Al-'Adiyat — Urdu Translation

بِسْمِ ٱللَّهِ ٱلرَّحْمَٰنِ ٱلرَّحِيمِ وَٱلْعَٰدِيَٰتِ ضَبْحًۭا ﴿1﴾

(میدانِ جہاد میں) تیز دوڑنے والے گھوڑوں کی قَسم جو ہانپتے ہیں،

فَٱلْمُورِيَٰتِ قَدْحًۭا ﴿2﴾

پھر جو پتھروں پر سُم مار کر چنگاریاں نکالتے ہیں،

فَٱلْمُغِيرَٰتِ صُبْحًۭا ﴿3﴾

پھر جو صبح ہوتے ہی (دشمن پر) اچانک حملہ کر ڈالتے ہیں،

فَأَثَرْنَ بِهِۦ نَقْعًۭا ﴿4﴾

پھر وہ اس (حملے والی) جگہ سے گرد و غبار اڑاتے ہیں،

فَوَسَطْنَ بِهِۦ جَمْعًا ﴿5﴾

پھر وہ اسی وقت (دشمن کے) لشکر میں گھس جاتے ہیں،

إِنَّ ٱلْإِنسَٰنَ لِرَبِّهِۦ لَكَنُودٌۭ ﴿6﴾

بیشک انسان اپنے رب کا بڑا ہی ناشکرا ہے،

وَإِنَّهُۥ عَلَىٰ ذَٰلِكَ لَشَهِيدٌۭ ﴿7﴾

اور یقیناً وہ اس (ناشکری) پر خود گواہ ہے،

وَإِنَّهُۥ لِحُبِّ ٱلْخَيْرِ لَشَدِيدٌ ﴿8﴾

اور بیشک وہ مال کی محبت میں بہت سخت ہے،

۞ أَفَلَا يَعْلَمُ إِذَا بُعْثِرَ مَا فِى ٱلْقُبُورِ ﴿9﴾

تو کیا اسے معلوم نہیں جب وہ (مُردے) اٹھائے جائیں گے جو قبروں میں ہیں،

وَحُصِّلَ مَا فِى ٱلصُّدُورِ ﴿10﴾

اور (راز) ظاہر کر دیئے جائیں گے جو سینوں میں ہیں،

إِنَّ رَبَّهُم بِهِمْ يَوْمَئِذٍۢ لَّخَبِيرٌۢ ﴿11﴾

بیشک ان کا رب اس دن ان (کے اعمال) سے خوب خبردار ہوگا،