na pphakambaal kano ron sa pakabrg go pagpr a mapiya: Mataan! a adn a matatago roo man a titho a tanda ko pagtaw a pnggdagdaan iran

68

Na iniilaham o Kadnan ka ko tamaing a: Mbaal ka ko manga palaw sa manga walay, go so manga kayo, go so pphanagombalayn iran;

69

Oriyan iyan na kang ka ko oman i manga onga, na okit ka ko manga lalan o Kadnan ka, a da a manga gigimbra Iyan. Adn a pphakagmaw a pphakapoon ko manga tiyan Iyan a inomn a mbidabida so manga warna niyan, a kadadalman sa bolong o manga manosiya: Mataan! a adn a matatago saya man a titho a tanda ko pagtaw a pphamimikiran on.

70

Na so Allah i miyadn rkano oriyan iyan na thangann kano Niyan; na so sabaad rkano na taw a phakandodn ko tanto a marata a btad ko kapagintaw (a bongaw), ka an da a katawi niyan a mayto bo ko andang a katawan iyan: Mataan! a so Allah na Matao, a Gaos.

71

Na so Allah na inilbi Niyan so sabaad rkano ko sabaad sii ko riskhi: Na da ko siran a piyamakalbi i ba iran bgan so riskhi kiran ko mipapaar o manga tangan iran (a manga oripn), na siran na makaplagilagid siran on. Ba so limo o Allah i zangkaan iran?

72

Na so Allah na singgayan kano Niyan sa manga karoma a pd ko manga ginawa niyo, go singgayan kano Niyan, a phoon ko manga karoma niyo sa manga wata, go manga apo, go riniskhiyan kano Niyan ko manga pipiya: Ba so ribat i pamaratiyayaan iran, na so limo o Allah na siran na pagongkirn iran?

73

Na pzimbaan iran a salakaw ko Allah, - so da a mipapaar iyan a riskhi kiran, a phoon ko manga langit ago so lopa a mayto bo, go da a khagaga iran.

74

Na di kano phangmbaal sa manga ibarat o Allah: Mataan! a so Allah i Matao, na skano i di manga tatao.

75

Mimbaal so Allah sa ibarat, a oripn, a mipapaar, a da a khagaga niyan a mayto bo; ago taw a bigan Ami skaniyan sa pagpr a mapiya a phoon Rkami, na skaniyan na pphammgay ron, sa masoln ago mapayag: Ba siran makaphagizan? So langowan o podi na rk o Allah! Kna ka so kadaklan kiran na di manga tatao.

76

Go mimbaal so Allah sa ibarat a dowa mama: So isa kiran na omaw, a da a khagaga niyan a mayto bo; go skaniyan na ikaririkor o khirk on; apiya anda niyan pakasangora skaniyan, na da a khitalingoma niyan a mapiya: Ba makaphagizan skaniyan ago so taw a pzogo ko ontol, a skaniyan na komkdg sa lalan a makaoontol?

77

Na rk o Allah so misosoln ko manga langit ago so lopa. Na da ko okit o bangkit inonta na lagid bo o saprk mata, odi na lawan roo sa kagaan: Mataan! a so Allah na sii ko langowan taman na Gaos Iyan.

78

Na so Allah na piyakaliyo kano Niyan phoon ko manga tiyan o manga ina iyo a da a katawan iyo a mayto bo; go inadn Iyan rkano so kan'g go so manga kaylay go so manga poso: ka an kano makapanalamat (ko Allah).

79

Ba iran da maylay so manga papanok, a libod kiran a kapphakalantap iran sii ko sold o kawang? A da a makatatayong kiran a rowar ko Allah. Mataan! a adn a matatago roo man a titho a manga tanda ko pagtaw a khipaparatiyaya.

80

Na so Allah na inadn Iyan rkano so manga walay niyo a Kadnan; go inadn Iyan rkano so manga kobal o manga ayam, a manga walay, a kaakhapan kano ron ko alongan a gii niyo kathotogalin, go so alongan a kaggnk iyo; go (inadn Iyan rkano) so manga bombol o bilibili, go so manga bombol o onta, go so manga bombol o kambing, a kasangkapan, go pagigimo taman ko masa (a kakharata iyan).

81

Na so Allah na singgayan kano Niyan ko inadn Iyan sa manga along (a sironga); go singgayan kano Niyan ko manga palaw sa manga liyang (a lindonga); go singgayan kano Niyan sa manga nditarn a makarrnding rkano ko mayaw, go manga nditarn a makarrnding rkano ko gomaan o ridoay niyo. Giyaya man i kaptharotopa Niyan ko limo Iyan rkano, ka an kano makazalimbotawan (sii Rkaniyan).

82

Na o talikhod siran, na aya bo a paliyogat rka na so kapamakasampay (o sogoan rka) a mapayag.

83

Kikilalaan iran so limo o Allah; oriyan iyan na phagongkirn iran bo skaniyan; na so kadaklan kiran na manga kapir.

84

Na (pakisaboting ka) so alongan a pakatindgan Ami so oman i pagtaw sa saksi (a so nabi ran): Oriyan iyan na di kabgan sa idin so da pamaratiyaya, go di siran pakapamangnin sa rila.

85

Go amay ka kasandngan o siran a da pamaginontolan so siksa, na di kiran dn pakakhapn, go di kiran taalikn.

86

Na amay ka kasandngan o siran a miyamanakoto so inipamanakoto iran (ko Allah), na tharoon iran: "Kadnan ami, siran aya so inipamanakoto ami, a siran so sinimba mi a salakaw Rka". Na salawadaan iran siran a katharo: "Mataan! a skano na titho a manga bokhag!"

87

Na mapalad iran ko Allah sa alongan oto so kambayorantang; go doratn siran o piyangmbaalan iran a kabokhag.

88

Siran a miyamangongkir go miyangalang ko lalan ko Allah na pagomanan Ami siran sa siksa a lawan ko siksa, sabap ko kiyapaminasa iran;

89

Na (pakisaboting ka) so alongan a pakatindgan Ami so oman i pagtaw sa saksi kiran, a pd ko manga ginawa iran: Go pakatalingomaan Ami ska (ya Mohammad) a saksi ko siran aya: Na piyakatoron Ami rka so kitab a osayan ko langowan taman, go toroan, go limo, go tothol a mapiya ko mimbabayorantang (ko Allah).

90

Mataan! a so Allah na isosogo Iyan so kaontol, go so kaphiyapiya, go so kabgi ko tonganay, go isasapar Iyan so pakasisingay, go so marata, go so kapanganiyaya: Iphagndao Niyan rkano, ka an kano makatatadm.

91

Na tomann iyo so diyandi o Allah igira a miyakindiyandi kano, go di niyo mbarngkasa so manga sapa ko oriyan o kiyatanto niyan; a sabnar a biyaloy niyo so Allah a saksi rkano; mataan! a so Allah na katawan Iyan so gii niyo nggolawlaan.

92

Na di niyo pagiringi so babay a kiyakasiyan so tinikr iyan ko oriyan o kinikibd iyan sa manga kanggolgol. Sa mabaloy niyo so manga sapa iyo a limpangan ko ndolondolonan iyo, sa kabaloy o isa a pagtaw a skaniyan i madakl a di so isa a pagtaw: Giya bo a kipthpngn rkano ron o Allah; na mataan! a phagosayn Iyan rkano dn ko alongan a qiyamah so skano na di kano ron phagayonayon.

93

Na o kabaya o Allah, na mataan! a khabaloy kano Niyan ko okit a isa: Na ogaid na ndadagn Iyan so taw a kabaya Iyan, go thoroon Iyan so taw a kabaya Iyan: Na mataan! a ipagiza rkano dn so pinggolawla niyo.

94

Na di niyo mbaloya so manga sapa iyo, a limpangan ko ndolondolonan iyo, ka midolas so parapara ko oriyan o kiyapakabkn iyan, go kataaman iyo so marata sabap ko kiyaalangi niyo ko lalan ko Allah, go makambagian kano sa siksa a lbi a mala.

95

Na di niyo phamasaan so diyandi o Allah sa arga a mayto: Mataan dn! a so zisii ko Allah na giyoto i tomo rkano, o skano na katawi niyo.

96

So zisii rkano na khada: Na so zisii ko Allah na kakal. Na mataan! a imbalas Ami dn, ko siran a miphapantang, so balas kiran sii ko mapiya ko pinggolawla iran.

97

Sadn sa nggalbk sa mapiya, a mama odi na babay, a skaniyan na mapaparatiyaya, na mataan! a pakapagintawn Ami dn skaniyan sa kapagintaw a mapiya, go mataan! a ibalas Ami kiran dn so balas kiran sii ko mapiya ko pinggolawla iran.

98

Na igira a mbatiyaan ka so Qor'an, na lindong ka ko Allah phoon ko shaytan a phradiyamn.

99

Mataan! a skaniyan na da a mapkhapaar iyan ko siran a miyamaratiyaya, so bo so Kadnan iran i sasarigan iran,

100

Aya bo a adn a mapkhapaar iyan on, na sii ko siran a pphamangonot rkaniyan go so siran a pphamanakoto ko Allah.

101

Na igira a adn a inisambi Ami a isa a ayat ko darpa o isa a ayat, - a so Allah i Matao ko ipthoron Iyan, - na tharoon iran a: "Ska dn (ya Mohammad) i pphangmbaal:" Kna, ka so kadaklan kiran na di manga tatao.

102

Tharoang ka a: Initoron skaniyan o (Jibril a) Niyawa-soti a phoon ko Kadnan ka a Bnar, ka an thakna so (poso o) siran a miyamaratiyaya, go toroan go tothol a mapiya ko mimbabayorantang (ko Allah).

103

Na sabnsabnar a katawan Ami a mataan! a siran na gi iran tharoon a: "Matag on aya ipphangndao a manosiya". (pitharo o Allah a:) "So basa a so ipphangambir iran on na ino a Adiyami, na giya Qor'an aya na basa Arab, a mapayag."

104

Mataan! a so siran a di mapaparatiyaya ko manga ayat o Allah, - na di siran thoroon o Allah, go adn a bagian iran a siksa a malipds.

105

Aya bo a pphangmbaal ko kabokhag na so siran a di mapaparatiyaya ko manga ayat o Allah: Na siran man na siran i manga bokhag!

106

Sadn sa taw a ongkirn iyan so Allah ko oriyan o kiyaparatiyaya niyan, - inonta so taw a miyatgl, a so poso iyan na thatakna ko paratiyaya na ogaid na sadn sa maliwanag sa ginawa niyan so kaongkir, - na sii kiran so rarangit a phoon ko Allah, go adn a bagian iran a siksa a lbi a mala.

107

Giyoto man na sabap sa mataan! a siran na miyatomo iran so kawyagoyag ko doniya a di so akhirat: Na mataan! a so Allah na di Niyan thoroon so pagtaw a da pamaratiyaya.

108

Siran man so piyatri o Allah so manga poso iran, go so kan'g iran, go so manga kaylay ran; na siran man na siran so khikalilipat.

109

Matatangkd a mataan! a siran na siran so manga logi ko akhirat.

110

Oriyan iyan na mataan! a so Kadnan ka, - makapantag ko siran a miyamagoyag ko oriyan o kiyapangarasii kiran, - oriyan iyan na miphrang siran go miphantang siran, - na mataan! a so Kadnan ka, ko oriyan aya na titho a Manapi, a Makalimoon.

111

(Pakisaboting ka:) So alongan a makatalingoma so oman i ginawa na domaowa sa linding iyan sa ginawa niyan, go itoman sa tarotop ko oman i ginawa so miyanggalbk iyan, a siran na di siran kasalimbotan.

112

Na mimbaal so Allah sa ibarat a: Ingd a miyabaloy a lomilintad, a thatakna, pphakatalingoma on so pagpr on a moramora a pphakapoon ko mbalabala a darpa: Na inongkir iyan so manga limo o Allah: Na piyakitaaman on o Allah so kinikolob on o kaor go so kalk sabap ko siyowa iran.

113

Na sabnsabnar a adn a miyakaoma kiran a sogo a pd kiran, na piyakambokhag iran skaniyan; na miyadansal siran o siksa a siran na kapapantagan a manga darowaka.

114

Na kang kano ko inipagpr rkano o Allah a halal a mapiya; go panalamat kano ko limo o Allah, o skano na aya niyo bo pzoasoatn.

115

Aya dn a inisapar Iyan rkano na so miyatay (a da masombali), go so rogo (a tomiyoga) go so sapo a baboy, go so inipanambay ko salakaw ko Allah: Na sa taw a kasngtan, a kna a ba pangangakowala, go kna a ba pmamalawani, - na mataan! a so Allah na Manapi, a Makalimoon.

116

Na di niyo ptharoa ko kiphropaan on o manga dila iyo ko kabokhag, - "A giyai na halal, go giyaya na haram", ka khiyangkob iyo ko Allah so kabokhag. Mataan! a siran a iphagangkob iran ko Allah so kabokhag, na di siran phamakaslang sa maliwanag.

117

Khasawitan iran sa mayto (ko doniya); na adn a bagian iran a siksa a malipds.

118

Na sii Ami bo inisapar ko manga Yahodi so piyanothol Ami rka gowani: Na da Ami siran salimboti, na ogaid na siran i pzalimbot ko manga ginawa iran.

119

Oriyan iyan na mataan! a so Kadnan ka, - sii ko siran a miyakanggalbk siran sa marata sabap ko kada a mlng, oriyan iyan na mithawbat siran ko oriyan oto, go miphiyapiya siran, - na mataan! a so Kadnan ka ko oriyan aya, na tanto a Manapi, a Makalimoon.

120

Mataan! a so Ibrahim na miyabaloy a ladiyawan, a pphangongonotan ko Allah, a tomataliyadok ko bnar, go da mapd ko manga pananakoto:

121

Mananalamat ko manga limo o Allah, pinili Iyan, go pinggonanao Niyan skaniyan ko lalan a makaoontol.

122

Go bigan Ami skaniyan sii ko doniya sa mapiya, go mataan! a sii ko akhirat na pd dn ko manga bilangataw.

123

Oriyan iyan na iniilaham Ami rka (ya Mohammad) a: Kdgang ka so okit o Ibrahim a zasalimbotawan, go da mapd ko manga moshrik.

124

Aya bo a piyaliyogatan (ko kapmaslaa) ko Sapto na so siran a da on pagayonayon; na mataan! a so Kadnan ka na khokomn Iyan siran dn ko alongan a qiyamah, ko da iran pagayonayoni.

125

Panolonn ka so lalan o Kadnan ka sa nggolalan ko ongangn, go so ndao a mapiya; go daowaan ka kiran so lbi a mapiya; mataan! a so Kadnan ka na Skaniyan i Matao ko taw a sominilay, phoon ko lalan Rkaniyan, go Skaniyan i Matao ko miyamangdg ko ontol.

126

Na o zaop kano na saop kano sa so lagid o inikidiya rkano to: Na ibt o zabar kano, na mataan! a giyoto i mapiya a bagian o miyamakasabar.

127

Na zabar ka, na di ka phakasabar inonta a sabap ko Allah; na ding ka siran pmboko on: Go dinggagtn a rarb ka so kapphagantangan iran sa marata.

128

Mataan! a so Allah na babid o siran a miyamananggila, go so siran a miphipiyapiya.

Part 15

Total Number of Verses: 111

1

Soti so (Allah a) piyakalalakaw Niyan so oripn Iyan (a Mohammad) ko kagagawii phoon ko Masjid Al-Haram sii ko Masjid Al-Aqsa, so piyakandaklan Ami sa mapiya so mliliyota on, - ka phakaylayn Ami skaniyan ko manga tanda Ami: Mataan! a so Allah so Pphakan'g, a Pphakaylay.

2

Na inibgay Ami ko Mosa so kitab, go biyaloy Ami skaniyan a toroan ko manga moriyataw o Israil, - (pitharo Ami a:) "Da a khowaan iyo a salakaw Rakn a sasarigan."

3

(Hay) Kiyababadan ko taw a riyoran Ami a pd o Noh (ko kapal), mataan! a so Noh na aya btad iyan na oripn, a mananalamat.

4

Na piyakitokawan Ami ko manga moriyataw o Israil sii ko kitab, a mataan! a phaminasa kano dn ko lopa sa makadowa, go mataan! a phangarasi kano dn sa kapangarasi a mala!

5

Na amay ka makawma so diyandi a paganay sa dowa oto, na pakipangarasiyan Ami skano ko manga oripn Ami a adn a bagr iyan a mitataralo: Na pakaphagazogaan iran so pagltltan o manga walay; na miyabaloy a diyandi a mapnggolawla.

6

Oriyan iyan na ikasoy Ami rkano so kappgsa kiran: Go bgan Ami skano sa manga tamok (a madakl), go manga wata, go balowin Ami skano a madakl a taw.

7

(Na pitharo Ami a:) O phiyapiya kano, na miyakaphiyapiya kano sa rk o ginawa niyo; na o mbinasa kano, na rk o ginawa niyo. Na amay ka makawma so diyandi a mori, (na pakapangarasin Ami siran), ka an iran mapakarimng so manga paras iyo, go an siran makasold ko Masjid (Al-Aqsa) lagid o kiyapakasold iran on ko paganay a kiya okitan, go an iran mabinasa so miyamgs sa mala a kapaminasa.

8

Masikn so Kadnan iyo na ikalimo kano Niyan; na o kasoy kano (maminasa), na ikasoy Ami (so siksa rkano): Na inisnggay Ami so naraka Jahannam a tharongkoan ko miyamangongkir.

9

Mataan! a giya ungkai a Qor'an na phakatoro ko skaniyan a lbi a matitho, go pphanotholn iyan ko miyamaratiyaya a siran so minggagalbk ko manga pipiya, a mataan! a adn a bagian iran a balas, a lbi a mala;

10

Na mataan! a siran a di mapaparatiyaya ko akhirat, na mithiyagar Kami sa bagian iran a siksa a malipds.

11

Na pphangnin o manosiya so marata (igira a pkhararangitan) lagid o kapphangniya niyan ko mapiya, na tatap a so manosiya na gaanggaann.

12

Na biyaloy Ami so gagawii ago so dawndaw a dowa a tanda: Na piyakasalm Ami so tanda a gagawii, na biyaloy Ami so tanda o dawndaw a masindaw; ka ang kano gii makambabanog sa riskhi a phoon ko Kadnan iyo, go an iyo katokawi so bilangan o manga ragon, go so itongan: Na so langowan taman na piyagosay Ami skaniyan sa marayag a kapagosay.

13

Na oman i manosiya na initambd Ami ron so sorat o amal iyan sii ko lig iyan: Na pakagmawn Ami ron sa alongan a qiyamah a sorat a masangat iyan a makakayat.

14

(Tharoon on a:) "Batiya angka so sorat ka: Makatatarotop so ginawang ka sa alongan nai a phamagitong rka."

15

Sadn sa komdg ko ontol, na phakakdg ko ontol sa rk bo a ginawa niyan: Na sadn sa somilay, na phakasilay sa rombo phakatana: Na di khaawidan o baradosa so dosa o pd iyan: Na di Kami phaniksa taman sa di Kami makasogo sa sogo.

16

Na igira a kabaya Ami a kabinasa Ami ko phagingd, na sogo on Ami so manga nakoda rkaniyan (a nggolalan ko manga rasol) na ndarowaka siran roo; na mapatot on so katharo (a siksa): Na binasaan Ami skaniyan sa tarotop a kabinasa.

17

Na madakl a bininasa Mi ko manga pagtaw a miyaoriyan o Noh. Na makatatarotop so Kadnan ka sii ko manga dosa o manga oripn Iyan a Kaip a Pphakaylay.

18

Sadn sa aya btad iyan na kabaya iyan so magaan, na nggagaanan Ami ron sii (sa doniya) so khabayaan Ami sii ko taw a kabaya Ami: Oriyan iyan na isnggay Ami a rk iyan so naraka Jahannam a phakasold on a kapapaawingan, a mibobowang.

19

Na sadn sa kabaya iyan so akhirat, go panamaran iyan nggalbk so pnggalbkn rkaniyan, a skaniyan na mapaparatiyaya, - na siran man na miyabaloy so galbk iran a tatarimaan.

20

Oman i isa na pmbgan Ami so siran nai go so siran aya, ko pammgayan o Kadnan ka: Na da ko btad o pammgayan o Kadnan ka iba kharn.

21

Pamimikiran angka o andamanaya i kiyapakalbi Ami ko sabaad kiran ko sabaad; na matatangkd a so akhirat i lbi a mala a kiyapakaphapangkata, go lbi a mala a kiyapakapllbiya.

22

Di ka phangmbaal sa pd o Allah a tohan a salakaw; ka makawzad ka a kapapaawingan, a misisili.

23

Na inipaliyogat o Kadnan ka a da a pzoasoata niyo a inonta Skaniyan, go (phiyapiya i niyo) so mbala a loks sa samporna a kaphiyapiya. Na o raota ko kamamasai rka so kaloks o isa sa dowa oto, odi na tanan siran, na ding ka kiran ptharoa i kharimorng ako, go ding ka siran phrarasnga, go tharoang ka kiran so katharo a kapagaadat.

24

Go pakainayang ka kiran so gowagoway ko kapangalimbabaan, phoon ko kalimo, go tharoang ka a: "Kadnan ko, kalimoon ka siran lagid o kiyapagoyagoyaga iran rakn ko kayto akn."

25

So Kadnan iyo i lbi a Matao ko nganin a zisii ko manga ginawa niyo: O mabaloy kano a manga bilangataw, na mataan! a Skaniyan na tatap a Manapi ko manga baratawbat.

26

Na bgan ka ko tonganay so kabnar iyan, go so miskin, go so gii mlayalayag a makakhakadiyat a miyakawang sa lalan. Go di ka phamagola sa kaplaga.

27

Mataan! a so manga tawlaan na miyabaloy siran a manga pagari o manga shaytan; na aya btad o shaytan na moongkir ko Kadnan iyan.

28

Na o thalikhoding ka siran sa kambabanog sa limo a phoon ko Kadnan ka, a nanayawn ka skaniyan, na tharoang ka kiran: Sa katharo a maynay.

29

Go ding ka mbaloya so limang ka a mitatambd ko lig ka, go ding ka mbkara skaniyan sa tarotop a kabkar, ka makawzad ka a kapapaawingan, a kiyawiswisan.

30

Mataan! a so Kadnan ka na pphakaloagn Iyan so pagpr sii ko taw a kabaya Iyan, go pphakasimpitn Iyan. Mataan! a Skaniyan na tatap sii ko manga oripn Iyan a Kaip, a Pphakaylay.

31

Go di niyo mbonoa so manga wata iyo sa kalk ko kamiskin: Ka Skami i pphagpr kiran, go pphagpr rkano. Mataan! a so kabonoa kiran na miyabaloy a dosa a mala.

32

Go di kano pagobay ko kazina: Ka mataan aya! a miyabaloy a pakasisingay, go miyakaratarata a okit.

33

Go di niyo mbonoa so ginawa a so inisapar o Allah inonta o misabap ko kabnar. Na sa taw a mabono a pimbabaan, na sabnar a singgayan Ami so wali ron sa kapaar: Na di plawan ko kakitas; mataan! a skaniyan na miyabaloy a tatabangan.

34

Go di kano pagobay ko tamok o ilo inonta o so iphakapiya niyan, taman sa iraot ko kakhasad iyan: Go tomana niyo so diyandi. Mataan! a so diyandi na tatap a khiiza (ko alongan a qiyamah).

35

Go tarotopa niyo so kapagasad igira a miyagasad kano, go thimbang kano ko timbangan a ontol: Giyoto man i tomo, go lbi a mapiya a ondas iyan.

36

Go ding ka pthindgi so da a kataong ka on; mataan! a so kan'g, ago so kaylay, go so poso na oman i isa kiran na khayzaan.

37

Go di ka plalakaw ko lopa sa kambantogan: Mataan! a ska na ding ka dn mabnsad so lopa, go ding ka dn marpng so manga palaw sa kaporo.

38

Oman i isa roo na miyabaloy so karataan iyan sii ko Kadnan ka a piyakagowagowad.

39

Giyoto man na pd ko iniilaham rka o Kadnan ka (ya Mohammad) a ongangn; na di ka phangmbaal sa pd o Allah a tohan a salakaw, ka maphozang ka ko naraka Jahannam, a kapapaawingan, a mibobowang.

40

Ba rkano piyakibisa o Kadnan iyo so manga wata a mama, na kinowa Niyan so manga malaikat (a wata Iyan) a manga babay? Mataan! a skano na matatangkd a gii kano tharo sa katharo a miyakalpas!

41

Na sabnsabnar a pizalisay Ami sangkai a Qor'an, ka an iran kasaboti, na da a minipagoman iyan kiran a rowar sa kiyapalagoy (ko bnar)!

42

Tharoang ka a: O adn a pd o Allah a manga tohan, - lagid o katharo iran, - na samawto na mataan! a mloloba siran sa lalan ko khirk ko kapaar!

43

Soti Skaniyan! go maporo a ka-aawat Iyan ko gi iran tharoon! a Maporo a Lbi-a-mala!

44

Pthasbik Rkaniyan so manga langit a pito go so lopa, go so matatago kiran, na da a nganin a badi pthasbik sa podi Rkaniyan; na ogaid na di niyo zabotn so tasbik iran. Mataan! a Skaniyan na tatap a Matigr, a Manapi!

45

Na igira a biyatiya aka so Qor'an, na pthagoan Ami so lt ka ago so lt o siran a di mapaparatiyaya ko akhirat, sa rnding a marrnding:

46

Go tiyagoan Ami so manga poso iran sa manga totop, ka an iran di khasaboti skaniyan, go (tiyagoan Ami) so manga tangila iran sa kabngl: Na igira a miyaaloing ka so Kadnan ka sii ko Qor'an, ko kai Isaysa Niyan, na tomingr siran, ko manga talikhodan iran sa kapalagoy.

47

Skami i lbi a Matao ko sabap a kapphamamakin'g iran oto gowani ko pphamamakin'gn ka iran; go gowani ko siran a gii siran mbibitiyarai, sa masa oto na gii tharoon o manga darowaka a: "Da a phagonotan iyo a rowar ko mama a tataraponan!"

48

Pamimikiranang ka (ya Mohammad) o andamanaya i kinipangibaratn iran rka: Na miyadadag siran, na da a khakdg iran a lalan.

49

Na pitharo iran: "Ino amay ka mbaloy kami a manga tolan go botha, ba mataan! a skami na pagoyagn kami dn sa kaadn a bago?"

50

Tharoang ka a: "Mbaloy kano pn a ator, odi na potaw,"

51

Odi na kaadn a pd ko mala (a kaggdaa niyo ron), ko manga rarb iyo (na khaoyag kano dn)! Na ptharoon iran dn: "Antawaa i maphakakasoy kami niyan (ko kawyagoyag)?" Tharoang ka a: "So miyadn rkano ko paganay a kiyaokitan". Na khlng-klngn iran rka a manga olo iran, na tharoon iran: "Anday kakhitana iyan?" Tharoang ka a: "Matatangkd a mababaloy a marani!"

52

"Sii ko alongan a tawagn kano Niyan, na mismbag iyo so podi Rkaniyan, go aya arangan iyo na da a minitarg iyo (ko doniya) a roar ko mayto!"

53

Na tharoang ka (ya Mohammad) ko manga oripng Ko a: Ptharoa iran so mapiya: Mataan! a so shaytan na pnggorigawn iyan siran: Mataan! a so shaytan na miyabaloy a ridoay o manga manosiya a mapayag.

54

So Kadnan iyo i Matao rkano: O kabaya Iyan, na ikalimo kano Niyan, odi na o kabaya Iyan, na siksaan kano Niyan: Na kna a ba Ami ska siyogo a somisiyap kiran.

55

Na so Kadnan ka i Matao ko taw a zisii ko manga langit go so lopa: Na sabnsabnar a piyakalbi Ami so sabaad ko manga nabi ko sabaad: Go bigan Ami so Dawood sa (kitab a) Zaboor.

56

Tharoang ka: "Panongganoya niyo so siran a initgo niyo (a manga katohanan) a salakaw ko Allah: Na da a mipapaar iran ko kapokas rkano o morala, go di iran khitogalin."

57

Siran man so siran a pphanongganowin iran na gi iran mbabanogn so okit a kapakarani ko Kadnan iran, - (pphamagarabaya) o antawaa kiran i lbi ron a madasg: Go aarapn iran so limo Iyan go ikaalk iran so siksa Iyan: Mataan! a so siksa o Kadnan ka na tatap a pakalklk.

58

Na da a ingd a ba Ami di binasaa skaniyan ko dapn so alongan a qiyamah, odi na ba Ami di siksaa skaniyan sa siksa a sangat: Miyabaloy oto a misosorat ko kitab (a Laoh Mahfod).

59

Na da a miyakarn Rkami ko kapphakatoron Ami ko manga tanda, a rowar sa kiyapakambokhaga on o miyangaoona: Na inibgay Ami ko Samod so babay a onta a karina a mapayag, na pindarowakaan iran oto: Na da a (salakaw a) kapphamakatoron Ami ko manga tanda a rowar sa pangangalk.

60

Na gowani na pitharo Ami rka a: Mataan! a so Kadnan ka na katatangkalan Iyan so manga manosiya: Na da a kinisnggayn Ami ko kaylay a so piyakiilay Ami rka, a rowar sa tpng ko manga manosiya, - go (lagid oto) so kayo a pimorkaan a miyaaloy ko Qor'an: Na ipphangangalk Ami kiran, na da a minipagoman iyan kiran a rowar sa kapangakowala a mala!

61

Na gowani na pitharo Ami ko manga malaikat a: "Pangalimbabaan kano ko Adam": Na miyangalimbabaan siran on, inonta so iblis: Ka pitharo iyan a: "Ino ako phangalimbabaan ko taw a inadn ka a botha?"

62

Pitharo (o iblis): "Ay gdaa Ka sangkai a piyakaombaong Ka rakn? Ibt o bgi akong Ka sa taalik taman ko alongan a qiyama na lngan'ng ko dn domadag so manga moriyataw niyan inonta so mayto!"

63

Pitharo (o Allah) a: "Nggolalann ka (i kabaya aka); ka sadn sa monot rka kiran, na mataan! a so naraka Jahannam i balas rkano, a balas a tarotop."

64

"Go pamodiyokn ka ko sadn sa khagagang ka kiran, so sowarang ka; go lalisang ka siran rakhs o manga komokoda aka, go so pphamakalalakawn ka; go pakithompok ka kiran ko manga tamok go so manga wata (iran); go bging ka siran sa pasad". Na da a ipmbgay kiran a pasad o shaytan a rowar sa kaplalalong.

65

"Mataan! a so manga oripng Ko (a miyamaratiyaya), na da dn a kapaar ka kiran: Go makatatarotop so Kadnan ka a Somisiyap."

66

So Kadnan iyo so pphakalatas rkano ko manga kapal ko kalodan, ka ang kano gii makambabanog ko kakawasaan Iyan. Mataan! a Skaniyan na tatap a mala rkano i limo.

67

Na igira a minisogat rkano so morala ko kalodan, na mada so pphanongganowin iyo inonta bo so Skaniyan (a Allah) - na kagiya mabaton kano Niyan ko kalopaan, na tomiyalikhod kano. Na tatap a so manosiya na da a tadm iyan!

68

Ba kano somiyarig sa di kano Niyan landngn ko didalm o lopa, odi na di kano Niyan botawanan sa sobosobo a pthad, a sa oriyan iyan na da dn a matoon iyo a panarigan?

69

Odi na ba kano somiyarig sa di kano Niyan roo pakakasowin zaroman, na botawanan kano Niyan sa mabagr a ndo na ldn kano Niyan sabap ko kiyaongkir iyo, oriyan iyan na da dn a matoon iyo a abanga iyo Rkami ron?

70

Na sabnsabnar a piyaka lbi Ami sa mnang so manga moriyataw o Adam; go piyakapagda Ami siran ko kalopaan ago so kalodan; go iniriskhi Ami kiran so manga pipiya; go piyakaombaw Ami siran ko madakl ko manga inadn Ami sa titho a kapakaombaw.

71

Sii ko alongan a itawag Ami ko oman i manosiya so daptar iran: Na sadn sa mibgay ron so kitab iyan sii ko kawanan iyan, na siran man na mabatiya iran so kitab iran, - na da a masalimbot kiran a izambo o dadanglisn.

72

Na sadn sa miyabaloy sii (sa doniya) a bota, na skaniyan sii ko akhirat na bota dn, go tanto a miyaawat ko lalan.

73

Na mataan! a mayto bo na khapokas ka iran dn ko iniilaham Ami rka (ya Mohammad), ka an ka Rkami miyangkob so salakaw rkaniyan: Na o giyoto i miyasowa na khowaang ka iran dn a bolayoka!

74

Na o da Ami ska pakathaknaa, na sabnsabnar a mararani mitaliyadok ka kiran sa shay' a mayto.

75

Na o giyoto i miyasowa na kaphakitaaman Ami rka dn so takp a siksa ko kawyagoyag, go so takp a siksa ko kapatay: Oriyan iyan na daa matoon ka a tabanga aka Rkami!

76

Na mataan! a mayto bo na khabogaw ka iran ko lopa (a Madinah), ka phakaawaang ka iran on; na o giyoto i miyasowa na da a khitarg iran ko kaypos ka, a rowar ko mayto.

77

Okit o taw a sabnar a siyogo an Ami a miyaonaan ka sa pd ko manga sogo Ami: Na da a khatoon ka a misalin ko okit Ami.

78

Pamayandgn ka so sambayang ko kapolid o alongan taman ko kalibotng o gagawii, go so kapangadii ko Qor'an ko sambayang ko khapita: Mataan! a so sambayang ko khapita na tatap a zasaksian.

79

Na so sabaad ko kagagawii na pphagnaw on ka so Qor'an a malalawan ko manga paliyogat a rk ka: Matatangkd a phakadarpaang ka o Kadnan ka ko darpa a mababantog!

80

Na tharoang ka: "Kadnan ko, pakasold akong Ka sa kasold a kasosoat, go pakaliyowa kong Ka sa kaliyo a kasosoat; go snggay akong Ka phoon ko hadapan Ka sa bagr a phakatabang."

81

Go tharoang ka a: "Miyakawma so bnar, na miyailang so ribat: Mataan! a so ribat na tatap a ilang."

82

Na ipthoron Ami a pd ko Qor'an so bolong go limo ko miyamaratiyaya: Na ba dn pphakaoman ko manga darowaka sa kalogi.

83

Na igira a inipangalimo Ami so manosiya, na tomalikhod go itangkiri iyan a kilid iyan, na igira a minisogat on so marata na mabaloy a kadaan sa panginam!

84

Tharoang ka a: "Oman iisa na gii nggalbk sii ko okit iyan: Na so Kadnan iyo i lbi a Matao ko taw a skaniyan i makaoontol sa lalan."

85

Na ipagiza iran rka so niyawa. Tharoang ka a: "So niyawa na sii ko ilmo o Kadnan ko: Go da a inibgay rkano ko katao rowar ko mayto."

86

Na mataan! a o inikabaya Ami, na matatangkd a maphakada Ami dn so iniilaham Ami rka: Na sa oriyan iyan na da a matoon ka makapantag rkaniyan a panarigan Rkami,

87

Ogaid na limo a phoon ko Kadnan ka: Mataan! a so kapdi Iyan na tatap a sii rka lbi a mala.

88

Tharoang ka a: "Mataan! a apiya thampotampong so manga manosiya, go so manga jinn sa kambaal iran sa lagid angkai a Qor'an, na di siran dn makambaal sa lagid iyan, apiyapn mabaloy so sabaad kiran a tabanga o sabaad."

89

Na sabnsabnar a di bo dn pira a kiniropaan Ami ko manosiya, sii sangkai a Qor'an, ko oman i ibarat: Na da tarimaa o kadaklan ko manga manosiya ka ba iran dn siyangka!

90

Na pitharo iran a: "Di ami ska dn pharatiyayaan, taman sa da a mapakambowat ka rkami phoon ko lopa a manga bowalan,"

91

"O di na adn a mabaloy a rk ka a pamomolan a manga korma, go manga anggor, na kapakambowatan ka so lmbak iyan sa manga lawasayg a manga babands;"

92

"O di na makaolog ka ko langit, manaa so inidaowang ka rkami sa sapangkat; odi na mapakadarpa aka so Allah go so manga malaikat sa mipagadapa;"

93

"O di na adn a mabaloy a rk ka a walay a bolawan, odi na makapanik ka ko langit. Na di ami dn pharatiyayaan i kiyapakapanik ka on taman sa di kaming ka katoronan sa kitab a mabatiya ami skaniyan". Tharoang ka: "Soti so Kadnan ko! Ba adn a btad akn a rowar sa manosiya; - a sogo?"

94

Na da a miyakarn ko manosiya ko kapakaparatiyaya iran gowani ko makawma kiran so toroan, a rowar sa kiyatharoa iran sa: "Ino zogo so Allah sa manosiya a sogo?"

95

Tharoang ka: "O aya matatago ko lopa, na manga malaikat a pphlalalakaw a khibabaling on, na mataan! a pakatoronan Ami siran a phoon ko langit sa malaikat a sogo."

96

Tharoang ka: "Makatatarotop so Allah a saksi rakn ago sii rkano: Mataan! a Skaniyan na tatap sii ko manga oripn Iyan a Kaip, a Pphakaylay."

97

Na sadn sa toroon o Allah, na skaniyan i phakakdg ko ontol; go sadn sa dadagn Iyan na ding ka siran dn mitoon sa manga panarigan a salakaw Rkaniyan. Go limodn Ami siran ko alongan a qiyamah, a mikakamanga so manga paras iran, a manga bota, go manga omaw, go manga bngl: Darpa iran so naraka Jahannam: Oman pphondaw na omanan Ami kiran sa kakadg.

98

Giyoto man i balas kiran, sabap sa mataan! a siran na inongkir iran so manga ayat Ami, go pitharo iran: "Ino amay ka mbaloy kami a manga tolan go botha, ba mataan! a skami na khawyag kami dn sa kaadn a bago?."

99

Ba iran di katawi a mataan! a so Allah, so miyadn ko manga langit go so lopa, khagaga Niyan a madn sa lagid iran? Go singgayan Iyan siran sa taalik, a da a sangkaa madadalm on. Na da tarimaa o manga darowaka ka ba iran dn siyangka.

100

Tharoang ka: "O skano i makapapaar ko khitatagoan ko limo o Kadnan ko, na samawto na mataan! a rnn iyo, sa kalk ko kanggasto: Ka aya btad o manosiya na maykot!"

101

Na sabnsabnar a bigan Ami so Mosa sa siyaw a manga tanda, a manga rarayag: Na izaan ka ko manga moriyataw o Israil: Gowani a makawma kiran, na pitharo on o Pir'awn: "Mataan! a sakn na aya dn a kaggdaa ko rka hay Mosa! na tataraponan!"

102

Pitharo (o Mosa): "Sabnsabnar a katawan ka a da a tomiyoron saya a rowar ko Kadnan o manga langit go so lopa a manga karina: Na mataan! a sakn na aya dn a kaggdaa ko rka hay Pir'awn! na ilang!"

103

Na kabaya iyan a mbogawn iyan siran ko lopa (a Misir): Na inld Ami skaniyan go so langowan a pd iyan.

104

Go pitharo Ami ko manga moriyataw o Israil ko oriyan iyan a: "Pagingd kano ko lopa (a Misir): Na amay ka makawma so diyandi ko akhirat, na pakatalingomaan Ami skano langon."

105

Na sii ko bnar a kinitornn Ami (ko Qor'an), go sii ko bnar a kiyapakatoron iyan: Na da a kiyasogo Ami rka (ya Mohammad) a rowar sa pphanonotholan sa mapiya, go pphamakaiktiyar.

106

Na so Qor'an na piyakassnggaya Ami skaniyan, ka an ka oto mabatiya ko manga manosiya sa malanat: Go initoron Ami oto sa (miyakazasaliob a) kinitoron iyan.

107

Tharoang ka: "Piyaratiyaya niyo skaniyan odi na di niyo pharatiyayaa, mataan! a siran a piyamgan ko katao a miyaonaan iyan, na igira a pmbatiyaan kiran, na ipzondong iran so manga baka a mangangalimbabaan siran,"

108

Sa gi iran tharoon: Soti so Kadnan ami, mataan! a tatap a so diyandi o Kadnan ami na mapnggolawla dn!

109

Go ipzondong iran so manga baka, sa pphaman'gad siran, go pphakaoman kiran sa kapangalimbabaan.

110

Tharoang ka: "Pangni kano ko Allah, odi na pangni kano ko Rahman: Apiya anda saya i ipangni niyo Ron, na rk Iyan so manga ngaran a manga pipiya. Na ding ka phakatanogn so sambayang ka, go ding ka oto phnanayn, na mbabanog ka ko pagltan oto sa okit."

111

Na tharoang ka: "So podi na rk o Allah, da kowa sa wata, go da a miyabaloy a sakotowa Iyan ko kapaar: Go da a miyabaloy a tabanga Iyan makapantag ko kapakayto: Na zlaslaang ka Skaniyan sa samporna a kazlasla."

Total Number of Verses: 110

1

So podi na rk o Allah, a so initoron Iyan ko oripn Iyan so kitab, go da a biyaloy Niyan on a bkhog:

2

Matitho, ka an Iyan kapakiiktiyari so siksa a sangat a phoon Rkaniyan, go an Iyan mapanothol ko miyamaratiyaya a siran so giinggalbk ko manga pipiya, a mataan! a adn a bagian iran a balas a mapiya.

3

Matatatap siran on sa dayon sa dayon:

4

Go an Iyan mapakaiktiyar so siran a mitharo sa: "Kominowa so Allah sa wata: "

5

Daa katao iran on, ago so manga loks iran. Miyakala a katharo a pphakambowat phoon ko manga ngari iran. Da a gi iran tharoon a rowar sa kabokhag!

6

Na masikn a mapakapaggt ka a ginawang ka (ya Mohammad), makapantag ko manga rarad iran odi ran paratiyaya a angkai a tothol sa makapantag sa boko.

7

Mataan! a Skami na biyaloy Ami so matatago ko lopa a parahiyasan iyan, ka an Ami siran katpngi o antawaa kiran i taralbi a mapiya i galbk.

8

Na mataan! a Skami na adn dn a pmbalowin Ami a matatago on a lopa kabagabagas.

9

Ba aya tangkap ka na mataan! a so manga taw ko liyang ago so migagaang on na miyabaloy siran a pd ko manga tanda Ami a pakammsa?

10

Gowani a magapas so manga ngongoda ko liyang: "Na pitharo iran: Kadnan Ami, bgi kaming Ka phoon Rka sa limo, go tanorang Ka rkami so btad Ami sa toroan!"

11

Na piyakatorog Ami siran ko liyang, ko manga ragon a maiitong,

12

Oriyan iyan na piyakagogonao Ami siran, ka an Ami mapnto o antawaa ko dowa lompok i miyakatndo ko masa a kiyathay ran!

13

Skami na pphanotholn Ami rka (ya Mohammad) so totholan kiran sii ko bnar: Mataan! a siran na manga ngongoda a piyaratiyaya iran so Kadnan iran, na inomanan Ami siran sa toroan:

14

Go piyakabagr Ami so manga poso iran: Gowani a gomanat siran na pitharo iran: "Aya Kadnan Ami na so Kadnan o manga langit ago so lopa: da dn a phangniyan Ami a salakaw Rkaniyan a tohan: Sabnsabnar a o sowa ami oto na miyakatharo kami sa miyakalpas (a katharo)!"

15

"Siran aya a pagtaw Ami na kominowa siran sa salakaw Rkaniyan a manga tohan: Ino a da a khitalingoma iran kiran a katantowan a mapayag? Na ba adn a lawan a darowaka ko taw a inangkob iyan so Allah sa kabokhag?"

16

"Na amay ka ganatan iyo siran ago so pzimbaan iran, a salakaw ko Allah, na pagapas kano ko liyang: Ka saboyagan kano o Kadnan iyo ko limo Iyan, go thiyagaran kano Niyan sa rangkap o btad iyo."

17

Na pkhaylaing ka so alongan, a igira a somibang, na miraramig ko liyang iran sa tampar sa kawanan, na igira a somidp, na pkhaawat kiran sa tampar sa diwang, a sii siran matatago ko madaya on. Giyoto man na pd ko manga tanda o Allah: Na sadn sa toroon o Allah na skaniyan i phakakdg ko ontol; na sadn sa dadagn Iyan, na ding ka dn mitoon sa panarigan a makanggonanao ron.

18

Na aya tangkap ka kiran na khipag-unaw, a oba di siran na khitotorogn; na gii Ami siran pakakhlikhlidn sa tampar sa kawanan go sa tampar sa diwang: Na so aso iran na igagamba iyan so dowa kamonamona niyan ko gimowa: O maylaing ka siran na katalikhodan ka siran dn sa kapalagoy, go mapnopno ka kiran dn a kalk.

19

Na giyaya i kiyapakagogonawa Mi kiran, ka an siran makapamagizai. Pitharo o mitharo a pd kiran a: "Pira i kiyathay niyo?" Pitharo iran a: "Aya kiyathay tano na salongan, odi na sabaad sa salongan". Pitharo (o sabaad kiran) a: "So Kadnan iyo i Matao ko kiyathay niyo. Na sogoa niyo so isa rkano rakhs o pirak iyo wai sii ko bandar a ingd: Na pangilaylay sa sadn sa soti a pangn'ngkn na wita niyan rkano, a pagpr a phoon Rkaniyan: Go lalanat, go di kano niyan dn phakitokawi sa isa a taw."

20

"Mataan! a siran na o katokawi kano iran, na radiyamn kano iran, odi na pakakasowin kano iran ko okit iran, na di kano dn makaslang sa maliwanag samawto sa dayon sa dayon."

21

Na giyaya i kiyapayag Ami kiran, ka an iran katokawi a mataan! a so diyandi o Allah (a kawyag ko alongan a qiyamah) na bnar, go mataan! a so bangkit na da a sangka a madadalm on. Gowani ko pphangasasawalan kiran so btad iran. Na pitharo iran: "Mbalay kano ko obay ran sa walay": So Kadnan iran i taralbi a Matao kiran: Pitharo o siran a miyakasogat siran ko kpit iran a: "Mbaal tano dn ko obay ran sa masjid".

22

Adn a ptharo kiran sa: Tlo, a ika pat iran so aso iran; go adn a ptharo kiran sa lima, a ika nm iran so aso iran; kapangsar sa gaib; go adn a ptharo kiran: Sa pito, a ika walo iran so aso iran. Tharoang ka a: "So Kadnan ko i taralbi a Matao ko bilangan iran"; da a matao kiran a rowar ko mayto. Na di ka pakipzasawala makapantag kiran, inonta so kapakizasawala a mapayag, go da a pagizaing ka kiran sa makapantag kiran a isa bo.

23

Na ding ka dn ptharoa! ko apiya antonaa i: "Mataan! a sakn na pnggolawlaang ko to amag,"

24

Inonta (o banayn kawn a:) "Omiyog so Allah!". Go tadming ka so Kadnan ka igira a miyalipat ka, go tharoang ka a: "Masikn a toroon ako o Kadnan ko sii ko marani a di giyai a ontol."

25

Na miyakatarg siran ko liyang iran sa tlo gatos ragon, na inomanan iran sa siyaw (ragon).

26

Tharoang ka a: "So Allah i taralbi a Matao ko kiyathay a kiyapakatarg iran: - rk Iyan so mapag-uma ko manga langit ago so lopa: Sayana a Lambasi-kaylay Skaniyan, go sayana a Malambti-kapamamakin'g! Da a bagian iran a salakaw Rkaniyan a panarigan; go da a phakasakoto Niyan ko kokoman Iyan a isa bo."

27

Na batiyaang ka so initoron rka ko kitab o Kadnan ka: da a phakasambi ko manga katharo Iyan, go da dn a khatoon ka a salakaw Rkaniyan a kaphagapasan.

28

Na gnggnang ka a ginawang ka rakhs o siran a pzimbaan iran so Kadnan iran ko kapipita, go so kagabigabi, a kabaya iran so kasosoat Iyan; go di siran plpasa o dowa matang ka, sa kabaya aka sa parayasan ko kawyagoyag ko doniya; go ding ka pagonoti so taw a piyakilipatan Ami ko poso iyan so tadm Rkami, go inonotan iyan so kabaya iyan a ribat, go mimbaloy so btad iyan a miyakalpas.

29

Na tharoang ka a: "So bnar na phoon ko Kadnan iyo: Na sadn sa khabaya, na paratiyaya, go sadn sa khabaya, na khapir: Mataan! a Skami na pithiyagaran Ami so manga darowaka sa apoy, khalikopan siran o manga kadg iyan; na amay ka mangni siran sa inomn na pakainomn siran sa ig a lagid o totonagn a timbga, a phakatotong ko manga paras. Piyakasisingay a inomn! Go miyakaratarata a darpa!"

30

Mataan! a so siran a miyamaratiyaya, go pinggalbk iran so manga pipiya, na mataan! a Skami na di Ami ndadasn so balas ko taw a miphiyapiya sa galbk.

31

Siran man i khibagian ko manga sorga a tatap, a pphamangondas ko kababaan iran so manga lawasayg: Phangimowan siran roo ko manga salnda a bolawan, go makapnditar siran sa nditarn a gadong a manipis a sotra, go makapal a sotra; gii siran roo zandasandang ko manga kantir. Pakalma a balas! Go miyakapiyapiya a darpa!

32

Na mbaaling ka kiran a ibarat, a dowa mama a: Singgayan Ami so isa on sa dowa a asinda a manga anggor go piyakalibtan Ami a dowa oto sa korma; go biyaloy Ami so pagltan a dowa oto a babasoka.

33

Oman i isa sa dowaya a asinda na pkhibgay niyan so onga niyan, go da a khorangn iyan on a mayto bo: Na piyaka ondas an Ami so lmbak a dowa oto sa lawasayg.

34

Na miyakatimo sa manga onga: Na pitharo iyan ko pd iyan a skaniyan na pphangandagan iyan a: "Sakn i madakl a di ska i tamok, go tanto a mabagr i manga tabanga."

35

Na somiyold ko asinda niyan ko gii niyan kandarowakai sa ginawa niyan: Pitharo iyan a: "Adi ko praotn a kirakira a ba ini maylang sa dayon sa dayon,".

36

"Go di ko praotn a kirakira i so bangkit na ba makatindg: Na ibt o makandod ako ko Kadnan ko, na mataan! a phakatoon ako dn sa tomo a di giyai a darpa a khandodan."

37

Pitharo on o pd iyan, a gii ron makizinmbaga a: "Inong ka pagongkira so (Allah a) inadng ka Niyan a phoon sa botha, oriyan iyan na phoon sa notfa, oriyan iyan na pithaong ka Niyan a mama!"

38

"Ogaid na (sakn na miyagikral ako sa) Skaniyan so Allah, a Kadnan ko, na da a izakoto akn ko Kadnan ko a isa bo."

39

"Na inong ka da tharoa isako somold ka ko asindang ka a: Sadn sa kabaya o Allah! Da a bagr odi sii ko Allah! apiya aya kapkhaylayang ka rakn na sakn na mayto a di ska i tamok ago moriyataw;"

40

"Na matatangkd a mbgan ako o Kadnan ko sa tomo a di so asindang ka, na botawanan Iyan (so asindang ka) sa manga lthi a phoon ko langit, na mabaloy a lopa a miyagnasnas!"

41

"O di na mabaloy so ig on a somnp, na ding ka dn oto magaga mbabanog."

42

Na miyailang so pr iyan, na miyabaloy a dii niyan mapakakhosowa so dowa a palad iyan makapantag ko miyanggasto niyan on, a giyoto na miyangaggba so manga taar on, sa gii niyan matharo: "Hay o babo da a minisakoto akn ko Kadnan a isa bo!"

43

Na da a miyabaloy ron a pagtaw a makaphananabang on a salakaw ko Allah, go da niyan malinding a ginawa niyan.

44

Roo man na so parinta na rk o Allah, a Ontol. Skaniyan i Mapiya-ikabalas, go Mapiya a khabolosan.

45

Na payagang ka kiran so ibarat o kawyagoyag ko doniya: Lagid o ig a piyakatoron Ami skaniyan phoon ko kawang: Na miyakazaosaog sa sabap rkaniyan so manga mangngto ko lopa, (na sa oriyan iyan) na mimbaloy a gapok, a ipkhayambr skaniyan o manga ndo: Na tatap a so Allah sii ko langowan taman na Gaos Iyan.

46

So tamok ago so manga moriyataw na (matag) parahiyasan ko kawyagoyag ko doniya: Na so manga tatap a manga pipiya, i taralbi a mapiya a balas sii ko Kadnan ka, go taralbi a mapiya a aarapn.

47

Na (tadming ka) so alongan a pakalalakawn Ami so manga palaw, na maylaing ka so lopa a mamamayas, go timoon Ami siran, na da a ibagak Ami kiran a isa bo.

48

Na ipangadap siran ko Kadnan ka a zasaasaap siran, (tharoon o Allah:) "Sabnsabnar a miyakaoma kano Rkami sa lagid o kiya adn Ami rkano ko paganay a kiyaokitan: Kna, ka initgo niyo a da dn a isnggay Ami rkano a taalik (a kakhawyag iyo)!"

49

Na mibtad so daptar, na maylaing ka so manga baradosa a maalk siran phoon ko nganin a matatago on; go matharo iran: "Hay miyabinasa tano! antona ini a daptar! a da a plaoon iyan a mayto go da a mala, a ba niyan da maytong". Na mawma iran on so pinggalbk iran a makamamasa: Na da a zalimbotan o Kadnan ka a isa bo.

50

Na gowani na pitharo Ami ko manga malaikat a: "Pangalimbabaan kano ko Adam": Na miyangalimbabaan siran inonta so iblis. Skaniyan na pd ko manga jinn, na siyangka iyan so sogoan o Kadnan iyan. Ba niyo khowaa skaniyan ago so manga tonas iyan a manga panarigan a izambi iyo Rakn? A siran na manga ridoay niyo! Sayana a marata a kiyasambi a manga darowaka!

51

Kna a ba Akn kiran piyakizaksian a kiya adna ko manga langit ago so lopa, odi na so kiya adna ko manga ginawa iran: Go kna a ba Akn kinowa so phamakadadag a manga tabanga!

52

Na (tadming ka) so alongan a tharoon (o Allah) a: "Tawaga niyo so inipririmbang iyo Rakn, a siran so initgo niyo"; na panongganowin iran siran, na di iran siran masmbag na tagoan Ami so pagltan iran sa landng a phakabinasa.

53

Na kasandngan o manga baradosa so apoy na matangkd iran a mataan! a siran na khawlog siran on: Go da a matoon iran a milidas on.

54

Na sabnsabnar a pizalinsalin Ami magosay sangkai a Qor'an, ko manga manosiya so oman i ibarat: Na tatap a so manosiya, na lbi a madakl i kapamawal ko apiya antonaa;

55

Na da a miyakarn ko manga manosiya ko kapakaparatiyaya iran, isa ko makawma kiran so toroan, ago so kapakapangni ran sa maap ko Kadnan iran, a rowar sa kaphakatalingoma kiran o kiyawkitan o miyanga o ona, odi na so, kaphakatalingoma kiran o siksa a mithomlanga (iran).

56

Na da a kiyasogo Ami ko manga sogo a rowar sa pakaphamanotholn siran sa mapiya, go phamakaiktiyar siran: Na ipphamawal o siran a miyamangongkir so ribat, ka imbinasa iran oto ko bnar, go kinowa iran so manga ayat Akn go so piyakiiktiyaran kiran a kasandagan!

57

Na ba adn a taw a makalawan a darowaka ko taw a minindao ron so manga ayat o Kadnan iyan, na tiyalikhodan iyan, go piyakalipatan iyan so miyanggalbk o dowa lima niyan (a dosa)? Mataan! a Skami na tiyagoan Ami so manga poso iran sa manga totop, ka an iyan di khasabot, go (tiyagoan Ami) so manga tangila iran, sa kabngl. Na apiya pn tawagn ka siran ko toroan, na di siran dn phakaontol samawto sa dayon sa dayon.

58

Na so Kadnan ka a Manapi, i Khirk ko limo. O dan'ga Niyan siran sabap ko pinggalbk iran, na mataan! a kapnggagaanan Iyan kiran so siksa: Kna, ka adn a bagian iran a taalik, na da dn a matoon iran a salakaw Rkaniyan a kapagapasan.

59

Na Giyang koto a (taw ko) manga ingd na bininasa Mi siran ko kiyandarowaka iran; go tiyagoan Ami so kakhabinasa iran sa taalik.

60

Na gowani na pitharo o Mosa ko mangoda niyan a: "Di ako tharg taman sa di ako misampay ko kiyambaratmowa an o dowa kalodan, odi na makapopos ako sa phipira ragon".

61

Na kagiya a iraot siran ko kiyambaratmowa an a dowa oto (a kalodan), na kiyalipatan iran so sda iran, na miyakambaal sa lalan iyan ko kalodan a okita (a kiyamaraan).

62

Na kagiya a makalpas siran na pitharo iyan ko mangoda niyan: "Witang ka sii so ipaghoto ta; sabnsabnar a riyaot ta sa kaphlalakaw ta ini a dokaw."

63

Pitharo (o mangoda niyan) a: "Ino miyailaing ka gowani ko domkhata ko lakongan? Na mataan! a sakn na kiyalipatang ko so sda: Na da a lominipat rakn on ko kaaloya ko ron a rowar ko shaytan: Na miyakambaal sa lalan iyan ko kalodan a pakammsa!"

64

Pitharo (o Mosa) a: "Giyoto man so pphlolobaan ta": Na komiyasoy siran ko kiyaiposan iran, sa gi iran panondogn so lakaw iran.

65

Na miyakatoon siran sa isa a oripn, a pd ko manga oripn Ami, a bigan Ami skaniyan sa limo a phoon ko hadapan Ami, go inndao Ami skaniyan phoon ko hadapan Ami sa katao.

66

Pitharo on o Mosa: "Ino o onota ko rka, sa undaon ka rakn so inindao rka a ontol?"

67

Pitharo o (Khidhr) a: "Mataan! a ska na di ka dn makagaga phantang sa kapagonot ka rakn!"

68

"Na andamanaya i kakhapantangang ka ko dang ka skaniyan szba a katao?"

69

Pitharo o (Mosa) a: "Khatkhad akong ka, omiyog so Allah, a mapantang: Go da a zorangng ko a sogoan ka."

70

Pitharo (o Khidhr): "Na o pagonot ka rakn, na ding ka rakn pagizaan so apiya antonaa, taman sa di ko rka mapanothol sa mawsay i sabap iyan."

71

Na lomiyalakaw siran a dowa: Taman sa kagiya a makada siran ko awang, na libo niyan. Pitharo (o Mosa): "Ba aya kiyalboang ka on na pagldn ka so taw ron? Sabnsabnar a miyakanggolawla ka sa shay' a tanto a marata!"

72

Pitharo iyan: "Ba akn da tharoa a mataan! a ska na di ka dn makagaga phantang sa kapagonot ka rakn?"

73

Pitharo (o Mosa): "Di akong ka khararangiti sabap ko kiyalipat akn, go di akong ka phaliyogati ko miyanggolawla ko sa margn."

74

Na lomiyalakaw siran a dowa: Taman sa minithoona iran a bagowamama, na biyono iyan. Pitharo (o Mosa): "Ino ka phamono sa baraniyawa a da a sala iyan ka da a miyabono iyan a taw? Sabnsabnar a minggolawla ka sa shay' a mala a pakasisingay!"

Part 16

75

Pitharo iyan: "Ba ko rka da tharoa a mataan! a ska na da ka dn makagaga phantang sa ka pagonot ka rakn?"

76

Pitharo (o Mosa): "Amay ka iiza akn rka so apiya antonaa ko oriyan aya, na di akong ka dn phagonotaan: Sabnar a piyakataman ka so rason a phoon rakn."

77

Na lomiyalakaw a dowa oto: Taman sa kagiya a makatalingoma siran ko manga taw ko isa a ingd, na miyangni siran sa pangn'ngkn ko manga taw ron, na tiyaplis iran oba iran mapagana a dowa oto. Na miyakatoon siran roo sa sasilang a kota a marani ko kakhawthang iyan, na biyangon iyan. Pitharo (o Mosa): "O pizinganin ka, na miyakakowa kawn dn sa sokay!"

78

Pitharo (o Khidhr): "Giyai dn i kapakapmblag akn ago ska: Panotholn ko rka so osayan ko pakatana o dang ka magaga phantang."

79

"Na so pman so awang, na aya btad iyan na rk o manga miskin a ipphaningkawiyagn iran ko kalodan: Na kiyabayaan ko a kiyaaibi ko ron, ka adn ko khabolosan iran a dato a pkhowaan iyan a tgl so langowan a awang (a mapiya)."

80

"Na so pman so bagowamama, na aya btad o mbala a loks iyan na miyamaratiyaya, na inikawan ami i baniyan siran kapaliyogati sa kandarowaka ago kaongkir."

81

"Na kiyabayaan ami a sambian kiran o Kadnan iran sa tomo a di skaniyan sa kasosoti go lbi ron sa karanii kapangalimo."

82

"Na so pman so sa silang a kota, na aya btad iyan na rk o dowa bagowamama, a manga ilo, sii ko bandar a ingd; na adn a matatago ko didalm iyan, a gadong a rk iran; na aya btad o ama iran na bilangataw: Na kabaya o Kadnan ka a iraot siran ko katarotop o bagr iran, na migmaw iran so gadong iran a limo a phoon ko Kadnan ka. Na kna a ba akn aya pinggolawla sa ba phoon ko Kadnan ka. Na kna a ba akn aya pinggolawla sa ba phoon sa kabaabaas akn. Giyotoman i osayan o pakatana o dang ka magaga phantang."

83

Na ipagiza iran rka (ya Mohammad) so Zolqarnain. Tharoang ka: "Batiyaan ko rkano skaniyan sa pananadm."

84

Mataan! a Skami na piyakakhapaar Ami skaniyan ko lopa, go bigan Ami skaniyan ko langowan taman sa okit.

85

Na miyakakdg sa okit,

86

Taman sa kagiya a iraot ko pzdpan o alongan, na miyagda iyan a pzdp ko bowalan a mayaw: Na miyakatoon roo sa pagtaw: Pitharo Ami: "Hay Zolqarnayn! (mbayabaya ka,) o ndan'g angka (siran), odi na magmbaal ka kiran sa mapiya."

87

Pitharo iyan: "Sa taw a ndarowaka, na ziksaan Ami dn skaniyan; oriyan iyan na, phakandodn ko Kadnan iyan: Na siksaan iyan sa siksa a pakasisingay."

88

"Na sa pman sa taw a maratiyaya, go nggalbk sa mapiya; na adn a bagian iyan a balas a mapiya, go thoroon Ami dn skaniyan ko sogoan Ami sa malbod."

89

Oriyan iyan na miyakakdg sa lalan,

90

Taman sa kagiya a iraot ko pzbangan o alongan, na miyagda iyan a pzbang ko pagtaw a da a inisnggay Ami kiran ko tampar rkaniyan a rnding.

91

Mawto dn man: Na sabnar a katawan Ami so zisii rkaniyan a tothol.

92

Oriyan iyan na miyakakdg sa lalan,

93

Taman sa kagiya a iraot ko pagltan a dowa a palaw, na miyakatoon ko obay a dowa oto sa pagtaw a margn a kapphakasabot iran sa katharo.

94

Pitharo iran: "Hay Zolqarnayn, mataan! a so Yajoj ago so Majoj na pphaminasa siran ko lopa: Na o s'nggay ami ska sa tndan sa asara tagoing ka so pagltan ami ago siran sa rn?"

95

Pitharo iyan a: "So piyakikhapaar rakn skaniyan o Kadnan ko na aya tomo: Na ba ako niyo dn tabangi a bagr: Ka tagoan ko so pagltan iyo ago siran sa kota: "

96

"Witi ako niyo sa piyamilolang a potaw"; taman sa kagiya a matilb iyan so pangltan o dowa pimping, na pitharo iyan: "Biyagi niyo", taman sa kagiya a mabaloy niyan oto a (lagid o) apoy, na pitharo iyan: "Witi ako niyo sa mawdod akn on a galang."

97

Na da iran magaga i ba iran kaliyawawi skaniyan, go da iran magaga lom'bo.

98

Pitharo iyan: "Giyai na limo a phoon ko Kadnan ko: Na amay ka makawma so diyandi o Kadnan ko, na mbalowin Iyan nai a ropt; na tatap a so diyandi o Kadnan ko na bnar."

99

Na botawanan Ami so sabaad kiran sa alongan oto na mizarndada iyan so sabaad: Na iyopn so sanggakala, na limodn Ami siran langon.

100

Na sandign Ami so Jahannam sa alongan oto ko manga kapir sa samporna a kasandig,

101

Siran na miyatago so manga mata iran ko rnding ko pananadm Rakn, go aya btad iran na di iran khabaraw mamamakin'g (so katharo o Allah).

102

Ba aya tiyangkapan on o siran a miyamangongkir na khakowa iran so manga oripng ko a salakaw Rakn a manga panarigan? Mataan! a Skami na inithiyakap Ami so naraka Jahannam ko manga kapir (a pithiyagar) a darpa.

103

Tharoang ka (ya Mohammad): "Ba ami rkano phanothola so titho a miyangalologi ko manga galbk?"

104

"Siran so miyailang so galbk iran ko kawyagoyag ko doniya a siran na tatarimaan iran sa mataan! a siran na gii siran phiyapiya sa galbk?"

105

Siran man so miyamangongkir ko manga ayat o Kadnan iran, go so kimbaratmowaan Rkaniyan: Na miyailang so manga galbk iran, na da a pakatindgn Ami a bagian iran ko alongan a qiyamah a timbang (iran).

106

Giyoto man i balas kiran, a so naraka Jahannam; sabap ko kiya ongkir iran, go kinowa iran so manga ayat akn ago so manga sogo akn a kasandagan.

107

Mataan! a so miyamaratiyaya, go pinggalbk iran so manga pipiya, na miyabaloy a bagian iran so manga sorga Pirdaws (a pithiyagar) a darpa,

108

Makakakal siran on: Di siran on khabaya mawa.

109

Tharoang ka: "Apiya mbaloy so kalodan a dawat (a isorat) ko manga katharo o Kadnan ko, na thaman dn so kalodan na di pn thaman so manga katharo o Kadnan ko, apiya mgay Kami sa lagid iyan a iyoman on."

110

Tharoang ka (ya Mohammad) a: "Sakn na matag manosiya a lagid iyo, a iphagilaham rakn, a aya bo a tohan iyo na tohan a Isaysa; na sadn sa taw a aya btad iyan na aarapn iyan so kimbaratmowaan ko Kadnan iyan, na nggalbk sa galbk a mapiya, go di niyan phakisakotowi so soasoat ko Kadnan iyan sa isa bo."

Total Number of Verses: 98

1

Kaf, Ha, Ya, Ayn, Sad ; (so Allah i Matao ko paka-aantapan Iyan on.)

2

(Giyaya so) Pananadm ko limo o Kadnan ka ko oripn Iyan a Zakariya.

3

Gowani na miyangni ko Kadnan iyan sa kapangni a masoln,

4

Pitharo iyan: "Kadnan ko mataan! a sakn na lomimk rakn so tolan, go kominindat so olo sa bok a mapoti: Go da ako mabaloy ko pangni akn Rka Kadnan ko a miyaola!"

5

"Na mataan! a sakn na inikawang ko so manga tonganay akn ko oriyan ko: Ka aya btad o karoma ko na balk: Na bgi akong Ka phoon ko hadapan Ka sa wata,"

6

"A makapangowaris rakn, go makapangowaris ko manga tonganay o Ya'qob; go baloyang Ka skaniyan, Kadnan ko! a makasosoat (Rka)!"

7

(Pitharo rkaniyan:) "Hay Zakariya, mataan! a Skami na phanotholn Ami rka a (pmbawata ka sa) bagowamama a aya ngaran iyan na Yahya: da a biyaloy Ami rkaniyan gowani a sangay (niyan)."

8

Pitharo iyan: "Kadnan ko! andamanaya i khakhaadn rakn o bagowamama, a aya btad o karoma ko na balk, go sabnar a iniraot ako phoon ko kaloks sa kiyamaraan?"

9

Pitharo (o sogo): "Mawto dn man", pitharo o Kadnan ka a: "Skaniyan na malbod Rakn: Go sabnar a inadn Akn ska gowani, a da ka pn sa mayto bo!"

10

Pitharo iyan: "Kadnan ko, snggay akong Ka sa tanda". Pitharo (o sogo) a: "Aya tanda a ka, na ding ka (magaga i bang ka) mimbitiyarai so manga manosiya sa tlo gawii, a da a sakit (ka)."

11

Na liniyowan iyan so pagtaw niyan a phoon ko mihrab: Na iniproayat iyan kiran a tasbik kano (ko Allah) ko kapitapita, go so kagabigabi.

12

(Pitharo o Allah:) "Hay Yahya, kpiting ka so kitab zabnsabnar": Go inibgay Ami rkaniyan so ongangn ko kayto iyan,

13

Go (bigan Ami sa) kapdi phoon ko hadapan Ami, go kasosoti: Go miyabaloy a pphangongonotan,

14

Go makapdiin ko mbala a loks iyan, go da mabaloy a mammndg a darowaka.

15

Na kalilintad a sii rkaniyan ko gawii a kinimbawataan on, go so gawii a kapatay niyan go so gawii a kapakatindga on (phoon ko kobor iyan) a oyagoyag!

16

Na aloyang ka ko kitab so Maryam, gowani a makawatan ko pagtaw niyan (ka somiyong) ko darpa a tampar sa sbangan.

17

Na mimbaal ko tampar kiran sa rnding; - na siyogo Ami sii rkaniyan so sogo Ami, na miyaniyaropa on sa manosiya a tarotop.

18

Pitharo (o Maryam): "Mataan! a sakn na mlindong ako ko (Allah a) Masalinggagaw: Phoon rka, o aya btad ka na manananggila."

19

Pitharo iyan a: "Matag ako sogo o Kadnan ka, sa kambgi akn rka sa wata a soti."

20

Pitharo (o Maryam) a: "Andamanaya i kakhaadn rakn o wata, a da a miyakapamakay rakn a mama, go da ako mabaloy a barazina?"

21

Pitharo (o sogo): "Mawto dn": Pitharo o Kadnan ka a: "Skaniyan na malbod Rakn: Go kagiya a mbalowin Ami skaniyan a tanda ko manga manosiya, go limo a phoon Rkami: Na miyabaloy a sogoan a miyapasad."

22

Na inikawgat iyan skaniyan, na inisibay niyan ko darpa a mawatan.

23

Na miyapakasong skaniyan o balilit ko kayo a korma: Na miyatharo iyan: "Hay oba ako bo miyatay ko onaan nai! Go miyabaloy ako a kiyalipatan a di dn pkhaaloy!"

24

Na tiyawag skaniyan (o sogo) ko kababaan iyan: "Di ka mboboko! Sabnar a tiyagoan o Kadnan ka so kababaan ka sa lawasayg (a mayto);"

25

"Na koyongang ka sii rka so kayo a korma: Ka ang ka niyan kapangologi sa onga a korma a kiyalotoan."

26

"Na kang ka, go inom ka, go pakapipiyaang ka a ginawang ka. Na o adn a khaylaing ka ko manga manosiya a sakataw, na tharoang ka a: 'Mataan! a sakn na minizamaya akn ko (Allah a) Masalinggagaw so kathigr, na di ako dn makipmbitiyarai sa alongan nai sa manosiya'."

27

Na inowit iyan ko pagtaw niyan, a aawidan iyan. Pitha iran: "Hay Maryam, sabnsabnar a miyakanggolawla ka sa shay' a lbi a mala a piyakagowagowad!"

28

"Hay babay o Haron, da ko btad i ama a ka oba taw a marata, go da ko btad i ina aka a ba pazisina!"

29

Na initoro iyan (so wata) pitharo iran: "Andamanaya i kipmbitiyarain ami ko taw a matatago ko saloyota a mayto a wata?"

30

Pitharo (o wata) a: "Mataan! a sakn na oripn o Allah: Inibgay Niyan rakn so kitab, go biyaloy ako Niyan a nabi;"

31

"Go biyaloy ako Niyan a pphangompiya, apiya anda ko matago, go inisogo Iyan rakn so sambayang go so zakat ko masa a kawyagoyag akn;"

32

"Go (biyaloy ako Niyan a) makapdiin ko ina akn, go da ko Niyan baloya a mammndg a darowaka;"

33

"Go so kalilintad na sii rakn ko gawii a kinimbawataan rakn, go so gawii a kapatay akn, go so gawii a kapakatindga rakn a oyagoyag!"

34

Giyoto man so Eysa a wata o Maryam: Katharo a bnar, a so kapaparampangan siran on.

35

Da mapatot ko Allah i ba kowa sa wata. Soti Skaniyan! Igira adn a pakapnggolalann Iyan a sogoan, na aya bo a ptharoon Iyan on na: "Kon", na khaadn.

36

Na mataan! a so Allah i Kadnan ko go Kadnan iyo: Na zoasoata niyo Skaniyan: Giyaya i okit a makaoontol.

37

Na da pagayonayon so pizagorompong ko ndolondolonan iran, na sangat a siksa a rk o siran a miyamangongkir, ko kapakandadarpai ko gawii a mala!

38

Sayana siran a phakan'g, go sayana siran a phakaylay, ko gawii a kapakatalingoma iran Rkami! Ogaid na so manga darowaka sa alongan nai na matatago ko kadadag a mapayag!

39

Na pakiiktiyaring ka kiran so alongan a kazndit, a masa a kakokoma ko miyanggolawla: Na siran na matatago ko kalipat a siran na da siran miyamaratiyaya!

40

Mataan! a Skami na Skami i phangowaris ko lopa, go so taw a matatago on: Go sii siran Rkami phamakandoda.

41

Na aloyang ka ko kitab so Ibrahim: Mataan! a skaniyan na aya btad iyan na tanto a mmamataan, a nabi.

42

Gowani na pitharo iyan ki ama iyan: "Hay ama, inong ka pzimbaa so di phakan'g, go di phakaylay, go da a khilinding iyan rka a mayto bo?"

43

"Hay ama, mataan! a sakn na sabnar a miyakaoma rakn so katao a: So da rka makatalingoma: Na onoti akong ka: Ka nggonanaon ko ska sa lalan a matitho."

44

"Hay ama, ding ka pzoasoata so shaytan: Mataan! a so shaytan na miyabaloy a darowaka ko (Allah a) Masalinggagaw."

45

"Hay ama, mataan! a sakn na ipkhawan akn oba ka masogat a siksa a phoon ko (Allah a) Masalinggagaw, na mabaloy ka a bolayoka o shaytan."

46

Pitharo (i ama iyan): "Bang ka khagowadn so manga katohanan ko, hay Ibrahim? Mataan! a oding ka gnki, na sabnar a radiyamn ko ska dn: Na tawaranga kong ka sa mathay!"

47

Pitharo (o Ibrahim): "Kalilintad a sii rka: Ipangni akn ska dn sa maap ko Kadnan ko: Mataan! a Skaniyan na tatap a Malai-gagaw rakn."

48

"Na pmblag ako rkano, ago so pphanongganowin iyo a salakaw ko Allah: Go phangni ako ko Kadnan ko: Matatangkd a di ako khabaloy ko pangni akn ko Kadnan ko, a khawla."

49

Na kagiya a mblag kiran ago so pzimbaan iran a salakaw ko Allah, na inibgay Ami ron so Is'haq go so Ya'qob; na oman i isa kiran na biyaloy Ami a nabi.

50

Go bigan Ami siran ko limo Ami, go singgayan Ami siran sa mapiya a bantogan a maporo.

51

Na aloyang ka ko kitab so Mosa: Mataan! a skaniyan na miyabaloy a tolabos, go miyabaloy a sogo a nabi.

52

Na tiyawag Ami skaniyan ko kilid o palaw sa tampar sa kawanan, go piyakarani Ami skaniyan, a kinimbitiyarain Ami ron.

53

Go inibgay Ami ron a pd ko limo Ami, so pagari niyan a Haron, a nabi.

54

Na aloyang ka ko kitab so Ismail: Mataan! a skanyan na miyabaloy a tomotoman sa pasad, go miyabaloy a sogo, a nabi.

55

Na miyabaloy a ipzogo iyan ko manga tonganay niyan so sambayang go so zakat, go miyabaloy sii ko Kadnan iyan a makasosoat.

56

Na aloyang ka ko kitab so Edris: Mataan! a skaniyan na miyabaloy a mmamataan, a nabi:

57

Go iniporo Ami skaniyan ko darpa a maporo.

58

Siran man so inikalimo siran o Allah a manga nabi; a pd ko moriyataw o Adam, go pd ko riyoran Ami (ko kapal) a pd o Noh, go pd ko kiyababadan ko Ibrahim go so Israil, - go pd ko taw a tiyoro Ami go pinili Ami. Igira a pphangadian kiran so manga ayat o (Allah a) Masalinggagaw, na pzondong siran a khisosodiod go pphaman'gad.

59

Na adn a miyakasalono ko oriyan iran a miyakasambi a inilang iran so sambayang, go piyangonotan iran so manga kabaya a ribat, na mawlog siran dn ko landng (ko naraka),

60

Inonta so taw a mithawbat go miyaratiyaya, go minggalbk sa mapiya: Na siran man i phamakasold ko sorga, go di siran khasalimbotan sa mayto bo, -

61

Manga sorga a tatap, so inidiyandi o (Allah a) Masalinggagaw ko manga oripn Iyan a da mapayag: Mataan! a Skaniyan na tatap a so diyandi Iyan na khitoman.

62

Daa khan'g iran roo a siyasiya, ogaid na kalilintad: Go adn a bagian iran a pagpr kiran roo, sa kapita, go magabi:

63

Giyoto man so sorga a so pakiphangowaliyan Ami ko manga oripn Ami a taw a miyabaloy a manananggila.

64

Na (pitharo o Jibril:) "Di kami phakatoron inonta o sabap ko sogoan o Kadnan ka: Kapaar Iyan so kasasangoran ami go so katatalikhodan ami, go so pagltan oto: Na da ko btad o Kadnan ka i ba khalipat,"

65

"Kadnan o manga langit ago so lopa, go so pagltan a dowa oto: Na simbaang ka Skaniyan, go phantang ka makapantag ko simba Rkaniyan: Ba adn a katawan ka a sangay Niyan?"

66

Na gii tharoon o manosiya: "Ino amay ka matay ako, mataan! a phakagmawn ako dn a oyagoyag?"

67

(Pitharo o Allah:) Ba di khatadmi o manosiya a mataan! a Skami na inadn Ami skaniyan gowani a dapn maadn sa mayto bo?

68

Na ibt ko Kadnan ka, mataan! a limodn Ami siran dn, rakhs o manga shaytan; oriyan iyan na mataan! a witn Ami siran dn ko mliliyota ko Jahannam a pkhidola iran a lb iran;

69

Oriyan iyan na mataan! a mamitbit Kami dn ko oman i isa ka tindg sa sadn sa tanto kiran a somiyang ka ko (Allah a) Masalinggagaw.

70

Oriyan iyan na Skami dn i Matao ko siran a siran i kiyapatotan ko kapakasold ko naraka.

71

Na da a isa rkano bo a ba on di makasagad: Miyabaloy sii ko Kadnan ka a miyapasad a kokoman.

72

Oriyan iyan na sabtn Ami so miyamananggila, na ibagak Ami roo so manga darowaka, a pkhidola iran a lb iran.

73

Na igira a pphangadian kiran so manga ayat Ami, a manga rarayag, na gii tharoon o siran a miyamangongkir, ko siran a miyamaratiyaya: "Antawaa ko dowa ka sagorompong i tomo i darpa, go mapiya i kalimodan?"

74

Na madakl a bininasa Mi ko miyaonaan iran a pagtaw, a siran i lbi a mapiya i kasangkapan go so kaphagilaya on!

75

Tharoang ka: "Sadn sa matago ko kadadag, na mbgan sa taalik skaniyan o (Allah a) Masalinggagaw sa madakl, taman sa amay ka kasandngan iran so ididiyandi kiran a siksa, odi na so bangkit, - na katokawan iran dn so taw a skaniyan i lbi a marata i darpa, go tanto a malobay i manga tabanga!"

76

"Na pphagomanan o Allah so siran a komidg sa ontol: sa toroan: Na so manga tatap a manga pipiya, na tomo sii ko Kadnan ka a balas, go tomo a khandodan."

77

Ino kiyatokawan ka so inongkir iyan so manga ayat Ami, go pitharo iyan a: "Mataan! a khabgan ako dn sa tamok go wata?"

78

Ba niyan miyailay so da mapayag, antawaa ba miyakakowa sii ko (Allah a) Masalinggagaw sa pasad?

79

Kna oto! Ipzorat Ami dn so gii niyan tharoon: Go pagomanan Ami ron so siksa

80

Go pangowaliyan Ami rkaniyan so gii niyan tharoon, go makatalingoma Rkami a tawantawan.

81

Na kominowa siran sa salakaw ko Allah a manga katohanan, ka an siran kon mabaloy a mamakawgop kiran!

82

Kna oto, ka pagongkirn iran dn so kiyasimbaa kiran, go khabaloy siran a manga ridoay ran.

83

Bang ka da katokawi a mataan! a Skami na biyotawanan Ami so manga shaytan ko miyamangongkir, a pphangondoy kiran sa tanto a kapangondoy?

84

Na ding ka kiran pnggagaani (so siksa), ka mataan! a phamagitongn Ami kiran dn sa samporna a kapamagitong.

85

Sii ko alongan a limodn Ami so miyamananggila sii ko Masalinggagaw, a khikokoda (a khisslaan),

86

Na idndg Ami so manga baradosa ko naraka Jahannam, a maawaw siran,

87

Daa makapapaar kiran ko sapaat, inonta so taw a miyakakowa sii ko (Allah a) Masalinggagaw sa diyandi.

88

Na pitharo iran a: "Kominowa so (Allah a) Masalinggagaw sa wata!"

89

(Pitharo o Allah): Sabnsabnar a mitharo kano sa shay' a minitaralo a pakasisingay!

90

Mayto bo na so manga langit na manga bbnsad sa phoon roo, go manga bbngkag so lopa, go mamangitombak so manga palaw a zagonaot,

91

Sa kinidaowaan iran sa adn a wata o (Allah a) Masalinggagaw.

92

Na di patot ko Masalinggagaw i ba kowa sa wata.

93

Da (a isa bo) ko langowan a taw a matatago ko manga langit go so lopa a ba di makatalingoma ko (Allah a) Masalinggagaw, a makapangangalimbabaan.

94

Sabnsabnar a maiitong Iyan siran, go mabibilang Iyan siran sa samporna a bilangan.

95

Na oman i isa kiran na makatalingoma Rkaniyan ko alongan a qiyamah a tawantawan.

96

Mataan! a so miyamaratiyaya, go pinggalbk iran so manga pipiya, na snggayan siran dn o (Allah a) Masalinggagaw sa kakasi

97

Na aya dn a kiyalboda Mi ko Qor'an ko basang ka (ya Mohammad), na an ka oto mapphamanothol ko miyamananggila, go an ka oto mipamakaiktiyar ko pagtaw a manga pawal.

98

Na madakl a bininasa Mi ko miyaonaan iran a pagtaw. Ba adn a pkhagdam ka kiran a isa bo, odi na pkhan'g ka kiran a karangs?

Total Number of Verses: 135

1

Ta, Ha. (so Allah i Matao ko paka-aantapan Iyan on.)

2

Kna a ba aya kinitoronn Ami rka (ya Mohammad) ko Qor'an na angka makandamar,

3

Ogaid na ndao ko taw a maalkn (ko Allah),

4

Initoron a miyakapoon ko miyadn ko lopa ago so manga langit a manga poporo.

5

So Masalinggagaw a sii ko aras mithakna.

6

Rk Iyan so matatago ko manga langit ago so matatago ko lopa, go so pagltan a dowa oto, go so didalm o lopa.

7

Na o pakatanogn ka so katharo, na mataan! a Skaniyan na katawan Iyan so masoln ago so lbi a mapag-uma.

8

So Allah! Da a tohan a salakaw Rkaniyan! Rk Iyan so manga ngaran a manga pipiya.

9

Ino, miyakatalingoma rka so totholan ko Mosa?

10

Gowani a makaylay sa apoy: Na pitharo iyan ki karoma niyan a: "Apa kano; ka mataan! a sakn na miyakaylay ako sa apoy; kalokalo kawitan ko skano ron sa barabad, odi na makatoon ako sii ko apoy sa nanao."

11

Na kagiya a makatalingoma on, na kiyatalowan: "Hay Mosa!"

12

"Mataan! a Sakn na Sakn so Kadnan ka! na ndaing ka so dowa a talompa aka: Mataan! a ska na matatago ko balintad a soti a giya Towa;"

13

"A Sakn na pinili Akn ska: Na pakin'gang ka so ipagilaham (rka)."

14

"Mataan! a Sakn na Sakn so Allah: Da a tohan a salakaw Rakn: Na simbaa Kong ka, go pamayandgn ka so sambayang sa pananadm Rakn."

15

"Mataan! a so bangkit na phakatalingoma marani a pag-umaan Ko skaniyan, ka an mibalas ko oman i isa a ginawa so galbk iyan."

16

"Na oba ka on kaalangi o taw a di ron mapaparatiyaya, go inonotan iyan so n'nga iyan, ka mabinasa ka!"

17

"Na antonaa angkanan a zisii sa kawanan ka, hay Mosa?"

18

Pitharo iyan: "Giyaya na badas akn a ipphankn akn skaniyan, go ipphangawit akn oto (sa pkhn) o kambing akn, go adn a manga osba ko ron a pd."

19

Pitharo (o Allah): "Ithogn ka, hay Mosa!."

20

Na iniithog iyan, na samawto na skaniyan na nipay, a giindoladola sa magaan.

21

Pitharo (o Allah): "Kowaang ka skaniyan, go di ka khalk: Ka phakandodn Ami bo skaniyan ko btad iyan a paganay: "

22

"Go soldn ka a limang ka ko kilid ka: ka an makambowat a masindaw, a kna a ba panggal, - tanda pn a salakaw," -

23

"Ka phakaylayn Ami ska ko manga tanda Ami a manga ala."

24

"Song ka ko Pir'awn, ka mataan! a skaniyan na miyangakowala."

25

Pitharo (o Mosa): "Kadnan ko, pakalowagang Ka rakn so rarb akn,"

26

"Go lbodang Ka rakn so zowaan akn,"

27

"Go pakalowayang Ka so kabigr o dila akn,"

28

"Ka an iran kasaboti so katharo akn:"

29

"Go snggay akong Ka sa wazir a pd ko tonganay akn,"

30

"So Haron, a pagari ko,"

31

"Bkhzn Ka skaniyan ko bagr akn,"

32

"Go pakatompokang Ka skaniyan ko galbk akn:"

33

"Kaang kami Rka pphakatasbik sa madakl,"

34

"Go an ami Ska katatadmi sa madakl: "

35

"Mataan! a Ska i tatap a phagilay rkami."

36

Pitharo (o Allah) a: "Sabnar a inibgay rka so pangning ka, hay Mosa!"

37

"Na sabnsabnar a inipangalimo Ami ska ko kiyaokitan a salakaw."

38

"Gowani a iilaham Ami ki ina aka so iphagilaham:"

39

(Sa pitharoon:) "Tagoang ka skaniyan (a Mosa) ko kaban, na anodang ka ko lawasayg (a Nayl): Na pimpirn skaniyan o lawasayg (a Nayl) ko thbaan, ka an makowa o ridoay Akn go ridoay niyan: Na tiyagoang Ko ska sa kakasi a phoon Rakn: Go angka mapagoyagoyag sii ko palihara Akn."

40

"Gowani a pphlalakaw si babaing ka na gii niyan tharoon: 'O toroi ko skano sa taw a makambaromitan on?' Na piyakandod Ami ska ki ina aka, ka an makapiya ginawa niyan go an di makamboboko. Na miyamono ka sa taw, na siyabt Ami ska phoon ko rata a ginawa, go piyanpngan Ami ska a manga tpng. Na miyakatarg ka sa miyakapira ragon ko manga taw sa Madiyan; oriyan iyan na miyakaoma ka sa takdir Akn, hay Mosa!"

41

"Go pinili Akn ska (a siyanaan) o ginawa Ko:"

42

"Lalakaw ka, ska, go si pagaring ka, rakhs o manga tanda Akn, go di niyo paparina so tadm Rakn."

