Compare up to three translations verse by verse.
And olsun batmaqda olan ulduza!
And olsun batmaqda olan ulduza!
Batmaqda olan ulduza (Sürəyya ulduzuna) and olsun ki,
Yoldaşınız (Muhamməd) nə azmış, nə də sapmışdır.
Sizin yoldaşınız nə haqdan azmış, nə də yoldan çıxmışdır.
Sizin yoldaşınız (Muhəmməd əleyhissəlam) nə haqq yoldan sapmış, nə də azmışdır!
O, havadan (istədiyini) danışmaz.
O, öz istəyi ilə danışmır.
O, kefi istəyəni (havadan) danışmır.
Bu (Quran), ona nazil edilən bir vəhydir.
Bu, ona təlqin edilən bir vəhydir.
Bu, ancaq (Allah dərgahından) nazil olan bir vəhydir.
Bunu ona çox qüvvətli olan öyrətdi –
Bunu ona çox qüvvətli olan öyrətdi –
Onu (Muhəmməd əleyhissəlama) çox qüvvətli olan (Cəbrail) öyrətdi.
gözəl görünüşlü (Cəbrail). O, yüksəlib (Peyğəmbərə öz surətində göründü).
gözəl görünüşlü Cəbrail. O, yüksəlib öz surətində göründü.
O qüvvət (ağıl və gözəllik) sahibi (Peyğəmbər əleyhissəlama öz həqiqi şəklində) göründü.
O (Cəbrail), ən uca üfüqdə idi.
O, ən uca üfüqdə idi.
O (Cəbrail) ən uca üfüqdə (günəşin çıxdığı yerdə) idi.
Sonra (Muhammədə) yaxınlaşıb aşağı endi.
Sonra Muhəmmədə yaxınlaşıb aşağı endi.
Sonra (Cəbrail Muhəmməd əleyhissəlama) yaxınlaşdı və aşağı endi.
(Cəbrail ilə Muhamməd arasındakı məsafə) iki yay qədər yaxud ondan da yaxın (məsafə) oldu.
O, iki yay uzunluğunda, hətta ondan da yaxın məsafədə idi.
(Onların arasındakı məsafə) iki yay uzunluğunda, bəlkə, ondan da yaxın oldu.
(Sonra Allah) quluna (Muhammədə) nazil edəcəyini vəhy etdi.
Sonra Allah Öz quluna nazil edəcəyini vəhy etdi.
Sonra (Cəbrail Allahın Öz) bəndəsinə (Mühəmmədə) vəhy buyurduğunu vəhy etdi.
Qəlb (Peyğəmbərin qəlbi) gördüyünü (Cəbraili iki gözü ilə görməsini) yalan saymadı.
Peyğəmbərin qəlbi gördüyünü yalan saymadı.
Qəlb (Peyğəmbərin qəlbi) gördüyünü yalan saymadı. (Muhəmməd əleyhissəlam gözü ilə gördüyünün Cəbrail olduğuna qəlbdən inandı).
(Ey Müşriklər!) Siz onunla gördüyü şey barəsində mübahisəmi edirsiniz?
İndi siz onunla gördüyü şey barəsində mübahisəmi edirsiniz?
Siz onunla gördüyü barəsində mübahisəmi edirsiniz?
(Muhamməd) Onu (Cəbraili) bir daha (isra gecəsi öz sürətində) enərkən gördü –
Onu bir daha öz sürətində enərkən gördü –
And olsun ki, (Muhəmməd əleyhiissəlam Cəbraili öz həqiqi surətində) başqa bir dəfə də (me’rac vaxtı) görmüşdü;
(Yeddinci səmadakı) Sidrətül-müntəhanın yanında.
son həddəki Sidr ağacının yanında.
(Yeddinci göydəki) Sidrətül-müntəhanın yanında.
Onun yanında Məva cənnəti vardır.
Məva bağı da onun yanındadır.
(Mələklər, şəhidlər və müttəqilər məskəni olan) Mə’va cənnəti onun yanındadır.
O zaman Sidrə ağacını bürüyən bürümüşdü.
O zaman Sidr ağacını bürüyən bürümüşdü.
O zaman Sidrəni nələr bürümüşdü, nələr!