43

"Songkano a dowa ko Pir'awn, mataan! a skaniyan na miyangakowala;"

44

"Na mbitiyarain iyo skanyan, sa lalag a malinank, ka kalokalo o skaniyan na makapagin'ng ka, odi na malk."

45

Pitharo iran a dowa: "Kadnan ami, mataan! a skami na ipkhalk ami i ba kami niyan sakotikaa, odi na magoman a kapphangakowala niyan."

46

Pitharo (o Allah): "Di kano khalk: Mataan! a Sakn na babid iyo: Pkhan'g Akn go pkhaylay Akn (so khasowa iyo)."

47

"Na song kano ron, na tharoa niyo a: 'Mataan! a skami a dowa na sogo o Kadnan ka: Na bokaing ka rkami so manga moriyataw o Israil, go ding ka siran pziksaa: Sabnar a adn a minioma mi rka a tanda, a phoon ko Kadnan ka. Na so kalilintad na sii ko taw a komidg ko toroan'!"

48

"Mataan! a skami na sabnar a iniilaham rkami a mataan! a so siksa na sii ko taw a tomiyaplis go tomiyalikhod."

49

Pitharo (o Pir'awn): "Antawaa i Kadnan iyo hay Mosa?"

50

Pitharo (o Mosa): "Aya Kadnan ami na so inibgay Niyan ko oman i isa shay' so iniyadn on, oriyan iyan na pinggonanao Niyan."

51

Pitharo (o Pir'awn): "Antonaay miyasowa o manga pagtaw a miyangaoona?"

52

Pitharo (o Mosa): "So katawi ron na sii ko Kadnan ko, ka matatago ko kitab: Di kharibat so Kadnan ko, go di khalipat,"

53

"So inisnggay Niyan rkano so lopa a miyakayat, go tiyagoan kano Niyan on sa manga lalan; go piyakatoron Iyan a phoon ko kawang so ig"; na adn a pphakambowatn Ami sa sabap on a pizoson a mangngto a mbidabida.

54

Kang kano (ron) go pagpra niyo (ron) so manga ayam iyo: Mataan! a adn a matatago roo man a titho a manga tanda ko adn a manga gdagda iyan:

55

Inadn Ami skano a phoon ko lopa, go ron Ami skano phakakasoya, go ron Ami skano phakagmawa so khaokitan a salakaw.

56

Na sabnsabnar a piyakiilay Ami (ko Pir'awn) so manga tanda Ami sa kalangolangowan iyan, na tomiyaplis go somiyang ka.

57

Pitharo (o Pir'awn): "Ba aya kiyasong ka rkami na ang kaming ka mapakaawa ko lopa Ami sabap ko balik matang ka, hay Mosa?"

58

"Na mataan! a khawitan Ami ska dn sa balik mata a lagid iyan. Na tndo ka ko lt ami go so lt ka sa kapthalabok, di kami ron ndorat skami go ska (sii ko) darpa a kasosokodan (rktano)."

59

Pitharo (o Mosa): "Aya kathalabok iyo na so alongan a kalilang, go malimod so manga manosiya ko kiporo o alongan."

60

Na tomiyalikhod so Pir'awn: Na tinimo iyan so antangan iyan, oriyan iyan na miyakatalingoma.

61

Pitharo kiran o Mosa: "Dowan dowaan kano! Di niyo pagangkoba so Allah sa kabokhag, ka ibinasa Niyan rkano so siksa: Na sabnar a kiyawiswisan so taw a inangkob iyan (so Allah)!"

62

Na piyamagodasaan iran i zowaan iran, ko ndolondolonan iran, go piyagns iran so bitiyara (iran).

63

Pitharo iran a: "Mataan! a giya dowaya na titho a manga balik mata a kabaya iran a mapakaawa kano iran ko lopa iyo sa misabap ko balik mata iran, go maylang iran so okit iyo a makallbi."

64

"Na timoa niyo so antangan iyo, oriyan iyan na talingoma kano a khizisinnday: Na sabnar a miyakadaag sa alongan nai so taw a miyakaombaw."

65

Pitharo iran: "Hay Mosa, na ithog ka odi na mabaloy kami a paganay a taw a minithog?"

66

Pitharo iyan: "Kna, ka ithog kano!" Na samawto na so manga tali ran go so manga badas iran na aya kaggdaa niyan on phoon ko balik mata iran na mataan! oto a pphamanola!

67

Na kiyagdian sa sii bo ko ginawa niyan sa kalk so Mosa.

68

Pitharo Ami: "Di ka pkhalk, mataan! a ska na ska i maporo: "

69

"Na ithogn ka so zisii ko kawanan ka: ka an iyan malolok so biyaloy ran; mataan! a so biyaloy iran na limpangan o balik mata: Na di phakadaag so balik mata, apiya anda lomiyabo."

70

Na miyamangi omng so manga balik mata sa khipakasosodiod: Pitharo iran: "Piyaratiyaya mi so Kadnan o Haron ago so Mosa."

71

Pitharo (o Pir'awn): "Ino niyo pharatiyayaa skaniyan a da akn skano pn kaydini? Mataan! a skaniyan i titho a goro niyo, a so miyangndao rkano ko balik mata! Na mataan! a pamotolan ko dn so manga lima niyo go so manga ai niyo sa di magonod, go mataan! a solaan ko skano dn ko manga kayo a korma: Go mataan! a katokawan iyo dn, o antawaa rkami i lbi a sangat i siksa, go lbi a kakal!"

72

Pitharo iran: "Di ami ska dn iplawan ko miyakaoma rkami a manga rarayag a karina, ago so miyadn rkami. Na nggolalann ka i ipnggolalan ka: Siing ka bo mipngolalan sangkai a kawyagoyag ko doniya."

73

"Mataan! a skami, na piyaratiyaya mi so Kadnan ami: Ka oba Niyan rkami napiya so manga kasalaan ami, go so initgl ka rkami skaniyan a balik mata: Na so Allah i lbi a mapiya, go lbi a tatap."

74

Mataan aya! a sadn sa taw a makatalingoma ko Kadnan iyan a baradosa, - na mataan! a bagian iyan so naraka Jahannam: Di roo phatay go di khaoyag (sa kawyag a mapiya).

75

Na sadn sa makatalingoma Rkaniyan a mapaparatiyaya a sabnar a pinggalbk iyan so manga pipiya, - na siran man i khibagian ko manga daradat a manga poporo,

76

Manga sorga a tatap, a phamangondas ko kababaan iyan, so manga lawasayg: Makakakal siran roo: Na giyoto man i balas ko taw a mizoti.

77

Na sabnsabnar a iniilaham Ami ko Mosa a: "Panglmn ka so manga oripn Ko, na mbaaln ka siran sa lalan ko kalodan a mamara, di ka khawan i ba kano raota, go di ka khalk."

78

Na tiyondog siran o Pir'awn rakhs o manga tantara iyan, na minitanggob kiran so kalodan so nganin a minitanggob kiran.

79

Na miyadadag o Pir'awn so pagtaw niyan, go da niyan matoro.

80

Hay manga moriyataw o Israil, sabnar a siyabt Ami skano ko ridoay niyo, go iniphasada Ami skano ko kilid o palaw sakawanan, go initoron Ami rkano so Manna, go so (papanok a) Salwa:

81

(Pitharo Ami:) "Kang kano ko manga pipiya ko nganin a inipagpr Ami rkano, go di kano ron phmalawani, ka matangkd rkano so rarangit Akn: Na sadn sa matangkd on so rarangit Akn na sabnar a mabinasa!"

82

"Na mataan! a Sakn na titho a Manapi ko taw a mithawbat, go miyamaratiyaya, go minggalbk sa mapiya, - oriyan iyan na komidg ko ontol."

83

"Na antonaa i minipagalokalok ka (sa kiya onaing ka) ko pagtawng ka, hay Mosa?"

84

Pitharo iyan: "Siran na kataya siran sii ko talikhodan ko (a matotondog ako iran): Na miyagalokalok ako rka Kadnan ko, ka obang Ka kasoatn."

85

Pitharo (o Allah): "Na mataan! a Skami na tiniyoba Ami so pagtawng ka ko oriyan ka (ko kiyablagang ka kiran): Ka diyadag siran o Samiri."

86

Na mimbalingan so Mosa ko pagtaw niyan a pkhararangitan a makamboboko. Pitharo iyan: "Hay pagtaw akn, ba kano da diyandii o Kadnan iyo sa diyandi a mapiya? Ba rkano miyathay so masa? Antawaa ba niyo kabaya a matangkd rkano so rarangit a phoon ko Kadnan iyo, sa kiyandorat iyo ko diyandi akn?"

87

Pitharo iran: "Kna a ba kami mindorat ko diyandii ka, sa ba sabap ko kapaar ami: Na ogaid na piyakaawid kami sa manga ppnd phoon ko imbolawan o pagtaw, na inipangithog ami oto (ko apoy), ka lagid oto a kiyaithog o Samiri."

88

"A inigmaw niyan kiran a mayto a sapi a lawas iyan, a phag-nga na pitharo iran a: Katii so tohan iyo, go tohan o Mosa, na miyalipat!"

89

Ba iran di khaylay a da a khismbag iyan kiran a katharo, go da a mipapaar iyan kiran a morala odi na ompiya?

90

Na sabnsabnar a pitharo kiran o Haron gowani a: "Hay pagtaw akn! giyabo a kinitpngn rkano ron: Ka mataan! a aya Kadnan iyo na so (Allah a) Masalinggagaw: Na onoti ako niyo go onoti niyo so sogoan ko."

91

Pitharo iran: "Di ami dn itharg a karrtki ami ron somimba, taman sa di makabaling rkami so Mosa."

92

Pitharo (o Mosa): "Hay Haron! antonaa i miyakarn rka, gowani a maylaing ka siran a miyadadag siran."

93

"Sa dang ka rakn kawnoti? Inong ka zoranga so sogoan ko?"

94

Pitharo Haron: "Hay wata i ina, ding ka nggandra so sompa akn go giya olo akn. Mataan! a sakn na inikalk akn o bang ka matharo a: Inomparik ka so manga moriyataw o Israil, go dang ka kanayawi so lalag akn!"

95

Pitharo (o Mosa): "Antonaa i siyowa aka, hay Samiri?"

96

Pitharo iyan a: "Miyailay akn so da iran maylay skaniyan: Na komims ako sa sakms ko lakaw o sogo, na iniithog akn on: Na giyoto i inibarayat rakn o ginawa ko."

97

Pitharo (o Mosa): "Na awa ka. Na mataan! a rk ka ko kawyagoyag so giing ka katharoa sa: 'Da a kazkhoay'; go mataan! a adn a rk ka a diyandi a di ka on dn makandorat: Na ilayang ka so tohan ka, a so tiyatap ka a kapzimba angka on: Mataan! a thotongn Ami dn skaniyan oriyan iyan na mataan! a ikayambr Ami dn skaniyan ko kalodan sa titho a kakayambr!"

98

Aya bo a tohan iyo na so Allah: So da a tohan a salakaw Rkaniyan: Rangkom Iyan a katao so langowan taman.

99

Lagid aya a kapphanothola Mi rka ko sabaad ko manga thotholan ko andang a miyaona a: Sabnar a bigan Ami ska phoon ko hadapan Ami sa pananadm.

100

Sadn sa tomalikhod on, na mataan! a skaniyan na phakaawid ko alongan a qiyamah sa mapnd;

101

Makakakal siran on: Na miyakaratarata a bagian iran ko alongan a qiyamah a awid,

102

Sii ko alongan a iyopn so sanggakala: Na limodn Ami so manga baradosa, sa alongan oto a khikabobota.

103

Na mipphamagtonga iran ko ndolondolonan iran a: "Da a minitarg iyo a rowar ko sopolo (gawii);"

104

Skami i Matao ko gi iran tharoon: ko masa a gii tharoon o makaoontol kiran i pamikiran a: "Da a kiyapakatarg iyo a rawar ko salongan!"

105

Na ipagiza iran rka so manga palaw: Na tharoang ka a: "Ikhayontong skaniyan o Kadnan ko sa samporna a ka kayontong;"

106

"Na ibagak Iyan (so lopa) a pantar a mammnas;"

107

"A da a khaylaing ka on a mallna, go da a mibobobong."

108

Sa alongan oto na khaonotan iran so pphananawag: Sa da a kakhorikori on: Na mapnt so manga sowara ko (Allah a) Masalinggagaw: Na da a khan'g ka a rowar sa dalpk.

109

Sa alongan oto na di phakanggay a gona so kapangongogopan inonta so taw a inidinan skaniyan o (Allah a) Masalinggagaw, go miyasoat on sa katharo.

110

Katawan Iyan so kasasangoran iran go so katatalikhodan iran: Go di iran khaszb Skaniyan a katao.

111

Na makapangalimbabaan so manga paras ko (Allah a) oyagoyag, a thatandingan: Na sabnar a kiyawiswisan so taw a miyakaawid sa kandarowaka.

112

Na sadn sa taw a nggalbk ko manga pipiya, a skaniyan na mapaparatiyaya, na di mawan sa ba kasalimboti go ba kakorangi (so amal iyan a mapiya).

113

Na lagid aya a kinitoronn Ami rkaniyan a Qor'an a basa Arab, go phisalinsalin Ami magosay ko sold iyan so pangangalk, ka an siran makapananggila, odi na makabago kiran sa ndao.

114

Na Maporo so Allah, a Phapaar, a Bnar! Na ding ka pnggagaani (ya Mohammad) so Qor'an ko dapn kapopos o kipzampayn rka on, na tharoang ka: "Kadnan ko, omani akong Ka sa katao."

115

Na sabnsabnar a diniyandian Ami so Adam, gowani, na miyalipat: Go da a miyatoon Ami ron a kattkhs.

116

Na gowani na pitharo Ami ko manga malaikat: "Pangalimbabaang kano ko Adam", na miyangalimbabaan siran, inonta so iblis: Ka somiyangka.

117

Na pitharo Ami: "Hay Adam, mataan! a giyaya na ridowaing ka, go si karomang ka: Na oba kano niyan mapakaawa ko sorga, ka marasay ka."

118

"Mataan! a rk ka a ding ka roo ka khaor go di ka khatalandiyang,"

119

"Go mataan! a ska na di ka roo mawaw, go di ka rantian a alongan."

120

Na piyangonsi skaniyan o shaytan: Pitharo iyan: "Hay Adam, ba ko rka thoroon so kayo a katatap, go kapaar a di khada?"

121

Na komiyan siran on, na miyapayag kiran so awrat iran: Go aya miyataad iran, na giya kapphanangkiri iran, ko raon sa sorga a minisapng iran ko awrat iran; na siyorang o Adam so Kadnan iyan, na miyaribat.

122

Oriyan iyan na pinili skaniyan o Kadnan Iyan: Na piyakatawbat Iyan, go tiyoro Iyan.

123

Pitharo Iyan a: "Tpad kano, phoon rkaniyan (a sorga) langon, so sabaad rkano na ridoay o sabaad: Amay ka adn a makatalingoma rkano a phoon Rakn a toroan, na sadn sa monot ko toroan Ko, na di madadag, go di marasay."

124

"Na sadn sa tomalikhod ko tadm Rakn, na mataan! a adn a rk iyan a kawyagoyag a masimpit, go witn Ami skaniyan ko kalilimod ko alongan a qiyamah a bota."

125

Tharoon iyan: "Kadnan ko! antonaa i sabap a kiyawitang Ka rakn ko kalilimod a bota ko, a sabnar a miyabaloy ako a pphakaylay (sii sa doniya)?"

126

Tharoon (o Allah) a: "Lagid anan, a miyakatalingoma rka so manga ayat Ami, na piyakalipatan ka oto: Na lagid anan, a sa alongan nai, na plipatang ka."

127

Go lagid aya a kambalasi Ami ko taw a mimalawani go da niyan paratiyayaa so manga ayat o Kadnan iyan: Na mataan! a so siksa ko akhirat i lbi a sangat go kakal.

128

Ino kiran da makanggonanao so madakl a bininasa Ami ko miyaonaan iran a pd ko manga pagtaw (a miyangaoona), a pphakalalakaw siran ko piyamagingdan iran? Mataan! a adn a matatago roo man a titho a manga tanda ko adn a manga gdagda iyan.

129

Na o da so katharo a miyaona a phoon ko Kadnan ka, mataan! a khabaloy (so siksa) a tatap, go so taalik a miyapnto.

130

Na tigrang ka so gi iran katharo: Go pthasbikn ka so podi ko Kadnan ka, ko dapn so kasbang o alongan, go so dapn so kasdp iyan; go so sabaad ko manga oras ko gagawii, na pthasbik ka, go so manga kilid o kadawndaw: Ka angka masoat.

131

Na ding ka phakasagata so (kaylay o) dowa matang ka ko piyakisawitan Ami kiran oto a pizoson a parayasan ko kawyagoyag ko doniya, ka ipthpng Ami kiran oto: Na so riskhi o Kadnan ka (ko sorga) i mapiya, go tatap.

132

Na sogoon ka ko taalok rka so sambayang, go phantang ka sii Rkaniyan. Di Kami rka phangni sa pagpr: Skami i pphagpr rka. Na so khabolosan (a mapiya) na bagian o manananggila.

133

Na pitharo iran a: "Ino a da a khitalingoma niyan rktano a tanda a phoon ko Kadnan iyan. Badaa miyakatalingoma kiran a karina a so matatago ko manga kitab a paganay?"

134

Na opama ka mataan! a inibinasa Mi kiran so siksa ko onaan aya, na ptharoon iran dn: "Kadnan ami, ino kaming Ka da sogoi sa sogo, ka an ami kawnoti so manga ayat Ka ko da ami pn kapakayto ago kahina."

135

Tharoang ka a: "Oman i isa na nomanayaw: Na nayaw kano, ka katokawan iyo bo o antawaa i khimangark ko lalan a ontol, go sa miyakatoman."

Part 17

Total Number of Verses: 112

1

Miyakarani ko manga manosiya so kaphamagitonga kiran a siran na matatago ko kalipat a khitatalikhod.

2

Daa phakatalingoma kiran a pananadm a phoon ko Kadnan iran a bago, a ba iran di phamamakin'ga a siran na sasablawn iran, -

3

Mabibimban so manga poso iran na inipnanay ran so bitiyara a siran na manga darowaka a: "Da ko ngkaya inonta na manosiya a lagid iyo; ati zong kano ko balik mata a skano na pkhaylay niyo?"

4

Pitharo (o Mohammad): "So Kadnan ko na katawan Iyan so katharo ko langit ago so lopa: Go Skaniyan so Pphakan'g a Matao."

5

Kna, ka pitharo iran a: "Manga sambar a manga taginpn! Kna, ka pimbabaas iyan oto! Kna, ka skaniyan na pababayok na witi tano niyan sa tanda lagid o kiyasogoa ko miyangaoona!"

6

Daa miyaratiyaya a miyaonaan iran a phagingd, a bininasa Mi skaniyan: Ino siran pharatiyaya siran?

7

Na da a siyogo Ami ko miyaonaan ka a rowar sa manga mama, a phagilahaman Ami siran na izai niyo so adn a katao niyan o skano na di niyo katawi.

8

Na da Ami siran snggai sa lawas a di phamangangan ko pangn'ngkn, go kna a ba siran phangakakakal (ko doniya).

9

Oriyan iyan na initoman Ami kiran so diyandi, na siyabt Ami siran ago so taw a kabayi Ami, go bininsasa Mi so manga malawani.

10

Sabnsabnar a tiyoronan Ami skano sa kitab a ndodon so mnang iyo: Ino niyo di pnggdagdaa?

11

Na madakl a bininas Ami a phagingd a aya btad iyan na darowaka, na mimbago Kami ko oriyan iyan sa pagtaw a manga salakaw!

12

Na kagiya a magdam iran so siksa Ami, na samawto na siran na pnggagaanan iran malagoy.

13

(Pitharo kiran): Di kano phamalagoy, go kasoy kano ko inipangalimo rkano, go so manga darpa iyo, ka ang kano kayzai.

14

Miyatharo iran: "Hay dowandowaan tano, mataan! a sktano na mimbaloy tano a manga darowaka!"

15

Na da dn mapta angkoto a kapnggoraok iran, taman sa biyaloy Ami siran a (lagid o) piragon a miyangattbas.

16

Na kna a ba aya kiyaadna Mi ko langit ago so lopa, go so nganin a lt a dowa nan na ba Ami kabimbanan!

17

O kabaya Ami a komowa Kami sa karimbaran, na mataan a kowaan Ami skaniyan phoon ko hadapan Ami, o Skami na pnggolawla Ami!

18

Kna, ka ipmbasbas Ami so ontol ko ribat, na mapakaphagotkotk iyan, na samawto na skaniyan na pkhaylang! Na aya rk iyo na so sangat a siksa phoon ko iphropa nyo.

19

Na rk Iyan so zisii ko manga langit go so lopa: Go so (manga malaikat a) zisii ko hadapan Iyan na di iran iphnama a kapzimbaa Rkaniyan, go di siran protosn:

20

Gi iran iphoroporo ko gagawii go so dawndaw sa di iran printasn.

21

Ba siran miyakakowa sa manga katohanan phoon ko lopa a siran na makaphangoyag siran sa miyatay?

22

O adn a matatago sa dowa oto, a manga tohan a salakaw ko Allah, na mabinasa dn a dowa oto! Na Soti so Allah, a Kadnan o aras: Phoon ko iphropa iran!

23

Di Ron khiiza so gii Niyan nggolawlaan, ka siran i khayzaan.

24

Ba siran miyakakowa sa manga katohanan a salakaw ko Allah? Tharoang ka a: "Bgay kano sa karina niyo: Giyaya na pananadm o taw a pd akn, go pananadm o taw a miyaonaang ko"; ogaid na so kadaklan kiran na di iran katawan so bnar, na siran na khitatalikhod.

25

Na da a siyogo Ami ko miyaonaan ka a sogo a ba Ami ron di phagilahamn a: Mataan aya! a da a tohan a inonta Sakn; na simba Ako niyo.

26

Na pitharo iran a: "Kominowa so (Allah a) Masalinggagaw sa wata (a manga malaikat)" Soti Skaniyan! Kna, ka manga oripn a khisslaan.

27

Daa khiona iran on a katharo, go siran na so sogoan Iyan i gi iran manggolawla.

28

Katawan Iyan so kasasangoran iran, go so katatalikhodan iran, go da a khaogopan iran a inonta so miyasoat on (so Allah), go siran na phoon ko kalk Rkaniyan na somasangkop siran.

29

Na sadn sa tharo a pd kiran sa: "Mataan! a sakn na tohan a salakaw ko Allah", na giyoto man na imbadal Ami ron so naraka Jahannam: Lagid man oto a imbadal Ami ko manga darowaka.

30

Ba da katokawi o siran a miyamangongkir a mataan! a so manga langit ago so lopa na aya btad a dowa oto na masasatiman (sa awal), na piyakamblag Ami siran? Na inadn Ami a phoon ko ig so langowan taman a oyagoyag. Ba siran di pharatiyaya?

31

Na piyamakabknan Ami so lopa sa manga palaw, ka an iyan siran di pkhakoyong, go miyangmbaal Kami ron sa manga dadaya a okita a manga lalan, ka an siran makakdg ko ontol.

32

Go biyaloy Ami so langit a atp a sisiyapn: Na siran na so manga tanda on na tatalikhodan iran!

33

Na Skaniyan so miyadn ko gagawii go so dawndaw, go so alongan go so olan: Oman i isa on na sii ko okit iyan pphamangdg.

34

Na da a singgayan Ami a manosiya a miyaonaan ka ko kakakal (ko doniya): Ino amay ka matay ka, na siran na khakakal siran?

35

Oman i baraniyawa na phakataam ko kapatay: Na ipthpng Ami rkano so marata, go so mapiya, ka tiyoba. Na sii kano Rkami phakandoda.

36

Na igira a miyailay ka o siran a miyamangongkir, na ba ka iran dn pkhowaa kasandagan. (Gii ran tharoon): "Ba giyai so phagaloy ko manga katohanan niyo?" Go siran ko kapkhaaloy o (Allah a) Masalinggagaw na siran na o ongkirn iran!

37

Inadn so manosiya a aalokalokn: Phakiilay Akn rkano dn so manga tanda Akn; na di niyo phagalokaloki!

38

Na gi iran tharoon: "Anda dn angkai a diyandi, o skano na mmamataan kano?"

39

O katokawi o siran a miyamangongkir so masa a di iran marn ko manga paras iran so apoy, go so manga likod iran, go di siran katabangan (na di iran oto matharo)!

40

Kna, ka phakatalingoma kiran sa mitalmba, na makatktk kiran: Na di iran magaga i karnawn, go di kiran mataalik.

41

Na sabnsabnar a piyamagompat so manga sogo ko miyaonaan ka; na miyakatoron ko siran a miyamagrg kiran so piyamagompat iran (a siksa).

42

Tharoang ka a: "Antawaa i makasiyap rkano ko gagawii go so dawndaw ko (siksa o Allah a) Masalinggagaw?" Kna, ka siran na so pananadm ko Kadnan iran na tatalikhodan iran.

43

Ba adn a manga katohanan iran a makalinding kiran a salakaw Rkami? Di iran khagaga i katabangi ko manga ginawa iran, go da a makaphaninindgan kiran phoon Rkami.

44

Kna, ka piyakisawitan Ami so kapagintaw ko siran aya, ago so manga loks iran taman sa miyakalndo kiran so omor. Ba iran di khaylay a mataan! a Skami na pzangorn Ami so lopa, na pkhorangan Ami skaniyan ko mbalabala on? Ba siran i phamakadaag?

45

Tharoang ka (hay Mohammad) a: "Aya bo a ipphamakaiktiyar Akn rkano na so wahi (a phoon ko Allah)": Na di phamakin'gn o manga bngl so pananawag, igira a pphamakaiktiyarn siran!

46

Na mataan a o adn a misogat kiran a mayto bo ko siksa o Kadnan ka, na mataan! a ptharoon iran dn: "Hay dowan dowaan tano, mataan! a sktano na mimbaloy tano a manga darowaka!"

47

Na ibtad Ami so manga timbangan a ontol sii ko alongan a qiyamah, na da a kasalimbotan a baraniyawa sa mayto bo. Na o adn a timbang (bo) o od a hardal, na italingoma Mi skaniyan: Na makatatarotop Kami a manga pagiitong.

48

Na sabnsabnar a inibgay Ami ko Mosa, go so Haron so (Tawrat) a padoman, go sindaw go pananadm a bagian o khipanananggila, -

49

Siran na somasangkop siran ko Kadnan iran a migagaib, go siran na so bangkit na ikaalk iran.

50

Na giyang kaya (a Qor'an) na pananadm a piyakandaklan sa mapiya a initoron Ami skaniyan; ino skano pagongkirn iyo skaniyan?

51

Na sabnsabnar a inibgay Ami ko Ibrahim so toroan rkaniyan gowani, go Skami i manga tatao ron.

52

Gowani na pitharo iyan ki ama iyan go so pagtaw niyan: "Antonaa angkai a manga barahala, a so skano na aya niyo dn sisimbaan?"

53

Pitharo iran a: "Miyatoon ami so manga loks ami a pphamanimbaan iran."

54

Pitharo iyan a: "Sabnsabnar a miyatago kano skano go so manga loks iyo ko kadadag a mapayag."

55

Pitharo iran: "Bang ka rkami inowit so bnar, antawaa ska na pd ko manga sasablaw?"

56

Pitharo iyan: "Kna, ka aya Kadnan iyo na so Kadnan o manga langit ago so lopa, a so miyadn kiran: Na sakn sa makapantag roo man na pd ko manga saksi (on).

57

"Na ibt ko Allah, ka prataan ko dn so manga barahala niyo ko oriyan o kalalakaw niyo, a mamakatalikhod kano."

58

Na piphoonan iyan siran mroropt, inonta so mala kiran, ka kalokalo siran na pangndodan iran skaniyan.

59

Pitharo iran: "Antawaa i minggolawla sii ko manga katohanan tano? Mataan! a skaniyan na pd dn ko manga darowaka!"

60

Pitharo iran a: "Miyan'g ami a mangoda a phagalowin iyan siran a: Pmbthowan skaniyan sa Ibrahim."

61

Pitharo iran: "Na wita niyo skaniyan ko phangaiilay o manga manosia, ka an iran kazaksii."

62

Pitharo iran: "Ba ska i minggolawla saya ko manga katohanan ami, hay Ibrahim?"

63

Pitharo iyan: "Kna, ka aya minggolawla on na giya mala kiran aya! Na izai niyo siran, o siran na makaptharo siran!"

64

Na kiyandodan iran a ginawa iran na pitharo iran a: "Mataan! a skano na skano i manga darowaka!"

65

Oriyan iyan na miyabariyonsong a manga olo iran (na pitharo iran:) "Sabnsabnar a katawan ka a di siran aya makapthataro!"

66

Pitharo iyan: "Ino niyo pzimbaa a salakaw ko Allah, so da a khiyompiya niyan rkano a mayto bo, go da a khibinasa niyan rkano?"

67

"Marzik kano, ago so pzimbaan iyo a salakaw ko Allah! Ba kano di pnggdagda?"

68

Pitharo iran: "Totonga niyo skaniyan, go tabangi niyo so manga katohanan iyo, o skano na pnggolawlaan niyo!"

69

Pitharo Ami: "Hay apoy, mbaloy ka a matnggaw, go kalilintad a sii ko Ibrahim!"

70

Na piyakaantapan iran skaniyan sa tipo: Na biyaloy Ami siran a titho a manga logi!

71

Na siyabt Ami so Ibrahim go so Lot sa inowit Ami ko lopa (a Sham) a so piyakandaklan Ami sa mapiya so dalm iyan, a bagian o manga kaadn.

72

Na inibgay Ami ron so Is'haq; go so Ya'qob a inioman. Na oman I isa kiran na biyaloy Ami a manga bilangataw,

73

Go biyaloy Ami siran a pkhakawnotan, a ipphamando iran so sogoan Ami, go iniilaham Ami kiran so kanggolawlaa ko manga pipiya, go so kipamayandgn ko sambayang, go so katonaya ko zakat; go miyabaloy siran a pphamanimba Rkami.

74

Go so Lot, na bigan Ami skaniyan sa kokoman go katao, go siyabt Ami skaniyan ko (taw ko) ingd a so miyabaloy a giinggolawla ko manga rrzik: Mataan! a siran na miyabaloy siran a pagtaw a marata, a manga songklid.

75

Na piyakasold Ami skaniyan ko limo Ami: Mataan! a skaniyan na pd ko manga bilangataw.

76

Go so Noh, ko masa a kiyapangni niyan gowani: Na tiyarima Ami skaniyan, go siyabt Ami skaniyan go so taalok on phoon ko boko a mala.

77

Go tiyabangan Ami skaniyan ko pagtaw a so piyakambokhag iran so manga ayat Ami: Mataan! a siran na miyabaloy siran a pagtaw a marata: Na inld Ami siran langon.

78

Go so Dawood, go so Solayman, na gowani na pkhokomn iran so pangomaan gowani a manathab on so kambing o pagtaw: Na miyabaloy Kami ko kokoman iran a manga saksi.

79

Na piyakisabotan Ami oto ko Solayman: Go oman i isa kiran na bigan Ami sa kokoman go katao; go piyakaphasiyonot Ami a rakhs o Dawood so manga palaw a pthasbik siran, ago so manga papanok: Na Skami i minggolawla (roo).

80

Go inindao Ami ron so kaphanday sa rabn a bagian iyo, ka ang kano niyan marnding ko gomaan (o ridoay) niyo: Na una, skano, phanalamat kano?

81

Go (piyakaphasiyonot Ami ko) bagian o Solayman so ndo a mabagr, pzambr sa sabap sa sogoan iyan, sii ko lopa a so piyakandakl Ami ron so manga pipiya: Na miyabaloy Kami sii ko langowan taman a manga tatao.

82

Go (piyakaphasiyonot Ami ron) so manga shaytan, a so ipphaninb iran (sa montiya) go gii siran nggalbk sa galbk a salakaw roo; na Skami i somisiyap kiran.

83

Go so Ayyob, gowani na miyangni ko Kadnan iyan, (sa pitharo iyan:) "Mataan! a sakn na miyasogat ako a morala, na Ska i lbi a Makalimoon ko Pphamangalimo."

84

Na tiyarima Ami skaniyan: Na inangkat Ami so minisogat on a morala, go inibgay Ami ron so taalok on, go so lagid iran a rakhs iran, - a limo a phoon ko hadapan Ami, go pananadm a bagian o manga barasimba.

85

Go so Ismail, go so Idris, go so Zilkifli, oman i isa kiran na pd ko manga papantang;.

86

Na piyakasold Ami siran ko limo Ami: Mataan! a siran na pd ko manga bilangataw.

87

Go so Yonos a liyamd a sda, gowani a lomalakaw a pkhararangitan: Na aya antangan iyan na di Ami dn kaphakasimpitan skaniyan! Na minigoraok iyan ko katatago iyan ko manga lilibotng: "Da a tohan a inonta Ska: Soti ka: Mataan! a sakn na miyabaloy ako a pd ko manga baradosa!"

88

Na tiyarima Ami skaniyan: Go siyabt Ami skaniyan phoon ko kapakandadamar: Na lagid man aya a kazabt Ami ko miyamaratiyaya.

89

Go so Zakariya, gowani a mangni ko Kadnan iyan: "Kadnan ko, di akong Ka mbagakn a tawantawan, na Ska i lbi a mapiya ko manga waris."

90

Na tiyarima Ami skaniyan: Go inibgay Ami rkaniyan so Yahya: Go tiyanor Ami rkaniyan si karoma niyan. Mataan! a siran na miyabaloy siran a gii siran magoradorad ko manga pipiya: Go pphamangni siran Rkami sa kabaya ago kalk, go miyabaloy siran a sii siran Rkami pphananangkopan.

91

Go so (Maryam a) siniyap iyan a ginawa niyan: Na iniiyop Ami ron so pd ko inadn Ami a niyawa, go biyaloy Ami skaniyan ago so wata iyan a tanda ko manga kaadn.

92

Mataan! a giyai okit iyo a okit a isa, go Sakn i Kadnan iyo: Na simba Ako niyo.

93

Na pizapotol iran so okit iran, ko ltlt iran; na oman i isa kiran na sii siran Rkami phamakandod.

94

Na sadn sa nggalbkn iyan so manga pipiya a skaniyan na mapaparatiyaya, - na di kalimngan so galbk iyan: Go mataan! a skami i pphanorat on.

95

Na inrn so phagingd a bininasa Mi skaniyan: Mataan! a siran na di siran makambalingan,

96

Taman ko masa a kalkaan so Yajoj ago so Majoj, a siran na mamakapoon ko oman i bobongan a gii siran zasakoya.

97

Na miyakarani so diyandi a bnar: Na samawto na giyoto! na masambolayang so manga kaylay o siran a miyamangongkir: (matharo iran:) "Hay dowan dowaan tano! Sabnar a miyatago tano ko da kayn'ngkaa sangkai; kna, ka mimbaloy tano a manga darowaka!"

98

Mataan! a skano ago so pzimbaan iyo a salakaw ko Allah, na itagon ko naraka Jahannam! Skano na rong kano phamakasold!

99

O aya btad o siran aya na manga katohanan, na di siran on mamakasold. Na oman i isa kiran na ron siran on dn makakakal.

100

Aya bagian iran on na katagaw, go siran na di siran roo phamakan'g.

101

Mataan! a siran a miyaona a bagian iran a phoon Rkami so mapiya, na siran man na piyakawatan siran on,

102

Di ran khan'g so dagdb iyan: Go siran i khatago ko pkhababayaan o manga ginawa iran, sa makakakal siran (roo).

103

Di siran mapakamboko o pakalklk a lbi a mala: Go ipagalaw kiran o manga malaikat a: "Giyaya so alongan iyo, - a so skano na ididiyandi rkano."

104

Alongan a kalolona Mi ko langit lagid o kaplolona o paniniyorat ko manga kitab, - lagid o kiniphoonn Ami ko paganay a kiyapangadn, a khasowin Ami skaniyan: Diyandi a matatangkd Rkami: Mataan! a Skami i tatap a pnggagalbk.

105

Na sabnsabnar a inisorat Ami ko Zaboor, ko oriyan o pananadm a: "Mataan! a so lopa na kaphangowarisan oto o manga oripn ko a manga bilangataw."

106

Mataan! a matatago saya so tanto a tarotop a ndao, a bagian o pagtaw a manga barasimba.

107

Na da a kiyasogo Ami rka (hay Mohammad), a rowar sa limo ko manga kaadn.

108

Tharoang ka (hay Mohammad) a: "Aya bo a iphagilaham rakn na aya bo a tohan iyo na tohan a isa": Na una, skano mimbayorantang kano?

109

Na amay ka tomalikhod siran, na tharoang ka a: "Piyakatokaw akn skano sa mlagilagid; na di ko katawan o ino marani antawaa mawatan so ididiyandi rkano."

110

"Mataan! a Skaniyan na katawan Iyan so matanog a katharo, go katawan Iyan so pag-umaan nyo.

111

"Na di akn katawan oba giyaya na tiyoba rkano, go kazonor taman ko masa (o kapatay)."

112

Pitharo iyan: "Kadnan ko, kokomn Ka (rkami) so bnar. Na aya Kadnan ami na so (Allah a) Masalinggagaw a Kaphangniyan sa tabang, a sorang ko iphropa niyo!

Total Number of Verses: 78

1

Hay manga manosiya, kalkn iyo so Kadnan iyo, mataan! a so linog ko bangkit na shay' a lbi a mala!

2

Sii ko alongan a maylay niyo to, na kalipatan o oman i pphakasoso so pphakasoson iyan, go mimbawata o oman i mawgat so ikawgat iyan: Go maylaing ka so manga manosiya a (lagid o) khikabbrg, a kna a ba siran khikabbrg: Na ogaid na so siksa o Allah a sangat (i kaadai kiran sa akal).

3

Na adn a pd ko manga manosiya a taw a gii makiphapawala makapantag ko Allah, sa kna ba katao, - go phagonotan iyan so oman i shaytan a pphaminasa!

4

Minikokom rkaniyan a mataan! a sadn sa manarig on na mataan! a skaniyan na khadadag iyan, go mapnggonanao Niyan ko siksa ko naraka Sair.

5

Hay manga manosiya, oba kano zasangka ko kawyag (ko oriyan o kapatay), na mataan! a Skami na inadn Ami skano a phoon sa botha, oriyan iyan na phoon sa notfa, oriyan iyan na phoon sa rogo a mbabathik, oriyan iyan na phoon sa saporon a sapo, a miyabaloy ago da mabaloy, ka an Ami rkano mapakaliwanag; go pthangnn Ami ko manga tiyan so kabaya Ami taman ko taalik a miyapnto, oriyan iyan na pphakaliyon Ami skano a manga wata, oriyan iyan (na pphakalaan Ami skano), ka ang kano raotn ko katarotop o bagr iyo; na adn a pd rkano a taw a pphatay (a kangodaan), go adn a pd rkano a taw a phakakasowin ko tanto a korang a kawyagoyag, ka an da a katawan iyan ko oriyan o katao a mayto bo. Na pkhaylaing ka so lopa a kamamaraan, na igira a piyakatoron Ami ron so ig, na pananabadn, go zibokar, go mapakatho iyan so oman i mbarambarang (a mangngto) a mapiya i paras.

6

Giyoto man na sabap sa mataan! a so Allah na Skaniyan so Bnar: Go mataan! a Skaniyan na pagoyagn Iyan so miyamatay, go mataan! a Skaniyan na so langowan taman na Gaos Iyan.

7

Na mataan! a so bangkit na phakatalingoma: da a sangka a madadalm on, go mataan! a so Allah na pagoyagn Iyan so taw a matatago ko manga kobor.

8

Na adn a pd ko manga manosiya a gii makiphapawala makapantag ko Allah, a kna a ba katao, go kna a ba toroan, go kna a ba kitab a pphakabgay sa maliwanag, -

9

A lilingiin iyan a lig iyan, ka an makadadag phoon ko lalan o Allah a: Adn a bagian iyan sii ko doniya a kahinaan, go pakitaaman Ami ron ko alongan a qiyamah so siksa a phakatotong.

10

(Ptharoon on:) "Giyai man na sabap ko miyanggalbk o mbala a limang ka, go mataan! a so Allah na kna a ba salimbot ko manga oripn Iyan."

11

Na adn a pd ko manga manosiya a pzimbaan iyan so Allah sa pkhaalangalangan: Na o masogat skaniyan a mapiya, na masoat on; na o masogat skaniyan a tiyoba, na klidn iyan a paras iyan: Miyalogi sa doniya, go sa akhirat: Giyoto man na skaniyan so kalogi a mapayag!

12

Pphanongganowin iyan a salakaw ko Allah, so di ron phakabinasa, go di ron phakaompiya: Giyoto man na skaniyan so kadadag a mawatan!

13

Pphanongganowin iyan so nganin a so kaphakabinasa niyan na lbi a marani a di so kaphakaompiya niyan. Tanto a marata a panarigan, go tanto a marata a bolayoka.

14

Mataan! a so Allah na phakasoldn Iyan so miyamaratiyaya, go pinggalbk iran so manga pipiya, ko manga sorga, a pphamangondas ko kababaan iyan so manga lawasayg: Mataan! a so Allah na pnggolawlaan Iyan so nganin a kabaya Iyan.

15

Sadn sa taw a aya btad iyan na tatarimaan iyan sa di dn thabangan o Allah (so Mohammad) sii sa doniya, go sa akhirat, na btr sa tali ko boongan, oriyan iyan na paggt: Na nggdagdaan iyan o ino khaylang dn o antangan iyan a marata so igagani gani ron!

16

Na lagid aya a kinitoronn Ami ron a manga tanda a manga rarayag; go mataan! a so Allah na pnggonanaon Iyan so taw a kabaya Iyan!

17

Mataan! a so miyamaratiyaya, go so manga Yahodi, go so manga Sabiin, go so manga Kristiyan, go so manga Majosi, go so miyamanakoto, - na mataan! a so Allah na khokomn Iyan siran ko alongan a qiyamah: Mataan! a so Allah i saksi ko langowan taman.

18

Bang ka di katawi a mataan! a so Allah na somosodiod on so matatago ko manga langit go so matatago ko lopa, - go so alongan, go so olan, go so manga bitoon; go so manga palaw, go so manga kayo, go so manga binatang; go madakl a pd on ko manga manosiya? Na madakl a miyatangkd on so siksa: Na sadn sa hinaan o Allah, na da a makabgay ron sa mnang: Mataan! a so Allah na pnggolawlaan Iyan so nganin a kabaya Iyan.

19

Giya dowaya a pkharido na miyarido siran makapantag ko Kadnan iran: Na so miyamangongkir, na khasnggayan siran sa nditarn a apoy phangododn ko poro o manga olo iran so phlikabo a ig.

20

Ipthonag oto ko matatago ko manga tiyan iran, go so manga kobal.

21

Go adn a manga bagian iran a manga rompi a potaw (a ipmbasal kiran).

22

Oman iran makhadiyat a kapagawa iran on, phoon ko boko, na pakakasowin siran on, go (tharoon kiran:) "Taami niyo so siksa a phakatotong!"

23

Mataan! a so Allah na phakasoldn Iyan so miyamaratiyaya, go pinggalbk iran so manga pipiya, ko manga sorga a pphamangondas ko kababaan iyan so manga lawasayg: Phangimowan siran roo ko manga salnda a bolawan go montiya, go aya manga nditarn iran roo na sotra.

24

Go miyanggonanao siran ko mapiya a katharo: Go miyanggonanao siran ko lalan o (Allah a) Diyaitano-podi.

25

Mataan! a so miyamangongkir, go pphangalang siran ko lalan o Allah, ago so Masjidil Haram, a so inisnggay Ami skaniyan a bagian o manga manosiya, a mlagid on so mababaling on, ago so mananangga. Na sadn sa khadiyat roo sa di ontol sabap sa kapanganiyaya, na pakataamn Ami skaniyan ko siksa a malipds.

26

Na gowani na piyayag Ami ko Ibrahim, so darpa o walay, (sa pitharo Ami ron:) "Da a zakoton ka Rakn a mayto bo; go sotiyang ka so walay Akn a bagian o gii thatawap, ago so pphamanindg, go so pphroroko a pphamanodiod."

27

"Na tawagn ka ko manga manosiya so kapnay-hajji: Ka mamakatalingoma siran rka a pphlalalag, go (khikokoda ko) oman i onta, a mamakatalingoma siran a phoon ko oman i lalan a mawatan;"

28

"Ka an iyan kamasai so phamakaompiya kiran, go an iran pkhaaloy so ngaran o Allah, sii ko manga alongan a khikappnto makapantag ko iniriskhi Niyan kiran a manga binatang a manga ayam: Na kang kano ron go pakakana niyo (ron) so karrgnan a pkhamrmran."

29

"Oriyan iyan na lalann iran so okit iran (ko kapnay-hajji) go tomann iran so manga samaya iran, go thawap siran ko walay a andang."

30

Giyoto man: Na sadn sa slaan iyan so piyakipamagadatan o Allah, na giyoto i mapiya on sii ko Kadnan iyan. Na piyakay rkano so manga ayam, inonta so kapphangadian rkano (so kiya haram awn): Na pakawatani niyo so marzik a manga barahala, go pakawatani niyo so katharo a kabokhag, -

31

A zasalimbotawan kano ko Allah, sa di niyo pphamanakoton Skaniyan: Na sadn sa ipanakoto niyan so Allah, na lagid oba miyawlog a phoon ko kawang na pzayabn skaniyan o manga papanok, odi na ipmbayog skaniyan o ndo ko darpa a mawatan.

32

Giyoto man: Na sadn sa slaan iyan so manga tanda o Allah, na mataan aya! a pd ko kapphangongonotan o manga poso.

33

Adn a bagian iyo ron a manga gona taman ko taalik a ppntoon: Oriyan iyan na so zombalian on na sii ko (obay o) walay a andang.

34

Na oman i pagtaw na singgayan Ami sa pphanombalian, ka an iran pkhaaloy so ngaran o Allah sii ko inipagpr Iyan kiran a binatang a manga ayam. Na so Tohan iyo na tohan a Isa: Na Ron kano mbayorantang: Na pphamanotholing ka sa mapiya so khipangangalimbabaan, -

35

Siran na igira miyaaloy so Allah, na somangkop so manga poso iran, go manga papantang ko nganin a minisogat kiran (a tiyoba), go khipamamayandg ko sambayang, go so sabaad ko inibgay Ami kiran na ipphammgay ran.

36

Na so manga onta na inisnggay Ami skaniyan a bagian iyo a pd ko manga tanda o Allah: Adn a bagian iyo ron a mapiya: Na aloya niyo so ngaran o Allah ko kasombalia on a khipakatitindg: Na igira minibtad so manga kilid iran (ko lopa), na kang kano ron, go pakakana niyo (ron) so domadapay, go so baraarapan: Lagid oto man a kiyapakaphasiyonot Ami kiran rkano, ka ang kano makapanalamat.

37

Di dn izampay ko Allah so manga sapo iran, go so manga rogo iran: Na ogaid na izampay ron so kapangongonotan a phoon rkano: Lagid oto man a kiyapaka phasiyonota Niyan kiran rkano, ka an iyo mazlasla so Allah ko kiyanggonanaoa Niyan rkano: Na pphamanotholing ka sa mapiya so miphipiyapiya.

38

Mataan! a so Allah na lilindingn Iyan so miyamaratiyaya: Mataan! a so Allah na di Niyan khabayaan so langowan o makadorat, a miyongkir.

39

Bigan sa idin (ko kaphrang) so siran a pphamono on siran sabap sa mataan! a siran na inaniyaya siran; - na mataan! a so Allah sii ko katabangi kiran na sabnar a Gaos Iyan;

40

Siran na biyogaw siran ko manga ingd iran sa di ontol, giya bo a gi iran katharoa sa: "Aya Kadnan Ami na so Allah". Na oda rna o Allah so manga manosiya so sabaad kiran sabap ko sabaad, na miyangaggba dn so manga (simbaan a) Sawami, go Biyaon, go Salawato, go so manga masjid, a pkhaaloy ron so ngaran o Allah sa madakl. Na mataan a thabangan dn o Allah so pthabang Rkaniyan; - mataan! a so Allah na titho

41

Siran na o pakakhapaar Ami siran ko lopa, na iphamayandg iran so sambayang, go tonayn iran so zakat, go isogo iran so mapiya, go isapar iran so marata: Na kapaar o Allah so khaakiran ko pkhakawlawla.

42

Na o taplisa ka iran (hay Mohammad), na sabnar a tomiyaplis ko miyaonaan iran so pagtaw o Noh, go so Ad, go so Samod;

43

Go so pagtaw o Ibrahim, go so pagtaw o Lot;

44

Go so manga taw sa Madyan; go tiyaplis so Mosa. Na piyakathali Akn sa malayat so manga kapir, oriyan iyan na diyan'g Akn siran: Na antonaa i miyambtad o kiyaalina Ko (kiran)!

45

Na madakl a phagingd a bininasa Mi skaniyan ko gi iran kandarowaka, na skaniyan na miyamangirobar so manga atp iyan, go paridi a kiyaganatan, go torogan a maporo.

46

Ba siran da makalalakaw ko lopa, na adn a bagian iran a manga poso a mipnggdagda iran, odi na manga tangila a miphamamakin'g iran? Na mataan aya! a di khabota so manga kaylay, na ogaid na aya khabota na so manga poso a so zisii ko manga rarb.

47

Na phangnin iran rka (hay Mohammad), a kapagalokaloki ko siksa na di dn pndorat so Allah ko diyandi Iyan. Na mataan! a so salongan sii ko Kadnan ka na lagid o sanggibo ragon ko itongan iyo (sa doniya).

48

Na madakl a phagingd a piyakathali Akn sa malayat, ko gi iran kandarowaka, oriyan iyan na siniksa Akn skaniyan. Na Sakn i khandodan.

49

Tharoang ka: "Hay manga manosiya, sakn na matag ako rkano phamakaiktiyar a mapayag:"

50

"Na siran a miyamaratiyaya, go pinggalbk iran so manga pipiya, na adn a bagian iran a maap, ago pagpr a mapiya."

51

"Na siran a miyamamanamar maminasa ko manga ayat Ami, a rorompisan iran; - na siran man i manga taw ko naraka Jahim."

52

Na da a siyogo Ami ko miyaonaan ka (hay Mohammad) a sogo odi na nabi, a ba di igira miyatiya, na pzarampongn o shaytan so batiya iyan: Na phagilangn o Allah so ipzarampong o shaytan, oriyan iyan na gii pakathaknaan o Allah so manga ayat Iyan: Na so Allah na Matao, a Mawngangn:

53

Ka mbalowin Iyan so ipzarampong o shaytan a tiyoba ko siran a kadadalman so manga poso iran sa gdamn, go so manga ttgas so manga poso iran: Na mataan! a so manga darowaka na matatago dn ko kiyanggibas, a mawatan:

54

Go adn katokawi o siran a piyamgan ko katao a mataan! (a giya Qor'an aya) na bnar a phoon ko Kadnan ka, go maparatiyaya iran aya, go thakna Rkaniyan so manga poso iran: Na mataan! a so Allah i titho a pnggonanao ko siran a miyamaratiyaya ko okit a ontol.

55

Na di khapokas so siran a miyamangongkir ko kazasangka Rkaniyan taman sa kapakatalingoma kiran o bangkit a mitalmba, odi na makatalingoma kiran so siksa ko gawii a da a kapipiya on a ginawa.

56

So kapaar sa alongan oto na rk o Allah: Khokomn Iyan siran: Na siran a miyamaratiyaya, go pinggalbk iran so manga pipiya, na matago ko manga sorga a pakadarandang.

57

Na so miyamangongkir go piyakambokhag iran so manga ayat Ami, na siran man na adn a bagian iran a siksa a phakahina.

58

Na so miyamanogalin sa ingd makapantag ko lalan o Allah, oriyan iyan na miyaprang siran, odi na miyatay siran, - na mataan a priskhiyan siran dn o Allah sa riskhi a mapiya: Na mataan! a so Allah na Skaniyan dn i lbi a mapiya ko pphamamgay sa riskhi.

59

Mataan a phakasoldn Iyan siran dn ko (sorga a) khasoldan a khasoat siran on: Na mataan! a so Allah na titho a Matao, a Matigr.

60

Giyoto dn man. Na sadn sa somaop sa lagid o kiya aniyayaa on, oriyan iyan na inaniyaya pman skaniyan, na mataan a thabangan dn skaniyan o Allah: Mataan! a so Allah na titho a Mamaapn, a Manapi.

61

Giyoto dn man. Sabap sa mataan! a so Allah na pphakasoldn Iyan so gagawii ko dawndaw, go pphakasoldn Iyan so dawndaw ko gagawii; na mataan! a so Allah na Pphakan'g, a Pphakaylay.

62

Giyoto dn man. Sabap sa mataan! a so Allah na Skaniyan so Bnar; go mataan! a so pphanongganowin iran a salakaw Rkaniyan, - na skaniyan so ribat: Go mataan! a so Allah na Skaniyan so Maporo, a Mala.

63

Bang ka di katawi a mataan! a so Allah na piyakatoron Iyan a phoon ko kawang so ig, na pkhabaloy so lopa a magagadong? Mataan! a so Allah na tanto a Malai-gagaw, a Kaip.

64

Rk Iyan so zisii ko manga langit ago so zisii ko lopa: Na mataan! a so Allah na titho a Skaniyan so Kawasa, a Pphodin.

65

Bang ka di katawi a mataan! a so Allah na piyakaphasiyonot Iyan rkano so zisii ko lopa, ago so manga kapal a pphamangtas ko kalodan sabap sa sogoan Iyan? Go uurnn Iyan so langit ka oba makatana ko lopa inonta o sabap sa idin Iyan: Mataan! a so Allah na tanto a Makapdiin ko manga manosiya, a Makalimoon;

66

Go Skaniyan so miyoyag rkano, oriyan iyan na mbono on kano Niyan, oriyan iyan na pagoyagn kano Niyan (ko oriyan o kapatay): Mataan! a so manosiya na titho a da a tadm iyan.

67

Oman i pagtaw na singgayan Ami sa okit, a siran na aya iran oto phagokitan: Na oba ka iran mapokas ko okit (a makaoontol); na panolonn ka so (okit o) Kadnan ka: Mataan! a ska na matatangkd a sii ko toroan a matitho.

68

Na amay ka makipphawala siran rka, na tharoang ka a: "So Allah i Matao ko gii niyo nggolawlaan."

69

"So Allah na khokomn kano Niyan ko alongan a qiyamah sii ko nganin a miyabaloy kano ron a di niyo phagayonayonan."

70

Bang ka di katawi a mataan! a so Allah na katawan Iyan so zisii ko langit ago so lopa? Mataan! a giyoto man na matatago ko kitab, mataan! a giyoto man sii ko Allah na malbod.

71

Na pzimbaan iran a salakaw ko Allah, so da a initoron Iyan on a katantowan, go so da a bagian iran on a katao: Na da a bagian o manga darowaka a phakatabang.

72

Na igira a pmbatiyaan kiran so manga ayat Ami, a manga rarayag, na masarinong ka ko manga paras o siran a miyamangongkir so kagowad. Sama iran bo di phamntola so pphamatiya kiran ko manga ayat Ami. Tharoang ka: "Ino o panothola ko rkano so marata a di giyoto? So naraka! na inithiyagar oto o Allah ko siran a miyamangongkir! Na mikharatarata a khabolosan!"

73

Hay manga manosiya! adn a inmbaalan a ibarat. Na pamakin'ga niyo skaniyan. Mataan! a so pphanongganowin iyo a salakaw ko Allah, na da dn a khaadn iran a satiman bo a tndk, apiya pn thimotimo an iran oto. Na o adn a khowaan kiran o tndk a mayto bo, na di iran oto kharn Rkaniyan. Malmk so pphangampit, ago so pphangampitn!

74

Da iran slaan ko Allah so titho a kala Iyan: Mataan! a so Allah na titho a Mabagr, a Domadaag.

75

So Allah na pphamili ko manga malaikat sa manga sogo ago so sabaad ko manga manosiya; mataan! a so Allah na Pphakan'g, a Pphakaylay.

76

Katawan Iyan so kasasangoran iran go so katatalikhodan iran: Na sii bo ko Allah phakandoda so pkhakawlawla.

77

Hay so miyamaratiyaya, roko kano, go sodiod kano, go simbaa niyo so Kadnan iyo, go nggolawlaa niyo so mapiya; ka ang kano makadaag.

78

Na panagontamann iyo sii ko Allah so ontol a kapanagontaman Rkaniyan, Skaniyan na pinili kano Niyan, go da a inisnggay Niyan rkano sii ko agama a masimpit; okit o ama iyo a Ibrahim. Skaniyan i mitho rkano sa manga Moslim gowani, go sii sangkai (a Qor'an); ka an mabaloy so sogo a saksi rkano, go mabaloy kano a manga saksi ko manga manosiya! Na pamayandgn iyo so sambayang, go tonaya niyo so zakat, go sarigi niyo so Allah. Skaniyan i Panarigan iyo; na miyakapiyapiya a Panarigan, go miyakapiyapiya a Phananabang!.

Part 18

Total Number of Verses: 118

1

Sabnar a phakadaag so miyamaratiyaya,

2

So siran sii ko sambayang iran na somasangkop siran,

3

Go so siran sii ko ilang na tatalikhodan iran,

4

Go so siran sii ko zakat na inggogolalan iran,

5

Go so siran sii ko manga kayaan iran na sisiyapn iran,

6

Inonta sii ko manga karoma iran, odi na so miyakhapaar o manga tangan iran, - ka mataan! a siran na di siran on mapzoman,

7

Na sadn sa mamagingar sa salakaw roo, na siran man na siran i mimamalawani;

8

Go siran sii ko manga sarig kiran, go so diyandi kiran na sisiyapn iran,

9

Go siran sii ko manga sambayang iran na papaliharaan iran;

10

Siran man na siran i manga waris,

11

Siran i makaphangowaris ko (sorga) Firdaws: Sa ron siran on dn makakakal.

12

(Ibt ka) Sabnsabnar a inadn Ami so manosiya a phoon ko rasa a phoon ko lipaw;

13

Oriyan iyan na biyaloy Ami skaniyan a mani sii ko darpa a matotongkop,

14

Oriyan iyan na inadn Ami so mani a rogo a mbabathik; na inadn Ami so rogo a mbabathik a saporon a sapo; na inadn Ami so saporon a sapo a manga tolan, na biyongkosan Ami so manga tolan sa sapo; oriyan iyan na inadn Ami skaniyan sa kaadn a salakaw. Na Maporo so Allah, a tanto a mapiya ko mithatakdir!

15

Oriyan iyan na mataan! a skano ko oriyan oto, na matatangkd a phamatay kano.

16

Oriyan iyan na mataan! a skano ko alongan a qiyamah, na pagoyagn kano.

17

Na sabnsabnar a inadn Ami ko kaporoan iyo so pito a manga lalan (a manga langit); go da ko btad Ami i ba Ami kalilipati so manga kaadn.

18

Na piyakatoron Ami phoon ko kawang so ig a madidiyangka, na piyakatarg Ami skaniyan ko lopa; na mataan! a Skami sii ko kaylang oto na sabnar a Gaos Ami.

19

Na piyakathoan Ami rkano sa sabap rkaniyan sa manga pamomolan a manga korma, go manga anggor a rk iyo: Katatagoan oto sa manga onga a madakl: Go so sabaad on na pkhakan iyo,

20

Go kayo a pphakagmaw ko palaw a Torisayna, a phagtho sa lana, go dilota a bagian o gii khakan.

21

Na mataan! a adn a bagian iyo ko manga ayam a titho a ndao: Pphakainomn Ami skano ko matatago ko manga tiyan iran (a gatas); go adn a bagian iyo ron a manga gona a madakl; go so sabaad on na pkhakan iyo;

22

Go pkharoran kano kiran, go sii ko manga kapal.

23

Na sabnsabnar a siyogo Ami so Noh ko pagtaw niyan: Na pitharo iyan: "Hay pagtaw akn, simbaa niyo so Allah! Da a tohan iyo a salakaw Rkaniyan. Ino kano di phananggila?"

24

Na pitharo o manga nakoda ko siran a miyamangongkir ko pagtaw niyan a: "Kna ini a ba di manosiya a lagid iyo; a khabayaan iyan a kaombawan kano niyan: Na o kabaya o Allah na mataan a tomoron sa malaikat: Da tano man'g angkai ko manga loks tano a miyangaoona."

25

"Da ko skaniyan inonta na mama a tataraponan: Na thigri niyo skaniyan taman ko masa (a kada iyan)."

26

Pitharo iyan: "Kadnan ko! tabangi akong Ka: Sabap ko kiyapakambokhaga iran rakn!"

27

Na iniilaham Ami sii rkaniyan a: "Mbaal ka sa kapal sii ko manga kaylay Ami go so sogoan Ami: Na amay ka makawma so sogoan Ami, na mamangiliphowak (a ig) ko daporan, na prorang ka on ko oman i ngganapa sa dowa, go so taalok rka, inonta so taw a miyaona on so katharo a pd kiran: Go ding ka Rakn pagangaya so mindadarowaka; ka mataan! a siran na pagldn siran."

28

Na amay ka makathakna ka, ska ago so manga pd ka ko kapal, na tharoang ka: "So podi na rk o Allah, a so siyabt kami Niyan phoon ko pagtaw a manga darowaka."

29

Go tharoang ka: "Kadnan ko, pakatpada kong Ka ko khatpadan a piyakandaklan sa mapiya: Ka Ska i lbi a Mapiya ko pphamakatpad."

30

Mataan! a adn a madadalm roo a titho a manga tanda, go mataan a tatap a Skami i titho a Pphaniyoba.

31

Oriyan iyan na miyadn Kami ko oriyan iyan sa pagtaw a manga salakaw.

32

Na siyogoan Ami siran sa sogo a pd kiran (sa pitharo iyan:) "Simbaa niyo so Allah! Da a tohan iyo a salakaw Rkaniyan. Ino kano di phananggila?"

33

Na pitharo o manga nakoda ko pagtaw niyan a so miyamangongkir go piyakambokhag iran so kitmo ko akhirat, go piyamgan Ami siran sa limo ko kawyagoyag ko doniya a: "Kna ini a ba di manosiya a lagid iyo; a pkhan ko pkhn iyo, go phaginom ko phaginomn iyo."

34

"Na ibt o onot kano sa manosiya a lagid iyo, na mataan! a skano samawto na titho a manga logi,"

35

"Ino Niyan rkano ndiyandiin i mataan! a skano na amay ka matay kano go mbaloy kano a botha, go manga tolan, na mataan! a skano na phamakagmawn (ko manga kobor)?"

36

"Miyakawatawatan so ipndiyandi rkano!"

37

"Daa kawyag a rowar ko kawyagoyag tano ko doniya. Phamatay tano na pkhawyag (so manga wata) tano. Na kna a ba tano phangaooyag (zaroman)!"

38

"Da ko skaniyan inonta na mama a inangkob iyan so Allah sa kabokhag, na di tano skaniyan pamaratiyayaan!"

39

Pitharo iyan: "Kadnan ko! tabangi akong Ka: Sabap ko kiyapakambokhaga iran rakn."

40

Pitharo (o Allah): "A di mathay na mataan a khabaloy siran dn a mamakasndit!"

41

Na miyadansal siran o lalis, a minggolalan ko bnar, na biyaloy Ami siran a apt! Na kapakawatan (ko limo) a bagian o pagtaw a manga darowaka!

42

Oriyan iyan na miyadn Kami ko oriyan iran sa manga pagtaw a manga salakaw.

43

Dikhaktng o pagtaw so adiyal iyan, go di iran khisonggod.

44

Oriyan iyan na siyogo Ami so manga sogo Ami a miyakathataliwana: Oman i makawma ko pagtaw a sogo kiran, na pakambokhagn iran skaniyan: Na initondog Ami ko sabaad kiran so sabaad: Go biyaloy Ami siran a manga tothol: Na kapakawatan (ko limo) a bagian o pagtaw a di siran mapaparatiyaya!

45

Oriyan iyan na siyogo Ami so Mosa, go so pagari niyan a Haron, rakhs o manga tanda Ami go so katantowan a mapayag,

46

Sii ko Pir'awn go so manga nakoda ko pagtaw niyan: Na mimaratabat siran: Go miyabaloy siran a pagtaw a miphapaporo.

47

Na pitharo iran: "Ino tano pharatiyayaa so dowa kataw a lagid tano? A so pagtaw iran na sii siran rktano pphangongonotan!"

48

Na piyakambokhag iran a dowa oto, na miyabaloy siran a pd ko miyangabibinasa.

49

Na sabnsabnar a inibgay Ami ko Mosa so kitab, ka an siran makaontol.

50

Na biyaloy Ami so wata o Maryam ago si ina iyan a tanda: Go piyakakadn Ami siran ko bobongan, a adn a pantar iyan go bowalan.

51

Hay manga sogo, kang kano ko manga pipiya (a pangn'ngkn), go nggalbk kano sa mapiya: Mataan! a Sakn na so gii niyo ngalbkn na katawan Ko.

52

Na mataan! a giyai okit iyo a okit a isa, go Sakn i Kadnan iyo: Na onoti Ako niyo.

53

Na pizaropt iran so okit iran ko ndolondolonan iran, sa kazaropt, a mbidabida: Oman i isa ka sagorompong na so kpit iran na pkhababayaan iran.

54

Na ganating ka siran ko kaada i kiran sa mlng taman ko masa (a kapamatay ran).

55

Ba iran tatangkapa sa mataan! a so ipmbgay Ami kiran oto a tamok go manga wata,

56

Na pnggagaanan Ami kiran so manga pipiya? Kna, ka di iran maiin'ngka.

57

Mataan! a so siran a phoon ko kasasangkop ko Kadnan iran na maalk siran;

58

Go so siran a so manga ayat o Kadnan iran i paparatiyayaan iran;

59

Go so siran a so Kadnan iran na di iran iphanakoto;

60

Go siran a pphammgay siran ko inipammgay ran a so manga poso iran na somasangkop, sa mataan! a siran na sii siran bo ko Kadnan iran phamakandod;

61

Siran man i gii magoradorad ko manga pipiya, go siran i phangaoona on.

62

Na da a iphaliyogat Ami ko baraniyawa a rowar ko khagaos iyan: Na zisii Rkami so kitab a gii tharo ko bnar: Na siran na di siran kasalimbotan.

63

Kna, ka so manga poso iran na matatago ko kalilipati sangkai; go adn a bagian iran a manga galbk a salakaw roo, a siran na aya iran gagalbkn,

64

Taman sa igira a piyakadansal Ami ko piyamgan kiran sa limo so siksa, na samawto na siran na nggoraok siran sa tabang!

65

(Tharoon kiran a:) "Di kano nggoraok sa tabang sa alongan nai; mataan! a skano na di kano khatabangan phoon Rkami."

66

"Sabnar a miyabaloy so manga ayat Akn a pphangadian rkano, na bakano dn miyangndod ko manga talikhodan iyo,

67

"A pmamaratabatan iyo skaniyan: Gii niyo thothotholaan ko gagawi a ikagogowad iyo."

68

Ba iran da nggdagdaa so katharo, antawaa ba kiran miyakaoma so da makatalingoma ko manga loks iran a miyangaoona?

69

Ba iran da makilala so sogo kiran, ago iran pagongkira skaniyan?

70

Ino iran gii tharoa i: "Tataraponan skaniyan?" Kna, ka minioma niyan kiran so bnar, na kadaklan kiran a so bnar na ikagogowad iran.

71

Na o inonotan a bnar so manga kabaya iran, na miyabinasa dn so manga langit ago so lopa, go so madadalm kiran. Kna, ka initalingoma Mi kiran so ndao kiran, na siran na so ndao kiran na tiyalikhodan iran.

72

Ba ka kiran phangni sa sokay? Na so sokay o Kadnan ka i tomo: Go Skaniyan i lbi a Mapiya ko pphamamgay sa riskhi.

73

Na mataan! a ska na sabnar a pthawagn ka siran ko lalan a matitho;

74

Na mataan! a so di iran paparatiyayaan so akhirat na so lalan na, sabnar a sisilayan iran.

75

Na o inikalimo Ami siran go piyokas Ami kiran so misosogat kiran a morala, na tomataros siran dn ko kadadadag iran, a gii siran mromparompak.

76

Na sabnsabnar a piyaka dansal Ami kiran so siksa, na da siran sangkop ko Kadnan iran, go di siran phangangarapan!

77

Taman sa kagiya a lomka Kami kiran sa isa a pinto a adn a siksa on a sangat: Na samawto na siran na kiyadaan siran roo sa panginam!

78

Na Skaniyan so miyadn rkano ko manga kan'g, go so manga kaylay, go so manga gdagda: Na miyakayto ito a kapphanalamat iyo!

79

Go Skaniyan so miyarmbad rkano ko lopa, go Ron kano plimoda.

80

Go Skaniyan so Pphangoyag go Pphangimatay, go kapaar Iyan so gii kapakazambi o gagawii ago so dawndaw: Ino kano di pnggdagda?

81

Kna, ka pitharo iran so lagid o pitharo o miyangaoona.

82

Pitharo iran: "Ino amay ka matay kami go mbaloy kami a botha, go manga tolan (a miyarophod), ba mataan! a skami na pagoyagn kami dn?"

83

"Sabnsabnar a minidiyandi rkami skami ago so manga loks ami angkai gowani. Da ko ungkai inonta na manga iringa a kabokhag o miyangaoona!"

84

Tharoang ka: "Antawaa i khirk ko lopa ago so matatago on, o skano na katawi niyo?"

85

Na ptharoon iran dn a: "Rk o Allah!". Tharoang ka a: "Ino kano di phananadm?"

86

Tharoang ka: "Antawaa i khirk ko manga langit a pito, go Khirk ko aras a mala?"

87

Ptharoon iran dn a: "Rk o Allah". Tharoang ka a: "Ino kano di phananggila?"

88

Tharoang ka: "Antawaa i sii sa tangan iyan so kapaar ko langowan taman, go skaniyan i ppakalinding, go da a phakarn on, o skano na katawi niyo?"

89

Ptharoon iran dn a: "Rk o Allah". Tharoang ka: "Na andamanaya i kapkhalimpang iyo?"

90

Kna, ka initalingoma Mi kiran so bnar: Na mataan! a siran na titho a manga bokhag!

91

Da kowa so Allah sa wata Iyan, go da a miyabaloy a pd Iyan a tohan: O adn a pd Iyan na bisaan dn o oman i isa a tohan so inadn iyan, go pgsn dn o sabaad kiran so sabaad. Soti so Allah! mawatan ko iphropa iran!

92

Katawan Iyan so gaib ago so mapayag: Na maporo a ka-aawat Iyan ko ipphanakoto iran (On)!

93

Tharoang ka: "Kadnan ko, obang Ka rakn phakimasai so ididiyandi kiran, -

94

"Kadnan ko! na di akong Ka mbaloya a pd ko pagtaw a manga darowaka!"

95

Na mataan! a Skami sii ko kapakimasai Ami rka ko ididiyandi Ami kiran na sabnar a khagaga Mi.

96

Rnn ka so lbi a mapiya ko marata: Skami i Matao ko pphamrakn iran.

97

Na tharoang ka: "Kadnan ko, mlindong ako Rka phoon ko manga pangonsi o manga shaytan."

98

"Go mlindong ako Rka Kadnan ko! ka oba siran rakn makadasg."

99

Taman sa igira miyakaoma, ko isa kiran so kapatay, na matharo iyan: "Kadnan ko, pakakasoya kong Ka (sa doniya);

100

"Kaan ako makanggolawla sa mapiya ko minibagak akn. Na di dn oto mapnggolawla! ka mataan aya! a sii bo sa katharo a: skaniyan i mitharo on"; go sii ko kasasangoran iran so paglt taman ko gawii a kawyaga kiran.

101

Na amay ka iyopn so sanggakala, na da a kambangnsa ko ndolondolonan iran sa alongan oto, go di siran makapamagizai!

102

Na sadn sa makapnd so manga timbang iyan, - na siran man na siran i phamakadaag:

103

Na sadn sa makakhap so manga timbang iyan, na siran man so inilang iran so manga ginawa iran; sii siran makakakal ko naraka Jahannam.

104

Pthotongn so manga paras iran o apoy, a siran roo na khipakasasangingi.

105

(Ptharoon kiran:) "Ba da mabaloy so manga ayat Akn a pkhabatiya rkano, na skano na piyakambokhag iyo skaniyan?"

106

Tharoon iran: "Kadnan ami, miyapgs kami o okor ami a marata, go miyabaloy kami a pagtaw a manga dadag!"

107

"Kadnan ami, pakaawaa kaming Ka (ko naraka): Na o kasowi ami (so kaongkir), na mataan! a skami na manga darowaka!"

108

Tharoon Iyan: "Kikips kano san! go di kano gii tharo!"

109

Mataan aya! a adn a sabaad ko manga oripn Ko, a gi iran tharoon: "Kadnan ami! miyaratiyaya kami; na napii kaming Ka, go kalimoon kaming Ka: Ka Ska i lbi a Mapiya ko pphamangalimo!"

110

"Na kinowa niyo siran a pagrg, taros a miyakatmbang siran rkano ko tadm Rakn, go miyabaloy kano a gii niyo siran ikhakala!

111

"Mataan! a Sakn na biyalasan Ko siran sa alongan nai sabap ko kiyaphantang iran: Mataan! a siran na siran i miyamakaslang sa maliwanag."

112

Tharoon Iyan: "Ay kiyathay niyo ko lopa ko bilangan o manga ragon?"

113

Tharoon iran: "Aya kiyathi ami na salongan odi na sabaad sa salongan: Na izaan ka ko manga pagiitong."

114

Tharoon Iyan: "Da a kiyathay niyo a rowar ko mayto; o mataan! a skano na aya btad iyo na katawan niyo!"

115

"Ba niyo tiyangkap sa aya bo a kiyaadna Mi rkano na karimbaran, go mataan! a skano na di kano Rkami phakandodn?"

116

Na Maporo so Allah, a Phapaar, a Bnar: da a tohan a inonta Skaniyan, a Kadnan o aras a piphiyapiyaan!

117

Na sadn sa manongganoy, a irimbang iyan ko Allah, sa tohan a salakaw, a da a karina niyan on; na so imbadal on na sii dn ko Kadnan iyan. Mataan aya! a di phakadaag so manga kafir!

118

Na tharoang ka: "Kadnan ko! napi Ka, go pangalimo Ka! ka Ska i lbi a Mapiya ko pphamangalimo."

Total Number of Verses: 64

1

(Giya ungkai a) Sorah na initoron Ami skaniyan, go inipaliyogat Ami skaniyan: Go adn a initoron Ami a madadalm on a manga ayat a manga rarayag, ka an iyo katanodi.

2

So mizina a babay ago so mizina a mama, - na lphadi niyo so oman i isa kiran a dowa, sa magatos a lphad: Na oba kano makowa o ranon sa dowa oto, sii ko kokoman o Allah, o skano na paparatiyayaan iyo so Allah ago so alongan a mawri: Go zaksii so siksa a dowa oto o sabaad ko miyamaratiyaya.

3

So mizina a mama na da a maphangaroma niyan a rowar ko mizina a babay, odi na pananakoto a babay: Go so mizina a babay na da a makaphangaroma on a rowar ko mizina a mama, odi na pananakoto a mama: Na inisapar oto ko miyamaratiyaya.

4

Na so siran a tokasan iran so manga patiis a manga babay, oriyan iyan na da a mitalingoma iran a pat a manga saksi, na lphadi niyo siran sa walo polo a lphad; go da a tharimaan iyo kiran a kazaksi sa dayon sa dayon: Na siran man na siran so manga songklid; -

5

Inonta so mithatawbat ko oriyan oto, go miphipiyapiya siran; ka mataan! a so Allah na Manapi, a Makalimoon.

6

Na so siran a tokasan iran so manga karoma iran, go da a mabaloy a manga saksi iran a rowar ko manga ginawa iran, - na so kazaksi o isa kiran na pat a manga kazaksi (makapzapa) sa ibt ko Allah mataan! a skaniyan na pd dn ko manga bnar;

7

Go ikalima na mataan! a so morka o Allah na mikolob on o skaniyan na pd ko manga bokhag.

8

Na marnding so babay ko siksa o kazaksi iyan sa pat a manga kazaksi (makapzapa) sa ibt ko Allah, mataan! a so mama na pd dn ko manga bokhag;

9

Go ikalima na mataan! a so rarangit o Allah na mikolob on o so mama na pd ko manga bnar.

10

Na o da so gagaw o Allah rkano, go so limo Iyan, go (kagiya a) mataan! a so Allah na phanarima ko tawbat, a Mawngangn (na sakotikaang kano Niyan)

11

Mataan! a so siran a minioma iran so tmpo na sagorompong rkano: Di niyo thangkapa skaniyan i ba marata rkano; kna, ka giyoto na mapiya rkano: bagian o oman i isa kiran so pizokat iyan ko dosa, go so miyamalata sa kiyapakala iyan a pd kiran, na adn a bagian iyan a siksa a mala.

12

Na o gowani a man'g iyo oto na da makapamikir so miyamaratiyaya a mama, go so miyamaratiyaya a babay, sii ko manga ginawa iran sa mapiya, go iran pitharo a: "Giyaya na kabokhag a mapayag?"

13

Ino a da a minitalingoma iran on a pat a manga saksi? Na gowani a da a minitalingoma iran a manga saksi, na siran man sii ko Allah na siran i manga bokhag!

14

Na o da so gagaw o Allah rkano, go so limo Iyan sii ko doniya go so akhirat, na miyatmo kano dn sabap ko initharmo iyo to a siksa a mala.

15

Gowani na gii niyo to pakimbasisa ko manga dila iyo, go gii niyo pakitharo ko manga ngari iyo so da a katao niyo ron go tatangkapn iyo to sa malbod a giyoto sii ko Allah na lbi a mala (a dosa).

16

Na gowani a man'g iyo to, na ino niyo da tharoa a: "Di rktano patot so gii tano katharoa sangkai: Soti Ka (Ya Allah) giyaya na tmpo a mala?"

17

Phangthomaan kano o Allah, ka o ba niyo kasowi so lagid aya, sa dayon sa dayon, o skano na khipaparatiyaya.

18

Go pphayagn rkano o Allah so manga ayat: Na so Allah na Matao, a Mawngangn.

19

Mataan! a siran a pkhababayaan iran a kalangkap o paka sisingay makapantag ko siran a miyamaratiyaya, na adn a bagian iran a siksa a malipds sii sa doniya ago sa akhirat: Na so Allah i Matao, na skano i di manga tatao.

20

Na o da so gagaw o Allah rkano, go so limo Iyan, go (kagiya a) mataan! a so Allah na makapdiin, a Makalimoon (na sakotikaan kano Niyan).

21

Hay so miyamaratiyaya, di niyo khdga so manga okit o shaytan: Na sadn sa komdg ko manga okit o shaytan, na mataan! a skaniyan na ipzogo iyan so pakasisingay, go so pakagowagowad: Na o da so gagaw o Allah rkano, go so limo Iyan, na da a soti Niyan rkano a isa bo sa dayon sa dayon: Na ogaid na so Allah na zoti Niyan so taw a kabaya Iyan: Na so Allah na Pphakan'g, a Matao.

22

Na di pzapa so adn a miyoombaw niyan a pd rkano, go (adn a rk iyan a) kakawasaan sa di iran mbgan so manga tonganay, go so manga miskin, go so miyamanogalin ko lalan ko Allah: Na pmaap siran, go napi siran. Ba niyo di khabayai a napiyan kano o Allah? Na so Allah na Manapi, a Makalimoon.

23

Mataan! a so siran a tokasan iran so manga patiis a manga babay, a pakalilipatan iran (so kazina), a miyamaratiyaya, na pimorkaan siran sii sa doniya go akhirat: Go adn a bagian iran a siksa a mala, -

24

Sii ko gawii a zaksian siran o manga dila iran, go so manga lima iran, go so manga ai ran sii ko pinggolawla iran.

25

Sa alongan oto na itoman kiran sa tarotop o Allah, so balas kiran a bnar, go katokawan iran a mataan! a so Allah na Skaniyan so Bnar a mapayag.

26

So manga rrzik a manga babay na pantag a manga rrzik a manga mama, go so manga rrzik a manga mama na pantag o manga rrzik a manga babay, na so manga soti a manga babay na pantag o manga soti a manga mama, go so manga soti a manga mama a pantag o manga soti a manga babay: Siran man na di masosogat o katharo iran (a kabokhag): adn a bagian iran a maap, go pagpr a mapiya.

27

Hay so miyamaratiyaya, di kano zold ko manga walay salakaw ko manga walay niyo, taman sa di kano makawdas, go masalam iyo so taw ron: Giyoto man i lbi a mapiya rkano, ka ang kano pphakatadm.

28

Na o da a matoon iyo ron a sakataw bo, na di kano ron zold, taman sa di kano kaydinan: Na o tharoa rkano a kasoy kano, na kasoy kano: Giyoto i lbi a soti a bagian iyo: Na so Allah na so gii niyo nggolawlaan na katawan Iyan.

29

Daa dosa niyo ko kasold iyo ko manga walay a di babalingan, a adn a matatago on a gona a bagian iyo: Na so Allah na katawan Iyan so ipapayag iyo, go so pag-umaan iyo.

30

Tharoang ka ko miyamaratiyaya a manga mama a: Pinggna iran so manga kaylay ran (ko haram), go siyapa iran so manga kayaan iran: Giyoto man i lbi a soti a bagian iran: Mataan! a so Allah na Kaip Iyan so gi iran nggolawlaan.

31

Go tharoang ka ko miyamaratiyaya a manga babay a: Pinggna iran so manga kaylay ran (ko haram), go siyapa iran so manga kayaan iran; go di iran pzawai so parahiyasan iran inonta so miyapayag on; go sapngn iran so manga kombong iran ko manga lig o bangkala iran, go di iran pzawai so parahiyasan iran inonta o sii ko manga karoma iran, odi na so manga ama iran, odi na so manga ama o manga karoma iran, odi na so manga wata iran a manga mama, odi na so manga wata a mama o manga karoma iran, odi na so manga pagari ran a mama, odi na so manga wata a mama o manga pagari ran a mama, odi na so manga wata a mama o manga pagari ran a babay, odi na so manga babay kiran, odi na so miyakhapaar o manga tangan iran, odi na so pphamangonotonot a da a kabaya iran (sa babay) a pd ko manga mama, odi na so manga wata a da iran pn kasaboti so manga awrat o manga babay; na di iran ndaphkhn so manga ai ran sa ba sabap sa an katokawi so pag-umaan iran ko parahiyasan iran. Na thawbat kano ko Allah langon, hay miyamaratiyaya! ka ang kano makaslang sa maliwanag.

32

Na pakipamangaromaan iyo so da a manga karoma niyan rkano, go so manga bilangataw a pd ko manga oripn iyo a mama, go so manga oripn iyo a babay: Na o mabaloy siran a manga miskin, na mbgan siran o Allah ko kakawasaan iyan: Na so Allah na Maginawa, a Matao.

33

Na thigr so da a khibaog iran ko kapangaroma, taman sa bgan siran o Allah ko kakawasaan Iyan. Na so khabayaan iran so kasorat (sa kamaradika iran) a pd ko miyakhapaar o manga tangan iyo, na soratn iyo siran, o katawi niyo a adn a matatago kiran a mapiya; go bgi niyo siran ko tamok o Allah a so inibgay Niyan rkano. Na di ni yo mbaasa so manga oripn iyo a manga babay ko kazina, o kabaya iran so kaphatiis, sabap sa ipmbabanog iyo ko kakayaan ko kawyagoyag ko doniya. Na sadn sa taw a baasn iyan siran (ko kazina), na mataan! a so Allah ko oriyan o kiyabaasa kiran, na Manapi, a Makalimoon.

34

Na sabnsabnar a piyakatoronan Ami skano sa manga ayat a miyamakapayag, go ladiyawan a pd ko siran a miyangaiipos ko miyaonaan iyo, go thoma a bagian o khipanananggila.

35

So Allah i sindaw o manga langit ago so lopa. Aya ibarat o sindaw Niyan na lagid o tagoay sa solo a kadadalman sa palitaan: So palitaan na madadalm ko pagalongan: So pagalongan na lagid oba skaniyan bitoon a masindaw: Mapphakakadg phoon ko kayo a piyakambarakat, a zaytona, kna a ba isbangann go kna a ba isdpann, mayto bo na so lana niyan na zindaw, apiya da maskho skaniyan a apoy: Sindaw ko liyawaw o sindaw! Pnggonanaon o Allah ko sindaw Niyan so taw a kabaya Iyan: Phangmbaalan o Allah so manga ibarat a bagian o manga manosiya: Na so Allah na so langowan taman na katawan Iyan.

36

Sii ko manga walay a inisogo o Allah so kaslaa on, go so kapkhaaloy ron o ngaran Iyan, gii zambayang a bagian iyan roo ko manga kapitapita, go so manga kagabi gabi,

37

So manga mama a di kiran phakasndod so kapamasa, go so kaphasa phoon ko tadm ko Allah, go so kipamayandgn ko sambayang, go so katonaya ko zakat: Ipkhalk iran so gawii a phananabadn roo so manga poso, go so manga kaylay, -

38

Ka imbalas kiran o Allah so mapiya a pinggolawla iran, go pagomanan Iyan siran ko kakawasaan Iyan: Na so Allah na priskhiyan Iyan so taw a kabaya Iyan, sa di khasar a pandapat.

39

Na so miyamangongkir, na so manga galbk iran na lagid o pamaloy ko manga landap a lopa, arangan on o pkhawaw na ig. Taman sa igira a miyakaoma on na da a khatoon iyan on a mayto bo: Na khatoon iyan so Allah sii ko obay niyan, na ithoman Iyan on sa tarotop so balas Iyan: Na so Allah na magaan i kabalas.

40

O di na lagid o manga lilibotng ko kalodan a madalm, a kakokoloban skaniyan sa bagl, a kaliliyawawan skaniyan pn sa bagl, a kaliliyawawan skaniyan sa gabon: Manga lilibotng, a so sabaad on na maliliyawaw ko sabaad: Igira a iniliyo niyan a lima niyan, na margn a kakhaylaya niyan on. Na sadn sa di snggayan o Allah sa bagian iyan sa sindaw, na da a bagian iyan a sindaw!

41

Bang ka di katawi a mataan! a so Allah na pthasbik Rkaniyan so matatago ko manga langit ago so lopa, go so manga papanok a zasarngkap? Oman i isa na sabnar a kiyatokawan so sambayang iyan go so tasbik iyan. Na so Allah na katawan Iyan so gi iran nggolawlaan.

42

Na rk o Allah so kapaar ko manga langit ago so lopa; na sii bo ko Allah so khandodan.

43

Bang ka di katawi a mataan! a so Allah na ipmbayog Iyan so gabon, oriyan iyan na pthimoon Iyan skaniyan, oriyan iyan na pmbalowin Iyan a miyagngkapngkap? Na pkhaylaing ka so oran a phltos phoon ko pagltltan iyan. Go pphakatoronn iyan phoon ko kawang so sabaad ko manga palaw ron a ilo: Na ipzogat Iyan oto ko taw a kabaya Iyan, go ipkhisar Iyan oto ko taw a kabaya Iyan. Mayto bo na so sindaw o kilat Iyan na khaylang iyan so manga kaylay.

44

Gii pakazambiin o Allah, so gagawii ago so dawndaw: Mataan! a adn a matatago roo man a titho a nanao a bagian o adn a manga kaylay niyan!

45

Na so Allah i miyadn ko oman i baraniyawa a phoon sa ig: Na adn a pd kiran a so ipndola niyan a tiyan iyan; go adn a pd kiran a so phlalakaw sa dowa ai, go so adn a pd kiran a so phlalakaw sa pat (a ai). Phagadnn o Allah so nganin a kabaya Iyan; mataan! a so Allah sii ko langowan taman na Gaos Iyan.

46

Sabnsabnar a tomiyoron Kami sa manga ayat a miyamakaosay: Na so Allah na pnggonanaon Iyan so taw a kabaya Iyan ko lalan a matitho.

47

Na gi iran tharoon a: "Piyaratiyaya Mi so Allah ago so Rasol, go inonotan Ami": Oriyan iyan na pthalikhod so isa ka sagorompong kiran ko oriyan oto: Na kna man a ba siran khipaparatiyaya.

48

Na igira a tiyawag siran sii ko (kitab o) Allah ago so sogo Iyan, ka an Iyan siran makokom na samawto na so isa kiran ka sagorompong na somasangka siran.