Göz (Peyğəmbərin gözü sağa-sola) yayınmadı və həddi aşmadı.
Peyğəmbərin gözü yayınmadı və həddi aşmadı.
Göz nə (sağa-sola) yayındı, nə də uzağa getdi (hər şeyi olduğu kimi gördü).
O, Rəbbinin ən böyük dəlillərindən bəzisini gördü.
O, öz Rəbbinin ən böyük dəlillərindən bəzisini gördü.
And olsun ki, (Peyğəmbər) öz Rəbbininən böyük qüdrət nişanələrindən (mö’cüzələrindən) bir qismini (Beytül-mə’muru, Sidrətül-müntəhanı, Cənnəti, Cəhənnəmi, Rəfrəfi, altı yüz qanadı olan Cəbrailin həqiqi surətini və i. a.) gördü.
(Ey müşriklər!) Lat və Uzzanı gördünüzmü?
Siz tapındığınız Lat və Uzzanı gördünüzmü?
(Ey müşriklər!) Bir deyin görək (sizin ibadət etdiyiniz) Lat və Uzza nəyə qadirdilər?!
Digər üçüncü olan Mənatı da?
Həmçinin üçüncü olan Mənatı da?
Digər üçüncü (büt) olan Mənat da həmçinin?!
Məgər oğlanlar sizin, qızlar Onundur (Allahındır)?!
Məgər oğlanlar sizin, qızlar Onundurmu?
Məgər oğlanlar sizin, (bəyənmədiyiniz) qızlar Onundurmu?! (Allahındırmı)?!
Onda bu, ədalətsiz bir bölgüdür!
Onda bu ədalətsiz bölgü olardı!
Elə isə bu ədalətsiz bölgüdür!
Bunlar (bütlər) sizin və atalarınızın qoyduqları adlardan başqa bir şey deyildir. Allah onlar haqqında heç bir dəlil nazil etməmişdir. Onlar (müşriklər) yalnız zənnə və nəfslərinin istəklərinə uyarlar. Halbuki Rəbbindən onlara doğru yolu göstərən rəhbər (Quran və Peyğəmbər) gəlmişdir.
Onlar sizin və atalarınızın qoyduqları adlardan başqa bir şey deyildir. Allah onlar haqqında heç bir dəlil nazil etməmişdir. Onlar yalnız zənnə və nəfslərinin istəklərinə uyarlar. Halbuki Rəbbindən onlara doğru yolu göstərən rəhbər artıq gəlmişdir.
Onlar (bütlər) sizin atalarınızın (özlərindən uydurub) qoyduqları adlardan başqa heç bir şey deyildir! (Onların yalnız quru adı var, heç bir şeyə qadir deyillər). Allah onlara (ibadət edilməsinə) dair heç bir dəlil endirməmişdir. Onlar (müşriklər) yalnız zənnə və nəfslərindən gələn istəklərə uyarlar. Halbuki Rəbbindən onlara haqq yolu göstərən rəhbər (Qur’an və Peyğəmbər) gəlmişdir.
Yoxsa insan üçün istədiyi şey (bütlərin onun üçün Allah yanında şəfaətçi olması) vardır?
Yoxsa insan üçün istədiyi hər şey hazırlanmışdır?
Yoxsa insan istədiyi hər şeyə nail ola bilər?! (Xeyr, bu mümkün deyildir. Müşriklərin çox istəməsinə baxmayaraq, bütlər onlar üçün Allah dərgahında heç bir şəfaət edə bilməzlər).
Axirət də, dünya da Allahındır.
Axirət də, dünya da Allahındır.
Axirətdə, dünya da ancaq Allahındır!
Göylərdə neçə-neçə mələk var ki, onların şəfaəti Allahın istədiyi və razı qaldığı kimsədən başqa (heç kəsə) heç bir fayda verməz.
Göylərdə neçə-neçə mələklər vardır ki, onların şəfaəti Allahın istədiyi və Özünün razı qaldığı kimsələrdən başqa heç kəsə heç bir fayda verməz.
Göylərdə neçə-neçə mələklər vardır ki, onların şəfaəti heç bir fayda verməz. Ancaq Allah Öz istədiyi və razı olduğu kimsəyə (mələyə, yaxud mö’minə) izin verdikdən sonra (onun şəfaəti fayda verər).
Axirətə inanmayanlar mələkləri (onların Allahın qızları olduğunu etiqad edərək) qadın adları ilə adlandırırlar.
Axirətə inanmayanlar, həqiqətən də, mələklərə qadın adları verirlər.
Həqiqətən, axirətə inanmayanlar mələklərə (onların Allahın qızları olduğunu iddia edərək) qadın adları verirlər.
Onların buna dair heç bir elmi yoxdur. Onlar yalnız zənnə qapılırlar. Zənn isə əsla həqiqət ola bilməz.
Halbuki buna dair heç bir bilgiləri yoxdur. Sadəcə olaraq zənnə qapılırlar. Zənn isə əsla həqiqət ola bilməz.
Onlar buna dair heç bir şey bilmir, yalnız zənnə qapılırlar. Zənn isə əsla həqiqət ola bilməz!
(Ey Peyğəmbər!) Zikrimizdən (Qurandan) üz çevirib dünya həyatından başqa bir şey istəməyənlərdən üz döndər!
Sən də Bizim Zikrimizi rədd edib dünya həyatından başqa bir şey istəməyənlərdən üzünü yana çevir!
Artıq (ya Peyğəmbər!) Bizim Qur’anımızdan üz çevirib dünya həyatından başqa bir şey istəməyənlərdən üz döndər!
Onların elmdən payı elə o qədərdir. Şübhəsiz ki, Rəbbin Onun yolundan azanı da, doğru yolda olanıda yaxşı bilir.
Onların bilik səviyyəsi budur. Şübhəsiz ki, sənin Rəbbin Onun yolundan azanı da, doğru yolla gedəni də yaxşı tanıyır.
Onların bildiyi elə bu qədərdir. Şübhəsiz ki, sənin Rəbbin haqq yoldan azanı da, doğru yolda olanı da ən gözəl tanıyandır!
Göylərdə və yerdə nə varsa, (hamısı) Allaha məxsusdur. (Bu, Allahın) pislik edənlərə əməllərinin cəzasını verməsi, yaxşılıq edənləri isə ən gözəli ilə (Cənnətlə) mükafatlandırması üçündür.
Göylərdə və yerdə nə varsa, Allahındır. Bu, Allahın pislik edənlərə əməllərinin cəzasını verməsi, yaxşılıq edənləri isə ən gözəli ilə (Cənnətlə) mükafatlandırması üçündür.
Göylərdə və yerdə nə varsa, (hamısı) Allahındır. O, pislik edənlərə əməllərinin cəzasını verəcək, yaxşılıq edənləri isə ən gözəl mükafatla mükafatlandıracaqdır!
Onlar kiçik günahlar müstəsna olmaqla, böyük günahlardan və çirkin əməllərdən (şirkdən və zinadan) çəkinirlər. Həqiqətən, sənin Rəbbin geniş məğfirət sahibidir. O, sizi torpaqdan yaradanda da, siz analarınızın bətnində ruşeym halında olanda da sizi yaxşı tanıyırdı. Özünüzü təmizə çıxartmayın! O, kimin (Allahdan) qorxduğunu yaxşı bilir.
Onlar kiçik günahlar istisna olmaqla, böyük günahlardan və iyrənc əməllərdən çəkinirlər. Həqiqətən, sənin Rəbbin geniş məğfirət sahibidir. O, sizi torpaqdan yaradanda da, siz analarınızın bətnində rüşeym halında olanda da sizi yaxşı tanıyırdı. Özünüzü təmizə çıxartmayın! Çünki O, kimin Allahdan qorxduğunu yaxşı bilir.
(O yaxşılıq edənlər ki) kiçik günahlar (xətalar) istisna olmaqla, böyük günahlardan və rəzil işlərdən (zinadan) çəkinərlər. Həqiqətən, sənin Rəbbin çox bağışlayandır. Sizi torpaqdan yaradan da, siz analarınızın bətnlərində rüşeym halında olanda da sizi ən gözəl tanıyan Odur. Özünüzü təmizə çıxartmayın. O, Allahdan qorxub pis əməllərdən çəkinənin kim olduğunu ən gözəl biləndir!