49

Na o adn a rk iran a kabnar, na somong siran on, a gii siran nggagaan.

50

Ba katatagoi so manga poso iran sa gdamn? Antawaa ba siran pkhadowadowai, antawaa ba iran pkhalkn o ba siran salimboti o Allah go so sogo Iyan? Kna, ka siran man na siran so manga darowaka.

51

Aya bo a miyabaloy a katharo o miyamaratiyaya, igira a tiyawag siran sii ko (kitab o) Allah go so sogo Iyan, ka an Iyan siran makokom, na so gi iran katharoa sa: "Piyamakin'g ami go inonotan ami": Na siran man na siran so miyamakadaag.

52

Na sadn sa mangongonotan ko Allah go so sogo Iyan, go ikaalk iyan so Allah, go pphangongonotan Rkaniyan, na siran man na siran so phamakaslang sa maliwanag.

53

Na inizapa iran ko Allah so totoo a manga sapa iran: "Sa ibt ka o sogoang ka siran, na mataan a mliyo siran dn (ko kaphrang)". Tharoang ka: "Di kano gii zapa; ka so kapangongonotan na katotokawan; mataan! a so Allah na Kaip Iyan so gii niyo nggolawlaan."

54

Tharoang ka: "Onoti niyo so Allah, go onoti niyo so Rasol": Na o talikhod siran, na aya bo a inipaliyogat ko Rasol na so inisogo on, go aya bo a inipaliyogat rkano na so inisogo rkano. Na o onoti niyo skaniyan, na matoro kano. Na da a inipaliyogat ko sogo a rowar ko kapamakasampay (o inisogo on) a mapayag.

55

Inidiyandi o Allah ko siran a miyamaratiyaya, a pd rkano go pinggalbk iran so manga pipiya, a mataan a phakasambiin Iyan siran dn ko lopa, lagid o kiya pakasambia Niyan ko siran a miyaonaan iran; go mataan a phakatindgn Iyan kiran dn so agama iran, a so inikasoat Iyan kiran; go mataan a zambian Iyan kiran dn ko oriyan o kalk iran, sa kasasarig: Pzimbaan Ako iran, da a izakoto iran Rakn a mayto bo. Na sadn sa mongkir ko oriyan oto, na siran man na siran i manga songklid.

56

Na pamayandgn iyo so sambayang, go tonaya niyo so zakat, go onoti niyo so Rasol, ka ang kano mipangalimo.

57

Ding ka dn thangkapa so miyamangongkir oba siran makapalagoy ko lopa: Na aya darpa iran na so apoy, - na miyakaratarata dn a khabolosan!

58

Hay so miyamaratiyaya, pphangni rkano sa idin so siran a miyakhapaar o manga tangan iyo, go so da pn praraotn ko kathataginp a pd rkano ko tlo a manga wakto: Sii ko onaan o sambayang a Sobo, go so wakto a kandai niyo ko manga nditarn iyo ko kawtho a alongan, go sii ko oriyan o sambayang a Aysah: Tlo a (khikasasawai ko) manga awrat iyo: Da rkano go da kiran i dosa ko oriyan oto: Pphagaloyan siran rkano so sabaad rkano ko sabaad: Lagid aya a kapphayaga o Allah rkano ko manga ayat: Na so Allah na Matao, a Mawngangn.

59

Na igira a miniraot so manga wata rkano ko kathataginp, na pphangni siran sa idin, lagid o kiyapangni sa idin o siran a miyaonaan iran: Lagid aya a kapphagosaya o Allah rkano ko manga ayat Iyan: Na so Allah na Matao, a Mawngangn.

60

Na so piyamanaphkan ko manga babay a so da a inam iran ko kapangaroma, - na da a dosa iran ko kandai ran ko (maliliyawaw ko) manga nditarn iran, a kna a ba siran phangangarig sa parahiyasan: Na so di iran on kandai i tomo kiran: Na so Allah na Pphakan'g, a Matao.

61

Daa dosa o bota, go da a dosa o lpo, go da a dosa o pkhasakit (ko di iran kaphakawnot ko kaphrang), go da a dosa o manga ginawa niyo, ko kapkhan iyo ko manga walay niyo, odi na so manga walay o manga ama iyo, odi na so manga walay o manga ina iyo, odi na so manga walay o manga pagari niyo a mama, odi na so manga walay o manga pagari niyo a babay, odi na so manga walay o manga pakiyamaan iyo sa ama, odi na so manga walay o manga pakiinaan iyo sa ama, odi na so manga walay o manga pakiyamaan iyo sa ina, odi na so manga walay o manga pakiinaan iyo sa ina, o dina so minipaar iyo so manga gonsi iyan, odi na so bolayoka iyo: da a dosa niyo ko kakan iyo a kapamagatoang, odi na kazisibasibaya. Na igira a zold kano ko manga walay, na salama niyo so manga ginawa niyo, sa kormat a phoon ko Allah, a piyakambarakat a rinarinaw. Lagid aya a kapphagosaya o Allah rkano ko manga ayat: ka an iyo sabota.

62

Aya bo a miyamaratiyaya, na siran a piyaratiyaya iran so Allah ago so sogo Iyan: Go igira a miyatago siran a pd so Rasol ko galbk a makasasamaya, na di siran ngganat taman sa di siran on makawdas; mataan! a siran a pphamangodas siran rka, na siran man so khipaparatiyaya ko Allah ago so sogo Iyan; na igira a miyangni siran rka sa idin, makapantag ko sabaad ko galbk iran, na idining ka so taw a kabaya aka kiran, go pangnin ka siran sa maap ko Allah: Mataan! a so Allah na Manapi, a Makalimoon.

63

Di niyo mbaloya so kapthawaga ko Rasol ko zaronsarongan iyo a lagid o kapthawaga o sabaad rkano ko sabaad: Sabnar a katawan o Allah so gii siran thitinonggosan lomiyo a pd rkano, a pphamanolilap: Na iktiyar so khisosorang ko sogoan Iyan, ka khasogat siran a tiyoba, odi na khasogat siran a siksa a malipds.

64

Tanodan ka mataan! a rk o Allah so zisii ko manga langit ago so lopa. Sabnar a katawan Iyan so btad iyo: Go (katawan Iyan) so alongan a phakandodn siran sii Rkaniyan, na phanotholn Iyan kiran so pinggolawla iran: Na so Allah sii ko langowan taman na katawan Iyan.

Total Number of Verses: 77

1

Mala so (Allah a) tomiyoron ko gii makasnggaya (ko ontol ago so ribat) sii ko oripn Iyan (a Mohammad), ka an mabaloy ko manga kaadn a pphamakaiktiyar;

2

So (Allah a) Khirk ko kapaar ko manga langit ago so lopa: Go da kowa sa wata Iyan, go da a miyaadn a sakotowa Iyan ko kapaar: Go inadn Iyan so langowan taman, na diniyangka Iyan sa samporna a diyangka.

3

Na kominowa siran sa salakaw Rkaniyan sa manga katohanan, a da a khaadn iran a mayto bo, ka siran na pphangmbaalan; go da a mipapaar iran a bagian o manga ginawa iran a kabinasa, go ompiya; go da a mipapaar iran a kapatay, go kawyag, ago kawyag ko oriyan o kapatay.

4

Na pitharo o siran a miyamangongkir: "Da ko ungkai (a Qor'an) inonta na kabokhag, a pimbabaas skaniyan (o Mohammad), go kiyatabangan on skaniyan o pagtaw a manga salakaw". Na sabnar a miyakanggolawla siran sa kandarowaka, go kabokhag.

5

Go pitharo iran a: "Manga iringa a kabokhag o miyangaoona, a piyakipanorat iyan: Na giyoto na phkhdgn on sa kapita, go magabi."

6

Tharoang ka a: "Initoron oto o (Allah a) Matao ko masoln, ko manga langit ago so lopa: Mataan! a Skaniyan na tatap a, Manapi, a Makalimoon."

7

Na pitharo iran: "Antona ini a sogo, a pkhan ko pangn'ngkn, go phlalakaw ko manga padian? Ino da pakatoroni skaniyan sa malaikat, na mabaloy a pdi iyan a pphamakaiktiyar?

8

"O di na kabgan skaniyan sa kakawasaan, odi na adn a mambagian iyan a pamomolan a pphakakan on? Na pitharo o manga darowaka a: Da a phagonotan iyo a rowar ko mama a tataraponan."

9

Nggdagdaang ka o anda manaya i kiyapayaga iran rka ko manga ibarat. Na miyadadag siran, na di iran khagaga i kapakatoon sa lalan!

10

Mala so (Allah a) o kabaya Iyan, na khasnggayan ka Niyan sa mapiya a di giyoto, - a manga pamomolan a pphamangondas ko kababaan iyan so manga lawasayg; go khasnggayan ka Niyan sa manga torogan.

11

Kna, ka piyakambokhag iran so bangkit: Na pithiyagaran Ami so taw a piyakambokhag iyan so bangkit sa kadg:

12

Na igira a miyailay niyan siran ko darpa a mawatan, na makan'g siran on sa kambaragani, go katagaw.

13

Na igira a piyamozang siran on, ko darpa a masimpit, a piyakapamagikta siran, na migoraok iran roo so kabinasa!

14

(Tharoon kiran:) "Di niyo nggoraokn sa alongan nai so kabinasa a isa: Na goraokn iyo so kabinasa a madakl!"

15

Tharoang ka: "Ba giyoto i tomo, antawaa so sorga a kakal, a so inidiyandi ko miyamananggila?" Miyabaloy a bagian iran a balas go khandodan.

16

"Mapmbagian iran roo so nganin a kabaya iran, a makakakal siran (roo). Miyabaloy sii ko Kadnan ka a diyandi a pphangnin."

17

Na sii ko alongan a limodn Iyan siran ago so pzimbaan iran a salakaw ko Allah, na tharoon Iyan: "Ba skano na diyadag iyo so manga oripn Ko a siran aya, antawaa siran i miyamangawa ko lalan?"

18

Tharoon iran: "Soti Ka (ya Allah)! Da mapatot rkami i ba kami kowa sa salakaw Rka a manga panarigan: Na ogaid na piyakasawit Ka siran (sa kapipiya ginawa), ago so manga loks iran, taman sa kiyalipatan iran so pananadm: Na mimbaloy siran a pagtaw a miyangabibinasa."

19

"Na sabnar a pakapmbokhagn kano iran ko katharo iyo: Na da a magaga niyo a kapakalidas, odi na pananabang". Na sadn sa ndarowaka rkano, na pakataamn Ami skaniyan sa siksa a mala.

20

Na da a siyogo Ami ko miyaonaan ka a manga sogo a ba di mataan! a siran na sabnar a pkhan siran ko pangn'ngkn, go phlalakaw siran ko manga padian: Na biyaloy Ami so sabaad rkano ko sabaad a tpng: Ino pphantang kano? Na tatap a so Kadnan ka na Pphakaylay.

Part 19

21

Na pitharo o siran a di iran pagarapn so kimbaratmowaan Rkami: "Ino kami da pakatoroni sa manga malaikat, odi na maylay ami so Kadnan ami?" Sabnsabnar a mimaratabat siran sii ko manga ginawa iran, go mimalawani siran sa kapmalawani a mala!

22

Sii ko gawii a kaylaya iran ko manga malaikat, - na da a tothol a mapiya sa alongan oto a bagian o manga rarata i ongar, na matharo iran a: "Rn ko pagrnn!"

23

Na sangorn Ami so miyanggalbk iran a galbk, na balowin Ami skaniyan a lopapk a mikakayambr.

24

So manga taw ko sorga sa alongan oto, i mapiya i darpa, go matanos i dkhai.

25

Na sii ko gawii a manga bbnsad so langit, a rakhs o manga gabon, go pakatoronn so manga malaikat, sa samporna a katoron,

26

So kapaar sa alongan oto a bnar, na rk o (Allah a) Masalinggagaw: Na mabaloy a gawii sii ko miyamangongkir a masikot.

27

Na sii ko gawii a garngtn o darowaka so mbala a lima niyan, gii niyan matharo: "Hay oba ako bo miyakakowa a rakhs o Rasol sa lalan (ko toroan)!"

28

"Hay dowan dowaan ako! Oba akn bo da makowa si giraw a bolayoka!"

29

"Sabnsabnar a miyaawat ako niyan ko pananadm ko oriyan o masa a kiyapakawma niyan rakn". Na miyabaloy so shaytan sii ko manga manosiya a pkhiyas!

30

Na pitharo o Rasol: "Hay Kadnan ko, mataan! a so pagtaw akn na biyaloy iran angkai a Qor'an a pphalagoyan."

31

Na lagid aya a kiyasnggai Ami ko oman i nabi sa ridoay a pd ko manga rarata i ongar: Na makatatarotop so Kadnan ka a Pnggonanao, go Phananabang.

32

Na pitharo o siran a miyamangongkir a: "Ino ron da toronn so Qor'an sa miyatimbl sa miyakaysa?" Lagid aya, ka an Ami mapakathakna sa sabap rkaniyan so posoo ka, go piyakazasaliyob Ami skaniyan sa malanat;

33

Na da a khitalingoma iran rka a ibarat, a ba Ami rka da talingomaan so bnar, go lbi a matanos a osayan.

34

Siran na limodn siran a mikakamanga a manga paras iran ko naraka Jahannam, - siran man i marata i darpa, go tanto a miyapokas ko lalan.

35

Na sabnsabnar a inibgay Ami ko Mosa so kitab, go biyaloy Ami a babid iyan so pagari niyan a Haron a tabanga;

36

Na pitharo Ami: "Song kano a dowa, ko pagtaw a so piyakambokhag iran so manga ayat Ami": Na bininasa Mi siran sa samporna a kabinasa.

37

Go (bininasa Mi) so pagtaw o Noh, - kagiya pakambokhagn iran so manga sogo, na inld Ami siran, go biyaloy Ami siran ko manga manosiya a ibarat; na pithiyagaran Ami so manga darowaka sa siksa a malipds;

38

Go (bininasa Mi) so Ad, go so Samod, go so manga taw sa ingd a Rassi, go so manga pagtaw ko pagltan oto a madakl.

39

Na oman i isa (kiran) na piyayag Ami ron so manga ibarat; na oman i isa (kiran) na bininasa Mi sa samporna a kabinasa.

40

Na sabnsabnar a miyakasong siran ko ingd a so piyakaoranan sa oran a marata: Ba iran oto da maylay? Kna, ka aya btad iran na di iran ikhalk so kawyag ko oriyan o kapatay.

41

Na igira a miyailay ka iran (hay Mohammad), na pmbalowin ka iran badn a kasablawan, (gi iran tharoon:) "Ba giyai so siyogo o Allah a sogo?"

42

"Mataan a mayto bo na khapokas tano niyan dn ko manga katohanan tano, o da tano phantangi skaniyan". Na katokawan iyan bo, ko masa a kasandngi ran ko siksa, o antawaa i taw a titho a miyapokas ko lalan!

43

Ay gda aka ko taw a kinowa niyan a katohanan iyan so babaya iyan? Ba ska i khabaloy a wakil iyan?

44

Antawaa bang ka tatangkapa sa mataan! a so kadaklan kiran na pphamakin'g siran, odi na gii siran nggdagda? Da' ko siran inonta na lagid o manga ayam; kna, ka siran i lbi a miyapokas ko lalan.

45

Bang ka da katokawi so Kadnan ka o andamanaya i kiyapakalaa Niyan ko along? Na o kabaya Iyan, na khabaloy Niyan dn oto a makatatarg. Oriyan iyan na biyaloy Ami so alongan a nanao ron;

46

Oriyan iyan na khikhm Ami skaniyan sii Rkami sa kakkhm a malbod.

47

Na Skaniyan so (Allah a) biyaloy Niyan rkano so gagawii a nditarn, go so torog a iddkha, go biyaloy Niyan so dawndaw a iphloloba sa kawiyagan.

48

Go Skaniyan so miyotawan ko manga ndo a pphamalata ko onaan o limo Iyan; na piyakatoron Ami phoon ko kawang so ig a phakasoti,

49

Ka iphagoyag Ami oto ko ingd a maatay, go pphakiinom Ami oto ko inadn Ami a manga ayam, go manga manosiya a madakl.

50

Na sabnsabnar a iniparak Ami oto ko ltlt iran, ka an siran makatanod, na somiyangka so kadaklan ko manga manosiya, ogaid na kaongkir.

51

Na o kabaya Ami, na kaphakitindgan Ami dn so oman i pagtaw sa pphamakaiktiyar.

52

Na ding ka pagonoti so manga kafir, na panagontamann ka kiran (a Qor'an aya), sa kapanagontaman a lbi a mala.

53

Na Skaniyan so (Allah a) miyotawan ko dowa kalodan: Giyaya na tabang a pakadnggaw, go giyaya na matimos a mapld go tiyagoan Iyan so pagltan a dowa oto sa lt, go rnding, a pangrn;

54

Go Skaniyan so miyadn phoon ko ig sa manosiya: Na biyaloy Niyan oto a bangnsa, go kakhakamonga: Na tatap a so Kadnan ka i Gaos.

55

Na pzimbaan iran a salakaw ko Allah so di kiran phakaompiya, go di kiran phakabinasa: Na miyabaloy so kafir a tabanga o sorang ko Kadnan iyan!

56

Na da a kiyasogo Ami rka (hay Mohammad) a rowar sa pphamanothol sa mapiya, go pphamakaiktiyar.

57

Tharoang ka a: "Kna a ba ako rkano phangni sa makapantag saya sa sokay: Ogaid na sa taw a khabaya na an makakowa sa lalan ko Kadnan iyan."

58

Na sarig ka ko (Allah a) Oyagoyag a so Di-phatay; go pthasbikn ka so podi Rkaniyan; na makatatarotop Skaniyan a Kaip ko manga dosa o manga oripn Iyan;

59

So miyadn ko manga langit ago so lopa, go so nganin a pagltan a dowa nan sii ko nm a manga gawii, oriyan iyan na mithakna ko aras: So (Allah a) Masalingagaw: Na izaan ka oto ko Kaip.

60

Na igira a pitharo kiran: "Sodiod kano ko (Allah a) Masalinggagaw!" Na tharoon iran: "Na antonaa so Masalinggagaw? Ati sodiod kami ko apiya antonaa i izogo o ka rkami?" Na ba kiran dn miyakawman sa kapalagoy.

61

Mala so (Allah a) tomiyago ko langit sa manga darpa o manga bitoon, go tomiyago on sa (alongan) a palitaan, go olan a masindaw;

62

Go Skaniyan so biyaloy Niyan so gagawii ago so dawndaw a gii makazambi; a bagian o taw a miyabaya mananadm, odi na miyabaya manalamat.

63

Na so manga oripn o (Allah a) Masalinggagaw na so pphlalakaw siran ko lopa kapangalimbabaan, go igira a inimbitiyarai siran o manga lalong, na tharo siran sa: "Kalilintad!"

64

Go siran na gii siran mbabasagawii, sa rk o Kadnan iran a khisosodiod, go khigaganat;

65

Go siran na gi iran tharoon: "Kadnan ami, pakalidasa kaming Ka ko siksa ko naraka Jahannam, mataan! a so siksa roo na miyabaloy a tatap,"

66

"Mataan oto! a miyakaratarata a kapthaknaan, go darpa;"

67

Go siran, na igira a minggasto siran, na di siran pthabowakar, go di phagikot, go miyabaloy ko pagltan oto a katatangkaan;

68

Go siran na di siran phanongganoy sa pd o Allah a tohan a salakaw, go di iran mbono on so baraniyawa a so inisapar o Allah, inonta o sabap ko kabnar, go di siran pzina; - na sadn sa nggolawla roo na khatmo niyan so siksa;

69

Pthaktakpn on so siksa ko alongan a qiyamah, go kakal roo a makadadapanas;

70

Inonta so taw a mithawbat, go miyaratiyaya, go minggalbk sa galbk a mapiya, na siran man, na zambian o Allah so manga karataan iran sa manga pipiya, na tatap a so Allah na Manapi, a Makalimoon.

71

Na sadn sa thawbat, go nggalbk sa mapiya, na mataan! a skaniyan na phakatawbat ko Allah; - sa samporna a tawbat.

72

Na siran na di iran pzaksian so kabokhag, go igira a siyagadan iran so ilang, na panizagadan iran a mbibilangataw siran;

73

Go siran na igira a miyaaloy kiran so manga ayat o Kadnan iran, na di siran on zondong sa ba siran mbbngl bota;

74

Go siran na gi iran tharoon: "Kadnan ami, bgi kaming Ka sa phoon ko manga karoma Mi go so manga moriyataw Ami sa kapipiya ginawa, go baloya kaming Ka ko miyamangongonotan a pkhaonotan."

75

Siran man na imbalas kiran so pangkatan a maporo, sabap ko kiyaphantang iran: Go alawn siran roo (sa sorga) a kormat, ago salaam,

76

Makakakal siran roo; miyakapiyapiya a kapthaknaan, go darpa!

77

Tharoang ka: "Di kano lilingayn o Kadnan ko o da so dowaa niyo: Na sabnar a piyakambokhag iyo (so Rasol), na khabaloy dn (so siksa) a tatap!"

Total Number of Verses: 227

1

Ta, Sin, Mim. (So Allah i Matao ko paka-aantapan Iyan on.)

2

Giyaya na manga ayat ko kitab a miyakawsai.

3

Baandang ka mapakapaggt a ginawang ka (hay Mohammad) ko di iran kabaloy a khipaparatiyaya.

4

O kabaya Ami, na pakatoronan Ami siran a phoon ko langit sa tanda, na matatap so manga lig iran sa kapakasosondong iran on.

5

Na da a phakatalingoma kiran a pananadm a phoon ko (Allah a) Masalinggagaw, a bago, a ba siran da mabaloy a khitatalikhod Rkaniyan.

6

Na sabnar a piyakambokhag iran (so Rasol): Na phakatalingoma kiran dn so manga totholan ko miyabaloy siran on a gi iran zandagan!

7

Ba iran da maylay so lopa, - ay kadakl a piyakatho Ami ron ko oman i sasoson a mapiya?

8

Mataan! a adn a matatago roo man a titho a manga tanda: Na da mabaloy so kadaklan kiran a khipaparatiyaya.

9

Na mataan! a so Kadnan ka, na titho a Skaniyan so Mabagr, a Makalimoon.

10

Na gowani na tiyawag o Kadnan ka so Mosa: "Song ka ko pagtaw a manga darowaka,"

11

"Pagtaw o Pir'awn: Ino siran di phananggila?"

12

Pitharo iyan: "Kadnan ko, mataan! a sakn na ipkhalk akn o ba ako iran pakambokhaga: "

13

"Go gomagt a rarb akn, go di mapkas a dila akn: Na sogoing ka so Haron (sa mimbabid akn);"

14

"Go adn a kasalaan ko kiran, na ipkhalk akn oba ako iran bonoa."

15

Pitharo (o Allah) a: "Kna pn nai! na lalakaw kano a dowa, rakhs o manga tanda Ami; Mataan! a Skami na babid iyo, a pphamamakin'g."

16

"Na song kano ko Pir'awn, na tharoa niyo a: Mataan! a skami na sogo o Kadnan o manga kaadn;"

17

"Botawaning ka rkami so manga moriyataw o Israil."

18

Pitharo (o Pir'awn): "Ba ami ska da pagoyagoyaga sii rkami, ko kawawatai rka, go miyakatarg ka rkami ko kawyagoyag ka sa miyakaphipira ragon?"

19

"Go pinggolawlang ka so pinggolawlang ka, a so pinggolawlang ka (a kiyapamonoo ka), na ska na miyapd ko da a manga tadm iyan!"

20

Pitharo (o Mosa): "Miyanggolawla ko oto, na samawto na sakn na pd ko miyangariribat."

21

"Na piyalagoyang ko skano, ka kagiya inikalk akn skano; na bigan ako o Kadnan ko sa ongangn, go biyaloy ako Niyan a pd ko manga sogo."

22

"Na giyoto man na limo a ipphangalimo o ka rakn oto, sa kiyapangongoripnang ka ko manga moriyataw o Israil!"

23

Pitharo o Pir'awn: "Na antonaa so Kadnan o manga kaadn?"

24

Pitharo (o Mosa) a: "So Kadnan o manga langit ago so lopa, go so nganin a pagltan a dowanan, - o skano na khitotomangkd."

25

Pitharo (o Pir'awn) ko makalilibt on: "Ba niyo da man'g?"

26

Pitharo (o Mosa) a: "So Kadnan iyo go Kadnan o manga loks iyo a miyangaoona!"

27

Pitharo (o Pir'awn) a: "Mataan! a so sogo rkano a so siyogo rkano na mataan a pmbthangn!"

28

Pitharo iyan a: "Kadnan o sbangan ago so sdpan, go so nganin a pagltan a dowa nan! o skano na zabota niyo!"

29

Pitharo (o Pir'awn) a: "Mataan a o kowa ka sa tohan a salakaw rakn, na sabnar a itapi ami ska dn ko manga kalaboso!"

30

Pitharo iyan: "Ati apiya adn a minioma ko rka a tanda a mapayag?"

31

Pitharo (o Pir'awn): "Na talingomaan ka skaniyan, o miyabaloy ka a pd ko manga bnar!"

32

Na iniithog iyan so badas iyan, na samawto na skaniyan na nipay a mala!

33

Go tiyonggos iyan a lima niyan, na samawto na skaniyan na sindaw (a miyailay o) khibabantay!

34

Pitharo (o Pir'awn) ko manga nakoda a lomilibt on a: "Mataan aya! a titho a balik mata a lbi a matao: "

35

"Khabayaan iyan a mapakaawa kano niyan ko lopa iyo sabap ko balik mata niyan; na antonaa i pangoyaw niyo?."

36

Pitharo iran a: "Pakalanatang ka skaniyan go so pagari niyan, na sogoing ka so manga ingd sa kalimod iran: "

37

"Kaan iran rka mawit so oman i balik mata a lbi a matao."

38

Na miyatimo so manga balik mata ko diyandi a kapthatalabok, ko gawii a miyapnto,

39

Na pitharo ko manga manosiya: "Ino skano miyatimo kano?"

40

"Kaan tano kawnoti so manga balik mata, o mabaloy siran a siran i mamakadaag."

41

Na kagiya a makawma so manga balik mata, na pitharo iran ko Pir'awn: "Ino mataan! a adn a mapmbagian ami a titho a balas o mabaloy kami a skami i mamakadaag?"

42

Pitharo iyan: "Oway, go mataan! a skano samawto na pd dn ko manga dadasg (rakn)."

43

Pitharo kiran o Mosa: "Ithogn iyo so skano na ipagithog iyo!"

44

Na iniithog iran so manga tali ran go so manga badas iran, go pitharo iran: "Ibt ko mnang o Pir'awn, ka mataan! a sktano na sktano dn i phamakapgs!"

45

Na iniithog o Mosa so badas iyan, na samawto na skaniyan na pphlololokn iyan so ipphanaliba iran!

46

Na miyakasondong so manga balik mata, sa khipakasosodiod,

47

Pitharo iran: "Piyaratiyaya mi so Kadnan o manga kaadn,"

48

"A Kadnan o Mosa ago so Haron."

49

Pitharo (o Pir'awn) a: "Piyaratiyaya niyo to a da akn skano pn kaydini; Mataan! a skaniyan na titho a mala rkano a so miyangndao rkano ko balik mata. Na mataan a katokawan iyo dn. Mataan a pamotolan ko dn so manga lima niyo go so manga ai niyo sa di magonod, go mataan a solaan ko skano dn langon!"

50

Pitharo iran: "A di rkami phakamorala so pkitmo rkami a pd ko siksa sa donya. Mataan! a skami na sii bo ko Kadnan ami phamakandod!"

51

"Mataan! a skami na maiinam ami a kanapiya rkami o Kadnan ami ko manga sala ami, sa kiyabaloy ami a paganay ko miyamaratiyaya!"

52

Na iniilaham Ami ko Mosa a: "Panglmn ka so manga oripn ko; mataan! a skano na phanalokonan kano (iran)."

53

Na siyogoan o Pir'awn so manga bandar a ingd sa kalimod iran,

54

(Sa gii niyan tharoon:) "Mataan! a siran aya na titho a pagtaw a manga iito,"

55

"Go mataan! a siran na titho tano iran a piyakanggani;"

56

"Go mataan! a sktano na langon tano dn makaiiktiyar."

57

Na piyakaawa Ami siran ko manga pamomolan, go so manga bowalan,

58

Go so manga kakawasaan: Go so darpa a mapiya;

59

Lagid oto, na piyakipangowarisan Ami oto ko manga moriyataw o Israil.

60

Na pithalokonan iran siran ko kiyasbangi kiran o alongan.

61

Na kagiya a makambantaya so dowa a madakl, na pitharo o manga pd o Mosa a: "Mataan! a sktano na praotn tano dn."

62

Pitharo (o Mosa): "Kna pn nai, mataan! a babid akn so Kadnan ko! na thoroon ako Niyan!"

63

Na iniilaham Ami ko Mosa a: "Bntoln ka so badas ka ko kalodan (na inibntol iyan on). Na miyasray, na mimbaloy so oman i sasray a lagid o palaw a mala."

64

Na piyakasipg Ami roo so manga salakaw (kiran).

65

Na siyabt Ami so Mosa ago so manga pd iyan, sa langon siran;

66

Oriyan iyan na inld Ami so manga salakaw (kiran).

67

Mataan! a adn a matatago roo man a titho a tanda: Na da mabaloy so kadaklan kiran a khipaparatiyaya.

68

Na mataan! a so Kadnan ka na Skaniyan dn i Mabagr, a Makalimoon.

69

Na batiyaang ka kiran so totholan ko Ibrahim.

70

Gowani na pitharo iyan ki ama iyan go so pagtaw niyan: "Antonaa i pzimbaan niyo?"

71

Pitharo iran a: "Pzimba kami sa manga barahala, na gii ami mbabasaalongan an a kapzimba ami ron."

72

Pitharo iyan a: "Ino pkhan'g kano iran ko masa a kapphanongganoya niyo (kiran),"

73

"O di na khapiyaan kano iran, odi na khabinasaan kano iran?"

74

Pitharo iran a: "Kna, ka miyatoon ami so manga loks ami a lagid oto a gi iran nggolawlaan."

75

Pitharo iyan: "Ay gda iyo ko skano na pzimbaan iyo,"

76

"Skano go so manga loks iyo a miyangaoona?"

77

"Na mataan! a siran na ridoay akn, inonta so Kadnan o manga kaadn;

78

"A so miyadn rakn, go Skaniyan i pnggonanao rakn;

79

"Go Skaniyan i pphakakan rakn, go pphakaynom rakn,

80

"Go igira a miyasakit ako, na Skaniyan i pphakapiya rakn;

81

"Go Skaniyan i phakapatay rakn, oriyan iyan na pagoyagn ako Niyan;

82

"Go Skaniyan i phangangarapanan ko, sa napi Niyan rakn so kasalaan ko ko gawii a kapamalas.

83

"Kadnan ko, bgi akong ka sa ongangn, go tapiin akong Ka ko manga bilangataw;

84

"Go snggay akong ka sa bantogan a mapiya sii ko phangaoori;

85

"Go baloya kong ka a pd ko manga waris ko sorga a pakalma;

86

"Go napiing Ka si ama, mataan! a skaniyan na miyabaloy a pd ko miyangadadadag;

87

"Go di akong Ka phakarondana ko gawii a kawyag a kiran (ko alongan a qiyamah);

88

"Gawii a di phakanggay a gona so tamok, go so manga wata,

89

"Inonta so taw a minitalingoma niyan ko Allah so poso a linang;

90

"Na ipakarani so sorga ko miyamananggila,

91

"Go pakisandngan so naraka Jahim ko miyangadadadag;

92

"Go tharoon kiran: Anda so skano na pzimbaan iyo,

93

"A salakaw ko Allah? Ino khatabangan kano iran, odi na khatabangan iran a ginawa iran?'

94

"Na panalimpatoon siran roo, - siran ago so miyangadadadag,

95

"Go so pagtaw o iblis sa kasamasama iran.

96

"Tharoon iran a siran na gii siran roo zasawala:

97

"Ibt ko Allah, ka mataan a miyatago kami dn ko kadadag a mapayag,

98

"Gowani a irimbang ami skano ko Kadnan o manga kaadn;

99

"Na da a miyakadadag rkami a rowar ko manga rarata i ongar.

100

"Na da a bagian ami a phamakaogop,

101

"Go da a bolayoka a gomagt sa ginawa (ko masosowa ami).

102

"Na o mataan! a adn a kapakakasoy ami (sa doniya), na mabaloy kami a pd ko miyamaratiyaya!"

103

Mataan! a adn a matatago roo man a titho a tanda, na da mabaloy so kadaklan kiran a khipaparatiyaya.

104

Na mataan! a so Kadnan ka na Skaniyan dn so Mabagr, a Makalimoon.

105

Piyakambokhag o pagtaw o Noh so manga sogo.

106

"Gowani na pitharo kiran o pagari ran a Noh: Ino kano di phananggila?

107

"Mataan! a sakn na sogo rkano a kasasanaan:

108

"Na kalkn iyo so Allah, go onoti ako niyo.

109

"Na da a phangnin ko rkano saya a balas: da a balas rakn inonta sii ko Kadnan o manga kaadn:

110

"Na kalkn iyo so Allah, go onoti ako niyo."

111

Pitharo iran: Ino ami ska pharatiyayaa, a aya phagonot rka na so tanto a manga bababa?

112

Pitharo iyan a: "Da ko katao akn so nganin a siran na gi iran nggolawlaan,"

113

"So itongan kiran na sii bo ko Kadnan ko, o katawi niyo.

114

"Na kna a ba rakn pakiphamogawn so miyamaratiyaya.

115

"Sakn na matag ako pphamakaiktiyar a mapayag."

116

Pitharo iran a: "Mataan! a o ding ka gnki, hay Noh! na mataan a khabaloy ka dn a pd ko praradiyamn."

117

Pitharo iyan: "Kadnan ko, mataan! a so pagtaw akn na piyakambokhag ako iran.

118

"Na kokoma kong Ka ago siran sa kokoman (a ontol), go sabt akong Ka ago so manga pd akn a miyamaratiyaya."

119

Na siyabt Ami skaniyan ago so manga pd iyan, ko kapal a mappno.

120

Oriyan iyan na inld Ami ko kiyaipos oto so miyangalalamba.

121

Mataan! a adn a matatago roo man a titho a tanda: Na da mabaloy so kadaklan kiran a khipaparatiyaya.

122

Na mataan! a so Kadnan ka na Skaniyan dn so Mabagr, a Makalimoon.

123

Piyakambokhag o (pagtaw a) Ad so manga sogo.

124

Gowani na pitharo kiran o pagari ran a Hod: "Ino kano di phananggila?"

125

"Mataan! a sakn na sogo rkano a kasasarigan:

126

"Na kalkn iyo so Allah go onoti ako niyo.

127

"Go da a phangning ko rkano saya a balas: da a balas rakn inonta so sii ko Kadnan o manga kaadn.

128

"Ino kano gii mbabalay ko oman i darpa a maporo sa toos a karimbaran niyo?

129

"Go pphangmbaal kano sa manga torogan, ka ang kano makakal:

130

"Go igira a minggolima kano, na minggolima kano a khipammndg:

131

"Na kalkn iyo so Allah, go onoti ako niyo.

132

"Na kalkn iyo so (Allah a) migay rkano ko nganin a katawan iyo;

133

"Migay rkano ko manga ayam go manga wata,

134

"Go manga pamomolan go manga bowalan.

135

"Mataan! a sakn na ikhawan akn skano ko siksa ko gawii a mala."

136

Pitharo iran: "Magizan rkami o ino miyangthoma ka antawaa da ka mabaloy a pd ko manga pangngthoma!

137

"Da ko ngkaya inonta na parangay o miyangaoona,

138

"Na kna a ba kami phangasisiksa!"

139

Na piyakambokhag iran skaniyan, na bininasa Mi siran. Mataan! a adn a matatago roo man a titho a tanda: Na da mabaloy so kadaklan kiran a khipaparatiyaya.

140

Mataan! a so Kadnan ka na Skaniyan dn so Mabagr, a Makalimoon.

141

Piyakambokhag o (pagtaw a) Samod so manga sogo.

142

Gowani na pitharo kiran o pagari ran a Salih: "Ino kano di phananggila?"

143

"Mataan! a sakn na sogo rkano a kasasanaan.

144

"Na kalkn iyo so Allah, go onoti ako niyo.

145

"Na da a phangnin ko rkano saya a balas: da a balas rakn inonta so sii ko Kadnan o manga kaadn.

146

"Ba kano khibagak, sii ko nganin a matatago sii, a khisasarig kano?

147

"Sii ko manga pamomolan go manga bowalan,

148

"Go manga prpran, go manga korma a so onga niyan na kiya lotoan?

149

"Go pphamso kano ko manga palaw sa manga walay, a pkhababaya kano.

150

"Na kalkn iyo so Allah, go onoti ako niyo;

151

"Na di niyo pagonoti so sogoan o manga malawani,

152

"A siran na pphaminasa siran ko lopa, go di siran phangompiya."

153

Pitharo iran a: "Ska na pd dn ko khitataraponan!

154

"Kna a ba ka di manosiya a lagid ami: Na bgay ka sa tanda, o ska na pd ko manga bnar!"

155

Pitharo iyan a: "Katii so onta a adn a kipantag iyan ko kaynom, go adn a kipantag iyo ko kaynom, ko gawii a mappnto.

156

"Na di niyo zogata skaniyan a marata, ka madansal kano a siksa ko gawii a mala."

157

Na biyono iran oto: Na miyabaloy siran a miyamakazndit.

158

Na miyadansal siran o siksa. Mataan! a adn a madadalm roo man a titho a tanda: Na da mabaloy so kadaklan kiran a khipaparatiyaya.

159

Na mataan! a so Kadnan ka na Skaniyan dn so Mabagr, a Makalimoon.

160

Piyakambokhag o pagtaw o Lot so manga sogo.

161

Gowani na pitharo kiran o pagari ran a Lot: "Ino kano di phananggila?"

162

"Mataan! a sakn na sogo rkano a kasasanaan.

163

"Na kalkn iyo so Allah, go onoti ako niyo.

164

"Na da a phangnin ko rkano saya a balas: da a balas rakn inonta so sii ko Kadnan o manga kaadn.

165

"Ino niyo pphangabaya i so manga mama ko manga kaadn,

166

"Na pngganatan iyo so inadn rkano o Kadnan iyo a manga karoma niyo? Kna, ka skano na pagtaw a manga malawani!"

167

Pitharo iran a: "Mataan a o ding ka gnki, hay Lot! na mataan a khabaloy ka dn a pd ko piyamakaawa!."

168

Pitharo iyan a: "Mataan! a sakn na pd ko pkhakararangit ko galbk iyo."

169

"Kadnan ko, sabt akong Ka ago so taalok rakn, phoon ko gi iran nggolawlaan!"

170

Na siyabt Ami skaniyan ago so taalok on a kasamasama iran,

171

Inonta so loks (a karoma niyan) ka minitapi ko miyangakakakal ko siksa.

172

Oriyan iyan na piyolang Ami so manga salakaw (kiran).

173

Go piyakaoranan Ami siran sa oran (a ator): Na miyakaratarata a inioran ko piyamakaiktiyar (a da dn paratiyaya)!

174

Mataan! a adn a matatago roo man a titho a tanda: Na da mabaloy so kadaklan kiran a khipaparatiyaya.

175

Na mataan! a so Kadnan ka na Skaniyan dn so Mabagr, a Makalimoon.

176

Piyakambokhag o manga taw sa Aykah so manga sogo.

177

Gowani na pitharo kiran o Shoayb: "Ino kano di phananggila?"

178

"Mataan! a sakn na sogo rkano a kasasanaan.

179

"Na kalkn iyo so Allah, go onoti ako niyo.

180

"Na da a phangnin ko rkano saya a balas: da a balas rakn inonta so sii ko Kadnan o manga kaadn.

181

"Tarotopa niyo so kapagasad, na oba kano mabaloy a pd ko pphamangorang.

182

"Na thimbang kano ko timbangan a makaoontol;

183

"Go da a khoranga niyo ko manga manosiya ko nganinganin iran, go di kano phangalandada ko lopa, a pphamaminasa kano;

184

"Go kalkn iyo so (Allah a) miyadn rkano, go (miyadn ko) manga kaadn a miyangaoona."

185

Pitharo iran a: "Ska na pd dn ko khitataraponan!

186

"Na kna a ba ka di manosiya a lagid ami, na mataan! a arangan ami rka na pd dn ko manga bokhag!

187

"Na ologi kaming ka sa pisagintasan ko siksa ko langit, o ska na pd ko manga bnar!"

188

Pitharo iyan a: "So Kadnan ko i Matao ko gii niyo nggolawlaan."

189

Na piyakambokhag iran skaniyan. Na miyadansal siran o siksa ko alongan a kinilalansay o gabon. Mataan aya! a miyabaloy a siksa ko alongan a mala.

190

Mataan! a adn a matatago roo man a titho a tanda: Na da mabaloy so kadaklan kiran a khipaparatiyaya.

191

Na mataan! a so Kadnan ka na skaniyan dn so Mabagr, a Makalimoon.

192

Na mataan a giya Qor'an aya! a titho a initoron o Kadnan o manga kaadn:

193

Initoron aya o Niyawa a Kasasarigan (a so Jibril),

194

Sii ko poso o ka (hay Mohammad), ka ang ka mabaloy a pd ko miyamakaiktiyar,

195

Sa basa Arab a mapayag.

196

Na mataan aya! a titho a madadalm ko manga kitab a miyangaoona.

197

Ba da a miyaadn kiran a tanda a katawan skaniyan o manga olama ko manga moriyataw o Israil?

198

Na o initoron Ami skaniyan ko sabaad ko kna a ba manga Arab,

199

Na go niyan kiran oto biyatiya, na di iran oto pharatiyayaan.

200

Lagid aya a kiyapakasold Ami ron ko manga poso o manga rarata i ongar.

201

Di iran oto pharatiyayaan taman sa di iran kasandngan so siksa a malipds;

202

Na makatalingoma kiran (so siksa) sa mitalmba, a siran na di iran maiin'ngka;

203

Na matharo iran: "Ino sktano khataalik rktano?"

204

(Pitharo o Allah:) Ino a so siksa Ami na pphangnin iran a kagaan iyan?

205

Ay gdaa ka? Amay ka pakasawitn Ami siran ko kapipiya a ginawa sa phipira ragon,

206

Oriyan iyan na makawma kiran so inidiyandi kiran (a siksa)!

207

Na di kiran makalinding so piyakisawitan kiran a kapipiya ginawa!

208

Na da a bininasa Mi a phagingd, a ba da a miyamakaiktiyar on,

209

Pananadm; na kna a ba Kami manga salimbot.

210

Go kna a ba initoron skaniyan o manga shaytan:

211

Go di kiran patot, go di iran khagaga.

212

Mataan! a siran na so kapamamakin'g (ko langit) na piyakignkan kiran dn.

213

Na di ka phanongganoy sa pd o Allah, a tohan a salakaw ka mabaloy ka a pd ko phangasisiksa.

214

Na pakaiktiyarang ka so manga tonganaing ka, a manga dadasg,

215

Go pakainayang ka so gowagowaing ka ko taw a miyonot rka, a pd ko miyamaratiyaya.

216

Na amay ka sorangng ka iran, na tharoang ka a: "Mataan! a sakn na angiyas ako ko gii niyo nggolawlaan!"

217

Go panarig ka ko (Allah a) Mabagr, a Makalimoon,

218

A so Pphakaylay rka ko masa a kapthindg ka,

219

Go so kapphagkaskas ka a rakhs o pphamanojiod.

220

Mataan aya! a Skaniyan so Pphakan'g, a Matao.

221

Ba ko rkano phanothola, so taw a pthpadan o manga shaytan?

222

Pthpad ko oman i bokhag, a baradosa,

223

A tatandangan iran sa pamamakin'gan (so manga shaytan), na so kadaklan kiran na manga bokhag.

224

Na so manga pababayok, na phagonotan siran o miyangadadadag:.

225

Bang ka da maylay a mataan! a siran na pphromparompak siran ko oman i laboay?

226

Go mataan a siran na gi iran tharoon so di iran pnggolawlaan,

227

Tabiya on so miyamaratiyaya, go pinggalbk iran so manga pipiya, go tiyadman iran so Allah sa madakl, go siyabt iran a ginawa iran ko oriyan o kiyasalimboti kiran; na katokawan dn o siran a manga salimbot o antonaa darpa i khandodan iran!

Total Number of Verses: 93

1

Ta, Sin. (so Allah i Matao ko paka-aantapan Iyan on). Giyaya man na manga ayat ko Qor'an, - go kitab a miyakaosay.

2

Toroan, go tothol a mapiya a bagian o miyamaratiyaya,

3

Siran na ipphamayandg iran so sambayang go pthonayn iran so zakat, go siran na so akhirat na tatangkdn iran.

4

Mataan! a siran a di mapaparatiyaya ko akhirat, na pipharasan Ami kiran so manga galbk iran; na siran na pphromparompak siran.

5

Siran man so mapmbagian iran so marata a siksa: Go siran sii ko akhirat na siran i titho a manga logi.

6

Na mataan! a ska (hay Mohammad) i titho a pphaladan ko Qor'an a phoon ko hadapan o Allah a Mawngangn, a Matao.

7

(Tadming ka) Gowani na pitharo o Mosa ko taalok on a: "Mataan! a sakn na miyakaylay sa apoy; na kabgan ko skano ron sa tothol, odi na kabgan ko skano sa masindaw a barabad, ka ang kano makathitirarang."

8

Na kagiya a makawma on, na minitawag on: "Piyakambarakat so taw a matatago ko apoy go so taw a makalilibt on: Na Soti so Allah, a Kadnan o manga kaadn."

9

"Hay Mosa, mataan aya! a Sakn so Allah, a Mabagr, a Mawngangn!"

10

"Na ithogn ka so badas ka!" (na iniithog iyan). Na kagiya a maylay niyan skaniyan a gii kaokhaog lagid o skaniyan na nipay a magaan i kadola, na miyakatingr a tomiyalikhod, go da dingil, (pitharo o Allah:) "Hay Mosa, di ka khalk: Mataan! a Sakn na di khalk ko hadapan ko so manga sogo,"

11

"Ogaid na so taw a miyakasalimbot, oriyan iyan na somiyambi sa mapiya ko oriyan o marata, na mataan! a Sakn na Manapi, a Makalimoon.

12

"Na soldn ka a limang ka ko lig o bangkala aka, ka an ka mapakaliyo a masindaw a knaa ba sakit: Pd ko siyaw a manga tanda a pagowitn ko Pir'awn go so pagtaw niyan: Mataan! a siran na miyabaloy siran a pagtaw manga songklid."

13

Na kagiya a makawma kiran so manga tanda Ami, a marayag, na pitharo iran a: "Giyaya na balik mata a mapayag!"

14

Na siyangka iran oto, oba di tiyangkd oto o manga ginawa iran, sa kapanalimbot go kaphaporo; na pamimikiranang ka o antonaa i miyambtad o kiya akiran ko miyamaminasa!

15

Na sabnsabnar a bigan Ami so Dawood, go so Solayman sa katao: Na pitharo iran a: "So podi na rk o Allah, so inilbi kami Niyan ko madakl ko manga oripn Iyan a miyamaratiyaya!"

16

Na kiyapangowarisan o Solayman so Dawood. Na pitharo iyan: "Hay manga manosiya, piyakisabotan rkami so katharo o manga papanok, go bigan kami ko langowan taman: Mataan! a giyaya na skaniyan dn so limo a mapayag."

17

Na linimod ko Solayman so manga tantara iyan, a manga jinn go manga manosiya, go manga papanok, na siran na pakapphnanayawaan siran.

18

Taman sa kagiya makatalingoma siran ko balintad o manga pila, na pitharo o (dato a) pila: "Hay manga pila, sold kano ko manga darpa iyo, di kano phakiropt ko Solayman go so manga tantara iyan a siran na di iran maiin'ng ka."

19

Na miyakang gmnggmn (so Solayman), a makakhakala phoon ko katharo (o pila); go miyatharo iyan: "Kadnan ko, ilahamn Ka rakn so kapakapanalamat akn ko limoo Ka, a so inipangalimoo Ka rakn ago so mbala a loks akn, go so kapakang galbk akn sa mapiya a masoat Ka on: Go pakasold akong Ka (ko sorga), sabap ko limoo Ka, a pd ko manga oripn Ka a manga bilangataw."

20

Na piyariksa iyan so manga papanok; na miyatharo iyan a: "Ino a di akn khaylay so (papanok a) Hodhod? Ba miyabaloy a pd ko miyamangigaib?"

21

"Mataan a siksaan ko dn skaniyan sa siksa a sangat, odi na mataan a sombaliin ko dn skaniyan, odi na mataan a kabgan ako niyan sa karina a mapayag."

22

Na miyakatarg sa da mathay; na miyatharo (o Hodhod) a: "Miyaszb akn so dang ka maszb skaniyan, go minitalingoma ko rka phoon sa Saba so tothol a matatangkd."

23

"Mataan! a sakn na miyatoon ko a babay a kandadatoan iyan siran, go kiyabgan ko langowan taman, go adn a kantir iyan a mala."

24

"Miyatoon ko skaniyan ago so pagtaw niyan a pzodiodan iran so alongan a salakaw ko Allah: Go phipharasan kiran o shaytan so manga galbk iran, na kiyaalangan iyan siran ko lalan (a ontol), na siran na di siran makaoontol,"

25

"Sa di iran kazodiod ko Allah, a so pphakagmaw ko masoln ko manga langit go so lopa, go Matao ko pag-umaan iyo go so papayagn iyo."

26

"So Allah! - da a tohan inonta Skaniyan! - a Kadnan o arash a mala!"

27

Pitharo (o Solayman) a: "Ilayn ta dn o ino bnar ka, antawaa miyabaloy ka a pd ko manga bokhag!"

28

"Lalakawn ka a sorat akn nai, na sampain ka ya kiran: Oriyan iyan na awatang ka siran, na ilayang ka o antonaa i phakakasowin iran (a smbag)."

29

Pitharo (o bai sa Saba) a: "Hay manga nakoda, mataan! a sakn na minisampay rakn a sorat a pagaadatan."

30

"Mataan aya! a phoon ko Solayman, go mataan aya! (a misosorat on) a: Sii ko ngaran o Allah, a Masalinggagaw, a Makalimoon:"

31

"Di ako niyo pphaporoi, go song kano rakn a mbabayorantang kano."

32

Pitharo iyan a: "Hay manga nakoda, mosawiri ako niyo sa pnggolawlaang ko: da a pagimasadng ko a pnggolawlaan taman sa di kano makamasa."

33

Pitharo iran a: "Sktano i khipakatatangan ko bagr, go khipakatatangan ko guus ko kambonoay a mala: Na so kapanonogo na sii rka; na phandapating ka o antonaa i izogoo ka."

34

Pitharo iyan a: "Mataan! a so manga dato, na igira a somiyold siran ko ingd, na pmbinasaan iran oto, go pmbalowin iran so manga ala i pangkatan ko taw ron a pphamakarondan, na lagid oto a gi iran ngolawlaan."

35

"Na mataan! a sakn na phakiwitan ko siran sa pammgayan, ka pagilaing ko o antonaa i mipmbalingan o manga sogo."

36

Na kagiya a makawma ko Solayman (so sogo iyan), na pitharo (o Solayman) a: "Ino ako niyo mbgi sa tamok? A so inibgay rakn o Allah na tomo a di so inibgay niyan rkano! Kna, ka skano na so pammgayan iyo na pkhababayaan niyo!"

37

"Kasowin ka kiran, ka mataan a khitalingoma mi kiran dn so manga tantara a da a kaphakaato iran on: Go mataan a mbogawn ami siran dn roo a khipakarorondan, a siran na khipakadadapanas."

38

Pitharo iyan: "Hay manga nakoda! antawaa rkano i makawit rakn ko kantir iyan ko da iran rakn pn kapakatalingoma, a mbabayorantang siran?"

39

Pitharo o Ifrit, a pd ko manga jinn a: "Sakn i makawit rka on ko ding ka pn kapakaganat ko darpa aka: Na mataan! a sakn ko makapantag on na titho a mabagr, a kasasanaan."

40

Pitharo o (Ashif Ibno Barkiya a) adn a zisii rkaniyan a katao ko kitab a: "Sakn i makawit rka on sa di pn makandod sii rka so kaylaing ka!" Na kagiya a maylay niyan a makabbkn ko obay niyan, na miyatharo iyan a: "Giyai na pd ko limo o Kadnan ko! - ka ithpng iyan rakn o ino phanalamat ako antawaa magongkir ako. Na sadn sa manalamat, na mataan! a so kapphanalamat iyan na bagian o ginawa niyan; na sadn sa mongkir, na mataan! a so Kadnan ko na Kawasa, a Maginawa!"

41

Pitharo iyan a: "Barngkasa niyo ron so kantir iyan, ka ilayn tano o ino khakilala niyan, antawaa mabaloy a pd ko siran a di ron phamakakilala."

42

Na kagiya a makawma (so bai sa Saba), na adn a mitharo: "Ba lagidai so kantir ka?" Pitharo iyan a: "Lagid oba skaniyan; na inibgay rkami so katao ko onaan aya, go miyabaloy kami a mimbabayorantang."

43

Na kiyaalangan skaniyan, (ko paratiyaya ko Allah) o miyabaloy a pzimbaan iyan a salakaw ko Allah: Ka mataan! a skaniyan na miyabaloy a pd ko pagtaw a manga kafir.

44

Pitharo on: "Sold ka ko astana": Na kagiya maylay niyan oto, na tiyarima iyan oto sa mala a ig, na kiyasawaan iyan so mbala a pamosoan iyan. Pitharo (on o Solayman) a: "Mataan aya! a astana a matilak a pagalongan. Pitharo iyan a: "Kadnan ko, mataan! a sakn na kiyasalimbotan ko a ginawa ko: Na mimbayorantang ako a pd o Solayman ko Allah, a Kadnan o manga kaadn."

45

Na sabnsabnar a siyogo Ami ko (pagtaw a) Samod, so pagari ran a Salih, sa "Simbaa niyo so Allah": Na samawto, na siran na miyadowa siran lompok a gii siran zasawala.

46

Pitharo iyan: "Hay pagtaw akn, ino niyo phagalokaloki so marata ko da pn so mapiya? Ino kano di phangni sa maap ko Allah, ka ang kano mipangalimo."

47

Pitharo iran a: "Kiyazoknaan kami sa marata sa sabap rka, go sabap ko manga pd ka". Pitharo iyan a: "So sokna iyo a marata na sii ko Allah; kna, ka skano na pagtaw a phphaniyobaan."

48

Na adn a matatago ko bandar a ingd a siyaw kataw a pphamaminasa siran ko lopa, go di siran phangompiya.

49

Pitharo iran a: "Zasapai kano sa ibt ko Allah ka mataan a slmn tano dn skaniyan go so taalok on, oriyan iyan na tharoon tano dn ko wali ron a: 'Da tano kamasai a kiyapolang o taalok on, go mataan! a sktano na titho a manga bnar'."

50

Na miyagikmat siran sa samporna a ikmat, go miyagikmat Kami sa samporna a ikmat, a siran na di iran maiin'ngka.

51

Na nggdagdaang ka o antonaa i miyambtad o kiya akiran ko ikmat iran! - mataan! a Skami na piyolang Ami siran go so pagtaw iran, sa langon siran.,

52

Na giyoto man so manga walay ran, - a miyangaggba, - sabap ko kiyandarowaka iran mataan! a adn a matatago roo man a titho a tanda ko pagtaw a manga tatao.

53

Na siyabt Ami so miyamaratiyaya, go mimbaloy siran a khipanananggila.

54

Na (aloyang ka) so Lot gowani na pitharo iyan ko pagtaw niyan a: "Ino niyo gii nggolawlaa so pakasisingay, a skano na pkhaylay niyo (a marata)?"

55

Ino a mataan! a skano na ipthalingoma niyo ko manga mama so kababaya a salakaw ko manga babay? Kna, ka skano na pagtaw a da a manga mlng iyo!

Part 20

56

Na da a miyabaloy a smbag o pagtaw niyan a rowar sa kiyatharoa iran sa: "Pakaawaa niyo so manga taalok ko Lot ko ingd iyo: Mataan siran! a manga taw a pzosoti!"

57

Na siyabt Ami skaniyan go so taalok on, inonta so karoma niyan: Ka inokor Ami skaniyan a pd ko mithatalimbagak.

58

Na piyakawranan Ami siran sa oran (a ator): Na miyakaratarata a inioran ko piyamakaiktiyar (a da siran dn paratiyaya)!

59

Tharoang ka a: So podi na rk o Allah, go kalilintad a sii ko manga oripn Iyan a pinili Iyan. Ino so Allah aya lbi a mapiya, antawaa so ipphanakoto iran?

60

Ba (di aya lbi a mapiya) so miyadn ko manga langit ago so lopa, go piyakatoron an kano Niyan phoon ko kawang sa ig? Na piyakatho Ami sa sabap rkaniyan so manga sapad a manga pipiya i paras: Na da a miyabaloy a kapaar iyo ko kapakathoa niyo ko kayo niyan. Ba adn a tohan a pd o Allah? Kna, ka siran na pagtaw a phrimbangn iran (so Allah).

61

Ba (di aya lbi a mapiya) so biyaloy Niyan so lopa a thatakna; go tiyagoan Iyan so pagltltan iyan sa manga lawasayg; go tiyagoan Iyan sa manga palaw; go tiyagoan Iyan so pagltan a dowa kalodan sa lt? Ba adn a tohan a pd o Allah? Kna, ka so kadaklan kiran na di iran katawan.

62

Ba (di aya lbi a mapiya) so pzmbag ko karrgnan, igira a miyangni Ron, go pphokas ko marata, go pmbaloy rkano a pphamakasambi ko lopa? Ba adn a tohan a pd o Allah? Miyakaytoito a kapphakatadm iyo!

63

Ba (di aya lbi a mapiya) so gii rkano ngonanao ko manga lilibotng ko kalopaan go so kalodan, go so pmbotawan rkano ko manga ndo a pphamalata ko anaan o limo Iyan? Ba adn a tohan a pd o Allah? Maporo so Allah a ka-aawat Iyan ko ipphamanakoto iran (Non)!

64

Ba (di aya lbi a mapiya) so pphanagipoon ko kapangadn, oriyan iyan (ko kapatay), na khasowin Iyan (madn so miyamatay), go pphagpr rkano ko phoon ko kawang ago so lopa? Ba adn a tohan a pd o Allah? Tharoang ka a: "Bgan iyo i karina niyo, a skano i manga bnar!"

65

Tharoang ka a: Da a matao a taw a matatago ko manga langit go so lopa, ko migagaib a inonta so Allah: Go di iran maiin'ngka o anday kapagoyaga kiran.

66

Ba riyaot a katao iran so akhirat? Kna, ka siran na pkhadowandowaan siran on, kna, ka siran na miyangabobota siran on!

67

Na pitharo o siran a miyamangongkir a: "Ino amay ka mbaloy kami a botha, ago so manga loks ami, ba mataan! a skami na phamakagmawn dn (ko manga kobor)?"

68

"Sabnsabnar a minidiyandi rktano aya, - sktano go so manga loks tano gowani: Da ko ngkaya inonta na manga iringa a kabokhag o miyangaoona."

69

Tharoang ka: "Lalakaw kano ko lopa na phapandapati niyo so miyambtad o kiya akiran ko manga rarata i ongar."

70

Go ding ka siran pmboko on, go di nggagtn a rarb ka so ikmat iran.

71

Na gi iran tharoon a: "Anda dn angkai a diyandi (a kaphakatalingoma o siksa) o skano i manga bnar?"

72

Tharoang ka a: "Matatangkd a khabaloy a marani rkano so sabaad ko pphagalokalokan iyo (a siksa)!"

73

Na mataan! a so Kadnan ka i titho a Malai-gagaw ko manga manosiya: Na ogaid na so kadaklan kiran na di siran phanalamat.

74

Na mataan! a so Kadnan ka na katawan Iyan dn so pag-umaan o manga rarb iran, go so papayagn iran.

75

Go da a migagaib, ko langit ago so lopa, a ba di matatago ko (Laoh Mahfod a) daptar a mapayag.

76

Mataan! a giyang kaya a Qor'an na pphanotholn iyan ko manga moriyataw o Israil so kadaklan ko siran na di siran on phagayonayon.

77

Na mataan aya! a titho a toroan go limo ko miyamaratiyaya.

78

Mataan! a so Kadnan ka na ikhokom Iyan kiran so kokoman Iyan: Go Skaniyan so Domadaag, a Matao.

79

Na sariging ka so Allah, mataan! a ska na sii ko bnar, a mapayag.

80

Mataan! a ska na ding ka maphakin'g ko miyamatay, go ding ka maphakin'g ko manga bngl so pananawag igira a tominingr siran a khitatalikhod.

81

Na da rka i bang ka manggonanao so manga bota, sa kapokas ko kadadadag iran: da a maphakan'g ka a rowar ko taw a mapaparatiyaya ko manga ayat Ami, na siran i mimbabayorantang.

82

Na amay ka makatana kiran so katharo, na pakagmawan Ami siran sa binatang ko lopa: Sa imbitiyarai niyan siran, sa mataan! a so manga manosiya na miyabaloy siran a so manga ayat Ami na di iran tatangkdn.

83

Na sii ko gawii a timo on Ami phoon ko oman i pagtaw so isa ka sagorompong a pd ko taw a gii niyan pakambokhagn so manga ayat Ami, na siran na pakaphpnanayawaan siran,

84

Taman sa amay ka makawma siran (ko Allah), na tharoon Iyan: "Ino niyo pakapmbokhaga so manga ayat Akn, go da niyo to szba a katao, ino antonaa so pinggolawla niyo?"

85

Na makatana kiran so katharo, sabap ko kiyandarowaka iran, na siran na di siran maka ptharo.

86

Ba iran da manggdagda a mataan! a Skami na biyaloy Ami so gagawii ka an siran on pphakadkha, go so dawndaw a mipphangilaylay? Mataan! a adn a matatago roo man a titho a manga tanda ko pagtaw a khipaparatiyaya!

87

Na sii ko gawii a kaiyopa ko sanggakala, na kalkan so matatago ko manga langit, go so matatago ko lopa, inonta so kabaya o Allah: Na oman iisa na makatalingoma siran Rkaniyan a khipakapangangalimbabaan.

88

Na maylaing ka so manga palaw, a aya tarima aka on na thatakna; a (o ba di) skaniyan na somasagmbt sa (lagid o) kasasagmbt o gabon: Galbk o Allah, a so mimbaibait ko langowan taman: Mataan! a Skaniyan i Kaip ko gii niyo nggolawlaan.

89

Sa taw a mitalingoma niyan so mapiya, na adn a bagian iyan a mapiya a di skaniyan; go siran ko pakalklk sa alongan oto na khisasarig siran.

90

Na sa taw a mitalingoma niyan so marata, na phozangn so manga paras iran ko naraka (tharoon kiran:) "Ba adn a imbalas rkano a rowar ko pinggolawla niyo?"

91

(Tharoang ka:) Aya bo a inisogo rakn na so kasimbaa ko ko Kadnan angkai a ingd, a so piyakipagadatan Iyan skaniyan, go rk Iyan so langowan taman: Go inisogo rakn a mabaloy ako a pd ko mimbabayorantang, -

92

Go so kapphangadii ko ko Qor'an: Na sa taw a montol, na phakaontol sa rk bo o ginawa niyan; na sa taw a somilay, na tharoang ka a: "Sakn na matag ako pd ko pphamakaiktiyar."

93

Go tharoang ka a: "So bantogan na rk o Allah, phakiilay Niyan rkano so manga tanda Iyan, na khakilala niyo to; na da ko Kadnan ka i ba Niyan kalilipati so gii niyo nggolawlaan."

Total Number of Verses: 88

1

Ta, Sin, Mim. (so Allah i Matao ko paka-aantapan Iyan on).

2

Giyaya na manga ayat ko kitab a miyakawsay.

3

Pmbatiyaan Ami rka so sabaad ko totholan ko Mosa, go so Pir'awn sii ko bnar, a bagian o pagtaw a khipaparatiyaya.

4

Mataan! a so Pir'awn na miphaporo ko lopa, go biyaloy niyan so taw ron a miyambaabaad, pangangarasiyan iyan so sabaad kiran: Pphanombaliin iyan so manga wata iran a manga mama, na phlambaan iyan so manga babay kiran: Mataan! a skaniyan na miyabaloy a pd ko pphamaminasa.

5

Na kabaya Ami a ikalimo Ami so siran a piyamangarasiyan ko lopa, go balowin Ami siran a pkhakawnotan, go balowin Ami siran a manga waris,

6

Go pakakhapaarn Ami siran ko lopa, go pakiilay Ami ko Pir'awn, go so Haman, go so tantara iran a dowa, a phoon kiran, so siran na ipkhalk iran.

7

Na iniilaham Ami ko (Yohanid a) ina o Mosa a: "Pakasosowang ka skaniyan, na o bang ka khalkn sa ba kamaratai skaniyan, na anodang ka skaniyan ko kalodan (a Nayl), go di ka pkhalk, go di ka mboboko: Mataan! a Skami na phakandodn Ami skaniyan sii rka, go mbalowin Ami skaniyan a pd ko manga rasol."

8

Na miyatoon skaniyan o manga taalok ko Pir'awn: Ka kagiya a khabaloy ko bagian iran a ridoay go boko: Mataan! a so Pir'awn go so Haman go so manga tantara iran a dowa na miyabaloy siran a manga ribat.

9

Na pitharo o (Asiyah a) karoma o Pir'awn a: "Iphakapiya ginawa, a bagian ko go bagian ka: Di niyo mbonoa skaniyan. Masikn a makaompiya rk ta, odi na kowaan ta skaniyan a wata ta; a siran na di iran maiin'ngka!."

10

Na miyabaloy so poso o ina o Mosa a makakawang: Mataan a mayto bo na khapayag iran dn oto o da Ami tkhsa so poso iyan, ka adn mabaloy a pd ko miyamaratiyaya.

11

Na pitharo iyan ko babay niyan a: "Tondogang ka skaniyan. Na tiyawdan iyan skaniyan sa mawatan; a siran na di iran maiin'ngka."

12

Na inrn Ami skaniyan ko pphamakasoso (ron) sa paganay, na pitharo (o babay niyan) a: "Ino o toroon ko rkano so taw ko isa a walay a tagikorn iran skaniyan rkano, go siran na siyapn iran skaniyan?"

13

Na piyakakasoy Ami skaniyan ki ina iyan, ka adn makapiya a ginawa niyan, go an di makamboboko, go an iyan katokawi a mataan! a so diyandi o Allah na bnar: Na ogaid na so kadaklan kiran na di iran katawan.

14

Na kagiya a isampay ko katarotop o bagr iyan, go mikhasad, na bigan Ami skaniyan sa ongangn, go katao: Na lagid aya man a kambalasi Ami ko miphipiyapiya.

15

Na somiyold ko bandar a ingd sii ko masa a kalilipat o taw ron: Na miyakatoon on sa dowa mama a gii siran mbono, - giya ngkaya (a isa on) na pd ko tampil rkaniyan, go giya ngkaya (a ika dowa) na pd ko ridoay niyan. Na miyangni rkaniyan sa tabang so pd ko tampil rkaniyan sii ko pd ko ridoay niyan, na siyontok skaniyan o Mosa na miyapatay niyan. Pitharo iyan a: "Giyaya na pd ko galbk o shaytan: Mataan! a skaniyan na ridoay a phakadadag, a mapayag!"

16

Pitharo iyan: "Kadnan ko, mataan a sakn na kiyandarowakaang ko a ginawa ko. Na napii akong Ka! Na niyapiyan Iyan skaniyan: Mataan a so Allah! a Skaniyan so Manapi, a Makalimoon."

17

Pitharo iyan: "Kadnan ko, sabap ko kinipangalimoon Ka rakn, na di ako dn mabaloy a tabanga o manga rarata i ongar!"

18

Na kiyapitaan ko bandar a ingd, a maalk, a pakatatanaan iyan (i mapnggolawla niyan), na samawto na so miyakitabang on kagai, na phakitabang on (pman). Pitharo on o Mosa a: "Mataang ka a titho a ribat a mapayag!"

19

Na kagiya a makhadiyat iyan a kaptan iyan so ridoay ran, na pitharo (o phakitabang): "Hay Mosa, bang ka kadiyat a mbono on akong ka lagid o kiyapamonoo ka sa taw kagai? Da a kadiyat ka a rowar sa kabalowing ka a talibono ko lopa, go ding ka kadiyat o ba ka mabaloy a pd ko pphamangompiya!"

20

Na miyakaoma a mama, a phoon ko kilid o bandar a ingd, a gii nggagaan. Pitharo iyan: "Hay Mosa, mataan! a so manga nakoda na pphagopakatan ka iran, ka mbono on ka iran: Na awa ka, mataan! a sakn sa makapantag rka na pd ko pphamangoyaw sa mapiya."

21

Na miyawa roo a pkhalk, a nomanayaw (sa mapnggolawla niyan), pitharo iyan: "Kadnan ko, sabt akong Ka phoon ko pagtaw a manga darowaka."

22

Na kagiya a makasangor sa tampar sa Madyan, na pitharo iyan: "Oba bo so Kadnan ko na nggonanaon ako Niyan ko ontol a lalan."

23

Na kagiya a makawma ko ig sa Madyan, na miyatoon iyan on a madakl a taw a pphamanagb siran, go miyatoon iyan ko kababaan iran a dowa a babay a pphangrnn iran (so manga kambing iran). Pitharo iyan: "Ino kano anan?" Pitharo a dowa oto a: "Di kami phakasagb taman sa di domlas so pphamamagonong (sa kambing): Na so ama Ami na loks a matoa."

24

Na inisagb iyan siran: Oriyan iyan na somiyong ko kasisirongan, na pitharo iyan: "Kadnan ko, mataan! a sakn na apiya antonaa i initoron Ka rakn a pangn'ngkn na makhakadiyat akn!"

25

Na miyakaoma on so isa sa dowa oto (a babay), a pphlalakaw a pkhamamala. Pitharo iyan a: "Mataan! a si ama na thawagn ka niyan ka imbalas iyan rka so balas o kinisagbn ka rkami". Na kagiya a makawma on go piyanothol iyan on so manga tothol (ko miyasowa iyan), na pitharo (o Shoayb): "Di ka pkhalk: Ka miyakalidas ka ko pagtaw a manga darowaka."

26

Pitharo o isa sa dowa oto (a babay): "Hay ama, sokaing ka skaniyan: Mataan! a mapiya a taw a zokayan ka, ka mabagr a kasasarigan."

27

Pitharo (o Shoayb) a: "Mataan! a sakn na kabaya akn a pakiphangaroma ko rka so isa sangkai a dowa a wata akn, sa asar ka nggalbkan ka rakn sa walo ragon; na o tarotopang ka a sapolo (ragon) na phoon sa kabaya aka; ka di ko kabaya iba ko ska pakargni: Khatoon akong ka omiyog so Allah, a pd ko manga bilangataw."

28

Pitharo (o Mosa) a: "Giyanan (i pasad ta) ko lt akn ago so lt ka: Apiya anda ko dowaa taalik i mitoman akn, na di ako ron ka maridowan. Na so Allah sii ko gii ta tharoon i saksi."

29

Na kagiya a matarotop o Mosa so taalik, na lomiyalakaw a pd iyan si karoma niyan, na miyakaylay ko kilid o palaw sa apoy, na pitharo iyan ki karoma niyan: "Targ kano; mataan! a sakn na miyakaylay ako sa apoy; na kalokalo o kawitang ko skano a phoon rkaniyan sa tothol, odi na waga a phoon ko apoy, ka an kano maka thitirarang."

30

Na kagiya a makatalingoma on, na miyatawag ko kilid o balintad sa kawanan, sii ko darpa a piyakambarakat phoon ko kayo: "Hay Mosa, mataan! a Sakn na Sakn so Allah, a Kadnan o manga kaadn."

31

"Na ithogn ka so badas ka" (na iniithog iyan)! Na kagiya a maylay niyan a gii khaokaog lagid oba skaniyan nipay, na tominingr a pphalagoy, go da kasoy: (na miyatawag:) "Hay Mosa, sangor ka, go di ka khalk: Mataan! a ska na pd ko khipakasasarig."

32

"Soldn ka a limang ka ko lig o bangkala aka, ka an ka mapakaliyo a sindaw a kna a ba sakit, go kakpn ka a limang ka phoon ko kalk. Na giyaya na dowa a tanda a phoon ko Kadnan ka a izampay ko Pir'awn go so manga nakoda a pagtaw niyan: Mataan! a siran na miyabaloy siran a pagtaw a manga songklid."

33

Pitharo iyan: "Kadnan ko, mataan! a sakn na miyakapatay ako kiran sa sakataw, na ikhalk akn oba ako iran bonoa."

34

"Na so pagari ko a Haron, na skaniyan i masagogod a di sakn i katharo; na sogoang Ka skaniyan a pd akn a pphakatabang, a pkhabnar ako niyan: Mataan! a sakn na ipkhalk akn o ba ako iran pakambokhaga."

35

Pitharo (o Allah) a: "Imbagr Ami ko barokan ka so pagaring ka, go snggayan Ami skano sa guus, na da a misampay ran rkano (a marata): Sabap ko manga tanda Ami na skano a dowa, go so miyonot rkano i phamakadaag."

36

Na kagiya a makawma kiran so Mosa a rakhs o manga tanda Ami a manga rarayag, na pitharo iran a: "Da ko ngkaya inonta na balik mata a pimbabaas; go da tano man'g angkai ko manga loks tano a miyangaoona!"

37

Na pitharo o Mosa a: "So Kadnan ko i Matao ko taw a minioma niyan so toroan a phoon ko hadapan Iyan, go so taw a khaadn a bagian iyan so phakatondog a ingd: Mataan aya! a di phakadaag so manga darowaka."

38

Na pitharo o Pir'awn: "Hay manga nakoda, da a katawan ko a bagian iyo a tohan a salakaw rakn: Na kombaan akong ka hay Haman! sa lipaw, na mbaaln akong ka sa bantabantay, ka an ako makapanik ko tohan o Mosa: Ka mataan! a sakn na ikakarang ko dn skaniyan sa pd ko manga bokhag!"

39

Na miyanakabor skaniyan go so manga tantara iyan ko lopa sa di ontol, go inipagarangan iran sa mataan! a siran na di siran Rkami phakandodn!

40

Na siniksa Ami skaniyan go so manga tantara iyan, na inibowang Ami siran ko kalodan: Na pamimikiranang ka o antonaa i miyambtad o kiya akiran ko manga darowaka!

41

Na biyaloy Ami siran a manga nakoda a ipphananawag iran so naraka; na sii ko alongan a qiyamah na di siran khatabangan.

42

Na tiyondog Ami siran sangkai a doniya a morka: Na sii ko alongan a qiyamah na siran na pd ko inipamowang.

43

Na sabnsabnar a inibgay Ami ko Mosa so kitab ko oriyan o kiyabinasa Ami ko miyagapidapid a manga pagtaw a paganay, manga liliwanag a osayan ko manga manosiya, go toroan ago limo, ka an iran katanodi.

44

Na kna a ba ka matatago (hay Mohammad) ko kilid (o palaw) a tampar sa sdpan gowani ko i ilaham Ami ko Mosa so sogoan, go kna aba ka pd ko khipakamamasa.

45

Na ogaid na miyadn Kami sa miyagapidapid a manga pagtaw, na miyakalndo kiran so omor; go kna a ba ka babaling ko manga taw sa Madyan, a pkhabatiya aka kiran so manga ayat Ami; na ogaid na tatap a Skami i miyanonogo (ko manga sogo).

46

Go kna a ba ka matatago ko kilid o palaw gowani a mananawag Kami; na ogaid na limo a phoon ko Kadnan ka, ka an ka mapakaiktiyar so pagtaw a da a miyakatalingoma kiran a miyamakaiktiyar a miyaonaan ka: ka an siran makatanod.

47

Na o da (aya) na so kasogat iran a tiyoba sabap ko miyanggalbk o manga lima iran, na tharoon iran a: "Kadnan ami, ino kaming Ka da sogo i sa sogo! ka an ami kawnoti so manga ayat Ka, go ang kami mabaloy a pd ko miyamaratiyaya!"

48

Na kagiya a makawma kiran so bnar a phoon ko hadapan Ami, na pitharo iran: "Ino ron da bgan, so lagid o inibgay ko Mosa?" Ba iran da ongkira so inibgay ko Mosa gowani? Pitharo iran a: "Dowaa balik mata a mithabanga siran!" go pitharo iran a: "Mataan! a skami na oman i isa kiran na inongkir ami!"

49

Tharoang ka: "Na witi ako niyo sa kitab a phoon ko hadapan o Allah, a skaniyan i lbi a phakatoro a di giya dowaya (a kitab), ka onotan ko skaniyan! o skano i manga bnar!"

50

Na odi ka iran masmbag, na tangkdang ka a aya bo a phagonotan iran na so manga kabaya iran a ribat: Na ba adn a taw a makalbi a dadag ko taw a inonotan iyan so kabaya iyan a ribat, a kna a ba toroan a phoon ko Allah? Mataan! a so Allah na di Niyan pnggonanaon so pagtaw a manga darowaka.

51

Na sabnsabnar a piyakazonosono Ami kiran so katharo, ka an siran makatanod.

52

So siran a inibgay Ami kiran so kitab ko onaan aya, - na siran na skaniyan i paparatiyayaan iran;

53

Go igira a pmbatiyaan kiran, na pitharo iran a: "Piyaratiyaya mi aya, mataan aya! a bnar a phoon ko Kadnan ami: Mataan! a skami na miyabaloy kami ko onaan aya a mimbayorantang."

54

Siran man na imbgay kiran so balas kiran sa takp, sabap ko kiyaphantang iran, go iphagrn iran so mapiya ko marata, go so sabaad ko inibgay Ami kiran na ipphammgay ran.

55

Go igira a miyan'g iran so ilang, na pthalikhodan iran oto, go gi iran tharoon a: "Rkami so manga galbk ami, na rk iyo so manga galbk iyo; kalilintad a sii rkano: da a singanin Ami ko da a manga mlng iyan."

56

Mataan! a ska na ding ka khatoro so taw a kiyababayaan ka; na ogaid na so Allah i thoro ko taw a kabaya Iyan; go Skaniyan i Matao ko khikkdg ko ontol.

57

Na pitharo iran a: "O onoti ami so toroan a pd ami ska, na khaagaw kami ko lopa ami". Ba Ami siran da snggai sa lindonga a panarigan, a pkhawit on so manga onga o langowan taman, - a pagpr a phoon ko hadapan Ami? Na ogaid na so kadaklan kiran na di iran katawan.

58

Na madakl a bininasa Mi a phagingd, a inizonor iran so kawiyagan iran. Na katatan so manga darpa iran, a da kabalingi ko oriyan iran, inonta so mayto! Na aya btad Ami na Skami i manga Waris!

59

Na da ko btad o Kadnan ka i ba Niyan binasaa so manga ingd taman sa di Niyan kasogoan so ponsowan iyan sa sogo, a pphakabatiya kiran ko manga ayat Ami; go da ko btad Ami i ba Ami binasaa so manga ingd inonta o so taw ron na manga darowaka.

60

Na so inibgay rkano a apiya antonaa, na matag sagad a kapipiya ginawa ko kawyagoyag ko doniya, go parahiyasan on; na so zisii ko Allah i tomo ago kakal: Ba niyo di mapng-gdagda?

61

Ino so taw a diniyandian Ami skaniyan sa diyandi a mapiya, na skaniyan na khatmo niyan oto, ba lagid o taw a piyakisawitan Ami ron so matag sagad a kapipiya ginawa ko kawyagoyag ko doniya, oriyan iyan na skaniyan ko alongan a qiyamah, na pd ko phamakadarpaan (ko naraka)?

62

Na sii ko gawii a tawagn Iyan siran, na tharoon Iyan: "Anda i manga sakotowa Akn a siran so initgo niyo (sa phamakatabang rkano)?"

63

Tharoon o siran a piyamadayan siran o katharo: "Kadnan ami, siran aya so diyadag ami: Diyadag ami siran, lagid o kiyadadag ami: Angiyas kami (kiran) ka sii kami Rka: Kna (a ba ami sogoan) i kiyasimbaa iran rkami."

64

Na adn a tharo sa: "Tawaga niyo so ipphamanakoto niyo": Na tawagn iran siran, na di iran siran masmbag; go kasandngan iran so siksa (na mandingandingan iran a); oba siran bo miyabaloy a khipaka oontol!

65

Na sii ko gawii a tawagn Iyan siran, na tharoon Iyan: "Antonaa i inismbag iyo ko manga sogo?"

66

Na karimbotan siran o manga tothol sa alongan oto, na siran na di siran makapamagizai.

67

Na so pman so taw a mithawbat, go miyaratiyaya, go minggalbk sa mapiya, na matatangkd a khabaloy a pd ko miyamakadaag.

68

Na so Kadnan ka na phagadnn Iyan so nganin a kabaya Iyan: Go gii zasamili: da a miyaadn a bagian iran ko kazasamili; Soti so Allah! go Maporo a ka-aawat Iyan ko ipphanakoto iran (Non)!

69

Na so Kadnan ka na katawan Iyan so pag-umaan o manga rarb iran go so papayagn iran.

70

Go Skaniyan so Allah: da a tohan inonta Skaniyan. Rk Iyan so podi, sa awal go sa akir: Go rk Iyan so kokoman, go Rong kano phakandoda.

71

Tharoang ka: Ay gda iyo? O baloya o Allah rkano so gagawii a tatap sa taman ko alongan a qiyamah, antawaa i tohan a salakaw ko Allah, a kawitang kano niyan sa maliwanag? Ino kano di phamamakin'g?

72

Tharoang ka: Ay gda iyo? O baloya o Allah rkano so dawndaw a tatap sa taman ko alongan a qiyamah, antawaa i tohan a salakaw ko Allah, a kawitang kano niyan sa gagawii a pphakadkha kano ron? Ino kano di phangilaylay?

73

Go pd ko limo Iyan a kinisnggayn Iyan rkano ko gagawii ago so dawndaw, - ka ang kano ron pphakadkha, go ang kano gii makambabanog ko kakawasaan Iyan; - go ang kano makapanalamat.

74

Na sii ko gawii a tawagn Iyan siran, na tharoon Iyan: Anda i manga sakotowa Akn a siran so initgo niyo?

75

Na morot Kami ko oman i pagtaw sa saksi, na tharoon Ami: Bayann iyo i karina niyo: Na katokawan iran a mataan! a so bnar na rk o Allah, go maylang kiran so pimbabaas iran a kabokhag.

76

Mataan! a so Qaron na miyaadn a pd ko pagtaw o Mosa; na inombawan iyan siran: Go bigan Ami skaniyan ko manga kakawasaan, mataan! a so bo so manga gonsi iyan na mataan a khipnd ko madakl a manga babagr. Gowani na pitharo on o pagtaw niyan: Di ka zosonor, mataan! a so Allah na di Niyan khababayaan so khikasosonor;

77

Go thontotn ka so inibgay rka o Allah, ko ingd a mawri, go ding ka phakalipati so kipantag ka ko doniya: Go phiyapiya ka, lagid o kiyaphiyapiya i rka o Allah, go ding ka phangontarma so kapaminasa ko lopa: Mataan! a so Allah na di Niyan khababayaan so pphamaminasa.

78

Pitharo iyan a: Aya bo a kinibgan rakn saya na makapantag ko katao a zisii rakn. Ba niyan di katawi a mataan! a so Allah na sabnar a bininasa Niyan ko miyaonaan iyan so manga pagtaw, a so skaniyan i lbi a di skaniyan i bagr go lbi a madakl i miyatimo? Na di ipagiza ko manga baradosa so manga dosa iran.

79

Na lominiyo ko pagtaw niyan ko kiyaphaparahiyasan iyan. Pitharo o siran a pkhababaya ko kawyagoyag ko doniya: Ah, oba adn bo a rk tano ko lagid o inibgay ko Qaroon. Mataan! a skaniyan i titho a khirk ko ontong a mala!

80

Na pitharo o siran a piyamgan ko katao: "Dowan dowaan kano! So balas o Allah i lbi a mapiya a rk o taw a miyaratiyaya, go minggalbk sa mapiya: Na da a khabgan on a rowar ko manga papantang."

81

Na liyandng Ami skaniyan ago so darpa iyan ko lopa, na da a miyaadn a bagian iyan a pagtaw a katabangan iran skaniyan a salakaw ko Allah, go da mabaloy a pd ko miyangasasabt iran a ginawa iran.

82

Na miyabaloy so siran a mindingandingan ko darpa iyan kagai, a gi iran matharo a: "Phammsa ko! ka mataan! a so Allah na pphakawladn Iyan so riskhi ko taw a kabaya Iyan, ko manga oripn Iyan. Go pphakasimpitn Iyan. O da kami kalimoon o Allah, na mataan a liyandng kami Niyan (pn)! Phammsa ko! ka mataan aya! a di phakadaag so manga kafir."

83

Giyang koto a ingd a mawri, na issnggay Ami oto a bagian o siran a di siran khabaya mangarasi ko lopa, go di phaminasa: Na so mababantog a ingd na bagian o khipanananggila.

84

Sadn sa mitalingoma niyan so mapiya, na adn a bagian iyan a tomo a di giyoto; go sadn sa mitalingoma niyan so marata, na da a imbalas ko siran a minggolawla ko manga rarata a rowar ko pinggolawla iran.

85

Mataan! a so tomiyoron rka ko Qor'an, na phakakasowin ka Niyan dn ko khandodan. Tharoang ka a: "So Kadnan ko i Matao ko taw a minitalingoma niyan so toroan, go so taw a skaniyan na matatago ko kadadag a mapayag."

86

Na kna a bang ka mapipikir (hay Mohammad) i kiilahamn rka ko kitab, ogaid na limo a phoon ko Kadnan ka: Na di ka dn pmbaloy a tabanga o manga kafir;

87

Go di ka kiran dn phakialang ko manga ayat o Allah ko oriyan o masa a kinitoron Iyan rka: Go panolonn ka so (kasimbaa ko) Kadnan ka, go di ka dn pmbaloy a pd ko manga pananakoto;

88

Go di ka phanongganoy, sa pd o Allah a tohan a salakaw. Da a tohan a inonta Skaniyan. So langowan taman na khabinasa inonta so dhat Iyan. Rk Iyan so kokoman, go Rong kano phakandoda.

Total Number of Verses: 69

1

Alif, Lam, Mim. (so Allah i Matao ko paka-aantapan Iyan on.)

2

Ba tiyarima o manga manosiya sa di siran pkhodiin asar a gi iran matharo a: "Miyaratiyaya kami, na siran na di siran thiyobaan?"

3

Na sabnsabnar a tiniyoba Ami so miyaonaan iran, na mataan a pntoon dn o Allah so mimamataan, go mataan a pntoon Iyan dn so manga bokhag.

4

Ba tiyarima o siran a giinggagalbk ko manga rarata sa khapalagoyan Kami ran? Miyakaratarata so ipkhokom iran!

5

Sa taw a mabaloy a aarapn iyan so khithoona an iyan ko Allah, na mataan! a so diyandi o Allah na phakatalingoma dn: Go Skaniyan so Pphakan'g, a Matao.

6

Na sa taw a managontaman, na makaphanagontaman sa rk bo o ginawa niyan: Mataan! a so Allah na sabnar a di makaphangangarongan ko manga kaadn.

7

Na siran a miyamaratiyaya, go pinggalbk iran so manga pipiya, na mataan a lalasn Ami kiran dn so manga dosa iran, go mataan a ibalas Ami kiran dn so mapiya ko pinggolawla iran.

8

Na piyanginsana Mi ko manosiya so (kaphiyapiya i niyan ko) mbala a loks iyan, sa samporna a kaphiyapiya: Na o tgln iran rka a kisakoton ka Rakn ko daa rk ka on a katao, na ding ka siran pagonoti. Sii Rakn so khandodan iyo, na phanotholn Ko rkano so pinggolawla niyo.

9

Na siran a miyamaratiyaya, go pinggalbk iran so manga pipiya, na matatangkd a phakasoldn Ami siran dn (ko sorga) a pd o manga bilangataw.