(Ey Peyğəmbər!) Üz çevirəni (Valid bin Muğiranı) gördünmü,
Gördünmü üz çevirəni,
(Ya Peyğəmbər!) İndi gördünmü (imandan) dönəni,
(malından) azacıq verib (sonra) paxıllıq edəni?
malından azacıq verib sonra heç verməyəni?
Bir az (pul, mal) verib (qalanına) xəsislik göstərəni?
Məgər qeyb elmi onun yanındadır, o da (bunu) görür?
Məgər o, qeybi bilirmi ki, bunu görsün?
Məgər o, qeybi bilirmi ki, (öz dostunun əzabına yüklənə biləcəyini) görsün?! (Müşriklərdən Vəlid ibn Müğirə islama meyl göstərmişdi. Bunu eşidən digər bir müşrik onu babalarının dinindən üz döndərməkdə ittiham edərək möhkəm danlamış və demişdi ki, əgər Müğirə ona müəyyən məbləğ pul, mal versə və islamı atıb öz dininə qayıtsa, o, axirətdə Müğirənin əzabını öz üzərinə götürəcəkdir. Müğirə islamdan üz döndərmiş, lakin xəsislik göstərib həmin şəxsə və’d etdiyi məbləğin hamısını deyil, bir qismini vermişdi).
Yoxsa Musanın səhifələrindəkilər ona xəbər verilmədi?
Yoxsa Musanın səhifələrində olanlar barədə ona xəbər verilmədi?
Yoxsa ona Musanın səhifələrindən olanlar xəbər verilmədi?!
Vəfalı olan İbrahimin (səhifələrindəkilər ona xəbər verilmədi?)
Məgər vəfalı olan İbrahimin səhifələrində olanlar barədə ona bildirilmədi?
Və (əhdə) çox vəfalı olan (Allahın qarşısındakı borcunu layiqincə ödəyən) İbrahimin (sühüfündəkilər bildirilmədi?!)
(O səhifələrində deyilənlərdən bəziləri bunlardır:) “Heç bir günahkar başqasının günahını daşımaz.
Heç bir günahkar başqasının günah yükünü daşımaz.
(Tövratda və İbrahimin səhifələrində deyilənlər bunlardır:) “Heç bir günahkar başqasının günahına yüklənməz!
İnsan üçün yalnız öz əməlinin əvəzi vardır.
İnsan can atdığı şeyə nail olar.
İnsana ancaq öz zəhməti (sə’yi, çalışması, əməli) qalar!
Şübhəsiz ki, onun əməli (Qiyamət günü) görünəcəkdir.
Əlbəttə, onun can atdığı əməl ona nəsib olacaqdır.
Şübhəsiz ki, (qiyamət günü) onun zəhməti (sə’yi, əməli) görünəcəkdir!
Sonra da ona (əməlinin) əvəzi tam veriləcəkdir!”
Sonra da ona bunun əvəzi tam veriləcəkdir!”
Sonra da ona (zəhmətinin, əməlinin) tam əvəzi veriləcəkdir!”
Son dönüş Rəbbinədir.
Son dönüş sənin Rəbbinədir.
Həqiqətən, axır dönüş sənin Rəbbinədir!
Güldürən də, ağladan da Odur!
Güldürən də, ağladan da Odur!
Güldürən də, ağladan da Odur!
Öldürən də, dirildən də Odur!
Öldürən də, dirildən də Odur!
Öldürən də, dirildən də Odur!
O, (insanlardan və heyvanlardan) biri erkək və biri dişi olmaqla iki cüt yaratdı.
O, insanlardan və heyvanlardan biri erkək və bir də dişi olmaqla iki cüt yaratdı –
(İnsanlardan və heyvanlardan ibarət) iki cifti (hər bir cütü) erkək və dişi olaraq yaradan Odur –
Axıdılan bir (damla) nütfədən.
axıdılan bir nütfədən.
(Bir qərtə) nütfədən (o, ata belindən analığa) axıb tökülərkən.
Təkrar diriltmək də Ona aiddir.
Təkrar diriltmək də Ona aiddir.
(Ölüləri) yenidən diriltmək də Ona aiddir!
Zəngin edən də, kasıb edən də Odur.
Dövlətli edən də, kasıb edən də Odur.
(İstədiyini) dövlətli də edən, kasıb da edən Odur!
Şiranın (müşriklərin ibadət etdiyi şira ulduzunun) da Rəbbi Odur.
Şiranın da Rəbbi Odur.
Şi’ranın (Şi’ra ulduzunun) da Rəbbi Odur!
O, əvvəlki Adı (Ad qövmünü) məhv etdi.
O, əvvəlki Ad tayfasını məhv etdi.
Əvvəlki (ilkin) Adı (Ad qövmünü) O məhv etdi.
Səmudu da (məhv edib onlardan heç kəsi sağ) buraxmadı.
Səmudu da məhv edib onlardan heç kəsi sağ buraxmadı.
Səmudu da həmçinin! Və (onlardan heç kəsi sağ) buraxmadı.
Daha öncə Nuh qövmünü də (məhv etdi), çünki onlar daha zalım və daha azğın kimsələr idi.
Daha öncə Nuh qövmünü də məhv etdi, çünki onlar daha zalım, daha azğın kimsələr idi.
Daha əvvəl Nuh qövmünü (məhv etdi), çünki onlar daha zalım, daha azğın kimsələr idi.
Mötəfikənin də (Lut qövmünün yurdu da) altını üstünə O çevirdi.
Alt-üst olmuş kəndləri də O viran qoydu.
(Lut qövmünün yurdu) Mö’təfikənin də altını üstünə O çevirdi (qaldırıb yerə vurdu).
Onların başına gətirdiyini gətirdi.
Onların başına gətirdiyini gətirdi.
Onları nələr sardı, nələr! (Başlarına nə müsibətlər gəldi!)
(Ey insan!) Rəbbinin hansı nemətlərinə şübhə edirsən?
Sən öz Rəbbinin hansı nemətlərinə şübhə edirsən?
(Ey insan!) Sən öz Rəbbinin hansı ne’mətlərinə şəkk edirsən?!
Bu (Muhamməd) də öncəki peyğəmbərlər kimi (Allahın əzabı ilə) qorxudan bir peyğəmbərdir.
Bu da əvvəlki xəbərdarlıq edib qorxudanlar kimi bir qorxudandır.
Bu (Muhəmməd əleyhissəlam) da əvvəlki peyğəmbərlər kimi (insanları Allahın əzabı ilə) qorxudan bir peyğəmbərdir!
Yaxınlaşan (Qiyamət günü) yaxınlaşdı.
Yaxınlaşan (Qiyamət günü) yaxınlaşdı.
(Ey insanlar!) Yaxınlaşam (qiyamət) yaxınlaşdı.
Allahdan başqa heç kəs onun qarşısını ala bilməz! (Və ya: Allahdan başqa heç kəs onun vaqe olacaq vaxtı bilməz!)
Allahdan başqa heç kəs onun qarşısını ala bilməz.
Onu Allahdan başqa heç kəs dəf edə bilməz! (Və ya: onun dəqiq vaxtını Allahdan başqa heç kəs bilməz!)
Yoxsa siz bu sözə (Qurana) təəccübmü edirsiniz?!
Siz bu Sözə təəccüblənirsiniz,
İndi siz bu kəlama (Qur’ana) təəccübmü edirsiniz?
(Ona istehza edərək) gülürsünüz, (oradakı öyüd-nəsihəti eşitdikdə) ağlamırsınız!
gülürsünüz, heç ağlamırsınız,
Həm də gülürsünüz, heç ağlamırsınız!
Və qəflət içində oynayıb əylənirsiniz (ona diqqət yetirmirsiniz)!
və oynayıb əylənirsiniz?
Siz (qəflət içində) oynayır-əylənirsiniz (ona e’tina etmirsiniz).
Allah üçün səcdəyə qapanın və (Ona) ibadət edin!
Siz Allaha səcdə qılın və Ona ibadət edin!
(Ey insanlar!) Gəlin Allaha səcdə edin, (Allaha) ibadət edin! (Ondan başqasına itaət etməyin!)