10

Na adn a pd ko manga manosiya a taw a gii niyan tharoon a: "Piyaratiyaya mi so Allah"; na igira a miyaringasa makapantag ko Allah, na balowin iyan so pangarasi o manosiya a izan o siksa o Allah! Na ibt o adn a makawma a tabang a phoon ko Kadnan ka, na mataan a ptharoon iran dn a: "Mataan! a skami na aya btad ami na pd iyo". Ba di so Allah i Matao ko nganin a zisii ko manga rarb o manga kaadn?

11

Na mataan a katawan dn o Allah so miyamaratiyaya, go mataan a katawan Iyan dn so pphamanangin.

12

Na pitharo o siran a miyamangongkir ko siran a miyamaratiyaya a: "Kdga niyo so okit ami, ka awidan ami so manga dosa niyo"; a da a khaawidan iran ko manga dosa iran a mayto bo: Mataan! a siran na titho a manga bokhag!

13

Na mataan a khaawidan iran so manga dosa iran, go so manga dosa (o diyadag iran), a rakhs o manga dosa iran, go mataan a ipagiza kiran dn ko alongan a qiyamah so pimbabaas iran a kabokhag.

14

Na sabnsabnar a siyogo Ami so Noh ko pagtaw niyan, na miyakatarg kiran sa sanggibo ragon korang bo sa lima polo ragon: Na piyolang siran o ig a mala, a siran na manga darowaka.

15

Na siyabt Ami skaniyan ago so manga pd a miyakada ko kapal, go biyaloy Ami oto a tanda ko manga kaadn!

16

Go (siyogo Ami) so Ibrahim gowani na pitharo iyan ko pagtaw niyan a: "Zoasoata niyo so Allah: Go onoti niyo Skaniyan: Giyoto man i mapiya rkano, o skano na katawi niyo!

17

"Aya bo dn a pzimbaan iyo a salakaw ko Allah na manga barahala, go pphangmbaalan iyo a kabokhag. Mataan! a so pzimbaan iyo a salakaw ko Allah na da a makhakapaar iran rkano a pagpr: Na thontota niyo sii ko Allah so pagpr, go simbaa niyo Skaniyan, go panalamat kano Rkaniyan: Ka Rong kano phakandoda.

18

"Na oba niyo pakapmbokhaga (so Rasol), na sabnar a piyakambokhag o manga pagtaw a miyaonaan iyo (so manga rasol): Na da a paliyogat ko Rasol a rowar ko kapamakasampay (o sogoan) a mapayag."

19

Ba iran da manggdagda o andamanaya i kapphakapanagipoona o Allah ko kapphangadn, oriyan iyan na khasowin Iyan skaniyan (madn)? Mataan! a giyoto man sii ko Allah na malbod.

20

Tharoang ka a: "Lalakaw kano ko lopa na pamimikirana niyo o andamanaya i kiyaphoon Iyan (madn) ko manga kaadn, oriyan iyan na so Allah na phangadn sa kapangadn a mori: Mataan! a so Allah na sii ko langowan taman na Gaos Iyan.

21

"Ziksaan Iyan so taw a kabaya Iyan, go ikhalimo Iyan so taw a kabaya Iyan, na Rong kano phakandoda.

22

"Na da rkano i ba niyo kapalagowi (so siksa) sii ko lopa, go da sii ko langit, go da a bagian iyo a salakaw ko Allah a Panarigan, go da a tabanga."

23

Na siran a miyamangongkir ko manga ayat o Allah, go so khithoona an Rkaniyan, - na siran man na kiya daan siran sa panginam ko limo Akn: Go siran man na adn a bagian iran a siksa a malipds.

24

Na da a miyabaloy a smbag o pagtaw (o Ibrahim) a rowar sa kiyatharo a iran sa: "Bonoa niyo skaniyan, odi na totonga niyo skaniyan". Na siyabt skaniyan o Allah phoon ko apoy. Mataan! a adn a matatago roo man a titho a manga tanda ko pagtaw a mapaparatiyaya.

25

Na pitharo iyan a: "Aya bo dn a kinowa niyo a salakaw ko Allah na manga barahala, a pinggiginawa iyan o lt iyo sii ko kawyagoyag ko doniya; oriyan iyan na sii ko alongan a qiyamah na taplisn o sabaad rkano so sabaad, go ipaninta o sabaad rkano so sabaad; go darpa iyo so apoy, go da a bagian iyo a phamakatabang."

26

Na piyaratiyaya skaniyan o Lot: Na pitharo (o Ibrahim) a: "Mataan! a sakn na phagapas ako ko Kadnan ko: Mataan! a Skaniyan na Skaniyan so Mabagr, a Mawngangn."

27

Na inibgay Ami rkaniyan so Is'haq go so Ya'qob, go inisnggay Ami sii ko manga moriyataw niyan so kananabii go so kitab, go inibgay Ami ron so balas rkaniyan sii sa doniya; go mataan! a skaniyan na sii sa akhirat na pd dn ko manga bilangataw.

28

Go (siyogo Ami) so Lot gowani na pitharo iyan ko pagtaw niyan: "Mataan! a skano na pzogokn iyo dn so pakasisingay, da a miyakawna rkano saya a isa bo ko manga kaadn.

29

"Ino a mataan! a skano na sabnar a pphangabayaan iyo so manga mama, go pphamagayan kano ko lalan, go gii niyo nggolawlaan ko pkhalimodan rkano so marata? Na da a miyabaloy a smbag o pagtaw niyan a rowar sa kiyatharo a iran: Sa talingomaan ka rkami so siksa o Allah, o ska na pd ko manga bnar."

30

Pitharo iyan: "Kadnan ko! tabangi akong Ka ko pagtaw a pphamaminasa!"

31

Na kagiya a miyoma o manga sogo Ami (a manga malaikat) - ko Ibrahim so mapiya a tothol, na pitharo iran a: "Mataan! a Skami na mbinasaan Ami so taw sangkai a ingd: Mataan! a so taw ron na miyabaloy siran a manga darowaka."

32

Pitharo (o Ibrahim) a: "Mataan! a matatago roo so Lot". Pitharo iran a: "Skami i matao ko taw a matatago roo: Mataan a zabtn Ami dn skaniyan ago so taalok on, - inonta si (Waylah a) karoma niyan: Ka miyabaloy a pd ko pthatalimbagak (ko siksa)!"

33

Na kagiya a makawma so manga sogo Ami ko Lot, na minimboko iyan siran, go inigagt siran a rarb (iyan): Na pitharo iran a: "Di ka pkhalk, go di ka mboboko: Mataan! a Skami na zabtn Ami ska ago so taalok rka, inonta so karomang ka: Ka miyabaloy a pd ko mithatalimbagak.

34

"Mataan! a Skami na pagowitan Ami so taw sangkai a ingd sa siksa a phoon ko langit, sabap ko kiyapanongklid iran."

35

Na sabnsabnar a inibagak Ami aya a tanda a mapayag, ko pagtaw a pnggdagdaan iran.

36

Go (siyogo Ami) sii ko pagtaw a Madyan so pagari ran a Shoayb. Na pitharo iyan: "Hay pagtaw akn, simbaa niyo so Allah, go kalkn iyo so alongan a mawri: Go di kano phribogar ko lopa, sa pphamaminasa kano."

37

Na piyakambokhag iran skaniyan: Na miyadansal siran o linog, na kiyapitaan siran ko darpa iran a miyamangndr.

38

Go (bininasa Mi) so pagtaw a Ad, go so pagtaw a Samod: Na sabnar a miyapayag rkano sa sabap ko manga darpa iran: Go pipharasan kiran o shaytan so manga galbk iran, na kiyaalangan iyan siran ko lalan (a ontol), a aya btad iran na pphamakaylay siran.

39

Go (bininasa Mi) so Qaroon, go so Pir'awn, go so Haman: Na sabnsabnar a minioma kiran o Mosa so manga rarayag a karina, na miyanakabor siran ko lopa; go da siran makapalagoy (ko siksa Ami).

40

Na oman i isa kiran na siniksa Ami sa sabap ko dosa niyan: Na pd kiran, so biyotawanan Ami skaniyan sa ndo a ator; go pd kiran so miyadansal skaniyan o sowara a phakapolang; go pd kiran so liyandng Ami skaniyan ko lopa; go pd kiran so inld Ami: Na da ko btad o Allah i ba Niyan siran pzalimboti: Na ogaid na aya btad iran na so manga ginawa iran i pzalimbotan iran.

41

Aya ibarat o siran a kominowa siran sa salakaw ko Allah a manga panarigan na lagid o lalawa, a mimbaal sa walay; na mataan! a aya lbi a malobay ko manga walay na sabnar a so walay o lalawa; o siran na katawi ran.

42

Mataan! a so Allah na katawan Iyan so pphanongganowin iran a salakaw Rkaniyan a shay': Go Skaniyan so Mabagr, a Mawngangn.

43

Na giyang kaya a manga ibarat na phagmbaalan Ami aya ko manga manosiya; na da a phakasabot saya a rowar ko manga tatao.

44

Inadn o Allah so manga langit ago so lopa sii ko bnar: Mataan! a adn a matatago saya a titho a tanda ko miyamaratiyaya.

45

Batiyaang ka so iniilaham rka a kitab, go pamayandgn ka so sambayang: Mataan! a so sambayang na phakasapar ko pakasisingay, go so marata; na mataan a so tadm ko Allah i lbi a mala. Na so Allah na katawan Iyan so gii niyo nggolawlaan.

Part 21

46

Na di kano pakipphapawala ko tiyoronan sa kitab, inonta o so skaniyan na lbi a mapiya, liyo bo ko siran a da kiran pamaginontolan: Go tharoa niyo a: "Piyaratiyaya mi so initoron rkami go so initoron rkano (a kitab); go so Tohan ami go Tohan iyo na Isaysa; go skami na Ron kami mbabayorantang."

47

Na lagid aya man a kinitoronn Ami rka ko kitab. Na siran a inibgay Ami kiran so kitab na paparatiyayaan iran oto, na adn a pd ko siran aya a taw a miyamaratiyaya on: Na da a somasangka ko manga ayat Ami a rowar ko manga kafir.

48

Kna a ba adn a pkhabatiya aka ko onaan aya a kitab, go kna a bang ka pkhisorat skaniyan a gii nggolalan ko kawanan ka: Ka samawto na mataan a kaparampangan so gii nggagalbk sa ribat.

49

Kna, ka skaniyan na manga ayat a manga rarayag a zisii ko manga rarb o siran a piyamgan ko katao: Na da a somasangka ko manga ayat Ami a rowar ko manga darowaka.

50

Na pitharo iran a: "Ino a da a initoron on a manga tanda a phoon ko Kadnan iyan? Tharoang ka a: So manga tanda na sii bo phoon ko Allah: Na sakn na matag pphamakaiktiyar a mapayag."

51

Ba kiran da makatarotop so mataan a kinitoronn Ami rka ko kitab a pkhabatiya kiran? Mataan! a adn a matatago roo man a titho a limo go pananadm a bagian o pagtaw a mapaparatiyaya.

52

Tharoang ka (hay Mohammad) a: "Miyakatarotop so Allah ko lt akn ago so lt iyo a saksi: Katawan Iyan so zisii ko manga langit ago so lopa. Na so siran a piyaratiyaya iran so ribat go inongkir iran so Allah, na siran man na siran so manga logi.

53

Na pphangnin iran rka a kagaan o siksa: Na o da so taalik a miyapnto, na makawma kiran dn so siksa: Na makatalingoma kiran dn a mitalmba, a siran na di iran maiin'ngka!

54

Pphangnin iran rka a: Kagaan o siksa a mataan! a so naraka Jahannam na sabnar a katatangkalan iyan so manga kafir!

55

Sii ko gawii a mibongkos kiran so siksa phoon ko kaporoan iran go phoon ko kababaan o manga a'i ran, na tharoon Iyan: "Taami niyo so pinggolawla niyo!"

56

Hay manga oripn Ko a so miyamaratiyaya, mataan! a so lopa Akn na mawlad: Na Sakn bo i simbaa niyo!

57

Oman i baraniyawa na phakataam ko kapatay: Oriyan iyan na sii kano Rkami phakandoda.

58

Na so siran a miyamaratiyaya, go pinggalbk iran so manga pipiya, na mataan a pakapphantawn Ami siran dn ko sorga, - a manga darpa a manga poporo a pphamangondas ko kababaan iyan so manga lawasayg, - makakakal siran on, sayana a mapiya a balas ko miyamagamal (sa mapiya)!

59

A siran na miphantang siran, go so bo so Kadnan iran i sasarigan iran.

60

Na madakl a baraniyawa a di phakaawid sa pagpr on: Na so Allah i pphagpr on, go (pphagpr) rkano: Na Skaniyan so Pphakan'g, a Matao.

61

Na ibt o izaan ka kiran, o antawaa i miyadn ko manga langit ago so lopa, go piyakaphasiyonot iyan so alongan go so olan? Na mataan a ptharoon iran dn a: "So Allah. Na andamanaya i kapthalikhod iran?"

62

So Allah na pphakawladn Iyan so riskhi ko taw a kabaya Iyan ko manga oripn Iyan; go pphakasimpitn Iyan rkaniyan; mataan! a so Allah sii ko langowan taman na katawan Iyan.

63

Na ibt o izaan ka kiran, o antawaa i tomiyoron, phoon ko kawang, ko ig, na inioyag Iyan oto ko lopa ko oriyan o kiyapatay niyan? Na mataan a ptharoon iran dn a: "So Allah!" tharoang ka: "So podi na rk o Allah! Kna, ka so kadaklan kiran na di siran pnggdagda."

64

Na da ko ungkai a kawyagoyag ko doniya inonta na karimbaran go katmbangan; na mataan! a so ingd a mawri na titho a skaniyan i kawyagoyag, o siran na katawi ran.

65

Na igira a miyakada siran ko kapal, na mangni siran ko Allah, sa totolabosn iran Rkaniyan so okit ko kapagintaw; na kagiya a sabtn Iyan siran a iraot siran ko kalopaan, na samawto na siran na pphanakoto siran!

66

Ka kagiya a phagongkirn iran so inibgay Ami kiran, go kagiya a masosonor siran! Na katokawan iran dn.

67

Ba iran da maylay a mataan! a Skami na sominggay Kami sa lindonga, a panarigan, na pphanikhmn so manga manosiya ko mliliyota kiran? Ba so ribat i pharatiyayaan iran, na so limo o Allah na phagongkirn iran?

68

Na ba adn a taw a makalbi a darowaka ko taw a inangkob iyan so Allah sa kabokhag, odi na piyakambokhag iyan so bnar kagiya makawma on? Ba da a matatago ko naraka Jahannam a darpa a bagian o manga kafir?

69

Na so siran a miyamanagontaman makapantag Rkami, - na mataan a nggonanaon Ami siran dn ko manga okit Ami: Na mataan! a so Allah na pd dn o miphipiyapiya.

Total Number of Verses: 60

1

Alif, Lam, Mim. (so Allah i Matao ko paka-aantapan Iyan on.)

2

Tiyaban so pagtaw a Rom -

3

Sii ko marani a lopa; na sii ko oriyan o kiyatabana kiran, na phakataban siran dn -

4

Sii ko mamakapira ragon. Rk o Allah so miyanggolawla paganay, ago so khawri: Na sa alongan oto na khababaya so miyamaratiyaya -

5

Sabap ko tabang o Allah, thabangan Iyan so taw a kabaya Iyan, Skaniyan so Mabagr, a Makalimoon.

6

Diyandi o Allah. Di pndorat so Allah ko diyandi Iyan: Na ogaid na so kadaklan ko manga manosiya na di iran katawan.

7

Katawan Iyan so mapapayag ko kawyagoyag sa doniya a: Siran na so akhirat na siran na di iran maiin'ngka.

8

Ba iran da pamimikirana sii ko manga ginawa iran? A da ko kiyaadna o Allah ko manga langit ago so lopa, go so nganin a pagltan a dowanan: Inonta na sii ko bnar, go so taalik a miyapnto; na mataan! a madakl ko manga manosiya a so kithoonaan ko Kadnan iran na titho a oongkirn iran!

9

Ba siran da lalakaw ko lopa, ka an iran mapagilaylay o antonaa i miyambtad o kiya akiran ko siran a miyaonaan iran? Aya btad iran na tanto a mala a di siran i bagr: Go pindado iran so lopa, go pimbabalayan iran oto sa madakl a di so kiyambalay iran on: Go minioma kiran o manga sogo kiran so manga rarayag a karina; na da ko btad o Allah i ba Niyan siran pzalimboti. Na ogaid na aya btad iran na so manga ginawa iran na pzalimbotan iran.

10

Oriyan iyan na aya dn a khabolosan o siran a minggagalbk sa marata, na so marata; sa kiyapakambokhaga iran ko manga ayat o Allah, go miyabaloy siran a gi iran oto pagizawiza on.

11

So Allah i pphanagipoon (mangadn) ko manga kaadn oriyan iyan na khasoy Niyan (madn ko akhirat); oriyan iyan na Ron kano phakandoda.

12

Na sii ko gawii a kapaka tindg o bangkit, na kadaan sa panginam so manga baradosa;

13

Go da a mabaloy a bagian iran ko ipphamanakoto iran a mamakaogop, go mabaloy siran a so ipphamanakoto iran na ongkirn iran.

14

Go sii ko gawii a kapaka tindg o bangkit, na sa alongan oto na makamblablag siran.

15

Na so siran a miyamaratiyaya, go pinggalbk iran so manga pipiya, na siran i khatago ko sorga a kokormatn siran.

16

Na so siran a miyamangongkir go piyakambokhag iran so manga ayat Ami ago so kitmo ko akhirat, na siran man i khatago ko siksa a phamakadarpaan siran on.

17

Na phodipodia niyo so Allah, ko masa a kagabii rkano, go so masa a kapita i rkano;

18

Na rk Iyan so podi, sii ko manga langit ago so lopa; go so kagabigabi go so masa a kaplohor iyo.

19

Pphakagmawn Iyan so oyagoyag a phoon ko miyatay, go pphakagmawn Iyan so miyatay phoon ko oyagoyag, go phagoyagn Iyan so lopa ko oriyan o kiyapatay niyan: Na lagid oto man a kaphakagmawa rkano (phoon ko manga kobor).

20

Na pd ko manga tanda Iyan, a kiya adna Niyan rkano a phoon sa botha; oriyan iyan na samawto na skano na manosiya a khipapayapat!

21

Go pd ko manga tanda Iyan, a inadnan kano Niyan a phoon ko manga ginawa niyo, sa manga darodopa, ka ang kano mapaparo sii rkaniyan, go singgayan Iyan so lt iyo sa kabaya ago limo: Mataan! a adn a matatago roo man a titho a manga tanda ko pagtaw a pphamimikiran nn iran.

22

Go pd ko manga tanda Iyan, a kiya adna Niyan ko manga langit ago so lopa, go so kambidabida o manga basa niyo go so manga warna niyo: Mataan! a adn a matatago roo man a titho a manga tanda ko manga tatao.

23

Go pd ko manga tanda Iyan, so torog iyo ko gagawii ago so dawndaw, go so kapphlolobaa niyo ko kakawasaan Iyan: Mataan! a adn a matatago roo man a titho a manga tanda ko pagtaw a pphamamakin'g siran.

24

Go pd ko manga tanda Iyan, a pphakiilay Niyan rkano so kilat, sa kalk ago inam, go ipthoron Iyan a phoon ko kawang so ig o oran na phagoyagn Iyan sa sabap rkaniyan so lopa ko oriyan o kiyapatay niyan: Mataan! a adn a matatago roo man a titho a manga tanda ko pagtaw a pnggdagdaan iran.

25

Go pd ko manga tanda Iyan, a kapakatitindg o langit ago so lopa sa sabap sa sogoan Iyan: Oriyan iyan na amay ko tawagn kano Niyan, sa isa a pananawag, phoon ko lopa, na samawto na skano na mamakagmaw kano (phoon ko manga kobor iyo).

26

Na rk Iyan so zisii ko manga langit go so lopa: Tanan on makaphapasiyonot.

27

Go Skaniyan so pphanagipoon (mangadn) ko manga kaadn; oriyan iyan na khasoy Niyan (madn ko akhirat); na giyoto na tanto a malbod sii Rkaniyan. Go rk Iyan so btad a maporo sii ko manga langit ago so lopa: Go Skaniyan so Mabagr, a Mawngangn.

28

Mimbaal rkano sa ibarat a phoon ko manga ginawa niyo: Ba adn a rk iyo a pd ko miyakhapaar o manga tangan iyo a khipakatotompok ko pagpr Ami rkano? Na skano na mlagilagid On, na ipkhalk iyo siran lagid o kipkhalkn iyo ko manga ginawa niyo? Lagid aya a gii Ami kazmpada magosay ko manga tanda ko pagtaw a phnggdagdaan iran.

29

Kna, ka aya inonotan o siran a minggogolawla sa ribat na so manga kabaya iran a kna a ba katao. Na antawaa i makatoro ko taw a diyadag o Allah! Go da a bagian iran a phamakatabang.

30

Na pakambatangang ka so hadap ka ko agama a: Zasalimbotawang ka. Okit a kiyapangadn o Allah a: So inadn Iyan so manga manosiya sii Rkaniyan. Da a kasambi ko kiyapangadn o Allah: Giyoto man i okit a ontol, na ogaid na so kadaklan ko manga manosiya na di iran katawan.

31

Sa sangor kano sii Rkaniyan, go onoti niyo Skaniyan, go pamayandgn iyo so sambayang, go oba kano mabaloy a pd ko manga pananakoto;

32

A siran so pimbaabaad iran so okit iran, go miyabaloy siran a mithitindga; - oman i isa ka sagorompong na so zisii kiran (a kpit) na pkhababayaan iran!

33

Na igira a miyasogat so manga manosiya a morala, na mangni siran ko Kadnan iran, a mbabalingan siran On: Oriyan iyan na igira a piyakataam Iyan siran sa phoon Rkaniyan a limo, na samawto na so isa ka sagorompong kiran na so Kadnan iran na pphakisakotowan iran, -

34

Ka phagongkirn iran so inibgay Ami kiran. Na sawiti niyo (so doniya); ka katokawan iyo bo.

35

Ba adn a initoron Ami kiran a katantowan, na Skaniyan i gii tharo ko nganin a siran na ipzakoto iran on?

36

Na igira a piyakataam Ami so manosiya sa limo, na mababaya siran sa sabap rkaniyan: Na o masogat siran a marata sabap ko miniona a galbk o manga lima iran, na samawto na siran na pkhadaan siran sa panginam!

37

Ba iran da maylay a mataan! a so Allah na pphakawladn Iyan so riskhi ko taw a kabaya Iyan, go pphakasimpitn Iyan? Mataan! a adn a matatago roo man a titho a manga tanda ko pagtaw a khipaparatiyaya.

38

Na bgan ka ko tonganay so kabnar iyan, go so miskin, go so gii mlayalayag a maka khakadiyat a miyakawang sa lalan. Giyoto man i lbi a mapiya a bagian o siran a kabaya iran so balas o Allah; na siran man na siran i phamakadaag.

39

Na sadn sa ipammgay niyo a phoon sa kapakaisg, ka an makaysg ko manga tamok o manga manosiya, na di phakaysg sii ko Allah: Na sadn sa ipammgay niyo a phoon sa pangalinggagaw a kabaya iyo ko balas o Allah, na siran man na siran i gii thaktakp.

40

So Allah so miyadn rkano: Oriyan iyan na riniskhiyan kano Niyan; oriyan iyan na phatayn kano Niyan; oriyan iyan na pagoyagn kano Niyan (ko alongan a qiyamah). Ba adn a pd ko ipphamanakoto niyo a makapnggolawla roo sa mayto bo? Soti Skaniyan! go Maporo a ka-aawat Iyan ko ipphanakoto iran!

41

Miyapayag so kabinasa ko kalopaan ago so kalodan sa sabap, ko pinggalbk o manga lima o manga manosiya (a kandarowaka), ka phakitaaman Iyan kiran so (karata o) sabaad ko pinggolawla iran: ka an siran makambalingan (ko ontol).

42

Tharoang ka a: "Ndalakaw kano ko lopa na pagilaylaya niyo o antonaa i miyambtad o kiya akiran ko siran a miyaona: Miyabaloy so kadaklan kiran a manga pananakoto."

43

Na antapn ka so hadap ka ko agama ontol, ko dapn so kapakatalingoma o gawii a da a makarn on phoon ko Allah: Sa alongan oto na makasznggaya siran.

44

Sa taw a mongkir na phakatana on so kiyaongkir iyan: Na sa taw a nggalbk sa mapiya na bagian o manga ginawa iran a pkhatibaba iran a dkhai:

45

Ka mbalasan Iyan so miyamaratiyaya, go pinggalbk iran so manga pipiya, ko kakawasaan Iyan. Mataan! a Skaniyan na di Niyan khababayaan so miyamangongkir.

46

Na pd ko manga tanda Iyan, a kapmbotawani Niyan ko manga ndo, a pphamalata (ko oran), go ang kano Niyan mapakataam ko limo Iyan, go an pphamakabthas so manga kapal sabap ko sogoan Iyan, go ang kano gii makambabanog ko kakawasaan Iyan: Go ang kano makapananalamat.

47

Na sabnsabnar a somiyogo Kami ko miyaonaan ka, sa manga sogo sii ko pagtaw iran; na miyakatalingoma siran kiran a rakhs o manga karina a manga rarayag: Na siniksa Ami so mimbabaradosa; na miyabaloy a kabnar Rkami so katabangi ko miyamaratiyaya.

48

So Allah so pphakasambr ko manga ndo, na pkhibayog iyan so gabon: Na pkhayatn Iyan ko kawang sa sadn sa kabaya Iyan, go pmbalowin Iyan skaniyan a pizagintas; na pkhaylaing ka so oran a pltos phoon ko pagltltan iyan: Na igira inisogat Iyan oto ko taw a kabaya Iyan ko manga oripn Iyan, na samawto na siran na pkhababaya siran!

49

Na mataan a miyabaloy siran ko da kiran on pn kitoronn ko onaan iyan a titho a khikaadaan sa panginam!

50

Na ilayang ka so rarad o limo o Allah! - o andamanaya i kaphagoyaga niyan ko lopa ko oriyan o kiyapatay niyan: Mataan! a giyoto man i titho a phangoyag ko miyamatay: Go Skaniyan sii ko langowan taman na Gaos Iyan.

51

Na ibt o sogo Kami sa ndo, na go iran maylay (so pangomaan) a makabinaning, - na itataros iran dn ko oriyan iyan a kaoongkir iran!

52

Na mataan! a ska na ding ka maphakin'g ko miyamatay, go ding ka maphakin'g ko manga bngl so panolon, igira a tominingr siran, a khitatalikhod.

53

Go da rka i bang ka manggonanao so manga bota sa kapokas iran ko kadadadag iran: da a maphakan'g ka a rowar ko taw a mapaparatiyaya ko manga ayat Ami, na siran na mbabayorantang siran.

54

So Allah so miyadn rkano phoon ko malmk, oriyan iyan na biyaloy Niyan a phoon ko oriyan o malmk a mabagr, oriyan iyan na biyaloy Niyan a phoon ko oriyan o mabagr a malmk, go kaloks. Phagadnn Iyan so kabaya Iyan, na Skaniyan so Matao, a Gaos.

55

Na sii ko gawii a kapakatindg o bangkit, na pzapa so manga baradosa sa da a minitarg iran (ko doniya) a salakaw ko isa ka oras: Lagid oto man a kiyabaloy ran a gii mbabaas sa kabokhag!

56

Na tharoon o siran a piyamgan ko katao, ago paratiyaya a: "Sabnsabnar a miyakatarg kano sii ko kitab o Allah, sa taman ko gawii a kapangoyag, na giyai so gawii a kapangoyag: Na ogaid na skano na aya btad iyo na di niyo katawan!"

57

Na sa alongan oto na di phakanggay a gona ko siran a mindadarowaka so dalina iran, go di siran pakaphangnin sa rila.

58

Na sabnsabnar a piyayag Ami ko manga manosiya, sangkai a Qor'an so oman i ibarat: Na ibt o katalingomaing ka siran sa tanda, na mataan a ptharoon dn o siran a da pamaratiyaya: "Da' ko skano inonta na manga ribat."

59

Lagid oto man a kappharkata o Allah ko manga poso o siran a di iran katawan.

60

Na phantang ka: Mataan! a so diyandi o Allah na bnar: Go oba ka mathitilakhap o siran a di khitotomangkd.

Total Number of Verses: 34

1

Alif, Lam, Mim. (so Allah i Matao ko paka-aantapan Iyan on.)

2

Giyaya na manga ayat ko kitab a katatagoan sa ongangn, -

3

A toroan go limo ko miphipiyapiya, -

4

A so ipphamayandg iran so sambayang, go pthonayn iran so zakat, go siran na so akhirat na siran na tatangkdn iran.

5

Siran man i thatakna ko toroan a phoon ko Kadnan iran; go siran man na siran i phamakadaag.

6

Na adn a pd ko manga manosiya, a taw a pphamasa sa katmbangan a tothol, ka an makadadag ko lalan o Allah, a kna a ba katao, go phagmbaalan iyan a kasandagan: Siran man na adn a bagian iran a siksa a phakahina.

7

Na igira a pphangadian on so manga ayat Ami, na tomalikhod, a mananakabor, lagid o ba niyan oto da man'g, lagid o ba kiyatagoan so mbala a tangila niyan sa kabngl: Na pphanotholang ka on so siksa a malipds.

8

Mataan! a so miyamaratiyaya, go pinggalbk iran so manga pipiya, na adn a bagian iran a manga sorga a pakalma, -

9

Makakakal siran on. Diyandi o Allah a bnar: Na Skaniyan so Mabagr, a Mawngangn.

10

Inadn Iyan so manga langit a da a manga polaos a khaylay niyo skaniyan; go piyakabknan Iyan so lopa sa manga palaw, ka ang kano Niyan di pkhakaog; go iniparak Iyan on so oman i baraniyawa. Na piyakatoron Ami phoon ko kawang so ig a oran, na piyakatho Ami ron so oman i pizoson a mapiya.

11

Giyaya a inadn o Allah: Na pakiilay niyo rakn o antonaa i miyaadn o siran a salakaw Rkaniyan: Kna, ka so manga darowaka na matatago ko kadadag, a mapayag.

12

Na sabnsabnar a inibgay Ami ko Loqman so ongangn (na pitharo on a): "Panalamat ka ko Allah". Na sa taw a manalamat, na makaphanalamat sa rk bo o ginawa niyan: Na sa taw a mongkir, na mataan! a so Allah na Angkos, a Pphodin.

13

Na gowani na pitharo o Loqman ko wata iyan, a skaniyan na pphangthomaan iyan: "Hay ikaritan ko, ding ka zakoton so Allah: Mataan! a so kapanakoto na titho a kandarowaka, a lbi a mala."

14

Na piyanginsana Mi ko manosiya so mbala a loks iyan: Kiyaawidan skaniyan o ina iyan ko kalmk, a maliliyawaw ko isa a kalmk: Go miyakagnk somoso ko sold a dowa ragon: "Panalamat ka Rakn ago so mbala a loks ka: Sii Rakn so khabolosan."

15

"Na oba ka iran mbaasa sa kisakoton ka Rakn ko da a rk kawn a katao, na ding ka siran pagonoti; go pakipagpda ka kiran sii ko doniya sa adat a mapiya; na kdg ka ko lalan o taw a mimbalingan sii Rakn: Oriyan iyan na sii Rakn so khandodan iyo, na phanotholn Ko rkano so pinggolawla niyo."

16

(Pitharo o Loqman:) "Hay ikaritan ko, mataan aya! a o adn a maadn (a amal) a timbang o od a hardal, na matago sii ko lakongan, odi na sii ko manga langit, odi na sii ko lopa, na ithalingoma skaniyan o Allah: Mataan! a so Allah na Lambasi-katao, a Kaip.

17

"Hay ikaritang ko, pamayandgn ka so sambayang, go sogo on ka so mapiya, go saparn ka so marata: Go phantang ka ko apiya antonaa i minisogat rka; mata an! a giyoto man na pd ko maylot a manga sogoan.

18

"Go ding ka thangkiriin so bias ka ko manga manosiya (sa kapanakabor), go di ka plalakaw ko lopa a mangangandag; mataan! a so Allah na di Niyan khabayaan so oman i takabor, a masalibantog;

19

"Go zokoding ka so kaplalakawng ka, go pakainayang ka so sowarang ka; mataan! a aya piyakagowagowad ko manga sowara na sabnar a so sowara kimar."

20

Ba niyo da maylay a mataan! a so Allah na piyakaphasiyonot Iyan rkano so nganin a zisii ko manga langit ago so zisii ko lopa, go siyamporna Iyan rkano so manga limo Iyan sa mapayag, go masoln? Na adn a pd ko manga manosiya a gii makiphapawala makapantag ko Allah, a kna a ba katao, go di toroan, go di kitab a miyakabgay sa sindaw!

21

Na igira a pitharo kiran a: Kdga niyo so initoron o Allah, na tharoon iran a: "Kna, ka aya khdgn ami na so miyatoon ami ron so manga loks ami". Ati apiya aya btad o shaytan na pthawagn iyan siran ko siksa a pzokhayaw (na aya iran dn phagonotan)?

22

Na sa taw a imbayorantang iyan a ginawa niyan ko Allah, a skaniyan na phipiyapiya, na sabnar a kiyakaptan iyan so kapta a mabagr: Na sii ko Allah so khaakiran ko manga olawla.

23

Na sa taw a mongkir, na oba ka mapakamboko o kiyaongkir iyan: Sii Rkami so khandodan iran, na phanotholn Ami kiran so pinggolawla iran: Mataan! a so Allah na katawan Iyan so zisii ko manga rarb.

24

Phakasawitn Ami siran (ko doniya) sa mayto: Oriyan iyan na pakapagbongn Ami siran ko siksa a sangat.

25

Na ibt ka o izaan ka kiran o antawaa i miyadn ko manga langit ago so lopa? Na mataan a ptharoon iran dn a: "So Allah". Tharoang ka a: "So podi na rk o Allah! Kna, ka so kadaklan kiran na di iran katawan."

26

Rk o Allah so nganin a zisii ko manga langit, go so lopa: Mataan! a so Allah na Skaniyan i Angkos, a Pphodin.

27

Na apiya pn mataan! a so matatago ko lopa a kayo na manga pansom, go so kalodan (na dawat), na omanan Iyan oto sa pito a manga kalodan, na di thaman so manga katharo o Allah: Mataan! a so Allah na Mabagr, a Mawngangn.

28

Da ko kiya adna rkano, go da ko kapagoyaga rkano, inonta na lagid o ginawa a isa: Mataan! a so Allah na Pphakan'g, a Pphakaylay.

29

Bang ka da maylay a mataan! a so Allah na pphakasoldn Iyan so gagawii ko dawndaw, go pphakasoldn Iyan so dawndaw ko gagawii; go piyakaphasiyonot Iyan so alongan, ago so olan, oman iisa na pkhdg (ko lalan iyan) taman ko taalik a ppnto on; na mataan! a so Allah na so gii niyo nggolawlaan na Kaip Iyan?

30

Giyoto man na sabap sa mataan! a so Allah na Skaniyan so bnar; na mataan! a so pphanongganowin iran a salakaw Rkaniyan na ribat; na mataan! a so Allah, na Skaniyan so Maporo, a Mala.

31

Bang ka da maylay a mataan! a so manga kapal na pphlalatas ko kalodan sabap ko limo o Allah? - ka pphakiilay Niyan rkano so manga tanda Iyan? Mataan! a dn a matatago roo man a titho a manga tanda ko oman i mapantang, a mananalamat.

32

Na igira a kiyakoloban siran sa bagl a lagid o manga palaw, na mangni siran ko Allah, a totolabosn iran Rkaniyan so pangni. Na kagiya a sabtn Iyan siran, a iraot siran ko kalopaan; na so sabaad kiran na miyaginontolan. Na da a zangka ko manga tanda Ami a rowar ko oman i makadorat, a miyongkir!

33

Hay manga manosiya, onoti niyo so Kadnan iyo, go kalkn iyo so gawii a da a khiyogop o mimbawata ko wata iyan, go da ko inimbawata i ba niyan kaogopi so mimbawata on, sa mayto bo. Mataan! a so diyandi o Allah na bnar: Na oba kano malimpang o kawyagoyag ko doniya, go oba kano malimpang sa sabap ko (katigr o) Allah o pphlilimpang.

34

Mataan! a so Allah na zisii Rkaniyan so katawi ko bangkit; go so kapphakatorona Niyan ko oran; go katawan Iyan so nganin a zisii ko manga tiyan. Na di katawan o baraniyawa o antonaa i mapnggalbk iyan mapita: Go di katatawan o baraniyawa o anday lopa a phatayan iyan. Mataan! a so Allah na Matao, a Kaip.

Total Number of Verses: 30

1

Alif, Lam, Mim. (so Allah i Matao ko paka-aantapan Iyan on.)

2

Na initoron so kitab a da a sangka a madalm on, - a phoon ko Kadnan o manga kaadn.

3

Ino a di iran tharoon a: "Pimbaas aya o Mohammad?" Kna, ka skaniyan so bnar a phoon ko Kadnan ka, ka an ka mapakaiktiyar so pagtaw a da a miyakatalingoma kiran a miyamakaiktiyar a miyaonaan ka, ka an siran makakdg ko ontol.

4

So Allah so miyadn ko manga langit, ago so lopa, go so nganin a pagltan a dowa nan, sii ko nm a alongan; oriyan iyan na lominiyawaw ko aras sa samporna a kaliyawaw ko domadait on: da a bagian iyo a salakaw Rkaniyan, a Panarigan, go da a Phangongogopan: Ino kano di phananadm?

5

Tomatakdir ko sogoan a phoon ko langit a phagowitn ko lopa: Oriyan iyan na phamanik sii Rkaniyan, sii ko alongan, a miyabaloy so diyangka iyan a sanggibo ragon ko itongan iyo (giyoto so alongan a qiyamah).

6

Giyoto man so Matao ko gaib, ago so mapayag, a Mabagr, a Makalimoon;

7

So miphiyapiya ko langowan taman a inadn Iyan: Go piyakapoon Iyan a kiyaadna Niyan ko manosiya ko lipaw,

8

Oriyan iyan na biyaloy Niyan so moriyataw Niyan a phoon sa rasa a phoon sa ig a malowig:

9

Oriyan iyan na inimasad Iyan thaong skaniyan, go inimasok Iyan on so pd ko niyawa a inadn Iyan. Na tiyagoan kano Niyan sa kan'g, go manga kaylay, go manga poso; miyakaytoito a kapphanalamat iyo!

10

Na pitharo iran: "Ino amay ka zanaw kami ko lopa, ba mataan! a skami na khatago kami dn ko kaadn a bago? Kna, ka siran na so kithoonaan ko Kadnan iran na oongkirn iran!

11

Tharoang ka a: "Thangan'ng kano o Malakalmawt, a so piyaka kibir rkano, oriyan iyan na sii kano ko Kadnan iyo phamakandoda."

12

Na o maylaing ka amay ka so manga baradosa a misosondong iran a manga olo iran sa hadapan o Kadnan iran, (matharo iran:) "Kadnan ami, miyakaylay kami, go miyakan'g kami: Na pakakasoya kaming Ka (sa doniya): Ka nggalbk kami sa mapiya: Mataan! a skami na mithomangkd kami."

13

Na o kabaya Ami, na khibgay Ami dn ko oman i ginawa so toroan rkaniyan: Na ogaid na miyatanto so katharo a phoon Rakn: "Mataan a ipnopno Akn dn ko naraka Jahannam so sabaad ko manga jinn, go so manga manosiya langon."

14

"Na taami niyo sa sabap ko kiyapakalipati niyo ko kapakambabaratmowa sa alongan iyo wai, mataan! a Skami na piyakalipatan Ami skano na taami niyo so siksa a kakal sabap ko pinggolawla niyo!"

15

Aya dn a mapaparatiyaya ko manga ayat Ami na so siran a igira a miyaaloy kiran skaniyan, na somondong siran, a khisosodiod, go ithasbik iran so podi ko Kadnan iran, a siran na di siran phmaratabat.

16

Pkhakalkat so manga kilid iran ko manga igaan, pphamangni siran ko Kadnan iran, sa kalk, ago arap: Go so sabaad ko inibgay Ami kiran na ipphammgay ran.

17

Na di katawan o ginawa so piyagma a bagian iran a kapipiya ginawa, a balas, sabap ko pinggolawla iran (a manga pipiya).

18

Ino so taw a aya btad iyan na mapaparatiyaya, ba lagid o taw a aya btad iyan na songklid? Kna a ba siran magizan.

19

Aya pman a so miyamaratiyaya, go pinggalbk iran so manga pipiya, na bagian iran so sorga a Jannatol Ma'wah, a tinibaba a darpa sabap ko pinggolawla iran (a manga pipiya).

20

Na so pman so miyamanongklid, na darpa iran so naraka: Oman iran khadiyatn a kapakaawa iran on, na pakakasowin siran on, go tharoon kiran: "Taami niyo so siksa ko naraka, a so skano na gii niyo to pakambokhagn."

21

Na mataan a pphakataamn Ami siran dn ko siksa a korang (sii sa doniya) ko dapn so siksa a mala (ko akhirat), ka an siran makambalingan (ko ontol).

22

Na ba adn a lbi a darowaka a di so taw a miyaaloy so manga ayat o Kadnan iyan, oriyan iyan na tiyalikhodan iyan? Mataan! a Skami i ziksa ko manga rarata i ongar.

23

Na sabnsabnar a inibgay Ami ko Mosa so kitab: Na oba ka matago ko anganangan ko kithoonaan ka rkaniyan: Go inisnggay Ami oto a toroan ko manga moriyataw o Israil.

24

Go biyaloy Ami so sabaad kiran a manga nakoda, a pkhipamando iran so sogoan Ami, ko masa a kiyaphantang iran; go miyabaloy siran ko manga ayat Ami a khitatangkd.

25

Mataan! a so Kadnan ka na Skaniyan i khokom ko lt iran ko alongan a qiyamah, sii ko siran a di siran on phagayonayon.

26

Ba kiran da makanggonanao so kadakl a bininasa Mi ko miyaonaan iran, a miyagapidapid a manga pagtaw, a pphakalalakaw siran ko manga darpa iran? Mataan! a adn a matatago roo man a titho a manga tanda: Ba siran di phamamakin'g?

27

Ba iran da maylay a mataan! a Skami na ipphamakaig Ami so ig ko lopa a kabagabagas, na pphakagmawan Ami sa sabap rkaniyan sa pr a pphakakan on so manga ayam iran, go so manga ginawa iran? Ba siran di phangilaylay?

28

Na gi iran tharoon: "Anda i masa angkai a kapakadaag, o skano i manga bnar?"

29

Tharoang ka a: "Sii ko alongan a kapakadaag, (a giyoto so alongan a qiyamah), na di phakanggay a gona ko siran a miyamangongkir so paratiyaya iran. Go di kiran mapthataalik."

30

Na talikhoding ka siran, go nayaw ka: Mataan! a siran, na khinanayaw (ko phakatalingoma a mapnggolawla).

Total Number of Verses: 73

1

Hay Nabi, lalayonang ka so kalk ko Allah, go ding ka pagonoti so manga kafir, go so manga monapik: Mataan! a so Allah na tatap a Matao, a Mawngangn.

2

Go onoting ka so iphagilaham rka a phoon ko Kadnan ka: Mataan! a so Allah na tatap a so gii niyo nggolawlaan na Kaip Iyan.

3

Go sariging ka so Allah, ka makatatarotop so Allah a somisiyap.

4

Daa singgayan o Allah a mama sa dowa a poso sii ko smba niyan: Go da Niyan baloya so manga karoma niyo a so ipphangingiring iyo siran (ko manga ina iyo) a manga ina iyo: Go da Niyan baloya so piyamangowa niyo a manga wata iyo a manga wata iyo. Giyoto man na katharo iyo a sii bo ko manga ngari iyo. Na so Allah i gii tharo ko bnar, go Skaniyan i dii nggonanao ko lalan.

5

Talo niyo kiran so manga ama iran: Giyoto i tanto a kaontol sii ko Allah. Na odi niyo katawi so manga ama iran, na manga pagari niyo (siran) sii ko agama, go manga ginawai niyo. Na da a dosa niyo sii ko miyaribat kano ron: Na ogaid na so pimbaba o manga poso iyo: Na tatap a so Allah na Manapi, a Makalimoon.

6

So Nabi i lbi a patot (ko kasisiyapa) ko miyamaratiyaya a diso manga ginawa iran, go so manga karoma niyan na manga ina iran. Na so thotonganaya na so sabaad kiran i lbi a patot (ko kapangowaris) sii ko sabaad, sii ko kitab o Allah a di so miyamaratiyaya ago so manga Mohajir: Ogaid na so kanggolawlai niyo ko manga ginawai niyo sa mapiya: Na miyabaloy oto sii ko kitab a misosorat.

7

Na gowani na tiyarima Ami phoon ko manga nabi so diyandi iran, go phoon rka, go phoon ko Noh, go so Ibrahim, go so Mosa, go so Eysa a wata o Maryam: Go kominowa Kami kiran sa diyandi a mapnd:

8

Ka ipagiza Iyan ko miyamanoman so kiyatoman iran: Na pithiyagaran Iyan so manga kafir sa siksa a malipds.

9

Hay so miyamaratiyaya! tadmi niyo so limo rkano o Allah, gowani a makawma rkano so manga tantara, na siyogoan Ami siran sa ndo, go manga tantara (a manga malaikat) a da niyo to maylay: Na tatap a so Allah na so gii niyo nggolawlaan na phagilayn Iyan.

10

Gowani na miyakaoma siran rkano phoon ko kaporoan iyo, go phoon ko kababaan iyo, go gowani na miyagilagila so manga kaylay, go iniraot so manga poso ko manga bakrng, go ipphagarangan iyo so Allah sa manga arangan!

11

Roo miyatiyoba so miyamaratiyaya: Go kiyayongkong siran sa kayongkong a sangat.

12

Na gowani na gii tharoon o manga monapik, go so kiyatagoan so manga poso iran sa gdamn a: "Da a inidiyandi rktano o Allah, go so sogo Iyan a rowar sa limpangan!"

13

Na gowani na pitharo o isa ka sagorompong kiran: "Hay taw sa Yathrib, da a khadarpaan iyo na kasoy kano!" Na pphagodas so salompok kiran ko Nabi, gi iran tharoon a: "Mataan! a so manga walay ami na mamamayas", a kna a ba oto mamamayas: Ka da a kadiyat iran a rowar sa kapalagoy.

14

Na o kiyasoldan siran phoon ko mbalabala on, oriyan iyan na piyangni kiran so kapanakoto, na imbgay ran dn oto, na da a khitarg iran roo a rowar sa mayto!

15

Na sabnsabnar a miyabaloy siran a miyakiphasada siran ko Allah gowani sa di siran phalagoy ko manga talikhodan; na tatap a so diyandi o Allah na khiiza.

16

Tharoang ka a: "Di rkano phakaompiya so kapalagoy, o palagowi niyo so kapatay, odi na so kabono; na samawto na da bo a phakisawitan rkano a rowar ko mayto!"

17

Tharoang ka a: "Antawaa i makarn rkano ko Allah amay ka pakaantapan kano Niyan sa marata, odi na pakaantapan kano Niyan sa limo?" Na da a khatoon iran a bagian iran a salakaw ko Allah, a Panarigan, ago tabanga.

18

Sabnar a katawan o Allah so pphamanmpowa rkano, go so gii thataro ko manga pagari ran a: "Song kano rkami", go da a izong iran ko kambonoay a rowar ko mayto,

19

Pliligtan kano iran. Na igira a miyakaoma so kalk na maylaing ka siran a ttntngang ka iran, a pkhatingr a manga mata iran, lagid o mikokolob rkaniyan so kapatay: Na igira a miyada so kalk, na panondiyarn kano iran a manga katharo, a magarang, manga liligt ko mapiya. Siran man na da siran paratiyaya; na inilang o Allah so manga amal iran: Na miyabaloy oto sii ko Allah a malbod.

20

Arangan iran ko mithampotampong na da siran awa; na o makatalingoma so mithampotampong (zaroman), na mapndingandingan iran a oba bo mataan! a siran na miyatago siran ko manga badawi, na pkhiiza iran so manga totholan rkano; na apiya miyatago siran rkano na da a kapagato iran a rowar ko mayto.

21

Sabnsabnar a miyaadn rkano sii ko Rasolollah so ladiyawan a mapiya, sii ko taw a miyabaloy a aarapn iyan so (balas o) Allah, ago so alongan a mawri, go tiyadman iyan so Allah sa madakl.

22

Na kagiya a maylay o miyamaratiyaya so mithampotampong, na pitharo iran a: "Giyaya so inidiyandi rktano o Allah, ago so sogo Iyan, na tomiyoman so Allah ago so sogo Iyan". Na da a minipagoman iyan kiran a rowar sa paratiyaya, ago kambayorantang.

23

Adn a pd ko miyamaratiyaya a manga mama a tiyoman iran so inibgay ran a diyandi ko Allah sii Rkaniyan: Na so sabaad kiran na minitoman iyan so samaya iyan, go so sabaad kiran na nomanayaw: Na da siran pagalin sa samporna a kaalin:

24

Ka mbalasan o Allah so miyamanoman sabap ko kiyatoman iran, go ziksaan Iyan so miyamanangin o kabaya Iyan, odi na phakatawbatn Iyan siran: Mataan! a so Allah na tatap a Manapi, a Makalimoon.

25

Na piyakandod o Allah so miyamangongkir a khiootgan siran, a da a miyaparoli iran a mapiya; na lininding o Allah so miyamaratiyaya ko kambonoay. Na tatap a so Allah na Mabagr, a Phakapgs.

26

Na piyakatpad Iyan so tomiyabang kiran a pd ko tiyoronan ko kitab, - phoon ko manga iliyan iran, go tiyago Iyan ko manga poso iran so kalk. So sabaad na pphamono on iyo, go pphamiyagn iyo so sabaad.

27

Na piyakipangowarisan Iyan rkano so lopa iran, go so manga bangon iran, go so manga tamok iran, go so lopa a da niyo to kapanadai. Na tatap a so Allah sii ko langowan taman na Gaos Iyan.

28

Hay Nabi! tharoang ka ko manga karomang ka a: "O skano na kabaya iyo so kawyagoyag ko doniya, go so parahiyasan on, na song kano sii ka ibgay akn rkano so kabaya iyo, go talakn ko skano sa talak a maliwanag."

29

Na o skano na kabaya iyo so (ikasosoat o) Allah go so sogo Iyan, go so ingd a mawri, na mataan! a so Allah na pithiyagaran Iyan so miphipiyapiya rkano sa balas, a mala.

30

Hay manga karoma o Nabi, sadn sa somogok rkano sa pakasisingay, a mapayag, na thakpn on so siksa sa dowa takp; na miyabaloy oto sii ko Allah a malbod.

Part 22

31

Na sadn sa mangongonotan rkano ko Allah go so sogo Iyan, go nggalbk sa mapiya, na imbgay Ami ron so balas rkaniyan sa takp: Go thiyagaran Ami skaniyan sa pagpr a mapiya.

32

Hay manga karoma o Nabi, kna a ba kano lagid o pithanggisaan ko manga babay: O pangongonotan kano, na di niyo phakaronoka so katharo, ka maynam o katatagoan so poso iyan sa gdamn, go tharo kano sa katharo a ontol.

33

Go kakadn kano ko manga walay niyo, go di kano phangangarig, sa kapangangarig ko kadaa mlng a paganay; na tindgn iyo so sambayang, go tonaya niyo so zakat; go onoti niyo so Allah go so sogo Iyan. Aya dn a kabaya o Allah na an Iyan rkano maylang so marzik (hay) taw ko walay (o Nabi), go an kano Niyan masoti sa samporna a kasoti.

34

Go tanodi niyo so pphangadian ko manga walay niyo, a manga ayat o Allah, go ongangn: Mataan! a so Allah na tatap a Lambasi-katao, a Kaip.

35

Mataan! a so mimbabayorantang a manga mama, go so mimbabayorantang a manga babay, go so miyamaratiyaya a manga mama, go so miyamaratiyaya a manga babay, go so miyamangongonotan a manga mama, go so miyamangongonotan a manga babay, go so miyamangimbnar a manga mama, go so miyamangimbnar a manga babay, go so manga papantang a manga mama, go so manga papantang a manga babay, go so khipangangalimbabaan a manga mama, go so khipangangalimbabaan a manga babay, go so gii zadka a manga mama, go so gii zasadka a manga babay, go so manga barapowasa a manga mama, go so manga barapowasa a manga babay, go so khizisiyapn iran so manga ginawa iran a manga mama, go so manga masiyapn a manga babay, go so khipakatatadm ko Allah sa madakl a manga mama, go so khipakatatadm a manga babay, na pithiyagaran siran o Allah sa maap, go balas a mala.

36

Na da mapatot ko miyaratiyaya a mama, go da ko miyaratiyaya a babay, igira a adn a inisogo o Allah ago so sogo Iyan, a sogoan, oba adn a mabaloy a bagian iran a kambayabaya ko okit iran: Na sadn sa sorangn iyan so Allah go so sogo Iyan, na sabnar a miyadadag sa kadadag a mapayag.

37

Na gowani na giing ka tharoon ko inikalimo o Allah skaniyan, go inikapdii ka skaniyan a: "Thatapiin ka si karomang ka, go kalkn ka so Allah"; pag-umaan ka sii ko ginawang ka so nganin a so Allah na phayagn Iyan oto: Go ipkhalk ka so manga manosiya, a so Allah i patot a ikhalk ka Skaniyan. Na kagiya a minggolalan on i zayd so hadiyat, na piyakipangaroma Mi rka skaniyan: ka an daa khabaloy ko miyamaratiyaya a dosa sii ko manga karoma o piyamangowa iran a manga wata iran, igira a mininggolalan iran kiran so hadiyat. Na tatap a so sogoan o Allah na mapnggolawla.

38

Da a miyaadn ko Nabi a dosa sii ko piyakay ron o Allah. Okit o Allah sii ko siran a miyanga iipos gowani. Na miyabaloy so sogoan o Allah a taks, a madidiyangka.

39

Siran na ipzampay ran so manga sogoan o Allah, go ipkhalk iran Skaniyan, go da a ikhalk iran a isa bo inonta so Allah. Na makatatarotop so Allah a Pagiitong.

40

Da mabaloy so Mohammad a ama o isa ko manga mama rkano, na ogaid na sogo o Allah, go mori ko manga nabi: Na tatap a so Allah sii ko langowan taman na katawan Iyan.

41

Hay so miyamaratiyaya! tadmi niyo so Allah sa tadm a madakl;

42

Go phoroporoon iyo Skaniyan ko kapitapita, go so kagabigabi.

43

Skaniyan so pphangalimo rkano, go so manga malaikat Iyan (na ipkhalimo kano iran), ka phakaawaan kano Niyan phoon ko manga lilibotng a makasong kano ko maliwanag: Na tatap a Makalimoon ko miyamaratiyaya.

44

Aya kormat kiran ko alongan a kimbaratmowaan iran ko Allah na "Salaam". Go pithiyagaran Iyan siran sa balas a mapiya.

45

Hay Nabi, mataan! a Skami na siyogo Ami ska a saksi, go pphamanothol sa mapiya, go pphamakaiktiyar,

46

Go pphanolon ko (onot ko) Allah sabap sa idin Iyan, go palitaan a masindaw.

47

Na pphamanotholang ka ko miyamaratiyaya a: Mataan! a adn a bagian iran a phoon ko Allah a kakayaan a lbi a mala.

48

Na ding ka pagonoti so miyamangongkir, go so manga monapik, go talikhoding ka so kaphringasaa iran (rka), go sariging ka so Allah; ka makatatarotop so Allah a Sasarigan.

49

Hay so miyamaratiyaya, igira a miyamangaroma kano ko miyamaratiyaya a manga babay, oriyan iyan na inizoway niyo siran ko da niyo kiran pn kiproradaan, na da a bagian iyo kiran a ida a maphagitong iyo skaniyan: Na bgi niyo siran sa ipakapiya a ginawa iran; go blaga niyo siran sa kamblag, a maliwanag.

50

Hay Nabi, mataan! a Skami na hiyalal Ami rka so manga karomang ka, a so minibgaing ka so manga btang kiran; go so miyakhapaar o tangan ka a pd ko piyakitaban rka o Allah (ko kiyathidawa); go so manga wata a babay o pagari i ama a ka, go so manga wata a babay o babay i ama a ka, go so manga wata a babay o laki i ina a ka, go so manga wata a babay o pagari i ina a ka, a siran so miyamanogalin sa ingd a pd ka; go so babay a mapaparatiyaya o thawakimn iyan a ginawa niyan ko Nabi, o kabaya o Nabi a kapangaromaa niyan on; - sii rka bo miyapharo, liyo ron so miyamaratiyaya; sabnar a katawan Ami so inipaliyogat Ami kiran makapantag ko manga karoma iran, go so miyakhapaar o manga tangan iran, ka an da a khaadn rka a masimpit. Na tatap a so Allah na Manapi, a Makalimoon.

51

Maphakaoring ka so taw a kabaya aka kiran, go khikakp ka so taw a kabaya aka: Na sa taw a khabayaan ka a pd ko taw a tiyawarang ka na da a dosang ka (on). Giyoto man i marani a kaphakapiya a ginawa iran, go di iran kapakapmboko, go kasosoat iran ko inibgaing ka kiran sa tanan siran: Na so Allah na katawan Iyan so zisii ko manga poso iyo: Na tatap a so Allah na Matao, a Matigr.

52

Di rka halal so manga babay ko oriyan aya, go di (rka halal) so kasambiing ka kiran - sa pd a manga karoma, apiya i kiya soata rka o kataid iran, inonta so miyakhapaar o tangan ka: Na tatap a so Allah sii ko langowan o shay' na totonggoan Iyan.

53

Hay so miyamaratiyaya, di kano zold ko manga walay o Nabi, - inonta o kaydini kano, sii ko pangn'ngkn, sa di niyo nanayawa i kaloto iyan: Na ogaid na igira a tiyalowan kano, na sold kano; na igira a miyakakan kano, na mblablag kano, na di kano pphama-nmbatmbang sa makapantag sa tothol. Mataan! a giyoto man na khabaloy a phakaringasa ko Nabi: Na ipkhaya kano niyan, na so Allah na di Niyan ikhaya so bnar. Na igira adn a ipagiza iyo kiran a hadiyat, na izaan iyo kiran ko liyo o rnding: Giyotoman i tanto a phakasoti ko manga poso iyo, ago so manga poso iran. Na da rkano mapatot oba niyo ringasaa so Rasolollah, go oba niyo pangaromaa so manga karoma niyan ko oriyan iyan sa dayon sa dayon. Mataan! a giyoto man na miyabaloy sii ko Allah a mala (a dosa).

54

O adn a payagn iyo a shay' odi na pagmaan iyo skaniyan, na mataan! a so Allah na tatap a sii ko langowan taman na katawan Iyan.

55

Daa dosa iran sii ko manga ama iran, go da ko manga wata iran a manga mama, go da ko manga laki ran, go da ko manga wata a manga mama o manga laki ran, go da ko manga wata a manga mama o manga pagari ran, go da ko manga babay kiran, go da ko miyakhapaar o manga tangan iran (i dosa). Na kalkn iran so Allah; mataan! a so Allah na tatap a Saksi ko langowan taman.

56

Mataan! a so Allah ago so manga malaikat Iyan na ipphangalimo iran so Nabi: Hay so miyamaratiyaya, pangni niyo sa limo skaniyan, go pangni niyo sa kalilintad a samporna a kalilintad.

57

Mataan! a siran a gii ziyanta ko Allah ago so sogo Iyan, na pimorkaan siran o Allah sii sa doniya, go sa akhirat, go pithiyagaran Iyan siran sa siksa a phakahina.

58

Na siran a gi iran iziyanta ko miyamaratiyaya a manga mama, go so miyamaratiyaya a manga babay so da iran manggalbk, na sabnar a miyakaawid siran sa tmpo, go dosa a mapayag.

59

Hay Nabi! tharoang ka ko manga karomang ka, go so manga wata a ka a manga babay, go so manga babay ko miyamaratiyaya, a sapngn iran ko manga olo iran go sii ko manga paras iran so manga nditarn iran go so manga sapng iran, ka an kadilongi so manga paras iran ago so manga rarb iran ago so manga olo iran. Giyoto man i lbi a marani a kakilala a kiran, na di siran maziyanta. Na tatap a so Allah na Manapi, a Makalimoon.

60

Ibt odi gnk so manga monapik, go so siran a katatagoan so manga poso iran sa gdamn, go so pphamangalap sa Madinah, na mataan a pakipangarasiyan Ami rka siran dn: Oriyan iyan na da a makiziringan kiran rka roo inonta so mayto:

61

Piyangamomorkaan: Apiya anda siran matoon na pphangowaan siran, go pphamono on siran sa samporna a kapamono.

62

Okit o Allah sii ko siran a miyangaiipos gowani: Na da dn a khatoon ka a kasambii ko okit o Allah.

63

Ipagiza rka o manga manosiya so bangkit, tharoang ka a: "So katawi ron na sii bo ko Allah": Na antawaa i kaphakitokawan iyan rka? - sa masikn a so bangkit na khabaloy a marani!

64

Mataan! a so Allah na pimorkaan Iyan so manga kafir, go pithiyagaran Iyan siran sa kadg, -

65

Makakakal siran on sa dayon sa dayon: da a khatoon iran a panarigan, go da a tabanga.

66

Sii ko gawii a kakhliklida ko manga paras iran ko apoy, na matharo iran: "Ah hay! Oba tano bo kiyaonotan so Allah go kiyaonotan tano so Rasol!"

67

Go Tharoon iran a: "Kadnan ami, mataan! a skami na kiyaonotan ami so manga nakoda ami, go so manga ala rkami, na miyadadag kami ran ko lalan."

68

"Kadnan ami, bging Ka siran sa dowa takp ko siksa, go pmorkaing Ka siran sa morka a mala!"

69

Hay so miyamaratiyaya, di niyo zowaa so siran a miziyanta ko Mosa, na piyakakiyas skaniyan o Allah ko pitharo iran: Go miyabaloy sii ko Allah a mmnangan.

70

Hay so miyamaratiyaya, onoti niyo so Allah, go tharo kano sa katharo a ontol:

71

Ka tanorn Iyan rkano so manga galbk iyo, go napi Niyan rkano so manga dosa niyo: Na sa taw a onotan iyan so Allah ago so sogo Iyan, na sabnar a miyakadaag sa daag a mala.

72

Mataan! a Skami na iniayag Ami so sarig ko manga langit go so lopa, go so manga palaw; na da iran pangrawa oba iran oto awidi, go inikalk iran oto: Na inawidan oto o manosiya; - mataan! a skaniyan na aya btad iyan na salimbot, a da a mlng iyan;

73

Kagiya ziksaan o Allah so manga monapik a manga mama, go so manga monapik a manga babay, go so manga pananakoto a manga mama, go so manga pananakoto a manga babay, go phakatawbatn o Allah so miyamaratiyaya a manga mama, go so miyamaratiyaya a manga babay: Na tatap a so Allah na Manapi, a Makalimoon.

Total Number of Verses: 54

1

So podi na rk o Allah, a so Khirk ko nganin a zisii ko manga langit go so nganin a zisii ko lopa: Go rk Iyan so podi ko akhirat: Go Skaniyan so Mawngangn, a Kaip.

2

Katawan Iyan so pphakasold ko lopa, go so pphakambowat a phoon rkaniyan; go so pphakatoron a phoon ko langit, go so pphakapanik ko sold iyan. Na Skaniyan so Makalimoon, a Manapi.

3

Na pitharo o siran a miyamangongkir a: "Di rktano phakatalingoma so bangkit": Tharoang ka: "Oway na! Ibt ko Kadnan ko, ka mataan a phakatalingoma rkano dn; - a Matao ko migagaib; - da a makaphagma on a timbang bo o ssrm sii ko manga langit, go da sii ko lopa: Go da a mayto a di giyoto, go da a mala, a ba di matatago ko kitab a mapayag:

4

Kagiya a mbalasan Iyan so miyamaratiyaya, go pinggalbk iran so manga pipiya: Siran man na adn a bagian iran a maap, go pagpr a mapiya."

5

Na so miyamanamar (mrn) ko manga ayat Ami, a rorompisan iran; na siran man na adn a bagian iran a siksa, - a pd ko sangat a siksa a malipds.

6

Na katawan o siran a piyamgan ko katao so initoron rka a phoon ko Kadnan ka a skaniyan so bnar, go makapnggonanao ko lalan o (Allah a) Mabagr, a Pphodin.

7

Na pitharo o siran a miyamangongkir: "Ba ami rkano thoroon so mama a phanotholn iyan rkano, a amay ka mazaropt kano sa samporna a kazaropt, na mataan! a skano na khatago dn ko kaadn a bago?

8

"Ba niyan inangkob so Allah sa kabokhag, antawaa ba katatagoi skaniyan sa bthang?" - kna, ka siran a di mapaparatiyaya ko akhirat, na khatago ko siksa, go so kadadag a mawatan.

9

Ba iran da maylay so kasasangoran iran, go so katatalikhodan iran, ko langit ago so lopa? O kabaya Ami, na khalandng Ami siran ko lopa, odi na khawlogan Ami siran sa sagintas ko langit. Mataan! a adn a matatago roo man a titho a tanda ko oman i oripn a pphananangoran.

10

Na sabnsabnar a bigan Ami so Dawood sa phoon Rkami a kakayaan: "Hay manga palaw, pndoyoga niyo skaniyan. Go so manga papanok. Go piyakalmk Ami ron so potaw;"

11

(Pitharo Ami:) "Phanday ka sa manga rabn a manga lolowag, go zokhoding ka sa ringkar, go ngalbk kano sa mapiya; mataan! a Sakn i phagilay ko gii niyo nggolawlaan."

12

Na (piyakaphasiyonot Ami) sii ko Solayman so ndo; a so sagad iyan ko kapipita na sawlan (a ilalakaw ron), go so sagad iyan ko kagabigabi na sawlan (a ilalakaw ron); go piyakatoga Ami ron so bowalan a galang; go so sabaad ko manga jinn na taw a gii nggalbk ko hadapan iyan, sabap ko idin o Kadnan iyan; na sa taw a phasiwang kiran ko sogoan Ami, na phakataamn Ami skaniyan ko siksa a kadg:

13

Ipphangmbaal iran sa kabaya iyan, a manga masjid, go manga toladan, go manga apang a ndalagid o paridi, go manga kodn a manga bbkn: "Nggalbk kano a manga tonganay o Dawood, sa kapanalamat. Mayto ko manga oripn Ko so mananalamat!"

14

Na kagiya a pakanggolalann Ami ron so kapatay, na da a miyakatoro kiran ko kiyapatay niyan a inonta so ingan ko lopa, a pkhn iyan so tongkat iyan: Na kagiya a maothang; na miyapayag so manga jinn a opama ka siran na katawi ran so migagaib, na di siran malanggay ko karomasayan a phakahina.

15

Sabnsabnar a adn a rk o (taw sa) Saba, sii ko darpa iran a tanda, a dowa a asinda, sa kawanan go sa diwang. (Pitharo kiran:) "Kang kano ko pagpr o Kadnan iyo, go panalamat kano Rkaniyan: Ingd a thatagompiya, na so Kadnan na Manapi!

16

Na tomiyalikhod siran, na biyotawanan Ami kiran so dgan o plit, go siyambian Ami kiran so dowa a asinda iran sa dowa a pamomolan a phagonga sa mapait, go dagiyangas, go nganin a sidar (kayo a maroni i raon ago onga, so raon iyan na iprigo sa miyatay) a mayto.

17

Giyoto man i inibadal Ami kiran sabap ko kiyaongkir iran: Na ba adn a mbadalan Ami saya a rowar ko miyongkir.

18

Go tiyagoan Ami so lt iran ago so lt o manga ingd (sa Sham) a so piyakandaklan Ami oto sa mapiya, sa manga ingd a manga babantay, go diniyangka Ami roo so kalalakaw: (pitharo Ami): "Lalakaw kano ron ko manga kagagawii go manga kadawndaw, a khisasarig kano."

19

Na pitharo iran: "Kadnan ami, pakakhakawatanaang Ka so lt o manga dkhai ami": Go pindarowakaan iran so manga ginawa iran. Na biyaloy Ami siran a manga tothol, go iniparak Ami siran sa samporna a kiparak. Mataan! a adn a matatago roo man a titho a manga tanda ko oman i mapantang, a mananalamat.

20

Na sabnsabnar a miyatoman kiran o iblis so antangan iyan, na kiyawnotan iran skaniyan, inonta so isa ka sagorompong a pd ko miyamaratiyaya.

21

Oba di daa kapaar iyan kiran, - ogaid na an Ami mapnto so taw a mapaparatiyaya ko akhirat sii ko taw a skaniyan na zasangka on: Na so Kadnan ka i somisiyap ko langowan taman.

22

Tharoang ka a: "Tawaga niyo so siran a initgo niyo (a tohan) a salakaw ko Allah: da a mipapaar iran a timbang o ssrm, sii ko manga langit go da sii ko lopa: Go da a mitotompok iran on, go da a tabanga iyan kiran;

23

"Go da a khibgay a gona o kapangalbalb sii ko hadapan Iyan, inonta sii ko taw a inidinan Iyan. Taman sa igira kiyadaan sa kalk so manga poso iran na tharoon iran a: Antonaa so pitharo o Kadnan niyo? Tharoon iran a: So bnar; go Skaniyan so Maporo, a Mala."

24

Tharoang ka a: "Antawaa i pphagpr rkano, a pphakapoon ko manga langit ago so lopa? Tharoang ka: So Allah; na mataan a skami odi na skano, na mataan a matatago ko toroan, odi na sii ko kadadag, a mapayag!"

25

Tharoang ka a: "Di rkano khiiza so minizala ami, go di rkami khiiza so gii niyo nggolawlaan."

26

Tharoang ka a: "Plimodn tano o Kadnan tano: Oriyan iyan na ikhokom Iyan rktano so bnar: Ka Skaniyan so Kokoman,"

27

Tharoang ka a: "Pakiilay niyo rakn so siran a inirimbang iyo Ron a manga sakotowa; sabnar, a kna, ka so bo so Allah, a Mabagr, a Mawngangn (a da a sakotowa Iyan)."

28

Na da a kiyasogo Ami rka (hay Mohammad) a rowar sa langkap ko manga manosiya, a pphamanothol sa mapiya, go pphamakaiktiyar, na ogaid na so kadaklan ko manga manosiya na di iran katawan.

29

Na gi iran tharoon a: "Anda dn angkai a diyandi (a siksa) o skano na manga bnar?"

30

Tharoang ka a: "Rk iyo so diyandi ko alongan, a di niyo to khisonggod sa isa ka oras, go di niyo khaktng."

31

Na pitharo o siran a miyamangongkir a: "Di ami dn pharatiyayaan angkai a Qor'an, go di (ami pharatiyayaan) so miyaonaan iyan". Na o maylaing ka amay ka so manga darowaka na tarongko on siran ko hadapan o Kadnan iran, na pangndodan o sabaad kiran so sabaad a katharo. Tharoon o siran a piyamangarasiyan ko siran a miyamanakabor a: "O da so skano, na miyabaloy kami dn a miyamaratiyaya!"

32

Tharoon o siran a miyamanakabor ko siran a piyamangarasiyan a: "Ba skami i miyakaalang rkano ko toroan ko oriyan o masa a kiyapakawma niyan rkano? Kna, ka miyabaloy kano a manga baradosa.

33

Na tharoon o siran a piyamangarasiyan ko siran a miyamanakabor a: "Kna! ka so antangan a marata ko kagagawii ago so kadawndaw: Gowani ko pzogoon kami niyo so kaongkir ami ko Allah go so kapangmbaal ami sa manga saginda Niyan (i miyakaalang rkami ko paratiyaya)!" Na misoln iran so kasndit ko masa a kaylaya iran ko siksa: Go tagoon Ami so manga patong ko manga lig o siran a miyamangongkir: Ba adn a imbalas kiran a rowar ko pinggolawla iran?

34

Na da a siyogo an Ami a ingd sa phamakaiktiyar, a ba da tharoa o manga olowan on a: "Mataan! a skami na so inisogo rkano to na inongkir ami."

35

Go pitharo iran a: "Skami i madakl i manga tamok go manga wata, go kna a ba skami i phamaniksaan."

36

Tharoang ka a: "Mataan! a so Kadnan ko na pphakawladn Iyan so rizki ko taw a kabaya Iyan, go pphakasimpitn Iyan, na ogaid na so kadaklan ko manga manosiya na di iran katawan."

37

Na kna a ba so manga tamok iyo, go kna a ba so manga wata iyo, so maphakarani kano niyan Rkami sa samporna a kapakarani: Ogaid na so taw a miyaratiyaya, go miyagamal sa mapiya na siran man i khibagian ko balas a takp sabap ko pinggolawla iran, go siran i khatago ko manga darpa ko sorga a khisasarig siran!

38

Na siran a mananamar sa kabinasa o manga ayat Ami, a rorompisan iran, na siran man i phamakadarpaan ko siksa.

39

Tharoang ka a: "Mataan! a so Kadnan ko na pphakawladn Iyan so rizki ko taw a kabaya Iyan ko manga oripn Iyan, go pphakasimpitn Iyan on. Na apiya antonaa i mapnggasto niyo a shay' na Skaniyan i pzambi on: Go Skaniyan i taralbi a mapiya ko (pphamamgay sa riskhi).

40

Na sii ko gawii a limodn Iyan siran langon, oriyan iyan na tharoon Iyan ko manga malaikat a: "Ba siran aya so skano i sinimba iran?"

41

Tharoon iran a: "Soti Ka! Ska i Panarigan ami a salakaw kiran. Kna, ka siran na aya pzimbaan iran na so manga jinn: So kadaklan kiran na siran i paparatiyayaan iran."

42

Na sa alongan oto na da a mapkhapaar o sabaad rkano a bagian o sabaad a gona, odi na morala: Na tharoon Ami ko siran a mindadarowaka a: "Taami niyo so siksa ko naraka, - a so skano na piyakambokhag iyo skaniyan!"

43

Na igira a pphangadian kiran so manga ayat Ami a manga rarayag, na tharoon iran a: "Da ko ungkai inonta na mama a kabaya iyan a kaalangan kano niyan sii ko pzimbaan o manga loks iyo". Go pitharo iran a: "Da ko ngkaya inonta na kabokhag a pimbabaas". Go pitharo o siran a miyamangongkir ko bnar ko kiyapakatalingoma niyan kiran a: "Da ko ngkaya inonta na balik mata, a mapayag!"

44

Na da a inibgay Ami kiran a manga kitab a kapphangadian iran oto, go da a miyasogo Ami kiran a miyaonaan ka a pphamakaiktiyar.

45

Na piyakambokhag o siran a miyaonaan iran (so manga sogo), a da siran raotn ko ikazasapolo bagi ko inibgay Ami kiran: Na piyakambokhag iran so manga sogo Akn!

46

Tharoang ka a: "Aya bo a ipagndao akn rkano na isa: So kipamayandgn iyo (ko bnar) sa makapantag ko Allah, - sa madowadowa kano, sa matarambisa kano, - oriyan iyan na pphamimikiran kano: Da ko (Mohammad a) pd iyo i bthang: Da ko skaniyan na inonta na pphamakaiktiyar rkano ko da pn so siksa a sangat."

47

Tharoang ka a: "Da a phangning ko rkano a sokay: Ka giyoto na rk iyo: da a sokay akn inonta so zisii ko Allah: Go Skaniyan i Saksi ko langowan taman."

48

Tharoang ka a: "Mataan! a so Kadnan ko na ipzorong Iyan so bnar; lbi a Matao ko manga gaib."

49

Tharoang ka a: "Miyakatalingoma so bnar, go di makapphoon so ribat go di phakakasoy."

50

Tharoang ka a: "O madadag ako, na khadadag ako sa sii bo phakatana ko ginawa ko: Na o makaontol ako, na sabap ko iphagilaham rakn o Kadnan ko: Mataan! a Skaniyan i Pphakan'g, a Marani."

51

Na o maylaing ka so masa a kalki kiran, na da a kapakapalagoy (ran), go gandrn siran phoon ko darpa a marani.

52

Go Tharoon iran a: "Piyaratiyaya mi skaniyan (a Qor'an);" na andamanaya i kakhaparoliya iran ko kiraot ko kathawbat phoon ko darpa a mawatan-

53

A sabnar a inongkir iran oto gowani, go pphangsarn iran so migagaib ko darpa a mawatan?

54

Na kaltan siran ago so mazizinganin iran, lagid o inikidia ko manga izan iran sa kpit gowani: Mataan! a siran na miyatago siran ko kazasangka, a mapayag a kazangka.

Total Number of Verses: 45

1

So podi na rk o Allah, a mimbaas ko manga langit ago so lopa, a biyaloy Niyan so manga malaikat a manga sogo, a adn a manga papak iyan, ndodowa, go tthlo, go phapat: Phagomanan iyan ko kaadn so kabaya Iyan: Mataan! a so Allah sii ko langowan taman na Gaos Iyan.

2

Sadn sa lkaan o Allah ko manosiya a limo na da a makarnon: Go sadn sa rnn Iyan on, na da a makabotawan on ko oriyan Iyan: Na Skaniyan so Mabagr, a Mawngangn.

3

Hay manga manosiya! tadmi niyo so limo o Allah rkano! Ba adn a miyangadn a salakaw ko Allah, a Pphagpr rkano ko phoon ko langit ago so lopa? da a tohan a inonta Skaniyan: Na andamanaya i kapthalikhod iyo?

4

Na oba ka iran pakapmbokhaga, na sabnar a piyakambokhag so manga sogo a miyaonaan ka: Na sii bo ko Allah phakandoda so pkhakawlawla.

5

Hay manga manosiya, mataan! a so diyandi o Allah na bnar. Na oba kano malimpang o kawyagoyag ko doniya, go oba kano malimpang ko (okit o) Allah o phlilimpang.

6

Mataan! a so shaytan na ridoay niyo: Na baloya niyo skaniyan a ridoay. Aya bo a ipthawag iyan ko maampil on, na an siran mabaloy a pd ko manga taw ko kadg (ko naraka).

7

Siran a miyamangongkir, na adn a bagian iran a siksa a sangat: Na so miyamaratiyaya, go pinggalbk iran so manga pipiya, na adn a bagian iran a maap, go balas a mala.

8

Ino so taw a pipharasan on so marata ko galbk iyan, na aya kiyailaya niyan on na mapiya. (ba lagid o tiyoro o Allah)? Na mataan! a so Allah na ndadagn Iyan so taw a kabaya Iyan, go thoroon Iyan so taw a kabaya Iyan. Na oba maylang so ginawang ka sa pantag o manga awida akal kiran: Mataan! a so Allah na katawan Iyan so gi iran nggolawlaan!

9

Na so Allah so miyotawan ko manga ndo, na pkhiporo iyan so gabon, na ipphamakaig Ami oto ko ingd a miyatay, na inoyag Ami sa sabap rkaniyan so lopa ko oriyan o kiyapatay niyan: Lagid man oto so kapagoyaga ko miyamatay!

10

Sa taw a kabaya iyan so mnang, na rk o Allah so mnang sa kalangolangowan iyan. Sii Rkaniyan pphakapanik so katharo a mapiya: Go so amal a ontol; na ipphoro Iyan skaniyan (ka ptharimaan Iyan). Na so pphamagantangan ko manga rarata, na adn a bagian iran a siksa a sangat; na so antangan o siran oto na giyoto na khaylang.

11

Na so Allah i miyadn rkano phoon ko botha, oriyan iyan na phoon ko notfa; oriyan iyan na biyaloy kano Niyan a nggaganapa. Na da a ikhawgat o babay, go da a ipmbawata iyan, a ba di sii ko katao Niyan. Go da a pagmbowayn a khamboway, go da a phakababaan so omor iyan, a ba di matatago ko daptar (a so Laoh Makhpod). Mataan! a giyoto man sii ko Allah na malbod.

12

Na kna a ba magizan so dowa a kalodan, - giyai na tabang, a pakadnggaw, a malbod so kaynoma on, go giyaya na matimos, a mapld. Na pphakakan kano ko pphakapoon ko oman i isa roo, a sapo a malmbo, go mapphakagmaw niyo so pakayan a gii niyo to manditar (a manga montiya); na pkhailaing ka so manga kapal rkaniyan a pphamangtas, ka an iyo mapphloloba so kakawasaan Iyan, go ang kano makapphanalamat.

13

Pphakasoldn Iyan so gagawii ko dawndaw, go pphakasoldn Iyan so dawndaw ko gagawii, go piyakaphasiyonot Iyan so alongan ago so olan: Oman i isa roo na pphalalagoy sii ko taalik a miyapnto. Giyoto man so Allah, a Kadnan iyo, a Khirk ko kapaar. Na so siran a pphanongganowin iyo a salakaw Rkaniyan, na da a mipapaar iran a izambo o dadanglisn.

14

O pangni kano kiran, na di iran khan'g so pangni niyo, na apiya man'g iran, na di kano iran smbagn. Na sii ko alongan a qiyamah na pagongkirn iran so kinisakoto niyo (kiran ko Allah). Na da a makaphanothol rka a lagid o (Allah a) Kaip.

15

Hay manga manosiya, skano na manga baraarapan ko Allah: Na so Allah na Skaniyan so Kaya, a Pphodin.

16

O kabaya Iyan na khaylang kano Niyan, go tomalingoma sa kaadn a bago.

17

Na kna oto a ba margn ko Allah.

18

Na di khaawidan o maawid so dosa o pd iyan. Go apiya pangnin o kappndan so kaawidi ron, na da a phakiawidan on a mayto bo, apiya pn skaniyan na tonganay niyan. Aya bo a maphakaiktiyar ka na so siran a ikaalk iran so Kadnan iran a da mapayag go inipamayandg iran so sambayang. Na sa taw a zoti na makapzoti sa rk bo o ginawa niyan; na sii bo ko Allah so khabolosan.

19

Na kna a ba magizan so bota ago so pphakaylay;

20

Go di (magizan) so manga lilibotng ago so maliwanag;

21

Go di (magizan) so kasisirongan ago so mayaw:

22

Go kna a ba magizan so manga oyagoyag ago so miyamatay. Mataan! a so Allah na mapphakan'g Iyan so taw a kabaya Iyan; na ding ka maphakan'g so taw a matatago ko manga kobor.

23

Ska na matag pphamakaiktiyar.

24

Mataan! a Skami na siyogo Ami ska (hay Mohammad) rakhs o bnar, a pphamanothol, go pphamakaiktiyar: Na da a pagtaw a ba da a miyaipos on a pphamakaiktiyar:

25

Na o pakambokhaga ka iran, na sabnar piyakambokhag o siran a miyaonaan iran (so manga rasol), minitalingoma kiran o manga rasol kiran so manga rarayag a karina, go so manga daptar, go so kitab a miyakabgay sa sindaw.

26

Oriyan iyan na siniksa Akn so siran a miyamangongkir: Na antonaa i miyambtad o siksa Akn (kiran)!

27

Bang ka da maylay a mataan! a so Allah na piyakatoron Iyan a phoon ko kawang so ig? Na piyakagmaw Ami sa sabap rkaniyan so manga onga a mbidabida so manga warna niyan. Go pd ko manga palaw so manga lalan a mapoti go mariga, a mbidabida so manga warna niyan, go miyamangintkintm.

28

Go pd so manga manosiya, go so manga binatang, go so manga ayam, a mbidabida so manga warna niyan a izan oto. Aya bo a maalk ko Allah, ko manga oripn Iyan, na so manga tatao: Mataan! a so Allah na Mabagr, a Manapi.

29

Mataan! a so siran a pphamangadi ko kitab o Allah, go inipamayandg iran so sambayang, go miyammgay siran ko inipagpr Ami kiran, sa masoln go mapayag, na maa-arap iran so kandagang a di dn khalapis:

30

Ka ithoman Iyan kiran sa tarotop so manga balas kiran, go pagomanan Iyan kiran so gagaw Niyan: Mataan! a Skaniyan na Manapi, a Masalamatn.

31

Na so iniilaham Ami rka (hay Mohammad) a kitab, na giyoto so bnar, - a tomatanto ko miyaonaan iyan: Mataan! a so Allah na titho a Kaip ko manga oripn Iyan, a Pphakaylay;

32

Oriyan iyan na piyakipangowarisan Ami so kitab ko siran a miyapili Ami ko manga oripn Ami: Na so sabaad kiran na pindarowakaan iyan a ginawa niyan; go so sabaad kiran na miyaona ko manga pipiya sabap sa idin o Allah; giyoto man na skaniyan so limo a mala.

33

Manga sorga a tatap a phamakasold siran on: Phangimowan siran roo ko manga salnda a bolawan, go montiya a tipay; go aya nditarn iran roo na sotra.

34

Na tharoon iran a: "So podi na rk o Allah, so inilang Iyan rkami so boko: Mataan! a so Kadnan Ami na titho a Manapi, a Masalamatn:

35

"A so piyakaphantaw kami Niyan ko ingd a kakal sa phoon ko gagaw Niyan: Di kami ron khasogat a dokaw, go di kami ron khasogat a robas."

36

Na so miyamangongkir na bagian iran so apoy ko naraka Jahannam: Di siran i thaman, ka oba siran mamatay, go di kiran phakakhapn so siksa on. Lagid man oto a kambalasi Ami ko oman i miyongkir!

37

Na siran na pkhigoraok iran roo a: Kadnan ami, pakaliyowa kaming Ka (ko naraka): "Ka nggalbk kami sa ontol, a salakaw ko pinggalbk ami! (tharoon o Allah:) Ba Ami skano da pakapagintawa sa diyangka a makaphananadm on so taw a phananadm? Go miyakaoma rkano, so miyamakaiktiyar. Na taami niyo ka da a bagian o manga darowaka a phakatabang."

38

Mataan! a so Allah i Matao ko migagaib ko manga langit ago so lopa: Mataan! a Skaniyan i Matao ko zisii ko manga rarb.

39

Skaniyan so biyaloy kano Niyan a manga khalifah ko lopa a: Sadn sa mongkir na phakatana on so (karata o) kiyaongkir iyan: Go da a khiyoman ko manga kafir o kiyaongkir iran sii ko Kadnan iran a inonta so rarangit; go da a khiyoman ko manga kafir o kiyaongkir iran a inonta so kalogi.

40

Tharoang ka (hay Mohammad): "Ay gda iyo ko ipphamanakoto niyo a so siran na pphanongganowin iyo a salakaw ko Allah? Pakiilay niyo rakn o antonaa i miyaadn iran ko lopa; antawaa ba adn a mitotompok iran ko manga langit? Antawaa ba adn a inibgay Ami kiran a kitab na siran na sii ko marayag a karina a phoon Rkaniyan?" - kna, ka da a ipmbgay a pasad o manga darowaka so sabaad kiran ko sabaad a rowar sa limpangan.

41

Mataan! a so Allah na uurnn Iyan so manga langit ago so lopa, ka oba siran mapokas: Na ibt o mapokas siran, na da a makarn kiran a isa bo ko oriyan iyan: Mataan! a Skaniyan na tatap a Matigr, a Manapi.

42

Na inizapa iran ko Allah so pithamanan a manga sapa iran sa ibt o adn a makatalingoma kiran a pphamakaiktiyar, na mataan! a khabaloy siran dn a lbi a phakaontol a di so pithanggisaan ko manga pagtaw: Na kagiya adn a miyakatalingoma kiran a pphamakaiktiyar, na da a minipagoman iyan kiran a rowar sa kapalagoy, -

43

Makapantag sa kapmaratabat ko lopa, go kapagantangan sa marata. Na da a khatangkalan o antangan a marata a rowar ko khirk on. Na ba adn a pnayawn iran a rowar ko kiyaokitan o miyangaoona? Na da dn a matoon ka a kasambii ko okit o Allah: Go da dn a matoon ka a kaalin o okit o Allah.

44

Ba siran da makandalakaw ko lopa, ka an iran mapamimikiran o antonaa i miyambtad o kiya akiran ko siran a miyaonaan iran, - a siran i lbi a di siran i bagr? Na da ko btad o Allah oba adn a makarompison a shay' ko manga langit go da sii ko lopa: Mataan! a Skaniyan na tatap a Matao, a Gaos.

45

Na o siksaan o Allah ko manga manosiya so pinggalbk iran (a manga dosa), na da a lambaan Iyan ko liyawaw o lopa a baraniyawa: Na ogaid na pakalalanatn Iyan siran taman ko taalik a miyapnto: Na igira a miyakatalingoma so taalik kiran, na mataan! a so Allah na tatap a phagilayn Iyan so manga oripn Iyan.

Total Number of Verses: 83

1

Yaa Siin. (so Allah i Matao ko paka-aantapan Iyan on.)

2

Ibt ko Qor'an, a hokoman (a pimbaibaitan); -

3

Mataan! a ska (hay Mohammad) na pd dn ko manga sogo (o Allah),

4

A sii ko okit a makaoontol (a so Islam).

5

Initoron o (Allah a) Mabagr, a Makalimoon.

6

Ka an ka mapakaiktiyar so pagtaw, a da mapakaiktiyar so manga loks iran, na siran na di khipakaiin'ngka.

7

Sabnsabnar a miyatangkd so katharo (a siksa) ko kadaklan kiran: Na siran na di siran mapaparatiyaya.

8

Mataan! a Skami na tiyagoan Ami so manga lig iran sa manga patong, na giyoto na taman ko manga baka, na ba siran dn makalilintangag;

9

Go tiyagoan Ami so kasasangoran iran sa rnding, go so katatalikhodan iran sa rnding, na pinilsan Ami siran: Na siran na di siran phakanono.

10

Na magizan kiran o ino piyakaiktiyar ka siran, antawaa dang ka siran pakaiktiyara: Ka di siran bo pharatiyaya.

11

Aya bo a maphakaiktiyar ka na so taw a miyonot ko Qor'an, go inikalk iyan so (Allah a) Masalinggagaw, a Migagaib: Na pphamanothol ang ka on so maap, go so balas a mapiya.

12

Mataan! a Skami na Skami i magoyag ko miyamatay, go ipzorat Ami so miniona iran, go so manga rarad iran; na langowan taman na maiitong Ami skaniyan ko kitab a mapayag (a so Lawkh Makhpod).

13

Na mbaaling ka kiran a ibarat: So manga taw ko ingd (a Intakiyah). Gowani na miyakaoma kiran so manga sogo.

14

Gowani a sogoan Ami siran sa dowa kataw, na piyakambokhag iran a dowa oto: Na biyagr Ami a ika tlo: Na pitharo iran a: "Mataan! a skami na sii rkano manga sogo."

15

Pitharo iran a: "Da ko skano inonta na manosiya a lagid ami; go da a initoron o (Allah a) Masalinggagaw a mayto bo (a wahy): Da’ ko skano inonta na pphamamokhag kano."

16

Pitharo iran a: "So Kadnan tano na katawan Iyan a mataan! - a skami na sii rkano titho a manga sogo:

17

"Na da a paliyogat rkami a rowar ko kapamakasampay (ko sogoan o Allah) a mapayag."

18

Pitharo iran a: "Mataan! a skami na miyakazokna kami sa marata sa sabap rkano: Ibt odi kano gnk, na mataan a radiyamn ami skano dn, go mataan a masogat kano dn o phoon Rkami a siksa a malipds."

19

Pitharo iran a: "So sokna iyo a marata na sarta iyo: Ati amay ko piyakatadm kano (na pizoknaan kano sa marata)? Kna, ka skano na pagtaw a manga malawani!"

20

Na miyakaoma a phoon ko pikhilidan o bandara ingd a mama (a si Habibo Najar), a gii nggagaan, pitharo iyan: "Hay pagtaw akn, onoti niyo so manga sogo:

21

"Onoti niyo so taw a da a phangnin iyan rkano a sokay, ka siran i makaoontol.

22

"Na antonaa i bagian ko sa di akn ka zimbaa ko (Allah a) Skaniyan i miyadn rakn, go Rong kano phakandoda?

23

"Ati khowaan ko so salakaw Rkaniyan a manga katohanan? A o pakaantapi ako o (Allah a) Masalinggagaw sa morala, na da a khilinding rakn o pangongogopan iran a mayto bo, go di ako iran khasabt.

24

"Mataan! a sakn na samawto na miyatago ako dn ko kadadag a mapayag.

25

"Mataan! a sakn na piyaratiyaya ko so Kadnan iyo na pakin'ga ko niyo: (na biyono iran)!"

26

Pitharo (rkaniyan): "Sold ka ko sorga. Pitharo iyan: Hay dingano mambo! O so pagtaw akn na katawan iran!

27

"So kiyapmaapi rakn o Kadnan ko, go so kiyabaloya niyan rakn a pd ko khipagaadatan!"

Part 23

28

Na da a piyakatoron Ami ko pagtaw niyan, ko oriyan iyan, a tantara a phoon ko langit, go da Kami sogo.

29

Daa rowar ko lalis a isa, na samawto na siran na miyapadng siran.

30

Hay kasndit a phakatana ko manga oripn (o Allah)! a da a pphakatalingoma kiran a sogo a ba iran oto da pamagrgi!

31

Ba iran da katokawi a madakl a bininasa Mi a miyaonaan iran ko miyagapidapid a pagtaw? Mataan! a siran na di siran kiran phakandod:

32

Na da ko oman i isa oba di langon sii ko hadapan Ami phamakadarpaa.

33

Na tanda kiran so lopa a miyatay a inoyag Ami skaniyan, go piyakagmawan Ami skaniyan sa pr, na so sabaad on na pkhakan iran.

34

Go tiyagoan Ami oto sa manga pamomolan a manga korma, go manga anggor, go piyamakambowat Ami ron so manga bowalan:

35

Kaan siran pphakakan ko onga niyan: Go so miyanggalbk skaniyan o manga lima iran: Ati di siran phanalamat?

36

Soti so (Allah a) miyadn ko nggaganapa sa kalangolangowan iyan, pd on so pphakathoon o lopa, go pd on so manga ginawa iran, go so nganin a di iran katawan.

37

Go tanda kiran so gagawii a pphokasn Ami ron so dawndaw, na samawto na siran na pkhalibotngan siran;

38

Go so alongan a pphalalagoy sii ko taks iyan: Giyoto na takdir o (Allah a) Mabagr, a Matao.

39

Go so olan, - a singgayan Ami skaniyan sa manga darpa taman sa makakasoy sa lagid o talintang a korma a miyathay.

40

Da ko alongan o bawn mapatot i karaota niyan ko olan, go da ko gagawii oba niyan kawnai so dawndaw: Na oman i isa na sii ko okit iyan pphamangdg.

41

Go tanda kiran a kiyarorana Mi ko manga mimoriyataw kiran ko kapal (o Noh) a mappno;

42

Go inadn Ami kiran so lagid oto a kapphagdaan iran.

43

Na o kabaya Ami, a ldn Ami siran: Na da a makatabang kiran, go da a makasabt kiran,

44

Inonta so limo a phoon Rkami, go so kapakasngka sa di mathay taman ko wakto (o kapatay).

45

Na igira a pitharo kiran a: "Kalkn iyo so miyaonaan iyo ago so khawriyan iyo, ka ang kano mipangalimo (na tomalikhod siran);"

46

Go da a phakatalingoma kiran a tanda a pd ko manga tanda o Kadnan iran, inonta na miyabaloy siran on a khitatalikhod.

47

Go igira a pitharo kiran: "Pphammgay kano ko inipagpr rkano o Allah", na tharoon o siran a miyamangongkir ko siran a miyamaratiyaya: "Ino Ami phakakana so taw a o kabaya o Allah, na phakakn Iyan skaniyan? Da’ ko inonta na matatago ko karibat a mapayag."

48

Go gi iran tharoon a: "Anda dn angkai a diyandi (a siksa), o skano na manga bnar?"

49

Daa pkhanayaw iran a rowar ko lalis a isa a phakadansal kiran ko gi iran kaphapawala!

50

Na di siran lomakay thanan, go di siran makandod ko manga tonganay ran!

51

Na iyopn so sanggakala. Na samawto na siran na makapoon ko manga kobor, a pphamagarabaya siran ko Kadnan iran!

52

Tharoon iran: "Hay dowandowaan tano! antawaa i miyokaw rktano ko pakatotorogan tano?" (ismbag kiran a:) "Giyaya so inidiyandi o (Allah a) Masalinggagaw; go miyatoman so (katharo o) manga sogo!"

53

Daa khaadn a rowar ko lalis a isa, na samawto na siran na langon sii ko hadapan Ami phamakadarpaa!

54

Na sa alongan aya, na da a khaaniyaya a baraniyawa a mayto bo, go da a imbalas rkano a rowar ko pinggolawla niyo.

55

Mataan! a so manga taw ko sorga sa alongan aya na matatago ko katmbangan a pkhababaya siran;

56

Siran ago so manga karoma iran, na sii ko khikasisirongan ko liyawaw o manga kantir, a gii siran zasandasandang;

57

Adn a bagian iran roo a manga onga; go khakowa iran so nganin a phangnin iran;

58

"Kalilintad" a katharo a phoon ko Kadnan a Makalimoon!

59

"Na sibay kano sa alongan aya! Hay manga baradosa!

60

"Ba Akn rkano da banayn hay manga moriyataw o Adam, a di niyo pzoasoata so shaytan; mataan! a skaniyan na ridoay niyo a mapayag? -

61

"Na zoasoata Ko niyo; giyaya i okit a makaoontol.

62

"Na sabnsabnar a miyakadadag rkano so kaadn a madakl. Ba da a manga sabot iyo?

63

"Katii so naraka Jahannam a so skano na ididiyandi rkano!

64

"Pamanold kano ron sa alongan aya, sabap ko kiyaongkir iyo."

65

Sa alongan aya na parkatn Ami so manga ngari iran; go imbitiyarai Kami o manga lima iran, go zaksian o manga ai ran, so pinggalbk iran.

66

Na o kabaya Ami, na mataan a khabota Mi so manga mata iran; na makapagoradorad siran ko lalan, na andamanaya i kaphakanono iran?

67

Na o kabaya Ami, na mataan a khasalin Ami siran sii ko manga darpa iran; na di iran magaga lomipos, go di siran phakandod.

68

Na sa taw a pagmbowayn Ami skaniyan, na phatoon Ami skaniyan ko korang a kaadn: Ba iran di zabota?

69

Na da Ami ndaon (ko Nabi) so bayok, go di ron patot: Da’ ko skaniyan (a minitalingoma niyan) inonta na pananadm, go Qor'an a miyakapayag:

70

Kaan iyan mapakaiktiyar so taw a aya btad iyan na oyagoyag (i poso) go an matangkd so katharo (a siksa) ko miyamangongkir.

71

Ba iran da maylay a mataan! a Skami na miyadn Kami sa rk iran a pd ko pinggalbk o manga guus Ami a manga ayam, na siran i makapapaar on?

72

Go piyakaphasiyonot Ami kiran oto, ka so sabaad on na gi iran kakhodaan, go so sabaad on na pkhakan iran:

73

Go adn a bagian iran on a manga gona, go manga inomn (a manga gatas). Ino siran di phanalamat?

74

Na kominowa siran sa salakaw ko Allah, sa manga katohanan, ka an siran katabangi!

75

Di ran khagaga so katabangi kiran: Go siran na manga tantara iran a phamakadarpaan (ko naraka).

76

Na oba ka mapakamboko o katharo iran. Mataan! a Skami na katawan Ami so isosoln iran, go so papayagn iran.

77

Ba di katawi o manosiya a mataan! a Skami na inadn Ami skaniyan a phoon sa notfa! Na samawto na skaniyan na lampawi, a mapayag!

78

Na mimbaal Rkami sa ibarat, go kiyalipatan iyan so kiyaadna on: Pitharo iyan a: "Antawaa i phakaoyag ko manga tolan a skaniyan na miyardak?"

79

Tharoang ka a: "Pagoyagn oto o miyadn on ko paganay a kiyawkitan. Ka Skaniyan i Matao ko oman i (okit a) kapangadn!

80

"So inadnan kano Niyan phoon ko kayo a maylaw sa apoy, na samawto na skano na mapphakakadg iyo (skaniyan)!

81

"Ba di so miyadn ko manga langit ago so lopa i Phakagaga sa ka adna Niyan ko lagid iran?" - Oway na, Ska so Pphangadn; a Matao -

82

Aya dn a btad Iyan, na igira a kabaya Iyan so apiya antonaa, na tharoon Iyan on so: "Kon", na maadn!

83

Na Soti so zisii sa tangan Iyan so kapaar ko langowan taman: Go Ron kano phamakandoda (ko kaphamagitonga ko manga amal)

Total Number of Verses: 182

1

Ibt ko zasaasaap sa samporna a kazaap,

2

Go so pphamanndg (ko gabon) sa samporna a kapanndg,

3

Go so pphamamatiya sa pananadm (a manga malaikat)!

4

Mataan! a so tohan iyo na matatangkd a Isa!

5

Kadnan o manga langit ago so lopa, go so pagltan a dowa oto, go Kadnan o manga sbangan!

6

Mataan! a Skami na inipharas Ami ko langit a marani so parahiyasan a manga bitoon, -

7

Go siyap ko oman i shaytan a gii mbinasa,

8

Di iran maphamamakin'g so (manga malaikat a) pagtaw a maporo, ka pphllbadn siran ko mbalabala,

9

Sa kapamogaw, go adn a bagian iran a siksa a tatap,

10

Inonta so miyakasinggaot sa isa a kasinggaot (ko katharo o manga malaikat), na siyaloba skaniyan o sindaw o bitoon a masindaw (a phakatotong).

11

Na pakiosayn ka kiran: O ba siran i lbi a mabagr a kaadn, antawaa so inadn Ami (i lbi a mabagr)? Mataan! a Skami na inadn Ami siran a phoon ko lipaw, a mapilit!

12

Kna, ka miyammsa ka, go pphamagrgang ka iran,

13

Na igira a piyakatadm siran, na di siran phakatadm, -

14

Go igira a miyakaylay siran sa tanda, na pphamagrgan iran,

15

Go pitharo iran a: "Da ko ungkai inonta na balik mata a mapayag!"

16

"Ino amay ka matay kami, go mbaloy kami a botha, go manga tolan, ba mataan! a skami na pagoyagn kami dn?"

17

"Antawaa so manga loks ami a miyangaoona?"

18

Tharoang ka a: "Oway, (pagoyagn kano dn), go skano na phamakarondan."

19

Na giyoto na satimambo a lalis; na samawto na siran na makananayaw siran!

20

Go matharo iran a: "Hay dowan dowaan tano! Giyai so alongan a kapamalas!"

21

(Na tharoon kiran:) "Giyai so alongan a kokoman, a so skano na piyakambokhag iyo skaniyan!"

22

(Tharoon o Allah ko manga malaikat:) "Limoda niyo so mindadarowaka, rakhs o manga oganapa iran, go so piyamanimba iran -

23

"A salakaw ko Allah, na nggonanaowa niyo siran ko lalan ko naraka Jahim!"

24

"Go tarongkoa niyo siran, ka mataan! a siran na pagizaan siran: "

25

(Ptharoon kiran:) "Ino kano di makapthatabanga?"

26

Kna, ka siran sa alongan aya na makambabayorantang siran;

27

Na sangoran o sabaad kiran so sabaad, a gii siran zsndita.

28

Tharoon iran a: "Mataan! a skano na aya btad iyo na pzong kano Rkami sa kapan'gl!"

29

Ismbag iran: "Kna, ka da kano mabaloy a miyamaratiyaya!"

30

"Go da a miyaadn a Rkami rkano a kapaar. Kna, ka miyabaloy kano a pagtaw a manga darowaka!"

31

"Na miyatangkd rktano, so katharo o Kadnan tano. Mataan! a sktano na khataaman tano dn (angkai a siksa)."

32

"Na miyadadag ami skano: Ka mataan! a skami na miyabaloy kami a manga dadag."

33

Na mataan! a siran sa alongan oto, na makazasakotowa siran ko siksa.

34

Mataan! a Skami na Lagid aya dn a ikhidia Mi ko manga baradosa.

35

Mataan! a siran na aya btad iran na igira a pitharo kiran a: Da a patot a pzoasoatn a inonta so Allah, na mmaratabat siran,

36

Go tharoon iran a: "Ati mataan! a sktano na mibagak tano dn so manga katohanan tano:, makapantag ko pababayok, a pmbthangn?"

37

Kna, ka aya minitalingoma o Mohammad na so bnar, go miyatanto niyan so manga sogo.

38

Mataan! a skano na khataaman iyo dn so siksa a malipds; -

39

Ka da a imbalas rkano a inonta so pinggolawla niyo; -

40

Ogaid na so manga oripn o Allah, a manga tolabos (na di siran phakataam ko siksa), -

41

Siran man na adn a bagian iran a pagpr a mappnto,

42

A manga onga; a siran na khisslaan,

43

Sii ko manga sorga a pakalma,

44

(Sii siran) Ko manga kantir a khipagaadapadapa:

45

Ipphagilid kiran so tatagoan sa inomn a phoon ko bowalan,

46

Mapoti, a mapiya i taam ko pphamanginom,

47

Daa matatago on a pakalangot; go di siran on phangabbrg.

48

Go zisii kiran so (manga darodopa a) manga thatangka i kaylay, a manga pipiya i kapmata;

49

Lagid oba siran montiya a totongkopn.

50

Na sangoran o sabaad kiran so sabaad a pphamagizai siran.

51

Tharoon o ptharo kiran a: "Mataan! a sakn na adn a bolayoka akn,"

52

A gii niyan tharoon a: "Ba mataan! a ska na pd dn ko miyamangimbnar?"

53

"Ino amay ka matay tano, go mbaloy tano a botha, go manga tolan, ba mataan! a sktano na khabalasan tano dn?"

54

Tharoon Iyan a: "Ba niyo prongawi?"

55

Na rongawan iyan, na maylay niyan ko lmbak o naraka Jahim.

56

Tharoon iyan: "Ibt ko Allah! ka mayto bo na mataan a khabinasa kong ka!"

57

"Na o da so limo o Kadnan ko, na miyabaloy ako dn a pd ko piyamakadarpa (ko naraka)!"

58

"Ino di tano phamatay,"

59

"Inonta so kiyapatay tano a paganay, go di tano phangasisiksa?"

60

Mataan aya! a titho a skaniyan so daag a mala!

61

Makapantag ko lagid aya, na panamar magamal so pphamagamal.

62

Ba giyoto i mapiya a talagad, antawaa so kayo a Zaqqom?

63

Mataan! a Skami na inisnggay Ami aya a tiyoba ko manga darowaka.

64

Mataan! a skaniyan na kayo a m'utho ko piyaganakanakan o naraka Jahim:

65

So onga niyan na miphlagid skaniyan o manga olo o manga shaytan:

66

Na mataan! a siran na phakakan siran on dn na khapno iran on so manga tiyan iran.

67

Oriyan iyan na mataan! a bagian iran oto a titho a kasasaogan sa phlikabo a ig.

68

Oriyan iyan na mataan! a aya khandodan iran na so dn so naraka Jahim.

69

Mataan! a siran na miyatoon iran so manga loks iran a khikadadadag;

70

Na siran na sii siran gii zasakoya ko manga lakaw iran!

71

Na sabnsabnar a mitharidadag ko miyaonaan iran so kadaklan ko miyangaoona;

72

Go sabnsabnar a siyogo an Ami siran sa pphamakaiktiyar; -

73

Na pamimikiranang ka o antonaa i miyambtad o kiya akiran ko piyamakaiktiyar (a dadn paratiyaya), -

74

Inonta so manga oripn o Allah a manga tolabos.

75

Na sabnsabnar a miyangangarapan Rkami so Noh, na mataan a miyakapiyapiya so tomiyarima (ko pangni niyan).

76

Na siyabt Ami skaniyan ago so taalok on ko boko a mala,

77

Go biyaloy Ami so kiyababadan on, a siran i miyangalalamba;

78

Go inibagak Ami skaniyan ko miyanga oori (a kapphananadman):

79

"Kalilintad a sii ko Noh ko manga kaadn!"

80

Mataan! a Skami na lagid man oto a kambalasi Ami ko miphipiyapiya.

81

Mataan! a skaniyan na pd ko manga oripn Ami a miyamaratiyaya.

82

Oriyan iyan na inld Ami so manga pd (a dapamaratiyaya).

83

Na mataan! a maapd ko okit iyan so Ibrahim.

84

Gowani a somangor ko Kadnan iyan a rakhs o poso a da a saninsaning iyan.

85

Gowani na pitharo iyan ki ama iyan, ago so pagtaw niyan a: "Antonaa i pzimbaan iyo?"

86

"Ba so kabokhag a manga katohanan a salakaw ko Allah i khabayaan niyo?"

87

"Na antonaa i arangan iyo ko Kadnan o manga kaadn?"

88

Na inilay niyan sa kaylay a gdagda so manga bitoon,

89

Na pitharo iyan a: "Mataan! a pkhasakit ako!"

90

Na inawaan iran skaniyan, a miyamanalikhod siran.

91

Na minanay somong ko manga katohanan iran, na pitharo iyan a: "Ino kano di khan?"

92

"Ino a di kano ptharo?"

93

Na siyongoan iyan siran sa mananay, na pirorompi niyan zabnar.

94

Na piyamantk iran skaniyan a gii siran mamagarabaya.

95

Pitharo iyan a: "Ino niyo pzimbaa so gii niyo phapandayan?"

96

"A so Allah i miyadn rkano, ago so pphangmbaalan niyo!"

97

Pitharo iran a: "Mbalayn iyo skaniyan sa walay, na lbadn iyo skaniyan ko kadg!"

98

Na pikhadiyatan iran skaniyan sa tipo, na biyaloy Ami siran a manga bababa!

99

Na pitharo iyan a: "Mataan! a sakn na zong ako ko Kadnan ko! a pnggonanao rakn!"

100

Kadnan ko, bgi akong Ka sa (wata a) pd ko manga bilangataw!""

101

Na piyanothol Ami ron a (pmbawata sa) wata a mama a matigr.

102

Na kagiya iraot sa miphagonota iyan lomalakaw, na pitharo iyan: "Hay wata ko, mataan! a sakn na pithataginp akn ko katotoroga (rakn) a mataan! a sakn na zombaliin ko ska: Na nggdagdaang ka o antonaa i pandapat ka!" Pitharo iyan: "Hay ama, nggolalann ka so sogoan rka: Ka khatoon akong ka, omiyog so Allah, a pd ko manga papantang!"

103

Na kagiya a mbayorantang siran a dowa, go piyakaiga iyan a tomatakilid;

104

Na tiyawag Ami skaniyan: "Hay Ibrahim!"

105

"Sabnar a miyatoman ka so taginpn!" - mataan! a Skami na lagid man oto a kambalasi Ami ko miphipiyapiya.

106

Mataan! a giyaya na titho a skaniyan na tiyoba a mapayag-

107

Na siyanggar Ami skaniyan a kibas a mala:

108

Go inibagak Ami skaniyan (a kapphananadman) ko miyangaoori:

109

"Kalilintad a sii ko Ibrahim!"

110

Lagid man oto a kambalasi Ami ko miphipiyapiya.

111

Mataan! a skaniyan na pd ko manga oripn Ami a miyamaratiyaya.

112

Na piyanothol Ami ron (a ipmbawata iyan) so Is'haq a nabi, - a pd ko manga bilangataw.

113

Na piyakandaklan Ami sa mapiya skaniyan ago so Is'haq: Na so sabaad ko manga mori ran a taw na phipiyapiya, go (so sabaad na) siyalimbotan iyan a ginawa niyan a mapayag.

114

Na sabnsabnar a inipangalimo Ami so Mosa ago so Haron,

115

Go siyabt Ami siran ago so pagtaw iran ko boko a mala;

116

Go tiyabangan Ami siran, na miyabaloy siran a siran i miyamakadaag;

117

Go inibgay Ami kiran so kitab a miyakapayag (ko manga kokoman);

118

Go pinggonanao Ami kiran so lalan a matitho.

119

Go inibagak Ami siran (a kapphananadman) ko miyangaoori:

120

"Kalilintad a sii ko Mosa ago so Haron!"

121

Mataan! a Skami na lagid man oto a kambalasi Ami ko miphipiyapiya.

122

Mataan! a giya dowa oto na pd ko manga oripn o Allah a miyamaratiyaya.

123

Go mataan! a so Ilyas na pd dn ko manga sogo.

124

Gowani na pitharo iyan ko pagtaw niyan a: "Ino kano di phananggila?"

125

"Ino niyo pphanongganoya so barahala a Baal, na ipmbagak iyo so lbi a mapiya a miyangadn;"

126

"A so Allah, a Kadnan iyo go Kadnan o manga loks iyo a miyangaoona?"

127

Na piyakambokhag iran Skaniyan, na mataan! a siran na phamakadarpaan dn (ko naraka), -

128

Inonta so manga oripn o Allah a manga tolabos.

129

Na inibagak Ami skaniyan (a kapphananadman) ko miyanga oori:

130

"Kalilintad a sii ko Ilyasin!"

131

Mataan! a Skami na lagid man oto a kambalasi Ami ko miphipiyapiya.

132

Mataan! a skaniyan na pd ko manga oripn Ami a miyamaratiyaya.

133

Go mataan! a so Lot na pd dn ko manga sogo (Ami).

134

Gowani na siyabt Ami skaniyan ago so taalok on, sa kasamasama iran.

135

Inonta so loks (a karoma niyan) ka miyapd ko miyamangi bagak (ko siksa):

136

Oriyan iyan na bininasa Mi so manga salakaw (kiran).

137

Na mataan! a skano na sabnar a pkhasagadan iyo siran, ko kapkhapitai rkano, -

138

Ago so gagawii: Ba niyo di mapnggdagda?

139

Go mataan! a so Yonos na pd dn ko manga sogo.

140

Gowani na miyalagoy a miyagapas ko kapal a ttgbn,

141

Na miyakipripa, na miyabaloy a pd ko piyamanaban:

142

Na liyamd skaniyan o sda, a skaniyan na makapphanginsoya.

143

Na o da (kagiya a) mataan a skaniyan na miyabaloy a pd ko miyamanasbik,

144

Na khatatap dn ko tiyan o sda sa taman ko alongan a kawyaga kiran (ko alongan a qiyamah).

145

Na inidampar Ami skaniyan ko taog a pagilidan a skaniyan na pkhasakit,

146

Go piyakathoan Ami so kaporoan iyan, sa pamomolan a pndonapa (a kiyasirongan iyan).

147

Na siyogo Ami skaniyan ko magatos nggibo (a manga taw) odi na makalalawan siran (sa magatos nggibo).

148

Na miyamaratiyaya siran; na piyakasawit Ami siran ko kapagintaw taman ko wakto (o kapatay).

149

Na pakiosayn ka kiran: O ba rk o Kadnan ka so manga wata a babay, na rk iran so manga wata a mama?

150

Antawaa ba Ami inadn so manga malaikat a manga babay, a siran na kamamasaan iran?

151

Tanodan, ka mataan! a siran na phoon ko kabokhag iran na ptharoon iran dn:

152

"A mimbawata so Allah!" go mataan! a siran na titho a manga bokhag!

153

Ati miyatomo Iyan so manga wata a babay a di so manga wata a mama?

154

Ino kano wai? Andamanaya i khipkhokomn iyo saya?

155

Ino kano di phananadm?

156

Antawaa ba adn a karina niyo a mapayag?

157

Na talingomaan iyo i kitab iyo o skano i manga bnar!

158

Na mimbaal siran ko lt o Allah ago so lt o manga jinn sa bangnsa: Na sabnsabnar a kiyatokawan o manga jinn a mataan! a siran na phamakadarpaan dn (ko naraka)!

159

Soti so Allah! a mawatan ko iphropa iran!

160

Inonta so manga oripn o Allah, a manga tolabos.

161

Na mataan! a skano ago so pzimbaan iyo, -

162

Na da rkano i sorang rkaniyan a madadag iyo,

163

Inonta so skaniyan a phakasold ko naraka Jahim!

164

"Na da a pd rkami (a manga malaikat) a ba da a bagian iyan a darpa a mappnto;"

165

"Go mataan! a skami na sabnar a zasaasaap;"

166

"Go mataan! a skami na sabnar a skami so pphamanasbik (ko Allah)!"

167

Na mataan! a siran na ptharoon iran dn:

168

"A oba bo mataan! a adn a zisii rkami a pananadm a phoon ko miyangaoona,"

169

"Ka miyabaloy kami dn a manga oripn o Allah, a manga tolabos!"

170

Na inongkir iran so Qor'an: Na katokawan iran bo!

171

Na sabnsabnar a miyaona so katharo Ami ko manga oripn Ami a piyamanogo:

172

Mataan! a siran na, siran dn so phangatatabangan,

173

Go mataan! a so manga tantara Ami, na siran dn so phamakadaag.

174

Na talikhoding ka siran sa taman ko masa (a di mathay).

175

Go pakaylayang ka siran, ka maylay ran bo!

176

Ba so siksa Ami na phagalokalokan iran?

177

Na pabila makatoron (so siksa) ko zaronsarongan iran, na miyakaratarata a kakhapitai ko piyamakaiktiyar (a da dn paratiyaya)!

178

Na talikhoding ka siran sa taman ko masa (a di mathay),

179

Go pakaylayang ka (siran), ka khaylay ran bo!

180

Soti so Kadnan ka, a Kadnan o mnang, a mawatan ko iphropa iran!

181

Na kalilintad a sii ko manga sogo!

182

Go so podi na rk o Allah, a Kadnan o manga kaadn.

Total Number of Verses: 88

1

Saad. (so Allah i Matao ko paka-aantapan Iyan on). Ibt ko Qor'an, a ndodon so pananadm (ka mataan a so Mohammad na bnar):

2

Kna, ka so miyamangongkir na matatago ko maratabat, go so kasosorang.

3

Madakl a bininasa Mi ko miyaonaan iran a pagtaw, na minithatawaga iran a: Da a masa a kapakapalagoy!

4

Na miyammsa siran ko kiyapakawma kiran o miyamakaiktiyar a pd kiran! Go pitharo o miyamangongkir a: "Giyai na balik mata a bokhag!"

5

"Ino niyan mbaloya so manga katohanan a tohan a Isaysa?" Mataan! a giyaya na titho a shay' a pakammsa!

6

Na inilalakaw o manga nakoda iran a: "Dadayon kano, go thatakna kano ko manga katohanan niyo. Mataan! a giyai na titho a shay' a paka-aantapn (rktano)!"

7

"Da tano aya man'g ko okit a miyawri": Da ko ungkaya inonta na piyangmbaalan (a kabokhag)!

8

"Ino skaniyan bo i thoroni ko pananadm ko ndolondolanan tano?" Kna ka siran na matatago ko kazasangka ko pananadm Akn. Kna, ka (kagiya) da iran pn kataami so siksa Akn!

9

Antawaa ba zisii kiran so khikatatagoan ko limo o Kadnan ka, - a Mabagr, a Pphammgay?

10

Antawaa ba iran rk so kapaar ko manga langit ago so lopa, go so nganin a pagltan a dowa nan? Na pamanik siran ko pphamangokitan!

11

Tantara a so ndodoo a pgs, a pd ko mithampotampong.

12

Tomiyaplis ko miyaonaan iran so pagtaw o Noh, ago so pagtaw a Ad, go so Pir'awn a khirk ko manga lutakan,

13

Go so pagtaw a Samod, go so pagtaw o Lot, go so manga taw sa Aykah; - siran man so mithampotampong.

14

Da' ko oman i isa kiran inonta na piyakambokhag iyan so manga sogo, na miyatangkd (kiran) so siksa Akn.

15

Na da a pnayawn o siran aya a rowar ko lalis a isa, a da a kaphakandod iyan.

16

Na pitharo iran a: "Kadnan ami, nggagaaning Ka rkami so kipantag ami ko dapn so alongan a kapamagitong!"

17

Phantang ka ko katharo iran, go aloyang ka so oripn Ami a Dawood, a adn a bagr iyan: Mataan! a skaniyan na pphananangoran (ko Allah).

18

Mataan! a Skami na piyakaphasiyonot Ami so manga palaw, a pd iyan a pthasbik siran, ko kagabigabi, ago so kapitapita,

19

Go so manga papanok a matitimo: Na tanan sii ko Allah pphananangoran.

20

Go piyakabagr Ami so kadato iyan, go inibgay Ami ron so ongangn, ago so katao ko kokoman.

21

Na ino a miyakatalingoma rka so totholan ko pkhakarido? Gowani a mangalakat siran ko Dawood sii ko darpa a diniyan zambayangan;

22

Gowani na somiyold siran ko Dawood, na inikalk iyan siran, pitharo iran: "A di ka khalk: Ka pkharido kami a dowa, ka inaniyaya o sabaad rkami so sabaad: Na kokoma kaming ka sa ontol, go di ka phramiramig; go nggonanaowa kaming ka ko ontol a lalan."

23

"Mataan! a giya ungkai a pagari ko: Na adn a siyaw polo ago siyaw a bilibili niyan, na adn a bilibili akn a satiman: Na pitharo iyan a: 'Pakitagikorn ka rakn oto', na kiyadaoban ako niyan sa katharo."

24

Pitharo (o Dawood) a: "Sabnsabnar a kiyasalimbotang ka niyan sa kiyapangniya niyan ko bilibiling ka a kinitapi iyan ko manga bilibili niyan: Ka mataan! a madakl ko zasakotowa a sabnar a phaganiyayaan o sabaad kiran so sabaad: Inonta so siran a miyamaratiyaya, go pinggalbk iran so manga pipiya, na tanto a mayto siran?" Na miyaantang o Dawood a giyabo a kinitpngn Ami ron: Na miyakapangni sa maap ko Kadnan iyan, go somiyondong a mangangalimbabaan, go miyananangoran (ko Allah).

25

Na niyapi Ami ron oto:. Go mataan! a miyambagian iyan sii Rkami so titho a kapakarani, ago so mapiya a khandodan.

26

Hay Dawood, mataan! a Skami na biyaloy Ami ska a khalifah ko lopa: Na kokomang ka so manga manosiya sa ontol: Go ding ka pagonoti so kabaya a ribat, ka madadag ka niyan ko lalan o Allah: Mataan! a so phangadadadag ko lalan o Allah, na adn a bagian iran a siksa a sangat, sabap ko kiyapakalipati ran ko alongan a kapamagitong.

27

Na da ko kiyaadna Mi ko langit ago so lopa, go so nganin a lt a dowa nan i ba ilang! Giyoto man i arangan o siran a miyamangongkir! Na sangat a siksa a bagian o siran a miyamangongkir ko naraka!

28

Ba Ami babaloya so miyamaratiyaya, go pinggalbk iran so manga pipiya, a lagid o pphamaminasa ko lopa? Antawaa ba Ami babaloya so khipanananggila, a lagid o manga baradosa?

29

(Giyai na) Kitab a initoron Ami skaniyan sii rka, a piyakandaklan sa mapiya, ka an iran manggdagda so manga ayat rkaniyan, go an kasaboti o adn a manga sabot iyan.

30

Na inibgay Ami ko Dawood so (wata iyan a) Solayman, miyakapiyapiya a oripn. Mataan! a skaniyan na pphananangoran (ko Allah)!

31

Gowani a pakimasaan ko Solayman ko kagabigabi so manga koda a manga gagaan;

32

Na miyatharo iyan a: "Mataan! a sakn na miyatomo akn so kabaya ko mapiya (sa doniya), a di so tadm ko Kadnan ko", - taman sa miyakadalong (so alongan) ko rnding:

33

(Pitharo o Solayman:) "Ndodn iyo siran rakn". Na phiphoonan iyan mamotol sa manga ai go manga lig.

34

Na sabnsabnar a tiniyoba Ami so Solayman: Ka piyakidarpaan Ami so korsi iyan sa isa a lawas: Oriyan iyan na mithawbat:

35

Pitharo iyan: "Kadnan ko, napii akong Ka, go bgi akong Ka sa kadato, a da a kapatotan on a isa bo ko oriyang ko: Mataan! a Ska na Ska so Pphammgay."

36

Na piyakaphasiyonot Ami ron so ndo, a pzambr sabap ko sogoan iyan, a malanat, a apiya anda niyan pphakaantapa,

37

Go so manga shaytan, a tanan pababalay, go panininb, -

38

Go so manga pd a khipapatongn ko manga sangkali.

39

(Pitharo Ami ron a) "Giyaya na pammgayan Ami: Na pammgay ka, odi na kakapting ka, sa da a kapamagitong."

40

Na mataan! a adn a bagian iyan sii Rkami a titho a kapakarani, go mapiya a khandodan.

41

Na aloyang ka so oripn Ami a Ayyob. Gowani na inipangangarapan iyan ko Kadnan iyan a: "Mataan! a sakn na minisogat rakn o shaytan so dokaw ago so siksa!"

42

(Pitharo on:) |Dasln ka so aing ka: Giyaya na papaygoay a matnggaw, go inomn."

43

Na inibgay Ami ron (bo) so manga taalok on, ago so lagid iran a inibabid kiran, - a limo a phoon Rkami, go pananadm, o adn a manga sabot iyan.

44

Go (pitharoon:) "Kowaang ka so limang ka sa sakkhm a rasaas, na lphadn ka (ki karomang ka): Ka dika kasapaan". Mataan! a Skami na miyatoon Ami skaniyan a mapantang. Sayana a mapiya a oripn! Mataan! a skaniyan na pphangongonotan (ko Allah)!

45

Go aloyang ka so manga oripn Ami a so Ibrahim, go so Is'haq, go so Ya'qob, a manga babagr go manga ala i pandapat.

46

Mataan! a Skami na initolabos Ami kiran so tolabos a pananadm ko ingd (a akhirat).

47

Go mataan! a siran sii ko hadapan Ami, na pd dn ko miyangapipili a manga pipiya.

48

Go aloyang ka so Ismail, go so Al-Yasha', go so Zolkifl: Na tanan pd ko manga pipiya.

49

Giyaya na pananadm: Na mataan! a rk o khipanananggila, so titho a mapiya a khandodan,

50

Manga sorga a tatap, a khillkaan kiran so manga pinto;

51

Gii siran roo zasandasandang; pphananawag siran roo sa manga onga a madakl, ago manga inomn;

52

Go manga ikapd iran so manga thatangka i kaylay (a manga bai), a mrzarza.

53

Giyaya so ididiyandi rkano ko alongan a kapamagitong!

54

Mataan! a giyaya na titho a pagpr Ami, a da a ikhada iyan; -

55

Giyaya (i khasowa), - na mataan! a bagian o manga malawani so titho a marata a khandodan!

56

Naraka Jahannam! - a phamakasold siran on, - na mikharatarata a dkhai! -

57

Giyaya! - na taami ran skaniyan, - a phlikabo, go pakabnd a manga rrzik!

58

Go adn a salakaw a lagid iyan, a mbarambarang (a siksa)!

59

Katii so salompok a pphamanold a pd iyo. Da a kapakadadaya iran. Mataan! a siran na phamakasold ko naraka!

60

Tharoon iran a: "Kna, ka skano na da a kapakadadaya iyo! Skano i tomiyoron rkami saya! Na miyakaratarata a darpa!"

61

Tharoon iran: "Kadnan ami, sadn sa tomiyoro rkami saya, - na omaning Ka on so siksa sa takp ko naraka!"

62

Go Tharoon iran a: "Ino tano wai a da a khaylay tano ko manga mama a sktano na so ibibilang tano siran ko manga rarata?"

63

"Ino tano khakowa siran a pagrg, antawaa ba da katoliki siran o manga kaylay?"

64

Mataan! a giyoto man na bnar dn, - a kapphapawala o taw ko naraka!

65

Tharoang ka (hay Mohammad) a: "Sakn na matag ako pphamakaiktiyar: Na da a tohan a inonta so Allah, a so Isaysa a phakabaas,"

66

"Kadnan o manga langit ago so lopa, go so nganin a pagltan a dowa nan, - a so Mabagr, a Manapi."

67

Tharoang ka a: "Skaniya na tothol a mala," -

68

"Skano na tatalikhodan iyo to!"

69

"Da a katao akn ko pagtaw a maporo, gowani ko pphanmbag siran."

70

"Da a kaphagilahami rakn a rowar sa sakn na matag pphamakaiktiyar a mapayag."

71

Gowani na pitharo o Kadnan ka ko manga malaikat: "Mataan! a Sakn na magadn ako sa manosiya a phoon sa lipaw (a giyoto so Adam): "

72

"Na amay ka imasadn skaniyan, go masokan Ko skaniyan sa niyawa, na sondong kano rkaniyan, a pangangalimbabaan kano."

73

Na miyangalimbabaan so manga malaikat, a tanan siran langon:

74

Inonta so iblis: Ka mimaratabat, go miyabaloy a pd ko miyamangongkir.

75

Pitharo (o Allah): "Hay iblis antonaa i miyakarn rka ko kaphangalimbabaan ka ko inadn Ko a minggolalan ko bagr Akn? Ba ka mimaratabat? Antawaa ba ka miyabaloy a pd ko miphapaporo?"

76

Pitharo iyan a: "Sakn i mapiya a di skaniyan: Inadn akong Ka a phoon sa apoy, na inadn ka skaniyan a phoon sa lipaw."

77

Pitharo (o Allah): "Na awa ka (phoon ko sorga): Ka mataan! a ska na inibowang."

78

"Go mataan a mikolob rka so morka Akn taman ko alongan a kapamalas."

79

Pitharo iyan: "Kadnan ko! na pakinayawn Ka rakn taman ko alongan a kawyaga kiran."

80

Pitharo (o Allah): "Na mataan! a ska na pd ko phamakanayaw -

81

"Taman ko alongan o wakto a mappnto."

82

Pitharo iyan: "Na ibt ko bagr Ka, ka mataan a dadagn ko siran dn langon,"

83

"Inonta so manga oripn ka a pd kiran, a manga tolabos."

84

Pitharo (o Allah): "Na so bnar (na Sakn), - go so bnar i ptharoon Ko -

85

"Mataan a ipno Akn dn ko naraka Jahannam so pd ka, ago so taw a miyonot rka a pd kiran, a mrakhrakhs kano."

86

Tharoang ka a: "Da a phangnin ko rkano sa makapantag saya a sokay, - go kna a ba ako pd ko pphamanangin."

87

"Da ko skaniyan (a Qor'an) inonta na pananadm o manga kaadn."

88

"Na mataan a katokawan iyo dn so totholan rkaniyan ko oriyan o masa."

Total Number of Verses: 75

1

So kinitoronn ko kitab na phoon ko Allah, a Mabagr, a Mawngangn.

2

Mataan! a Skami na initoron Ami rka (hay Mohammad) so kitab sabap ko bnar: Na zoasoatang ka so Allah, a totolabosang ka Rkaniyan so okit ko kapagintaw.

3

Tanodan ka rk o Allah so okit a tolabos. Na so miyamangowa sa salakaw Rkaniyan a manga panarigan (na pitharo iran): "Da a kapzimba Ami kiran a rowar sa ang kami ran mapakarani ko Allah sa samporna a kadazg". Mataan a so Allah na khokomn Iyan siran sii ko nganin a siran na di siran on phagayonayon. Mataan! a so Allah na di Niyan pnggonanaon so taw a skaniyan na bokhag, a miyongkir."

4

O kabaya o Allah a khowa sa wata, na mataan a mamili ko phagadnn Iyan sa kabaya Iyan: Soti Skaniyan! Skaniyan so Allah, a Isaysa, a Phakabaas.

5

Inadn Iyan so manga langit ago so lopa sii ko bnar: Ipkholob Iyan so gagawii ko dawndaw, go ipkholob Iyan so dawndaw ko gagawii: Go piyakaphasiyonot Iyan so alongan ago so olan: Oman i isa kiran na phagokit sii ko taalik a miyapnto. Ba di Skaniyan so Mabagr, a Manapi?

6

Inadn kano Niyan a phoon ko ginawa a isa: Oriyan iyan na inadn Iyan, a miyakapoon on so karoma niyan; go inadn Iyan rkano so manga ayam a walo a nggaganapa: Phagadnn kano Niyan sii ko manga tiyan o manga ina iyo, sa isa a kaadn, ko oriyan o isa a kaadn, sii ko manga lilibotng a tlo (lapis). Giyoto man so Allah, a Kadnan iyo: Rk Iyan so kapaar. Da a tohan inonta Skaniyan: Na andamanaya i kapthalikhod iyo?

7

Amay ka mongkir kano, na mataan! a so Allah na da a singanin Iyan rkano; go di Niyan ikhasoat ko manga oripn Iyan so kaongkir: Na o panalamat kano, na ikhasoat Iyan oto rkano. Na di khaawidan o maawid so awid o salakaw. Oriyan iyan na sii bo ko Kadnan iyo so khandodan iyo, na phanotholn Iyan rkano so pinggolawla niyo. Mataan! a Skaniyan i Matao ko zizii ko manga rarb.

8

Na igira a miyasogat so manosiya a morala, na mangni ko Kadnan Iyan, a pphananangoran sii Rkaniyan: Oriyan iyan na igira a bigan Iyan skaniyan sa limo a phoon Rkaniyan, na kalipatan iyan so kiyapangni niyan On gowani, go mmbaal sa manga saginda o Allah, ka an iyan mipanadag ko lalan Rkaniyan. Tharoang ka a: "Sawiting ka so kiyaongkir ka sa mayto: Mataan! a ska na pd ko manga taw ko naraka!"

9

Ino so taw a skaniyan na pphangongonotan ko manga oras ko kagagawii a somosodiod go gomaganat a ikaalk iyan so (siksa ko) akhirat, go aarapn iyan so limo o Kadnan iyan (ba lagid o taw a di phangongonotan)? Tharoang ka a: "Ba magizan so manga tatao ago so di manga tatao? Aya bo a phakatanod on na so adn a manga sabot iyan.

10

Tharoang ka ko manga oripng Ko a so miyamaratiyaya! a: "Kalkn iyo so Kadnan iyo". Adn a rk o siran a miphipiyapiya sangkai a doniya a mapiya (sii ko akhirat). Na so lopa o Allah na mawlad! Ithoman dn sa tarotop ko manga papantang so balas kiran sa di khaytong!"

11

Tharoang ka a: "Mataan! a sakn na inisogo rakn a kazoasoata ko ko Allah a totolabosn akn On so okit ko kapagintaw;"

12

"Go inisogo rakn ka ana ko mabaloy a paganay ko mimbabayorantang (Rkaniyan)."

13

Tharoang ka a: "Mataan! a sakn na ikhalk akn amay ka sorangng ko so Kadnang ko, so siksa ko alongan a mala."

14

Tharoang ka a: "So Allah i pzoasoatn ko, a totolabosn akn On so okit akn: "

15

Na zoasoata niyo so nganin a kabaya iyo a salakaw Rkaniyan. Tharoang ka a: "Mataan! a aya manga logi na so liyogi ran so manga ginawa iran ago so taalok kiran ko alongan a qiyamah": Tanodan ka giyoto man na skaniyan so kalogi a mapayag!

16

Rk iran ko kaporoan iran so milapilapis a apoy, go sii ko kababaan iran so milapilapis (a apoy): Giyoto man na ipphangangalk oto o Allah ko manga oripn Iyan - (pitharo Iyan): "Hay manga oripn Ko! na onoti Ako niyo!"

17

Na so piyamakawatanan iran so Tagot, - ka oba iran masimba skaniyan, - go miyananangoran siran ko Allah, - na bagian iran so tothol a mapiya: Na pphamanotholing ka sa mapiya so manga oripn Ko, -

18

A siran so pphamakin'gn iran so katharo, na phagonotan iran so mapiya on: Siran man so pinggonanao siran o Allah, go siran man na siran so manga papantas i akal.

19

Ino so miyatangkd on so katharo a siksa: Bang ka khasabt so taw a matatago ko naraka?

20

Ogaid na so inikalk iran so Kadnan iran, na adn a bagian iran a manga darpa a maporo, sii ko kaporoan iyan so manga darpa a maporo a pimbabalay: Pphamangondas ko kababaan iyan so manga lawasayg: Diyandi o Allah: Di pndorat so Allah ko diyandi.

21

Bang ka da maylay a mataan! a so Allah na piyakatoron Iyan phoon ko kawang so ig, na piyakasnp Iyan oto ko pphamangmbowatan a ig ko lopa? Oriyan iyan na pphakagmawn Iyan sa sabap rkaniyan, so pr a mbidabida so manga warna niyan: Oriyan iyan na pphrorang; na pkhailaing ka skaniyan a pphakabinaning; oriyan iyan na pmbalowin Iyan oto a ropt. Mataan! a adn a matatago roo man a titho a ndao ko manga papantas i akal.

22

Ino so taw a piyakaloag o Allah so rarb iyan makapantag ko Islam, na skaniyan na sii ko sindaw a phoon ko Kadnan iyan, (ba lagid o piyarkat Iyan so poso iyan)? Na sangat a siksa a rk o khittgas so manga poso iran ko tadm ko Allah! Siran man i matatago ko kadadag a mapayag!

23

So Allah na initoron Iyan so lbi a mapiya a tothol, kitab a makapzasagindai, a gii makhasokasoy a pthabadn so phoon rkaniyan so manga kobal o siran a ikaalk iran so Kadnan iran; oriyan iyan na plmk so manga kobal iran ago so manga poso iran ko tadm ko Allah. Giyoto man so (Qor'an a) toroan o Allah a: Thoroon Iyan sa sabap rkaniyan so taw a kabaya Iyan; na sa taw a dadagn o Allah, na da a makanggonanao ron.

24

Ino so taw a khatampar iyan so paras iyan ko marata a siksa ko alongan a qiyamah, (ba lagid o phakalidas ko siksa)? Na tharoon ko manga darowaka: "Taami niyo so pizokat iyo (a marata)!"

25

Tomiyaplis so miyaonaan iran, na miyakatalingoma kiran so siksa ko di iran kapakaiin'ngka.

26

Na piyakitaaman kiran o Allah so kahinaan ko kawyagoyag ko doniya; na mataan a so siksa ko akhirat i lbi a mala, o siran na katawi ran!

27

Na sabnsabnar a inmbaalan Ami ko manga manosiya, sii sangkai a Qor'an so oman i ibarat, ka an siran makatanod.

28

Pphangadian a basa Arab, a da a bkhog on: ka an siran makapananggila.

29

Mimbaal so Allah sa ibarat: Mama a kathotompotompokan skaniyan o di phamagayonayon, go mama a kabisa o isa a mama: Ba mlagid a dowaya a ibarat? So podi na rk o Allah! - kna, ka so kadaklan kiran na di iran katawan.

30

Mataan! a ska na phatay, go mataan! a siran na phamatay.

31

Oriyan iyan na mataan! a skano ko alongan a qiyamah, sii ko hadapan o Kadnan iyo, na pzasawala kano.

Part 24

32

Na ba adn a makalawan a darowaka ko taw a tiyokasan iyan sa kabokhag so Allah, go piyakambokhag iyan so bnar gowani a makatalingoma on; ba da a matatago ko naraka Jahannam a darpa o miyamangongkir?

33

Na so minitalingoma niyan so bnar, ago so minaron na siran man so siran i khipanananggila.

34

Mapmbagian iran so nganin a kabaya iran, sii ko Kadnan iran: Giyoto man i balas ko miphipiya:

35

A giya kaplalasa kiran o Allah ko marata ko pinggolawla iran, go giya kimbalasn Iyan kiran ko balas kiran, a pantag o mapiya a pinggolawla iran.

36

Ba di so Allah i Maka-aangkos ko oripn Iyan! Na ipphangangalk iran rka so siran a salakaw ko Allah! Na sadn sa taw a dadagn o Allah, na da a makapnggonanao ron.

37

Na sadn sa taw a toroon o Allah, na da a makadadag on. Ba di so Allah i Mabagr, a Khirk ko kandadan'g?

38

Na ibt o izaan ka kiran o: "Antawaa i miyadn ko manga langit ago so lopa?" Na ptharoon iran dn a: "So Allah", tharoang ka: "Ay gda iyo ko pphanongganowin iyo a salakaw ko Allah, - o pakaantapi ako o Allah sa morala, ba siran i phamakapokas ko morala Niyan? - odi na pakaantapan ako Niyan sa limo, ba siran i phamakarn ko limo Iyan?" Tharoang ka a: "Ka-aangkosan ako o Allah! Skaniyan i Sasarigan o khisasarig."

39

Tharoang ka: "Hay pagtaw akn, nggalbk kano sii ko tindg iyo: Mataan! a Sakn na gomagalbk (mambo): Na katokawan iyo bo, -

40

"So taw a khatalingomaan skaniyan a siksa a phakarondann Iyan, go khatanaan skaniyan a siksa a tatap."

41

Mataan! a Skami na initoron Ami rka (hay Mohammad) so kitab a rk o manga manosiya sii ko bnar. Na sadn sa taw a komdg ko ontol, na rk o ginawa niyan: Na sa taw a tharidadag, na khadadag sa sii bo phakatana sii rkaniyan. Kna a ba ska i somisiyap kiran.

42

So Allah na pthangann Iyan so manga niyawa ko wakto a kapatay niyan; go (pthangann Iyan) so dapn matay sii ko katotoroga on: Na phagrnn Iyan so piyakanggolalan Iyan on so kapatay, go pmbotawanan Iyan so salakaw ron, taman ko taalik a miyapnto. Mataan! a adn a matatago roo man a titho a manga tanda ko pagtaw a pphamimikirann iran.

43

Ino siran khowa sa salakaw ko Allah a phamangogop? Tharoang ka: "Ati apiya pn siran na da a kapaar iran a mayto bo, go da a sabot iran?"

44

Tharoang ka a: "Rk o Allah so kapangongogopan langon: Rk Iyan so kapaar ko manga langit ago so lopa: Oriyan iyan na Ron kano phakandoda (ko alongan a qiyamah)."

45

Na igira a miyaaloy so Allah a Isaysa Skaniyan, na masisingay so manga poso o siran a di mapaparatiyaya ko akhirat; na igira a miyaaloy so salakaw Rkaniyan, na samawto na siran na pkhababaya siran!

46

Tharoang ka: "Ya Allah! a miyadn ko manga langit ago so lopa! a Matao ko gaib ago so mapayag! Ska i khokom ko manga oripn Ka sii ko nganin a siran na zosoransorang siran on."

47

Na opama ka mataan! a rk o siran a mindadarowaka so matatago ko lopa langon, go so lagid iyan na ibabid on, na mataan a iyaon iran oto sa ginawa iran ko marata a siksa ko alongan a qiyamah: Na mapayag kiran phoon ko Allah, so da iran masara a pandapat (a mbarambarang a siksa)!

48

Go mapayag kiran so manga rarata a pinggalbk iran, go katangkalan siran o piyamagrgan iran (a siksa)!

49

Na igira a miyasogat so manosiya a morala, na mangni Rkami: Oriyan iyan na igira bigan Ami skaniyan sa limo a phoon Rkami, na tharoon Iyan a: "Aya bo a kinibgan rakn on na makapantag ko katao!" kna, ka giyoto na tpng, na ogaid na so kadaklan kiran na di iran katawan!

50

Sabnar a pitharo aya o siran a miyaonaan iran! Na da kiran makanggay a gona so pizokat iran.

51

Na miyasogat siran o manga rarata a pizokat iran. Na so mindadarowaka a pd ko siran aya na khasogat siran dn o manga rarata a pizokat iran, go di siran mamakapalagoy!.

52

Ba iran di katawi a mataan! a so Allah na pphakawladn Iyan so riskhi ko taw a kabaya Iyan, go pphakasimpitn Iyan. Mataan! a adn a matatago roo man a titho a manga tanda ko pagtaw a khipaparatiyaya!

53

Tharoang ka ko manga oripn Ko a so kiyapmalawanian iran so manga ginawa iran a: "Di kano khadai sa panginam ko limo o Allah: Mataan! a so Allah na pnapin Iyan so manga dosa langon: Mataan aya! a Skaniyan so Manapi, a Makalimoon.

54

"Go ndod kano ko Kadnan iyo, go mbayorantang kano Rkaniyan, ko da pn kapakatalingoma rkano o siksa a: Sa oriyan iyan na di kano khatabangan.

55

"Go onoti niyo so (Qor'an a) mapiya a so initoron rkano a phoon ko Kadnan iyo, ko dapn kapakatalingoma rkano o siksa a mitalmba, a skano na di niyo maiin'ngka!

56

"Ka oba matharo o ginawa i: Hay miyakazndit ako! - sa kiyandidimataga ko ko onot ko Allah, go mataan a miyabaloy ako a minitapi dn ko mamakasodi!

57

"O di na matharo iyan a: Opama ka mataan! a so Allah na tiyoro ako Niyan, na miyabaloy ako dn a pd ko miyamananggila!

58

"O di na matharo iyan ko wakto a kasandngi niyan ko siksa a: Oba bo mataan! a adn a kapakakasoy akn (sa doniya), na mabaloy ako a pd ko miphipiyapiya!

59

"Oway na, sabnar a miyakatalingoma rka so manga ayat Akn, na piyakambokhag ka skaniyan: Go pimaratabatan ka, na miyabaloy ka a pd ko miyamangongkir!"

60

Na sii ko alongan a qiyamah na maylaing ka so siran a miyamamokhag makapantag ko Allah; a so manga paras iran na miyamangintkintm; ba da a matatago ko naraka Jahannam a darpa a bagian o manga takabor?

61

Na isabt o Allah ko siran a miyamananggila so kapakaslang iran sa maliwanag: da a khisogat kiran a marata, go di siran makapmboko.

62

So Allah i miyadn ko langowan taman, go Skaniyan sii ko langowan taman i somisiyap on.

63

Rk Iyan so manga gonsi o manga langit ago so lopa: Na so miyamangongkir ko manga ayat o Allah, - na siran man na siran i manga logi.

64

Tharoang ka: "Ba so salakaw ko Allah i izogo iyo rakn a pzoasoatn ko, hay da a manga mlng iyan?"

65

"Na sabnsabnar a iniilaham rka, - go sii ko siran a miyaonaan ka, - a mataan a o panakoto ka, na mataan a maylang dn so amal ka, go mataan a khabaloy ka dn a pd ko manga logi."

66

Ogaid na so Allah i zoasoatang ka, go tapi ka ko miyamanalamat.

67

Na da iran slaan ko Allah so patot a kala Iyan, a so lopa langon na kkmsn Iyan ko alongan a qiyamah, go so manga langit na phangalololon ko kawanan Iyan: Soti Skaniyan! go maporo a ka-aawat Iyan ko ipphanakoto iran!.

68

Na iyopn so sanggakala, na mamatay so zisii ko manga langit ago so zisii ko lopa, inonta so kabaya o Allah. Oriyan iyan na iyopn pman oto zaroman, na samawto na siran na khipakatitindg a nomanayaw siran (o antonaa i ikhidiya kiran)!

69

Na lomiwanag so lopa sa sabap ko sindaw o Kadnan iyan: Go nggomonn so daptar; go pakadarpaan so manga nabi, ago so manga saksi; go ikokom kiran so bnar; a siran na di siran kasalimbotan.

70

Go itoman sa tarotop ko oman i ginawa so pinggalbk iyan; na so Allah i Matao ko gi iran nggolawlaan.

71

Na idndg so miyamangongkir sii ko naraka Jahannam a khokhoyokhoyog: Taman sa amay ka makawma siran on, na kalkaan so manga pinto iyan. Na tharoon kiran o khisisiyap on a: "Ba rkano da makatalingoma, so manga sogo a pd rkano, a kapphangadian iyan rkano so manga ayat o Kadnan iyo, go mipphamakaiktiyar iran rkano so kapakambabaratmowa sa alongan iyo wai?" Tharoon iran: "Ungkaino da: Na ogaid na miyatangkd so katharo o siksa ko miyamangongkir!"

72

Tharoon (kiran): "Sold kano ko manga pinto o naraka Jahannam, sa makakakal kano ron: Na mikharatarata a darpa o manga takabor!"

73

Na idolog so miyamangongonotan ko Kadnan iran sii ko sorga a khokhoyokhoyog: Taman sa amay ka makatalingoma siran on, a kallkaan so manga pinto iyan; na tharoon kiran o khisisiyap on: "Kalilintad a sii rkano! manga pipiya kano! na pamanold kano ron, sa makakakal kano ron."

74

Go tharoon iran: "So podi na rk o Allah, a so tiyoman Iyan rkami so diyandi Iyan, go piyakipangowarisan Iyan rkami so lopa: Sa pndarpa kami ko sorga sa sadn sa kabaya ami: Na sayana a mapiya a balas ko miyamagamal (sa mapiya)!"

75

Na maylaing ka so manga malaikat a khokoliling siran ko mliliyota ko aras, a ipthasbik iran so podi ko Kadnan iran; go ikokom kiran so ontol, na tharoon a: "So podi na rk o Allah, a Kadnan o manga kaadn!"

61

Na isabt o Allah ko siran a miyamananggila so kapakaslang iran sa maliwanag: da a khisogat kiran a marata, go di siran makapmboko.

62

So Allah i miyadn ko langowan taman, go Skaniyan sii ko langowan taman i somisiyap on.

63

Rk Iyan so manga gonsi o manga langit ago so lopa: Na so miyamangongkir ko manga ayat o Allah, - na siran man na siran i manga logi.

64

Tharoang ka: "Ba so salakaw ko Allah i izogo iyo rakn a pzoasoatn ko, hay da a manga mlng iyan?"

65

"Na sabnsabnar a iniilaham rka, - go sii ko siran a miyaonaan ka, - a mataan a o panakoto ka, na mataan a maylang dn so amal ka, go mataan a khabaloy ka dn a pd ko manga logi."

66

Ogaid na so Allah i zoasoatang ka, go tapi ka ko miyamanalamat.

67

Na da iran slaan ko Allah so patot a kala Iyan, a so lopa langon na kkmsn Iyan ko alongan a qiyamah, go so manga langit na phangalololon ko kawanan Iyan: Soti Skaniyan! go maporo a ka-aawat Iyan ko ipphanakoto iran!.

68

Na iyopn so sanggakala, na mamatay so zisii ko manga langit ago so zisii ko lopa, inonta so kabaya o Allah. Oriyan iyan na iyopn pman oto zaroman, na samawto na siran na khipakatitindg a nomanayaw siran (o antonaa i ikhidiya kiran)!

69

Na lomiwanag so lopa sa sabap ko sindaw o Kadnan iyan: Go nggomonn so daptar; go pakadarpaan so manga nabi, ago so manga saksi; go ikokom kiran so bnar; a siran na di siran kasalimbotan.

70

Go itoman sa tarotop ko oman i ginawa so pinggalbk iyan; na so Allah i Matao ko gi iran nggolawlaan.

71

Na idndg so miyamangongkir sii ko naraka Jahannam a khokhoyokhoyog: Taman sa amay ka makawma siran on, na kalkaan so manga pinto iyan. Na tharoon kiran o khisisiyap on a: "Ba rkano da makatalingoma, so manga sogo a pd rkano, a kapphangadian iyan rkano so manga ayat o Kadnan iyo, go mipphamakaiktiyar iran rkano so kapakambabaratmowa sa alongan iyo wai?" Tharoon iran: "Ungkaino da: Na ogaid na miyatangkd so katharo o siksa ko miyamangongkir!"

72

Tharoon (kiran): "Sold kano ko manga pinto o naraka Jahannam, sa makakakal kano ron: Na mikharatarata a darpa o manga takabor!"

73

Na idolog so miyamangongonotan ko Kadnan iran sii ko sorga a khokhoyokhoyog: Taman sa amay ka makatalingoma siran on, a kallkaan so manga pinto iyan; na tharoon kiran o khisisiyap on: "Kalilintad a sii rkano! manga pipiya kano! na pamanold kano ron, sa makakakal kano ron."

74

Go tharoon iran: "So podi na rk o Allah, a so tiyoman Iyan rkami so diyandi Iyan, go piyakipangowarisan Iyan rkami so lopa: Sa pndarpa kami ko sorga sa sadn sa kabaya ami: Na sayana a mapiya a balas ko miyamagamal (sa mapiya)!"

75

Na maylaing ka so manga malaikat a khokoliling siran ko mliliyota ko aras, a ipthasbik iran so podi ko Kadnan iran; go ikokom kiran so ontol, na tharoon a: "So podi na rk o Allah, a Kadnan o manga kaadn!"

Total Number of Verses: 85

1

Ha, Mim. (so Allah i Matao ko paka-aantapan Iyan on.)

2

So kinitoron o kitab na phoon ko Allah, a Mabagr, a Matao, -

3

A Pphakada ko dosa, go Ptharima ko tawbat, a maylot i kandadan'g, a Khirk ko kakayaan. Da a patot a pzoasoatn a inonta Skaniyan: Sii Rkaniyan so khabolosan.

4

Daa pphamawal ko manga ayat o Allah a rowar ko siran a miyamangongkir. Na oba ka malimpang o gi iran kathotogalin ko manga ingd!

5

Tomiyaplis ko miyaonaan iran, so pagtaw o Noh, go so mithampotampong ko oriyan iran; go piyagngtan o oman i pagtaw so sogo kiran, ka mbiyagn iran skaniyan, go inipamawal iran so ribat, ka imbinasa iran oto ko bnar: Na siniksa Akn siran! Na antonaa i miyambtad o siksa Akn (kiran)!

6

Na giyaya dn i kinitoman o katharo o Kadnan ka ko siran a miyamangongkir; a mataan! a siran i manga taw ko naraka!

7

So khitatanggong ko aras ago so makaliliyot on na ipthasbik iran so podi ko Kadnan iran; go paparatiyayaan iran Skaniyan; go ipphangni ran sa maap so miyamaratiyaya (gii ran tharoon): "Kadnan Ami, miyarangkom Ka so langowan taman a limo go katao; na pmaaping Ka so siran a mithatawbat, go kidg iran so lalan Ka; go pakalidasang Ka siran ko siksa ko naraka Jahim!

8

"Kadnan ami! go pakasoldang Ka siran ko manga sorga a tatap, a so inidiyandi i Ka kiran, rakhs o miyamaginontolan ko manga loks iran, go so manga karoma iran, go so manga moriran a taw! mataan! a Ska na Ska so Mabagr, a Mawngangn;

9

"Go pakalidasang Ka siran ko manga rarata; ka sadn sa pakalidasn Ka ko manga rarata sa alongan oto, - na sabnar a inikalimoo Ka skaniyan: Na giyoto man na skaniyan i daag a lbi a mala."

10

Mataan! a so miyamangongkir na pphamakalangkapn kiran a: "Mataan a so rarangit o Allah na lbi a mala a di so rarangit iyo ko manga ginawa niyo, gowani ko ipndolon rkano so paratiyaya na phagongkirn iyo."

11

Tharoon iran: "Kadnan ami, biyono kaming Ka sa miyakadowa, go inoyag kaming Ka sa miyakadowa! Na inipagikral ami so manga dosa mi; na ba adn a okit a kapakaliyo ami (phoon ko naraka)?"

12

(Tharoon o Allah:) "Giyoto man na sabap sa mataan aya! a igira inipanolon so Allah a Isaysa Skaniyan, na phagongkirn iyo; na amay ka pzakotowan Skaniyan, na ppharatiyayaan niyo! Na so kokoman na rk o Allah, a Maporo, a Lbi a mala!"

13

Skaniyan so pphakiilay Niyan rkano so manga tanda Iyan, go pphakatoronan kano Niyan phoon ko kawang sa riskhi (a oran): Na da a phakatanod on a rowar ko pphananangoran (ko Allah).

14

Na zoasoata niyo so Allah sa totolabosa niyo Rkaniyan, so okit ko kapagintaw, apiya pn miyagowad so miyamangongkir.

15

Pphoro ko manga daradat, a Khirk ko aras: Ipthoron Iyan so wahy phoon sa sogoan Iyan ko taw a kabaya Iyan ko manga oripn Iyan; ka an Iyan kapakiiktiyari so alongan a kapakambabaratmowa, -

16

Sii ko alongan a siran na mabayar siran: da a makapagma kiran ko Allah a mayto bo. (Tharoon o Allah:) "Antawaa i Khirk ko kapaar sa alongan nai?" Rk o Allah, a Isaysa, a Phakagaga!

17

Sa alongan nai na imbalas ko oman i ginawa so pinggalbk iyan; da a kapanalimbot sa alongan nai, mataan! a so Allah na Magaan i kapamagitong.

18

Na pakiiktiyaring Ka kiran so gawii a pphakarani, masa a so manga poso na mongkg ko manga korokom, a khipakamboboko. Da a bagian o manga darowaka a gomagt (kiran) sa ginawa; go da a phangongogopan a khatarima.

19

Katawan Iyan so gii kandonsiyan o manga mata, go so pag-umaan o manga rarb (a manga pamikiran).

20

Na so Allah na ipkhokom Iyan so bnar: Na so pphanongganowin iran a salakaw Rkaniyan, na da a khikokom iran a mayto bo. Mataan! a so Allah na Skaniyan so Pphakan'g, a Pphakaylay.

21

Ba siran da makandalakaw ko lopa, ka an iran maylay o antonaa i miyambtad o kiya akiran ko siran a miyaonaan iran? Miyabaloy siran a siran i lbi a di siran i bagr, go manga rarad ko lopa: Na siniksa siran o Allah sabap ko manga dosa iran, go da a miyabaloy a miyakalinding kiran ko (siksa o) Allah.

22

Giyoto man na sabap sa mataan! a siran na minitalingoma kiran o manga sogo kiran so manga rarayag a karina, na inongkir iran: Na siniksa siran o Allah: Mataan! a Skaniyan i Mabagr, a Maylot i kandadan'g.

23

Na sabnsabnar a siyogo Ami so Mosa, rakhs o manga tanda Ami, go katantowan a mapayag.

24

Sii ko Pir'awn, ago so Haman, go so Qaroon; na ba iran dn pitharo a: "Balik mata, a lbi a bokhag!,"

25

Na kagiya a miyoma niyan kiran so bnar, a phoon ko hadapan Ami, na pitharo iran a: "Pamonoa niyo so manga wata a mama o siran a miyamaratiyaya a pd iyan, na oyaga niyo so manga babay kiran"; na da ko antangan a marata o miyamangongkir inonta na matatago ko karibat!

26

Na pitharoo Pir'awn: "Botawani ako niyo ka bonoong ko so Mosa; go tawaga niyan i Kadnan iyan, mataan! a sakn na ipkhawan akn o ba niyan kasambii so okit iyo, odi na ba niyan mapayag ko lopa so kapaminasa!"

27

Na pitharo o Mosa a: "Mataan! a sakn na lominindong ako ko Kadnan ko go Kadnan iyo phoon ko oman i takabor a di mapaparatiyaya ko alongan a kapamagitong!"

28

Na pitharo o mama a mapaparatiyaya (a si Hazqil) a pd ko manga tonganay o Pir'awn, a pag-umaan iyan so paratiyaya niyan: "Ino niyo mbonoon ko mama a gii niyan katharoa sa: Aya Kadnan ko na so Allah a sabnar a minioma niyan rkano so manga rarayag a karina a phoon ko Kadnan niyo? Na o skaniyan na bokhag, na phakatana on so kabokhag iyan; o skaniyan na mmamataan, na khisogat rkano so sabaad ko ipphangangalk iyan rkano: Mataan! a so Allah na di Niyan pnggonanaon so taw a skaniyan na mmamalawani a bokhag!".

29

"Hay pagtaw akn, rk iyo so kadato sa alongan nai: Makadadaag kano ko lopa: Na antawa onon i makatabang rktano ko siksa o Allah amay ka makawma rktano? Pitharo o Pir'awn: Da a ithoro akn rkano a rowar ko mapipikir akn; go da a pnggonanaoan ko rkano a rowar ko lalan a ontol!"

30

Na pitharo o miyaratiyaya: "Hay pagtaw akn, mataan! a sakn na ipkhawan akn skano ko lagid o masa o mithampotampong!"

31

"Lagid o miyasowa o pagtaw o Noh, go so Ad, go so Samod, go so miyaoriyan iran: Na kna oba kabaya o Allah i kasalimboti ko manga oripn (Niyan);

32

"Go hay pagtaw akn, mataan! a sakn na ikhawan akn skano ko alongan a kathatawaga;

33

"Alongan a tomalikhod kano a pphamalagoy kano: da a makalinding rkano phoon ko (siksa o) Allah: Na sa taw a dadagn o Allah, na da a makanggonanao ron;

34

"Na sabnsabnar a minitalingoma rkano o Yosof gowani so manga rarayag a karina, na da kano dn pagkar ko kazasangka ko minitalingoma niyan rkano to: Taman sa kagiya matay, na pitharo iyo a: 'Da dn a zogoon o Allah, ko oriyan iyan a sogo'. Lagid man oto a kandadaga o Allah ko taw a skaniyan na mmamalawani a zasangka;

35

"Siran na pphamawaln iran so manga ayat o Allah, a da a katantowan a miyakatalingoma kiran. Miyakala a rarangit a phoon ko Allah go phoon ko siran a miyamaratiyaya. Lagid man oto a kappharkata o Allah ko oman i poso o takabor, a thtgas."

36

Na pitharo o Pir'awn: "Hay Haman, mbalayn akong ka sa bantabantay, ka an ako misampay ko manga lalan,

37

"A manga lalan ko manga langit, ka an akn kabantai so tohan o Mosa: Ka mataan! a sakn na ikakarang ko dn skaniyan sa bokhag". Na giyoto man i kiyapharasi ko Pir'awn ko marata ko amal iyan, go kiyabalambanan ko lalan (a ontol); na da ko antangan a marata o Pir'awn inonta na matatago ko kalogi.

38

Na pitharo o miyaratiyaya: "Hay pagtaw akn, onoti ako niyo: ka thoroon ko skano ko lalan a ontol."

39

"Hay pagtaw akn! giya ungkai a kawyagoyag ko doniya na matag sagad a kapipiya ginawa: Na mataan! a so akhirat na giyoto i darpa a tatap."

40

"Sa taw a nggalbk sa marata na da a imbalas on a rowar ko lagid iyan: Na sa taw a nggalbk sa mapiya, mama odi na babay, a skaniyan na mapaparatiyaya, - na siran man i phamakasold ko sorga: Pphagprn siran roo sa da a pithatamanan iyan;

41

"Go hay pagtaw akn, ino ako wai a ipthawag akn rkano so kapakaslang sa maliwanag na aya ipthawag iyo rakn na so apoy (ko naraka)!

42

"Pthawagn ako niyo, ka an akn maongkir so Allah, go an akn on misakoto so da a katao akn on; na sakn na ipthawag akn rkano so (Allah a) Mabagr, a Manapi!"

43

"Matatangkd a so ipthawag iyo rakn skaniyan na da a khatarima iyan a pangni sii sa doniya, go da sii sa akhirat; go mataan! a sii tano phakandod ko Allah; na mataan! a so manga malawani na siran i manga taw ko naraka!

44

"Na katadman iyo dn so katharo akn rkano; na isasarig akn so tindg akn ko Allah: Mataan! a so Allah i phagilay ko mang oripn (Niyan)."

45

Na inilidas skaniyan o Allah ko manga rarata a antangan iran; na kiyatangkalan so pagtaw o Pir'awn o marata a siksa.

46

So apoy na pzandign siran on, ko kapitapita, go so kagabigabi: Na sii ko alongan a kapakatindg o bangkit (na tharoon o Allah:) "Pamakasolda niyo so pagtaw o Pir'awn ko sangat a siksa!"

47

Na so masa a phapawala siran ko naraka! Na tharoon o manga lolobay ko siran a miyamanakabor a: "Mataan! a skami na miyabaloy kami a phagonot rkano: Na ino, skano khalinding kami niyo ko sabaad ko apoy?

48

Tharoon o siran a miyamanakabor: "Mataan! a sktano na palaya tano ron khatago. Mataan! a so Allah na sabnar a kiyokom Iyan so manga oripn (Niyan)!"

49

Na tharoon o siran a khitatago ko naraka ko khisisiyap ko Jahannam: "Pangniya niyo ko Kadnan iyo a pakakhapan kami Niyan sa salongan bo ko siksa!"

50

Tharoon iran: "Ba rkano da mitalingoma o manga sogo rkano so manga rarayag a karina?" Sommbag siran: "Ungkayno da"; na tharoon iran: "Na pangni kano! Na da ko pangni o miyamangongkir inonta na matatago ko karibat!"

51

Mataan! a Skami na thabangan Ami dn so manga sogo Ami, ago so miyamaratiyaya, sii ko kawyagoyag ko doniya, go so alongan a kapakatindg o manga saksi (ko alongan a qiyamah), -

52

Alongan a di makanggay a gona ko manga darowaka so daowa iran, go bagian iran so morka, go bagian iran so marata a darpa.

53

Na sabnsabnar a inibgay Ami ko Mosa so toroan, go piyakipangowarisan Ami ko manga moriyataw o Israil so kitab (a Tawrat),

54

Toroan go pananadm a bagian o adn a manga sabot iyan.

55

Na phantang ka, mataan! a so diyandi o Allah na khatoman: Go pangni ka sa maap makapantag ko dosang ka, go pthasbikn ka so podi o Kadnan ka ko kagabigabi go so kapitapita.

56

Mataan! a siran a pphamawaln iran so manga ayat o Allah a da a katantowan a miyakatalingoma kiran; na da a matatago ko manga rarb iran a rowar ko kathakabor, a di iran bo oto praotn: Na lindong ka ko Allah: Mataan aya! a Skaniyan so Pphakan'g, a Pphakaylay.

57

Mataan so kiya adna ko manga langit ago so lopa na lbi a mala a di so kiya adna ko manosiya: Na ogaid na so kadaklan ko manga manosiya na di iran katawan.

58

Na di makaphagizan so bota ago so pphakaylay: Go (sakamawto) so miyamaratiyaya, go pinggalbk iran so manga pipiya, ago so minggalbk sa marata. Miyakayto ito a kapakatatadm iyo!

59

Mataan! a so bangkit na phakatalingoma dn: da a sangka a madadalm on: Na ogaid na so kadaklan ko manga manosiya na di iran paparatiyayaan.

60

Na pitharo o Kadnan iyo: "Pangni kano Rakn, ka tarimaan Ko rkano (so pangni niyo): Mataan! a so siran a pmamaratabatan iran so pangni Rakn na mamakasold siran dn ko naraka Jahannam, a khipakarorondan!"

61

So Allah so miyadn rkano ko gagawii, ka ang kano ron pphakadkha, go so dawndaw, a mipphangilaylay. Mataan! a so Allah i tanto a Malai-gagaw ko manga manosiya: Na ogaid na so kadaklan ko manga manosiya na di siran phanalamat.

62

Giyoto man so Allah, a Kadnan iyo, a miyadn ko langowan taman. Da a tohan a inonta Skaniyan: Na andamanaya i katatalikhod iyo!

63

Lagid man oto a kapphakatalikhoda ko siran a aya btad iran ko manga ayat o Allah na oongkirn iran.

64

So Allah so biyaloy Niyan rkano so lopa a kapthaknaan, go so langit a atp, go mimbontal rkano, na piphiyapiyaan Iyan so bontal iyo; - go inipagpr Iyan rkano so manga pipiya; - giyoto man so Allah a Kadnan iyo. Na Soti so Allah, a Kadnan o manga kaadn!

65

Skaniyan so Oyagoyag: da a tohan a inonta Skaniyan: Na zoasoata niyo Skaniyan, sa totolabosa niyo Rkaniyan so okit ko kapagintaw. So podi na rk o Allah, a Kadnan o manga kaadn!

66

Tharoang ka a: "Mataan! a sakn na inisapar rakn so kazoasoata ko ko siran a pphanongganowin iyo a salakaw ko Allah, - ko kiyapakatalingoma rakn o manga rarayag a karina a phoon ko Kadnan ko; go inisogo rakn a mbayorantang ako ko Kadnan o manga kaadn."

67

Skaniyan so miyadn rkano phoon sa botha, oriyan iyan na phoon sa notfa, oriyan iyan na miyakapoon sa rogo a mimbathik; oriyan iyan na pphakaliyon kano Niyan a wata: Oriyan iyan na ang kano raotn ko kakhasad iyo; oriyan iyan na ang kano mabaloy a manga loks; - na so sabaad rkano na taw a pphatay ko da niyan pn kapakatoa; - go ang kano raotn ko adiyal a miyapnto; ka an iyo dii manggdagda.

68

Skaniyan so Pphangoyag go Pphangimatay; na igira a adn pakapnggolalann Iyan a sogoan, na aya bo a ptharoon Iyan on na: "Kon", na maadn.

69

Bang ka da manggdagda so siran a pphamawaln iran so manga ayat o Allah? O andamanaya i katatalikhod iran? -

70

Siran so piyakambokhag iran so kitab, go so inisogo Ami skaniyan ko manga sogo Ami: Na katokawan iran dn, -

71

Ko masa a so manga patong na matago ko manga lig iran, na, go so manga rantay, - na tondaan siran, -

72

Ko phlikabo a ig; oriyan iyan na pakakadgn siran ko apoy;

73

Oriyan iyan na tharoon kiran: "Anda so ipphamanakoto niyo -

74

"A salakaw ko Allah?" Ismbag iran: "Diyorat kami ran": Kna! ka da a piyanongganoy ami gowani a mayto bo. Lagid man oto a kandadaga o Allah ko miyamangongkir.

75

"Giyoto man na sabap ko kiyakhariyala iyo ko lopa sa di ontol, go sabap ko kiyambotaka iyo."

76

"Pamanold kano ko manga pinto o naraka Jahannam, a makakakal kano ron: Na miyakaratarata a darpa o manga takabor!"

77

Na phantang ka: Mataan! a so diyandi o Allah na bnar: Na amay ka pakiilay Ami rka so sabaad ko ididiyandi Ami kiran, odi na tangann Ami ska, - na sii siran Rkami bo phamakandoda.

78

Na sabnsabnar a somiyogo Kami sa manga sogo a miyaonaan ka: So sabaad kiran na taw a piyanothol Ami rka, na so sabaad kiran na da Ami rka panothola. Na da mapatot ko sogo a ba adn a mitalingoma Niyan a tanda inonta o sabap ko idin o Allah: Na amay ka makawma so sogoan o Allah, na mikokom so bnar, na malogi roo dn so minggagalbk sa ribat.

79

So Allah so miyadn rkano ko manga ayam, ka ang kano gii makakhoda ko sabaad on, go so sabaad on na pkhakan iyo;

80

Go adn a bagian iyo a matatago on a manga gona, - go kagiya an iyo misampay sa sabap Rkaniyan so hadiyat a matatago ko manga rarb iyo; go so liyawaw niyan ago so liyawaw o manga kapal na pkharoran kano ron.

81

Na pphakiilay Niyan rkano so manga tanda Iyan: Na anda ko manga tanda o Allah i pagongkirn niyo?

82

Ba siran da makandalakaw ko lopa, ka an iran mapagilaylay o antonaa i miyambtad o kiya akiran ko siran a miyaonaan iran? Aya btad iran na madakl a di siran, go makalalawan i bagr go manga rarad ko lopa: Na da kiran makalinding so miyasokat iran.

83

Na kagiya a mitalingoma kiran o manga sogo kiran so manga rarayag a karina, na kiyababayaan iran so zisii kiran a katao; na kiyatangkalan siran o piyamagrgan iran oto (a siksa).

84

Na kagiya a kasandngan iran so siksa Ami, na pitharo iran: "Piyaratiyaya mi so Allah a Isaysa Skaniyan go inongkir ami so skami na inipamanakoto ami Ron."

85

Na da kiran makanggay a gona so paratiyaya iran ko kiyasandngi ran ko siksa Ami. Okit o Allah a sabnar a miyaypos ko manga oripn Iyan. Na miyalogi roo man so miyamangongkir!

Total Number of Verses: 54

1

Ha. Mim. (So Allah i Matao ko paka-aantapan Iyan on.)

2

(Giya ungkai a Qor'an na) Initoron a phoon ko Masalinggagaw, a Makalimoon;

3

Kitab, a pizalisay so manga ayat on; - a Qor'an a basa Arab, a rk o pagtaw a manga tatao ron;

4

Pphamanothol sa mapiya, go phamakaiktiyar: Na tomiyalikhod so kadaklan kiran, na siran na di siran phamakin'g.

5

Na pitharo iran a: So manga poso ami na matatago ko manga totop, phoon ko ipthawag ka rkami skaniyan, go kiyatagoan so manga tangila mi sa kabngl, go kaaltan kami ago ska sa rnding: Na nggalbk ka; ka mataan! a skami na gomagalbk (mambo)!

6

Tharoang ka (ya Mohammad) a: "Sakn na matag manosiya a lagid iyo: Iphagilaham rakn a aya bo a tohan iyo na so Tohan a Isaysa: Na pananangoran kano sii Rkaniyan, go pangni kano Ron sa maap". Na sangat a siksa a rk o manga pananakoto, -

7

Siran na di iran thonayn so zakat, go siran na so akhirat na siran na oongkirn iran.

8

Mataan! a so miyamaratiyaya, go pinggalbk iran so manga pipiya, na adn a bagian iran a balas a di pthaman.

9

Tharoang ka a: Ino a mataan! a skano na titho a oongkirn iyo so (Allah a) miyadn ko lopa ko sold o dowa gawii? Go pphangmbaal kano sa manga saginda Niyan! Giyoto man so Kadnan o manga kaadn.

10

Go tiyagoan Iyan oto sa manga palaw sii ko kaporoan iyan, go piyakandaklan Iyan oto sa mapiya, go diniyangka Iyan on so manga pagpr on sii ko pat gawii, a ndatadatar ko pphamangingiza.

11

Oriyan iyan na siyangor Iyan so langit, a skaniyan na bl, na pitharo Iyan on go sii ko lopa a: "Phasiyonot kano, sa onot odi na tgl". Inismbag iran a: "Miphasiyonot kami sa pphangongonotan kami."

12

Na inimasad Iyan siran a pito a manga langit sii ko dowa gawii, go iniilaham Iyan ko oman i isa a langit so sogoan on. Na inipharas Ami ko langit a marani so manga bitoon, ago so siyap. Giyoto man i takdir o (Allah a) Mabagr, a Matao.

13

Na o talikhod siran, na tharoang ka a: "Piyakiiktiyaran ko rkano so phakapolang lagid o miyakapolang ko pagtaw o Ad, go so pagtaw o Samod!"

14

Gowani a mitalingoma kiran o manga sogo, phoon ko hadapan iran, go phoon ko talikhodan iran a: "Da a pzoasoatn iyo a inonta so Allah". Pitharo iran a: "O kabaya o Kadnan ami, na mataan a tomoron sa manga malaikat: Na mataan! a skami na so inisogo rkano to na inongkir ami."

15

Na so pagtaw o Ad na miyanakabor siran ko lopa sa di ontol, go pitharo iran a: "Antawaa i lawan rkami sa bagr?" Ba iran di katawi a mataan! a so Allah, so miyadn kiran, Skaniyan i lawan kiran sa bagr? Na miyabaloy siran a so manga ayat Ami na oongkirn iran!

16

Na biyotawanan Ami kiran so ndo a domadagoos sii ko manga gawii a manga naas (kiran), ka an Ami kiran kapakitaami so siksa a phakahina sii ko kawyagoyag ko doniya; na mataan a so siksa ko akhirat i lbi a phakahina: Go siran na di siran khatabangan.

17

Na so pman so pagtaw o Samod, na tiyoro Ami siran, na miyatomo iran so kadadag a di so toroan: Na miyadansal siran o phakapolang, a siksa a phakahina, sabap ko pizokat iran (a dosa).

18

Na siyabt Ami so miyamaratiyaya, go miyabaloy siran a khipanananggila.

19

Na sii ko gawii a kalimoda ko manga ridoay o Allah ko naraka, a siran na pakapphnanayawaan siran;

20

Taman sa amay ka makawma siran on (ko kaphamagitonga kiran), na zaksian siran o kan'g iran, go so manga kaylay ran, go so manga kobal iran ko pinggolawla iran.

21

Na tharoon iran ko manga kobal iran: "Ino kami niyo pzaksii?" Na ismbag iran a: "Piyakatharo kami o Allah; - a so piyakatharo Iyan so langowan taman. A Skaniyan so miyadn rkano, ko paganay a kiya okitan, go Ron kano phamakandoda."

22

"Na da kano makadalong ko kazasaksii rkano o kan'g iyo, ago so manga kaylay niyo, ago so manga kobal iyo, na ogaid na: Tiyangkap iyo sa mataan! a so Allah na di Niyan katawan so madakl ko gii niyo nggolawlaan!

23

"Na giyoto man so arangan iyo a so inipagarangan iyo ko Kadnan iyo, a miyakabinasa rkano, na mimbaloy kano a pd ko miyangalologi!."

24

Na apiya i kaphantang iran, na so dn so naraka i darpa iran! Go apiya i kapangni ran sa rila, na di siran mapd ko piririlaan.

25

Na tinibabaan Ami siran sa manga salinggogopa, na pipharasan iran kiran so kasasangoran iran go so katatalikhodan iran; go miyatanto kiran so katharo a rakhs o manga pagtaw a andang a miyaypos ko miyaonaan iran, a manga jinn, go manga manosiya; mataan! a siran na miyabaloy siran a manga logi.

26

Na pitharo o siran a miyamangongkir a: "Di niyo phamakin'ga angkai a Qor'an, go romowa niyo skaniyan ka ang kano makataban!"

27

Na mataan a pakataamn Ami dn so miyamangongkir sa siksa a sangat, go mataan a ibalas Ami kiran dn so tanto a marata a pinggolawla iran.

28

Giyoto man i balas ko manga ridoay o Allah, - a so naraka: Rk iran roo so darpa a kakal: Badal, sabap ko kiyaongkira iran ko manga ayat Ami.

29

Na tharoon o siran a miyamangongkir: "Kadnan ami, pakimasaing Ka rkmi so domiyadag rkami ko manga jinn ago so manga manosiya, ka tagoon Ami siran ko didalm o manga paraparami, ka an siran mabaloy a pd ko miyamakababababa."

30

Mataan! a so siran a pitharo iran a: "Aya Kadnan ami na so Allah", oriyan iyan na miyaginontolan siran, na itoron kiran o manga malaikat (ko masa a kaphatay ran a): "Di kano phangandam! Go di kano pmboko! Go pakapiyaa niyo a ginawa niyo sabap ko sorga, a so skano na ididiyandi rkano!"

31

"Skami i khisisiyap rkano sii ko kawyagoyag ko doniya, go sii ko akhirat: Go bagian iyo roo so pkhababayaan o manga ginawa niyo; go bagian iyo roo so phangni niyo!

32

"Talagad a phoon ko (Allah a) Manapi, a Makalimoon!"

33

Na ba adn a taw a makalbi a mapiya i katharo ko taw a inipanolon iyan so (kawnoti ko) Allah, go minggalbk sa mapiya, go pitharo iyan a: "Mataan! a sakn na pd ko mimbabayorantang (ko Allah)?"

34

Na di makaphagizan so mapiya ago so marata. Rnn ka (ko marata) so mapiya: Na samawto na so adn a ridoo ka on na lagid oba mataan! a skaniyan na ginawai a madasg!

35

Na da a khabgan saya a rowar ko siran a miphapantang, go da a khabgan saya a rowar ko khirk ko ontong a mala.

36

Na amay ka maphakasilay ka o pangonsi a phoon ko shaytan, na lindong ka ko Allah. Mataan aya! a Skaniyan so Pphakan'g, a Matao

37

Na pd ko manga tanda Iyan so gagawii ago so dawndaw, ago so alongan go so olan. Di kano zodiod ko alongan, ago so olan, na sodiod kano ko Allah, a so miyadn kiran, o skano na Skaniyan bo i pzoasoatn iyo.

38

Na oba siran phanakabor: Na (nayno ka) so siran a zisii ko Kadnan ka na gi iran iphoroporo Skaniyan ko gagawii ago so dawndaw; a siran na di siran protosn.

39

Go pd ko manga tanda Iyan a: Mataan! a ska na pkhaylaing ka so lopa a miyagango; na igira a piyakatoron Ami ron so ig, na pananabadn go zibokar (na mtho on so manga mangngto). Mataan! a so miyakaoyag saya i titho a phangoyag ko miyamatay. Mataan! a Skaniyan sii ko langowan taman na Gaos Iyan.

40

Mataan! a siran a pphamakasilayn iran so manga ayat Ami na di siran Rkami makapagma. Ino so taw a phozangn ko naraka, aya mapiya? - antawaa so taw a phakatalingoma a somasarig, ko alongan a qiyamah? Nggalbka niyo so kabaya iyo: Mataan! a so Allah na so gii niyo nggolawlaan na phagilayn Iyan.

41

Mataan! a so miyamangongkir ko pananadm ko kiyapakawma niyan kiran (na ziksaan siran). Na mataan! a skaniyan (a Qor'an) na titho a kitab a sslaan.

42

Daa phakatalingoma on a ribat a phakapoon ko onaan iyan, go da a phakapoon ko oriyan iyan: Initoron a phoon ko (Allah a) Mawngangn, a Pphodin.

43

Daa gii rka tharoon a inonta so sabnar a pitharo ko manga sogo a miyaonaan ka: Mataan! a so Kadnan ka i titho a Khirk ko maap, go Khirk ko siksa a malipds.

44

Na o biyaloy Ami skaniyan a Qor'an a kna a ba basa Arab, na ptharoon iran dn a: "Ino da pakasagogoda so manga ayat on? Ino a kna a ba basa Arab na (so Rasol na) Arab?" Tharoang ka a: "Skaniyan na bagian o siran a miyamaratiyaya a toroan go bolong; na so da pamaratiyaya, na kiyatagoan so manga tangila iran sa kabngl, go skaniyan na inilamn kiran: Siran man na pthawagn siran phoon ko darpa a mawatan!"

45

Na sabnsabnar a inibgay Ami ko Mosa so kitab: Na kiyazasawalaan oto. Na o da so katharo a miyaona a phoon ko Kadnan ka, (so kaphakawriya Niyan ko kapamagitong), na miyakokom siran dn: Na mataan! a siran na matatago dn ko kazasangka phoon rkaniyan sa mapayag a kazangka.

46

Sa taw a nggalbk sa mapiya na rk o ginawa niyan; na sa taw a nggalbk sa marata, na phakatana on: Na da ko Kadnan ka i ba salimbot ko manga oripn (Niyan).

Part 25

47

Sii Rkaniyan phakandoda so katawi ko bangkit: Na da a phakaliyo a manga onga phoon ko manga daog iyan, go da a khawgat a babay, go da a pmbawata a ba di sii ko katao Niyan. Na sii ko gawii a itawag Iyan kiran a: "Anda so manga sakotowa Akn?" Tharoon iran a: "Phakitokawan ami rka a da a pd rkami a saksi (on)!"

48

Na doratn siran o piyanongganoy ran gowani, go matangkd iran a da a kaphagapasan iran.

49

Di protosn so manosiya ko kapangni sa mapiya, na amay ka misogat on so marata, na karpoan, a kaadaan sa panginam.

50

Na ibt o pakataama Mi skaniyan sa limo a phoon Rkami, ko oriyan o morala a minisogat on, na mataan a ptharoon iyan dn a: "Giyai na rk akn, go di ko tatarimaan so bangkit oba makatindg; na ibt o pakandoda ko ko Kadnan ko, na mataan! a mapmbagian ko sii ko hadapan Iyan so lbi a mapiya". Na mataan! a panotholn Ami dn ko siran a miyamangongkir so pinggolawla iran, go mataan a phakitaaman Ami kiran dn so siksa a masopiit.

51

Na igira a inipangalimo Ami, so manosiya, na tomalikhod, go itangkiri iyan a kilid iyan; na igira a minisogat on so marata, na makandowaa sa malayat!

52

Tharoang ka a: "Ay gda iyo amay ka skaniyan (a Qor'an) na phoon ko hadapan o Allah, oriyan iyan na inongkir iyo skaniyan? Ba adn a makalawan a ribat ko taw a skaniyan na matatago ko kasosorang a mawatan (ko bnar)?"

53

Phakiilay Ami kiran dn so manga tanda Ami ko mbalabala, go sii ko manga ginawa iran, taman sa mapayag kiran a mataan! a skaniyan so (Qor'an a) bnar. Ba da makatarotop so Kadnan ka a mataan! a Skaniyan i saksi ko langowan taman?

54

Ba di mataan! a siran na matatago ko kazasangka ko kimbaratmowaan ko Kadnan iran, ba di mataan! a Skaniyan i Matao ko langowan taman?

Total Number of Verses: 53

1

Ha. Mim. (So Allah i Matao ko paka-aantapan Iyan on.)

2

Ain. Sin. Qaf. (So Allah i Matao ko paka-aantapan Iyan on.)

3

Lagid man oto a kaphagilahami rka (ya Mohammad) go so siran a miyaonaan ka, so Allah, a Mabagr, a Mawngangn.

4

Rk Iyan so zisii ko manga langit ago so zisii ko lopa: Go Skaniyan so Maporo, a Lbi-a-mala.

5

Mayto bo na so manga langit na phangabbngkag ko kaporoan iran: Na so manga malaikat na ipthasbik iran so podi ko Kadnan iran, go ipphangni ran sa maap so taw a matatago ko lopa: Ba di mataan! a so Allah na Skaniyan so Manapi, a Makalimoon?

6

Na so miyamangowa sa salakaw Rkaniyan a manga panarigan, - na so Allah i Tomotonggo kiran; go kna a ba ska i sasarigi kiran.

7

Na lagid aya man a kiniilahamn Ami rka ko Qor'an a basa Arab: ka an ka mapakaiktiyar so (taw sa Makkah a) Amoran o manga ingd ago so makaliliyot on, - go an ka kapakiiktiyari so alongan a kaplimod, a da a sangka a madadalm on: So sabaad na khatago ko sorga, na so sabaad na khatago ko kadg.

8

Na o kabaya o Allah, na mataan a khabaloy Niyan siran ko okit a isa; na ogaid na phakasoldn Iyan so taw a kabaya Iyan ko limo Iyan; na so manga darowaka na da a bagian iran a panarigan go da a tabanga (iran).

9

Ino siran khowa sa salakaw ko Allah a manga panarigan? A so Allah, - na Skaniyan i Panarigan, go Skaniyan i magoyag ko miyamatay: Go Skaniyan i Gaos ko langowan taman.

10

Na so da kano ron pagayonayon a shay', na so kokoman iyan na sii ko Allah: Giyoto man so Allah a Kadnan ko: Skanyan i siyarigan ko, go Ron ako pagndod.

11

Mimbaas ko manga langit ago so lopa: Singgayan kano Niyan a phoon ko manga ginawa niyo sa manga karoma, go phoon ko manga ayam sa nggaganapa: Pmbarmbadn kano Niyan sa sabap roo: da dn a lagid Iyan a isa bo, go Skaniyan so Pphakan'g, a Pphakaylay.

12

Rk Iyan so manga gonsi o manga langit ago so lopa: Pphakawladn Iyan so riskhi ko taw a kabaya Iyan: Go pphakasimpitn Iyan. Mataan! a Skaniyan i Matao ko langowan taman.

13

Piyayag Iyan rkano a okit so inisogo Iyan oto ko Noh, go so iniilaham Ami rka (ya Mohammad), go so inisogo Ami oto ko Ibrahim, go so Mosa, go so Eysa a: Pamayandgn iyo so agama, ago di niyo to pmblablagi: Minindarasag o manga pananakoto so ipndolon ka kiran oto. So Allah na pnggawiin Iyan on so taw a kabaya Iyan, go pnggonanaon Iyan on so taw a pphananangoran (ko onot Rkaniyan).

14

Na da siran mblablag inonta ko oriyan o kiyapakawma kiran o katao, - kadngki ran. Na o da so katharo a miyaona a phoon ko Kadnan ka, a taman ko taalik a miyapnto, na miyakokom siran dn: Na mataan! a so siran a piyakapangowaris ko kitab a miyaoriyan iran, na matatago dn ko kazasangka phoon rkaniyan sa mapayag a kazangka.

15

Na makapantag roo, na panolong ka, go ontolang ka so inisogo rka, go ding ka phangonoti so manga n'nga iran; go tharoang ka a: "Piyaratiyaya ko so initoron o Allah a kitab; go inisogo rakn a paginontolanang ko skano. So Allah i Kadnan ami go Kadnan iyo: Rk ami so manga galbk ami, na rk iyo so manga galbk iyo. Da a rido ko lt ami go lt iyo. So Allah na thimo on tano Niyan, go Ron so khabolosan."

16

Na so siran a gii siran makiphapawala makapantag ko Allah ko oriyan o kiyatarimaa rkaniyan, - na so daowa iran na ilang sii ko Kadnan iran: Go miyakaphawto siran sa rarangit, go adn a bagian iran a siksa a sangat (ko akhirat).

17

So Allah so tomiyoron ko kitab (kaan mapayag) so bnar go so timbangan. Na antai kaphakitokawan iyan rka sa masikn so bangkit na marani?

18

Pphagalokalokan aya o siran a di ron mapaparatiyaya: Na so miyamaratiyaya na ikaalk iran oto, ka katawan iran a mataan oto! a bnar. Ba di mataan a siran a pphamawal ko bangkit na matatago dn ko kadadag a mawatan?

19

So Allah i Masalinggagaw ko manga oripn Iyan: Pphakalaan Iyan ko riskhi so taw a kabaya Iyan: Go Skaniyan so Mabagr, a Domadaag.

20

Sa taw a kabaya iyan so balas ko akhirat, na pagomanan Ami ron so balas rkaniyan; na sa taw a kabaya iyan so balas ko doniya, na mbgan Ami ron, na da a bagian iyan ko akhirat a kipantag.

21

Ba adn a manga sandogowa iran, a mimbaal kiran ko okit a so di sogoan skaniyan o Allah? Na o da so katharo a kokoman (a miyaona), na miyakokom siran dn. Na mataan! a so manga darowaka na adn a bagian iran a siksa a malipds.

22

Khaylaing ka so manga darowaka a ikaalk iran so pinggalbk iran, a giyoto na phakatana kiran. Na so miyamaratiyaya, go pinggalbk iran so manga pipiya na sii ko manga pipiya a darpa ko manga sorga: Khakowa iran so nganin a kabaya iran sii ko Kadnan iyan. Giyoto man na skaniyan so kakayaan a mala.

23

Giyoto man so pphanotholn o Allah ko manga oripn Iyan, a so miyamaratiyaya, go pinggalbk iran so manga pipiya. Tharoang ka a: "Da a phangnin ko rkano sa makapantag saya a sokay inonta so kanggiginawai sii ko manga tonganay". Na sa taw nggalbk sa mapiya, na omanan Ami ron roo sa mapiya: Mataan! a so Allah na Manapi, a Masalamatn.

24

Ino iran gii tharoa a: "Inangkob iyan so Allah sa kabokhag?" Na o kabaya o Allah, na khatkhs Iyan so posoo ka. Thiphadn o Allah so ribat, na pakaphangotaraan Iyan so bnar sabap ko manga katharo Iyan. Mataan! a Skaniyan i Matao ko zisii ko manga rarb (a manga pamikiran).

25

Go Skaniyan so ptharima ko tawbat a phoon ko manga oripn Iyan, go phmaap ko manga rarata: Go katawan Iyan so gii niyo nggolawlaan;

26

Go ptharima ko siran a miyamaratiyaya, go pinggalbk iran so manga pipiya, go phagomanan Iyan siran ko kakayaan Iyan: Na so miyamangongkir na adn a bagian iran a siksa a sangat.

27

Na o pakawlada o Allah so riskhi ko manga oripn Iyan, na mangalandada siran dn ko lopa; na ogaid na ipthoron Iyan sii ko diyangka a kabaya Iyan. Mataan! a Skaniyan i Kaip ko manga oripn Iyan, a Pphakaylay.

28

Go Skaniyan so pphaka toronn Iyan so oran ko oriyan o kiyadai kiran sa panginam, go pmbmbar ko limo Iyan. Na Skaniyan so Panarigan, a Pphodin.

29

Pd ko manga tanda Iyan so kiyaadna ko manga langit ago so lopa, go so iniparak Iyan sa dowa oto a manga baraniyawa: Na Skaniyan sii ko kalimoda kiran amay ka kabaya Iyan na Gaos Iyan.

30

Na sadn sa misogat rkano a tiyoba, na sabap ko pinggalbk o manga lima niyo (a dosa), na Phmaap sa madakl.

31

Na di kano dn makapalagoy ko lopa; go da a bagian iyo a salakaw ko Allah, a Panarigan, go da a mamakatabang (rkano).

32

Go pd ko manga tanda Iyan so pphamangtas ko kalodan, a ndalagid o manga palaw (a manga kapal).

33

O kabaya Iyan, na maphakalngn Iyan so ndo: Na khabaloy siran a khitatangn ko liyawaw o kalodan. Mataan! a adn a matatago roo man a titho a manga tanda ko oman i mapantang, a masalamatn.

34

O di na khikagm Iyan siran sabap ko pinggalbk iran (a dosa); na phmaap sa madakl.

35

Na katokawan o siran a pphamawal ko manga ayat Ami, a da a kaphagapasan iran.

36

Na sadn sa pkhibgay rkano a shay' na matag sagad a karimbaran ko kawyagoyag ko doniya: Na so zisii ko Allah (a balas) i tomo ago kakal a bagian o siran a miyamaratiyaya, go so bo so Kadnan iran i sasarigan iran;

37

Go siran na panananggilaan iran so manga ala a dosa, go so manga pakasisingay, go igira a kiyararangitan siran na siran na phnapi siran;

38

Go siran na tiyarima iran so Kadnan iran, go inipamayandg iran so sambayang; go so pnggolawlaan iran na pphamagodasaan iran; go so sabaad ko inibgay Ami kiran na ipphammgay ran;

39

Go siran na igira a miyasogat siran o kaaniyaya, na siran na phagato siran.

40

Na aya balas o marata na marata a lagid iyan: Na sa taw a mmaap go makiphasada (ko ridoay niyan), na so balas rkaniyan na miyatangkd ko Allah: Mataan! a Skaniyan na di Niyan khabayaan so manga salimbot.

41

Na mataan a sa taw a miyato ko oriyan o kiyaaniyaya niyan, na siran man na da kiran i lalan (ko siksa).

42

Ayabo a adn a lalan on (o siksa) na sii ko siran a phaganiyayaan iran so manga manosiya, go pphangalandada siran ko lopa sa di ontol: Siran man na adn a bagian iran a siksa a malipds.

43

Na mataan a sa taw a phantang go nomapi, na mataan! a giyoto man na pd dn ko mapiya ko manga olawla.

44

Na sa taw a dadagn o Allah, na da a bagian iyan a panarigan ko oriyan iyan. Na maylaing ka so manga darowaka, ko kasandngi ran ko siksa, a matharo iran a: "Ba adn a okit a kapakakasoy (ko doniya)?"

45

Na khaylaing ka siran a phaganagn siran ko apoy, a makasasangkop siran, phoon ko kahinaan, makapphangilaylay siran sa kaylay a masoln. Na tharoon o siran a miyamaratiyaya a: "Mataan! a aya manga logi, na so liyogi ran so manga ginawa iran, ago so taalok kiran ko alongan a qiyamah. Tanodan ka mataan! a so manga darowaka na khatago ko siksa a tatap!"

46

Go da a mabaloy a bagian iran a manga panarigan a mamakatabang kiran, a salakaw ko Allah. Na sa taw a dadagn o Allah, na da a mambagian iyan a lalan (a ontol).

47

Tarimaa niyo so Kadnan iyo, ko dapn kapakatalingoma o alongan a da a phakarn on ko Allah! Da a bagian iyo a khalindongan sa alongan oto, go da a bagian iyo a kapaka ongkir!

48

Na o talikhod siran, na da Ami ska sogoa a somisiyap kiran. Da a paliyogat rka a rowar ko kapamakasampay. Na mataan! a Skami na igira a piyakataam Ami so manosiya sa phoon Rkami a limo, na izonor iyan oto; na o masogat siran a marata, sabap ko miniona o manga lima iran (a dosa), na mataan! a so manosiya na da a tadm iyan!

49

Rk o Allah so kapaar ko manga langit ago so lopa. Phagadnn Iyan so nganin a kabaya Iyan. Pmbgan Iyan so taw a kabaya Iyan sa (manga wata a) manga babay, go pmbgan Iyan so taw a kabaya Iyan sa (manga wata a) manga mama,

50

Odi na pakazangisangiin Iyan siran a: Manga mama ago manga babay, go pmbalowin Iyan so taw a kabaya Iyan a balk: Mataan! a Skaniyan i Matao, a Gaos.

51

Na da mapatot ko manosiya o ba mbitiyarain skaniyan o Allah inonta o ilaham, odi na sii ko sabala a rnding, odi na somogo sa sogo, na iphagilaham Iyan sa sabap sa idin Iyan, so kabaya Iyan: Mataan! a Skaniyan i Maporo, a Mawngangn.

52

Na lagid aya man a kiniilahamn Ami rka (ya Mohammad) ko Qor'an phoon ko sogoan Ami: Da’ ko btad ka i bang ka katawi (gowani) o antonaa so kitab, go antonaa so paratiyaya? Na ogaid na biyaloy Ami oto a sindaw, a pthoroon Ami sa sabap rkaniyan so taw a kabaya Ami ko manga oripn Ami; na mataan! a ska (ya Mohammad) i titho a makapnggonanao ko okit a makaoontol,

53

A okit o Allah, a so Khirk ko nganin a zisii ko manga langit ago so nganin a zisii ko lopa. Tanodan, ka sii bo ko Allah phakandod so langowan taman a pkhakawlawla!

Total Number of Verses: 89

1

Ha, Mim. (So Allah i Matao ko paka-aantapan Iyan on.)

2

Ibt ko kitab a miyakapayag,

3

Mataan! a Skami na biyaloy Ami skaniyan a Qor'an a basa Arab, ka an iyo sabota.

4

Na mataan! a skaniyan na madadalm ko asal o kitab (a so Lawh Makhpod), sii ko hadapan Ami, a titho a Maporo, a sindadan o ongangn.

5

Ba Ami rkano phokasa so pananadm sa kadapay, ka kagiya skano na pagtaw a manga malawani?

6

Na madakl a siyogo Ami a nabi ko miyangaoona!

7

Na da a pphakatalingoma kiran a nabi a ba iran oto di pphamagrgi.

8

Na bininasa Mi so lawan kiran sa bagr; - go miyaypos so ibarat o miyangaoona.

9

Na ibt o izaan ka kiran, o antawaa i miyadn ko manga langit ago so lopa? Na mataan a ptharoon iran a: Inadn siran o (Allah a) Mabagr, a Matao; -

10

So inisnggay Niyan rkano so lopa a darpa, go singgayan kano Niyan on sa manga lalan, ka ang kano makaontol;

11

Go Skaniyan so piyakatoron Iyan phoon ko kawang so ig sa didiyangkaan; - na inoyag Ami sa sabap rkaniyan so ingd a maatay; na lagid man oto a kaphakagmawa rkano (ko manga kobor);

12

Go Skaniyan so miyadn ko nggaganapa, a kalangolangowan iyan, go sominggay rkano ko manga kapal ago so manga ayam a so kapphagdaan iyo,

13

Ka ang kano gii makathakna ko manga likod iyan, oriyan iyan na an iyo katadmi so limo o Kadnan iyo, igira a miyakathakna kano ron, go an iyo matharo: "Soti so piyakaphasiyonot Iyan rkami aya, a kna a ba skami i phamakagaga on,

14

"Go mataan! a skami na sii bo ko Kadnan ami, i titho a khandodan ami!"

15

Na singgayan iran sa bagian Iyan ko manga oripn Iyan sa sabaad. Mataan! a so manosiya na titho a miyongkir, a mapayag!

16

Ati kominowa ko phagadnn Iyan sa manga wata a babay, na piyakibisa Niyan rkano so manga wata a mama?

17

Na igira a miyapanothol ko isa kiran so biyaloy niyan a rk o (Allah a) Masalinggagaw a ibarat, na mabaloy so paras iyan a mangirngkirm, a skaniyan na mappno a rata a ginawa!

18

Ino (iran mbaloya a rk o Allah) so phagoyagn makapantag ko kaphaparahiyasan, a skaniyan makapantag ko kapakiphawala na di phakaosay?

19

Go biyaloy iran so manga malaikat a so siran na manga oripn o (Allah a) Masalinggagaw a manga babay. Ba iran kiyazaksian so kiyaadna kiran? Khisorat dn so kiyazaksi iran (sa kabokhag), go khiiza kiran!

20

Na pitharo iran a: "O kabaya o Masalinggagaw, na di ami siran masimba". Da a bagian iran roo a katao! Da ko siran inonta pphangsarn iran!

21

Ba Ami siran bigan sa kitab ko onaan aya, na siran na aya iran oto kkpitan?

22

Kna, ka pitharo iran: "Mataan! a skami na miyatoon ami so manga loks ami sangkai a okit, na mataan! a skami na so manga rarad iran i pkhdgn ami."

23

Na lagid man oto a da a siyogo Ami a miyaonaan ka ko ingd a pphamakaiktiyar, a ba da tharoa o manga gayagomaya on a: "Mataan! a skami na miyatoon ami so manga loks ami sangkai a okit, na mataan! a skami na so manga rarad iran i pkhdgn ami."

24

Pitharo iyan: "Ati apiya pn minioma ko rkano so lbi a toroan a di so miyatoon iyo ron so manga loks iyo?" Pitharo iran a: "Mataan! a skami na so inisogo rkano to na inongkir ami."

25

Na siniksa Ami siran: Na pamimikiranang ka o antonaa i miyambtad o kiya akiran ko miyamanaplis!

26

Na gowani na pitharo o Ibrahim ko ama iyan go so pagtaw niyan a: "Mataan! a sakn na angiyas ako ko pzimbaan iyo:"

27

"Inonta so (Allah a) miyadn rakn, ka mataan! a Skaniyan na thoroon ako Niyan."

28

Na biyaloy niyan aya a katharo a posaka ko pkhababadan on, ka an siran makambalingan (ko paratiyaya).

29

Kna, ka piyakaplagod Akn so siran aya, go so manga loks iran, taman sa miyakaoma kiran so bnar, go so sogo a miyakawsay.

30

A kagiya a makatalingoma kiran so bnar, na pitharo iran a: "Giyaya na balik mata, go mataan! a skami na inongkir ami aya."

31

Go pitharo iran a: "Ino da toronn angkai a Qor'an ko mama a phoon ko dowa a ingd, a sslaan?"

32

Ba siran i dii mbagibagi ko limo o Kadnan ka? Skami i mimbagibagi kiran ko kawiyagan iran ko kawyagoyag ko doniya: Na iniporo Ami so sabaad kiran ko kaporoan o sabaad sa manga daradat, ka an makowa o sabaad kiran so sabaad a talasogoay. Na so limo o Kadnan ka i tomo a di so pphanimo on iran.

33

O di so oba mabaloy so manga manosiya ko okit a isa, na mataan a isnggay Ami a rk o taw a moongkir ko (Allah a) Masalinggagaw, a rk o manga walay ran so manga atp a pirak, go manga towak a pkhipanik iran on,

34

Go rk o manga walay ran so manga pinto, go manga kantir (a pirak) a gii siran on makazandasandang,

35

Go manga kabolawanan. Na da ko kalangolangowan oto inonta na matag sagad a kapipiya ginawa ko kawyagoyag ko doniya: Na so akhirat, sii ko Kadnan ka, i bagian o khipanananggila.

36

Na sa taw a tomalikhod ko tadm ko (Allah a) Masalinggagaw, na snggayan Ami skaniyan sa shaytan, na giyoto i sarikita iyan.

37

Na mataan! a siran na phagalangan iran siran dn ko lalan (a ontol), go aya tangkap iran on na mataan! a siran na makaoontol siran!

38

Taman sa amay ka makawma Rkami, na tharoon iyan a: "Hay dinganomambo o milt rakn ago ska so kawatan o dowa masarik!" Na sayana a miyakaratarata a sarikita!

39

Na di rkano dn makanggay a gona sa alongan nai a masa a (kiyapayag o) kiyandarowaka iyo, mataan! a skano na mrakhrakhs kano ko siksa!

40

Ino ska maphakan'g ka so bngl odi na khatoroo ka so bota, go so taw a aya btad iyan na matatago ko karibat a mapayag?

41

Na apiya tangann Ami ska dn, na mataan! a Skami na ndan'gn Ami siran nganin,

42

Odi na pakimasaan Ami rka so inidiyandi Ami kiran: Na mataan! a Skami na khagaga Mi siran.

43

Na kpiting ka so iniilaham rka: Mataan! a ska na zisii ko okit a makaoontol.

44

Na mataan! a (giya Qor'an aya na) titho a mnang a rk ka, go rk o pagtawng ka; na ipagiza rkano bo.

45

Na izaan ka so siyogo Ami ko miyaonaan ka a manga sogo Ami; oba adn a inisnggay Ami a salakaw ko (Allah a) Masalinggagaw, a manga tohan a pphamanimbaan?

46

Na sabnsabnar a siyogo Ami so Mosa rakhs o manga tanda Ami, sii ko Pir'awn go so pagtaw niyan: Na pitharo iyan a: "Mataan! a sakn na sogo o Kadnan o manga kaadn."

47

Na kagiya a mitalingoma niyan kiran so manga tanda Ami, na samawto na siran na ba iran dn oto gii khakalaan.

48

Na da a pphakimasaan Ami kiran a tanda a ba di skaniyan i mala a di so pd iyan (a miyaona); na inidan'g Ami kiran so siksa, ka an siran makambalingan (ko ontol).

49

Na pitharo iran: "Hay mala i katao! Pangning kaming ka ko Kadnan ka sabap ko inidiyandi Iyan rka; mataan! a skami na miyaratiyaya kami dn."

50

Na kagiya a pokasn Ami kiran so siksa, na samawto na siran na gii siran mbarngkas.

51

Na piyakalangkap o Pir'awn ko pagtaw niyan, a pitharo iyan a: "Hay pagtaw akn, ba akn di rk so kadato sa Misir, go giya ungkai a manga lawasayg a pphamangondas ko kababaang ko? Ba kano di phakaylay?"

52

"Kna, ka sakn i tomo a di giya ungkai a (mama a) so skaniyan na pkhalaklak, go margn a kapphakaosay niyan!"

53

"Na ino da alopa skaniyan a manga salnda a bolawan, odi na da a miyakatalingoma a pd iyan a manga malaikat a khigagabay ron?"

54

Na miyalalong iyan so pagtaw niyan, na kiya onotan iran skaniyan: Mataan! a siran na mimbaloy siran a pagtaw a manga songklid.

55

Na kagiya a tiyopowan Kami ran, na diyan'g Ami siran na inld Ami siran langon.

56

Na biyaloy Ami siran a miyangaoona a poringana, go ibarat ko miyangaoori.

57

Na kagiya a balowin so wata o Maryam a ibarat, na samawto na so pagtawng ka na phoon roo na pkhisagorong siran a kakayad!.

58

Go pitharo iran: "Ino so manga katohanan ami aya tomo, antawaa Skaniyan (i tomo)?" da a kiyapayaga iran rka on, a rowar sa kapamawal: Kna, ka siran na pagtaw a manga pawal.

59

Da ko skaniyan (a Eysa) inonta na oripn a inipangalimo Ami skaniyan, go biyaloy Ami, skaniyan a ladiyawan ko manga moriyataw o Israil

60

Na o kabaya Ami, na mataan a phakaadn Kami sa sambi iyo a manga malaikat ko lopa, a mamakasambi siran.

61

Na mataan! a so Eysa na titho a nanao ko bangkit: Na di kano ron pkhadowadowai, go onoti Ako niyo: Giyaya i okit a makaoontol.

62

Na di kano phakialang ko shaytan: Mataan! a skaniyan na ridoay niyo a mapayag.

63

Na kagiya a makatalingoma so Eysa a rakhs o manga rarayag a karina, na pitharo iyan: "Sabnar a minitalingoma ko rkano so ongangn, go kagiya a pagosayn ko rkano so sabaad ko nganin a di kano ron phagayonayon: Na kalkn iyo so Allah, go onoti ako niyo."

64

"Mataan! a so Allah na Skaniyan i Kadnan ko go Kadnan iyo: Na zoasoata niyo Skaniyan: Giyaya i okit a makaoontol."

65

Na mizoransorang so pizagorompong ko ndolondolonan iran: Na sangat a siksa a bagian o siran a mindadarowaka, a pd ko siksa ko gawii a malipds!

66

Ba adn a pnayawn iran a rowar ko bangkit, sa kapakatalingoma niyan kiran a mitalmba, a siran na di siran makaiin'ngka?

67

So mbobolayoka sa alongan oto na so sabaad kiran na ridoay o sabaad, - inonta so miyamananggila.

68

Hay manga oripn Ko, da a pangandam iyo sa alongan nai, go da rkano i ba kano makamboko,

69

So miyamaratiyaya ko manga ayat Ami, go mimbabayorantang,

70

(Na ptharoon kiran:) Sold kano ko sorga, skano ago so manga karoma niyo, a kokormatn kano.

71

Ipphagilid kiran so manga talam a bolawan, go manga baso: Go matatago on so pkhababayaan skaniyan o manga ginawa, go ikhasoat o manga mata: Na skano na makakakal kano ron dn.

72

Na giyoto man so sorga a so piyakipangowarisan rkano to sabap ko pinggolawla niyo (a mapiya).

73

Adn a rk iyo roo a manga onga a madakl, a so sabaad on na pkhakan iyo.

74

Mataan! a so manga baradosa na sii ko siksa ko naraka Jahannam, manga kakal:

75

Di kiran khababasan, go siran na kaadaan siran roo sa panginam.

76

Na da Ami siran salimboti: Na ogaid na miyabaloy siran a siran i manga salimbot.

77

Na mizadaw iran: "Hay Malik! tinggasa kami o Kadnan ka". Tharoon iyan: "Mataan! a skano na makakakal kano (ron)!"

78

Sabnsabnar a minitalingoma Mi rkano so bnar: Na ogaid na so kadaklan rkano na so bnar na ikagogowad iran.

79

Ba adn a kiyambaibaitan iran a zowaan? Na mataan! a Skami i mimbaibait.

80

Ba iran tatarimaa sa mataan! a Skami na di ami khan'g so pag-umaan iran go so khokonsikonsi an iran? Oway (pkhan'g Ami), go so manga sogo Ami a (manga malaikat a) makamamasa kiran, na ipphanorat iran.

81

Tharoang ka (ya Mohammad) a: "O adn a wata o (Allah a) Masalinggagaw, na sakn i mawna ko pphanonoatan On."

82

Soti so Kadnan o manga langit ago so lopa, a Kadnan o aras, a mawatan ko iphropa iran!

83

Na ganating ka siran ko kapphamrak iran, go so kabibimban iran, taman sa mithomlanga iran so alongan iran, a so ididiyandi kiran.

84

Na Skaniyan so sii sa langit na Tohan, go sii sa lopa na Tohan; na Skaniyan so Mawngangn, a Matao.

85

Na Soti so (Allah a) Khirk ko kapaar ko manga langit ago so lopa, go so nganin a pagltan a dowa nan: Go sii Rkaniyan so katawi ko bangkit: Go Ron kano phakandoda.

86

Na da a kapaar o siran a pphanongganowin iran a salakaw Rkaniyan, - ko kapanapaat inonta so mizaksi ko bnar, a siran na katawan iran.

87

Na ibt o izaan ka kiran o antawaa i miyadn kiran, na mataan a ptharoon iran dn a: So Allah: Na andamanaya i katatalikhod iran?

88

Na pitharo o Nabi: "Hay Kadnan ko, mataan! a siran aya na pagtaw a di siran mapaparatiyaya!"

89

(Pitharo o Allah:) "Na napiing ka siran (ya Mohammad), go tharo ka sa kalilintad! ka katokawan iran bo!"

Total Number of Verses: 59

1

Ha. Mim. (So Allah i Matao ko paka-aantapan Iyan on)

2

Ibt ko kitab a miyakapayag (ko ontol ago so ribat);

3

Mataan! a Skami na initoron Ami skaniyan (a Qor'an) ko gagawii a piyakandaklan sa mapiya: Mataan! a Skami na miyabaloy Kami a pphamakaiktiyar.

4

Ron gii pakazsnggayaa so langowan o sogoan a miyapasad a kokoman,

5

Sogoan a phoon ko hadapan Ami. Mataan! a Skami na miyabaloy Kami a pphanonogo,

6

Limo a phoon ko Kadnan ka: Mataan aya! a Skaniyan so Pphakan'g, a Matao;

7

A Kadnan o manga langit ago so lopa, go so nganin a pagltan a dowa nan, o skano na thotomangkd kano.

8

Daa tohan a inonta Skaniyan a Pphangoyag go Pphangimatay, - Kadnan iyo go Kadnan o manga loks iyo a miyangaoona.

9

Kna, ka siran na matatago ko kazasangka a sasablawn iran,

10

Na nayawang ka so gawii a kitalingomaan o langit ko bl a mapayag.

11

A mikolob ko manga manosiya: (na matharo iran a:) giyai na siksa a malipds.

12

(Go matharo iran:) "Kadnan ami, pokasang Ka rkami so siksa, ka mataan! a skami na miyaratiyaya kami!"

13

Andamanaya i kakhaparoliya iran ko pananadm, a sabnar a miyakaoma kiran so sogo, a miyakapayag,

14

Oriyan iyan na tiyalikhodan iran oto, go pitharo iran: "Piyangndao a pmbthangn!"

15

Mataan! a Skami na piyokas Ami so siksa sa da mathay, na mataan! a skano na mimbalingan kano (bo).

16

Sii ko isa alongan na olangn Ami so bagr a mala: Mataan! a Skami i Pndadan'g!

17

Na sabnsabnar a tiniyoba Ami ko miyaonaan iran so pagtaw o Pir'awn: Go minitalingoma kiran o (Mosa a) sogo a sslaan, (a pitharo iyan:)

18

"Palada niyo rakn so manga oripn o Allah: Mataan! a sakn na sogo rkano a kasasanaan;"

19

"Go di niyo pagombawi so Allah: Mataan! a sakn na minitalingoma ko rkano so katantowan a mapayag."

20

"Go mataan! a sakn na lominindong ako ko Kadnan ko go Kadnan iyo, ka oba ako niyo radiyama!"

21

"Na odi ako niyo pharatiyayaa na awata ko niyo."

22

Na miyangangarapan ko Kadnan iyan: "Mataan! a siran aya na pagtaw a manga baradosa."

23

Na (pitharo o Allah a:) "Panglmn ka so manga oripn ko ko kagagawii: Mataan! a skano na thondogn kano (iran);"

24

"Go ganating ka so kalodan a massray: Mataan! a siran na tantara a phangldn."

25

Madakl a kiyaganatan iran a manga pamomolan ago manga bowalan,

26

Go manga pr go darpa a mapiya,

27

Go limo a miyabaloy siran on a khikasosonor!

28

Giyoto man (i inikidia Mi kiran)! Go piyakipangowarisan Ami oto ko pagtaw a miyangaoori (a pagtaw o Mosa)!

29

Na da siran kasgadi o langit ago so lopa: Go da siran bgi sa taalik.

30

Na sabnsabnar a siyabt Ami so manga moriyataw o Israil phoon ko siksa a phakahina,

31

A phoon ko Pir'awn; mataan! a skaniyan na miyabaloy a miphaporo a pd ko manga malawani.

32

Na sabnsabnar a pinili Ami siran sii ko katao ko manga kaadn (ko masa iran),

33

Go bigan Ami siran ko manga tanda a so katatagoan sa tpng, a mapayag.

34

Mataan! a siran aya na gi iran tharoon:

35

"Daa salakaw a rowar ko kapatay tano a paganay, go kna a ba tano phangaooyag ko oriyan o kapatay."

36

"Na pakambowata niyo so manga loks ami, o skano i manga bnar!"

37

Ba siran i tomo, antawaa so pagtaw o Tobba', go so miyaonaan iran? Bininasa Mi siran, mataan! a siran na miyabaloy siran a manga sala.

38

Da ko kiyaadna Mi ko manga langit ago so lopa, go so nganin a pagltan a dowa nan, oba Kami khikabibimban:

39

Da ko kiyaadna Mi sa dowa nan inonta na sii ko bnar: Na ogaid na so kadaklan kiran na di iran katawan.

40

Mataan! a so alongan a kokoman na diyandi kiran langon,

41

Alongan a da a khilinding o tonganay ko tonganay niyan a mayto bo, go di siran phangatatabangan,

42

Inonta so inikalimo o Allah: Mataan! a Skaniyan na Skaniyan so Mabagr, a Makalimoon.

43

Mataan! a so kayo a Zaqqom,

44

Na pangn'ngkn o baradosa,

45

Lagid o totonagn a galang, a pndidi ko manga tiyan,

46

Lagid o kapndidi o phlikabo a ig.

47

(Tharoon:) "Kowaa niyo skaniyan na goyoda niyo to ko lmbak o naraka Jahim!"

48

"Oriyan iyan na ododa niyo ko poro o olo niyan so siksa a phlikabo."

49

(Tharoon on:) "Taaming ka! mataan! a ska na ska so mabagr, a pagaadatan (sa doniya)!"

50

"Mataan! a giyaya so skano na zasangka kano ron!"

51

Mataan! a so khipanananggila na sii ko darpa a sasarigan,

52

Sii ko manga pamomolan go manga bowalan;

53

Ndiditar siran sa sotra a manipis go sotra a makapal, a khipaga adapadapa;

54

Giyoto dn man, go pakaphamangaromaan Ami siran sa manga tataid, a manga pipiya i kapmata.

55

Pphananawag siran roo sa pithibarang a onga, a khisasarig siran;

56

Daa khasagadan iran roo a kapatay, inonta so kapatay a paganay (sa doniya); go phakalidasn Iyan siran ko siksa ko naraka Jahim,

57

Kakayaan a phoon ko Kadnan ka. Giyoto man na skaniyan so daag, a mala!

58

Na aya dn a kiyalbod Ami ron, sii ko basang ka, na an iran sabota (a Qor'an aya).

59

Na nayaw ka; mataan! a siran na nomanayaw siran (mambo).

Total Number of Verses: 37

1

Ha, Mim. (So Allah i Matao ko paka-aantapan Iyan on.)

2

Initoron so kitab a phoon ko Allah a Mabagr, a Mawngangn.

3

Mataan! a zisii ko manga langit ago so lopa, so titho a manga tanda ko miyamaratiyaya;

4

Go zisii ko kiyaadna rkano, go so ipphayapat Iyan a manga baraniyawa, so manga tanda ko pagtaw a khitotomangkd;

5

Go (zisii ko) gii kapakazambi o gagawii ago so dawndaw, go so kiyapakatorona o Allah phoon ko kawang ko (oran a) pagpr, na inoyag Iyan sa sabap rkaniyan so lopa ko oriyan o kiyapatay niyan, go so kapkhaalin o manga ndo, - sa manga tanda a rk o pagtaw a pnggdagdaan iran.

6

Giyoto man so manga ayat o Allah, a pmbatiyaan Ami rka oto sii ko bnar: Na antonaa i tothol ko oriyan o (katharo o) Allah go so manga ayat Iyan i pharatiyayaan iran?

7

Sangat a siksa a bagian o oman i bokhag, a baradosa:

8

Pphamakin'gn iyan so manga ayat o Allah a pmbatiyaan on, oriyan iyan na idadayon iyan dn so dosa, a mananakabor, ka maniyan oto a da man'g: Na pphanotholang ka on so siksa, a malipds!

9

Na igira a adn a miyasowa iyan ko manga ayat Ami a mayto bo, na balowin iyan oto a kasandagan: Siran man na adn a bagian iran a siksa a phakahina.

10

Sii ko kasasangoran iran so naraka Jahannam: Go da a milinding kiran o miyasokat iran a mayto bo, go da a (milinding kiran o) nganin a kinowa iran a salakaw ko Allah a manga panarigan: Go adn a bagian iran a siksa a mala.

11

Giyaya na toroan: Na so miyamangongkir ko manga ayat o Kadnan iran, na adn a bagian iran a siksa a pd ko sangat a siksa a malipds.

12

So Allah so piyakaphasiyonot Iyan rkano so kalodan, ka an pphamakaktas so manga kapal ko liyawaw niyan sabap sa sogoan Iyan, go ang kano gii makambabanog ko kakawasaan Iyan, go ang kano makapanalamat.

13

Go piyakaphasiyonot Iyan rkano so nganin a zisii ko manga langit ago so nganin a zisii ko lopa: Sa kalangolangowan iyan a phoon Rkaniyan; mataan! a matatago roo man so titho a manga tanda a rk o pagtaw a pphamimikirann iran.

14

Tharoang ka ko siran a miyamaratiyaya: Napi iran so siran a di iran ikhalk so manga gawii o Allah: Ka imbadal Iyan ko pagtaw so pinggalbk iran.

15

Sa taw a nggalbk sa mapiya, na rk o ginawa niyan; na sa taw a nggalbk sa marata, na phakatana on. Oriyan iyan na sii kano bo ko Kadnan iyo phamakandoda.

16

Na sabnsabnar a inibgay Ami ko manga moriyataw o Israil so kitab, go so ongangn, go so kananabii; go inipagpr Ami kiran so manga pipiya; go inilbi Ami siran ko manga kaadn (ko masa iran).

17

Go bigan Ami siran sa manga rarayag a karina a pd ko sogoan: Na da siran zoransorang inonta ko oriyan o kiyapakawma kiran o katao, ka dngki ran; mataan! a so Kadnan ka na khokomn Iyan siran ko alongan a qiyamah sii ko miyabaloy siran on a zosoransorang.

18

Oriyan iyan na piyakathakna Ami ska ko okit a pd ko sogoan: Na Kdgang ka oto, na ding ka pagonoti so manga n'nga o siran a di manga tatao.

19

Mataan! a siran na da dn a milinding iran rka ko Allah a mayto bo: Na mataan! a so manga darowaka na so sabaad kiran i manga panarigan o sabaad: Na so Allah i Panarigan o khipanananggila.

20

Giya Qor'an aya na manga osayan a rk o manga manosiya, go toroan go limo ko pagtaw a khitotomangkd.

21

Ba tatarimaa o siran a miyamakasogok ko manga rarata sa balowin Ami siran a lagid o siran a miyamaratiyaya, - go pinggalbk iran so manga pipiya, a makaplagid so kawyagoyag iran - ago so kapatay ran? Miyakaratarata so ipkhokom iran.

22

Na inadn o Allah so manga langit ago so lopa sii ko bnar, go an mibalas ko oman i ginawa so pinggalbk iyan, a siran na di siran kasalimbotan.

23

Ay gda a ka ko taw a biyaloy niyan a katohanan iyan so n'nga iyan? Go diyadag skaniyan o Allah sii ko katao, go piyarkat Iyan so kan'g iyan go so poso iyan, go tiyagoan Iyan so kaylay niyan sa pils? Na antawaa i makanggonanao ron ko oriyan o Allah? Ino kano di phananadm?

24

Na pitharo iran: "Da a salakaw saya a rowar ko kawyagoyag tano ko doniya; pphamatay tano go pphangaooyag (so manga wata) tano, go da a pphakabinasa rktano a rowar ko masa". Na da a rk iran roo a katao: Da ko siran inonta na pphagarangan siran:

25

Na igira a pphangadian kiran so manga ayat Ami a manga rarayag, na da a miyabaloy a rason iran a rowar sa kiyatharoa iran sa: "Pakagmawa niyo so manga loks Ami, o skano i manga bnar!"

26

Tharoang ka a: "So Allah na phagoyagn kano Niyan, go phagimatayn kano Niyan; oriyan iyan na thimoon kano Niyan ko alongan a qiyamah, a da a sangka a madadalm on": Na ogaid na so kadaklan ko manga manosiya na di iran katawan.

27

Na rk o Allah so kapaar ko manga langit ago so lopa, na sii ko gawii a kapakatindg o bangkit, - na sa alongan oto na malogi so minggagalbk sa ribat!

28

Na maylaing ka so oman i isa ka tindg a malilimod a khipakatitikoro: Oman i isa ka tindg na itawag on so daptar iyan: "Sa alongan nai na imbalas rkano so pinggolawla niyo!"

29

"Giyaya so daptar Ami a ptharoang kano niyan sa bnar: Mataan! a Skami i pndaptar ko pinggolawla niyo."

30

Na so miyamaratiyaya, go pinggalbk iran so manga pipiya, na phakasoldn siran o Kadnan iran ko limo Iyan (ko sorga): Giyoto man na skaniyan so daag a mala.

31

Na so miyamangongkir (na tharoon kiran): "Ba da mabaloy so manga ayat Akn a kapphangadian rkano? Na mimaratabat kano, go mimbaloy kano a pagtaw a manga sala!"

32

Na igira a pitharo a mataan! a so diyandi o Allah na bnar, go so bangkit na da a sangka a madadalm on, na tharoon iyo: "Di ami katawan o antonaa i bangkit: da a pikir ami (ron) a rowar sa arangan, go kna a ba kami khipakatatangkd."

33

Na mapayag kiran so manga rarata ko pinggolawla iran, go katangkalan siran o piyamagrgan iran oto (a siksa)!

34

Na adn a tharo a: "Sa alongan nai na pakalilipatan Ami skano lagid o kiyalipati niyo ko kimbaratmowaan sa alongan iyo wai! Na darpa iyo so naraka, go da a bagian iyo a phamakatabang!"

35

"Giyoto man na sabap sa mataan! a skano na biyaloy niyo so manga ayat o Allah a kasandagan, go miyalimpang kano o kawyagoyag ko doniya": Na sa alongan aya na di siran roo pamakaawaan, go di siran pakapangnin sa rila.

36

Na rk o Allah so podi, a Kadnan o manga langit go Kadnan o lopa, - a Kadnan o manga kaadn!

37

Go rk Iyan so kabsaran ko manga langit ago so lopa: Go Skaniyan so Mabagr, a Mawngangn!

Part 26

Total Number of Verses: 35

1

Ha, Mim. (So Allah i Matao ko paka-aantapan Iyan on.)

2

Initoron so kitab a phoon ko Allah, - a Mabagr, a Mawngangn.

3

Da ko kiyaadn Ami ko manga langit ago so lopa, go so nganin a pagltan a dowa nan inonta na sii ko bnar, go so taalik a miyapnto; na so miyamangongkir na so piyakiiktiyaran kiran na tatalikhodan iran.

4

Tharoang ka (ya Mohammad): "Ay gda iyo ko pphanongganowin iyo a salakaw ko Allah? Pakiilayn iyo rakn o antonaa i miyaadn iran ko lopa, ba adn a minitompok iran ko manga langit? Witi ako niyo sa kitab a miyaonaan aya, odi na so malalamba ko katao, o skano i manga bnar!

5

Na ba adn a taw a makalawan a dadag ko taw a pphanongganowin iyan a salakaw ko Allah, so da a khismbag iyan on sa taman ko alongan a qiyamah, go siran na so panongganoy ran na da a mlng iran on?

6

Go amay ka limodn so manga manosiya na mabaloy siran a manga ridoay ran, go mabaloy siran ko kapzimbaa kiran a ongkirn iran!

7

Na igira a pphangadian kiran so manga ayat Ami a manga rarayag, na tharoon o siran a miyamangongkir ko bnar ko kiyapakawma niyan kiran a: "Giyaya na balik mata, a mapayag!"

8

Kna, ka gi iran tharoon a: "Pimbaas iyan aya". Tharoang ka a: "O pimbaas akn aya na da a mipaar iyo rakn ko (siksa) o Allah a mayto bo. Skaniyan i Matao ko pphamrakn iyo. Miyakatarotop Skaniyan a saksi ko lt akn ago skano; go Skaniyan so Manapi, a Makalimoon."

9

Tharoang ka (ya Mohammad) a: "Kna a ba ako mibibida ko manga sogo, go di ko katawan i ikhidia rakn ago skano. Da a pagonotang ko inonta so iphagilaham rakn, go sakn na matag phamakaikitiyar, a mapayag."

10

Tharoang ka: "Ay gda iyo amay ka aya btad iyan na phoon ko hadapan o Allah, a inongkir iyo skaniyan, go adn a mizaksi a saksi a pd ko manga moriyataw o Israil ko lagid iyan, na miyaratiyaya, na mimaratabat kano. Mataan! a so Allah na di Niyan pnggonana on so pagtaw a manga darowaka."

11

Na pitharo o siran a miyamangongkir ko siran a miyamaratiyaya: "O adn a kapiya niyan na di kami niyo ron kaonaan na gowani a da iran paratiyayaa skaniyan", na ptharoon iran a: "Giyai na kabokhag, a andang!"

12

Na sii ko onaan iyan so kitab o Mosa, a ladiyawan, go limo: Na giyaya na kitab a tomiyanto, a basa Arab, ka an iyan mapakaiktiyar so mindadarowaka, go tothol a mapiya ko miphipiyapiya.

13

Mataan! a so siran a pitharo iran a: "Aya Kadnan ami na so Allah, oriyan iyan na miyontol siran, na da a pangandam iran, go di siran makamboko (ko alongan a mawri);"

14

Siran man i khimangark ko sorga, makakakal siran on: Balas sabap ko pinggolawla iran.

15

Na piyanginsana Mi ko manosiya so (kaphiyapiya i ko) mbala a loks iyan sa samporna a kaphiyapiya: inikawgat skaniyani ina iyan sa margn, go inimbawata iyan sa margn. Na so kiya awidi niyan on, go so kiyapakagnka on somoso na tlo polo olan. Taman sa igira a minisampay ko kakhasad iyan go isampay sa pat polo ragon, na tharoon iyan: "Kadnan ko, ilahamn Ka rakn so kapakapanalamat akn ko limoo Ka, a so inipangalimoo Ka rakn, go so mbala a loks akn, go so kapakapagamal akn sa mapiya a masoat Ka on, go tanorang Ka rakn so manga moriyataw akn; mataan! a sakn na mithawbat ako Rka, go mataan! a sakn na pd ko mimbabayorantang (Rka)."

16

Siran man so tharimaan Ami kiran so mapiya ko pinggolawla iran, go pnapin Ami so manga karataan iran, a pd ko khimangark ko sorga; diyandi a bnar a so inidiyandi kiran.

17

Na so mitharo ko mbala a loks iyan a: "Marzik a rk iyo! Ino niyo rakn pphangangalkn i kakhawyag akn (zaroman) a sabnar a miyaypos so miyagapidapid a manga pagtaw ko miyaona angko?" Giya dowa oto na makapphangni siran sa tabang ko Allah (di iran matharo a): "Dowandowaan ka! Paratiyaya ka. Mataan! a so diyandi o Allah na bnar". Na tharoon Iyan a: "Da ko ungkai inonta na manga kabokhag o miyangaoona!"

18

Siran man so piyamadayan siran o katharo a (siksa) rakhs o manga pagtaw a andang a miyaypos ko miyaonaan iran a pd ko manga jinn ago so manga manosiya; mataan! a siran na miyabaloy siran a manga logi.

19

Na adn a rk o oman iisa a manga daradat phoon ko pinggalbk iran; go kagiya a ithoman Iyan kiran sa tarotop so manga galbk iran, a siran na di siran khasalimbotan.

20

Na sii ko alongan a kaphaganaga ko siran a miyamangongkir ko apoy (na tharoon kiran a:) :Inipos iyo so manga pipiya niyo ko kawyagoyag iyo sa doniya, go siyawitan iyo to; na sa alongan nai na imbadal rkano so siksa a kahinaan sabap ko kiyapanakabor iyo ko lopa sa di ontol, go sabap ko kiya panongklid iyo."

21

Na aloyang ka so (Hod a) pagari o (moriyataw) Ad; gowani na piyakaiktiyar iyan so pagtaw niyan sii ko mimbotoboto a ipamthad, na sabnar a miyaypos so miyamakaiktiyar ko onaan iyan go so oriyan iyan - (sa pitharo iyan a:) "Da a pzoasoata niyo inonta so Allah. Mataan! a sakn na ikhalk akn skano ko siksa ko alongan a lbi a mala."

22

Pitharo iran: "Ba aya kiyapaka omang ka rkami na kagiya a phakitalikhodan ka rkami so manga katohanan ami? Na pakadansalang ka rkami so ipphangangalk ka rkami o ska na pd ko manga bnar!"

23

Pitharo iyan a: "So katawi ron na sii bo ko Allah; na ipzampay akn rkano so inisogo rakn oto, na ogaid na sakn na pkhaylay akn skano a pagtaw a da a manga mlng iyo!"

24

Na kagiya a maylay ran oto a gabon a mababalawag, a papantkn iyan so manga balintad iran, na pitharo iran a: "Giyang kaya a gabon a mababalawag na pagoranan tano niyan! Kna, ka skaniyan so piyagalokalokan iyo to! Ndo a kadadalman sa siksa a malipds!"

25

"A phowalasn iyan so langowan taman sabap sa sogoan o Kadnan iyan!" Na kiyapitaan siran a da a khaylay a rowar ko manga darpa iran. Lagid aya man a kambalasi Ami ko pagtaw a manga baradosa!

26

Na sabnsabnar a piyaki khapaar Ami kiran so da Ami rkano to pakikhapaarn, go singgayan Ami siran sa kan'g, go manga kaylay, go manga kagda; na da kiran makanggay a gona so kan'g iran, go so manga kaylay ran, go so manga kagda iran, sa mayto bo, kagiya siyangka iran so manga ayat o Allah; na kiyatangkalan siran o piyamagrgan iran oto (a siksa)!

27

Na sabnsabnar a bininasa Mi so makaliliyot rkano a manga ingd, go phikhasokasoy Ami magosay so manga ayat, ka an siran makambalingan (ko ontol).

28

Na ino siran da katabangi o siran a kinowa iran a salakaw ko Allah a pphangampitn a manga katohanan? Kna, ka minigaib siran kiran: Na giyoto man so kabokhag iran, go so inipangangkob iran (ko Allah).

29

Na gowani na piyakasangor Ami rka so phipira katao ko manga jinn, a phamakin'gn iran so Qor'an: Na kagiya a makadarpa siran on, na pitharo iran: "Rrnk kano!". Na kagiya a mapasad, na mimbalingan siran ko pagtaw iran, a pphamakaiktiyar siran.

30

Pitaro iran: "Hay pagtaw ami, mataan! a skami na adn a miyan'g ami a kitab a initoron ko oriyan o Mosa, a tomatanto ko miyaonaan iyan, a phakatoro ko bnar go sii ko okit a makaoontol.

31

"Hay pagtaw ami! tarimaa niyo so pakapphanolonn o Allah, go paratiyayaa niyo skaniyan: Ka napiyan kano Niyan ko manga dosa niyo, go lpasn kano Niyan ko siksa a malipds.

32

"Na sadn sa di tomarima ko pakapphanolonn o Allah, na di makapalagoy sii ko lopa, go da a mambagian iyan a salakaw ko Allah a manga panarigan. Siran man i matatago ko kadadag, a mapayag."

33

Ba iran di katawi a mataan! a so Allah, a so miyadn ko manga langit ago so lopa, go da dokawi ko kiyaadna Niyan kiran, na Gaos Iyan so kapagoyaga Niyan ko miyamatay? Oway, mataan! a Skaniyan sii ko langowan taman na Gaos Iyan.

34

Na sii ko alongan a kaphaganaga ko siran a miyamangongkir ko apoy, (na tharoon kiran a): "Ba ini di bnar?" Tharoon iran: "Oway, ibt ko Kadnan ami (ka bnar dn)". Tharoon Iyan: "Na taami niyo so siksa sabap ko kiya ongkir iyo!"

35

Na phantang ka (ya Mohammad) lagid o kiyaphantang o manga babagr i tindg ko manga sogo, go ding ka kiran phagalokaloki (so siksa). Lagid oba mataan a siran ko alongan a kasandngi ran ko ididiyandi kiran na da a minitarg iran (ko doniya) a rowar ko isa ka oras ko kadawndaw. (Giyaya na) kapamakasampay: Na ba adn a mbinasaan a rowar ko pagtaw a manga songklid?

Total Number of Verses: 38

1

So miyamangongkir go miyangalang siran ko lalan ko Allah, na inilang Iyan so manga amal iran.

2

Na so miyamaratiyaya, go pinggalbk iran so manga pipiya, go piyaratiyaya iran so initoron ko Mohammad, - a skaniyan so bnar a phoon ko Kadnan iran, - na liyalas Iyan kiran so manga dosa iran go piyaka ontol Iyan so btad iran.

3

Giyoto man na sabap sa mataan! a so miyamangongkir na kidg iran so ribat. Na mataan! a so miyamaratiyaya na kidg iran so ontol a phoon ko Kadnan iran: Giyoto man i kapphayaga o Allah ko manga manosiya ko manga ibarat kiran.

4

Na igira a minithmo niyo so miyamangongkir na kapotol sa manga lig; taman sa igira a miyapakadakl iyo so kapphamonoa kiran na ilota niyo so kapamatong; na (pakaliyowa niyo siran sa) kapdi ko oriyan iyan, odi na kaawn sa ginawa, taman sa mibtad o kambonoay so manga ppnd iyan; giyoto man; na o kabaya o Allah na mataan a khapgs Iyan siran, na ogaid na (inisogo aya ka) kagiya ithiyoba Iyan ko sabaad rkano so sabaad. Na so miyangapprang sa lalan ko Allah, na di Niyan dn pagilangn so manga galbk iran.

5

Thoroon Iyan siran dn, go phaka ontoln Iyan so btad iran,

6

Go phakasoldn Iyan siran ko sorga a piyakikilala Niyan kiran skaniyan.

7

Hay so miyamaratiyaya, o tabangi niyo so (agama o) Allah, na thabangang kano Niyan, go phakabagrn Iyan so manga tindg iyo.

8

Na so miyamangongkir na kabinasa a rk iran, go inilang Iyan so manga galbk iran.

9

Giyoto man na sabap sa mataan! a siran na inikagowad iran so initoron o Allah; na inilang Iyan so manga amal iran.

10

Ba siran da makandalakaw ko lopa, ka an iran maylay o antonaa i miyambtad o kiya akiran ko siran a miyaonaan iran? Piyowalas siran o Allah, na bagian o miyamangongkir so manga lagid iyan.

11

Giyoto man na sabap sa mataan! a so Allah i Panarigan o siran a miyamaratiyaya; na mataan! a so miyamangongkir na da a panarigan iran.

12

Mataan! a so Allah na phakasoldn Iyan so miyamaratiyaya, go pinggalbk iran so manga pipiya ko manga sorga, a pphamangondas ko kababaan iyan so manga lawasayg. Na so miyamangongkir a sasawitan iran (so doniya) go pphangan'ngkan siran sa lagid o kapphangan'ngkan o manga binatang; na so naraka i darpa iran.

13

Na madakl a ingd, a skaniyan i tanto a mabagr a di so ingd ka (ya Mohammad), a so piyakaawa ka niyan, a bininasa Mi siran, na da a miyakatabang kiran.

14

Ino so taw a mithakna ko karina a phoon ko Kadnan iyan, ba lagid o taw a pipharasan on so marata ko galbk iyan (na aya kiyailaya niyan on na mapiya), go piphapangonotan iran so manga n'nga iran?

15

Aya ropaan o sorga a so inidiyandi ko miyamananggila: Na katatagoan oto sa manga lawasayg a ig a di kharmbis, go manga lawasayg a gatas a di phagalin so taam iyan, go manga lawasayg a arak a mapiya i taam ko pphamanginom, go manga lawasayg a tnb a da a saninsaning iyan; go rk iran roo so pithibarang a manga onga, go maap a phoon ko Kadnan iran. Ba lagid o skaniyan a kakal ko naraka, go pphamakainomn siran sa ig a phlikabo, na phangattphd iyan so manga tinai ran?

16

Na pd kiran so taw a pphamakin'gn ka niyan, taman sa igira miyakaliyo siran phoon ko hadapan ka na tharoon iran ko siran a piyamgan ko katao: "Antonaa i pitharo iyan kagiya?" Siran man so piyarkat o Allah so manga poso iran, go piphapangonotan iran so manga kabaya iran a ribat.

17

Na so miyangatotoro na inomanan Iyan siran sa toroan, go inibgay Niyan kiran so pananggila iran.

18

Na ba adn a pkhanayaw iran a rowar ko bangkit sa kapakatalingoma niyan kiran a mitalmba? Na sabnar a adn a miyakatalingoma a manga nanao ron. Na andamanaya i kakhaparoliya iran ko pananadm iran amay ka daan kiran a miyakatalingoma?

19

Na tangkdang ka a mataan aya! a da a patot a pzoasoatn inonta so Allah, go pangni ka sa maap makapantag ko dosang ka, a rakhs o miyamaratiyaya a manga mama, go so miyamaratiyaya a manga babay. Na so Allah na katawan Iyan so dii niyo pagalinalinan nggalbk go so darpa iyo.

20

Na gii tharoon o siran a miyamaratiyaya a: "Oba bo adn a initoron a sorah!" Na igira adn a initoron a sorah a piyakasagogod, go miyaaloy ron so kambonoay, na maylaing ka so kadadalman so manga poso iran sa gdamn a phagilaing ka iran sa kaylay o mikokolob rkaniyan so kapatay. Na aya patot kiran, -

21

Na kapangongonotan go katharo a mapiya. Na igira a miyatkhs so pnggolawlaan, na o bnara iran so Allah na mataan a mabaloy a mapiya a bagian iran.

22

Na ino masikn skano na o makakhapaar kano na phaminasa kano ko lopa, go phanphdn iyo so manga kathotonganaya iyo?

23

Siran man so pimorkaan siran o Allah na bingl Iyan siran go biyota Niyan so manga kaylay ran.

24

Ino iran di pnggdagdaa so Qor'an, ba kiyatagoan so manga poso sa manga kandado niyan?

25

Mataan! a so siran a miphato ko manga talikhodan iran ko oriyan o kiyapayag kiran o toroan, na so shaytan na pipharasan iyan kiran, go piyakaplagod iyan siran.

26

Giyoto man na sabap sa mataan! a siran na pitharo iran ko siran a miyanga gogowad ko initoron o Allah a: "Pagonotan ami skano dn ko sabaad ko olawla. Na so Allah na katawan Iyan so khipag-umaan iran."

27

Na antonaa i khasowa, amay ka tangann siran o manga malaikat, a pamntoln iran so manga paras iran go so manga likod iran?

28

Giyoto man na sabap sa mataan! a siran na kidg iran so inikararangit o Allah, go inikagowad iran so ikasosoat Iyan; na inilang Iyan so manga amal iran.

29

Ba aya tarima on o siran a khikadadalman so manga poso iran sa gdamn, na di dn phakagmawn o Allah so manga siig iran?

30

Na o kabaya Ami na mataan a mapakiilay Ami siran rka, na khakilalang ka siran dn sabap ko tanda iran: Na mataan a khakilalang ka siran dn sii ko ilat o katharo. Na so Allah na katawan Iyan so manga galbk iyo.

31

Na mataan a pthiyobaan Ami skano taman sa katokawan Ami (sa mapayag) so khipananagontaman rkano, a, go so manga papantang, go mapayag Ami so manga totholan rkano.

32

Mataan! a so miyamangongkir, go miyamangalang ko lalan ko Allah, go siyorang iran so Rasol ko oriyan o kiyapayag kiran o toroan, na da dn a mibinasa iran ko Allah a mayto bo, go ilangn Iyan so manga galbk iran.

33

Hay so miyamaratiyaya, onoti niyo so Allah, go onoti niyo so Rasol, go di niyo mbinasaa so manga galbk iyo!

34

Mataan! a so miyamangongkir, go miyamangalang ko lalan ko Allah, oriyan iyan na miyatay siran, a siran na manga kapir, na di siran dn napiyan o Allah.

35

Na di kano khalobai go di kano phangni sa kalilintad a skano i makadadaag; ka so Allah na babid iyo, go da dn a khorangn Iyan rkano ko manga galbk iyo.

36

So kawyagoyag ko doniya na matag katmbangan ago karimbaran: Na o paratiyaya kano go mananggila kano, na ibgay Niyan rkano so manga balas rkano, go di Niyan rkano phangnin so manga tamok iyo.

37

O pangniya Niyan rkano to (langon) sa zabnar an Iyan rkano, na mligt kano, na khapayag Iyan so manga rarangit iyo.

38

Ah! Skano aya na pthawagn kano ka ang kano makapammgay sa lalan ko Allah, na so sabaad rkano na taw a pphligt. Na sa taw a mligt, na aya dn a kiyapligtan iyan na giya ginawa niyan: Ka so Allah i Kawasa, na skano i manga miskin. Na o talikhod kano na somambi sa pagtaw a salakaw rkano, oriyan iyan na di siran mabaloy a manga lagid iyo!

Total Number of Verses: 29

1

Mataan! a Skami na phakadaagn Ami ska (ya Mohammad) sa daag a mapayag:

2

Ka kagiya a pnapin rka o Allah so miyaona a dosang ka, go so miyawri, go tharotopn Iyan so limo Iyan rka, go thoroong ka Niyan ko okit a makaoontol,

3

Go thabangang ka o Allah sa tabang a mabagr.

4

Skaniyan so piyakatoron Iyan so kathatana ko manga poso o miyamaratiyaya, ka an siran makawman sa paratiyaya, - a rakhs o (andang a) paratiyaya iran. Na rk o Allah so manga tantara ko manga langit go so lopa. Na tatap a so Allah na Matao, a Mawngangn,

5

(Inisogo Iyan so kaphrang ka) kagiya a phakasoldn Iyan so miyamaratiyaya a manga mama, go so miyamaratiyaya a manga babay ko manga sorga, a pphamangondas ko kababaan Iyan so manga lawasayg, makakakal siran roo, go plalasn Iyan kiran so manga karataan iran; - na miyabaloy oto sii ko Allah a daag, a mala, -

6

Go an iyan masiksa so pphamanangin a manga mama, go so pphamanangin a manga babay, go so manga pananakoto a manga mama, go so manga pananakoto a manga babay, a ipagaarangan iran so Allah sa arangan a marata; sii kiran so pkhagolinggoling a marata: Na kiyararangitan siran o Allah go pimorkaan Iyan siran, go inithiyagar Iyan kiran so Jahannam. Na mikharatarata a khabolosan.

7

Na rk o Allah so manga tantara ko manga langit ago so lopa. Na tatap a so Allah na Mabagr, a Mawngangn.

8

Mataan! a Skami na siyogo Ami ska (ya Mohammad) a saksi, go pphamanothol sa mapiya, go pphamakaiktiyar:

9

Ka an iyo maparatiyaya so Allah, go so sogo Iyan, go an iyo Skaniyan katabangi, go an iyo mazlasla Skaniyan, go an iyo miphoroporo so Allah ko kapitapita, go so kagabigabi.

10

Mataan! a so siran a gii siran rka makiphasada, na aya dn a gi iran miphasada na so Allah: So lima o Allah na Maliliyawaw ko manga lima iran; na sadn sa ndorat na aya dn a kapndoratan iyan na giya dn a ginawa niyan; Na sa taw a tomann iyan so inibgay niyan a pasad ko Allah, na mbgan Iyan dn skaniyan sa balas, a mala.

11

Ptharoon rka dn o mithatalimbagak ko manga Arab a: "Miyatmbang kami o manga tamok ami go so manga taalok rkami, na pangnin kaming ka sa maap". Di iran pakitharo ko manga dila iran so da ko manga poso iran. Tharoang ka: "Na antawaa i adn a mapkhapaar iyan rkano ko Allah a mayto bo amay ka pakaantapan kano Niyan sa morala odi na pakaantapan kano Niyan sa ompiya? Kna, ka tatap a so Allah sii ko gii niyo nggolawlaan na Kaip Iyan.

12

"Kna, ka inipagarangan iyo sa di dn makambalingan so Rasol ago so miyamaratiyaya ko manga taalok kiran sa dayon sa dayon, go pipharasan oto ko manga poso iyo, go miyagarangan kano sa arangan a marata, go miyabaloy kano a pagtaw a miyangabibinasa."

13

Na sadn sa di maratiyaya ko Allah go so sogo Iyan na mataan! a Skami na pithiyagaran Ami so miyamangongkir sa kadg!

14

Na rk o Allah so kapaar ko manga langit ago so lopa: Pnapiyan Iyan so taw a kabaya Iyan, go ziksaan Iyan so taw a kabaya Iyan. Na tatap a so Allah na Manapi, a Makalimoon.

15

Ptharoon o mithatalimbagak, amay ko songowan iyo so manga taban ka phangowaan iyo skaniyan a: "Botawani kami niyo ka monot kami rkano"; khabayaan iran a kasambian iran so manga katharo o Allah. Tharoang ka: "Di kano rkami dn pagonot." Giyoto man na pitharo o Allah gowani, na ptharoon iran dn: - "Kna, ka ziign kami niyo". Kna, ka miyabaloy siran a da a sasabotn iran inonta so mayto.

16

Tharoang ka ko mithatalimbagak ko manga Arab a: "Thawagn kano (a phakaaton) ko pagtaw a adn a guus iyan a mala, a mipmbonoay niyo siran, odi na somangkop siran; na o onoti niyo na mbgang kano o Allah sa balas a mapiya. Na o talikhod kano lagid o kiyatalikhod iyo a miyaona, na ziksaan kano Niyan sa siksa a malipds."

17

Da' ko bota i dosa, go da' ko lpo i dosa, go da' ko pkhasakit i dosa (ko da iran kawnot sa thmoan): Na sadn sa monot ko Allah go so sogo Iyan, na phakasoldn Iyan ko manga sorga a pphamangondas ko kababaan iyan so manga lawasayg. Na sa taw a tomalikhod, na ziksaan Iyan skaniyan sa siksa a malipds.

18

Sabnsabnar a miyasoat so Allah ko miyamaratiyaya gowani ko dii siran rka makiphasada ko atag o kayo: Na katawan Iyan so matatago ko manga poso iran, na piyakatoron Iyan kiran so kathatana, go inibalas Iyan kiran so daag, a marani,

19

Go manga taban a madakl a phangakokowa iran skaniyan. Na tatap a so Allah na Mabagr, a Mawngangn.

20

Inidiyandi rkano o Allah so manga taban a madakl, a phangakokowa niyo skaniyan, na pinggagaanan Iyan rkano aya, go lininding kano Niyan ko manga barokan o manga manosiya, ka ang kano mabaloy a tanda ko miyamaratiyaya, go ang kano Niyan matoro ko okit a makaoontol;

21

Go adn a manga pd a da niyo pn oto maparoli, na sabnar a katawan oto o Allah. Na tatap a so Allah sii ko langowan taman na Gaos Iyan.

22

Na o pakimbonoay rkano so miyamangongkir na italikhod iran dn so manga likod (iran); oriyan iyan na da a khatoon iran a panarigan, go tabanga.

23

Okit o Allah a so andang a miyaypos gowani: Na da dn a khatoon ka a kasambii ko okit o Allah.

24

Na Skaniyan so lomininding rkano ko manga barokan iran, go lomininding kiran ko manga barokan iyo sii ko balintad sa Makkah, ko oriyan o kiyapakidaagn Iyan rkano kiran. Na tatap a so Allah sii ko gii niyo nggolawlaan na phagilayn Iyan.

25

Siran so miyamangongkir go inalangan kano iran ko Masjidil Haram, go so pammgayan a miyarn ko kisampay niyan ko darpa iyan. Na o da so manga mama a miyamaratiyaya, go so manga babay a miyamaratiyaya a di niyo siran pangatatawan a oba niyo siran mirakhs mamono, na masogat kano sa sabap kiran a kasalaan sabap ko di niyo kiran katawi (na phakitgl Iyan siran rkano): Kagiya a phakasoldn o Allah ko limo Iyan so taw a kabaya Iyan, o minisibay siran na mataan a ziksaan Ami so miyamangongkir kiran sa siksa a malipds.

26

Gowani a tagoon o siran a miyamangongkir ko manga poso iran so maratabat, - a maratabat ko kada a mlng, - na piyakatoron o Allah so kathatana iyan ko sogo Iyan go so miyamaratiyaya, go iniilaham Iyan kiran so katharo a kapananggila, go miyabaloy siran a kiyapatotan saya, go diyaitan aya. Na tatap a so Allah sii ko langowan taman na katawan Iyan.

27

Sabnsabnar a tiyoman o Allah ko sogo Iyan so taginpn iyan sii ko bnar. Mataan a phamakasold kano dn ko Masid Al-Haram, o kabaya o Allah a somasarig kano, a pphamangopawan iyo so manga olo niyo, go gii niyo nggogontingan, a da a pangandam iyo. Na katawan Iyan so di niyo katawan, na adn a minibgay Niyan ko da pn oto a daag a marani.

28

Skaniyan so siyogo Iyan so sogo Iyan rakhs o toroan go so agama a bnar, ka phakiombawan Iyan on so agama sa kalangolangowan iyan: Na miyakatarotop so Allah a Saksi.

29

So Mohammad na sogo o Allah; na so manga pd iyan na khittgas ko manga kapir, a dii siran khakalimoay. Pkhailaing ka siran a khiroroko, a khisosojiod, a gii siran mbabanog sa kakawasaan a phoon ko Allah ago kasosoat. So tanda iran, na zisii ko manga paras iran phoon ko rarad o sojiod. Giyoto man i ropaan iran ko Tawrat; na aya ropaan iran ko Injil: Na lagid o pr a piyakambowat iyan so sina niyan, na miyambagr iyan skaniyan, na miyakatiwaro na minipamayandg iyan so tomadng iyan, a sosoatn iyan so miyamola, ka an iyan mapakapphagotg sa sabap kiran so manga kapir. Inidiyandi o Allah ko siran a miyamaratiyaya, go pinggalbk iran so manga pipiya a pd kiran so maap, go balas, a lbi a mala.

Total Number of Verses: 18

1

Hay so miyamaratiyaya, di niyo pagonai so Allah go so sogo Iyan; go kalkn iyo so Allah: Mataan! a so Allah na Pphakan'g, a Matao.

2

Hay so miyamaratiyaya, di niyo pphoroon so manga sowara niyo sa makaombaw ko sowara o Nabi, go di niyo pphamakatanogi skaniyan sa katharo, lagid o kapphamakatanogi o sabaad rkano ko sabaad, ka oba maylang so manga amal iyo a skano na di niyo maiin'ngka.

3

Mataan! a so ibababa iran so manga sowara iran ko hadapan o Rasolollah, - na siran man so tiyolabos o Allah so manga poso iran ko kapananggila: Adn a bagian iran a maap ago balas a lbi a mala.

4

Mataan! a so siran a pthawagn ka iran (ya Mohammad) ko liyo o manga bilik, - na so kadaklan kiran na di siran phamanabot.

5

Na o mataan! a siran na miphantang siran taman sa kaliyowing ka kiran, na mataan a khabaloy a mapiya a bagian iran: Na so Allah na Manapi, a Makalimoon.

6

Hay so miyamaratiyaya, o adn a miyoma rkano o songklid a tothol, na amada niyo, ka oba niyo kapmaratai so pagtaw sabap ko di kapakakakaip, na mabaloy kano ko pinggolawla niyo a khipakazsndit.

7

Na tangkda niyo a mataan! a matatago rkano so sogo o Allah: Amay ka onotang kano niyan ko madakl ko pkhawlawla, na mataan a makandarasag kano; na ogaid na so Allah na piyakikababayaan Iyan rkano so paratiyaya, go pipharasan Iyan oto ko manga poso iyo, go piyakikagowad Iyan rkano so kaongkir, go so kapanongklid, go so kandarowaka: Siran man na siran so khipakaoontol:

8

Gagaw a phoon ko Allah, go limo. Na so Allah na Matao, a Mawngangn.

9

Na o adn a dowa ka sagorompong ko miyamaratiyaya a pmbobono siran; na tanora niyo siran. Na amay ka phanalimbotan o isa sa dowa oto so pd iyan, na pakimbono kano ko phanalimbot taman sa di mndod ko sogoan o Allah; na amay ka mndod, na tanora niyo siran ko ontol, go paginontolan kano. Mataan! a so Allah na pkhababayaan Iyan so manga oontol.

10

So miyamaratiyaya na aya bo magariyari: Na tanora niyo so manga pagari niyo, go kalkn iyo so Allah, ka ang kano mipangalimo.

11

Hay so miyamaratiyaya, di phamagrgi o isa a pagtaw so isa a pagtaw: Ka masikn a mabaloy siran (a pphamagrgan) a tomo a di siran, go di (phamagrgi o) manga babay so manga pd a babay: Ka masikn a mabaloy siran a tomo a di siran: (a pphamagrg); go di niyo pphapaawinga so (manga pd o) manga ginawa niyo, go di niyo pthatalowaan so manga patogina a piyakagowagowad. Miyakaratarata a ngaran so kapanongklid ko oriyan o paratiyaya. Na sa taw a di niyan thawbatn, na siran man na siran so manga darowaka.

12

Hay so miyamaratiyaya, pakawatani niyo so madakl a kapanganganib; ka mataan! a so sabaad ko kapanganganib na dosa; go di kano pphanoriman, go di pphamagantaa o sabaad rkano so sabaad. Ba khabayai o isa rkano a kakana niyan ko sapo o pagari niyan a miyatay? Na inikagowad iyo to! Na kalkn iyo so Allah: Mataan a so Allah na pphanarima ko tawbat, a Makalimoon.

13

Hay manga manosiya, mataan! a Skami na inadn Ami skano a phoon sa mama ago babay, go biyaloy Ami skano a mbarambarang a bangnsa, ago pithikaloksan, ka ang kano makakhikilalai. Mataan! a aya lbi a sslaan rkano sii ko Allah na so lbi a masanggila rkano. Mataan! a so Allah na Matao, a Kaip.

14

Pitharo o (manga Badawi a) manga Arab a: "Miyaratiyaya kami". Tharoang ka (ya Mohammad) a: "Da kano paratiyaya, na ogaid na aya tharoa niyo na somiyangkop kami, ka da pn sold so paratiyaya ko manga poso iyo. Na amay ka onotan iyo so Allah ago so sogo Iyan, na da a korangn Iyan rkano ko manga amal iyo a mayto bo. Mataan! a so Allah na Manapi, a Makalimoon."

15

Aya bo a titho a khipaparatiyaya na so piyaratiyaya iran so Allah go so sogo Iyan, oriyan iyan na da siran paganganangan, go inipanagontaman iran so manga tamok iran go so manga ginawa iran ko lalan ko Allah: Siran man na siran so mimamataan.

16

Tharoang ka a: "Ba niyo phakitokawi ko Allah so okit iyo, a so Allah na katawan Iyan so zisii ko manga langit ago so zisii ko lopa? Na so Allah sii ko langowan taman na katawan Iyan.

17

Pphamagitongn iran a limo iran rka (ya Mohammad) a kiyapag-Islam iran. Tharoang ka a: "Di niyo pphamagitonga a limo iyo rakn a kiyapag-Islam iyo. Kna, ka so Allah na iphananakawan iyan rkano a kiyatoroa Niyan rkano ko paratiyaya, o skano na mmamataan kano.

18

"Mataan! a so Allah na katawan Iyan so migagaib ko manga langit ago so lopa: Na so Allah na phagilayn Iyan so gii niyo nggolawlaan.

Total Number of Verses: 45

1

Qaf. (So Allah i Matao ko paka-aantapan Iyan on). Ibt ko Qor'an a sslaan; (ka so Mohammad na sogo o Allah).

2

Kna, ka miyammsa siran sa kiyapakawma kiran o miyamakaiktiyar a pd kiran. Na pitharo o miyamangongkir a: "Giyaya na shay' a piyakammsa!"

3

"Ino amay ka matay tano go mbaloy tano a botha, (khawyag tano zaroman)? Giyoto na kapakandod a mawatan!"

4

Sabnar a katawan Ami so pkhorangn kiran o lopa; go zisii Rkami so daptar a sisiyapn.

5

Kna, ka piyakambokhag iran so bnar ko kiyapakawma niyan kiran: Na siran na matatago ko btad a di thatana.

6

Ba iran da pagilaylaya so langit ko kaporoan iran? O andamanaya i kiyambalaya Mi ron go so kiyapharasi Ami ron, a da a manga lbo niyan?

7

Go so lopa a kiyayat Ami skaniyan, go piyakabknan Ami oto sa manga palaw, go piyakatho Ami ron so pizoson a pakaranon,

8

In'ngka, ago pananadm o oman i oripn a pphangongonotan (ko Allah).

9

Na piyakatoron Ami a phoon ko kawang so ig a madakl i gona, na piyakatho Ami sa sabap rkaniyan so manga pamomolan go so pr a mapphragon;

10

Go so manga korma a manga poporo, a adn a onga niyan a miyakanggontogontor,

11

Pagpr ko manga oripn (o Allah;) go inioyag Ami oto ko ingd a maatay: Lagid man oto so kaphakagmaw (phoon ko manga kobor).

12

Tomiyaplis ko miyaonaan iran so pagtaw o Noh, go so khibabaling sa (ingd a) Rassi, go so pagtaw a Samod,

13

Go so pagtaw a Ad, go so Pir'awn, go so manga pagari o Lot,

14

Go so khibabaling sa Aykah, go so pagtaw o Tobba': Oman i isa kiran na piyakambokhag iyan so manga rasol, na miyatangkd (kiran) so siksa Akn.

15

Ba Kami minikopay ko kiyapangadn a paganay? Kna, ka siran na matatago ko kazasangka ko kaphangadn a bago.

16

Na sabnsabnar a inadn Ami so manosiya, go katawan Ami so pkhigdi skaniyan o ginawa niyan: Go Skami i lbi a marani ron a di so ogat ko bakrng;

17

Gowani a pphanorat so dowa a malaikat, sii sa kawanan go sa diwang khioontod;

18

Daa maptharo iyan a katharo a ba da a zisii rkaniyan, a tomotonggo a makadadarpa.

19

Na mitalingoma o Sakratol Mawt so bnar. "Giyoto man so ska na pphalagoyan ka skaniyan!"

20

Na iyopn so sanggakala:, giyoto man so alongan a diyandi.

21

Na makawma so oman i isa a ginawa a: Adn a pd iyan a pndndg on go saksi.

22

(Tharoon on a:) "Sabnsabnar a miyatago ka ko kalilipati sangkai, na piyokas Ami rka so mirrnding rka, na so kaylaing ka sa alongan nai na malambt!"

23

Na tharoon o (malaikat a) pd iyan a: "Giyaya so kadadarpaang ko."

24

(Tharoon o Allah:) "Phozanga niyo a dowa ko naraka Jahannam so oman i miyongkir, a somiyangka,"

25

"Phagrn ko mapiya, a mmamalawani, a pkhadowadowaan,"

26

"A so miyangmbaal sa rimbang o Allah a katohanan a salakaw: Na pozanga niyo skaniyan ko siksa a sangat."

27

Tharoon o (shaytan a) pd iyan: "Kadnan ami, da akn dadaga skaniyan, na ogaid na miyatago ko kadadag a mawatan."

28

Tharoon (o Allah) a: "Di kano gii phapawala ko hadapan Ko: Ka sabnar a miniona ko rkano so kapakaiktiyar."

29

"Di khasambian so katharo ko hadapan Ko, go di Akn zalimbotan so manga oripn (Ko)."

30

Sii ko alongan a tharoon Ami ko Jahannam: "Ba ka miyapno?" Na tharoon iyan: "Ba adn a khiyoman?"

31

Na ipakarani so sorga ko miyamananggila, a di mawatan:

32

"Giyaya so ididiyandi rkano, a rk o oman i pphananangoran (ko Allah) a masiyapn,"

33

"A so maalkn ko Masalinggagaw, a migagaib, go miyakaoma rakhs o poso a thotolabos:

34

"Pamanold kano ron sa kapipiya ginawa. Giyaya so alongan a kakal!"

35

Khakowa iran so nganin a kabaya iran roo; go adn a zisii Rkami a lawan on.

36

Na madakl a bininasa Ami ko miyaonaan iran a pagtaw, siran i mala a di siran i guus, go miyanbnb iran so manga ingd! Na ba adn a kiyaapasan (iran)?

37

Mataan! a adn a matatago roo man a titho a ndao ko taw a adn a sabot iyan, maana tiyandang iyan so kapamamakin'g, a skaniyan na tomototoo.

38

Na sabnsabnar a inadn Ami so manga langit go so lopa, go so nganin a lt a dowa nan sii ko nm a alongan, na da Kami raota a dokaw.

39

Na phantanging ka so di iran tharoon, go pthasbikn ka so podi o Kadnan ka, ko di pn kapakasbang o alongan, go so di niyampn kasdp,

40

Go sii ko kagagawii, na pthasbik ka Rkaniyan, go so manga oriyan o sojiod.

41

Na pamakin'gang ka so alongan a mananawag so phananawag ko darpa a marani,

42

Sii ko alongan a man'g iran so lalis a rakhs o bnar: Giyoto man so alongan a kapakambowat (ko kobor).

43

Mataan! a Skami na Skami i pphangoyag go pphangimatay; go sii Rkami so khabolosan,

44

Sii ko alongan a manga bbngkag kiran so lopa, a gii siran makanggagaan (lomiyo ko manga kobor): Giyoto man i kaplimod a malbod Rkami.

45

Skami i lbi a Matao ko gi iran tharoon; na kna a ba ka kiran pakaphamaasa. Na pakitadming ka so Qor'an ko taw a ikaalk iyan so pangangalk Akn!

Total Number of Verses: 60

1

Ibt ko pphamanambr sa mabands,

2

Go so pphamangawid sa mapnd,

3

Go so pphlalatas sa malbod,

4

Go so dii nggomonggomon ko sogoan,

5

Mataan a so ididiyandi rkano na titho a bnar,

6

Go mataan! a so kokoman na phakatana dn.

7

Ibt ko langit a adn a manga lalan on,

8

Mataan! a skano na matatago dn ko katharo a zosoran sorang;

9

Pphakatalikhodn on so taw a (andang a) piyakatalikhod.

10

Pimorkaan so manga bokhag,

11

So siran na matatago ko kada a mlng a khikalilipat!

12

Iphagiza iran o: "Anda so alongan a kokoman?"

13

Sii ko alongan a siran na thotongn siran ko apoy:

14

"Taami niyo so kathotonga rkano! Giyaya so skano na pphagalokalokan iyo skaniyan!"

15

Mataan! a so miyamananggila na sii ko manga sorga, go manga bowalan,

16

A tatarimaan iran so inibgay kiran o Kadnan iran. Mataan! a siran na aya btad iran ko onaan oto na miphipiyapiya siran.

17

Aya btad iran na mayto ko kagagawii a ipphakatorog iran,

18

Go sii ko kapkhakalibabas iyan, na siran na pphangni siran sa maap (ko Allah),

19

Go sii ko manga tamok iran na adn a rk on o pphamangni, go so di phamangni.

20

Na adn a matatago ko lopa a manga tanda ko khitotomangkd,

21

Go zisii (pn) ko manga ginawa niyo: Ba kano di phangilaylay?

22

Go zisii ko langit so pagpr rkano, go so ididiyandi rkano.

23

Na ibt ko Kadnan o langit ago so lopa ka mataan aya! a titho a bnar, lagid o mataan! a skano na katharo iyo.

24

Ino a miyakatalingoma rka so totholan ko manga banto o Ibrahim a (manga malaikat a) khisslaan?

25

Gowani a somold siran on na mitharo siran sa: "Salaam!" Somimbag sa: "Salaam!" (miyapamikir iyan a): "Pagtawai a di makikilala."

26

Na minanay somong ki karoma niyan na minioma niyan a sapi a piyagiyaw,

27

Na iniobay niyan kiran, na pitharo iyan: "Ino kano di khan?"

28

Na kiya akinan kiran sa kalk. Na pitharo iran: "Di ka khalk. Na piyanothol iran on a mama a matao (a ipmbawata iyan)."

29

Na miyakaoma si karoma niyan, a mikokorot a lagam iyan, na miyatphi iyan a parasiyan, go miyatharo iyan: "(sakn na) loks, a balk!"

30

Pitharo iran: "Manaya dn man, so pitharo o Kadnan ka mataan! a Skaniyan na Skaniyan so Mawngangn, a Matao."

Part 27

31

Pitharo iyan: "Antonaa i pagangin iyo, hay manga sogo?"

32

Pitharo iran a: "Mataan! a skami na siyogo kami ko pagtaw a manga sala,"

33

"Ka an ami siran kapakawrani sa ator a phoon sa lipaw,"

34

"Totoosan sii ko Kadnan ka a rk o manga malawani."

35

Na piyakaliyo Ami so matatago on ko miyamaratiyaya;

36

Na da a miyatoon Ami ron a salakaw ko isa ka walay a manga Moslim.

37

Na inibagak Ami ron so tanda a rk o siran a ikaalk iran so siksa a malipds;

38

Go sii (pn) ko Mosa gowani a sogo on Ami ko Pir'awn rakhs o katantowan, a mapayag.

39

Na tomiyalikhod a rakhs o gomagabay ron, go pitharo iyan a: "Balik mata odi na tataraponan!"

40

Na siniksa Ami skaniyan go so manga tantara iyan, na inibowang Ami siran ko kalodan, a skaniyan na kapphanginsoyaan;

41

Go sii (pn) ko pagtaw a Ad gowani a botawanan Ami kiran so ndo a maminasa:

42

Daa plaoon iyan a mayto bo a miyadansal iyan a ba niyan oto da baloya a izan o lopapk;

43

Go sii (pn) ko pagtaw a Samod gowani a tharoon kiran a: "Zonor kano sa taman ko wakto (o siksa)!"

44

Na pimaratabatan iran so sogoan o Kadnan iran, na miyadansal siran o lalis, a siran na kasasandngan iran.

45

Na da siran makagaga gomanat, go da iran malinding a ginawa iran;

46

Go so pagtaw o Noh gowani: Mataan! a siran na miyabaloy siran a pagtaw a manga songklid.

47

Go so langit na pimbalay Ami skaniyan sabap ko bagr, go mataan! a Skami i titho a miyakawlad on.

48

Go so lopa na kiyayat Ami skaniyan, na sayana a mapiya so miyangayat on!

49

Go so langowan taman na inadn Ami a nggaganapa; ka an iyo pkhatadmi.

50

Na pagagaw kano ko Allah. Mataan! a sakn na pphamakaiktiyar rkano, a mapayag a phoon Rkaniyan.

51

Na di kano phangmbaal sa rimbang o Allah a katohanan a salakaw. Mataan! a sakn na pphamakaiktiyar rkano, a mapayag a phoon Rkaniyan!

52

Mawto dn man, a da a miyakatalingoma ko siran a miyaonaan iran a sogo a ba iran da tharoa a: "Balik mata, odi na tataraponan!"

53

Ba iran aya inithatanana? Kna, ka siran na pagtaw a manga darowaka!

54

Na talikhoding ka siran, ka kna ba adn a paawing ka on.

55

Na pangthoma ka, ka mataan! a so thoma na phakanggay a gona ko miyamaratiyaya.

56

Na da a kiyaadna Ko ko manga jinn go so manga manosiya, a rowar sa ana Ko iran mazoasoat.

57

Daa singanin Akn kiran a pagpr, go di Akn singanin i kapakakana iran Rakn.

58

Mataan! a so Allah na Skaniyan so Pphagpr, - a Khirk ko bagr, a di ptharotos.

59

Na mataan! a adn a bagian o siran a mindadarowaka a kipantag (ko siksa) a lagid o kipantag o manga pd iran; na di iran Rakn maphangni i kapagalokaloki ron!

60

Na sangat a siksa a bagian o siran a miyamangongkir, sii ko alongan iran a so ididiyandi kiran!

Total Number of Verses: 49

1

Ibt ko palaw a Tor (a giyoto so palaw a ron inimbitiyarai o Allah so Mosa ko liyawaw niyan).

2

Go so kitab a misosorat (a giyo to so Qor'an)

3

Ko karatas a makakayat,

4

Go so Baytil Maamor (a giyoto so walay a mbabalayn a dii tawapan mambo o manga malaikat sa langit).

5

Go so atp a ipoporo (a giyoto so langit a matatampar sa donya)

6

Go so kalodan a mappno,

7

Ka mataan! a so siksa o Kadnan ka na phakatana dn, -

8

Daa phakarnon,

9

Sii ko alongan a mabirbir so langit sa titho a kabirbir,

10

Go mamangikayontong so manga palaw a mikayambr.

11

Na sangat a siksa sa alongan oto a bagian o miyamanaplis,

12

So siran na sii ko ribat khikabibimban;

13

Sii ko alongan a ipanaromag siran ko naraka Jahanam, sa mabasng a kapanaromag.

14

(Tharoon kiran:) Giyai so apoy, a so piyakambokhag iyo skaniyan!

15

Ino balik mata ini, antawaa skano i di phamakanono? -

16

Sombowi niyo skaniyan: Na phantang kano, antawaa di kano pphantang, na mlagid rkano. Aya bo a imbalas rkano na so pinggolawla niyo.

17

Mataan! a so miyamananggila na sii ko manga sorga, go kadarandang,

18

A mabababaya siran sabap ko inibgay kiran o Kadnan iran; go piyakalidas siran o Kadnan iran ko siksa ko naraka Jahim.

19

(Tharoon kiran:) Kang kano, go inom kano sa kapipiya ginawa, sabap ko pinggolawla niyo;

20

Gii siran zasandasandang ko manga kantir a khirarantarn; go pakaphamangaromaan Ami siran sa manga tataid, a manga pipiya i kapmata.

21

Na so miyamaratiyaya, go tiyondog siran o manga moriyataw iran ko paratiyaya, - na pakiraot Ami siran ko manga moriyataw iran, go da a korangn Ami kiran ko galbk iran a mayto bo. Oman i isa a taw na sanda ko galbk iyan.

22

Na phagomanan Ami siran sa onga, ago sapo, a pkhababayaan iran.

23

Gii siran roo ndadawaga sa inomn, a da a ilang on, go da a ikhadosa on;

24

Go phlibtn siran o manga ngongoda iran, lagid o ba siran montiya a totongkopn;

25

Go pphagadapn o sabaad kiran so sabaad, a pphamagizai siran:

26

Tharoon iran a: Mataan! a sktano na miyabaloy tano gowani ko zisii tano ko manga tonganay tano a maalk tano.

27

"Na inikalimo tano o Allah, go piyakalidas tano Niyan ko siksa, a phakarobrob.;"

28

"Mataan! sktano na miyabaloy tano gowani a pphamangni tano Rkaniyan. Mataan! a Skaniyan na Skaniyan so Pphangompiya, a Makalimoon!"

29

Na pphangthoma ka, ka sabap ko limo o Kadnan ka, na kna a ba ka paririmar, go di ka tataraponan.

30

Kna, ka gi iran tharoon a: "Pababayok! Na daraan tano rkaniyan so phangababago o masa!"

31

Tharoang ka: "Dadara kano, ka mataan! a sakn na pd iyo a pd ko khidadara!."

32

Ba kiran aya sosogoon o manga gdagda iran; kna, ka siran na pagtaw a manga darowaka?

33

Ino iran gii tharoa a: "Piyangmbaalan iyan aya a katharo?" Kna, ka di siran mapaparatiyaya!

34

Na bgay siran sa tothol a lagid iyan, o siran i manga bnar!

35

Ba siran miyaadn sa da a miyangadn, antawaa ba siran i miyangadn?

36

Ba iran inadn so manga langit ago so lopa? Kna, ka di iran tatangkdn.

37

Ba kiran zisii so manga kakawasaan o Kadnan ka, antawaa ba siran i phamakabaas?

38

Ba adn a towak iran (ko langit) a makapphamakin'g siran on? Na talingomaan o miyamamakin'g kiran i katantowan, a mapayag!

39

Ba aya rk Iyan na so manga wata a babay, na rk iyo so manga wata a mama?

40

Na ba ka kiran pphangni sa sokay, na siran na phoon ko kapakambayadan na kappndan siran?

41

Ba kiran zisii so migagaib, na siran i pphamanorat on?

42

Kna, ka aya antap iran na antangan a marata, na so miyamangongkir na siran i piyangakakaydan!

43

Ba adn a tohan iran a salakaw ko Allah? Soti so Allah mawatan ko ipphanakoto iran!

44

Na o makaylay siran sa sagintas ko langit a pkhawlog, na ptharoon iran a: "Gabon a thotorogan!"

45

Na botawaning ka siran, taman sa mimbaratmowa iran so alongan iran, a so khadaan siran on sa tanod,

46

Alongan a di kiran makanggay a gona so ikmat iran sa mayto bo, go di siran pangatatabangan.

47

Na mataan! a adn a bagian o siran a mindadarowaka, a siksa a salakaw roo, na ogaid na so kadaklan kiran na di iran katawan.

48

Na phantang ka ko kokoman o Kadnan ka; ka mataan! a ska na sii ko manga kaylay Ami: Go pthasbikn ka so podi o Kadnan ka, ko wakto a kangganat ka;

49

Go sii ko kagagawii na pthasbik ka Rkaniyan, go so kapamakasdp o manga bitoon!

Total Number of Verses: 62

1

Ibt ko bitoon igira a minigaib,

2

Ka da makasilay so (Mohammad a) pd iyo, go da maribat,

3

Go di ptharo sa phoon sa kabaya iyan;

4

Da ko skaniyan inonta na ilaham a iphagilaham on:

5

Inindao rkaniyan (o Jibril a) tanto a mabagr,

6

A miyakabagbagr; na mimbatang,

7

A skaniyan na sii ko sindadan o kaylay a maporo.

8

Oriyan iyan na miyakarani (so Jibril ko Mohammad), go domiyazg,

9

Na miyabaloy a lagid o dowa poro o bosogan (a pana), odi na lawan on sa kadasg;

10

Na iniilaham Iyan ko oripn o Allah so iniilaham Iyan.

11

Da zangka so poso (o Mohammad) ko miyailay niyan.

12

Ino niyo pphamawala skaniyan ko miyailay niyan?

13

A sabnsabnar a miyailay niyan so Jibril ko miyakaysa a salakaw,

14

Sii ko Sidratil Montaha (a giyoto so kayo a pmbthowan sa nabk a matatago ko ika pito lapis a langit)

15

Mipagoobay skaniyan o sorga a Jannatol Ma'wa!

16

Gowani a pkhikolob ko Sidrat (El Montaha) so pkhikolob (a pakammsa),

17

Na da mapaling so kaylay (o Mohammad) go da makalpas!

18

Sabnsabnar a miyakaylay, ko manga tanda o Kadnan iyan, a lbi a mala!

19

Ay gda iyo ko (barahala) Lat, go so Ozza,

20

Go so Manat, a so ika tlo, a salakaw (ba adn a khagaga iran)?

21

Ati rk iyo so mama, na rk Iyan so babay?

22

Giyoto man na samawto na kambagibagi a kazoramig!

23

Da ko skaniyan inonta na manga ngaran a inipamtho niyo skaniyan, - skano go so manga loks iyo - a da a initoron on o Allah a katantowan. Da a phagonotan iran a rowar ko arangan, go so kabaya o manga ginawa! Na sabnsabnar a miyakaoma kiran a phoon ko Kadnan iran so toroan!

24

Ba khakowa o manosiya so nganin a ongaya iyan?

25

Na rk o Allah so khawri, ago so khawna.

26

Na madakl a malaikat ko manga langit, na da a khibgay a gona o pangongogopan iran a mayto bo inonta ko oriyan o kaidin o Allah sii ko taw a kabaya Iyan go masosoat on.

27

Mataan! a so di iran paparatiyayaan so akhirat, na sabnar a pmbthowan iran so manga malaikat sa ngaran, a babay.

28

A da a rk iran on a katao; da a phagonotan iran a rowar ko arangan; na mataan! a so arangan na di phakanggay a gona ko bnar sa mayto bo.

29

Na talikhoding ka so taw a tiyalikhodan iyan so pananadm Ami, go da a kabaya iyan a rowar ko kawyagoyag ko doniya.

30

Giyoto man i riyaot iran a katao. Mataan! a so Kadnan ka na Skaniyan i Matao ko taw a sominilay phoon ko lalan Iyan, go Skaniyan i Matao ko taw a komidg ko ontol.

31

Na rk o Allah so zisii ko manga langit go so zisii ko lopa: ka an iyan mibalas ko siran a minggolawla sa marata, so pinggolawla iran, go an iyan mibalas ko siran a miphipiyapiya so mapiya.

32

Siran na panananggilaan iran so manga ala a dosa, go so manga pakasisingay, inonta so maroni a dosa, - mataan! a so Kadnan ka na mawlad i napi. Skaniyan i lbi a Matao rkano, gowani a adnn kano Niyan a phoon ko lopa, go gowani a skano na manga bodi ko manga tiyan o manga ina iyo. Na di niyo pmbantogann i kasosoti o manga ginawa niyo: Skaniyan i lbi a Matao ko taw a miyananggila.

33

Ay gda a ka ko skaniyan a tomiyalikhod,

34

Go migay sa mayto, na tiphd iyan bo?

35

Ba zisii rkaniyan so katawi ko migagaib, na skaniyan na pkhaylay niyan?

36

Ba on da mapanothol so zisii ko manga kitab o Mosa,

37

Go so Ibrahim a so tomiyarotop:

38

A di khaawidan o baradosa so dosa o salakaw,

39

Go da a khatangkd ko manosiya inonta so miyanggalbk iyan,

40

Go mataan! a so galbk iyan na khaylay dn,

41

Oriyan iyan na khabalasan on sa balas a tarotop;

42

Na mataan! a sii bo ko Kadnan ka so khadansalan;

43

Go mataan! a Skaniyan na Skaniyan so pzabap ko kapakakhala, go so kapakasgad,

44

Go mataan! a Skaniyan na Skaniyan so miyangimatay, go miyangoyag,

45

Go mataan! a Skaniyan i miyadn ko ngganapa: mama, go babay, -

46

Phoon sa mani igira a pkhipantos;

47

Go mataan! a matatangkd Rkaniyan so kaphangadn pharoman (ko alongan a qiyamah);

48

Go mataan! a Skaniyan na Skaniyan i pphamgay sa kakawasaan, go pmbgay sa kamiskin;

49

Go mataan! a Skaniyan na Skaniyan i Kadnan o bitoon a Sha'rah;

50

Go mataan! a Skaniyan i mininasa ko pagtaw a Ad a paganay,

51

Go so pagtaw a Samod, na da a liyamba Iyan (kiran),

52

Go so pagtaw o Noh gowani. Mataan! a siran na miyabaloy siran a siran i lbi a darowaka, go lbi a malawani;

53

Go giya ingd a Mo'tafika a piyozang Iyan,

54

Na inikolob Iyan on so inikolob Iyan (a siksa).

55

Na anda ko manga limo o Kadnan ka i zangkaan ka?

56

(So Mohammad) Giyaya na pphamakaiktiyar, a pd ko pphamakaiktiyar a paganay!

57

Miyakarani so pakatatalingomaan (a bangkit):

58

Daa salakaw ko Allah a phakapayag on.

59

Antonaa i sabap a giya ungkai a tothol (a Qor'an) na ipphammsa niyo?

60

Go gii kano khakala a dikano phaman'gad,

61

Go skano na khikattmbang kano?

62

Na sojiod kano ko Allah go zoasoata niyo!

Total Number of Verses: 55

1

Miyakarani so bangkit, go miyaopak so olan.

2

Na o makaylay siran sa tanda, na talikhodan iran, go tharoon iran a: "Balik mata a mabagr!"

3

Go piyakambokhag iran go inonotan iran so manga kabaya iran a ribat. Na oman i btad na adn a pthaknaan iyan.

4

Na sabnsabnar a adn a miyakaoma kiran a manga tothol a so kadadalman sa tapaos,

5

Ongangn a somsndad; - na da makanggay a gona so miyamakaiktiyar;

6

Na talikhoding ka siran. Sii ko alongan a itawag o (Israfil a) phananawag so shay' a pakalklk.

7

Makapangangalimbabaan so manga kaylay ran, a pphamakambowat siran phoon ko manga kobor, a lagid o ba siran manga tarapan a mipapayapat,

8

Madilapt a kapphakasong iran ko pphananawag. Gii matharo o miyamangongkir a: "Giyai na alongan a margn."

9

Tomiyaplis ko miyaonaan iran so pagtaw o Noh, ka tiyaplis iran so oripn Ami (a Noh), go pitharo iran a: "Tataraponan, go tiyapaosan."

10

Na miyangangarapan ko Kadnan iyan (sa pitharo iyan): "Mataan! a sakn na kiyarompisan, na tabangi akong Ka!"

11

Na likaan Ami so manga pinto o langit ko ig, a pkhabobos;

12

Go piyakambowatan Ami so lopa sa manga bowalan; na miyakambaratmowa so ig ko sogoan a sabnar a miyadiyangka;

13

Go riyoran Ami skaniyan ko pithapi a manga papan, go manga pansar,

14

Phlatas sii ko kaylay Ami: Balas ko taw a aya btad iyan na inongkir!

15

Na sabnsabnar a inibagak Ami aya a tanda; na ba adn a phananadm?

16

Na antonaa i miyambtad o siksa Akn, go so pamakaiktiyar Akn!

17

Na sabnsabnar a libod Ami so Qor'an ko kapkhatanodi ron; na ba adn a phananadm?

18

Tomiyaplis so pagtaw a Ad, na antonaa i miyambtad o siksa Akn, go so pamakaiktiyar Akn!

19

Mataan! a Skami na biyotawanan Ami siran sa ndo, a domadagoos sii ko gawii a naas (kiran) a lomalagaday,

20

Dii niyan nggagansingn so manga manosiya lagid o ba siran manga itado a korma a miyangababadot.

21

Na antonaa i miyambtad o siksa Akn go so pamakaiktiyar Akn!

22

Na sabnsabnar a libod Ami so Qor'an ko kapkhatanodi ron: Na ba adn a phananadm?

23

Tiyaplis o pagtaw a Samod so pphamakaiktiyar.

24

Na pitharo iran: "Ba so manosiya! a pd rktano a sakataw i pagonotan tano skaniyan? Mataan! a sktano amay ka ba giyoto na titho a miyatago ko karibat, go kapamthang!

25

"Ino skaniyan i mbgi ko pananadm ko ndolondolonan tano? Kna, ka skaniyan na bokhag, a takabor!

26

Katokawan iran bo sa akir iyan, o antawaa i bokhag, a takabor!

27

Mataan! a Skami na zogo Kami sa babay a onta a tiyoba kiran; na nayawang ka siran go thigr ka!

28

Na panotholang ka kiran a: Mataan! a so ig na pimbagi kiran: Oman i zagb na sii ko alongan iyan phakadarpa.

29

Na tiyawag iran (si Qadar a) pd iran, na kinowa niyan, na biyono iyan.

30

Ah na antonaa i miyambtad o siksa Akn, go so pamaka iktiyar Akn!

31

Mataan! a Skami na biyotawanan Ami siran sa lalis a isa, na miyabaloy siran a lagid o miyarophod ko kodal.

32

Na sabnsabnar a libod Ami so Qor'an ko kapkhatanodi ron: Na ba adn a phananadm?

33

Tiyaplis o pagtaw o Lot so pphamakaiktiyar.

34

Mataan! a Skami na biyotawanan Ami siran sa ndo (a maka-aawid sa ator) inonta so taalok ko Lot: Ka siyabt Ami siran ko kakhalibabas iyan, -

35

Limo a phoon ko hadapan Ami: - lagid oto man a kambalasi Ami ko taw a miyanalamat.

36

Na sabnsabnar a piyakiiktiyaran Iyan kiran so siksa Ami, na piyamawal iran so miyamakaiktiyar.

37

Na sabnsabnar a inangay ran on so khikabobolos on (a manga malaikat); na biyota Mi so manga mata iran (na pitharo kiran) a: "Taami niyo so siksa Akn, go so pamakaiktiyar Akn."

38

Na sabnsabnar a kiyabalagaan siran ko kapitapita o siksa, a tatap:

39

"Na taami niyo so siksa Akn, go so pamakaiktiyar Akn."

40

Na sabnsabnar a libod Ami so Qor'an ko kapkhatanodi ron: Na ba adn a phananadm?

41

Na sabnsabnar a miyakaoma ko pagaw o Pir'awn so pphamakaiktiyar;

42

Na piyakambokhag iran so manga tanda Ami, sa kalangolangowan iyan; na inigandr Ami kiran so kagandr o Mabagr, a Phakagaga.

43

Ba so miyamangongkir rkano i tomo a di so miyaonaan iyo, odi na ba adn a kallpas iyo sii ko manga kitab?

44

Ino iran dii tharoa a: "Skami a madakl a matitimo i phakadaag?"

45

Khasaropt so matitimo, go khitalikhod iran so manga likod (iran).

46

Kna, ka so bangkit i diyandi kiran, ka so bangkit i lawan a margn, go lawan a mapait.

47

Mataan! a so manga sala i zisii ko karibat, go kadadag.

48

Sii ko alongan a panondaan siran ko naraka a mikakaras a manga paras iran (tharoon kiran): "Gdami niyo so kisombo ko naraka Sakar!"

49

Mataan! a Skami na so langowan taman na inadn Ami skaniyan a didiyangkaan.

50

A da ko sogoan Ami inonta na isa a lagid o saprk mata.

51

Na sabnsabnar a bininasa Mi so manga lagid iyo sa kpit: Na ba adn a phananadm?

52

Na so langowan taman a pinggolawla iran oto na zisii ko manga daptar (a pizoratan o manga malaikat):

53

Go oman i mayto, ago mala, na misosorat (ko Lawkh Makfod).

54

Mataan! a so miyamananggila, na khatago ko manga sorga, go manga lawasayg,

55

Sii ko darpa a bnar, obay o (Allah a) Dato a Phakagaga.

Total Number of Verses: 78

1

So (Allah a) Masalinggagaw!

2

I mindao ko Qor'an.

3

Inadn Iyan so manosiya,

4

Na inindao Niyan on so lalag.

5

So alongan ago so olan na sii ko itongan.

6

Na so mangngto a pndonapa, go so manga kayo na mangangalimbabaan siran (ko Masalinggagaw).

7

Na so langit na iniporo Iyan skaniyan, go inadn Iyan so timbangan,

8

Ka ang kano di khapokas ko ontol;

9

Na pakambatanga niyo so kathimbang ko kaontol, go di kano phangorang ko timbangan.

10

Na so lopa na kiyayat Iyan skaniyan sa baba a rk o manga kaadn:

11

Katatagoan sa manga onga, go manga korma, a khibobongkosan,

12

Go so manga onga a maroni, a adn a manga inoot iyan ago so mamot.

13

Na anda ko manga limo o Kadnan iyo, i pagongkirn niyo?

14

Inadn Iyan so manosiya a phoon ko botha, a gango, a lagid o kiyomba,

15

Go inadn Iyan so jinn a phoon ko kadg o apoy:

16

Na anda ko manga limo o Kadnan iyo, i pagongkirn niyo?

17

Kadnan o dowa a sbangan, go Kadnan o dowa a sdpan!

18

Na anda ko manga limo o Kadnan iyo, i pagongkirn niyo?

19

Biyotawanan Iyan so dowa a kalodan, a gii makambaratmowa:

20

Kaaltan a dowa oto sa rnding; a di makapzmbor:

21

Na anda ko manga limo o Kadnan iyo, i pagongkirn niyo?

22

Pphakagmaw a phoon sa dowa nan so manga tipay, go so manga koralis:

23

Na anda ko manga limo o Kadnan iyo, i pagongkirn niyo?

24

Na rk Iyan so pphlalatas, a miyanga-aadn ko kalodan, a lagid o manga palaw:

25

Na anda ko manga limo o Kadnan iyo, i pagongkirn niyo?

26

Oman i matatago ko lopa na khada;

27

Na aya bo a khalamba na so dhat o Kadnan ka, - a Khirk ko kabsaran, ago so kapangalimo: -

28

Na anda ko manga limo o Kadnan iyo, i pagongkirn niyo?

29

Makapphamangni Rkaniyan so zisii ko manga langit go so lopa: Oman gawii na Skaniyan na zisii ko btad Iyan!

30

Na anda ko manga limo o Kadnan iyo, i pagongkirn niyo?

31

Phamagitongn Ami skano dn, hay dowa a kappndan (a manga manosiya ago manga jinn)!

32

Na anda ko manga limo o Kadnan iyo, i pagongkirn niyo?

33

Hay kasamasama o manga jinn, go manga manosiya! O khagaga niyo a kalambasa niyo ko piphisopisokan o manga langit, go so lopa, na lambasa niyo. Di niyo malambas odi misabap sa bagr!

34

Na anda ko manga limo o Kadnan iyo, i pagongkirn niyo?

35

Mbotawanan rkano so kadg o apoy, go so bl, na di niyo dn marn:

36

Na anda ko manga limo o Kadnan iyo, i pagongkirn niyo?

37

Na amay ka maopak so langit na mbaloy a paras a obarobar, a lagid o kobal a mariga:

38

Na anda ko manga limo o Kadnan iyo, i pagongkirn niyo?

39

Na sa alongan oto na di ipagiza ko manosiya so dosa niyan, go di ipagiza ko jinn:

40

Na anda ko manga limo o Kadnan iyo, i pagongkirn niyo?

41

Makikilala so manga baradosa sabap ko manga tanda iran: Na gii nggagandrn sii ko manga ombonombonan, go so manga parapara!

42

Na anda ko manga limo o Kadnan iyo, i pagongkirn niyo?

43

Giyaya so naraka Jahannam a so phagongkirn skaniyan o manga baradosa:

44

Makapphagaloyan siran ko lt iyan go lt o phlikabo a ig, a sangat a mayaw!

45

Na anda ko manga limo o Kadnan iyo, i pagongkirn niyo?

46

Na adn a bagian o taw a inikalk iyan so kapakatindg iyan ko hadapan o Kadnan iyan, a dowa a sorga:

47

Na anda ko manga limo o Kadnan iyo, i pagongkirn niyo?

48

A romarangiran.

49

Na anda ko manga limo o Kadnan iyo, i pagongkirn niyo?

50

Katatagoan a dowa oto sa dowa a bowalan a pphamangondas.

51

Na anda ko manga limo o Kadnan iyo, i pagongkirn niyo?

52

Katatagoan a dowa oto sa mbarambarang a onga, a ndodowa soson.

53

Na anda ko manga limo o Kadnan iyo, i pagongkirn niyo?

54

Gii siran zasanda sandang ko manga igaan, a so manga didalm iyan na sotra a makapal: Na so kaphropoa ko onga o dowa a pamomolan na marani.

55

Na anda ko manga limo o Kadnan iyo, i pagongkirn niyo?

56

Katatagoan oto sa (manga bai a) manga thatangka i kaylay, a da a miyakabatal kiran a manosiya ko onaan o manga karoma iran, antawaa jinn.

57

Na anda ko manga limo o Kadnan iyo, i pagongkirn niyo?

58

Lagid oba siran montiya a Yaakot, go Marjan.

59

Na anda ko manga limo o Kadnan iyo, i pagongkirn niyo?

60

Ba adn a imbalas ko kaphiyapiya a rowar ko kaphiyapiya?

61

Na anda ko manga limo o Kadnan iyo, i pagongkirn niyo?

62

Na adn a salakaw roo pn a dowaa sorga.

63

Na anda ko manga limo o Kadnan iyo, i pagongkirn niyo?

64

Miyagadogadong a dowa oto.

65

Na anda ko manga limo o Kadnan iyo, i pagongkirn niyo?

66

Katatagoan a dowa oto sa dowa a bowalan, a mipapantos.

67

Na anda ko manga limo o Kadnan iyo, i pagongkirn niyo?

68

Katatagoan a dowa oto sa manga onga, go korma, go dalima.

69

Na anda ko manga limo o Kadnan iyo, i pagongkirn niyo?

70

Katatagoan oto sa (manga bai a) manga pipiya (i parangay), a manga tataid.

71

Na anda ko manga limo o Kadnan iyo, i pagongkirn niyo?

72

A manga lalano, a khigigibonn ko manga lamin,

73

Na anda ko manga limo o Kadnan iyo, i pagongkirn niyo?

74

Daa miyakabatal kiran a manosiya, ko onaan o manga karoma iran antawaa jinn.

75

Na anda ko manga limo o Kadnan iyo, i pagongkirn niyo?

76

Gii siran zasanda sandang ko manga ontoda, a gadong, go manga paramadali, a manga tatanos.

77

Na anda ko manga limo o Kadnan iyo, i pagongkirn niyo?

78

Maporo so ngaran o Kadnan ka, a Khirk ko kabsaran, ago so kapangalimo!

Total Number of Verses: 96

1

Amay ka makatana so phakatana (a so alongan a qiyamah), -

2

Da ko kapakatana iyan i maka ongkir on, -

3

Phakarondann Iyan (so sabaad), phakaombawn Iyan (so sabaad);

4

Amay ka linogn so lopa sa linog a samporna,

5

Go mazaropt so manga palaw sa samporna a kazaropt,

6

Na mbaloy a lopapk, a mikakayambr,

7

Go mbaloy kano a tlo ka dinis:

8

Na so manga taw sa kawanan; - na antonaa i manga taw sa kawanan?

9

Go so manga taw sa diwang, - na antonaa i manga taw sa diwang?

10

Go so miyangaoona (ko paratiyaya) na phangaoona (ko sorga):

11

Na siran man i manga rarani (ko Allah),

12

A khatago ko manga sorga, a pakalma:

13

Madakl a pd on ko miyangaoona,

14

Na mayto a pd on ko miyanga oori;

15

Khidadarpa ko manga kantir, a piyamarabowatan,

16

Gii siran roo zasandasandang, a khipagaadapadapa.

17

Ipphagilid kiran o manga wata a tatap a manga kangodaan,

18

So manga baso, go manga kndi, go so khitatagoan sa inomn a phoon ko bowalan,

19

Di ron zakit a olo iran, go di siran on khabrg,

20

Go manga onga, a pd ko matotomo iran,

21

Go sapo a manga papanok a pd ko pkhababayaan iran;

22

Go so (manga bai a) manga tataid, a manga pipiya i kapmata,

23

Manga izan o manga montiya, a totongkopn;

24

Balas ko pinggolawla iran (a mapiya).

25

Daa khan'g iran roo a ilang, go da a kambaradosa,

26

Inonta so katharo a "salaam, kalilintad."

27

Na so manga taw sa kawanan; - antonaa i manga taw sa kawanan?

28

Khatago siran ko kayo a Sidr a disorokn,

29

Go manga saging, a manga titiyolig,

30

Go kasisirongan a tatap,

31

Go ig a mabobobos,

32

Go manga onga a madakl,

33

Dikharintas go da a rn iyan,

34

Go manga igaan a manga poporo.

35

Mataan! a Skami na pagadnn Ami siran (a manga bai ko sorga) sa bago a kapangadn,

36

Na mbalowin Ami siran a manga raga,

37

A manga sasalinggagaw, a mrzarza,

38

A bagian o manga taw sa kawanan.

39

Madakl a pd on ko miyangaoona,

40

Go madakl a pd on ko miyangaoori.

41

Na so manga taw sa diwang; - antonaa i manga taw sa diwang?

42

Khatago ko mayaw, go phlikabo a ig,

43

Go along, a bl a maytm,

44

Di pakarnggay, go di mapiya,

45

Mataan a siran na aya btad iran ko onaan oto na khikasosonor,

46

Go aya btad iran na lalalayonn iran so dosa a mala,

47

Go aya btad iran na gi iran tharoon: "Ino amay ka matay kami, go mbaloy kami a botha, go manga tolan, ba mataan! a khawyag kami dn (zaroman)?"

48

"Go so manga loks ami a miyangaoona?"

49

Tharoang ka: "Mataan! a so miyangaoona, go so miyangaoori,"

50

"Na plimodn siran dn ko kapthatalabokaan ko alongan a mappnto;"

51

"Oriyan iyan na mataan! a skano hay mithataridadag! - a miyamanaplis, -

52

"Na phakakan kano dn ko kayo a Zaqqom,"

53

"Na mapnopno iyo ron so manga tiyan iyo;"

54

"Na misondok iyo ron so phlikabo a ig."

55

"Na makainom kano sa kainom a manga onta a pkhawaw!"

56

Giyaya i talagad kiran ko gawii a kapamalas!

57

Skami i miyadn rkano; na ba kano di phangimbnar?

58

Ay gda iyo ko pkhawdod iyo (ko manga rahim o manga babay)?

59

Ba skano i phagadn on, antawaa Skami i Pphangadn?

60

Skami i dominiyangka rkano ko kapatay, na di Kami niyo khapalagoyan,

61

Ko kazambi Ami sa manga lagid iyo, go so kaphagadna Mi rkano ko nganin a di niyo katawan.

62

Na sabnsabnar a kiyatokawan iyo so kiyapangadn a paganay; na ba niyo di khatadmi?

63

Ay gda iyo ko ipzawd iyo?

64

Ba skano i pphamakalonaw ron, antawaa Skami i pphamakalonaw ron?

65

O kabaya Ami na mataan a khabaloy Ami skaniyan a pols, na mabaloy kano a pphammsa kano,

66

(Gii niyo matharo:) "Mataan! a skami na ba kami dn miyakambayadan!"

67

"Kna, ka skami na piyapas rkami (so riskhi)."

68

Ay gda iyo ko ig a so phaginomn iyo?

69

Ba skano i pphamakatoron on a phoon ko manga gabon, antawaa Skami i pphamakatoron on?

70

O kabaya Ami, na khabaloy Ami skaniyan a mapld; na ino kano di phanalamat?

71

Ay gda iyo ko apoy a so mapphakagmaw niyo?

72

Ba skano i miyakatho ko kayo niyan, antawaa Skami i miyamakatho on?

73

Skami na biyaloy Ami skaniyan a pananadm, go kapnggonaan khitatanaw.

74

Na phoroporo on ka so ngaran o Kadnan ka a Mala!

75

Na pzapa Ako dn sa ibt ko manga darpa o manga bitoon,

76

Na mataan aya a titho a kazapa o katawi niyo a lbi a mala,

77

Mataan! a skaniyan na titho a Qor'an, a pagaadatan,

78

Zisii ko daptar a pagoongowan (a so Lawkh Mahfod).

79

Daa phakaskho on inonta so miyanga sosoti;

80

Initoron a phoon ko Kadnan o manga kaadn.

81

Antonaa i sabap a giya ungkai a tothol na skano na pakaiitoon iyo,

82

Go pmbalowin iyo so pagpr rkano a mataan! a skano na phagongkirn niyo?

83

Na ino igira a miyakasampay (so niyawa) ko bakrng,

84

A skano sa masa oto na pkhailay niyo,

85

Go Skami i lbi a marani ron a di skano, - na ogaid na di niyo khaylay,

86

Na o skano na di kano khabalasan,

87

Na ino niyo to di maphakakasoy, o skano i manga bnar?

88

Na amay ka aya btad iyan na pd ko phamakaranin (ko sorga),

89

Na (rk iyan) so kapakadkha, go pagpr, go sorga, a pakalma.

90

Na amay ka aya btad iyan na pd ko manga taw sa kawanan,

91

Na (tharoon on:) "Salaam a bagian ka a pd ko manga taw sa kawanan."

92

Na amay ka aya btad iyan na sii pd ko miyamanaplis, a mithataridadag,

93

Na talagad on so phlikabo a ig,

94

Go phagbong ko naraka Jahim.

95

Mataan! a giyaya na titho a skaniyan so bnar a matatangkd.

96

Na phoroporo on ka so ngaran o Kadnan ka, a Lbi-a-mala.

Total Number of Verses: 29

1

Pthasbik ko Allah so zisii ko manga langit ago so lopa; go Skaniyan so Mabagr, a Mawngangn.

2

Rk Iyan so kapaar ko manga langit go so lopa: Pphangoyag go Pphangimatay; go Skaniyan sii ko langowan taman na Gaos Iyan.

3

Skaniyan i Pagampaganay go Moripori, go Mapayag go Masoln; go Skaniyan sii ko langowan taman na katawan Iyan.

4

Skaniyan so miyadn ko manga langit go so lopa sii ko nm alongan; oriyan iyan na lominiyawaw ko aras a samporna a kaliyawaw ko domadait on: Katawan Iyan so pphakasold ko lopa, go so pphakaliyo a phoon rkaniyan, go so pphakatoron a phoon ko langit, go so pphakapanik on; go Skaniyan na pd iyo apiya anda kano matatago. Na so Allah na so gii niyo nggolawlaan na phagilayn Iyan.

5

Rk Iyan so kapaar ko manga langit go so lopa: Na sii bo ko Allah phakandoda so langowan taman a pkhawlawla.

6

Pphakasoldn Iyan so kagagawii ko dawndaw, go pphakasoldn Iyan so dawndaw ko gagawii. Na Skaniyan i Matao ko zisii ko manga rarb (a manga pamikiran).

7

Paratiyayaa niyo so Allah go so sogo Iyan, go pammgay kano ko biyaloy kano Niyan on a miyamakasambi; na so miyamaratiyaya a pd rkano go miyammgay siran, na adn a bagian iran a balas a lbi a mala.

8

Na antonaa i bangn iyo sa di niyo kapharatiyayaa ko Allah? A so Rasol na pthawagn kano niyan, ka an iyo maparatiyaya so Kadnan iyo, a sabnar a miyatarima Iyan so diyandi iyo, o skano na khipaparatiyaya.

9

Skaniyan so initoron Iyan ko oripn Iyan so manga ayat a manga rarayag, ka ang kano Niyan mapakaawa phoon ko manga lilibotng a makasong kano ko maliwanag. Na mataan! a so Allah na mala rkano i gagaw, a Makalimoon.

10

Na antonaa i bangn iyo sa di niyo kaphammgay sa lalan ko Allah? - a rk o Allah so paninggalan ko manga langit ago so lopa. Da a phakatimbang rkano ko taw a miyammgay, ko dapn so kapakadaag, go miyakimbonoay. Siran man i mala i daradat a di so siran a miyammgay ko oriyan iyan; go miyakimbonoay siran. Na oman i isa kiran na inidiyandi on o Allah so mapiya. Na so Allah na so gii niyo nggolawlaan na Kaip Iyan.

11

Antawa aya i phagotang ko Allah sa otang a mapiya? ka an Iyan on mathaktakp, go adn a bagian iyan a balas a mapiya.

12

Sii ko alongan a maylaing ka so miyamaratiyaya a manga mama, go so miyamaratiyaya a manga babay, - a somisindaw so tihaya iran ko hadapan iran go sii ko kawanan iran (ptharoon kiran:) "Tothol rkano a mapiya sa alongan nai: So manga sorga a pphamangondas ko kababaan iyan so manga lawasayg, kakal kano ron! Giyoto man na skaniyan so daag a lbi a mala!"

13

Alongan a tharoon o manga monapik a manga mama, go so manga monapik a manga babay ko siran a miyamaratiyaya: "Nayawa kami niyo, ka ang kami makakowa sa maliwanag ko tihaya niyo!" adn a tharo: "Kasoy kano ko talikhodan iyo, na ploloba kano sa tihaya!" Na katagoan so lt iran sa kota a adn a pinto iyan, so sold iyan na madadalm on so limo, na so liyo niyan na mapapantag skaniyan o siksa!

14

Tawagn iran siran: "Ba kami niyo di manga pd?" Ismbag iran: "Oway; na ogaid na bininasa niyo so manga ginawa niyo, go mithidaraan kano, go mizangka kano, go miyalimpang kano o manga ongaya taman sa miyakaoma so sogoan o Allah; go miyalimpang kano makapantag ko Allah o palilimpang (a shaytan)."

15

"Na sa alongan nai na da a khatarima a phoon rkano a saliyo o ginawa, odi na phoon ko siran a miyamangongkir. Aya darpa iyo na so naraka: Giyoto i patot rkano. Na miyakaratarata a khabolosan!"

16

Ba da makawma so masa ko siran a miyamaratiyaya a kapakambayorantang o manga poso iran ko tadm ko Allah go so miyakatoron a bnar, ka an siran di khabaloy a lagid o siran a piyamgan ko kitab gowani, na miyakalayat kiran so masa na tomigas so manga poso iran, go madakl kiran a manga songklid.

17

Tangkda niyo a mataan! a so Allah i phagoyag ko lopa ko oriyan o kapatay niyan. Sabnar a piyakarayag Ami rkano so manga tanda, ka an iyo sabota.

18

Mataan! a so manga barasadka, a manga mama, go so manga barasadka, a manga babay, go piyagotangan iran so Allah sa otang a mapiya, na pthaktakpn kiran, go adn a bagian iran a balas a mapiya.

19

Na so miyamaratiyaya ko Allah go so manga sogo Iyan, na siran man na siran so mithotomangkd; go manga saksi sii ko Kadnan iran, na adn a bagian iran a balas kiran go sindaw iran. Na so miyamangongkir go piyakambokhag iran so manga ayat Ami, na siran man i manga taw ko naraka Jahim.

20

Tangkda niyo a so kawyagoyag ko doniya na matag katmbangan, go karimbaran, go kapangangarig, go kambantogan ko ltlt iyo, go kapamagindiga sa kadakl i manga tamok go manga wata. Lagid o oran, a miyasoat so taribasok o piyakato iyan, oriyan iyan na mrorang na maylaing ka skaniyan a makabinaning, oriyan iyan na mabaloy a rarag. Na zisii ko akhirat so siksa a sangat, go so maap a phoon ko Allah go kasosoat. Na da ko kawyagoyag ko doniya inonta na matag sagad a kapipiya a ginawa, a phakalimpang.

21

Pagoradorad kano ko maap a phoon ko Kadnan iyo, go so sorga a aya kablang iyan na lagid o kablang o langit go so lopa, a inithiyagar ko siran a miyamaratiyaya ko Allah go so manga sogo Iyan: Giyoto man so kakawasaan o Allah, a imbgay Niyan oto ko taw a kabaya Iyan: Na so Allah i Khirk ko kakawasaan a lbi a mala.

22

Daa khisogat a tiyoba ko lopa, odi na sii ko manga ginawa niyo a ba di matatago ko daptar ko da Ami ron pn kaadna: - mataan! a giyoto sii ko Allah na malbod,

23

Ka an iyo di mipmboko so miyada rkano, go an iyo di mipzonor so inibgay Niyan rkano. Na so Allah na di Niyan khabayaan so oman i takabor, a tangandag, -

24

A siran na manga liligt, go ipzogo iran ko manga manosiya so kapligt. Na sa taw a tomalikhod, na mataan! a so Allah na Skaniyan so Kawasa a Pphodin.

25

Sabnsabnar a siyogo Ami so manga sogo Ami a rakhs o manga rarayag a karina, go piyakatoron Ami a babid iran so kitab, go so timbangan, ka an mapakatindg o manga manosiya so kaontol; go inadn Ami so potaw a kadadalman sa bagr, a mala, go manga gona a rk o manga manosiya, go an mapnto o Allah so taw a thabang Rkaniyan go so manga sogo Iyan sii ko kisosoln iyan. Mataan! a so Allah na Mabagr, a Domadaag.

26

Na sabnsabnar a siyogo Ami so Noh go so Ibrahim, go inisnggay Ami sii ko manga moriyataw iran so kananabii go so kitab. Na adn a pd kiran a komkdg ko ontol; go madakl kiran a manga songklid.

27

Oriyan iyan na piyakitondog Ami so manga lakaw iran ko manga sogo Ami; go piya kitondog Ami ko Eysa a wata o Maryam, go inibgay Ami rkaniyan so Injil, go tiyagoan Ami so manga poso o siran a miyamangonot rkaniyan sa ranon, go limo, go kasibay a pimbago iran oto, a da Ami kiran paliyogatn, ogaid na singanin ko kasosoat o Allah; na da iran oto paliharaa ko titho a kapaliharaa on. Na inibgay Ami ko siran a miyamaratiyaya a pd kiran so balas kiran; na madakl kiran a manga songklid.

28

Hay so miyamaratiyaya, kalkn iyo so Allah, go paratiyayaa niyo so sogo Iyan; ka bgang kano Niyan sa takp ko limo Iyan, go snggayan kano Niyan sa sindaw a milalakaw niyo skaniyan go napiyan kano Niyan: Na so Allah na Manapi, a Makalimoon:

29

Kaan katokawi o tiyoronan ko kitab a da a kapaar iran a mayto bo ko kakawasaan o Allah, ka mataan! a so kakawasaan na sii sa tangan o Allah, imbgay Niyan oto ko taw a kabaya Iyan. Na so Allah i Khirk ko kakawasaan a lbi a mala.

Part 28

Total Number of Verses: 22

1

Sabnar a miyan'g o Allah so katharo o (babay a) pphamawalng ka niyan makapantag ko karoma niyan, go gii phanon ko Allah. Na so Allah na pkhan'g Iyan so gii niyo kazinmbaga: Mataan! a so Allah na Pphakan'g, a Pphakaylay.

2

Siran a pd rkano a ipphangingiring iran ko manga likod o manga ina iran so manga karoma iran, na kna a ba siran i manga ina iran: da a manga ina iran inonta so mimbabawata kiran; na mataan! a siran na titho a gii siran tharo sa marzik a katharo go kabokhag. Na mataan! a so Allah na tanto a Malai-maap, a Manapi.

3

Na so ipphangingiring iran ko manga likod o manga ina iran so manga karoma iran, oriyan iyan na ipagndod iran so miyatharo iran, na makapmaradika sa isa a oripn ko da iran pn kapakaprorada. Giyoto man na ipphangthoma rkano to. Na so Allah na so gii niyo nggolawlaan na Kaip Iyan.

4

Na sa taw a di makatoon (sa mapmaradika iyan, na paliyogat on) so kaphowasa sa dowa olan sa di marintas ko di iran pn kapakaprorada. Na sa taw a di phakabaog, na so kapakakana ko nm polo a miskin. Giyoto dn man, ka an iyo maparatiyaya so Allah go so sogo Iyan. Na giyoto man i manga taman o Allah. Na adn a bagian o miyamangongkir a siksa a malipds.

5

Mataan! a siran a sosorangn iran so Allah go so sogo Iyan, na phakadapanasn siran sa lagid o kiyapakadapanasa ko miyaonaan iran. Na sabnar a piyakatoron Ami so manga ayat a manga rarayag. Na adn a bagian o miyamangongkir a siksa, a phakahina,

6

Sii ko alongan a kawyaga kiran o Allah langon, na panotholn Iyan kiran so pinggolawla iran. Tatanodan oto o Allah, na piyakalipatan iran oto. Na so Allah i saksi ko langowan taman.

7

Bang ka di katawi a mataan! a so Allah na katawan Iyan so zisii ko manga langit ago so zisii ko lopa? da a khabaloy a bitiyara o tlo a ba di Skaniyan i ika pat iran, - o di na lima a ba di Skaniyan i ikanm iran, - odi na kakorangan oto, antawaa makadakl, a ba di Skaniyan i pd iran apiya anda siran matago, oriyan iyan na panotholn Iyan kiran so pinggolawla iran, ko alongan a qiyamah. Mataan! a so Allah i Matao ko langowan taman.

8

Ay gda a ka ko siran a inisapar kiran so kakhokoroya, oriyan iyan na gi iran mbalinganan so inisapar kiran skaniyan? Go gi iran khokoroyaan so dosa, go so rido, go so kasasangkaa ko Rasol. Na igira a miyakaoma siran rka na ipzalam iran rka so da rka oto salamn o Allah, go gi iran tharoon sii ko manga ginawa iran a: "Ino a di rktano bo iziksa o Allah so gii tano tharoon?" Kiyatangkaan siran ko naraka Jahannam; a phamakasold siran on. Na miyakaratarata a khabolosan!

9

Hay so miyamaratiyaya, igira a pmbibitiyarai kano, na di niyo pmbibitiyarai so dosa, go so rido, go so kasangkaa ko Rasol, na aya mbibitiyarai niyo na so kaphiyapiya, go so kapananggila. Na kalkn iyo so Allah, a so sii Rkaniyan i plimodan rkano.

10

So kakhokoroya (a marata) na sii bo phoon ko shaytan, ka an iyan mapakamboko so miyamaratiyaya. Na da a khibinasa niyan kiran a mayto bo inonta o sabap ko idin o Allah. Na so bo so Allah i sarigi o miyamaratiyaya.

11

Hay so miyamaratiyaya! igira a pitharo rkano, a ploaloag kano ko manga darpa, na ploaloag kano, ka loagang kano o Allah. Na igira a adn a mitharo sa ozor kano, na ozor kano; ka iphoro o Allah so miyamaratiyaya, a pd rkano, go (iphoro Iyan) so piyamgan ko katao, sa phipira pangkat. Na so Allah na so gii niyo nggolawlaan na Kaip Iyan.

12

Hay so miymaratiyaya, igira a ipmbitiyarai niyo so Rasol, na onaan iyo ko dapn so bitiyara niyo so sadka. Giyoto man i mapiya rkano go lbi a phakasoti. Na o da a khatoon iyo na mataan! a so Allah na Manapi, a Makalimoon.

13

Ba niyo inikalk a kiyonaan iyo ko da pn so bitiyara niyo ko manga sadka? Na gowani a da niyo nggolawlaa, go piyakatawbat kano o Allah, na pamayandgn iyo so sambayang, go tonaya niyo so zakat, go onoti niyo so Allah ago so sogo Iyan. Na so Allah na Kaip Iyan so gii niyo nggolawlaan.

14

Bang ka da maylay so kinowa iran a manga panarigan so pagtaw a kiyararangitan siran o Allah? Di siran rkano pd go di siran kiran pd, go gii siran zapa sa kabokhag, a siran na katawan iran.

15

Pithiyagaran o Allah so bagian iran sa siksa a sangat. Mataan! a siran na miyakaratarata so pinggolawla iran.

16

Pimbaalan iran so manga sapa iran a lindonga, ka an siran pphakaalang ko lalan ko Allah, na adn a bagian iran a siksa a phakahina.

17

Dadn a milinding kiran o manga tamok iran, go so manga wata iran ko (siksa o) Allah a mayto bo. Siran man i manga taw ko naraka, siran na ron siran on dn makakakal!

18

Sii ko alongan a kawyaga kiran o Allah langon, na pzapa siran on sa lagid odi iran rkano kazapa: Ka aya tarima iran na mataan! a siran na sii ko shay' (a phakabgay sa gona). Ba di mataan! a siran na siran na manga bokhag?

19

Minipaar siran o shaytan, na piyakilipatan iyan kiran so tadm ko Allah: Siran man i tampil ko shaytan. Ba di mataan! a so tampil ko shaytan na siran i manga logi?

20

Mataan! a so khisosorang ko Allah ago so sogo Iyan na siran man i pd ko lbi a manga bababa.

21

Inisorat o Allah a: "Mataan a phakadaag Ako dn, Sakn ago so manga sogo Akn. Mataan! a so Allah na Mabagr, a Domadaag."

22

Daa khatoon ka a pagtaw a paparatiyayaan iran so Allah ago so alongan a mawri a ba iran pkhababayai so taw a siyorang iyan so Allah ago so sogo Iyan, apiya pn siran na manga loks siran, odi na manga wata iran, odi na manga pagari ran, odi na manga tonganay ran. Siran man na inisorat Iyan ko manga poso iran so paratiyaya, go inibagr Iyan kiran so limo a phoon Rkaniyan; go phakasoldn Iyan siran ko manga sorga a pphamangondas ko kababaan iyan so manga lawasayg, makakakal siran on. Miyasoat kiran so Allah, go miyasoat siran Rkaniyan. Siran man i tampil ko Allah; ba di mataan! a so tampil ko Allah; na siran i phamakadaag?

Total Number of Verses: 24

1

Pthasbik ko Allah so nganin a zisii ko manga langit go so zisii ko lopa; go Skaniyan so Mabagr, a Mawngangn.

2

Skaniyan so piyakaawa Iyan so miyamangongkir a pd ko tiyoronan ko kitab phoon ko manga darpa iran, sii ko paganay a kalimod. Da niyo tarimaa o ba siran makaawa: Na aya tarima iran na mataan! a siran na kharn siran o manga kota iran phoon ko (siksa o) Allah, na miyatalingoma siran o (sogoan o) Allah sa di iran mapipikir, go inipansir Iyan ko manga poso iran so kalk, na iningggba iran ko manga walay ran so manga lima iran, go so manga lima o miyamaratiyaya, na kowaa niyo a thoma, hay adn a manga kaylay niyan!

3

Na o da kiran kokomn o Allah so kaawa, na mataan a ziksaan Iyan siran ko doniya; go bagian iran sii ko akhirat so siksa ko naraka.

4

Giyoto man na sabap ko mataan! a siran na siyorang iran so Allah go so sogo Iyan: Na sa taw a sorangn iyan so Allah, na mataan! a so Allah na Mayloti-kapaniksa.

5

Sadn sa piyata iyo a korma odi na giyanatan iyo to a khipakatitindg, ko manga itado niyan, na sabap sa idin o Allah, go an Iyan mapakarondan so manga songklid.

6

Na so piyakitaban o Allah ko Sogo Iyan a phoon kiran, - na da niyo to kapakiprondai sa koda, odi na onta: Na ogaid na so Allah na pakiphangarasiyan Iyan ko manga sogo Iyan so taw a kabaya Iyan: Na so Allah sii ko langowan taman na Gaos Iyan.

7

So piyakitaban o Allah ko Sogo Iyan a phoon ko taw ko manga ingd, na rk o Allah, go rk o Rasol, go rk o manga dadasg o Rasol, go so manga wata a ilo, go so manga miskin, go so miyakaalang sa lalan, ka an di khabaloy a mipthotogalin ko lt o manga kawasa rkano. Na sadn sa inibgay rkano o Rasol, na kowaa niyo skaniyan, go sadn sa inisapar iyan rkano skaniyan na gnkn iyo. Na kalkn iyo so Allah. Mataan! a so Allah na Mayloti-kapaniksa.

8

Rk o pkhakamrmran a miyamagoyag, a so piyamogaw siran ko manga darpa iran, go so manga tamok iran, a pphloloba siran sa gagaw a phoon ko Allah, go kasosoat, go pthabangan iran so (agama o) Allah go so sogo Iyan: Siran man na siran i mimamataan;

9

Go so khitatakna ko ingd, go so paratiyaya a miyaonaan iran, na pkhababayaan iran so miyamagoyag kiran, go da a khatoon iran ko manga rarb iran a siig phoon ko inipamgay kiran, go inilawan iran ko manga ginawa iran, apiya pn adn a zisii kiran a kamiskin. Na sa taw a ipilak iyan so kaligt o ginawa niyan, na siran man na siran i phamakaslang sa maliwanag;

10

Go so miyamakawma ko oriyan iran, na gi iran tharoon: "Kadnan ami, napii kaming Ka, ago so manga pagari ami a so kiyawna an kami ran ko paratiyaya, go ding Ka thagoi so manga poso ami sa siig ko siran a miyamaratiyaya. Kadnan ami, mataan! a Ska i Malai-gagaw, a Makalimoon."

11

Bang ka da maylay so siran a miyamanangin? Gi iran tharoon ko manga pagari ran a so miyamangongkir a pd ko tiyoronan ko kitab a: "Ibt o pakaawa a kano na mataan a pd kami niyo dn a magawa, go da a pagonotan ami a sorang rkano a isa bo sa dayon sa dayon, go o phamonoa kano na mataan a tabangan ami skano dn". Na so Allah na zasaksian Iyan a mataan! a siran na titho a manga bokhag.

12

Mataan a o pakaawaa siran na di siran bo pd a magawa, go mataan a o pamonoa siran na di iran siran bo thabangan, go mataan a apiya tabangan iran siran na mataan a ithalikhod iran bo so manga likod iran, oriyan iyan na di siran katabangan.

13

Mataan a skano i lbi a ipkhalk iran sii ko manga rarb iran, a di so Allah, giyoto man na sabap sa mataan! a siran na pagtaw a di phamanabot.

14

Di siran rkano makipmbonoay, sa ba siran matataayon, inonta o sii ko manga ingd a khikokotaan, odi na sii ko kaaltan sa manga tambak. So gi iran kambobono ko ltlt iran na mitataralo. Arangan ka kiran na matataayon, a so manga poso iran na masasagomparak: Giyoto man na sabap ko mataan! a siran na pagtaw a di phamanabot.

15

Lagid o siran a miyaonaan iran sa marani, kiyataaman iran so karata o olawla iran; go adn a bagian iran a siksa a malipds.

16

Izan o shaytan gowani a tharoon iyan ko manosiya a: "Ongkir ka, na kagiya a makaongkir na pitharo iyan a: 'Mataan! a sakn na angiyas ako rka; mataan! a sakn na i ikhalk akn so Allah, a Kadnan o manga kaadn'!"

17

Na miyabaloy so khaakiran sa dowa oto a mataan! a siran na khatago ko naraka, a makakakal siran on. Na giyoto man i balas ko manga darowaka.

18

Hay so miyamaratiyaya, kalkn iyo so Allah; go pamimikirana o ginawa so miniona niyan a rk o gawii a phakasambi. Na kalkn iyo so Allah, mataan! a so Allah na Kaip Iyan so gii niyo nggolawlaan.

19

Na di niyo zowaa so piyakalipatan iran so Allah, na piyakilipatan iyan kiran so manga ginawa iran. Siran man na siran so manga songklid!

20

Di magizan so manga taw ko naraka ago so manga taw ko sorga. So manga taw ko sorga na siran i miyamakaslang sa maliwanag.

21

O initoron Ami angkai a Qor'an ko palaw, na maylaing ka dn skaniyan a makapangalimbabaan, a manga bbngkag, phoon sa kalk ko Allah. Na giyoto man so manga ibarat a phagmbaalan Ami skaniyan ko manga manosiya, ka an siran makapphamimikiran.

22

Skaniyan so Allah, so da a tohan inonta Skaniyan; katawan Iyan so gaib ago so mapayag; Skaniyan so Masalinggagaw, a Makalimoon.

23

Skaniyan so Allah, so da a tohan inonta Skaniyan, a Phapaar, a Soti, a Pphamgay sa kalilintad, a Pphamgay sa kasasarig, a Masiyap, a Domadaag, a Mamndg, a Diyaitan o kala. Soti so Allah mawatan ko ipphanakoto iran!

24

Skaniyan so Allah, a Pphangadn, a Giimbaas a Giimbontal; rk Iyan so manga ngaran a manga pipiya: Pthasbik Rkaniyan so nganin a zisii ko manga langit ago so lopa; go Skaniyan so Mabagr, a Mawngangn.

Total Number of Verses: 13

1

Hay so miyamaratiyaya, di niyo khowaa so ridoay Akn, go ridoay niyo a manga panarigan, a isampay niyo kiran so kapakingginawai, a sabnar a inongkir iran so miyakaoma rkano a bnar, phakaawaan iran so Rasol ago skano, ka kagiya a paparatiyayaan niyo so Allah, a Kadnan iyo; o skano sa kiyaliyo niyo na panagontaman ko lalan Akn, go kaploba ko kasosoat Akn; pphagmaan iyo a gii niyo kiran kingginawain, a Sakn na katawang Ko so piyagma iyo go so piyayag iyo. Na sa taw a nggolawla rkano saya, na sabnar a miyapokas ko ontol a lalan.

2

O kadaobi iran, na pmbaloy siran a manga ridoay niyo, go pphapangonotan iran rkano so manga barokan iran, go so manga dila iran ko marata, go miyandingandingan iran a oba kano bo pagongkir.

3

Di rkano dn phakanggay a gona so manga tonganay niyo, go so manga wata iyo; sii ko alongan a qiyamah: Na pakapmblablagn kano Niyan. Na so Allah na so gii niyo nggolawlaan na phagilayn Iyan,

4

Sabnar a adn a bagian iyo a ladiyawan a mapiya sii ko Ibrahim, go so manga pd iyan, gowani a tharoon iran ko pagtaw iran a: "Mataan! a skami na angiyas kami rkano, go so pzimbaan iyo a salakaw ko Allah; inongkir ami skano; go miyapayag ko lt ami ago so lt iyo so rido go so rarangit, sa dayon sa dayon, taman sa di niyo paratiyayaan so Allah a Isaysa Skaniyan" inonta so katharo o Ibrahim ki ama iyan: "Mataan a ipangni akn ska dn sa maap, na da a kapaar akn a mapmbagian ka a phoon ko Allah a mayto bo" - "Kadnan ami, Ska bo i siyarigan ami, go sii kami Rka bo pmbalingan, go sii Rka so khabolosan."

5

"Kadnan ami, di kaming Ka mbaloya a pangangarasiyan o siran a miyamangongkir, go maapi kaming Ka, Kadnan ami, mataan! a Ska na Ska so Mabagr, a Mawngangn."

6

Sabnsabnar a miyabaloy rkano siran a ladiyawan a mapiya, a rk o taw a aya btad iyan na ikaalk iyan so Allah, ago so alongan a mawri. Na sa taw a tomalikhod, na mataan! a so Allah na Skaniyan i Kawasa a Pphodin:

7

Matatangkd a so Allah na mbalowin Iyan ko lt iyo ago so lt o siran a minipridoay niyo kiran, so kanggiginawai. Na so Allah na Gaos. Na so Allah na Manapi, a Makalimoon.

8

Da rkano saparn o Allah so siran a da siran rkano pakimbonoay makapantag ko agama, go da kano iran bogawa ko manga darpa iyo, ko kaphiyapiya i niyo kiran, go so kapaginontolani niyo kiran. Mataan! a so Allah na pkhababayaan Iyan so manga oontol.

9

Aya bo a isasapar rkano o Allah na so siran a miyakimbonoay siran rkano, makapantag ko agama, go biyogaw kano iran ko manga darpa iyo, go piyamagogopaan iran a kapakaawa iyo, oba niyo siran panarigi. Na sa taw a manarig kiran, na siran man i manga darowaka.

10

Hay so miyamaratiyaya, igira a miyakaoma rkano so miyamaratiyaya a manga babay a miyamanogalin, na amadi niyo siran; so Allah na katawan Iyan so paratiyaya iran: Na o katokawi niyo siran a (titho a) miyamaratiyaya, na di niyo siran phakakasoya ko manga kapir. Di siran khapakay ko siran (a manga kapir), go di siran khapakay (a manga kapir) ko siran (a miyamaratiyaya a manga babay). Na bgan iyo kiran so miyanggasto iran (a mahar). Na da a dosa niyo ko kapangaromaa niyo kiran igira a minibgay niyo kiran so manga mahar iran. Na di niyo kakapti so kakakaromai ko manga kapir a manga babay; go skata niyo so minibtang iyo; go skata iran so minibtang iran. Giyoto man i kokoman o Allah a iphkhokom Iyan rkano. Na so Allah na Matao, a Mawngangn.

11

Na o adn a mada rkano a isa ko manga karoma niyo a magagaw ko manga kapir, na go kano makataban, na bgan iyo ko siran a miyawa so manga karoma iran so lagid o minibtang iran. Na kalkn iyo so Allah a so Skaniyan i paparatiyayaan iyo.

12

Hay Nabi, igira a miyakaoma rka so miyamaratiyaya a manga babay a makipphasada siran rka sa di iran izakoto so Allah sa mayto bo, go di siran pzina, go di iran mbono on so manga wata iran, go di siran pnggolawla sa kabokhag, a khitmpo iran oto ko lt o manga lima iran ago so manga ai ran, go di ka iran sangkaan ko ontol, na pakiphasada ka kiran go pangnin ka siran sa maap ko Allah. Mataan! a so Allah na Manapi, a Makalimoon.

13

Hay so miyamaratiyaya, di kano phanarig ko pagtaw a kiyararangitan siran o Allah, a sabnar a kiyadaan siran sa panginam ko akhirat, lagid o kiyadai sa panginam ko manga kapir a pd ko manga taw ko manga kobor.

Total Number of Verses: 14

1

Pthasbik ko Allah so nganin a zisii ko manga langit ago so zisii ko lopa: Go Skaniyan so Mabagr, a Mawngangn.

2

Hay so miyamaratiyaya, ino niyo gii tharoa so di niyo bo pnggolawlaan?

3

Miyakala a rarangit a phoon ko Allah sa gii niyo katharoa ko di niyo bo pnggolawlaan.

4

Mataan! a so Allah na pkhababayaan Iyan so gii siran makimbonoay sii ko lalan Rkaniyan a zisinnday; miyakaibarat siran ko kambalay a piyakanddkta.

5

Na goani na pitharo o Mosa ko pagtaw niyan: "Hay pagtaw akn, ino ako niyo dii ziyantaa, a sabnar a katawan iyo a mataan! a sakn na sogo o Allah sii rkano?" Na kagiya a sominilay siran, na piyakasilay o Allah so manga poso iran. Na so Allah na di Niyan thoroon so pagtaw a manga songklid.

6

Na gowani na pitharo o Eysa a wata o Maryam: "Hay manga moriyataw o Israil, mataan! a sakn na sogo o Allah sii rkano, a tomatanto ko miyaonaan ko a Tawrat, go phanothol ko sogo a phakatalingoma ko oriyan ko, a aya ngaran iyan na so Ahmad". Na kagiya a miyoma niyan kiran so manga rarayag a karina, na pitharo iran: "Giyaya na balik mata a mapayag!"

7

Na ba adn a taw a makalawan a daroaka ko taw a iniangkob iyan ko Allah, so kabokhag, a skaniyan na pthawagn ko Islam? Na so Allah na di Niyan thoroon so pagtaw a manga daroaka.

8

Kabaya iran a iphadng iran ko sindaw o Allah so manga ngari iran; a so Allah na tharotopn Iyan so sindaw Niyan, apiya miyagoad so manga kapir.

9

Skaniyan so somiyogo ko sogo Iyan a rakhs o toroan ago so agama a bnar, ka phakilangkoloban Iyan on so agama sa kalangolangoan iyan, apiya miyagoad so manga pananakoto.

10

Hay so miyamaratiyaya, ba Ko rkano thoroon so kandagang a makasabt rkano ko siksa a malipds?

11

So kaparatiyayaa niyo ko Allah go so sogo Iyan, go so kipanagontamann iyo sa lalan ko Allah, ko manga tamok iyo, go so manga ginawa niyo: Giyoto man i mapiya rkano, o skano na katawan niyo!

12

Napi Niyan rkano so manga dosa niyo, go pakasoldn kano Niyan ko manga sorga, a pphamangondas ko kababaan iyan so manga lawasayg, go manga darpa a manga tatanos sii ko manga sorga a tatap: Giyoto man so daag a mala;

13

Go adn a salakaw pn a pkhababayaan iyo skaniyan; tabang a phoon ko Allah go daag a masipg. Na pphamanotholing ka sa mapiya so miyamaratiyaya.

14

Hay miyamaratiyaya, mbaloy kano a manga tabanga o Allah: Izan o kiyatharoa o Eysa a wata o Maryam ko manga Hawariyyon a: "Antawaa i manga tabanga akn sii ko Allah?" Pitharo o manga Hawariyyon: "Skami i manga tabanga o Allah". Na miyaratiyaya so sabaad ko manga moriyataw o Israil, na miyongkir so sabaad. Na piyakabagr Ami so miyamaratiyaya, ko kizosogataan iran ko ridoay ran, na miyabaloy siran a miyamakadaag.

Total Number of Verses: 11

1

Pthasbik ko Allah so zisii ko manga langit go so zisii ko lopa, a Phapaar, a Soti, a Mabagr, a Mawngangn.

2

Skaniyan so somiyogo ko manga Ommi sa sogo a pd kiran, a pkhabatia iyan kiran so manga ayat Iyan; go pphakasoti kiran go pphakandao kiran ko kitab ago so ongangn; a mataan a aya btad iran gowani na matatago dn ko karibat a mapayag;

3

Go so manga salakaw a pd kiran a da kiran pn raot. Na Skaniyan so Mabagr, a Mawngangn.

4

Giyoto man so kakayaan o Allah, imbgay Niyan ko taw a kabaya Iyan: Na so Allah i Khirk ko kakayaan a mala.

5

Aya ropaan o siran a siyanaan ko Tawrat, oriyan iyan na da iran nggolalann skaniyan, na lagid o ropaan o kimar a phagawid sa manga kitab. Miyakaratarata a ropaan o pagtaw a so piyakambokhag iran so manga ayat o Allah: Na so Allah na di Niyan thoroon so pagtaw a manga darowaka.

6

Tharoang ka: "Hay manga Yahodi, oba niyo initgo a mataan! a skano i pkhabayaan o Allah a di ron pd so manga manosiya, na zinganin na niyo so kapatay, o skano na pmamataan kano!"

7

Na di iran dn oto zinganinn sa dayon sa dayon, sabap ko miniona o manga lima iran (a dosa). Na so Allah na katawan Iyan so manga darowaka!

8

Tharoang ka a: "Mataan! a so kapatay a so pphalagoyan iyo skaniyan: Na mataan aya! a mipthoona kano niyan; oriyan iyan na phakandodn kano ko (Allah a) Matao ko masoln, ago so mapayag: Na phanotholn Iyan rkano so pinggolawla niyo!"

9

Hay miyamaratiyaya, igira a inipananawag so sambayang ko alongan a Jomaat, na nggagaang kano somong ko tadm ko Allah, go awai niyo so kaphapasai: Giyoto man i mapiya rkano o skano na katawi niyo!

10

Na igira a miyapasad so sambayang, na pharaparak kano ko lopa, go niyo mbabanoga so kakayaan o Allah, go tatadmi niyo so Allah sa madakl, ka ang kano makaslang sa maliwanag.

11

Na igira a miyakaylay siran sa dagangan, odi na karimbaran, na zasakoya siran on, go ganatang ka iran ko katitindg ka (ya Mohammad). Tharoang ka a: "So (balas a) zisii ko Allah na aya tomo a di so karimbaran, ago so dagangan! Na so Allah i taralbi a mapiya ko pphamgay sa riskhi."

Total Number of Verses: 11

1

Igira a miyakaoma rka (ya Mohammad) so manga monapik, na gi iran tharoon a: "Zasaksian ami a mataan! a ska na titho a sogo o Allah". Na so Allah na katawan Iyan a mataan! a ska na titho a sogo Iyan. Na so Allah na zasaksian Iyan a mataan! a so manga monapik na titho a manga bokhag.

2

Biyaloy ran so manga sapa iran a lindonga: ka an iran pkhaalangi so lalan ko Allah. Mataan! a siran na miyakaratarata so pinggolawla iran.

3

Giyoto man na sabap sa mataan a siran na miyaratiyaya siran, oriyan iyan na miyongkir siran, na miyapatri so manga poso iran; na siran na di siran phakasabot.

4

Na igira a miyaylaing ka siran na pkhasoat ka o manga lawas iran. Na amay ka mitharo siran na pphamamakin'gn ka so katharo iran. Lagid siran o manga kayo a khisasaragn. Arangan iran ko oman i lalis na itotompa kiran. Siran so manga ridoay, na iktiyaring ka siran. Pimorkaan siran o Allah! andamanaya i katatalikhod iran!

5

Na igira a pitharo kiran a: "Song kano sii ka ang kano mipangni sa maap o Rasolollah!" Na ipanglngklng iran so manga olo iran, go maylaing ka siran a pphamanalikhod, a siran na khipananakabor.

6

Magizan o inipangning ka siran sa maap, antawaa dang ka siran pangnin sa maap, ka di siran dn pmaapan o Allah. Mataan! a so Allah na di Niyan thoroon so pagtaw a manga songklid.

7

Siran so gii tharo sa: "Di niyo pphamgi so taw a tampil ko Rasolollah, taman sa di iran blagn". Na rk o Allah so manga kakawasaan ko manga langit ago so lopa; na ogaid na so manga monapik na di iran sasabotn.

8

Gi iran tharoon a: "Ibt o makandod tano sa Madinah, na phakaawaan roo dn o mabagr so malobay", na rk o Allah so bagr go rk o sogo Iyan, go rk o miyamaratiyaya; na ogaid na so manga monapik na di iran katawan.

9

Hay so miyamaratiyaya, oba kano mabimban o manga tamok iyo ago so manga wata iyo ko tadm ko Allah. Na sa taw a nggolawla roo, na siran man na siran i miyangalologi.

10

Na pammgay kano ko inibgay Ami rkano ko dapn kapakatalingoma ko isa rkano, o kapatay, na matharo iyan: "Kadnan ko, ino akong Ka di phakaakola sa taman ko taalik a marani, ka an ako makazasadka, go an ako mabaloy a pd ko manga bilangataw?"

11

Na da dn a phakaakoln o Allah a baraniyawa igira a miyakaoma so adiyal iyan. Na so Allah na Kaip Iyan so gii niyo nggolawlaan.

Total Number of Verses: 18

1

Pthasbik ko Allah so zisii ko manga langit ago so zisii ko lopa; rk Iyan so bantogan; go Skaniyan sii ko langowan taman na Gaos Iyan.

2

Skaniyan so miyadn rkano; na so sabaad rkano na kapir, na so sabaad rkano na mapaparatiyaya: Na so Allah na so gii niyo nggolawlaan na Phagilayn Iyan.

3

Inadn Iyan so manga langit ago so lopa sii ko bnar, go pimbontalan kano Niyan, na piphiyapiyaan Iyan so manga bontal iyo; go sii Rkaniyan so khabolosan.

4

Katawan Iyan so zisii ko manga langit ago so lopa, go katawan Iyan so isosoln iyo go so papayagn iyo; na so Allah na katawan Iyan so zisii ko manga rarb.

5

Ba rkano da makatalingoma so totholan ko siran a miyamangongkir gowani? Na kiyataaman iran so karata o olawla iran. Go adn a bagian iran a siksa a malipds.

6

Giyoto man, na sabap sa mataan aya a miyakatalingoma kiran so manga sogo kiran rakhs o manga rarayag a karina, na pitharo iran a: "Ba so manosiya i pnggonanao rk tano?" Na inongkir iran, go tomiyalikhod siran. Na Kawasa so Allah. Na so Allah na Kaya a Pphodin.

7

Initgo o siran a miyamangongkir a di siran dn khawyag zaroman. Tharoang ka (ya Mohammad): "Oway na, ibt ko Kadnan ko! ka mataan a pagoyagn kano dn, oriyan iyan na mataan a phanotholn rkano dn so pinggolawla niyo. Na giyoto man sii ko Allah na malbod."

8

Na paratiyayaa niyo so Allah go so sogo Iyan, go so (Qor'an a) sindaw a so initoron Ami. Na so Allah na so gii niyo nggolawlaan na Kaip Iyan.

9

Sii ko alongan a kalimoda Niyan rkano ko alongan a kaplimod; - giyoto man so alongan (a kapayag) o kalogi. Na sa taw a paratiyayaan iyan so Allah go nggalbk sa mapiya, - na lalasn Iyan on so manga dosa niyan, go pakasoldn Iyan ko manga sorga a pphamangondas ko kababaan iyan so manga lawasayg, makakakal siran on sa dayon sa dayon: Giyoto man i daag a mala.

10

Na so miyamangongkir go piyakambokhag iran so manga ayat Ami, na siran man i manga taw ko naraka, a makakakal siran on: Na miyakaratarata a khabolosan.

11

Da a minisogat a tiyoba, a ba di sabap sa idin o Allah: Na sa taw a maratiyaya ko Allah, na nggonanaon Iyan so poso iyan: Na so Allah sii ko langowan taman na katawan Iyan.

12

Na onoti niyo so Allah, go onoti niyo so Rasol: Na o talikhod kano, na aya bo a paliyogat ko sogo Ami na so kapamakasampay a mapayag.

13

So Allah! Da a tohan a inonta Skaniyan. Na so bo so Allah i sarigi o miyamaratiyaya.

14

Hay so miyamaratiyaya, mataan! a so sabaad ko manga karoma niyo go so manga wata iyo a ridoay niyo, na iktiyari niyo siran. Na o pmaap kano, go dapay niyo, go nomapi kano, na mataan! a so Allah na Manapi, a Makalimoon.

15

So manga tamok iyo go so manga wata iyo na matag rkano tpng: Na so Allah na Ron so balas a mala.

16

Na kalkn iyo so Allah sa sadn sa khagaga niyo, go pphamamakin'g kano, go pphangongonotan kano, go pphammgay kano sa mapiya a rk o manga ginawa niyo. Na sa taw a ipilak iyan so kaligt o ginawa niyan, na siran man na siran i phamakadaag.

17

O pagotangi niyo so Allah sa otang a mapiya; na pthaktakpn Iyan oto rkano, go napiyan kano Niyan: Na so Allah na Masalamatn, a Matigr,

18

Katawan Iyan so masoln ago so mapayag, a Mabagr, a Mawngangn.

Total Number of Verses: 12

1

Hay Nabi, igira a ipzoway niyo so manga babay, na zoway niyo siran sii ko ida iran, go itonga niyo so ida: Go kalkn iyo so Allah a Kadnan iyo; di niyo siran phakaawaa ko manga walay (a babalingan) iran, go di siran pagawa inonta o makasogok siran sa pakasisingay, a mapayag. Na giyoto man i manga taman o Allah: Na sa taw a lomawan ko manga taman o Allah, na sabnar a miyabinasa niyan a ginawa niyan: ding ka katawan: Na masikn a so Allah na adn a pmbago Niyan ko oriyan oto a khasowa.

2

Na igira a ipraot siran ko taalik kiran, na balingi niyo siran sii ko adat a mapiya, odi na mblagn iyo siran sii ko adat a mapiya, go pakizaksii niyo so dowa a maontol a pd rkano, go pamayandgn iyo so kazaksi a rk o Allah. Giyoto man na ipphangthoma oto ko taw a aya btad iyan na paparatiyayaan iyan so Allah, ago so alongan a mawri. Na sa taw a ikalk iyan so Allah, na snggayan Iyan sa milidas iyan ko margn:

3

Go mbgan Iyan sa pagpr a di niyan mapipikir. Na sa taw a somarig ko Allah, na Skaniyan dn i Maako ron. Mataan! a so Allah na pakapphamondasn Iyan so sogoan Iyan. Sabnar a tiyagoan o Allah so langowan taman sa diyangka.

4

Na so mithaman kiran so hayd ko manga babay rkano, na amay ka kapaparampangan kano, na aya ida iran na tlo olan, go (lagid oto so) siran a da pn mahayd. Na so manga oogat, na aya ida iran na so kimbawataan iran ko ikaogat iran. Na sa taw a ikalk iyan so Allah, na snggayan Iyan ko okit iyan sa malbod.

5

Giyoto man i sogoan o Allah, a initoron Iyan oto sii rkano: Na sa taw a ikalk iyan so Allah, na lalasn Iyan on so manga dosa niyan, go pakalaan Iyan ko bagian iyan so balas.

6

Pakababalinga niyo siran ko sadn sa babalingan iyo, sii ko gaos iyo: Go di niyo siran phakargni, ka kaphakasimpitan iyo siran. Na amay ka adn a manga ikawgat iran, na nggastowi niyo siran taman sa mimbawata iran so ikawgat iran: Na amay ka pakasoson iran rkano, na bgan iyo kiran so manga tndan kiran; go pphamagodasai niyo sii ko btad a mapiya. Na amay ka makaphrgna kano, na pakasoson rkaniyan o salakaw (a babay);

7

Nggasto so adn a kakawasaan iyan ko kakawasaan iyan: Na sa taw a miyakasimpit on so pagpr iyan, na nggasto ko inibgay ron o Allah. Da a iphaliyogat o Allah ko ginawa a rowar ko inibgay Niyan on. Mbalowin bo o Allah ko oriyan o margn so malbod.

8

Madakl a phagingd a siyangka iyan so sogoan o Kadnan iyan, ago so manga sogo Iyan, na piyamagitong Ami skaniyan sa itongan a margn, go siniksa Ami skaniyan sa siksa a pakasisingay.

9

Na kiyataaman iyan so karata o olawla niyan, go miyabaloy so kiya akiran ko olawla niyan a kalogi.

10

Pithiyagaran siran o Allah sa siksa a sangat; na kalkn iyo so Allah, hay adn a manga sabot iyan - a miyamaratiyaya! - sabnar a piyakatoronan kano o Allah sa pananadm,

11

Sogo a pphakabatiya rkano ko manga ayat o Allah, a miyamakawsay, - ka an iyan mapakaawa so miyamaratiyaya, go minggagalbk sa manga pipiya phoon ko manga lilibotng sa mawit ko maliwanag. Na sa taw a paratiyayaan iyan so Allah go nggalbk sa mapiya, na pakasoldn Iyan ko manga sorga a pphamangondas ko kababaan iyan so manga lawasayg, makakakal siran on sa dayon sa dayon: Sabnar a piphiyapiyaan o Allah so bagian iyan sa pagpr.

12

So Allah so miyadn ko pito a manga langit, go so lopa a lagid oto. Pthoron so sogoan ko pagltan iran, ka an iyo katokawi a mataan! a so Allah sii ko langowan taman na Gaos Iyan, go mataan! a so Allah na sabnar a mararangkom Iyan a katao so langowan taman.

Total Number of Verses: 12

1

Hay Nabi, inong ka kharama so piyakay rka o Allah, a iphloloba aka ko manga kasosoat o manga karomang ka? Na so Allah na Manapi, a Makalimoon.

2

Sabnar a biyaloy rkano o Allah a bitikan so kakhiparat ko manga sapa iyo; na so Allah i Panarigan iyo; go Skaniyan so Matao, a Mawngangn.

3

Na gowani a pakipagma o Nabi ko sabaad ko manga karoma niyan so miyanggolawla; na kagiya a pamanotholn iyan oto go piyayag on o Allah, na tiyanto niyan so sabaad na tiyalikhodan iyan so sabaad. Na kagiya a panotholn iyan on oto na pitharo iyan a: "Antawaa i miyanothol rka sii?" Pitharo iyan: "Piyanothol rakn (o Allah a) Matao, a Kaip."

4

Amay ka thawbat kano a dowa sii ko Allah, ka sabnar a miyakasilay so poso iyo, (na tharimaan Iyan); na o thabangain iyo so sorang Rkaniyan, na mataan! a so Allah na Skaniyan i Panarigan iyan, go so Jibril, go so maontol ko miyamaratiyaya; go so manga malaikat ko oriyan oto na tabanga iyan.

5

Matatangkd a so Kadnan iyan, na o undai kano niyan, na phakasambiin Iyan skaniyan sa manga karoma a mapiya a di skano, a mimbabayorantang, a miyamaratiyaya, a miyamangongonotan, a manga baratawbat, a manga barasimba, a manga barapowasa, a manga bitowann, go manga raga.

6

Hay miyamaratiyaya, lidasn iyo so manga ginawa niyo go so taalok rkano ko apoy a aya itagon iyan na so manga manosiya ago so manga ator, a pakisisiyap ko manga malaikat a manga babasng, a manga babagr, di iran zangkaan so Allah ko sogoan Iyan kiran, go inggogolalan iran so ipzogo kiran.

7

"Hay miyamangongkir, di kano dn pphamitowa sa alongan nai! ka aya bo a imbalas rkano na so pinggolawla niyo."

8

Hay so miyamaratiyaya! thawbat kano ko Allah sa kathawbat a totoo: Matatangkd a so Kadnan iyo na lalasn Iyan rkano so manga dosa niyo, go pakasoldng kano Niyan ko manga sorga a pphamangondas ko kababaan iyan so manga lawasayg, sii ko alongan a di phakayto on o Allah so Nabi ago so miyamaratiyaya a pd iyan. So sindaw iran na lomalangkap ko hadapan iran ago so manga kawanan iran: Ptharoon iran a: "Kadnan ami, sampornaang Ka rkami so sindaw ami, go napii kaming Ka: Mataan! a Ska i Gaos ko langowan taman."

9

Hay Nabi, prangang ka so manga kapir, ago so manga monapik, go pakabasnging ka siran. Na darpa iran so naraka Jahannam; a mikharatarata a khabolosan.

10

Mimbaal so Allah sa ibarat, ko siran a miyamangongkir: So karoma o Noh ago so karoma o Lot: Giya dowa oto na darodopa o dowa oripn a pd ko manga oripn Ami, a manga bilangataw na diyorat iran a dowa oto na da a minilinding iran sa dowa oto (a babay) ko (siksa o) Allah a mayto bo, go ptharoon (sa dowa oto a babay) a: "Sold kano ko naraka a pd o phamakasold on!"

11

Go mimbaal so Allah sa ibarat ko siran a miyamaratiyaya: So karoma o Pir'awn, gowani na pitharo iyan: "Kadnan ko, pakimbalayn akong Ka sii ko marani Rka sa walay sii ko sorga, go sabta kong Ka phoon ko Pir'awn, go so galbk iyan, go sabta kong Ka phoon ko pagtaw a manga darowaka;"

12

Go so Maryam a wata o Imran, a so siniyap iyan a ginawa niyan; na iniiyop Ami ron so pd ko inadn Ami a niyawa; go tiyanto niyan so manga katharo o Kadnan iyan, go so manga kitab iyan, go miyapd ko pphamangongonotan (ko Allah).

Part 29

Total Number of Verses: 30

1

Maporo so (Allah a) zisii sa tangan Iyan so kapaar; go Skaniyan sii ko langowan taman na Gaos Iyan,

2

So miyadn ko kapatay ago so kawyag, ka ang kano Niyan katpngi o antawaa rkano i mapiya i galbk: Na Skaniyan so Domadaag, a Manapi,

3

So miyadn ko pito a manga langit a miyaka phapangkata: da a khaylaing ka ko kiyapangadn o Masalinggagaw a sombang. Na pharomaning ka milay: Ba adn a khaylaing ka on a manga opak?

4

Oriyan iyan na pharomaning ka milay sa makadowa: Ka makambalingan rka so kaylay a kalolobayan, a skaniyan na lalamnn.

5

Na sabnsabnar a phipharasan Ami so langit a marani sa manga bitoon, go biyaloy Ami oto a manga lbad ko manga shaytan; go pithiyagaran Ami siran sa siksa a kadg.

6

Na bagian o siran a miyamangongkir ko Kadnan iran so siksa ko naraka Jahannam: Na miyakaratarata a khabolosan!

7

Amay ka pamozangn siran on na makan'g siran on sa dalg a skaniyan na phlikabo,

8

Mayto bo na makapzisibaya phoon sa gani. Oman i phozangn on a salompok na izaan siran o khisisiyap on: "Ba da a miyakatalingoma rkano a pphamakaiktiyar?"

9

Tharoon iran: "Oway; sabnar a miyakaoma rkami so pphamakaiktiyar, na piyakambokhag ami ago pitharo ami: 'Da a piyakatoron o Allah a mayto bo, da ko skano inonta na matatago ko karibat a mala'!"

10

Go tharoon iran: "Opama ka miyakapamamakin'g kami, odi na miyakapamimikiran kami, na di kami mabaloy a pd ko manga taw ko kadg!"

11

Na mipagikral iran so dosa iran; na kapakawatan ko limo a bagian o manga taw ko kadg!

12

Mataan! a so ikaalk iran so Kadnan iran sa masoln, na adn a bagian iran a maap, go balas a mala.

13

Na pnanayn iyo so katharo iyo odi na pakatanogn iyo skaniyan. Mataan! a Skaniyan na katawan Iyan so zisii ko manga rarb.

14

Ba Niyan di katawi so inadn Iyan? A Skaniyan so Lambasi-katao, a Kaip.

15

Skaniyan so biyaloy Niyan rkano so lopa a phapasiyonot, na lalakaw kano ko mbalabala on, go kang kano ko pagpr o Allah. Na sii Rkaniyan so kaphangoyag zaroman.

16

Ba kano sasarig ko Skaniyan a zisii ko langit sa di kano Niyan landngn ko lopa amay ka skaniyan na mabirbir?

17

Antawaa ba kano sasarig ko Skaniyan a zisii ko langit sa di kano Niyan botawanan sa ndo (a maka-aawid sa ator)? Na katokawan iyo bo o antonaa so kapphamakaiktiyar Akn!

18

Na sabnsabnar a piyakambokhag o siran a miyaonaan iran (so manga rasol), na antonaa i miyambtad o kiyaalina Ko (kiran)?

19

Ba iran da maylay so manga papanok ko kaporoan iran a khikakayat sa papak go ipkhakp iran? da a makakakapt kiran inonta so Masalinggagaw. Mataan! a Skaniyan sii ko langowan taman na phagilayn Iyan.

20

Ba adn a taw a giyaya so skaniyan na tantara iyo a phakatabang rkano a salakaw ko (Allah a) Masalinggagaw? Da ko miyamangongkir inonta na matatago ko kalilimpang.

21

Ba adn a taw a giyaya so phakabgay rkano sa riskhi, amay ka rnn (o Allah) so rizkhi Niyan? Kna, ka piyakapamts iyo so kathakabor, ago so kaphapalagoy;

22

Ino so taw a pphlalakaw a iggpha niyan a paras iyan, aya makaoontol antawaa so taw a pphlalakaw a mbabatang ko lalan a matitho?

23

Tharoang ka a: "Skaniyan so miyadn rkano go sominggay rkano ko kan'g, ago so manga kaylay, go so manga poso. Miyakayto ito a kapphanalamat iyo!"

24

Tharoang ka a: "Skaniyan so miyarmbad rkano ko lopa, go Ron kano plimoda."

25

Na gi iran tharoon a: Anda dn angkai a diyandi o skano na mmamataan kano?

26

Tharoang ka a: "So katawi ron na sii bo ko Allah, ka sakn na matag pphamakaiktiyar a mapayag."

27

Na amay ka maylay ran skaniyan a marani, na makarimng so manga paras o siran a miyamangongkir; na adn a ptharo: "So giyai so skano na pphangnin iyo skaniyan."

28

Tharoang ka a: "Ay gda iyo amay ka binasaan ako o Allah ago so manga pd akn, odi na ikalimo kami Niyan, na antawaa i makalinding ko miyamangongkir phoon ko siksa a malipds?"

29

Tharoang ka a: "Skaniyan so Masalinggagaw: Piyaratiyaya mi Skaniyan, go Skaniyan bo i siyarigan ami: Na katokawan iyo bo o antawaa i skaniyan i matatago ko karibat a mapayag."

30

Tharoang ka a: "Ay gda iyo amay ka mabaloy so ig iyo a somnp, na antawaa i katalingomaan kano niyan sa ig a pthoga?"

Total Number of Verses: 52

1

Noon. (So Allah i Matao ko paka-aantapan Iyan on.) Ibt ko pansom ago so nganin a ipzorat iran,

2

Sabap ko limo o Kadnan ka (ya Mohammad) na kna a ba ka pmbthanga.

3

Na mataan! a rk ka so mala a balas a di pthaman;

4

Go mataan! a ska na titho a thatakna ko parangay a mala.

5

Na khaylaing ka dn, go khaylay ran,

6

O antawaa rkano i mariribat.

7

Mataan! a so Kadnan ka na Skaniyan i Matao ko taw a sominilay phoon ko lalan Iyan: Go Skaniyan i Matao ko miyamangdg ko ontol.

8

Na ding ka pagonoti so miyamanaplis.

9

Na kabaya iran a oba ka bo plokha: ka an siran makalokha.

10

Na ding ka pagonoti so oman i balisapaan, a Hina,

11

A taliyantaan, a ilalalakaw niyan so kapamangondor,

12

Phagrn ko mapiya, a malawani, a baradosa,

13

Talibatak, oriyan oto na wata sa zina.

14

Kagiya adn a tamok iyan, ago manga wata.

15

Igira a pphangadian on so manga ayat Ami, na gii niyan tharoon a: "Manga iringa a kabokhag o miyanga oona!"

16

Tiyapan Ami dn skaniyan sa ngirong!

17

Mataan! a Skami na tiniyoba Ami siran lagid o kiyatiyoba Ami ko khimangark ko pamomolan, gowani a zapa siran sa mataan a phragonn iran dn skaniyan a phangabalaga siran.

18

"Go di siran phanabiya;"

19

Na kiyalikopan oto a tiyoba a phoon ko Kadnan ka, a siran na khitotorogn siran.

20

Na miyabaloy a lagid o gagawii a malibotng;.

21

Na mithatawaga siran ko kiyapitai kiran:

22

"Pangabalaga kano ko pangomaan iyo o skano na phragon kano."

23

Na lomiyalakaw siran, a siran na ipphnanay ran tharo:

24

"Da dn a makasold rkano ron sa alongan nai a miskin;"

25

Na komiyabalaga siran, ka an di phakawnot so manga miskin, a khittgo siran.

26

Na kagiya a maylay ran oto, na pitharo iran a: "Mataan! a sktano na titho a miyangadadadag!"

27

"Kna, ka sktano na piyapas rk tano!"

28

Pitharo o mapiya kiran: "Ba ko rkano da tharoa: 'Ino kano di thasbik (ko Allah)'?"

29

Pitharo iran: "Soti so Kadnan tano! Mataan! a sktano na mimbaloy tano a manga darowaka!"

30

Na siyangoran o sabaad kiran so sabaad, a gii siran zsndita!

31

Pitharo iran: "Hay dowan dowaan tano, mataan! a sktano na mimbaloy tano a manga malawani!"

32

"Masikn a so Kadnan tano na zambian Iyan rktano sa mapiya a di giyoto: Mataan! a sktano na sii tano dn ko Kadnan tano pangangarapan!"

33

Giyoto dn man so siksa (ko doniya). Na mataan! a so siksa ko akhirat i lbi a mala; o siran na katawi ran!

34

Mataan! a bagian o miyamananggila, sii ko Kadnan iran so manga sorga a pakadarandang.

35

Ba Ami mbaloya so mimbabayorantang a lagid o manga sala?

36

Ino kano wai? Andamanaya i kipkhokomn iyo (ko bkhog)!

37

Ba adn a kitab iyo a kapphangadian iyo ron,

38

A mataan! a khakowa niyo ron so nganin a khapili iyo?

39

Antawaa ba adn a manga diyandi tano a lomalagaday sa taman ko alongan a qiyamah: Sa mataan! a khakowa niyo so nganin a ipkhokom iyo?

40

Izaan ka kiran, o antawaa kiran i mangangako roo!

41

Antawaa ba adn a manga sakoto iran? Na pakadarpaa iran i manga sakoto iran, o siran na mmamataan siran!

42

So alongan a qiyamah na phangosbo so btad, go so kapakargn o alayalay niyan, go pakamaon so Allah a Maporo ko kapakaptatailisaa Niyan ko kakhokoma ko ndolondolonan o manga kaadn, na zawaan Iyan a pamosoan Iyan a mapiya a da a khaibaratan on ko manga kaadn a isabo go itawag kiran so kasojiod, na di iran magaga,

43

Makassnong so manga kaylay ran, - a kakokoloban siran sa kahinaan. Na sabnar a siran na ipthawag kiran (ko doniya) so kasojiod a siran na kadadayaan iran.

44

Na botawani akong ka ago so taw a gii niyan pakambokhagn angkai a tothol: Zagintonn Ami siran dn somiksa sa di iran katawan.

45

Na pakadadamayn Ko siran. Mataan! a so antangan Akn na maylot

46

Ba ka kiran pphangni sa sokay, a siran na minipnd kiran a bayadan?

47

Antawaa ba zisii kiran so migagaib, na siran i pphanorat on?

48

Na phantang ka ko kokoman o Kadnan ka, go oba kamabaloy a lagid o (Yonos a) miyatago ko (tiyan o) sda; gowani a makapangangarapan, a skaniyan na kammnmnan.

49

Oda raota skaniyan o limo a phoon ko Kadnan iyan, na mataan a imbowang Ami ko taog, a pagilidan, a skaniyan na kapapaawingan.

50

Na pinili skaniyan o Kadnan Iyan, na biyaloy Niyan a pd ko manga bilangataw.

51

Na mataan a mayto bo na so miyamangongkir na khipaps ka iran dn sabap ko manga kaylay ran ko kiyan'ga iran ko pananadm, go gi iran tharoon a: "Mataan! a skaniyan na titho a pmbthangn!"

52

Na da ko skaniyan (a Qor'an) inonta na pananadm a rk o manga kaadn.

Total Number of Verses: 52

1

So phakatangkd.

2

Antonaa so phakatangkd?

3

Na antawaa i miyakandao rka o antonaa so phakatangkd (a giyoto so bangkit)?

4

Piyakambokhag o pagtaw a Samod, ago so pagtaw a Ad so phakatktk!

5

Na so pagtaw a Samod, na inibinasa kiran so lalis a minitaralo!

6

Na so pman so pagtaw a Ad, na inibinasa kiran so ndo a domadagoos, a miyakabandbands;

7

Piyakapangarasi Niyan kiran sa miyakapito ka gagawii, go miyakawalo ka dawndaw sa da mapta, na khaylaing ka so pagtaw roo a khipakakklit, lagid oba siran manga itado a korma a miyanga o othang!

8

Na ba adn a khaylaing ka kiran a malalamba?

9

Na siyogok o Pir'awn, ago so miyaonaan iyan, ago so taw sa Mo'tafikah so dosa;

10

Go siyangka iran so sogo o Kadnan iran, na siniksa Iyan siran sa siksa a maylot.

11

Mataan! a Skami na kagiya a lomapay so ig na riyoran Ami skano ko kapal,

12

Kaan Ami rkano oto mabaloy a pananadm, go adn man'g skaniyan o tangila a pphamamakin'g.

13

Na amay ka iyopn so sanggakala sa kaiyop a makaysa,

14

Go madiyongkat so lopa ago so manga palaw, na maropt a dowa oto sa karopt a makaysa,

15

Na sa alongan oto na makatana so phakatana (a giyoto so bangkit).

16

Go manga oopak so langit, na skaniyan sa alongan oto na makalmk,

17

Go so manga malaikat na sii ko manga bagibir iyan. Na tanggongn so aras o Kadnan ka ko kaporoan iran sa alongan oto o walo (a manga malaikat);

18

Sa alongan oto na pakadarpaan kano na da a makapagma rkano a phagma.

19

Na so mibgay ron so daptar iyan, sii ko kawanan iyan, na tharoon iyan a: "Kowaa niyo, na batiyaa niyo so daptar akn!"

20

"Mataan! a sakn na miyatangkd akn a mataan! a sakn na khatmo akn so itongan rakn!"

21

Na skaniyan na matago ko kawyagoyag a kasosoat,

22

Sii ko sorga a maporo,

23

So manga onga on na manga rarani.

24

(Tharoon kiran:) "Kang kano go inom kano sa kapipiya ginawa, sabap ko miniona niyo ko manga alongan a miyaypos!"

25

Na so pman so mibgay ron so daptar iyan sii ko diwang iyan, na matharo iyan: "Hay oba rakn bo da mibgay so daptar akn!"

26

"Go di akn katawan o antonaa i itongan rakn!"

27

"Hay oba bo skaniyan na miyabaloy a kapatay dn!"

28

"Daa minilinding rakn o tamok akn!"

29

"Miyada rakn so bagr akn!,"

30

(Tharoon o Allah:) "Kowaa niyo na sangkalii niyo skaniyan,"

31

"Oriyan iyan na so naraka Jahim na sombo niyo ron;"

32

"Oriyan iyan na so rantay a aya karawa iyan na pito polo hasta, na zokharn iyo ron!"

33

"Mataan! a skaniyan na aya btad iyan na di niyan paparatiyayaan so Allah a lbi a mala,"

34

"Go di niyan i phamiis so kapakakana ko miskin!"

35

"Na da a bagian iyan sa alongan nai sii a tonganay a phakaompiya on,"

36

"Go da a pangn'ngkn iyan a rowar ko sago o taw ko naraka,"

37

"Daa phakakan on inonta so manga baradosa."

38

Na kna, ka pzapa ako ko nganin a pkhaylay niyo,

39

A go so nganin a di niyo pkhaylay,

40

Sa mataan! a skaniyan (a Qor'an) na titho a gii matharo o sogo a sslaan,

41

Go kna a ba skaniyan katharo o pababayok, miyakayto ito a kapaparatiyaya niyo!

42

Go kna a ba katharo a paririmar, miyakayto ito a kapphakatadm iyo.

43

Initoron a phoon ko Kadnan o manga kaadn.

44

Na opama ka iniangkob iyan Rkami so sabaad ko manga katharo,

45

Na mataan a khakowa Mi skaniyan sa nggolalan ko bagr,

46

Oriyan iyan na mataan a potoln Ami ron so ogat ko poso:

47

Na da a pd rkano a isa bo a mamakalinding on.

48

Na mataan! a titho a pananadm a rk o khipanananggila.

49

Na mataan! a Skami na katawan Ami dn a mataan! a so sabaad rkano na piyakambokhag iran (so Qor'an).

50

Na mataan aya! a titho a kazndit a phakatana ko miyamangongkir;

51

Go mataan aya! a titho a bnar a matatangkd.

52

Na phoroporo on ka so ngaran o Kadnan ka a Lbi-a-mala.

Total Number of Verses: 44

1

Piyangni o miyangni a so siksa na makatana,

2

Ko miyamangongkir, da a phakarn on,

3

Phoon ko Allah a Khirk ko pphangapapanikan.

4

Pphanik so manga malaikat go so Jibril sii Rkaniyan, sii ko alongan a miyabaloy so diyangka iyan a lima polo nggibo ragon.

5

Na phantang ka sa kaphantang, a maliwanag.

6

Mataan! a siran na aya kapkhaylaya iran on na mawatan,

7

Na aya kapkhaylaya Mi ron na marani:

8

Sii ko alongan a mbaloy so langit a lagid o tiyonag a pirak,

9

Go mbaloy so manga palaw a lagid o bombol a marorodot,

10

Go di kayzaan o madazg so madazg iyan,

11

A pkhaylay ran siran. Mapndingandingan o baradosa a: Oba niyan bo khirnding ko siksa sa alongan oto so manga wata iyan,

12

Go so karoma niyan, go so pagari niyan,

13

Go so manga tonganay niyan a so mithitimo iyan,

14

Go so matatago ko lopa langon, oriyan iyan na sabtn skaniyan (o Allah).

15

Di dn oto; ka mataan aya! a kadg,

16

A phlodas ko kobal ko olo!

17

Pthawagn iyan so taw a tomiyalikhod go mimbarapaling,

18

Go miyanimo na miyamotal (sa tamok)!

19

Mataan! a so manosiya na inadn a tithiyakhaan, mala i inam,

20

Igira a miyasogat skaniyan o marata na dii khaminan;

21

Na igira a miyasogat skaniyan o mapiya na simpnn iyan (ka di phammgay);

22

Inonta so manga barasambayang,

23

A so siran na so sambayang iran na tatatapn iran,

24

Go siran na adn a matatago ko manga tamok iran a haq a mappnto (a so zakat),

25

A rk o pphamangni, ago so di phamangni a karrgnan,

26

Go siran na bbnarn iran so alongan a kapamalas,

27

Go siran na siran na so siksa o Kadnan iran na ikaalk iran,

28

Mataan! a so siksa o Kadnan iran na da a somasarig sa kalpas iyan on,

29

Go siran na siran na so manga ginawa iran na sisiyapn iran,

30

Inonta sii ko manga karoma iran, odi na so miyakhapaar o manga tangan iran, - ka mataan! a siran na da a paawing iran on,

31

Na sa taw a mamagingar sa salakaw roo na siran man na siran i manga malawani;

32

Go siran na siran na so manga sarig kiran, ago so diyandi kiran na sisiyapn iran,

33

Go siran na siran na so kazasaksian iran na ipamamayandg iran,

34

Go siran na siran na so sambayang iran na sisiyapn iran.

35

Siran man i khatago ko manga sorga, a khisslaan siran.

36

Na antonaa so miyamangongkir a mapapantag ka a khilalangag.

37

Sii sa kawanan ago sa diwang a khokoliling siran?

38

Ba maiinam o oman i isa kiran a kapakasolda on ko sorga a pakadarandang?

39

Di dn oto! Mataan! a Skami na inadn Ami siran phoon ko nganin a katawan iran (a notfa)!

40

Na kna, ka pzapa ako sa ibt Ako Kadnan o manga sbangan, ago so manga sdpan, ka mataan! a Skami na titho a manga Gaos,

41

Sa kasambi Ami sa mapiya a di siran; go da Rkami i ba Kami ran kaonai.

42

Na botawaning ka siran ko kapphamrak iran, go mabibimban siran, taman sa mithmo iran so alongan iran a so ididiyandi kiran!

43

Alongan a mamakambowat siran phoon ko manga kobor sa manga gagaan, lagid o ba siran pphamagarabaya ko apasa,

44

A khipakassnong so manga kaylay ran, a kakokoloban siran sa kahinaan. Giyoto man so alongan a so siran na ididiyandi kiran!

Total Number of Verses: 28

1

Mataan! a Skami na siyogo Ami so Noh ko pagtaw niyan: (sa pitharo on a) "Pakaiktiyarang ka so pagtawng ka ko da kiran pn katalingomai a siksa a malipds."

2

Pitharo iyan: "Hay pagtaw akn, mataan! a sakn na phamakaiktiyar rkano a mapayag:"

3

"Zoasoata niyo so Allah, go kalkn iyo Skaniyan, go onoti ako niyo:"

4

"Ka napin Iyan rkano so manga dosa niyo go pakaplagidn kano Niyan sa taman ko taalik a miyapnto: Mataan! a so taalik o Allah na igira a miyakatalingoma na di khisndod; o skano na katawi niyo."

5

Pitharo iyan: "Kadnan ko, mataan! a sakn na diyolon akn so pagtaw akn ko kagagawii na goso kadawndaw:

6

"Na da a minipagoman kiran o panolon akn a rowar sa kapalagoy;

7

"Go mataan! a sakn na oman akn siran dolonn, ka an Ka siran kapmaapi, na iyoln iran so manga tindoro iran ko manga tangila iran, go izalikombong iran so manga nditarn iran, go idadayon iran (so kaongkir) go mmaratabat siran sa mala a kapmaratabat;

8

"Oriyan iyan na mataan! a sakn na tiyawag akn siran sa matanog.

9

"Go mataan! a sakn na piyakalangkap akn kiran, go inipnanay akn kiran sa tanto a kapnanay,

10

"Na pitharo akn a: 'Pangni kano sa maap ko Kadnan iyo'; mataan! a Skaniyan na tatap a Manapi,"

11

"Ka botawanan Iyan rkano so oran a margs,

12

"Go pakadakln Iyan rkano so manga tamok ago so manga wata, go snggayan kano Niyan sa manga pamomolan, go snggayan kano Niyan sa manga lawasayg.

13

"Ino kano wai a di niyo ikhalk so Allah sa slasla,

14

"A sabnar a inadn kano Niyan ko pizoson a btad?

15

"Ba niyo da manggdagda o andamanaya i kiyaadna o Allah ko pito a manga langit a miyakaphapangkata,

16

"Go biyaloy Niyan roo so olan a sindaw, go biyaloy Niyan so alongan a palitaan?

17

"Na so Allah na inadn kano Niyan a phoon ko lopa sa (lagid o) mangngto,

18

"Oriyan iyan na phakakasowing kano Niyan roo, go phakagmawn kano Niyan sa samporna a kapakagmaw.

19

"Na so Allah na biyaloy Niyan rkano so lopa a makakayat,

20

"Ka ang kano pphakawkit ko manga lalan on a manga dadaya."

21

Pitharo o Noh: "Kadnan ko, mataan! a siran na siyangka ako iran, ka aya iran inonotan so taw a da a minioman on o tamok iyan, ago so wata iyan, a rowar sa kalogi;

22

"Go miyagikmat siran sa ikmat a mala;

23

Go pitharo iran a: "Di niyo ngganati so manga katohanan iyo: Go di niyo ngganati so (barahala a) Wadda, go so Sowaa, go so Yaghos, go so Yawqa, go so Nasra;

24

"Go sabnar a miyakadadag siran sa madakl; na da a pagomann Ka ko manga darowaka a rowar ko kadadag."

25

Phoon ko manga kasalaan iran na inld siran, go piyakasold siran ko apoy; na da a miyatoon iran a bagian iran a salakaw ko Allah a mamakatabang.

26

Na pitharo o Noh: "Kadnan ko, da a plambaang Ka ko lopa ko miyamangongkir a makapamagingd on!

27

"Mataan! a Ska na o adn a lambaan Ka kiran na madadag iran so manga oripn Ka, go da a imbawata iran a rowar sa baradosa a miyongkir,

28

"Kadnan ko, pmaapi akong Ka, ago so mbala a loks akn, go so taw a somiyold ko walay akn a mapaparatiyaya, ago so miyamaratiyaya a manga mama, go so miyamaratiyaya a manga babay, go da a pagomann Ka ko manga darowaka a rowar ko kabinasa!"

Total Number of Verses: 28

1

Tharoang ka (ya Mohammad) a: Iniilaham rakn a mataan aya! a adn a miyamakin'g a salompok ko manga jinn; na pitharo iran a: 'Mataan! a skami na miyakan'g kami sa kapangadi a pakammsa!

2

Pphakatoro ko ontol, na piyaratiyaya mi skaniyan: Go da dn a izakoto ami ko Kadnan ami a isa bo,

3

Go mataan aya! a Maporo so kabsaran o Kadnan ami: Da kowa sa karoma ago wata;

4

Na mataan aya! a adn a dii tharo a manga mondo rkami, makapantag ko Allah sa minitaralo a kabokhag,

5

Na mataan! a skami na aya tangkap ami ron na da dn a makatharo a manosiya ago jinn makapantag ko Allah sa kabokhag;

6

Na mataan aya! a adn a manga mama ko manga manosiya a phlindong siran ko manga mama ko manga jinn, na kiyawmanan iran siran sa kandarowaka;

7

Na mataan! a siran na aya arangan iran na lagid o arangan iyo a da dn a pagoyagn o Allah ko oriyan o kapatay a isa bo;

8

Na mataan! a skami na miyakasampay ko langit na miyatoon ami skaniyan a miyapno a pphamagipat a manga babagr ago manga kadg;

9

Go mataan! a skami na aya btad ami na pphakaontod kami ron ko manga ontoda makapantag ko kapamakin'g (gowani). Na sa phamamakin'g imanto na phakatoon on sa kadg a pphamagayan;

10

Na mataan! a skami na di ami katawan o ino marata a piyakaantap ko taw ko lopa, antawaa piyakaantapan siran o Kadnan iran sa toroan;

11

Go mataan! a skami na adn a pd rkami a manga bilangataw, go adn a pd rkami a soranga oto: Miyatago kami ko manga okit a mbidabida;

12

Go mataan! a skami na tiyangkd ami a di ami dn malipos so Allah ko lopa, go di ami Ron dn milipos i kapalagoy,

13

Go mataan! a skami na kagiya a man'g ami so toroan, na piyaratiyaya mi skaniyan: Na sadn sa maratiyaya ko Kadnan iyan na di niyan ikalk o ba kakorangi, go oba maaniyaya;

14

Go mataan! a skami na adn a pd rkami a mimbabayorantang, go adn a pd rkami a miyamanilay. Na sadn sa mbayorantang na siran man i miyakathibaba komdg sa ontol.

15

Na so pman so miyamanilay na miyabaloy siran a itagon o naraka Jahannam;'

16

(Pitharo o Allah:) "Na opama ka miyontol siran ko lalan na mataan a ododan Ami siran sa ig a madakl,

17

"Ka an Ami kiran oto mitpng. Na sa taw a tomalikhod ko tadm ko Kadnan iyan, na pakasoldn Iyan ko siksa a margn.

18

"Na mataan! a so manga masjid na rk o Allah na da a phangangarapani niyo a pd o Allah a isa bo;

19

"Na mataan aya! a kagiya tomindg so oripn o Allah a pphangangarapan Rkaniyan na mayto siran bo na khabaloy siran on a phliliyawawa."

20

Tharoang ka (ya Mohammad) a: "Aya bo a phangangarapanan ko na so Kadnan ko, go da a izakoto akn on a isa bo."

21

Tharoang ka a: "Mataan! a sakn na da a mipapaar akn rkano a kabinasa, ago toroan."

22

Tharoang ka a: "Mataan! a sakn na da dn a makalinding rakn ko Allah a isa bo, go da dn a khatoon akn a salakaw Rkaniyan a khalindongan;"

23

"Inonta so kapamakasampay a phoon ko Allah ago so manga pakawit iyan: Na sa taw a sangkaan iyan so Allah ago so sogo Iyan na mataan! a bagian iyan so apoy ko naraka Jahannam; a makakakal siran on sa dayon sa dayon."

24

Taman sa amay ka kasandngan iran so ididiyandi kiran, na katokawan iran dn o antawaa i malmk i tabanga, go mayto i bilangan.

25

Tharoang ka a: "Di ko katawan o ino marani so ididiyandi rkano, antawaa balowin Skaniyan o Kadnan ko a mathay;"

26

"Katawan Iyan so migagaib, na da a phayagan Iyan ko igagaib Iyan a isa bo,

27

"Inonta so taw a miyasoat on a sogo, na mataan aya! a tiyagoan Iyan so kasasangoran iyan ago so katatalikhodan iyan sa pphagipat,

28

"Ka an Iyan katokawi a sabnar a minisampay ran so manga pakawit o Kadnan iran; go katawan Iyan so zisii kiran, go maiitong Iyan so bilangan o langowan taman."

Total Number of Verses: 20

1

Hay (Nabi a) khakayokos!

2

Tindgn ka (so sambayang), ko kagagawii inonta so mayto, -

3

Kalookan oto, - odi na koranging ka oto sa mayto,

4

O di na lawaning ka skaniyan; go phiyapiyaing ka matiya so Qor'an sa malanat a kabatiya.

5

Mataan! a Skami na thoronan Ami ska sa katharo a mapnd.

6

Mataan! a so pkhaadn a amal ko kagagawii na giyoto na tanto a somasagat ko pamikiran, go marayag so katharo.

7

Mataan! a sii ko kadawndaw na adn a tmbang ka a mala:

8

Na tatadming ka so ngaran o Kadnan ka, go tholabos ka sii Rkaniyan sa totoo a katholabos, -

9

Kadnan o sbangan ago so sdpan: da a tohan inonta Skaniyan na kowaang ka Skaniyan a Sasarigan.

10

Go phantanging ka so gi iran tharoon go awaing ka siran sa kaawa a maliwanag;

11

Go botawani Akong ka a goso miyamanaplis a piyamgan sa limo, go pakaplagidang ka siran sa mayto.

12

Mataan! a adn a zisii Rkami a manga patong, ago kadg,

13

Go pangn'ngkn a pakabakg, go siksa a malipds!

14

Sii ko alongan a linogn so lopa ago so manga palaw, go mabaloy so manga palaw a pthad a pkhaanas.

15

Mataan! a Skami na siyogo an Ami skano sa sogo, a saksi rkano, lagid o kiyasogo i Ami ko Pir'awn sa sogo.

16

Na siyangka o Pir'awn so sogo; na siniksa Ami skaniyan sa siksa a maylot.

17

Na andamanaya i kapakalidas iyo amay ka mongkir kano ko alongan a khabaloy Niyan so manga wata a manga loks?

18

So langit na manga bbngkag sa sabap rkaniyan. Miyabaloy so diyandi rkaniyan a mapnggolawla.

19

Mataan! a giyaya na pananadm: Na sa taw a khabaya na mbaal sa lalan ko Kadnan iyan.

20

Mataan! a so Kadnan ka na katawan Iyan a mataan! a ska na pthindg ka ko korang ko dowa ko tlo bagi ko kagagawii, go so kalooki ron go so ika tlo ron bagi, go so salompok ko siran a manga pd ka. Na so Allah na tatakdirn Iyan so gagawii, ago so dawndaw. Katawan Iyan a di niyo to khaitong, na piyakatawbat kano Niyan na batiyaa niyo so malbod (rkano) ko Qor'an, katawan Iyan a khabaloy so sabaad rkano a pkhakasakit, go so manga pd na pphlalakaw siran ko lopa, a gii siran mbabanog ko kakawasaan o Allah, go so manga pd na gii siran makimbonoay ko lalan ko Allah. Na batiyaa niyo so malbod on, go pamayandgn iyo so sambayang, go tonaya niyo so zakat; go pagotangi niyo so Allah sa otang a mapiya. Na sadn sa mipakawit iyo a rk o manga ginawa niyo a mapiya na khatoon iyo to sii ko Allah, giyoto i lbi a mapiya, go lbi a mala a balas. Na pangni kano sa maap ko Allah. Mataan! a so Allah na Manapi, a Makalimoon.

Total Number of Verses: 56

1

Hay (Nabi a) khokolob!

2

Pamayandg ka na, go ka pamakaiktiyar!

3

Go so Kadnan ka na zlaslaang ka!

4

Go so nditarn ka na sotiyang ka!

5

Go so marzik na pakawataning ka!

6

Go di ka phammgay sa pantag sa kaplaba!

7

Go makapantag ko Kadnan ka na thigr ka!

8

Na amay ka iyopn so sanggakala,

9

Na giyoto man sa alongan oto i alongan a margn,

10

Sii ko miyamangongkir, kna a ba malbod.

11

Botawani Akong ka, ago so taw a inadn Ko a tawantawan!

12

Go singgayan Ko sa bagian iyan a tamok a madakl,

13

Go manga wata a khipakamamasa,

14

Go piyakapangondaya Akn on sa samporna a kapangondaya

15

Oriyan iyan na maiinam iyan a kawmani Ko ron.

16

Di dn oto; ka mataan! skaniyan na miyabaloy sii ko manga ayat Ami a somasangka!

17

Ipaliyogat Akn on so kapanakdg!

18

Mataan! a skaniyan ni miyamimikiran go mithakdir,

19

Na pimorkaan, andamanaya i kiyathakdir iyan!

20

Oriyan iyan na pimorkaan andamanaya i kiyathakdir iyan!

21

Oriyan iyan na miyangilaylay,

22

Oriyan iyan na miyakarimng, go komirs;

23

Oriyan iyan na tomiyalilkhod go miyanakabor;

24

Na pitharo iyan a: "Da ko ungkaya inonta na balik mata, gii mithatanana;

25

"Da ko ungkaya inonta katharo o manosiya!"

26

Pakasoldn Ko skaniyan ko naraka Sakar!

27

Na antawaa i miyakandao rka o antonaa i naraka Sakar?

28

A da a plambaan iyan, go da a imbagak iyan!

29

Pthotong ko kobal! -

30

Katatagoan sa sapolo ago siyaw (a malaikat).

31

Na da a tindo Ami a khitotonggo ko naraka a rowar ko manga malaikat; go da a kiyatndo Ami ko itongan iran a rowar sa tpng ko siran a miyamangongkir; ka an makatangkd so piyamgan ko kitab, go an makapagoman so miyamaratiyaya sa paratiyaya, go an di kapaparampangi so piyamgan ko kitab ago so miyamaratiyaya, go an matharo o siran a kiyatagoan so manga poso iran sa gdamn ago so miyamangongkir a: "Antonaa i piyakaantapan o Allah sangkai a ibarat?" Lagid man oto a kandadaga o Allah ko taw a kabaya Iyan, go kathoroa Niyan ko taw a kabaya Iyan: Na da a matao ko manga tantara o Kadnan ka inonta Skaniyan. Na da a salakaw saya a rowar sa pananadm a rk o manosiya.

32

Di dn: Ibt ko olan,

33

Go so gagawii igira a khaypos,

34

Go so khapita igira a mliwanag,

35

Mataan aya! a titho a isa a mala,

36

A ipphamakaiktiyar ko manosiya,

37

Sii ko taw a khabaya rkano mangonakona, odi na pphapakawri.

38

Oman i ginawa na sanda ko pinggalbk iyan;

39

Inonta so manga taw ko kawanan,

40

Ka sii ko manga sorga, gi iran pamagizai iyan,

41

So manga baradosa:

42

"Ino kano phakasold ko naraka Sakar?"

43

Ismbag iran: "Da kami mabaloy a pd ko manga barasambayang,

44

"Go da kami mabaloy a pphamgay sa pangn'ngkn ko miskin,

45

"Go miyabaloy kami a pphamrak, a pd o pphamamrak,

46

"Go miyabaloy kami a gii ami pakambokhagn so alongan a kapamalas,

47

"Taman sa miyakatalingoma rkami so kapakatangkd (a giyoto so kapatay)."

48

Na di kiran makanggay a gona so sapaat o pphamanapaat.

49

Na antonaa i mapmbagian iran sa katatalikhod iran ko pananadm?

50

Lagid o ba siran manga kimar a pphamalagoy,

51

A piyalagoyan iran so arimaw!

52

Kna, ka kabaya o oman i isa kiran a kabgan sa manga sorat a makakayat (a phoon ko Allah)!

53

Di dn oto. Kna, ka di iran ikhalk so akhirat.

54

Sabnar, a mataan! a giya Qor'an aya! na pananadm:

55

Na sa taw a khabaya na pananadmn iyan oto!

56

Na da a phakatadm kiran inonta sa kabaya o Allah: Skaniyan i patot a ikhalk, go patot a phmaap.

Total Number of Verses: 40

1

Pzapa Ako sa ibt ko alongan a qiyamah;

2

Go pzapa Ako sa ibt ko niyawa a pphanginsoya (ka pagoyagn kano dn).

3

Ba aya tarima on o manosiya na di Ami dn khatimo so manga tolan iyan?

4

Oway, khagaga Mi a kathaong Ami pharoman ko manga kmr iyan!

5

Kna, ka kabaya o manosiya a kapmbaradosa niyan ko kasasangoran iyan;

6

Iphagiza iyan o: "Anda i kaphakatalingoma o alongan a qiyamah?"

7

Na amay ka mabrg so kaylay,

8

Go nggarahana so olan,

9

Go matimo so alongan ago so olan,

10

Matharo o manosiya sa alongan oto a: "Anda i khapalagoyan?"

11

Da dn oto! ka da a khalindongan!

12

Sobo so Kadnan ka sa alongan oto i kapthaknaan.

13

Panotholn ko manosiya sa alongan oto so miniona niyan ago so minipakawri niyan.

14

Kna, ka so manosiya i zaksi ko ginawa niyan,

15

Na apiya i inibgay niyan a manga dalina iyan.

16

Ding ka pkhaoga sa sabap rkaniyan (a Qor'an) so dila aka makapantag sa kaphagalokaloking ka on.

17

Mataan! a sii Rkami so katimo iyan, ago so kapphangadi iron:

18

Na igira a piyangadian Ami skaniyan, na kdgang ka so kiyapangadi iron;

19

Oriyan iyan na mataan! a sii Rkami so kapakarayaga on.

20

Sabnar a kna, ka pkhababayaan iyo so (doniya a) matag sagad,

21

Go ipmbagak iyo so akhirat.

22

Adn a manga paras sa alongan oto a mamakataid, -

23

A maylay ran so Kadnan iran;

24

Go adn a manga paras sa alongan oto a khipakaiibi,

25

Maggda iran a adn a pnggolawlaan kiran a margn.

26

Sabnar a amay ka isampay (so niyawa) ko manga tolan ko bakrng;

27

Na matharo a: "Antawaa i pamomotar?"

28

Na miyatangkd iyan a mataan! a skaniyan so kapakapngganata (o niyawa ago so badan);

29

Na milapis so margn ko isa a margn:

30

Sii bo ko Kadnan ka sa alongan oto so khandodan!

31

(Skaniyan) Na da pangimbnar, go da zambayang!

32

Na ogaid na tomiyaplis, go tomiyalikhod!

33

Oriyan iyan na somiyong ko pagtaw niyan a zasagola!

34

So kabinasa a rk ka; na miyakarani (hay miyongkir)!

35

Oriyan iyan na so kabinasa a rk ka, na miyakarani!

36

Ba aya tarima on o manosiya na imbagak sa kandaraynon?

37

Ba da mabaloy skaniyan a malmk a mani a pkhipantos?

38

Oriyan iyan na mimbaloy a rogo a mimbathik, na inadn o Allah go pithaong Iyan sa tarotop;

39

Na biyaloy Niyan skaniyan a ngganapa: mama ago babay.

40

Ba di giyoto i phakagaga sa kawyaga Niyan ko miyamatay?

Total Number of Verses: 31

1

Sabnar a somiyagad ko manosiya so wakto a pd ko masa, a da a mayto bo a kiyaaloy niyan.

2

Mataan! a Skami na inadn Ami so manosiya a phoon sa notfa a miyakazaozaog, ka an Ami katpngi skaniyan; na biyaloy Ami skaniyan a pphakan'g, a pphakaylay.

3

Mataan! a Skami na pinggonanao Ami skaniyan ko lalan: Na adn a miyanalamat, na adn a miyongkir.

4

Mataan! a Skami na pithiyagaran Ami so miyamangongkir sa manga rantay, go manga patong, go kadg.

5

Mataan! a so miphipiyapiya, na phamakainom siran ko inomn, a adn a saog iyan a Kafor,

6

Bowalan a pkhaynom skaniyan o manga oripn o Allah, pphamaka ondasn iran oto sa sadn sa phakaondasan iran on.

7

Ipthoman iran so paliyogat, go ikaalk iran so gawii a miyabaloy so karataan iyan a langkap (a giyoto so alongan a qiyamah);

8

Go pphakakn iran sa pangn'ngkn sii ko kapkhababayai rkaniyan so miskin, go so wata a ilo, go so bilanggo;

9

(Pitharo iran:) "Aya bo a kapphakakana mi rkano na makapantag ko balas o Allah: Da a singanin ami rkano a balas, odi na panalamat;

10

"Mataan! a skami na ipkhalk ami phoon ko Kadnan ami so gawii a marimng, a mitataralo."

11

Na phakalidasn siran o Allah ko karata angkoto a gawii, go mbgan Iyan siran sa kataid, go kapipiya ginawa;

12

Go imbalas Iyan kiran sabap ko kiyaphantang iran, so sorga, go (nditarn a) sotra,

13

Gii siran roo zasandasandang ko manga kantir; da a khagdam iran roo a (kayaw) o alongan, go da a matnggaw;

14

Go miyadayondong kiran so manga along roo, go pphamangitaliyadok so manga onga on a pawnotonot,

15

Go iphlibt kiran so manga pananagoay a pirak, go manga baso a ropaan a manga batowintan,

16

Manga batowintan a pirak, a diniyangka iran oto sa samporna a diyangka,

17

Go pphakainom on siran roo sa inomn a aya saog iyan na Zanjabil;

18

Bowalan roo a pmbthowan sa Salsabila;

19

Na gii siran nggagayanan o manga tatap a manga kangodaan; na igira a inilaing ka siran, na aya tarima aka kiran na manga montiya a misasamborak;

20

Go igira a miyailaing ka na ron ka khaylay so limo go kadato a lbi a mala;

21

Khindiditar siran sa manga nditarn a sotra a manipis a gadong, go sotra a makapal; go phangimowan siran sa manga salnda a pirak, go phakainomn siran o Kadnan iran sa inomn a phakasoti:

22

(Ptharoon kiran a) "Mataan! a giyaya na miyabaloy a balas rkano, go miyabaloy so amal iyo a tiyarima."

23

Mataan! a Skami na Skami na initoron Ami rka so Qor'an sa katoron (a miyakazosokli);

24

Na thigr ka makapantag ko kokoman o Kadnan ka, go ding ka pagonoti so pd kiran, a baradosa odi na miyongkir.

25

Go tatadming ka so ngaran o Kadnan ka ko kapitapita, go so kagabigabi;

26

Go so sabaad ko kagagawii na pzojiod ka Rkaniyan; go phoroporo on ka Skaniyan ko kagagawii sa malayat.

27

Mataan! a siran aya na pkhababayaan iran so matag sagad, na ipmbagak iran so kasasangoran iran a gawii a mapnd.

28

Skami na inadn Ami siran, go pimbaibaitan Ami so taong iran. Na amay ka kabaya Ami na somambi Kami sa manga lagid iran sa samporna a kasambi.

29

Mataan! a giyaya na pananadm: Na sa taw a khabaya na mbaal sa lalan sii ko Kadnan iyan.

30

Na da a kapaar iyo inonta o miyog so Allah. Mataan! a so Allah na Tatap a Matao, a Mawngangn.

31

Phakasoldn Iyan so taw a kabaya Iyan sii ko limo Iyan. Na so manga darowaka na pithiyagaran Iyan siran sa siksa a malipds.

Total Number of Verses: 50

1

Ibt ko pphamanogo on, a dii makathondotondog,

2

Go so pphamanambr sa mabands,

3

Go so pphamayapat (ko oran) sa samporna a kapamayapat,

4

Go so gii makazsnggaya sa samporna a kasnggai,

5

Go so pphamamgay sa pananadm (a manga malaikat).

6

Kapamokas sa kataksilan, odi na kapamakaiktiyar,

7

Mataan! a so diyandi rkano (a mapnggolawla ko alongan a qiyamah) na phakatana dn.

8

Na amay ka so manga bitoon na mapadng,

9

Go amay ka so langit na mabnsad,

10

Go amay ka so manga palaw na mamangikayambr.

11

Go amay ka so manga sogo na limodn ko wakto a mappnto,

12

Antonaa i alongan a tiyaalik?

13

Sii ko alongan a kokoman.

14

Na antonaa i miyakandao rka o antonaa i alongan a kokoman?

15

Kabinasa sa alongan oto, a bagian o piyamakambokhag iran aya!

16

Ba Ami da binasaa so miyangaoona?

17

Oriyan iyan na ipthondog Ami kiran so miyangaoori

18

Lagid oto man a ikhidia Mi ko manga baradosa.

19

Kabinasa sa alongan oto, a bagian o miyamanaplis!

20

Ba Ami skano da adna a phoon sa ig a malmk?

21

Na tiyago Ami oto ko darpa a mapapalihara,

22

Taman ko diyangka a katawan,

23

Na pindidiyangka Ami. Na sayana Kami a mapiya a mindidiyangka!

24

Kabinasa ko alongan oto, a bagian o miyamanaplis!

25

Ba Ami da baloya so lopa a maka-aangkos,

26

Ko manga oyagoyag ago so miyamatay,

27

Go piyakabknan Ami oto sa manga palaw a manga poporo, go piyakaynom Ami skano sa ig a tabang?

28

Kabinasa sa alongan oto, a bagian o miyamanaplis!

29

(Ptharoon kiran:) "Song kano ko piyakambokhag iyo skaniyan!

30

"Song kano ko along a tlo sai -

31

"Di khasirongan, go di khirn ko kadg.

32

"Mataan aya! a ipphllbad iyan so manga kotokoto a apoy a datar o manga torogan.

33

"Lagid oba oto manga onta a manga bibinaning."

34

Kabinasa sa alongan oto, a bagian o miyamanaplis!

35

Giyaya so alongan a di siran makaptharo,

36

Go di kiran iphangonot, ka oba siran makapamitowa.

37

Sangat a siksa sa alongan oto, a bagian o miyamanaplis!

38

Giyaya so alongan a kokoman: Linimod Ami skano a rakhs o miyangaoona!

39

Na o adn a ikmat iyo, na ikmat Ako niyo!

40

Sangat a siksa sa alongan oto, a rk o miyamanaplis!

41

Mataan! a so miyamananggila, na sii ko khikasisirongan ago manga bowalan,

42

Ago manga onga, a pd ko pkhababayaan iran.

43

(Ptharoon kiran:) "Kang kano, go inom kano sa kapipiya ginawa sabap ko pinggolawla niyo (a mapiya)."

44

Mataan! a Skami na lagid oto man a kambalasi Ami ko miphipiyapiya.

45

Sangat a siksa sa alongan oto, a rk o miyamanaplis!

46

Kang kano go khariyala kano sa di mathay. Mataan! a skano na manga sala.

47

Sangat a siksa sa alongan oto, a rk o miyamanaplis!

48

Na igira a pitharo kiran a: "(Zambayang kano sa) Pangalimbabaang kano! Na di siran phangalimbabaan."

49

Sangat a siksa sa alongan oto, a rk o piyakambokhag iran aya!

50

Na antonaa i tothol, ko oriyan angkai a Qor'an, i pharatiyayaan iran?

Part 30

Total Number of Verses: 40

1

Antonaa so gi iran pamagizai yan?

2

A tothol a mala,

3

A so siran na di siran on phagayonayon?

4

Na gnki ran, ka khatokawan iran bo!

5

Oriyan iyan, na sabnar a katokawan iran bo!

6

Ba Ami da baloya so lopa a miyadmpas?

7

Go so manga palaw a manga pask?

8

Go inadn Ami skano a nggaganapa,

9

Go biyaloy Ami so torog iyo a kadkha,

10

Go biyaloy Ami so gagawii a nditarn,

11

Go biyaloy Ami so dawndaw a ipphaningkawyagn;.

12

Go pimbalayan Ami so kaporoan iyo sa pito a manga babagr (a manga langit),

13

Go miyadn Kami sa palitaan a masindaw (a alongan),

14

Go piyakatoron Ami a phoon ko manga gabon so ig a madakl,

15

Ka an Ami mapakagmaw sa sabap rkaniyan so prpran ago mangngto,

16

A go manga pamomolan a milapilapis.

17

Mataan! a so alongan a kokoman na miyabaloy a wakto a kapthatalabokan,

18

Sii ko alongan a kaiyopa ko sanggakala, na makatalingoma kano a pizagorompong,

19

Go kalkaan so langit na mabaloy a manga paytaw,

20

Go mikayontong so manga palaw na mabaloy a lopapk.

21

Mataan! a so naraka Jahannam na aya btad iyan na mibbkn a ayan,

22

A khandodan o miyamangakowala,

23

Matatap siran on sa tanitiyasa;

24

Daa khataam iran on a pakadnggaw, go da a khaynom on,

25

A rowar ko phlikabo a ig go dana,

26

Balas a pindait (ko galbk iran a marata).

27

Mataan! a siran na aya btad iran na di iran ikhalk so itongan,

28

Go piyakambokhag iran so manga ayat Ami sa tanto a kapakambokhag.

29

Na langowan taman na inisorat Ami skaniyan ko daptar;

30

"Na taami niyo, ka da dn a ipagoman Ami rkano a rowar ko siksa."

31

Mataan! a adn a bagian o miyamananggila a darpa a kapakadaya,

32

A manga pamomolan, ago manga anggor,

33

Go manga raga a mrzarza,

34

Go tagoay sa inomn a tthbira.

35

Daa khan'g iran on a ilang go da a kabokhag;

36

Balas a phoon ko Kadnan ka, a pammgayan a tarotop, -

37

Kadnan o manga langit, ago so lopa, ago so nganin a pagltan a dowa nan, a Masalinggagaw; da a phakagaga kiran on mbitiyarai.

38

Sii ko alongan a tomindg so Roh ago so manga malaikat a zasaasaap, da a makaptharo kiran, a rowar sa idinan (o Allah a) Masalinggagaw, ago ptharo sa ontol.

39

Giyoto man so alongan a bnar; na sadn sa khabaya na mbaal sa darpa a khandodan sii ko Kadnan iyan.

40

Mataan! a Skami na piyakiiktiyaran Ami rkano so siksa a marani, sii ko alongan a kasandngan o taw so miyanggalbk o mbala a lima niyan, na matharo o miyongkir: "Hay oba ako bo mimbaloy a botha."

Total Number of Verses: 46

1

Ibt ko dii nggagandr tomkaw (a manga malaikat),

2

Go so pphamanonggos sa mananay,

3

Go so pphamanoron sa magaan,

4

Go so pphamangonakona,

5

Go so gii thatandingan ko sogoan (ka pagoyagn kano dn);

6

Sii ko alongan a thambtambg so phakatambg,

7

A matondog skaniyan o phakatondog.

8

So manga poso sa alongan oto na maalk,

9

So manga kaylay ron na makassnong.

10

Gi iran tharoon: "Ba mataan! a sktano na khikasoy tano dn ko asal a btad (a kawyagoyag)?"

11

"Ati apiya pn mabaloy tano a manga tolan a miyanga rorophod?"

12

Pitharo iran a: "Giyoto man na samawto na kapakakasoy a kalogi!"

13

Na giyoto na satiman bo a lalis,

14

Na samawto na siran na matago siran ko liyawaw o lopa (a manga oyagoyag).

15

Ino a miyakatalingoma rka so totholan ko Mosa?

16

Gowani a itawag rkaniyan o Kadnan iyan sii ko balintad a soti a giya Towa:

17

"Song ka ko Pir'awn, mataan! a skaniyan na miyangakowala,"

18

"Na tharoang ka: 'Ino khabaya ka a masoti ka?'

19

"Go manggonanao akn ska ko Kadnan ka, na makapananggila ka."

20

Na piyakiilay niyan on so tanda a mala.

21

Na piyakambokhag iyan go somiyangka,

22

Oriyan iyan na tomiyalikhod a gii nggagaan,

23

Na tominimo sa taw go piyakalangkap iyan,

24

Sa pitharo iyan: "Sakn i tohan iyo a maporo."

25

Na inidan'g on o Allah so siksa ko mori, ago so paganay.

26

Mataan! a adn a matatago saya a titho a thoma ko taw a maalkn (ko Allah).

27

Ba skano i margn a adnn, antawaa so langit? Pimbalay Niyan skaniyan:

28

Iniporo Iyan so kaporo Iyan go pithaong Iyan phiyapiya,

29

Go piyakalibotng Iyan so gagawii ron, go piyakaliwanag Iyan so dawndaw ron;

30

Go so lopa ko oriyan oto na kiyayat Iyan,

31

Piyakambowat Iyan on so ig rkaniyan, ago so manga pangn'ngkn on;

32

Go so manga palaw na piyamakabkn Iyan on,

33

Pagpr rkano ago so manga ayam iyo.

34

Na amay ka makatalingoma so khawlawla a mala,

35

Sii ko alongan a katadman o manosiya so pinggolawla niyan,

36

Go payagn so naraka Jahim ko phakaylay ron.

37

Na so pman so taw a miyangakowala,

38

Go miyatomo iyan so kawyagoyag sa doniya,

39

Na mataan! a so naraka Jahim na giyoto i darpa iyan.

40

Na so pman so miyalk sa kakhaadapa niyan ko Kadnan iyan, go pininggn iyan a ginawa niyan ko kabaya a ribat.

41

Na mataan! a so sorga na giyoto i darpa iyan.

42

Ipagiza iran rka so bangkit, o anday kaphakadongko iyan?

43

Na bang ka kiran oto kaphakisaboti?

44

Sii bo ko Kadnan ka so khadansalan iyan.

45

Mataan! a ska na matag ka phamakaiktiyar ko maalk Rkaniyan.

46

Lagid oba mataan a siran ko alongan a kasandngi iran on na da a minitarg iran (ko doniya) a rowar ko kagabigabi odi na so kapitapita!

Total Number of Verses: 42

1

Miyakarimng (so Nabi) go tomiyalikhod,

2

Sa kiyapakatalingoma on o bota (a si Abdollah Ibno Ommi Maktoom).

3

Na antawaa i kaphakitokawan iyan rka sa masikn a skaniyan na pzoti,

4

O di na phakindao na makanggay ron a gona so ndao?

5

Na so taw a mitharambisa,

6

Na ska na ayang ka gii zasagipaan,

7

A kna a ba rka khisndit a di niyan kapzoti.

8

Na so pman so miyakaoma rka a mananamar,

9

A skaniyan na maalkn (ko Allah),

10

Na ska na ikaririmorng ka.

11

Ding ka oto ppharomani, mataan aya! a pananadm,

12

Na sadn sa khabaya, na pananadmn iyan.

13

Matatago ko manga kitab a sslaan,

14

A ipoporo, a sosotin,

15

A minggolalan ko manga lima o manga panonorat,

16

A khisslaan a pphamangongonotan.

17

Pimorkaan so manosiya (a miyongkir)! Sayana a da a tadm iyan!

18

Antonaa shay' i pakapoon iyan, sa kiyaadna on o Allah.

19

Miyakapoon sa notfa, inadn Iyan go pindidiyangka Iyan,

20

Oriyan iyan na so lalan na libod Iyan on,

21

Oriyan iyan na inisabap Iyan a kiyapatay Niyan, na piyakikobor Iyan;

22

Oriyan iyan na amay ko kabaya Iyan na oyagn Iyan bo.

23

Sabnar, a da Niyan nggolalann so inisogo on (o Allah).

24

Na pamimikirana o manosiya so pangn'ngkn iyan:

25

A mataan! a Skami na inodod Ami so ig sa samporna a kawdod,

26

Oriyan iyan na piyakambabatkad Ami so lopa sa maroni a kambabatkad,

27

Na piyamakathoan Ami skaniyan sa prpran,

28

Go anggor, go llthaan,

29

Go zayton, go korma,

30

Go manga pamomolan a manga rarabong,

31

Go manga onga, go manga paotanotan:

32

Ka an iyo kanggonai ago so manga ayam iyo.

33

Na amay ko makatalingoma so lalis,

34

Sii ko alongan a palagoyan o taw so pagari niyan,

35

Go so ina iyan, ago so ama iyan,

36

Go so karoma niyan, go so manga wata iyan.

37

Oman i isa kiran sa alongan oto, na adn a btad a makattmbang on.

38

Adn a manga paras sa alongan oto a khisisigay,

39

Makakhakala, a mabababaya;

40

Go adn a manga paras sa alongan oto - a masasalapot a lopapk,

41

A kakokoloban sa malibotng:

42

Siran man na siran so miyamangongkir a manga baradosa.

Total Number of Verses: 29

1

Amay ka so alongan na kowaan sa sindaw,

2

Go amay ka so manga bitoon na manga oolog,

3

Go amay ka so manga palaw na mamangi kayontong,

4

Go amay ka so manga onta a mawgat na indaraynon,

5

Go amay ka so manga binatang na timoon,

6

Go amay ka so manga kalodan na pakakadgn,

7

Go amay ka so manga niyawa na itoon ko manga ganap iyan.

8

Go amay ka so bagowaraga a inilbng a oyagoyag na iiza,

9

O antonaa i dosa a sabap a inibono on;

10

Go amay ka so manga daptar (a siyoratan ko manga amal) na kayatn,

11

Go amay ka so langit na pokasn ko darpa iyan,

12

Go amay ka so naraka Jahim na pakazokhaya on,

13

Go amay ka so sorga na ipakarani (ko miyamananggila),

14

Na katokawan o ginawa so pithiyagar iyan.

15

Na pzapa Ako sa ibt ko (manga bitoon a) sombang somdp,

16

A pphamalalagoy a pphamangigaib,

17

Go so gagawii igira a phakalibotng,

18

Go so khapita igira a phakaliwanag.

19

Mataan! (a giya Qor'an aya) na titho a gii matharo o Sogo a sslaan,

20

Mabagr sii ko Khirk ko kapaar, a adn a pangkatan Iyan,

21

Pkhaonotan roo, a kasasanaan.

22

Na da ko bolayoka iyo (a Mohammad) iba pmbthanga.

23

Na sabnsabnar a miyailay niyan skaniyan (a Jibril) ko sindadan o kaylay sa poro a mapayag;

24

Go kna a ba niyan inipligt so katawan iyan ko da mapayag;

25

Go kna a ba aya katharo a shaytan a pradiyamn:

26

Na anda kano zong?

27

Daa salakaw saya a rowar sa pananadm a bagian o manga kaadn,

28

Sii ko taw a kabaya iyan rkano a kapakaontol iyan:

29

Na da a kapaar iyo, inonta sa kabaya o Allah, a Kadnan o manga kaadn.

Total Number of Verses: 19

1

Amay ka so langit na mangabbngkag,

2

Go amay ka so manga bitoon na mikayambr,

3

Go amay ka so manga kalodan na pakandadanonaan,

4

Go amay ka so manga kobor na pamaklidn,

5

Na katokawan o ginawa so piyakaona niyan ago so piyakaori niyan.

6

Hay manosiya! antonaa i miyakalimpang rka ko Kadnan ka, a Maginawa,

7

So miyadn rka, go mithaong rka phiyapiya, go mizokod rka?

8

Apiya antonaa bontal i kabaya Iyan na piyakimbontal Iyan rka.

9

Sabnar, a kna ka oongkirn iyo so kokoman!

10

A mataan! a titho a adn a khisisiyap rkano (a manga malaikat),

11

A khisslaan, - a manga panonorat:

12

A katawan iran so gii niyo nggolawlaan.

13

Mataan! a so miyamaratiyaya, na khatago dn ko pakadarandang.

14

Na mataan! a so manga baradosa na khatago dn ko naraka Jahim;

15

Phamakasold siran on ko alongan a kapamalas,

16

Na di siran on mamakaawa.

17

Na antawaa i miyakandao rka o antonaa i alongan a kapamalas?

18

Oriyan iyan, na antawaa i miyakandao rka o antonaa i alongan a kapamalas?

19

So alongan a da a mapkhapaar o isa a ginawa ko isa a ginawa a mayto bo: Ka so kokoman sa alongan oto, na rk o Allah.

Total Number of Verses: 36

1

Sangat a siksa a bagian o manga palilimpang:

2

Siran na igira a miyakipagasad siran ko manga manosiya na pphakitarotop siran,

3

Na igira a piyagasadan iran siran odi na pithimbangan iran siran na pphangorang siran.

4

Ba di tatangkda o siran oto a mataan! a siran na pagoyagn siran,

5

Sii ko alongan a lbi a mala:

6

A so alongan a kapakatindg o manga manosiya sa hadapan o Kadnan o manga kaadn?

7

Gnki ran, ka mataan! a so kitab o manga baradosa na khatago dn ko Sijjin, -

8

Na antawaa i miyakandao rka o antonaa i Sijjin?

9

Kitab a sosoratan.

10

Sangat a siksa sa alongan oto a bagian o miyamangongkir,

11

Siran na oongkirn iran so alongan a kapamalas.

12

Na da a phagongkir on a rowar ko oman i malawani, a baradosa!

13

Igira a pphangadian on so manga ayat Ami na gii niyan tharoon a: "Manga iringa a manga kabokhag o miyangaoona!"

14

Sabnar, a kna ka mithaab ko manga poso iran so pinggalbk iran (a dosa)!

15

Sabnar, a mataan! a siran sa alongan oto na kharnding siran dn ko Kadnan iran:

16

Oriyan iyan na mataan! a siran na makasold siran dn ko naraka Jahim;

17

Oriyan iyan na tharoon (kiran) a: "Giyaya so inongkir iyo skaniyan."

18

Sabnar, a mataan! a so kitab o miyamaratiyaya na khatago dn ko Illiyon,

19

Na antawaa i miyakandao rka o antonaa i Illiyon? -

20

Kitab a sosoratan,

21

Zasaksi an oto o manga rarani (ko Allah).

22

Mataan! a so miyamaratiyaya na khatago dn ko pakadarandang;

23

Sii ko manga kantir, a gii siran mbabantabantay,

24

Masasarinong ka ko manga paras iran so sigay o kadarandang;

25

Pphamakainomn siran ko soti a arak, a paparkatn:

26

Aya parkat iyan na kastori na makapantag saya na pamagarabaya so pphamagarabaya (ko kapangongonotan ko Allah)

27

Go sasaogan oto sa Tasnim:

28

Bowalan, a phaginomn oto o manga rarani (ko Allah).

29

Mataan! a so manga baradosa na aya btad iran na gi iran ikhakala so miyamaratiyaya (sii sa doniya),

30

Go igira a siyagadan iran siran na gii siran khkrata;

31

Go igira a miyakandod siran ko manga taalok kiran, na makandod siran a pkhababaya siran;

32

Go igira a miyailay ran siran, na tharoon iran: "Mataan! a siran aya na titho a miyangadadadag,"

33

A kna a ba siran siyogo a khisisiyap kiran.

34

Na sa alongan aya na siran a miyamaratiyaya na ikhakala iran so manga kapir:

35

Sii siran ko manga kantir, gii siran mbabantabantay.

36

Ino minibalas ko manga kapir so pinggolawla iran?

Total Number of Verses: 25

1

Amay ka so langit na manga bbnsad,

2

Go mangonot ko Kadnan iyan, ka miyapatot on,

3

Go amay ka so lopa na pakawladn,

4

Go iyawa iyan so nganin a madadalm on, na kadaan sa tago,

5

Go mangonot ko Kadnan iyan, ka miyapatot on!

6

Hay manosiya, mataan! a ska na pananagontaman sa taman sa kitmo ko Kadnan ka sa samporna a panagontaman, ka mipmbaratmowa aka Skaniyan.

7

Na sadn sa mibgay ron so daptar iyan sii ko kawanan iyan,

8

Na mapamagitong dn sa itongan a malbod,

9

Go makandod ko manga tonganay niyan a mabababaya!

10

Na so pman so midawag on so daptar iyan sii ko tampar ko likod iyan.

11

Na migoraok iyan dn so kabinasa,

12

Go makasold ko kadg.

13

Mataan! a skaniyan na so katatago iyan (sa doniya) ko manga tonganay niyan na mabababaya.

14

Mataan aya! a aya tangkap iyan on na di dn phakandod (ko Kadnan iyan).

15

Oway na, mataan! a so Kadnan iyan; na tatap a phagilayn Iyan!

16

Na pzapa Ako sa ibt ko pamorawag a mariga,

17

Ago so gagawii, go so nganin a miyatigans iyan,

18

Go so olan igira a mimbiring,

19

Ka pphakasakat kano dn ko sapangkat phoon ko sapangkat.

20

Na antonaa i makaarn kiran sa di iran kapharatiyaya,

21

Go igira a biyatiya kiran so Qor'an na di siran phangalimbabaan?

22

Kna, ka siran a da pamaratiyaya, na gi iran pakambokhagn (so Qor'an).

23

Na so Allah i lbi a Matao ko pag-unsn iran.

24

Na pamanotholang ka kiran so siksa a malipds,

25

Ogaid na so siran a miyamaratiyaya, go pinggalbk iran so manga pipiya: Na adn a bagian iran a balas a di khaompas.

Total Number of Verses: 22

1

Ibt ko langit, a katatagoan sa manga darpa o manga bitoon,

2

Go so alongan a didiyandiin (a so alongan a qiyamah),

3

Go so saksi, ago so pzaksian;

4

Pimorkaan so khimangark ko kakar,

5

A apoy a tatagoan sa itagon,

6

Gowani a siran na moontod siran ko obay niyan,

7

A siran na mbabantayan iran so ipkhidia iran ko miyamaratiyaya.

8

Na da a inikagowad iran kiran a rowar sa kapaparatiyaya a iran ko Allah, a Mabagr, a Diyaitan o podi,

9

So Khirk ko kapaar ko manga langit ago so lopa. Na so Allah i Saksi ko langowan taman.

10

Mataan! a siran a sominiksa ko miyamaratiyaya, a manga mama ago miyamaratiyaya a manga babay, oriyan iyan na da siran thawbat, na bagian iran so siksa ko naraka Jahannam, go bagian iran so siksa a phakatotong.

11

Mataan! a so siran a miyamaratiyaya, go pinggalbk iran so manga pipiya, na adn a bagian iran a manga sorga a pphamangondas ko kababaan iyan so manga lawasayg: Giyoto man so daag a mala.

12

Mataan! a so siksa o Kadnan ka na titho a maylot.

13

Mataan! a Skaniyan na Skaniyan i pphanagipoon mangadn, go ppharoman mangadn;

14

Go skaniyan so Manapi, a Malai-gagaw,

15

A Khirk ko aras, a sslaan,

16

A inggogolalan Iyan so nganin a kabaya Iyan.

17

Ino a miyakatalingoma rka so totholan ko manga tantara,

18

A so Pir'awn ago so pagtaw a Samod?

19

Kna, ka siran a da pamaratiyaya na zisii ko kaoongkir!

20

Na so Allah, na katatangkalan Iyan so mbalabala kiran!

21

Kna, ka skaniyan so Qor'an a sslaan,

22

A madadalm ko Lawh Mahfod.

Total Number of Verses: 17

1

Ibt ko langit, ago so bitoon a Tariq,

2

Na antawaa i miyakandao rka o antonaa so bitoon a Tariq?

3

So bitoon a masindaw!

4

Daa baraniyawa a ba da a somisiyap on.

5

Na nggdagdaa o manosiya so kiyapakapoon o kiyaadna on!

6

Inadn a phoon ko ig a minipantos,

7

Phliyo a pphakapoon ko pagltan o bkhokong (o ama) ago so manga gosok (o ina).

8

Mataan! a Skaniyan na matatangkd a Gaos Iyan a kikasowin Iyan on (ko kawyagoyag)!

9

Sii ko alongan a payagn so piyamagma;

10

Na da a bagr iyan roo, go da a tabanga iyan.

11

Ibt ko kawang, a gii khasokasoyan (o oran),

12

Go so lopa a gii mbabatkad,

13

Ka mataan! (a giya Qor'an aya) na titho a katharo a miyakaznggaya (ko ontol ago so ribat):

14

Go kna a ba skaniyan kasandagan.

15

Mataan! a siran na pphagantangan siran sa totoo a antangan a marata,

16

Na pphagantangan Ako sa totoo a antangan.

17

Na pakaplagodang ka (ya Mohammad) so manga kapir: Pakaplagodang ka siran sa di mathay.

Total Number of Verses: 19

1

Phoroporo on ka so ngaran o Kadnan ka a Maporo,

2

A so Miyangadn, go Mithaong phiyapiya;

3

Go Skaniyan so Mindidiyangka na Minggonanao;

4

Go Skaniyan so piyakagmaw Niyan so pagpr,

5

Na biyaloy Niyan a rarag a maytm.

6

Phakibatiya Ami rka (ya Mohammad) na ding ka khalipatan,

7

Inonta sa kabaya o Allah: Mataan! a Skaniyan i Matao ko mapapayag ago so misosoln;

8

Go plbodn Ami rka so okit a malbod.

9

Na pamakatadm ka, amay ka phakanggay a gona so pananadm.

10

Phakatadm so taw a maalkn (ko Allah);

11

Na phakawatanan skaniyan o marata i okor,

12

A so phakasold ko apoy a mala;

13

Oriyan iyan na di roo phatay go di khawyag (sa kawyag a mapiya).

14

Sabnar a miyakadaag so taw a mizoti,

15

Go kiyatadman iyan so ngaran o Kadnan iyan, go mizambayang.

16

Kna, ka illbi niyo so kawyagoyag ko doniya;

17

A so akhirat i thomo ago kakal.

18

Mataan! a giyaya na titho a matatago ko manga kitab a miyaona,

19

A manga kitab o Ibrahim ago so Mosa.

Total Number of Verses: 26

1

Ino a miyakatalingoma rka so totholan ko khikolob?

2

Adn a manga paras, sa alongan oto, a khipakatitipadng,

3

A gomagalbk, a khidodokawan,

4

A phamakasold ko apoy a tanto a mayaw,

5

A phphamakainomn ko bowalan a plikabo.

6

Daa pangn'ngkn iran a rowar ko sorokn,

7

Di ipkhawlit, go di phakarn sa kaor.

8

Adn a manga paras, sa alongan oto, a madadarandang,

9

Sabap ko galbk iran na masosoat siran;

10

Sii ko sorga a maporo,

11

Daa khan'g iran on a ilang:

12

Katatagoan sa manga bowalan a pphamanoga;

13

Katatagoan sa manga kantir a manga poporo,

14

Go manga baso a khiaadirn,

15

Go manga olona a khiaantibn,

16

Go manga paramadali a khikakayatn.

17

Ba iran di pnggdagdaa so manga onta o andamanaya i kiyaadna on?

18

Go so langit o andamanaya i kiniporoon on?

19

Go so manga palaw o andamanaya i kiyapamakatindga on?

20

Go so lopa o andamanaya i kiyakayata on?

21

Na pamakain'ngka ka, a ska na matag pphamakain'ngka.

22

Kna a ba siran rka pakiphan'gln,

23

Ogaid na sadn sa tomalikhod go mongkir,

24

Na isiksa on o Allah so siksa a mala.

25

Mataan! a sii Rkami so khandodan iran;

26

Oriyan iyan na mataan! a sii Rkami so itongan kiran.

Total Number of Verses: 30

1

Ibt ko Fajr,

2

Go so manga gagawii a zasapolo,

3

Go so ganap ago so gansar,

4

Go so gagawii igira a khaypos (ka ziksaan dn so manga kapir);

5

Ba saya di matatago so kazapa ko adn a sabot iyan?

6

Bang ka da nggdagdaa so inikidiya o Kadnan ka ko (pagtaw a) Ad,

7

A so Iram, a manga poporo i tindg,

8

So da a miyaadn a lagid iran ko manga ingd?

9

Go so (pagtaw a) Samod, a so miyanonggirb siran ko manga dalama ko balintad?

10

Go so Pir'awn a adn a manga lutakan iyan?

11

A siran na miyamangakowala ko manga ingd;

12

Go piyakandakl iran roo so kapaminasa.

13

Na piyakatoronan siran o Kadnan ka sa mbarambarang a maylot a siksa:

14

Mataan! a so Kadnan ka na titho a tomitilik.

15

Na so pman so manosiya, na amay ka tiniyoba skaniyan o Kadnan iyan ka bigan Iyan sa mnang, go inikalimo Iyan, na tharoon iyan a: "So Kadnan ko na bigan ako niyan sa mnang."

16

Na amay ka tiniyoba Iyan, ka piyakasimpitan Iyan ko pagpr Iyan, na tharoon Iyan a: "So Kadnan ko na piyakarondan ako Niyan!"

17

Sabnar, a kna, ka di niyo phoporongan so wata a ilo!

18

Go di niyo iphamiis so kapakakana ko miskin!

19

Go phagarabn iyo so paninggalan sa kaarab a kabosaw,

20

Go mababaya kano sa tamok sa kabaya a mitataralo.

21

Sabnar, a amay ka roptn so lopa, a maropropt,

22

Go makatalingoma so Kadnan ka, ago so manga malaikat a zizinnday;

23

Go miyoma sa alongan oto so naraka Jahannam, na sa alongan oto na phananadm so manosiya, na ay gona on o kapananadm?

24

Matharo iyan: "Aydaw, oba ako bo miyakapamakot sa rk o kawyagoyag akn!"

25

Na sii ko alongan oto, na da a makapaniksa ko siksa Iyan a isa bo!

26

Go da a makaphamatong ko kaphamatong Iyan a isa bo.

27

"Hay niyawa a thatana!

28

"Ndod ka ko Kadnan ka, a masosoat, a makasosoat!

29

"Na sold ka ko manga oripn ko!

30

"Go sold ka ko sorga Akn!

Total Number of Verses: 20

1

Pzapa Ako sa ibt ko ungkai a ingd (a Makkah),

2

A ska na mababaling sangkai a ingd,

3

Go so mimbawata ago so inimbawata,

4

Ka sabnsabnar a inadn Ami so manosiya sii ko karomasayan:

5

Ba niyan tatarimaa sa da dn a phakapaar on a isa bo?

6

Gii niyan tharoon a: Miyakaylang ako sa tamok a madakl!

7

Ba niyan tatarimaa sa da a miyakaylay ron a isa bo?

8

Ba Ami da snggay skaniyan sa dowa mata?

9

Go dila, go mbala a modol?

10

Go pinggonanao Ami skaniyan ko dowa a lalan?

11

Na ino niyan da panagontamani so mapigl,

12

Na antawaa i miyakandao rka o antonaa so mapigl?

13

So kapmaradika sa oripn,

14

O di na so kapakakana sii ko alongan a kaor,

15

Ko wata a ilo a madasg,

16

O di na so miskin a middkt ko botha;

17

Oriyan iyan na miyabaloy a pd ko siran a miyamaratiyaya, ago iniphipiisa iran so kaphantang go iniphipiisa iran so kapangalimo.

18

Na siran man i manga taw ko kawanan.

19

Na so siran a miyamangongkir ko manga ayat Ami, na siran i manga taw ko diwang;

20

A kakokoloban siran sa apoy.

Total Number of Verses: 15

1

Ibt ko alongan ago so sindaw niyan,

2

Go so olan igira a tiyondog iyan,

3

Go so dawndaw igira a piyayag iyan,

4

Go so gagawii igira a ipkholob iyan,

5

Go so langit, ago so Mimbalay ron,

6

Go so lopa ago so Komiyayat on,

7

Go so ginawa, ago so Mithaong on phiyapiya:

8

Na iniilaham Iyan on so kapmbaradosa niyan, ago so kaphangongonotan iyan;

9

Sabnar a miyakadaag so taw a siyoti niyan a ginawa niyan;

10

Go sabnar a kiyawiswisan so taw a diyadag iyan a ginawa niyan!

11

Piyakambokhag o (pagtaw a) Samod (so sogo kiran) sabap ko kiyapangakowala iran;

12

Gowani a mbakorot so lbi a darowaka kiran,

13

Na pitharo kiran o sogo o Allah: "(Botawani niyo) So onta o Allah, go so kaphaginom iyan!"

14

Na piyakambokhag iran skaniyan, na biyono iran oto, na bininasa siran o Kadnan iran sabap ko dosa iran, na piyakaprarampata Iyan siran,

15

Go di Niyan ikhalk so kiyabolosan oto.

Total Number of Verses: 21

1

Ibt ko gagawii igira a pkhikolob (so kalibotng iyan),

2

Go so dawndaw igira a lominiwanag,

3

Go so miyadn ko mama, go so babay,

4

Ka mataan! a so galbk iyo na sabnar a mbidabida.

5

Na so pman so taw a miyammgay ago miyananggila,

6

Go tiyanto niyan so mapiya,

7

Na plbodn Ami ron a (kaparoliya niyan ko) malbod,

8

Na so pman so taw a miligt go mitharambisa,

9

Go piyakambokhag iyan so mapiya;

10

Na plbodn Ami ron a (kaakir iyan ko) margn.

11

Go di ron phakanggay a gona so tamok iyan amay ka mawlog (ko naraka).

12

Mataan! a sii Rkami so titho a toroan,

13

Go mataan! a Rkami so khawri, ago so paganay.

14

Na piyakiiktiyaran Ko rkano so apoy a pkhadg;

15

Daa phakasold on a rowar ko marata i okor,

16

A so tomiyaplis go tomiyalikhod.

17

Na phakawatan on so miyananggila (sa dosa).

18

A so pphammgay ko tamok iyan, ka an masoti;

19

Go kna a ba adn a rk o isa a taw a zisii rkaniyan a limo a mbalasan,

20

Ogaid na singanin ko kasosoat o Kadnan iyan a Maporo;

21

Na matatangkd a khasoat dn.

Total Number of Verses: 11

1

Ibt ko tnganayk,

2

Go so gagawii igira a lominibotng,

3

Ka da ka ndaraynonn o Kadnan ka (ya Mohammad) go da ka Niyan kararangiti;

4

Go matatangkd a so khawri na tomo rka a di so paganay;

5

Go matatangkd a mbgang ka dn o Kadnan ka na khasoat ka.

6

Ba ka Niyan da matoon a wata a ilo na piyakisiyap ka Niyan?

7

Go miyatoong ka Niyan a madadadag na pinggonanao ka Niyan,

8

Go miyatoon ka Niyan a miskin, na bigang ka Niyan sa kakawasaan.

9

Na so wata a ilo na ding ka phangarasii;

10

Go so pphamangni na ding ka phrarasnga;

11

Go so limo o Kadnan ka na pphamanotholang ka!

Total Number of Verses: 8

1

Ba Ami da pakaloaga rka so rarb ka (ya Mohammad)?

2

Go piyokas Ami rka so mapnd ka?

3

A so minipnd ko likod ka,

4

Go iniporo Ami rka so tadm rka?

5

Na mataan! a khatondog so margn, a malbod,

6

Mataan! a khatondog so margn, a malbod.

7

Na igira miyakapasad ka, na nggalbk ka pman,

8

Go sii ka bo ko Kadnan ka pphangangarapan

Total Number of Verses: 8

1

Ibt ko Tin ago so Zayton,

2

Go so palaw a Torisina,

3

Go giya ungkai a ingd a (Makkah a) panarigan,

4

Ka sabnsabnar a inadn Ami so manosiya sii ko lbi a mapiya a bontal,

5

Oriyan iyan na pakakasowin Ami skaniyan ko lbi a mababa ko manga bababa,

6

Inonta so miyamaratiyaya, go pinggalbk iran so manga pipiya: Ka adn a bagian iran a balas a di pthaman.

7

Na antawaa i maphakiongkir iyan rka ko oriyan aya, so kokoman?

8

Ba di so Allah i lbi a Maontol i kokoman ko manga kokoman?

Total Number of Verses: 19

1

Pangadi ka: Sii ko ngaran o Kadnan ka a so Miyangadn;

2

Inadn Iyan so manga manosiya, phoon ko manga rogo a mimbathik.

3

Pangadi ka: Ka so Kadnan ka na lbi a Maginawa, -

4

So miyangndao ko (kisoratn ko) pansom,

5

Inindao Niyan ko manosiya so di Niyan katawan.

6

Sabnar a mataan! a so manosiya na phangakowala dn,

7

Ko kiyailaya niyan sa miyakatharambisa.

8

Mataan! a sii bo ko Kadnan ka i khandodan.

9

Ay gda aka ko skaniyan a pzapar,

10

Ko oripn (o Allah) igira a mizambayang?

11

Ay gda aka amay ka skaniyan na zisii ko toroan,

12

O di na inisogo iyan so kapananggila?

13

Ay gda aka amay ka (so pphanapar na) tomiyaplis go tomiyalikhod?

14

Ba niyan di katawi a mataan! a so Allah na phagilayn Iyan?

15

Gnki niyan, ka mataan a odi niyan gnki, na gandrn Ami dn ko tandongan,

16

(Khirk ko) Tandongan, a bokhag, a baradosa;

17

Na tawaga niyan i salinggogoya iyan!

18

Ka tawagn Ami so khisisiyap ko naraka!

19

Sabnar! a ding ka pagonoti skaniyan, go sojiod ka, go pakarani ka (ko Kadnan ka).

Total Number of Verses: 5

1

Mataan! a Skami na initoron Ami (a Qor'an aya) sii ko gagawii a sslaan.

2

Na antawaa i miyakandao rka o antonaa so gagawii a sslaan?

3

So gagawii a sslaan na thomo a di so sanggibo a olanolan.

4

Pthoron roo so manga malaikat, ago so Roh, sabap sa idin o Kadnan iran, makapantag ko oman i sogoan:

5

Kalilintad skaniyan taman ko kasbang o Fajr!

Total Number of Verses: 8

1

Da ko btad o siran a da pamaratiyaya a pd ko tiyoronan ko kitab, ago so manga pananakoto oba siran miyamagkar taman sa kiyapakatalingoma kiran o marayag a karina:

2

Sogo a phoon ko Allah, a makapphangadi ko manga kitab a manga soti:

3

Khisosoratan oto sa (kokoman a) ontol.

4

Na da makazsnggaya so siran a piyamgan ko kitab inonta ko oriyan o kiyapakatalingoma kiran o marayag a karina.

5

A da a inisogo kiran a rowar sa kapzoasoata iran ko Allah, a totolabosn iran on, so okit ko kapagintaw, a zasalimbotawan siran, ago so kipamayandgn iran ko sambayang, go so katonaya iran ko zakat: Giyoto man i okit a ontol.

6

Mataan! a so siran a da pamaratiyaya a pd ko tiyoronan ko kitab, ago so manga pananakoto, na sii ko apoy ko naraka Jahannam, makakakal siran on. Siran man i miyakaratarata ko manga kaadn.

7

Mataan! a so siran a miyamaratiyaya, go pinggalbk iran so manga pipiya, na siran man na siran i miyakapiyapiya ko manga kaadn.

8

Adn a balas kiran sii ko Kadnan iran a manga sorga a tatap, a pphamangondas ko kababaan iyan so manga lawasayg, makakakal siran on, sa dayon sa dayon. Miyasoat kiran so Allah na khasoat siran on (mambo). Giyoto man na bagian o taw a inikalk iyan so Kadnan iyan.

Total Number of Verses: 8

1

Amay ka ilinog ko lopa so iplinog on,

2

Go pakaliyon o lopa so khippnd on,

3

Go matharo o manosiya a: Antona ini?

4

Sa alongan oto na panotholn iyan so manga tothol rkaniyan:

5

Sabap sa mataan! a so Kadnan ka na ipagilaham Iyan on oto.

6

Sa alongan oto na mamakaliyo so manga manosiya a mbidabida, ka phakiilay kiran so (balas o) manga galbk iran.

7

Na sadn sa nggolawla sa timbang bo o kolpong a mapiya, na khaylay niyan oto;

8

Go sadn sa nggolawla sa timbang bo o ssrm a marata, na khaylay niyan oto!

Total Number of Verses: 11

1

Ibt ko (manga koda a) pphlolompat a gii makazowara,

2

Go pphamangapoyan sa kalamaging,

3

Go pphamanibowa ko khapita.

4

Go miyamakakayambr siran roo sa bayank,

5

Go minilmbak iran oto ko kaoorongan (ko ridoay);

6

Mataan! a so manosiya sii ko makapantag ko Kadnan iyan na titho a da a tadm iyan;

7

Go mataan! a Skaniyan sa makapantag roo i titho a saksi;

8

Go mataan! a skaniyan makapantag ko kabaya ko tamok na tonganay a minitaralo.

9

Ba niyan di katawi, - a amay ka pakaliyon so zisii ko manga kobor,

10

Go payagn so zisii ko manga rarb?

11

Mataan! a so Kadnan iran sa alongan oto i titho a Kaip kiran.

Total Number of Verses: 11

1

So phakatktk!

2

Antonaa so phakatktk?

3

Na antawaa i miyakandao rka o antonaa so phakatktk?

4

Alongan a mabaloy so manga manosiya a makairing sa manga paroparo a masosolapak,

5

Go mabaloy so manga palaw a makairing ko bombol a riyodot.

6

Na sadn sa taw a makapnd so manga timbang iyan,

7

Na skaniyan na matago ko kawyagoyag a makasosoat.

8

Na so pman so taw a makakhap so manga timbang iyan,

9

Na aya darpa iyan na so naraka Hawiya.

10

Na antawaa i miyakandao rka o antona oto?

11

Apoy a miyakayawiyaw!

Total Number of Verses: 8

1

Miyakatmbang rkano so kapamagindiga sa kadakl,

2

Taman sa makasongkano ko manga kobor.

3

Na gnki niyo, ka khatokawan iyo dn!

4

Oriyan iyan na gnki niyo, ka khatokawan iyo dn!

5

Sabnar, a o katokawi niyo sa katao a matatangkd!

6

Na mataan a maylay niyo dn so naraka Jahim!

7

Oriyan iyan, na mataan a maylay niyo dn oto sa kaylay a matatangkd!

8

Oriyan iyan, na mataan a khiiza rkano dn sa alongan oto so manga limo (rkano)!

Total Number of Verses: 3

1

Ibt ko masa,

2

Ka mataan! a so manga manosiya na matatago dn ko kalogi,

3

Inonta so miyamaratiyaya, go pinggalbk iran so manga pipiya, go inipamagosiyata iran so bnar, go inipamagosiyata iran so kaphantang.

Total Number of Verses: 9

1

Sangat a siksa, a rk o oman i taliyantaan, a makasodi,

2

A so miyanimo sa tamok na miyataman on magitong,

3

Tatarimaan iyan sa mataan! a so tamok iyan na miyabaloy niyan skaniyan a kakal!

4

Gnki niyan oto, mataan a phozangn dn ko makaropt;

5

Na antawaa i miyakandao rka o antonaa so makaropt?

6

So apoy o Allah, a pakakakadgn,

7

So pzokhayaw ko manga poso:

8

Mataan aya! a sii kiran mikolob,

9

Sii ko manga pask a manga rarawa

Total Number of Verses: 5

1

Bang ka da katokawi so inikidiya o Kadnan ka ko khimangark ko gadiya?

2

Ba Niyan da tagoa so antangan iran a marata sii ko kalogi?

3

Go biyotawanan Iyan siran sa manga papanok a khirrngkap.

4

A pphangolog kiran sa ator a phoon ko lipaw a kiyomba;

5

Na biyaloy Niyan siran a miyakairing ko pr a kiyan (a old)?

Total Number of Verses: 4

1

Makapantag ko kiyasinanad o manga Qoraysh,

2

So kiyasinanad iran ko kathotogalin ko kapann'nggaw niyan ago so kakhakayaw niyan,

3

Na zoasoata iran so Kadnan angkai a Baytollah,

4

So migay kiran sa pangn'ngkn phoon ko kaor, go miyakasarig kiran phoon ko kalk.

Total Number of Verses: 7

1

Ino kiyatokawan ka so gii niyan pakambokhagn so balas (ko akhirat)?

2

Na giyoto man so pphanaromag ko wata a ilo,

3

Go di niyan iphamintal so kapakakana ko miskin.

4

Na sangat a siksa a rk o manga barasambayang,

5

A so siran na so sambayang iran na pakalilipatan iran,

6

So siran na makiilaylayn siran,

7

Go uurnn iran so kakhapiyaan

Total Number of Verses: 3

1

Mataan! a Skami na inibgay Ami rka (hay Mohammad) so madakl (a mapiya)

2

Na zambayang ka makapantag ko Kadnan ka, go khorbang ka .

3

Mataan! a so pkhararangit rka na skaniyan i da a tondas iyan.

Total Number of Verses: 6

1

Tharoang ka (hay Mohammad): Hay manga kafir!

2

Kna a ba akn dii zoasoata so gii niyo zoasoatn;

3

Go da rkano i ba niyo dii zoasoata so gii akn zoasoatn:

4

Go da rakn i ba ko pzoasoata so pizoasoat iyo,

5

Go da rkano i ba niyo pzoasoata so gii akn zoasoatn.

6

Rk iyo so okit iyo ko kapagintaw, na rk akn so okit akn ko kapagintaw.

Total Number of Verses: 3

1

Igira a miyakatalingoma so tabang o Allah, ago so daag,

2

Go maylaing ka so manga manosiya a pphamanold ko agama o Allah, a ndadakdakl,

3

Na pthasbik ka a rakhs o podi ko Kadnan ka, go pangni ka On sa maap: Mataan! a Skaniyan na Tatap a Pphanarima ko tawbat.

Total Number of Verses: 5

1

Miyailang so dowa a tangan o Abilahab, go miyailang (skaniyan)!

2

Dawn makanggay a gona so tamok iyan, ago so miyasokat iyan!

3

Phakasold dn ko apoy a pzokhayaw!

4

Go so karoma niyan a maawid sa itagon,

5

Kiyatagoan so lig iyan sa tali a phamkl!

Total Number of Verses: 4

1

Tharoang ka: Skaniyan so Allah, a Isaysa!

2

So Allah a pphangangaronganan!

3

Da mbawata, go da mbawataan,

4

Go da a miyaadn a saginda Niyan a isa bo.

Total Number of Verses: 5

1

Tharoang ka a: Mlindong ako ko Kadnan o khapita,

2

Phoon ko karataan o nganin a inadn Iyan,

3

Go so karataan o gagawii igira a miyakalibotng,

4

Go so karataan o pphamangiyop ko manga palot,

5

Go so karataan o makasiig igira a miyaniig.

Total Number of Verses: 6

1

Tharoang ka a: Mlindong ako ko Kadnan o manga manosiya,

2

A Phapaar ko manga manosiya,

3

A Tohan o manga manosiya,

4

Phoon ko karataan o pphangonsi, a pphanoosook,

5

So pphangonsi ko manga rarb o manga manosiya,

6

A pd ko manga jinn, ago so manga manosiya